‘Иблисә гаршы дурмагда’ Исаны тәглид един
«Иблисә... гаршы дурун вә о, сиздән гачаҹагдыр» (ЈАГ. 4:7).
1. Иса јер үзүндә һансы мүгавимәтлә гаршылашаҹағыны билирди вә бунун нәтиҹәси нә олаҹагды?
ИСА МӘСИҺ билирди ки, Иблисин мүгавимәти илә үзләшәҹәк. Бу факт, илан васитәсилә данышан пис, үсјанкар руһани варлыға Аллаһын дедији сөзләрдән мәлум иди: «Мән сәнинлә гадын [Јеһованын тәшкилатынын сәмави һиссәси] арасына, сәнин баланла онун өвлады арасына дүшмәнчилик салырам. Бу өвлад [Иса Мәсиһ] сәнин башындан вураҹаг, сән дә ону дабанындан санҹаҹагсан» (Јар. 3:14, 15; Вәһј 12:9). Исанын дабанындан санҹылмасы јер үзүндә оларкән өлдүрүләҹәјини вә бунун мүвәггәти зәрәр олдуғуну билдирирди, чүнки Јеһова ону сәмави иззәт үчүн дирилдәҹәкди. Иланын башындан вурулаҹағы исә Иблисин өлүм зәрбәси алаҹағыны вә һеч вахт сағалмајаҹағыны билдирирди. (Һәвариләрин ишләри 2:31, 32; Ибраниләрә 2:14 ајәләрини оху.)
2. Исанын Иблисә мүвәффәгијјәтлә мүгавимәт ҝөстәрәҹәјинә Јеһова нә үчүн әмин иди?
2 Јеһова әмин иди ки, Иса јер үзүндә оларкән Онун тапшырығыны јеринә јетирмәкдә вә Иблисә мүгавимәт ҝөстәрмәкдә мүвәффәгијјәтли олаҹаг. Јеһова нә үчүн белә әмин иди? Чүнки О, Исаны чох илләр өнҹә ҝөјдә јаратмыш вә мүшаһидә етмишди, һәмчинин бу ‘мемарын’ вә «бүтүн хилгәтин фөвгүндә дуран, илк доғулан Оғул»ун итаәткар вә садиг олдуғуну билирди (Сүл. мәс. 8:22-31; Колос. 1:15). Буна ҝөрә дә, Исаны јер үзүнә ҝөндәрәндә вә Иблис тәрәфиндән сынаға чәкилиб өлдүрүлмәсинә јол верәндә Аллаһ ваһид Оғлунун галиб чыхаҹағына әмин иди (Јәһ. 3:16).
Јеһова Өз хидмәтчиләрини горујур
3. Јеһованын хидмәтчиләринә Иблис неҹә мүнасибәт бәсләјир?
3 Иса Иблисин «бу дүнјанын рәиси» олдуғуну деди вә шаҝирдләрини хәбәрдар етди ки, һәтта онлар да онун кими тәгиб олунаҹаглар (Јәһ. 12:31; 15:20). Һәгиги мәсиһчиләр Јеһоваја хидмәт етдикләри вә салеһлик тәблиғчиләри олдуглары үчүн Шејтан Иблисин әлиндә олан бу дүнја онлара нифрәт едир (Мат. 24:9; 1 Јәһ. 5:19). Иблисин хүсуси һәдәфи Мәсиһлә бирҝә сәмави Падшаһлыгда рәһбәрлик едәҹәк мәсһ олунмушларын галығыдыр. Һәмчинин јерүзү Ҹәннәтдә јашамаг үмиди олан бир чох Шаһидләр дә Шејтанын һәдәфидир. Аллаһын Кәламы бизә хәбәрдарлыг едир: «Дүшмәниниз олан шејтан, нәрә чәкән вә ашырмаг үчүн кимисә ахтаран аслан кими ҝәзир» (1 Пет. 5:8).
4. Аллаһын халгынын Иблисә мүвәффәгијјәтлә гаршы дурмасы нәдән ҝөрүнүр?
4 Јеһова Аллаһдан дәстәк алан бир тәшкилат олдуғумуз үчүн Иблисә мүвәффәгијјәтлә гаршы дуруруг. Бу фактлары нәзәрдән кечирәк: өтән јүзилликдә бәшәр тарихинин ән гәддар диктаторларынын бәзиләри Јеһованын Шаһидләрини јер үзүндән силмәјә чалышмышлар. Буна бахмајараг, Шаһидләрин сајы артмагдадыр вә һал-һазырда бүтүн дүнјада 7 000 000-а чатыр, јығынҹагларын сајы исә 100 000-дән чохдур. Амма Јеһованын халгыны тәгиб едән диктаторларын изи-тозу галмајыб!
5. Јешаја 54:17 ајәсиндәки сөзләр Јеһованын хидмәтчиләри үзәриндә неҹә јеринә јетди?
5 Аллаһ гәдим исраил јығынҹағына мүраҹиәт едәрәк вәд етди: «Сәнә гаршы ишләнән һеч бир силаһ ишә јарамајаҹаг. Мәһкәмәдә сәни тәгсирләндирән һәр бир кәси тәгсиркар чыхараҹагсан. Рәббә гуллуг едәнләрин ирси беләдир. Онларын салеһлији Мәндән ҝәлир» (Јешаја 54:11, 17). Бу вәд «ахыр ҝүнләрдә» Јеһованын бүтүн дүнјаја сәпәләнмиш халгы үзәриндә дә јеринә јетди (2 Тим. 3:1-5, 13). Биз Иблисә мүгавимәт ҝөстәрмәјә давам едирик вә Јеһова бизимлә олдуғу үчүн Онун халгыны јер үзүндән силмәк мәгсәдилә Иблисин истифадә етдији һеч бир силаһ ишә јарамыр (Мәз. 118:6, 7).
6. Даниелин пејғәмбәрлијиндә Иблисин һакимијјәтинин агибәти һагда нә дејилир?
6 Индики пис системин сону сүрәтлә јахынлашыр вә о заман Шејтан һакимијјәтинин бүтүн һиссәләри тамамилә мәһв едиләҹәк. Даниел пејғәмбәр Аллаһдан илһам алараг габагҹадан демишди: «О [инди мөвҹуд олан] падшаһларын дөврүндә ҝөјләрин Аллаһы [ҝөјдә] һеч вахт дағылмајан бир падшаһлыг гураҹаг вә бу падшаһлыг башга халгын әлинә кечмәјәҹәк. О бүтүн әввәлки [индики] падшаһлыглары әзиб-дағыдаҹаг, өзү исә әбәди галаҹаг» (Дан. 2:44). Бу сөзләр јеринә јетәндә Шејтанын вә гејри-камил инсанларын һакимијјәтинә сон гојулаҹаг. Иблисин системи әбәдијјән јох олаҹаг вә бүтүн јер үзүнү идарә едәҹәк јеҝанә һөкумәт Аллаһын Падшаһлығы олаҹаг. (2 Петер 3:7, 13 ајәләрини оху.)
7. Һарадан билирик ки, Јеһованын хидмәтчиләри ајры-ајрылыгда Иблисә мүвәффәгијјәтлә мүгавимәт ҝөстәрә биләрләр?
7 Шүбһә јохдур ки, Јеһова Өз тәшкилатыны горујуб сахлајаҹаг вә бу тәшкилат даима Онун хејир-дуасы алтында чичәкләнәҹәк. (Мәзмур 125:1, 2 ајәләрини оху.) Бәс бизим һаггымызда нә демәк олар? Мүгәддәс Китаб дејир ки, Иса кими биз дә Иблисә мүвәффәгијјәтлә мүгавимәт ҝөстәрә биләрик. Һәвари Јәһјанын Мәсиһдән алдығы пејғәмбәрликдә ҝөстәрилир ки, Шејтанын мүгавимәтинә бахмајараг, јерүзү үмидинә малик олан ‘бөјүк издиһам’ бу системин сонундан сағ-саламат чыхаҹаг. Мүгәддәс Китаба әсасән, онлар јүксәк сәслә: «Хилас, тахтда отуран Аллаһымыза вә Гузуја [Иса Мәсиһә] мәхсусдур!» — дејәрәк нида едирләр (Вәһј 7:9-14). Мәсһ олунмушлар һаггында дејилир ки, онлар Шејтана галиб ҝәлирләр вә онларын әмәкдашлары олан ‘башга гојунлар’ да она мүвәффәгијјәтлә мүгавимәт ҝөстәрирләр (Јәһ. 10:16; Вәһј 12:10, 11). Амма буна наил олмаг үчүн сәј ҝөстәрмәли вә ‘шәрдән [Шејтандан] хилас олунмамыз’ үчүн сәмими дуалар етмәлијик (Мат. 6:13).
Иблисә мүгавимәт ҝөстәрмәкдә мүкәммәл нүмунә
8. Иблисин сәһрада Исаја тәклиф етдији илк шеј нә иди вә Иса неҹә ҹаваб верди?
8 Иблис Исанын нөгсансызлығыны сындырмаға чалышырды. Исаны Јеһоваја итаәтсизлијә тәһрик етмәк үчүн Шејтан сәһрада ону имтаһан етди. Амма Иса Шејтана мүгавимәт ҝөстәрмәкдә мүкәммәл нүмунә гојду. Иса гырх ҝүн, гырх ҝеҹә јемәк јемәдији үчүн, тәбии ки, бәрк аҹды. Шејтан она деди: «Әҝәр Сән Аллаһын Оғлусанса, әмр ет ки, бу дашлар чөрәјә дөнсүн». Лакин Иса Аллаһын вердији гүввәдән шәхси мәнафеји үчүн истифадә етмәкдән имтина едиб, деди: «Јазылмышдыр ки, “Инсан јалныз чөрәклә јашамаз, лакин Аллаһын ағзындан чыхан һәр бир сөзлә јашар”» (Мат. 4:1-4; Ганун. т. 8:3).
9. Нәјә ҝөрә биз јол вермәмәлијик ки, Иблис бизим тәбии физики арзуларымыздан өз мәнфәәти үчүн истифадә етсин?
9 Бизим ҝүнләрдә Иблис Јеһованын хидмәтчиләринин тәбии физики арзуларындан өз мәнфәәти үчүн истифадә етмәјә чалышыр. Буна ҝөрә биз позғун дүнјада ҝениш јајылмыш гејри-гануни сексуал арзулара мүгавимәт ҝөстәрмәкдә гәти гәрарлы олмалыјыг. Аллаһын Кәламында гејд едилир: «Јохса буну билмирсинизми ки, салеһ олмајанлар Аллаһын Сәлтәнәтини мирас алмајаҹаглар? Алданмајын: нә әхлагсызлар, нә бүтпәрәстләр, нә зинакарлар, нә кишибазлар, нә ушагбазлар... Аллаһын Сәлтәнәтини мирас алмајаҹаглар» (1 Кор. 6:9, 10). Ајдындыр ки, әхлагсыз һәјат тәрзи сүрәнләрә вә ондан әл чәкмәк истәмәјәнләрә Аллаһын јени дүнјасында јер јохдур.
10. Матта 4:5, 6 ајәләринә әсасән, Исанын нөгсансызлығыны сындырмаг үчүн Шејтанын нөвбәти сынағы нәдән ибарәт иди?
10 Исанын сәһрада мәруз галдығы имтаһанларын бири һагда Мүгәддәс Китаб дејир: «Иблис Ону мүгәддәс шәһәрә ҝәтирир вә мәбәдин гүлләсинә гојуб Она дејир: “Әҝәр Сән Аллаһын Оғлусанса, Өзүнү ашағы ат; чүнки јазылмышдыр: “О, Сәнин һаггында Өз мәләкләринә әмр едәҹәк” вә “Ајағын даша илишмәсин дејә, Сәни әлләри үзәриндә дашыјаҹаглар”» (Мат. 4:5, 6). Ола билсин, Шејтан дүшүнүрдү ки, Иса белә етмәклә инсанлара өзүнүн Мәсиһ олдуғуну нүмајиш етдирәҹәкди. Әслиндә исә бу, Аллаһын бәјәнмәдији вә дәстәкләмәдији сәһв вә тәкәббүрлү бир һәрәкәт оларды. Иса бир даһа Јеһованын гаршысында нөгсансызлығыны горуду вә ҹавабында бир ајәни ситат ҝәтирди: «“Аллаһын олан Рәбби сынама”, — дејә дә јазылмышдыр» (Мат. 4:7; Ганун. т. 6:16).
11. Шејтан бизи неҹә ширникдирә биләр вә бунун нәтиҹәси нә ола биләр?
11 Шејтан бизи мүхтәлиф саһәләрдә шан-шөһрәт ахтармаға ширникдирә биләр. О, һәмчинин бизи ҝејим вә хариҹи ҝөрүнүшдә буҝүнкү дүнјанын гәрибәлији илә сечилән модасыны тәглид етмәјә вә ја шүбһәли әјләнҹәләрдә иштирак етмәјә мејлләндирә биләр. Әҝәр Мүгәддәс Китаб мәсләһәтләринә мәһәл гојмајыб дүнјаны тәглид едириксә, мәләкләрин бизи бу кими шејләрин пис тәсириндән горујаҹағына үмид едә биләрикми? Падшаһ Давуд Бат-Шева илә етдији ҝүнаһа ҝөрә төвбә етсә дә, өз әмәлинин пис нәтиҹәләриндән мүдафиә олунмады (2 Шам. 12:9-12). Ҝәлин бу дүнја илә достлуг мүнасибәтләри гурмагла Јеһованы мүнасиб олмајан тәрздә сынамајаг. (Јагуб 4:4; 1 Јәһја 2:15-17 ајәләрини оху.)
12. Матта 4:8, 9 ајәләринә әсасән, Шејтан Исаны даһа һансы сынаға чәкди вә Иса буна неҹә ҹаваб верди?
12 Сәһрада Исаны имтаһан едәркән Иблис она сијаси һакимијјәт дә тәклиф етди. Шејтан она дүнјанын бүтүн өлкәләрини вә онларын шан-шөһрәтини ҝөстәриб деди: «Әҝәр јыхылыб мәнә сәҹдә етсән, бүтүн бу шејләри Сәнә верәрәм» (Мат. 4:8, 9). Јеһоваја мәхсус олан ибадәти мәнимсәмәјә вә Исаны Аллаһа сәдагәтсизлијә тәһрик етмәјә ҹәһд етмәк неҹә дә алчаг һәрәкәтдир! Вахтилә садиг олан бу мәләк истәди ки, она ибадәт етсинләр вә бу истәји өзүндә инкишаф етдирәрәк ҝүнаһлы, аҹҝөз, пис вә јолдан чыхаран Шејтан Иблис олду (Јаг. 1:14, 15). Амма бунун там әксинә олараг, Иса сәмави Атасына садиг галмагда гәти гәрарлы иди вә буна ҝөрә дә деди: «Рәдд ол, шејтан! Чүнки јазылмышдыр: “Аллаһын олан Рәббә сәҹдә гыл вә јалныз Она гуллуг ет”». Бунунла Иса бир даһа Иблисә гәтијјәтлә вә бирмәналы шәкилдә мүгавимәт ҝөстәрди. Аллаһын Оғлу Шејтанын дүнјасынын бир һиссәси олмаг истәмирди вә һеч вахт бу пис мәләјә ибадәт дә етмәзди! (Мат. 4:10; Ганун. т. 6:13; 10:20).
«Иблисә... гаршы дурун вә о, сиздән гачаҹагдыр»
13, 14. а) Иблис Исаја дүнјанын бүтүн өлкәләрини ҝөстәрмәклә она нә тәклиф етди? б) Шејтан бизи позмаға неҹә чалышыр?
13 Иблис дүнјанын бүтүн өлкәләрини Исаја ҝөстәрмәклә она индијәдәк һеч бир инсанын малик олмадығы сәлаһијјәти тәклиф етди. Шејтан үмид едирди ки, ҝөстәрдикләри Иса үчүн ҹәлбедиҹи олаҹаг вә ону дүнјанын ән ҝүҹлү сијаси лидери ола биләҹәјинә инандыраҹаг. Бу ҝүн Иблис бизә өлкәләр тәклиф етмир, лакин ҝөрдүјүмүз, ешитдијимиз вә үзәриндә дүшүндүјүмүз шејләр васитәсилә үрәјимизи корламаға чалышыр.
14 Иблис бүтүн дүнјаны идарә едир. Күтләви информасија васитәләри дә онун әлинин алтындадыр. Буна ҝөрә дә, бу дүнјанын бахмаг, гулаг асмаг вә охумаг үчүн тәклиф етдији материалларын нә үчүн әхлагсызлыг вә зоракылыгла долу олмасы һеч дә тәәҹҹүблү дејил. Рекламлар биздә әслиндә еһтијаҹымыз олмајан чох шејләри алмаг арзусуну ојатмаг мәгсәдини ҝүдүр. Белә етмәклә Иблис ҝөзүмүзә, гулағымыза вә дүшүнҹәмизә хош ҝәлә биләҹәк мүхтәлиф мадди шејләрин ҹазибәдарлығындан истифадә едәрәк бизи даима јолдан чыхармаға чалышыр. Анҹаг Мүгәддәс Китаб принсипләринә зидд ҝедән шејләрә бахмагдан, гулаг асмагдан вә онлары охумагдан имтина етмәклә санки: «Рәдд ол, Шејтан!» — дејирик. Шејтанын натәмиз дүнјасыны рәдд етмәклә Исанын ҝөстәрдији әзмкарлығы вә гәтијјәти тәглид етмиш олуруг. Јеһованын Шаһиди вә Мәсиһин давамчысы олдуғумузу ишдә, мәктәбдә, гоһум вә гоншуларымыза нә гәдәр ҹәсарәтлә ҝөстәрдијимиздән дә Шејтанын дүнјасынын бир һиссәси олмадығымыз ҝөрүнүр. (Марк 8:38 ајәсини оху.)
15. Нә үчүн Шејтана мүгавимәт ҝөстәрмәк даима ајыг-сајыг дурмаг демәкдир?
15 Исанын Аллаһ гаршысында нөгсансызлығыны сындырмаг үчүн Иблисин үчүнҹү ҹәһди боша чыханда «ону тәрк етди» (Мат. 4:11). Амма Шејтан Исаны сынаға чәкмәк нијјәтиндән дөнмәди, чүнки јазылмышдыр: «Иблис [сәһрада] һәр имтаһаны битирдикдән сонра, бир мүддәтә Ондан ајрылды» (Лука 4:13). Иблисә мүвәффәгијјәтлә мүгавимәт ҝөстәрәндә Јеһоваја миннәтдар олмалыјыг. Бунунла јанашы, Аллаһдан көмәк дә диләмәлијик, чүнки Иблис она мүнасиб олан вә ола билсин, ҝөзләмәдијимиз вахтда бизи сынаға чәкмәк үчүн гајыдаҹаг. Буна ҝөрә һәр заман ајыг дурмалы вә үзләшдијимиз сынаглардан асылы олмајараг, Јеһоваја мүгәддәс хидмәти иҹра етмәкдә гәтијјәтли олмалыјыг.
16. Јеһова бизә һансы бөјүк гүввәни верир вә нәјә ҝөрә онун үчүн дуа етмәлијик?
16 Иблисә гаршы дурмаг үчүн Аллаһдан каинатда ән бөјүк гүввә олан мүгәддәс руһу истәмәли вә ону алаҹағымыза әмин олмалыјыг. Онун сајәсиндә өз гүввәмизлә баҹармадығымыз шејләри едә биләҹәјик. Иса давамчыларыны Аллаһдан мүгәддәс руһ алмағын мүмкүн олдуғуна әмин едәрәк деди: «Мадам ки, сиз [гејри-камил вә буна ҝөрә мүәјјән дәрәҹәдә] пис олдуғунуз һалда өз өвладларыныза јахшы һәдијјәләр верә билирсиниз, Сәмави Атанызын Ондан диләјәнләрә Мүгәддәс Руһу верәҹәји нә гәдәр јәгиндир!» (Лука 11:13). Ҝәлин һәр заман Јеһоваја мүгәддәс руһ үчүн тәкидлә дуа едәк. Бу бөјүк гүввәнин сајәсиндә биз Иблисә гаршы дурмагда әзмимизи горумаға вә галиб чыхмаға мүвәффәг олаҹағыг. «Иблисин һијләләринә гаршы дура билмәк үчүн» мүнтәзәм вә сәмими дуа етмәклә јанашы, Аллаһын бүтүн руһани зиреһләрини дә ҝејинмәлијик (Ефес. 6:11-18).
17. Иблисә мүгавимәт ҝөстәрмәјә Исаја һансы севинҹ көмәк етди?
17 Иблисә мүгавимәт ҝөстәрмәкдә Исаја башга бир шеј дә көмәк етмишди вә бу бизим үчүн дә јарарлы ола биләр. Мүгәддәс Китабда дејилир: «О, [Иса] гаршысына гојулан севинҹ уғрунда, рүсвајчылыға етинасызлыг ҝөстәриб, чармыха [«ишҝәнҹә дирәјинә», ЈД] тәһәммүл етди вә Аллаһын тахтынын сағында отурду» (Ибр. 12:2). Јеһованын һөкмранлығыны дәстәкләсәк, мүгәддәс адына еһтирам бәсләсәк вә әбәди һәјат мүкафатыны јадымызда мөһкәм сахласаг, биздә дә ејни севинҹ олаҹаг. Шејтан вә онун бүтүн әмәлләри мәһв едиләндә вә ‘мәзлумлар [һәлимләр] өлкәни мүлк олараг аланда, әмин-аманлығын боллуғундан зөвг тапанда’ биз неҹә дә севинәҹәјик! (Мәз. 37:11). Буна ҝөрә дә, ҝәлин Иблисә гаршы дурмагда Исаны тәглид едәк. (Јагуб 4:7, 8 ајәләрини оху.)
Неҹә ҹаваб верәрдиниз?
• Јеһованын Өз халгыны горудуғуну нәдән ҝөрүрүк?
• Шејтана гаршы дурмагда Иса неҹә нүмунә верди?
• Сән Иблисә неҹә мүгавимәт ҝөстәрә биләрсән?
[29-ҹу сәһифәдәки шәкил]
Дүнја илә достлуг Аллаһа гаршы дүшмәнчиликдир
[31-ҹи сәһифәдәки шәкил]
Шејтан Исаја дүнјанын бүтүн өлкәләрини тәклиф едәндә о имтина етди