Кешиш килсәни нәјә ҝөрә тәрк етди?

Зәһмәт олмаса, ушаглығыныз барәдә бир аз данышын.

Мән 1943-ҹү илдә Италијада дүнјаја ҝөз ачмышам. Ушаглығым баҹы-гардашларымла бирликдә кичик бир кәнддә кечиб. Атам әкинчи иди, о һәм дә дүлҝәр ишләјирди. Валидејнләрим бизи диндар католик кими тәрбијә едирдиләр.

Нә үчүн кешиш олмаг истәдиниз?

Ушаг икән килсәјә ҝетмәји, кешиши динләмәји чох севирдим. Онларын сәсинә, данышыг габилијјәтинә валеһ идим, һәм дә килсәдәки тәмтәраглы ајинләр мәни һејран едирди. Она ҝөрә мән дә кешиш олмаг истәдим. 13 јашым оланда анам мәни интернат мәктәбинә гојду. Орада оғланлара ҝәләҹәкдә кешиш олмалары үчүн хүсуси тәлим кечирдиләр.

Орада охудуғунуз мүддәтдә Мүгәддәс Китабы арашдырырдыныз?

Әслиндә, јох. 15 јашым оланда бир мүәллим мәнә Инҹили, Исанын һәјатындан вә хидмәтиндән бәһс едән китабы верди. Мән бу китабы бир нечә дәфә охудум. 18 јашына чатанда Ромада папанын рәһбәрлији алтында фәалијјәт ҝөстәрән али тәһсил оҹагларында тәлим алмаға јолландым. Орада латын вә јунан дилләрини, һәмчинин тарих, фәлсәфә, психолоҝија вә илаһијјатшүнаслыг фәнләрини өјрәнирдим. Мүгәддәс Китабдан ајәләри әзбәрләјирдик, базар ҝүнү вәзләриндә Мүгәддәс Китаб парчалары уҹадан охунурду, амма бу китабы арашдырмырдыг.

Сиз сонрадан ректор олдунуз. Бәс дәрс дејирдиниз?

Әсасән инзибати ишләрлә мәшғул олсам да, дәрс дә дејирдим, мәсәлән, бәзи синифләрдә Икинҹи Ватикан Шурасынын фәрманлары һагда дәрс кечирдим.

Нә үчүн килсәјә шүбһә етмәјә башладыныз?

Мәни үч шеј нараһат едирди. Килсә актив шәкилдә сијасәтә гарышырды. Руһаниләрин дә, килсә үзвләринин дә налајиг һәрәкәтләринә ҝөз јумулурду. Бундан башга, католик килсәсинин мүәјјән тәлимләри мәнә мәнтигсиз ҝәлирди. Мисал үчүн, неҹә олур ки, инсанлары севән Аллаһ онлара өләндән сонра әбәдијјән ҹәза верир? Јахуд да, доғрудан да, әлимизә тәсбеһ алыб ејни дуаны ҝүндә јүз дәфәләрлә тәкрар етмәјимиз Аллаһа хошдур?a

Нә етдиниз?

Ҝөзүмдән јаш аха-аха Аллаһдан диләјирдим ки, мәнә јол ҝөстәрсин. Католик килсәсинин нәшр етдији вә италјанҹа тәзәҹә ишыг үзү ҝөрмүш «Јерусәлим Мүгәддәс Китабы»ны охумаға башладым. Бир дәфә базар ҝүнү сәһәр ибадәтдән сонра палтарларымы долаба асырдым ки, семинаријаја ики нәфәр ҝәлди. Онлар Јеһованын Шаһидләри иди. Биз бир саатдан чох Мүгәддәс Китаб һаггында вә орада һәгиги динин сәҹијјәви әламәтләри һагда сөһбәт еләдик.

Бу адамлар сизә һансы тәәссүраты бағышладылар?

Онларын әминликлә данышмасы вә католикләрин дәрҹ етдији Мүгәддәс Китабда ајәләри раһатҹа тапмасы мәни һејран етди. Сонра Марио адлы башга бир Јеһованын Шаһиди мәнә баш чәкди. О, чох сәбирли, пунктуал иди: истәр исти олсун, истәр јағыш, һәр шәнбә ҝүнү сәһәр саат доггузда Марио гапынын зәнҝини чалырды.

Диҝәр кешишләр онун ҝәлиши һагда һансы фикирдә идиләр?

Мән онлары бизим мүзакирәләрә гатылмаға һәмишә дәвәт едирдим, анҹаг онлардан һеч бири Мүгәддәс Китабын тәдгигинә ҹидди јанашмады. Мән исә әксинә, ләззәт алырдым. Узун илләр боју мәнә раһатлыг вермәјән суаллара, мәсәлән, нијә Аллаһ зүлмә-зилләтә дөзүр кими суаллара ҝөзәл ҹаваблар алырдым.

Јүксәк вәзифәли кешишләр сизә мане олмаға чалышырды?

1975-ҹи илдә мөвгејими изаһ етмәк үчүн бир нечә дәфә Ромаја сәфәр етдим. Орадакы јүксәк рүтбәли дин хадимләри мәни фикримдән дашындырмаға чалышырдылар, амма һеч биринин әлиндә Мүгәддәс Китаб јох иди. Нәһајәт, 1976-ҹи ил јанварын 9-да Ромаја мәктуб јазыб билдирдим ки, артыг өзүмү католик һесаб етмирәм. Бундан ики ҝүн сонра семинаријаны тәрк етдим, гатара миниб илк дәфә Јеһованын Шаһидләринин јығынҹаг ҝөрүшүнә јолландым. Сән демә бу, ади һәфтәлик ҝөрүш јох, бир нечә јығынҹағын иштиракы илә кечирилән топланты иди. Бу, өјрәшдијимдән фәргли, тамам башга бир дүнја иди! Һәр кәсин әлиндә Мүгәддәс Китаб вар иди, мәрузәчиләр мүхтәлиф мөвзуларла чыхыш етдикҹә онлары динләјәнләр Мүгәддәс Китаб ајәләрини ачырдылар.

Аиләниз бу гәрарыныз барәдә һансы фикирдә иди?

Гоһумларымын әксәријјәти мәнә гаршы чыхды. Сонра хәбәр тутдум ки, бир гардашым да Јеһованын Шаһидләри илә Мүгәддәс Китабы өјрәнир. О, Италијанын шималында, Ломбардија әјаләтиндә јашајырды. Ону ҝөрмәјә ҝетдим вә орада галдым. Орадакы гардашларын көмәклији илә ишә дүзәлдим, ев тапдым. Һеч бир ил кечмәмиш Јеһованын Шаһиди кими вәфтиз олундум.

Пешман дејилсиниз ки?

Гәтијјән! Нәһајәт, өзүмү Аллаһа јахын һисс едирәм. Чүнки Ону Мүгәддәс Китабдан таныјырам, фәлсәфәдән вә ја килсә ајинләриндән јох. Башгаларына да бу биликләри тәмиз үрәклә вә әминликлә өјрәдирәм.