Мәсиһчи олмағынла фәхр ет!

«Өјүнән, Рәбб [Јеһова] илә өјүнсүн» (1 КОРИНФЛИЛӘРӘ 1:31).

1. Бу ҝүн бир чох инсанлар өз динләринә неҹә мүнасибәт бәсләјирләр?

«Е’ТИНАСЫЗЛЫГ». Бу сөзлә дини ишләр үзрә бир шәрһчи бир чох инсанларын өз динләринә олан мүнасибәтини тәсвир етмишдир. О дејир: «Бу ҝүн динә гаршы јени бир мүнасибәт нәзәрә чарпмаға башлајыб инсанлар өз динләринә е’тинасыз јанашараг онун дәринликләринә вармаг истәмирләр». Шәрһчи бу е’тинасызлығы белә ачыглајыр ки, бир чохлары «Аллаһа инандыгларыны десәләр дә... Онунла марагланмырлар».

2. а) Инсанларын руһани ҹәһәтдән сүст олмалары нә үчүн тәәҹҹүб доғурмур? б) Е’тинасызлыг мәсиһчиләр үчүн һансы тәһлүкәни јарада биләр?

² Бу ҹүр е’тинасызлыг Мүгәддәс Китабы өјрәнәнләрдә тәәҹҹүб доғурмур (Лука 18:8). Башга ҹүр ола да билмәзди. Белә ки, јалан динләр инсанлары узун мүддәт аздырмыш вә мә’јус етмишдир (Вәһј 17:15, 16). Лакин бу гәдәр ҝениш јајылмыш е’тинасызлыг руһу мәсиһчиләр үчүн әсл тәһлүкә јарада биләр. Биз иманымыза гаршы лагејд олмаға, һабелә Мүгәдддәс Китаб һәгигәтләринә вә Аллаһа хидмәтә олан сә’јимизин азалмасына јол вермәмәлијик. Иса Лаодикијада јашајан биринҹи әср мәсиһчиләрини руһани сүстлүк һаггында хәбәрдар едәрәк дејирди: «Сән нә сојугсан, нә дә исти; каш ки, сән, ја сојуг, ја да исти олајдын! ...Амма илыгсан» (Вәһј 3:15-18).

Кимлијимизи унутмуруг

3. Мәсиһчиләр нә илә фәхр едә биләрләр?

³ Руһани е’тинасызлыгла мүбаризә апармаг үчүн мәсиһчиләр ким олдугларыны ајдын дәрк етмәли вә башгаларындан онлары бу гәдәр фәргләндирән иманлары илә фәхр етмәлидирләр. Мүгәддәс Китабда Јеһованын хидмәтчиләри вә Мәсиһин давамчылары олан бизләр һаггында данышылыр. Биз ‘мүждәни’ сә’јлә јајдығымыз үчүн Јеһованын ‘шаһидләри’ вә ‘Аллаһын әмәкдашларыјыг’ (Јешаја 43:10; 1 Коринфлиләрә 3:9; Матта 24:14). Биз ‘бир-биримизи севирик’ (Јәһја 13:34). Ҝөрүндүјү кими, мәсиһчиләр дәркетмә габилијјәтләрини ‘хејирлә шәри ајырд етмәк үчүн тәрбијә етмишләр’ (Ибраниләрә 5:14). Биз ‘каинатда улдузлар кими парлајырыг’ (Филипилиләрә 2:15). О ҹүмләдән, «иман ҝәтирмәјәнләр арасында мүсбәт» һәјат сүрмәјә чалышырыг (1 Петер 2:12; 2 Петер 3:11, 14).

4. Јеһованын хидмәтчиси ким олмадығыны неҹә мүәјјән едә биләр?

⁴ Јеһованын һәгиги хидмәтчиләри ким олмадыгларыны да јахшы билирләр. Онларын Рәһбәри Иса Мәсиһ «дүнјадан олмадығы кими, онлар да дүнјадан дејилләр» (Јәһја 17:16). Онлар «зеһинләри гаранлыглашмыш... Аллаһын һәјатына јад олмуш» милләтләрдән ајры дурурлар (Ефеслиләрә 4:17, 18). Бу сәбәбдән дә Исанын давамчылары «Аллаһа гаршы һөрмәтсизлији вә дүнјәви еһтираслары рәдд едиб, бу дүнјада тәмкинли, салеһ вә Аллаһ јолуна ујғун» өмүр сүрүрләр (Титуса 2:12).

5. Јеһова илә ‘өјүнмәк’ нә демәкдир?

⁵ Ким олдуғумуз вә Каинатын Али Һөкмдары илә јахын мүнасибәтләримиз үзәриндә дүшүнәркән Јеһова илә өјүнмәјә билмәрик (1 Коринфлиләрә 1:31). Бәс өјүнмәк нә демәкдир? Бир мәсиһчи кими Јеһоваја хидмәт етмәкдән фәрәһ һисси дујуруг. Биз ашағыдакы мәсләһәтә риајәт едирик: «Өјүнән онунла өјүнсүн ки, Мән Рәббин [Јеһованын] дүнјада мәһәббәт, әдаләт вә салеһлик јаратдығыны дәрк едир вә Мәни таныјыр» (Јеремја 9:24). Биз о мә’нада өјүнүрүк ки, Аллаһы танымаг үстүнлүјүнә маликик. Үстәлик Аллаһ башгаларына көмәк етмәк үчүн биздән истифадә едир.

Гаршылашдығымыз чәтинликләр

6. Нәјә ҝөрә мәсиһчи олдуғумузу даима јадда сахламаг асан олмур?

⁶ Е’тираф етмәлијик ки, ким олдуғумузу даима јадда сахламаг һәмишә асан олмур. Мәсиһчи аиләсиндә тәрбијә алмыш бир ҝәнҹ оғлан руһани ҹәһәтдән зәифләдији вахтлары хатырлајараг дејир: «Елә олурду ки, нәјә ҝөрә Јеһованын Шаһиди олдуғуму баша дүшә билмирдим. Һәгигәти ушаглыгдан билирдим. Һәрдән мәнә елә ҝәлирди ки, бу ади динләрдән биридир». Башгалары исә јол вермишләр ки, шәхсијјәтләри әјләнҹә дүнјасынын, күтләви информасија васитәләринин вә Аллаһы нәзәрә алмајан мүасир бахышларын тә’сири алтында формалашсын (Ефеслиләрә 2:2, 3). Амма елә дә ола биләр ки, мәсиһчиләрдән кимсә өзүнә әминлик һиссини итириб һәјат мәгсәдләри вә дәјәрләри үзәриндә јенидән дүшүнмәјә башлајыр.

7. а) Аллаһын хидмәтчиләри өзләрини неҹә јохламалыдырлар? б) Тәһлүкә һарада ҝизләнир?

⁷ Вахташыры өзүмүзү диггәтлә јохламаг һаггында нә демәк олар? Һәвари Павелин мәсиһчиләри нәјә тәшвиг етдијини хатырлајаг: «Өзүнүзү јохлајын, ҝөрүн иман јолундасынызмы? Өзүнүзү имтаһан един» (2 Коринфлиләрә 13:5). Һәвари демәк истәјирди ки, мәсиһчи үрәјиндә көк салмыш руһани зәифликләри објектив сурәтдә ашкар едиб, онлары дүзәлтмәк мәгсәдилә өзүнү имтаһан етмәлидир. Иманда олдуғуну јохлајан мәсиһчидән әмәлләри вә сөзләринин иманына ујғун ҝәлиб-ҝәлмәдијини мүәјјән етмәк тәләб олунур. Лакин өзүмүзү јохлајаркән, кимлијимизи вә суалларымыза ҹаваблары Јеһова вә мәсиһчи јығынҹағы илә әлагәси олмајан јерләрдә ахтарсаг, бу, јанлыш форма ала биләр. Белә олдугда өзүнү јохлама фајдасыз, һәтта руһани ҹәһәтдән өлүмҹүл ола биләрa. Ҝәлин һеч вахт иманымызын ‘ҝәми гәзасына’ уғрамасына јол вермәјәк! (1 Тимотејә 1:19).

Чәтинликләрдән мүдафиә олунмамышыг

8, 9. а) Муса шәхси гүввәсинә әмин олмадығыны неҹә билдирди? б) Јеһова Мусанын шүбһәләринә неҹә ҹаваб верди? ҹ) Јеһованын көмәк едәҹәји һагда вә’дләрини охујаркән, сиз һансы һиссләри кечирирсиниз?

⁸ Әҝәр мәсиһчи вахташыры өзүнә әминлик һиссини итирирсә, о һеч нәјә јарамадығыны дүшүнмәлидирми? Әлбәттә ки, јох! Кечмишдә белә һиссләри кечирән Аллаһын садиг хидмәтчиләринин нүмунәси она тәсәлли верә биләр. Мәсәлән, гејри-ади иманы, сә’ји вә сәдагәти илә сечилән Мусаны хатырлајаг. Она иҹра олунмасы чәтин ҝөрүнән тапшырыг һәвалә едилән заман, о горха-горха: «Мән кимәм?» деди (Чыхыш 3:11). Ҝөрүнүр, Муса «Ахы мән һеч кимәм! Мән буну баҹармарам!» демәк истәјирди. Мусанын һәјатыны хатырласаг, онун нәјә ҝөрә өзүнә бу гәдәр әмин олмадығыны баша дүшмәк олар. О, көләликдә олан халга мәнсуб иди. Исраиллиләр ону рәдд етмишди. О, сәлис данышмағы баҹармырды (Чыхыш 1:13, 14; 2:11-14; 4:10). Бундан башга, о, чобан иди. Бу исә мисирлиләрдә ијрәнҹ пешә һесаб олунурду (Јарадылыш 46:34). Буна ҝөрә дә тәәҹҹүблү дејил ки, о өзүнү Аллаһын көләликдә олан халгынын хиласкары кими тәсәввүр едә билмирди!

⁹ Јеһова Мусаны руһландырмаг үчүн ону мөһкәмләндирәҹәк ики вә’д верир: «Мән сәнинләјәм. Мәним сәни ҝөндәрдијимә әламәт бу олаҹаг: сән халгы Мисирдән чыхаранда бу дағда Мәнә ибадәт едәҹәксиниз» (Чыхыш 3:12). Аллаһ гәтијјәтсиз хидмәтчисини ону тәрк етмәјәҹәјинә әмин едир. Һәмчинин халгыны мүтләг азад едәҹәјини дә сөјләјир. О, халгына дәстәк олаҹағына даир әсрләр боју зәманәт верирди. Аллаһ Вә’д едилмиш дијарын астанасында дуран Исраил халгына Мусанын васитәсилә деди: «Ҹәсарәтли вә мөһкәм олун... Аллаһыныз Рәбб сизинлә ҝедир. О сизи атмаз, тәрк етмәз!» (Ганунун тәкрары 31:6). Јеһова Јешуаны да нөвбәти сөзләрлә руһландырмышдыр: «Бүтүн өмрүн боју һеч кәс сәнә гаршы чыха билмәјәҹәк... сәнинлә... олаҹағам, сәни атмајаҹағам вә тәрк етмәјәҹәјәм» (Јешуа 1:5). Аллаһ мәсиһчиләрә дә вә’д едир: «Сәни һеч бурахмајаҹағам вә әсла тәрк етмәјәҹәјәм» (Ибраниләрә 13:5). Бу ҹүр ҝүҹлү көмәјә малик олараг, мәсиһчи олдуғумузла фәхр етмәлијик!

10, 11. Јеһоваја хидмәтин дәјәрли олдуғуну дәрк етмәкдә Левили Асафа нә көмәк етди?

¹⁰ Мусадан тәхминән беш әср сонра јашамыш Асаф адлы садиг Левилидә салеһлик јолу илә ҝетмәјин нә гәдәр дәјәрли олдуғуна даир шүбһә јараныр. О, сынаглара вә имтаһанлара таб ҝәтирәрәк, Аллаһа хидмәтдә бөјүк сә’ј ҝөстәрирди, лакин Аллаһа истеһза едәнләрин фираванлығынын вә чичәкләндијинин шаһиди олурду. Бу Асафа неҹә тә’сир едир? О дејир: «Мәним ајагларым аз гала бүдрәмишди, аддымларым мәни јыхмышды. Писләрин фираванлығыны ҝөрәркән бу мәғрурлара һәсәд апарырдым». О, Јеһоваја хидмәт етмәјин нә дәрәҹәдә дәјәрли олдуғуна шүбһә етмәјә башлајыр: «Мәҝәр мән бош јерә гәлбими тәмизләмишдим, ҝүнаһсызлыг ичиндә әлләрими јумушдум? Һәмишә әзијјәтә дүшүрәм» (Мәзмур 73:2, 3, 13, 14).

¹¹ Асаф ону нараһат едән бу һиссләрин өһдәсиндән неҹә ҝәлирди? Онлары инкармы едирди? Хејр. О, 73-ҹү Мәзмурда охудуғумуз кими, үрәјини Аллаһа ачыр. Аллаһын мә’бәдинә ҝәлмәси Асаф үчүн дөнүш нөгтәсинә чеврилир. Орада оларкән Аллаһа хидмәт етмәјин ән јахшы һәјат јолу олдуғуну дәрк едир. Асаф јенидән руһани мүвазинәти әлдә едәрәк, Јеһованын пислијә нифрәт етдијини вә вахт ҝәләндә бүтүн пис инсанларын өз ҹәзаларыны алаҹағыны баша дүшүр (Мәзмур 73:17-19). О, Јеһованын хидмәтчиси олмасынын нә гәдәр шәрәфли олдуғуну ајдын дәрк етмәјә башлајыр вә Аллаһа белә сөзләрлә мүраҹиәт едир: «Даим Сәнинлә олмушам, мәним сағ әлимдән тутмусан. Нәсиһәтинлә мәнә јол ҝөстәрирсән, сонра мәни шәрәфә чатдыраҹагсан» (Мәзмур 73:23, 24). Асаф Аллаһа хидмәт етдији үчүн јенидән севинҹ вә фәрәһ дујмаға башлајыр (Мәзмур 34:2).

Онлар ким олдугларыны унутмурдулар

12, 13. Мүгәддәс Китабда хатырланан инсанлардан кимләр Аллаһа хидмәт етдикләри илә фәхр едирдиләр?

¹² Мәсиһчи олдуғумузу унутмамағын үсулларындан бири — ән чәтин шәраитләрдә белә Аллаһла олан мүнасибәтләрини гијмәтләндирән садиг хидмәтчиләрин иман нүмунәләрини тәдгиг етмәкдир. Јагубун оғлу Јусифи хатырлајаг. Јусиф ҝәнҹ икән хәјанәтә уғрајыб, көлә кими Мисирә сатылыр. О, Аллаһдан горхан атасындан, һәмчинин меһрибан вә хош үзлү доғма аиләсиндән узагда галмаға мәҹбур олур. Аллаһын мүдрүклијинә әсасланан мәсләһәтләри алмаг үчүн Јусиф Мисирдә һеч кимә мүраҹиәт едә билмир. Бундан башга, орада әхлаг принсипләринин мөһкәмлијини вә Аллаһа е’тибарынын дәринлијини сынајан мүрәккәб вәзијјәтләрә дүшүр. Бунунла белә о, Аллаһын хидмәтчиси олдуғуну унутмамаг вә һәмишә виҹданла һәрәкәт етмәк үчүн сә’јлә чалышыр. Һәтта әдавәтли мүһитдә белә, о, Јеһованын хидмәтчиси олмағы илә фәхр едир вә өз е’тигады һагда данышмагдан горхмур (Јарадылыш 39:7-10).

¹³ Сәккиз әсрдән сонра, әсир дүшән вә Сурија орду башчысы Нааманын гуллугчусу олан балаҹа бир исраилли гыз да Јеһованын хидмәтчиси олдуғуну унутмурду. Бу гыз фүрсәт дүшән кими һәгиги Аллаһ вә Онун пејғәмбәри Елиша һаггында данышмагдан горхмады (2 Падшаһлар 5:1-19). Ҝәнҹ Јошија падшаһ Аллаһдан үз дөндәрән кәсләрин арасында јашаса да, бөјүк дини дәјишикликләр едәрәк, Аллаһын мә’бәдини тә’мир етди вә халгы Јеһоваја дөндәрди. Јошија һәгиги Аллаһа иман етдији илә фәхр едирди (2 Салнамәләр, 34, 35-ҹи фәсилләр). Бабилдә олан Даниел вә үч досту Јеһованын хидмәтчиси олдугларыны бир ан белә унутмурдулар, һәмчинин тәзјигләрә вә имтаһанлара бахмајараг, Аллаһа сәдагәтләрини горујурдулар. Сөзсүз ки, онлар Јеһованын хидмәтчиләри олдуглары илә фәхр едирдиләр (Даниел 1:8-20).

Аллаһа хидмәт етмәјинлә фәхр ет

14, 15. Биз Јеһова илә неҹә ‘өјүнә’ биләрик?

¹⁴ Адларыны чәкдијимиз Аллаһын хидмәтчиләри мүвәффәгијјәтә наил олурдулар. Чүнки онлар һеч заман ким олдугларыны унутмур вә һәмишә Аллаһла олан мүнасибәтләрини јүксәк гијмәтләндирирдиләр. Бәс бизим һаггымызда нә демәк олар? Биз Јеһова илә неҹә ‘өјүнә’ биләрик?

¹⁵ Илк нөвбәдә биз Јеһованын адыны дашыјан халга мәнсуб олдуғумуз, һәмчинин Онун хејир-дуасына вә илтифатына малик олдуғумуз үчүн үрәкдән миннәтдар олмалыјыг. Аллаһ Она мәхсус оланлары јахшы таныјыр. Дини гарышыглыг дөврүндә јашамыш һәвари Павел јазмышды: «Рәбб [Јеһова] Өзүнүнкүләри таныјыр» (2 Тимотејә 2:19; Сајлар 16:5). Јеһова ‘өзүнүнкүләрлә’ фәхр едир. О бәјан едир: ‘Сизә тохунан Мәним ҝөз бәбәјимә тохунмуш олур’ (Зәкарја 2:8). Һәгигәтән дә, Јеһова бизи севир. Бизим дә Аллаһла мүнасибәтләримиз Она олан дәрин мәһәббәтә әсасланмалыдыр. Павел гејд едирди: «Ким Аллаһы севирсә, о адам Онун тәрәфиндән таныныр» (1 Коринфлиләрә 8:3).

16, 17. Нәјә ҝөрә һәм ҝәнҹ, һәм дә јашлы мәсиһчиләр руһани мираслары илә фәхр едә биләрләр?

¹⁶ Јеһованын Шаһидләри кими тәрбијә олунмуш ҝәнҹ оғлан вә гызлар, Аллаһла е’тибарлы мүнасибәтләр инкишаф етдирәрәк бу јолда нә гәдәр мөһкәм дурдугларыны јохласалар, јахшы оларды. Онлар садәҹә валидејнләринин иманына бел бағламалы дејилләр. Павел Аллаһын һәр бир хидмәтчисинә даир белә јазырды: «Өз ағасы гаршысында дурар вә ја јыхылар». Беләликлә, һәваринин гејд етдији кими, «һәр биримиз өзү үчүн Аллаһа һесабат верәҹәкдир» (Ромалылара 14:4, 12, И–93). Садәҹә аилә ән’әнәләрини пассив сурәтдә давам етдирән инсан, Јеһова илә јахын мүнасибәтләри горујуб сахлаја билмәз.

¹⁷ Тарих боју Јеһованын шаһидләри олмушдур. Онлар 6 000 ил әввәл јашамыш садиг Һабилдән башлајараг ҝүнләримизә гәдәр «бөјүк издиһамы» тәшкил едән Шаһидләрдән ибарәтдирләр. Бу група ҝәләҹәкдә әбәди јашамаг үмиди олан бир чох инсанлар гошулмагдадырлар (Вәһј 7:9; Ибраниләрә 11:4). Биз дә бу садиг хидмәтчиләрин сырасындајыг. Доғрудан да, зәнҝин руһани мираса маликик!

18. Дәјәр вә нормаларымыз бизи бу дүнјадан неҹә фәргләндирир?

¹⁸ Бир мәсиһчи кими бизә мүәјјән дәјәрләр, хүсусијјәтләр вә нормалар хасдыр. Ал-лаһа мәгбул олан бу јеҝанә һәјат тәрзи Мүгәддәс Китабда «Јол» адланыр (Һәвариләрин ишләри 9:2; Ефеслиләрә 4:22-24). Мәсиһчиләр ‘һәр шеји тәдгиг етмәли’ вә ‘јахшылыға бағлы олмалыдырлар’ (1 Салониклиләрә 5:21). Мәсиһчиликлә Аллаһдан узаглашмыш бу дүнја арасындакы учурумун нә гәдәр бөјүк олдуғуну ајдын сурәтдә дәрк едирик. Јеһова һәгиги ибадәтлә сахта ибадәт арасындакы фәрги кәскин шәкилдә ҝөстәрир. Аллаһ Өз хидмәтчиси Малакинин васитәсилә е’лан едир: «Сиз салеһлә пис адам, Аллаһа гуллуг едәнлә етмәјән арасындакы фәрги јенә ҝөрәҹәксиниз» (Малаки 3:18).

19. Мәсиһчиләр һеч вахт нәјин гурбаны олмајаҹаглар?

¹⁹ Јашадығымыз зәманәдә гарышыглыг вә гејри-мүәјјәнлик һөкм сүрдүјү үчүн, Јеһова илә ‘өјүнмәјимиз’ вә мәсиһчи олдуғумузу һәмишә јадда сахламағымыз чох ваҹибдир. Бу саһәдә бизә нә көмәк едә биләр? Нөвбәти мәгаләдә буна даир фајдалы мәсләһәтләри мүзакирә едәҹәјик. Бир шејә там әмин ола биләрик: мәсиһчиләр һеч вахт е’тинасызлығын гурбаны олмајаҹаглар.

[Һашијә]

Хатырлајырсынызмы?

• Јеһова илә ‘өјүнмәк’ нә демәкдир?

• Биз Муса илә Асафын нүмунәсиндән нә өјрәндик?

• Мүгәддәс Китабда хатырланан инсанлардан кимләр Аллаһа хидмәт етдикләри илә фәхр едирдиләр?

• Биз һансы мә’нада Јеһова илә ‘өјүнә’ биләрик?

[8-ҹи сәһифәдәки шәкил]

Мусанын өзүнә әмин олмадығы вахтлар олмушдур.

[9-ҹу сәһифәдәки шәкилләр]

Јеһованын кечмишдә јашамыш бир чох хидмәтчиләри Аллаһла олан мүнасибәтләри илә фәхр едирдиләр.