Мүгәддәс Китабы охумаг фајдалы вә хошдур
“Ҝеҹә ҝүндүз ону дүшүнәҹәксән” (ЈЕШУ 1:8).
1. Үмумијјәтлә оху, хүсусилә дә Мүгәддәс Китабы охумаг һансы фајданы верир?
ДИГГӘТӘЛАЈИГ материалын охунмасы фајдалы мәшғулијјәтдир. Франсыз маарифчиси, һүгугшүнас вә философ Шарл Луи Монтескјө јазырды: “Һәјат гајғыларынын јорғунлуғу илә мүбаризә апармагда, мәним үчүн һәмишә ән јахшы васитә охумаг олуб. Бир саат әрзиндә охудугдан сонра, арадан галдырылмасы мүмкүн олмајан елә бир мә’јуслуг һисс етмәмишәм”. Буну, шүбһәсиз олараг, Мүгәддәс Китабы охумаға да аид етмәк олар. Аллаһдан илһам алмыш мәзмурчу белә сөзләр дејирди: “РӘББИН шәриәти камилдир; ҹаны тәзәләјир; РӘББИН шәһадәти садигдир; тәҹрүбәсиз адама һикмәт верир. РӘББИН бујуруғу доғрудур; үрәји севиндирир” (Мәзмур 19:7, 8).
2. Јегова нәјә ҝөрә әсрләр әрзиндә Мүгәддәс Китабы горујуб сахлајыб вә О, өз халгындан нә ҝөзләјир?
2 Мүгәддәс Китабын Мүәллифи олан Јегова Аллаһ, дини вә дини олмајан дүшмәнләрин әсрләр әрзиндә бу китаба гаршы ҝөстәрдикләри амансыз мүгавимәтләрә бахмајараг, ону горујуб сахлајыбдыр. Аллаһ истәјир ки, “бүтүн инсанлар хилас олуб, һәгигәти дәрк етсинләр”, буна ҝөрә дә өз Кәламынын бүтүн бәшәријјәт үчүн әлчатан олмасынын гејдинә галыбдыр (1 Тимотејә 2:4). Һесабламалара ҝөрә, Јер күрәсинин тәхминән 80 фаиз әһалиси илә 100 дилин көмәклијилә үнсијјәтдә олмаг мүмкүндүр. Мүгәддәс Китабын там мәтни 370 дилә тәрҹүмә олунуб, онун ајры–ајры һиссәләрини исә 1 860 дилдә вә диалектдә охумаг олар. Јегова истәјир ки, халгы Онун Кәламыны охусун. Аллаһ, Онун Кәламына диггәт јетирән - бәли, ону ҝүндәлик охујан хидмәтчиләринә хејир-дуа верир (Мәзмур 1:1, 2).
Мүгәддәс Китабы охумаг, нәзарәтчиләр үчүн тәләбдир
3, 4. Јегова Исраилин падшаһларындан нә тәләб едирди вә бу тәләбләрин буҝүнкү мәсиһчи ағсаггаллары үчүн дә ваҹиб олмасынын сәбәбләри һансылардыр?
3 Исраил халгынын, өзүнә инсанлардан падшаһ сечәҹәји вахты нәзәрдә тутараг, Јегова деди: “Краллығынын тахты үзәринә отурдуғу заман, каһинләрин, Левилиләрин өнүндә оландан бу шәриәтин бир нүсхәсини бир китаба јазаҹаг; вә јанында олаҹаг вә һәјатынын бүтүн ҝүнләриндә ондан охујаҹаг, та ки, Аллаһы РӘБДӘН горхмағы, бу шәриәтин бүтүн сөзләрини вә бу ганунлары јеринә јетирмәк үзрә онлары тутмағы өјрәнсин; гардашлары үзәриндә үрәји јүксәлмәсин вә әмрдән саға вә сола сапмасын; та ки, өзү вә оғуллары, Исраилин ортасында, өлкәсиндә чох јашасынлар” (Тәснијә 17:18—20).
4 Јегованын, Исраилин ҝәләҹәк падшаһларындан Ганунун һәр ҝүн охунмасыны һансы сәбәбдән тәләб етдијинә диггәт јетирин: 1) “та ки, Аллаһы РӘБДӘН горхмағы, бу шәриәтин бүтүн сөзләрини вә бу ганунлары јеринә јетирмәк үзрә онлары тутмағы өјрәнсин”, 2) “гардашлары үзәриндә үрәји јүксәлмәсин” вә 3) “әмрдән саға вә сола сапмасын”. Мәҝәр буҝүнкү мәсиһчи нәзарәтчиләринә Јеговадан горхмаг, Онун ганунларына табе олмаг, гардашлары үзәриндә јүксәлмәкдән вә Јегованын әмрләриндән кәнара чыхмагдан чәкинмәк лазым дејилми? Шүбһәсиз ки, Мүгәддәс Китабы ҝүндәлик охумаг, Исраилин падшаһлары үчүн ваҹиб олдуғу кими, онлара да ваҹибдир.
5. Рәһбәрлик шурасы, Мүгәддәс Китабын охунмасы барәдә филиалларын Комитә үзвләринә бу јахынларда нә јазмышдыр вә бу мәсләһәтә риајәт етмәк бүтүн мәсиһчи ағсаггалларына нә үчүн фајдалы оларды?
5 Буҝүнкү мәсиһчи ағсаггалларынын ишләри һәмишә чохдур вә Мүгәддәс Китабы ҝүндәлик охумаг онлара бир о гәдәр дә асан дејил. Мәсәлән, Јегованын Шаһидләринин Рәһбәрлик шурасы вә филиалларын Комитә үзвләри чох мәшғул адамлардыр. Буна бахмајараг, Рәһбәрлик шурасынын бу јахынларда бүтүн филиалларын Комитәләринә ҝөндәрдији мәктубунда, Мүгәддәс Китабын ҝүндәлик охунмасынын вә мүнтәзәм олараг өјрәнилмәсинин ваҹиблији гејд олунурду. Мәктубда гејд олундуғу кими, бу, Јеговаја вә һәгигәтә мәһәббәтимизи артырмаға, еләҹә дә “иманы, севинҹи вә сәбири иззәтли сона гәдәр горумаға” бизә көмәк едәр. Јегованын Шаһидләринин јығынҹагларындакы бүтүн ағсаггаллар бунун ҝәрәкли олдуғуну анлајырлар. Мүгәддәс Јазыларын ҝүндәлик охунмасы, “мүдрик давранмагда” онлара көмәк едәҹәк (Јешу 1:7, 8, ЈД). Мүгәддәс Китабын охунмасы ағсаггаллара “тә’лим, тәкзиб, ислаһ, салеһлик тәрбијәси үчүн” хүсусилә јарарлыдыр (2 Тимотејә 3:16).
Һәм ҝәнҹләр, һәм дә јашлылар үчүн ваҹибдир
6. Нун оғлу Јешу, Јегованын Ганунундакы бүтүн сөзләри топлашан Исраил гәбиләләри вә гәрибләрин гаршысында нә үчүн охуду?
6 Гәдим заманларда, инсанларда Мүгәддәс Јазыларын шәхси нүсхәси јох иди, буна ҝөрә дә Мүгәддәс Китабы топлашан халгын гаршысында охујурдулар. Јегова, Нун оғлу Јешуја Ај шәһәри үзәриндә гәләбә вердикдән сонра, Јешу Исраил гәбиләсини Ебал вә Ҝеризим дағынын әтәјинә топлады. Баш верән һадисә һагда охујуруг: “Шәриәтин бүтүн сөзләрини, бәрәкәти вә лә’нәти, шәриәт китабында јазылмыш оланын һамысына ҝөрә охуду. Исраилин бүтүн ҹамаатынын вә гадынларын вә ушагларын вә араларында јеримәкдә олан гәрибләрин гаршысында Мусанын бүтүн әмр етдикләриндән Јешунун охумадығы бир сөз галмады” (Јешу 8:34, 35). Һансы давранышын Јегованын хејир-дуасына, һансынын исә Онун мүһакимәсинә сәбәб олаҹағыны ҝәнҹләр вә јашлылар, исраиллиләр вә гәрибләр үрәкләринә вә зеһинләринә һәкк етмәли идиләр. Мүгәддәс Китабын ҝүндәлик охунмасы, шүбһәсиз ки, бунда бизә дә көмәк едәҹәк.
7, 8. а) Бу ҝүн “гәрибләрә” кимләр бәнзәјир вә онлара нә үчүн Мүгәддәс Китабы охумаг лазымдыр? б) Јегованын халгы арасында олан “ушаглар” Исанын нүмунәсини неҹә тәглид едә биләрләр?
7 Бу ҝүн, Јегованын милјонларла хидмәтчиси руһани мә’нада “гәрибләрә” бәнзәјирләр. Әввәлләр онлар бу дүнјанын нормаларына әсасән јашајырдылар, лакин сонрадан јени һәјата башладылар (Ефеслиләрә 4:22—24; Колослулара 3:7, 8). Јегованын јахшы вә пис сајдығы шејләри онлар өзләринә һәмишә хатырлатмалыдырлар (Амос 5:14, 15). Бу ишдә онлара Аллаһын Кәламыны ҝүндәлик охумаг көмәк едир (Ибраниләрә 4:12; Јагуб 1:25).
8 Јегованын халгы арасында, Онун нормаларына валидејнләри тәрәфиндән өјрәдилмиш чохлу “ушаглар” да вар. Амма, Аллаһын ирадәсинин дүзҝүнлүјүнә һәмин ушагларын өзләри әмин олмалыдырлар (Ромалылара 12:1, 2). Онлар буну неҹә едә биләрләр? Исраилдә каһинләрә вә ағсаггаллара ҝөстәриш верилирди: “Бу шәриәти бүтүн Исраилин гаршысында, гулаглары илә ешитсинләр дејә онлара охујаҹагсан. Халгы, кишиләри вә гадынлары вә ушаглары вә шәһәрләриндә олан сәнин гәрибини топла, та ки, ешитсинләр вә өјрәнсинләр вә Аллаһыныз РӘБДӘН горхсунлар; вә бу шәриәтин бүтүн сөзләрини јеринә јетирмәк үчүн тутсунлар; билмиш олмајан оғуллары да ешитсинләр; вә... Аллаһыныз РӘБДӘН горхмағы өјрәнсинләр” (Тәснијә 31:11—13). Иса, Мусанын ганунларына табе олараг јашајырды вә артыг 12 јашында оларкән, Атасынын ганунларыны анламаға ҹидди мараг ҝөстәрмишдир (Лука 2:41—49). Сонралар, Мүгәддәс Јазылары синагогда динләмәк вә онун охунмасында иштирак етмәк Исанын адәти олду (Лука 4:16; Һәвариләрин ишләри 15:21). Исанын нүмунәсини тәглид етмәк, јә’ни Аллаһын Кәламыны ҝүндәлик охумаг вә Мүгәддәс Китабын охундуғу вә өјрәнилдији јығынҹаг ҝөрүшләринә мүнтәзәм олараг ҝетмәк буҝүнкү ушаглара да фајдалы олар.
Мүгәддәс Китабы охумаг, ән ваҹиб мәшғулијјәтләрдән биридир
9. а) Охумаг үчүн материл сечәндә биз нәјә ҝөрә еһтијатлы олмалыјыг? б) Бу журналын редактор-баниси Мүгәддәс Китабын өјрәнилмәси үчүн олан вәсаитләр барәдә нә демишдир?
9 Мүдрик падшаһ олан Сүлејман јазырды: “Чох китаблар тәртиб етмәјин сону јохдур; вә чох охумаг бәдән јорғунлуғудур” (Ваиз 12:12). Бу сөзләрә әлавә етмәк олар ки, бу ҝүн нәшр едилән китабларын чохуну охумаг тәкҹә бәдән јорғунлуғу дејил, ачыг десәк, һәм дә зеһин үчүн тәһлүкәлидир. Буна ҝөрә дә, охумаг үчүн материал сечәндә еһтијатлы олмаг ваҹибдир. Мүгәддәс Китабын өјрәнилмәси үчүн нәшр олунан әдәбијјатларымыздан әлавә, биз Мүгәддәс Китабын өзүнү дә охумалыјыг. Охудуғунуз бу журналын редактор-баниси ашағыдакы сөзләрлә охуҹулара мүраҹиәт етмишдир: “Һеч заман унутмајын ки, Мүгәддәс Китаб бизим ме’јарымыздыр вә Аллаһын бизә вердији “көмәкчи” вәсаитләр нә гәдәр фајдалы олсалар да, онлар садәҹә вәсаит олараг галыр вә Мүгәддәс Китабы әвәз едә билмәзләр”a. Беләликлә, Мүгәддәс Китаба әсасланан нәшрләрә е’тинасызлыг ҝөстәрмәдән, биз Мүгәддәс Китабын өзүнү дә охумалыјыг.
10. “Садиг вә ағыллы гул” Мүгәддәс Китабы охумағын зәрурилијини неҹә гејд едир?
10 Бу тәлабаты анлајараг, “садиг вә ағыллы гул” артыг нечә илдир ки, бүтүн јығынҹагларда кечирилән теократик хидмәт Мәктәбинин програмына Мүгәддәс Китабын охунмасыны да әлавә едир (Матта 24:45). Бу програма риајәт едәрәк, Мүгәддәс Китабы бүтүнлүклә једди илә охумаг олар. Бу ҹәдвәл һамыја, хүсусән дә Мүгәддәс Китабы һәлә бүтүнлүклә охумајан јени мараглананлар үчүн фајдалыдыр. Ҝилеад Мәктәбиндә вә хидмәти тәкмилләшдирмә Мәктәбиндә охујанлардан, еләҹә дә Бејт-ел аиләсинин јени үзвләриндән бир ил әрзиндә Мүгәддәс Китабы әввәлдән ахыра гәдәр охумаг тәләб олунур. Истәр шәхсән, истәрсә дә аиләви, һансы графикә риајәт етмәниздән асылы олмајараг, графикә әмәл едә билмәниз үчүн Мүгәддәс Китабын охунмасына үстүнлүк вермәк ваҹибдир.
Мүгәддәс Китабы охумаг вәрдишиниз нәји ҝөстәрир?
11. Јегованын сөзләри илә неҹә вә нә үчүн һәр ҝүн гидаланмалыјыг?
11 Әҝәр сиз, Мүгәддәс Китабын охунмасы графикинә әмәл едә билмирсинизсә, јахшы олар ки, өзүнүздән сорушасыныз: “Дүнјәви әдәбијјатлары охумаг вә телевизора бахмаг вәрдишим, Јегованын Кәламыны охумаг баҹарығыма неҹә тә’сир ҝөстәрир?” Мусанын јаздығы вә сонралар исә Исанын тәкрар етдији, “инсан јалныз чөрәклә јашамаз, лакин Аллаһын ағзындан чыхан һәр бир сөзлә јашар” сөзләрини хатырлајын (Матта 4:4; Тәснијә 8:3). Физики гүввәмизи итирмәмәк үчүн, бизә һәр ҝүн чөрәк вә ја башга гида лазым олдуғу кими, руһани сағламлығымызы да горујуб сахламаг үчүн, бизә ҝүндәлик олараг Јегованын фикирләрини мәнимсәмәк ҝәрәкдир. Аллаһын фикирләрини исә, Мүгәддәс Јазылары һәр ҝүн охумагла мәнимсәјә биләрик.
12, 13. а) Аллаһын Кәламына олаҹаг һәвәсимизи һәвари Павел һансы мисалла ҝөстәрир? б) Павелин сүд барәдә истифадә етдији мисал, Петерин мисалындан нә илә фәргләнир?
12 Әҝәр биз Мүгәддәс Китабы “бәшәри сөз олараг дејил, әслиндә олдуғу кими, Аллаһын кәламы олараг гәбул” едириксә, көрпә ушаг ана сүдүнә ҹан атдығы кими, биз дә бу Кәлама мејл ҝөстәрәҹәјик (1 Салониклиләрә 2:13). Һәвари Петер мүгајисә апарараг јазырды: “Анадан тәзә олмуш көрпәләр кими, һијләсиз сүдү андыран кәламы арзулајын ки, онунла бөјүјүб гуртулуша наил оласыныз. Она ҝөрә ки, Рәббин хејирхаһ олдуғуну даддыныз” (1 Петер 2:2, 3). Әҝәр шәхси тәҹрүбәмиздә “Рәббин хејирхаһ олдуғуну” дадмышыгса, биздә Мүгәддәс Китабы охумаға ҝүҹлү истәк олаҹагдыр.
13 Гејд етмәк лазымдыр ки, Петер бу ајәдә сүдлә мүгајисәни, һәвари Павел кими истифадә етмир. Јени доғулан көрпәјә сүд бүтүн лазыми гида маддәләрини верир. Петерин истифадә етдији әјани мисал ҝөстәрир ки, “бөјүјүб гуртулуша наил” олмағымыз үчүн, бизә ҝәрәк олан һәр шеј Аллаһын Кәламында вар. Павел исә, сүдә олан тәлабат һаггындакы мисалында ҝөстәрир ки, өзләрини руһән јеткин сананлардан бә’зиләри пис гидаланырлар. Ибраниләрдән олан мәсиһчиләрә ҝөндәрдији мәктубунда Павел јазырды: “Һәрчәнд сиз индијәдәк мүәллим олмалы идиниз; анҹаг һәлә дә буна мөһтаҹсыныз ки, кимсә сизә тәкрарән Аллаһын сөзләринин ибтидаи гајдаларыны өјрәтсин; вә гүввәтли јемәјә дејил, сүдә мөһтаҹ олмусунуз. Чүнки сүдлә бәсләнән һәр кәс салеһлик һаггындакы кәламда тәҹрүбәсиздир; чүнки о, көрпә ушагдыр. Гүввәтли јемәк исә камилләр үчүндүр. Чүнки онларын һиссләри алышдырылараг, хејирлә шәри ајырд етмәк үчүн тәрбијә едилмишдир” (Ибраниләрә 5:12—14). Мүгәддәс Китабы диггәтлә охумаг, “һиссләримизи” инкишаф етдирмәкдә бизә чох көмәк едәҹәк вә руһани гидаја иштаһамызы артыраҹаг.
Мүгәддәс Китабы охумаг тәрзи
14, 15. а) Мүгәддәс Китабын Мүәллифи бизә һансы көмәји тәклиф едир? б) Биз, Аллаһын мүдриклијиндән неҹә фајдалана биләрик? (Мисаллар ҝәтирин.)
14 Мүгәддәс Китабын даһа сәмәрәли охунмасы, охунун өзүндән јох, дуадан башланыр. Дуа - чох гијмәтли бәхшишдир. Тәсәввүр един ки, мараглы мәсәлә мүзакирә олунан китабы охумаға башлајырсыныз вә охудуғунуз мәсәләни анламагда көмәк үчүн мүәллифә мүраҹиәт едирсиниз. Бу, бөјүк фајда верәрди! Мүгәддәс Китабын Мүәллифи олан Јегова, бизә мәһз бу ҹүр көмәји тәклиф едир. Биринҹи әсрин рәһбәрлик шурасынын бир үзвү гардашларына јазырды: “Әҝәр сизләрдән биринин һикмәти әксикдирсә, һәр кәсә ҹомәрдликлә вә ҝилејләнмәјәрәк верән Аллаһдан диләсин, она вериләҹәкдир. Амма гој иманла диләсин, һеч шүбһә етмәсин” (Јагуб 1:5, 6). Мүасир Рәһбәрлик шурасы бизи даима тәшвиг едир ки, Мүгәддәс Китабы дуа едәрәк охујаг.
15 Мүдриклик, әлдә едилән билији практикада тәтбиг етмәк баҹарығыдыр. Буна ҝөрә дә, Мүгәддәс Китабы ачмаздан әввәл, Јеговадан хаһиш един ки, шәхси һәјатынызда риајәт етмәниз ҝәрәк олан принсипләри ҝөрмәкдә сизә көмәк етсин. Јени өјрәндикләринизи, билдикләринизлә әлагәләндирин. Гој јени өјрәндијиниз, артыг мәнимсәдијиниз “сағлам сөзләри”н нүмунәсинин бир һиссәси олсун (2 Тимотејә 1:13, И—93). Јегованын кечмишдә јашајан хидмәтчиләринин һәјатларыны тәсвир едән һадисәләр үзәриндә дәриндән дүшүнүн вә өзүнүзә, мән белә шәраитләрдә неҹә давранардым, дејә суал верин (Тәквин 39:7—9; Даниел 3:3—6, 16—18; Һәвариләрин ишләри 4:18—20).
16. Мүгәддәс Китабын охунмасыны даһа фајдалы вә сәмәрәли етмәкдә һансы практики мәсләһәтләр бизә көмәк едәр?
16 Мәгсәдимиз, јалныз мүәјјән сајда сәһифә охумаг олмамалыдыр. Тәләсмәк лазым дејил. Охудуғунузун үзәриндә дәриндән дүшүнүн. Бир фикир сизә хүсусилә мараглы ҝөрүнәндә, әҝәр Мүгәддәс Китабынызда һәмин фикрә паралел ајә ҝөстәрилирсә, она да диггәт јетирин. Әҝәр фикир сизә там ајдын дејилсә, сонрадан әлавә тәдгигат апармаг үчүн, ону гејд един. Охудуғунуз заман хүсусилә јадда сахламаг истәдијиниз һиссәләрдә гејдләр един, јахуд да онлары көчүрүн. Сиз һәмчинин вәрәгин кәнарларында гејдләр едиб, әлавә паралел јерләри дә ҝөстәрә биләрсиниз. Әҝәр бу вә ја диҝәр ајәнин тәблиғ вә мүәллимлик фәалијјәтиндә јарарлы ола биләҹәјини санырсынызса, әсас сөзләрин Мүгәддәс Китабын сонундакы индексдә олуб олмадығыны јохлајынb.
Мүгәддәс Китабын охунмасыны зөвглү един
17. Мүгәддәс Китабы охумаг нәјә ҝөрә бизә зөвг вермәлидир?
17 Мәзмурчу хошбәхт инсан барәдә дејир: “Зөвгү РӘББИН шәриәтиндәдир вә ҝеҹә ҝүндүз онун шәриәтини дәрин дүшүнүр” (Мәзмур 1:2). Мүгәддәс Китабын ҝүндәлик охунмасы хошаҝәлмәз бир иш олмамалыдыр, әксинә, инсана зөвг вермәлидир. Мәсәлән, бунун үчүн өјрәндијинизин дәјәрини һәмишә јадда сахламаг олар. Мүдрик падшаһ Сүлејман јазырды: “Һикмәт тапан адам... нә хошбәхтдир! Онун јоллары севимли јоллардыр вә бүтүн јоллары сүлһдүр. Ону тутанлар үчүн бир һәјат ағаҹыдыр вә ону мөһкәм тутанлар хошбәхтдир” (Сүлејманын мәсәлләри 3:13, 17, 18). Мүдриклик әлдә етмәк, шүбһәсиз ки, сәрф едилән ҹәһдләрә дәјәр, чүнки мүдриклик јоллары хошдур - сүлһ, хошбәхтлик, ахыр нәтиҹәдә исә һәјат ҝәтирәр.
18. Мүгәддәс Китабы охумагдан әлавә нә тәләб олунур вә нөвбәти мөвзуда нәји мүзакирә едәҹәјик?
18 Бәли, Мүгәддәс Китабы охумаг һәм фајда ҝәтирир, һәм дә зөвг верир. Амма бу кифајәтдирми? Христиан аләминин килсә үзвләри Мүгәддәс Китабы әсрләрлә охујурлар, амма онлар “даим өјрәнән, лакин әсла һәгигәти дәрк едә билмәјән... адамлар”дырлар (2 Тимотејә 3:7). Мүгәддәс Китабы охумагдан фајда әлдә етмәк үчүн, Мүгәддәс Китаб билијини һәјатымызда неҹә тәтбиг етмәјин вә онлары тәблиғдә, еләҹә дә шаҝирдләр һазырламагда неҹә истифадә етмәјин үзәриндә дүшүнмәлијик (Матта 24:14; 28:19, 20). Бунун үчүн сә’ј вә јахшы өјрәнмә үсуллары тәләб олунур. Нөвбәти мөвзудан ҝөрәҹәјимиз кими, бунлар да зөвг верир вә сәмәрәләр ҝәтирир.
[Һашијәләр]
a Ҝөзәтчи Гүлләси Ҹәмијјәтинин нәшр етдији “Јегованын Шаһидләри - Аллаһын Падшаһлығыны е’лан едәнләр” китабына бахын, сәһифә 241, инҝ.
b “Ҝөзәтчи Гүлләси”нин 1995-ҹи ил 1 мај нөмрәсиндә “Мүгәддәс Китабы даһа сәмәрәли охумағын үсуллары” адлы чәрчивәјә бахын, сәһифә 16, 17 (русҹа).
Тәкрар үчүн суаллар
• Исраил падшаһларына верилән һансы нәсиһәт буҝүнкү нәзарәтчиләрә тәтбиг едиләндир вә нә үчүн?
• Бу ҝүн “гәрибләр” вә “ушаглар” кимләри тәмсил едир вә нә үчүн онлара Мүгәддәс Китабы ҝүндәлик охумаг лазымдыр?
• “Садиг вә ағыллы гул” тәрәфиндән верилән һансы практики мәсләһәтләр Мүгәддәс Китабы мүнтәзәм охумагда бизә көмәк едәр?
• Биз, Мүгәддәс Китабы охумагдан неҹә фајда вә зөвг ала биләрик?
[17-ҹи сәһифәдәки шәкил]
Мүгәддәс Китабы һәр ҝүн охумаг, ағсаггаллара хүсусилә ваҹибдир
[18-ҹи сәһифәдәки шәкил]
Синагогда Мүгәддәс Јазыларын охунмасында иштирак етмәк Исанын адәти иди