Падшаһлыг мүждәчиләри һагда һесабат
О, һәјатын мәнасыны тапды
ИСА демишди: «Өз гојунларымы таныјырам» (Јәһја 10:14). Әҝәр инсанын ҝөзәл үрәји варса вә сүлһү, әдаләти севирсә, о, мүтләг Исанын давамчылары илә гаршылашаҹаг. Белә инсан Белчикада јашајан бир гадын кими һәјатын мәнасыны тапаҹаг. Бу гадынын һадисәси беләдир:
«Јеһованын Шаһидләри гапыны дөјән вахт дәрин депрессијадајдым вә интиһар етмәји дүшүнүрдүм. Шаһидләрин бу пис дүнјадакы проблемләрин һәлли барәдә дедији шејләр хошума ҝәлди. Амма биләндә ки, бунлары Аллаһ едәҹәк, бу хошума ҝәлмәди. Сәккиз ил әввәл килсәјә ҝетмәји дајандырмышдым. Чүнки орада икиүзлүлүк ҝөрмүшдүм. Амма Јеһованын Шаһидләри илә сөһбәт етдикҹә онларын дедикләринин һәгигәт олдуғуну ҝөрдүм вә баша дүшдүм ки, Аллаһсыз һәјат бош бир һәјатдыр.
Тәәссүф ки, Шаһидләрлә бир нечә дәфә ҝөрүшә билдик, сонра әлагәм итди. Өзүмү бәдбәхт һисс едирдим. Ҝүнә ики гуту сигарет чәкирдим. Сонра наркотикә гуршандым. Өлмүш бабамла әлагә јаратмаг истәјирдим. Буна ҝөрә дә ҹиндарлыгла марагланмаға башладым. Нәтиҹәдә, бир дәфә ҝеҹә тәк оланда ҹинләр мәнә һүҹум еләдиләр, чох горхмушдум. Бу, беләҹә ајларла давам еләди. Һәр ҝеҹә тәк галмаг фикри мәни горхудурду.
Бир ҝүн ҝәзинтијә чыхмышдым. Бу дәфә фәргли јердән јолуму салдым. Гаршыма бөјүк тикинти әразиси чыхды. Тикинтидә чохлу инсанын чалышдығыны ҝөрәндә тәәҹҹүбләндим. Әразијә јахынлашанда ҝөрдүм ки, Јеһованын Шаһидләри ибадәт еви тикир. Јеһованын Шаһидләринин евимдә мәнә баш чәкдикләри вахтлар јадыма дүшдү. Дүшүндүм, бүтүн дүнја бу инсанлар кими олса, нә јахшы оларды.
Шаһидләрин мәнимлә тәкрар сөһбәт етмәләрини чох истәјирдим. Буна ҝөрә дә ибадәт евиндә чалышан бир нечә Шаһидлә данышдым. Аллаһа дуа еләдим. Он ҝүндән сонра мәнә илк дәфә тәблиғ едән инсан евимә ҝәлди. О тәклиф еләди ки, Мүгәддәс Китаб дәрсини давам етдирим. Мәмнунијјәтлә разылашдым. Ардынҹа мәни ибадәт евиндә кечирилән ҝөрүшләрдә иштирак етмәјә дәвәт еләди. Мән дә гәбул еләдим. Орада ҝөрдүкләрим мәни чох валеһ еләди. Узун мүддәт иди ки, бир-бирини севән, хошбәхт инсанлар ахтарырдым. Ахыр ки, тапдым!
О вахтдан сонра бүтүн ҝөрүшләрә ҝетмәјә башладым. Тәхминән үч һәфтәдән сонра сигарети тәрҝитдим. Астролоҝија илә бағлы китабларымы атдым, сатанист маһнылара гулаг асмағы дајандырдым. Һисс едирдим ки, ҹинләрин мәнә тәсири јоха чыхыр. Јеһованын Мүгәддәс Китабда јаздырдығы гајда-ганунлара ујғун јашамаға башладым. Үч ајдан сонра мүждәни тәблиғ етмәјә башладым. Алты ајдан сонра исә вәфтиз олундум. Вәфтизимдән ики ҝүн сонра исә көмәкчи өнҹүл кими хидмәт етмәјә башладым.
Мәнә етдији јахшылыглара ҝөрә Јеһоваја чох миннәтдарам. Артыг һәјатымын мәнасы вар. Бәли, Јеһованын ады мөһкәм галадыр. Мән Онда пәнаһ тапырам, өзүмү тәһлүкәсизликдә һисс едирәм (Мәсәлләр 18:10). Зәбур 84:10-да јазылмыш бу сөзләр мәним кечирдијим һиссләри јахшы ифадә едир: “Сәнин һәјәтиндә кечән бир ҝүнү, өзҝә јердә кечирдијим мин ҝүнә дәјишмәрәм. Аллаһын евинин кандарында дурмаг, шәр адамын чадырында јашамагдан гат-гат јахшыдыр”».
Бу сәмими гәлбли гадын һәјатын мәнасыны тапды. Бәли, Јеһованы ахтаран ҝөзәл гәлбли инсанлар да буну баҹарар.