Охуҹуларын суаллары
Неһемја 8:10 ајәсиндә јәһудиләрә: «Јағлы јемәк јејин», Левилиләр 3:17 ајәсиндә исә: «Пиј... јемәјин» дејилир. Бунлары неҹә баша дүшмәк олар?
Неһемја 8:10 ајәсиндә «јағлы јемәк» вә Левилиләр 3:17 ајәсиндә «пиј» кими тәрҹүмә олунан сөзләр орижинал дилдә дә мүхтәлифдир. Левилиләр 3:17 ајәсиндәки «пиј» сөзү, һејвана вә ја инсана аид олмасындан асылы олмајараг, ибраниҹә кéлев сөзүнүн тәрҹүмәсидир (Лев. 3:3; Һак. 3:22). 17-ҹи ајәнин контексти ҝөстәрир ки, гурбан ҝәтирилән һејванларын ичалатыны вә бөјрәкләрини, һәмчинин белини өртән пији исраиллиләрә јемәмәк әмр едилмишди, чүнки «бүтүн пиј Рәббә мәхсусдур» (Лев. 3:14-16). Беләликлә, Јеһоваја тәгдим олунан һејван пијини јемәк гадаған олунмушду.
Неһемја 8:10 ајәсиндә «јағлы јемәк» кими тәрҹүмә олунан сөзә исә машманим сөзү мүвафигдир вә Ибраниҹә Мүгәддәс Јазыларда бу сөзә јалныз бу ајәдә раст ҝәлинир. Бу сөз, мәнасы «көкәлмәк, пијләнмәк» олан шамéн фелиндән әмәлә ҝәлиб. Бу фел илә бағлы олан сөзләр, әсас етибарилә, фираванлыг вә боллуг демәкдир. (Јешаја 25:6 (КМ) ајәси илә мүгајисә ет.) Шамéн фелиндән әмәлә ҝәлән шéмән исми чох вахт, «зејтун јағы» ифадәсинә дахил олан, «јағ» сөзү кими тәрҹүмә олунур (Ганун. т. 8:8; Лев. 24:2). Неһемја 8:10 ајәсиндәки машманим сөзү, ҝөрүнүр, чох јағлы хөрәјә аиддир вә һәтта бу јемәјә үзәриндә халис һејван пији јох, хырда пиј тикәләри олан әт дә гатыла биләрди.
Исраиллиләрә халис һејван пији јемәк гадаған олунса да, онлар бәсләјиҹи вә ләзиз хөрәкләр јејә биләрдиләр. Бәзи јемәкләр, мәсәлән, ундан һазырланмыш көкәләр һејван пијиндә јох, битки јағында (адәтән зејтун јағында) биширилирди (Лев. 2:7). Буна ҝөрә дә «Мүгәддәс Јазыларын дәрк едилмәси» енсиклопедијасында (инҝ.) изаһ олунур ки, Неһемја 8:10 ајәсиндәки «јағлы јемәк» ифадәси «бәсләјиҹи јемәкләрә — јағсыз, гидалы олмајан хөрәкләрә јох, иштаһаачан, еләҹә дә битки јағында биширилмиш дадлы јемәкләрә аиддир».
Әлбәттә, мәсиһчиләр билирләр ки, пиј јемәјә гојулан гадаға Ганунун бир һиссәси иди. Онлар, һејван гурбанларына даир тәләбләр дә дахил олмагла, бу ганунун алтында дејилләр (Ром. 3:20; 7:4, 6; 10:4; Колос. 2:16, 17).