Һеч елә олубму ки, сиз дә нә вахтса Мүгәддәс Китабы охумаг истәмисиниз, лакин бу кими сәбәбләр уҹбатындан фикриниздән дашынмысыныз? Чохлары үчүн бу китабы охумаг чәтин ҝөрүнүр. Бәс билирсиниз ки, Аллаһын Кәламыны охумагла һәјатыныза хошбәхтлик вә мәна гата биләрсиниз? Хәбәриниз вар ки, Мүгәддәс Китабы охумағы мараглы едән бәзи үсуллар вар?

Бу суаллара ҹаваб тапмаг үчүн ҝәлин Аллаһын Кәламыны охумағын хејрини ҝөрән бәзи инсанларын дедији сөзләрә диггәт јетирәк.

20 јашлы Језекијел дејир: «Әввәлләр мән машыны мәгсәдсиз сүрән сүрүҹү кими идим. Лакин Мүгәддәс Китабы охумағын сајәсиндә һәјатымда мәна тапдым. Бу китабда һәр ҝүнүмүз үчүн фајдалы мәсләһәтләр вар».

Фрејда адлы 20 јашлы диҝәр бир ҝәнҹ бөлүшүр: «Әввәлләр өзүмдән тез чыхырдым. Лакин Мүгәддәс Китабы охумаг мәнә тәмкинли олмаға көмәк етди. Инди башгалары илә јола ҝетмәк мәним үчүн даһа асандыр, чохлу достум вар».

50 јашы олан Јунәс адлы гадын дејир: «Аллаһын Кәламы мәнә даһа јахшы инсан олмаға вә пис вәрдишләрими тәрҝитмәјә көмәк етди».

Ады чәкилән бу инсанларын вә милјонларла диҝәр инсанын һадисәси ҝөстәрир ки, Аллаһын Кәламы сизә хошбәхт олмаға көмәк едә биләр (Әшија 48:17, 18). Мәсәлән, Аллаһын Кәламыны охумаг сизә дүзҝүн гәрарлар вермәјә, әсл достлар тапмаға, стрессин өһдәсиндән ҝәлмәјә, ән әсасы исә, Аллаһы јахындан танымаға көмәк едә биләр. Мүгәддәс Китабын ичиндә јазыланлар Аллаһын сөзләридир, буна ҝөрә орада јазыланларын сизә һеч вахт зијаны дәјмәз. Аллаһ-Таала һеч вахт пис мәсләһәт вермәз.

Әсас мәсәлә охумаға башламагдыр. Бәс неҹә едә биләрсиниз ки, Мүгәддәс Китабы охумаг сизә асан вә мараглы олсун?

Аллаһын Кәламыны севә-севә охумаг вә ондан там фајда әлдә етмәк үчүн нә едә биләрсиниз? Ашағыда сынагдан кечмиш беш мәсләһәт ҝәтирилиб.

Раһат шәраит јарадын. Чалышын сакит бир јердә охујасыныз. Диггәти јајындыран шејләр нә гәдәр аз олса, фикринизи охудуғунуза бир о гәдәр чох ҹәмләјә биләҹәксиниз. Диггәт јетирин ки, охудуғунуз јер ишыглы вә һавасы тәмиз олсун. Бу, охудугларынызы гаврамаға көмәк едәҹәк.

Дүзҝүн нијјәтлә охујун. Мүгәддәс Китаб Јараданын Өз өвладларына ҝөндәрдији намәдир. Әҝәр сизин ушагтәк өјрәнмәк һәвәсиниз олса, Мүгәддәс Китабы охумаг сизә даһа чох фајда ҝәтирәҹәк. Јох әҝәр сиз Мүгәддәс Китаб һагда гәрәзли фикирдәсинизсә, чалышын бу фикирләри кәнара гојасыныз. Әкс һалда, Аллаһдан өјрәнмәк фүрсәтини итирә биләрсиниз (Зәбур 25:4).

Охумаздан өнҹә дуа един. Мүгәддәс Китаб Аллаһдан назил олуб. Она ҝөрә дә ону баша дүшмәјимиз үчүн Аллаһын көмәјинә еһтијаҹымыз вар. Аллаһ-Таала сөз вериб ки, Ондан көмәк истәјәнләрә Өз руһундан верәҹәк (Лука 11:13). Аллаһын мүгәддәс руһу сизә Онун сөзләрини баша дүшмәјә көмәк едәҹәк. Вахт өтдүкҹә исә Мүгәддәс Китабын һәтта дәрин сирләрини дә дәрк едәҹәксиниз (1 Коринфлиләрә 2:10).

Охудугларынызы баша дүшмәјә чалышын. Бу китабы садәҹә охумаг хатиринә охумајын. Охудугларынызы ҝөтүр-гој един. Өзүнүзә белә суаллар верин: «Һаггында охудуғум инсанын һансы хүсусијјәтләри вар? Ондан нә өјрәнә биләрәм?»

Мәгсәдјөнлү шәкилдә охујун. Мүгәддәс Китабы охумагдан там фајда әлдә етмәк истәјирсинизсә, мәгсәд гојун ки, орадан һәјатыныз үчүн лазым олаҹаг нәсә тапасыныз. Мәсәлән, бу кими мәгсәдләр гоја биләрсиниз: «Мән Аллаһы даһа јахшы танымаг истәјирәм», «Мән јахшы инсан, јахшы һәјат јолдашы олмаг истәјирәм». Сонра Мүгәддәс Китабдан сизә бу саһәләрдә көмәк едәҹәк һиссәләри охујунa.

Бу беш мәсләһәт сизә Мүгәддәс Китабы охумаға башламаға көмәк едәҹәк. Бәс неҹә едә биләрсиниз ки, бу китабы охумаг сизин үчүн мараглы олсун? Нөвбәти мәгаләдә бәзи үсуллар ҝөстәрилир.

Бу китабы охумаг мараглыдыр, јохса дарыхдырыҹы? Һәр шеј сизин ону неҹә охумағыныздан асылыдыр. Ҝәлин ҝөрәк Мүгәддәс Китабы охумағы мараглы етмәк үчүн нә етмәк олар.

Етибарлы вә мүасир тәрҹүмә сечин. Әҝәр охудуғунуз Мүгәддәс Китаб чәтин баша дүшүләндирсә вә ја билмәдијиниз сөзләрлә долудурса, онда ону охумаг сизин үчүн ҹансыхыҹы олаҹаг. Буна ҝөрә дә чалышын раһат баша дүшүлән, ејни заманда дәгиг тәрҹүмә олунмуш Мүгәддәс Китабы охујасынызa.

Мүасир технолоҝијадан истифадә един. Бизим дөврүмүздә Мүгәддәс Китаб нәинки чап формада, һәмчинин електрон форматда да мөвҹуддур. Сиз Мүгәддәс Китабын бәзи тәрҹүмәләрини онлајн шәкилдә охуја биләрсиниз. Бу китабы һәмчинин компүтеринизә, планшетинизә вә ја телефонунуза јүкләјә биләрсиниз. Мүгәддәс Китабын бәзи тәрҹүмәләриндә елә имканлар вар ки, онларын васитәсилә охудуғунуз ајәләрлә әлагәли олан диҝәр ајәләри тапа биләрсиниз. Охудуғунуз ајәләри һәмчинин диҝәр тәрҹүмәләрлә дә мүгајисә едә биләрсиниз. Охумагдан чох динләмәји севәнләр Мүгәддәс Китабын бир чох дилләрдә олан аудио форматыны јүкләјә биләрләр. Әксәр инсанлар иҹтимаи нәглијјатда ҝедәркән вә гулаг асмаға имкан верән диҝәр ишләрлә мәшғул оларкән Мүгәддәс Китабын гираәтинә гулаг асырлар. Сиз дә өз вәзијјәтинизә ујғун үсул сечә биләрсиниз.

Әлавә вәсаитләрдән истифадә един. Арашдырма апармаг үчүн олан вәсаитләрин көмәји илә сиз охудугларыныздан там фајда әлдә едәҹәксиниз. Бу вәсаитләрдән бири Мүгәддәс Китабда ады чәкилән өлкәләрин хәритәләридир. Онларын васитәсилә охудуғунуз һадисәнин һарада баш вердијини өјрәнә вә мәлуматы даһа јахшы баша дүшә биләрсиниз. Бундан башга, нәшрләримиздәки, һәмчинин jw.org сајтынын «Мүгәддәс Јазыларын тәлимләри» бөлмәсиндәки мәгаләләр сизә Мүгәддәс Китаб ајәләринин мәнасыны анламаға көмәк едә биләр.

Мүхтәлиф үсулларла охујун. Мүгәддәс Китабы башдан сона доғру сыра илә охумаг сизин үчүн дарыхдырыҹы ҝәлирсә, охумаға сизә мараглы олан һиссәдән башлаја биләрсиниз. Әҝәр сиз Мүгәддәс Китабда ады чәкилмиш һансыса инсан һаггында әтрафлы мәлумат алмаг истәјирсинизсә, онда онун барәсиндә олан фәсилләри охујун. «Мүгәддәс Китабын дәринлијинә варын. Бу мөмин инсанлары јахындан таныјын» чәрчивәсиндә буна даир нүмунәләр вар. Һәмчинин Мүгәддәс Китабы мөвзу үзрә вә ја хроноложи ардыҹыллыгла охумаг олар. Истәдијиниз үсулу сечә биләрсиниз.

Мүгәддәс Китаб ади китаб дејил. Орада Јараданын ләтиф кәлмәләри јазылыб (2 Тимутијә 3:16). Бу китабда јазылан ајәләр инсанын үрәјинин дәринлијинә нүфуз едир. Мүгәддәс Китабын бир ајәсиндә дејилир: «Аллаһын сөзү ҹанлы вә гүдрәтлидир» (Ибраниләрә 4:12). Бу китаб бизә һәјатын ән ваҹиб саһәләриндә көмәк етмәјә гадирдир: һәр вахт дүзҝүн гәрар гәбул етмәк үчүн бизә јол ҝөстәрир; Аллаһ вә Онун вәдләри һаггында елм верир (1 Тимутијә 4:8; Јагуб 4:8).

Һәјатымызы индидән јахшылыға доғру дәјишир. Мүгәддәс Китабда һәтта шәхси мәсәләләрә аид һикмәтли мәсләһәтләр вар. Мәсәлән, ашағыдакы саһәләрдә:

• Инсанларла мүнасибәтдә (Ефеслиләрә 4:31, 32; 5:22, 25, 28, 33).

• Емосионал вә физики сағламлыг мәсәләләриндә (Зәбур 37:8; Мәсәлләр 17:22).

• Әхлаг мәсәләсиндә (1 Коринфлиләрә 6:9, 10).

• Пул мәсәләсиндә (Мәсәлләр 10:4; 28:19; Ефеслиләрә 4:28)a.

Асија гитәсиндән олан бир ҹаван аилә Мүгәддәс Китабда јазылан мәсләһәтләрин хејрини өз һәјатында ҝөрүб. Һәр бир јени аилә гуран ҹүтлүк кими, онлар үчүн дә бир-биринә ујғунлашмаг, ачыг сөһбәт етмәк әввәл-әввәл чәтин иди. Анҹаг сонра онлар Мүгәддәс Китабдан охудугларына әмәл етмәјә башладылар. Бунун һансы хејри олду? Аиләнин башчысы, Висент дејир: «Мүгәддәс Китабдан охудугларым аиләмиздәки проблемләри меһрибанчылыгла јолуна гојмаға көмәк етди. Аллаһын Кәламында јазыланлара ујғун јашадығымыз үчүн аиләмиз чох хошбәхтдир». Онун һәјат јолдашы Аналу да әринин сөзләринә шәрикдир: «Мүгәддәс Китабда ады чәкилән мөмин инсанларын давранышы бизә чох көмәк едиб. Инди чох хошбәхтәм вә аиләмдән, гојдуғумуз мәгсәдләримиздән разыјам».

Аллаһы јахындан танымаға көмәк едир. Висент Мүгәддәс Китабы охумағын фајдасыны диҝәр саһәләрдә дә ҝөрүб. О дејир: «Аллаһын Кәламыны охумаг мәни Јеһова Аллаһа даһа да јахынлашдырды». Онун бу сөзләри ваҹиб бир мәгамы вурғулајыр: Мүгәддәс Китаб сизә Аллаһы танымаға көмәк едәҹәк. Бу китабы охусаныз, фајдалы мәсләһәтләр әлдә етмәклә јанашы, Аллаһы бир дост кими даһа јахындан таныјаҹагсыныз. Ҝөрәҹәксиниз ки, Мүгәддәс Китабда ҝөзәл ҝәләҹәк һагда бәһс олунур. Һәмин вахт биз «әсил һәјат»ын нә демәк олдуғуну биләҹәк вә әбәди јашајаҹағыг (1 Тимутијә 6:19). Башга һеч бир китабда бу вәд һагда данышылмыр.

Әҝәр сиз дә Мүгәддәс Китабы охумаға башламысынызса, давам един. Бунун сајәсиндә сиз дә Аллаһы даһа јахындан таныјаҹаг вә хошбәхт олаҹагсыныз. Анҹаг Мүгәддәс Китабы охудугҹа сиздә суаллар јаранаҹаг. Онда 2000 ил бундан әввәл Аллаһын Кәламында јазылмыш һәбәшистанлы мәмурун һадисәси үзәриндә дүшүнүн. Онун Мүгәддәс Китабда јазыланларла бағлы чохлу суалы вар иди. Филип адлы бир нәфәр ондан охудугларыны баша дүшүб-дүшмәдијини сорушанда о, белә ҹаваб вермишди: «Изаһ едән олмаса, неҹә баша дүшә биләрәм?»b Һәбәшистанлы мәмур Мүгәддәс Китабы јахшы билән Филипин көмәјини гәбул етди (Һәвариләрин ишләри 8:30, 31, 34). Сиз дә Аллаһын Кәламыны өјрәнмәк истәјирсинизсә, тәклиф едирик jw.org сајтына дахил олуб бунунла бағлы истәјинизи ҝөндәрәсиниз вә ја бу журналда ҝәтирилән үнванлардан биринә јазасыныз. Бундан әлавә, сиз Јеһованын Шаһидләри илә әлагә сахлаја вә ја онларын ибадәт евинә ҝедә биләрсиниз. Мәсләһәт ҝөрүрүк ки, елә ҝүнү бу ҝүндән Мүгәддәс Китабы охујасыныз вә онун сизин һәјатынызы јахшылыға доғру дәјишдирмәсинә јол верәсиниз.