Дирилмә үмиди сизин үчүн ҝерчәкдирми?
«Өлүләрин дирилмәси олаҹагдыр» (ҺӘВАРИЛӘРИН ИШЛӘРИ 24:15).
1. Нәјә ҝөрә өлүм гачылмаз ҝөрүнүр?
«БУ ДҮНЈАДА мүтләг олан һеч бир шеј јохдур, өлүмдән вә верҝиләрдән башга». 1789-ҹу илдә Американын дөвләт хадими Бенҹамин Франклинин гәләмә алдығы бу сөзләр бә’зиләринә ағыллы ҝөрүнмүшдү. Лакин бир чох виҹдансыз инсанлар верҝиләрдән јајыныр. Даһа чох гачылмаз ҝөрүнән өлүмдүр. Өз ҝүҹүмүзлә һеч биримиз өлүмдән гача билмәрик. О, һамымызын изиндәдир вә әввәл-ахыр јахалајаҹаг. Бәшәријјәтин үмуми мәзары әзизләримизи аҹҝөзлүклә удур (Сүлејманын мәсәлләри 27:20). Лакин бир үмид бизә тәсәлли верир.
2, 3. а) Нә үчүн өлүм, бә’зиләринин дүшүндүјү кими, гачылмаз дејил? б) Бу мәгаләдә нә мүзакирә олунаҹаг?
2 Јеһованын Кәламы әсаслы үмид верир ки, өләнләр дириләҹәк, јә’ни јенидән һәјата гајыдаҹаг. Бу, садәҹә хәјал дејил, каинатда һеч бир гүввә Јеһоваја дирилмә үмидини ҝерчәкләшдирмәјә мане ола билмәз. Бә’зиләри үчүн өлүм, чохларынын дүшүндүјү кими, гачылмаз дејил. Нијә? Чүнки сајсыз-һесабсыз ‘бөјүк издиһам’ тезликлә ҝәләҹәк ‘бөјүк мәшәггәтдән’ сағ чыхаҹаг (Вәһј 7:9, 10, 14). Онларын әбәди јашамаг үмиди олаҹагдыр. Демәли, өлүм онлар үчүн гачылмаз дејил. Үстәлик, о «јох едиләҹәк» (1 Коринфлиләрә 15:26).
3 «Һәм салеһ, һәм дә салеһ олмајан өлүләрин дирилмәси олаҹагдыр» дејән Павел кими, биз дә дирилмәнин олаҹағына әмин олмалыјыг (Һәвариләрин ишләри 24:15). Ҝәлин дирилмәјә аид үч суалы нәзәрдән кечирәк. Биринҹиси, дирилмәнин мүтләг олаҹағыны һарадан билирик? Икинҹиси, дирилмә үмиди шәхсән сизә неҹә тәсәлли верә биләр? Үчүнҹүсү, бу үмид индики һәјатыныза неҹә тә’сир ҝөстәрә биләр?
Дирилмә мүтләг олаҹаг
4. Нәјә ҝөрә дирилмә Јеһованын нијјәтиндә ваҹиб јери тутур?
4 Бир сыра амилләр вардыр ки, дирилмәнин мүтләг олаҹағына бизи әмин едир. Һәр шејдән әввәл дирилмә Јеһованын нијјәтиндә ваҹиб јери тутур. Шејтан бәшәријјәти гачылмаз нәтиҹәси өлүм олан ҝүнаһа сүрүкләди. Буна ҝөрә Иса Шејтан һаггында демишди: «О, башланғыҹдан инсан гатили иди» (Јәһја 8:44). Лакин Јеһова вә’д етмишдир ки, ‘гадынын’, јә’ни Онун арвады тимсалында чыхыш едән сәмави тәшкилатын Зүрријјәти олаҹаг вә о, ‘гәдим иланын’ башыны әзәҹәк, бунунла да Шејтанын мөвҹудлуғуна сон гојаҹаг (Јарадылыш 3:1-6, 15, КМ; Вәһј 12:9, 10; 20:10). Јеһова Хиласкар Зүрријјәтлә бағлы нијјәтини тәдриҹән ачыгладыгҹа ајдын олду ки, Зүрријјәт Шејтаны мәһв етмәкдән даһа чох шеј едәҹәк. Мүгәддәс Јазыларда дејилир: «Аллаһын Оғлу да буна ҝөрә зүһур етди ки, иблисин әмәлләрини пуч етсин» (1 Јәһја 3:8). Јеһованын Иса Мәсиһ васитәсилә пуч етмәк нијјәтиндә олдуғу Шејтанын әмәлләринин ән башлыҹасы Адәмдән мирас алдығымыз ҝүнаһын нәтиҹәси олан өлүмдүр. Бу бахымдан, Исанын фидијә гурбанлығы вә дирилмә чох бөјүк әһәмијјәт кәсб едир (Һәвариләрин ишләри 2:22-24; Ромалылара 6:23).
5. Нәјә ҝөрә дирилмә Јеһованын адына иззәт ҝәтирәҹәк?
5 Јеһова мүгәддәс адыны иззәтләндирмәји гәти гәрара алыб. Шејтан Јеһованын адына гара јахмагла јанашы, јаланлар да ујдуруб. О, јаландан деди ки, Адәмлә Һәвва Аллаһын гадаған етдији мејвәдән јесәләр, ‘әсла өлмәјәҹәкләр’ (Јарадылыш 2:16, 17; 3:4). О вахтдан Шејтан буна бәнзәр јаланлар јајыб, мәсәлән, ҝуја инсан өләндә руһу јашајыр. Анҹаг дирилмә васитәсилә Јеһова бүтүн бунларын һәгигәт олмадығыны үзә чыхараҹаг. Һәмишәлик сүбут олунаҹаг ки, һәјаты горујан вә ону инсана гајтаран јалныз Јеһовадыр.
6, 7. Јеһова инсанларын дирилмәсинә неҹә јанашыр вә Онун һиссләри һагда һарадан билирик?
6 Јеһова инсанлары дирилтмәјин һәсрәтиндәдир. Мүгәддәс Китаб Јеһованын дирилмәјә даир һансы һиссләри кечирдијини ачыглајыр. Мәсәлән, ҝәлин садиг Әјјубун Аллаһдан илһам алараг дедији сөзләринә нәзәр салаг: «Инсан өлсә, дириләрми? Нөвбәм чатанаҹан бу әзабдан [«иҹбари хидмәтдән», ЈД] гуртулмаг үчүн һәр ҝүн ҝөзләјәҹәјәм. Сән чағыранда ҹаваб верәҹәјәм, әлләринин бу ишинин һәсрәтини чәкәҹәксән» (Әјјуб 14:14, 15). Бу нә демәкдир?
7 Әјјуб билирди ки, өләндән сонра бир мүддәт гуртулушуну ҝөзләмәк мәҹбуријјәтиндә олаҹаг. Буна ҝөрә дә һәмин вахты ‘иҹбари хидмәт’ адландырды. О, гуртулушун мүтләг ҝәләҹәјини билирди вә буна шүбһә етмирди. Белә әминлик онда һарадан иди? Әјјуб Јеһованын һиссләриндән хәбәрдар иди: Јеһова садиг хидмәтчисини јенидән ҝөрмәјин ‘һәсрәтини чәкәҹәкди’. Бәли, Аллаһ бүтүн салеһ инсанлары һәјата гајтармаг арзусундадыр. Јеһова диҝәр инсанлара да Ҹәннәтдә әбәди јашамаг имканыны верәҹәк (Лука 23:43; Јәһја 5:28, 29). Дирилмә Аллаһын ирадәсидирсә, ким она әнҝәл ола биләр?
8. Јеһова дирилмәјә даир инсанлара неҹә «сүбут верди»?
8 Јеһова Исаны дирилтмәклә ҝәләҹәјә олан үмидимизин доғрулуғуна даир сүбут верди. Павел Афинада чыхыш едәндә демишди: «Аллаһ елә бир ҝүн тә’јин етди ки, о ҝүн сечдији Адам васитәси илә дүнјаја әдаләтлә һөкм едәҹәкдир. Ону өлүләрдән дирилдәрәк, бүтүн инсанлара бу барәдә сүбут верди» (Һәвариләрин ишләри 17:31). Павели динләјәнләрдән чоху дирилмә һаггында ешидәндә кинајә илә ҝүлсә дә, бә’зиләри иман ҝәтирди. Бәлкә дә, онларын диггәтини ҹәлб едән бу үмидин доғрулуғуна даир сүбут верилмәси иди. Јеһова Исаны дирилдәндә мө’ҹүзәләрин ән мөһтәшәмини ҝөстәрди. О Өз Оғлуну гүдрәтли руһани шәхсијјәт кими һәјата гајтарды (1 Петер 3:18). Инди, дирилмиш Иса јерә ҝәлмәздән әввәл олдуғундан даһа гүдрәтли иди. Өлмәз вә Јеһовадан сонра ән гүдрәтли шәхсијјәт олан Иса һазырда Атасынын мөһтәшәм тапшырыгларыны јеринә јетирмәјә гадирдир. Инсанларын истәр ҝөјләр, истәрсә дә јер һәјатына дирилмәси мәһз Исанын васитәсилә мүмкүндүр. О демишдир: «Дирилмә вә һәјат Мәнәм» (Јәһја 5:25; 11:25). Оғлуну дирилтмәклә Јеһова бүтүн салеһ инсанлара бу үмидин доғрулуғуна даир сүбут верди.
9. Мүгәддәс Китаб дирилмәнин ҝерчәк олдуғуну неҹә ҝөстәрир?
9 Дирилмә инсанларын ҝөзү гаршысында баш верирди вә бу барәдә Аллаһын Кәламында јазылыб. Мүгәддәс Китабда сәккиз нәфәрин јенидән һәјата инсан кими гајытмасы бүтүн тәфәррүаты илә тәсвир олунуб. Бу мө’ҹүзәләр ҝизлинҹә јох, ачыг-ашкар, чох вахт инсанларын ҝөзү гаршысында едилмишдир. Иса дөрд ҝүн мәзарда јатан Лазары јас сахлајан аилә үзвләринин, достларынын, гоһум-гоншуларынын ҝөзү гаршысында дирилтди. Бу, Исанын Аллаһ тәрәфиндән ҝөндәрилдијинә елә ҝүҹлү сүбут иди ки, онун дүшмәнләри Лазарын дирилмәсини инкар етмирдиләр. Әксинә, онлар нәинки Исаја, һәтта Лазара да гаршы суи-гәсд һазырлајырдылар! (Јәһја 11:17-44, 53; 12:9-11). Бәли, дирилмәнин мүтләг олаҹағына әмин ола биләрик. Аллаһ кечмишдәки дирилмәләри Кәламында јаздырыб ки, онлары охујанда тәсәлли алаг вә иманымыз мөһкәмләнсин.
Дирилмә үмиди тәсәлли верир
10. Мүгәддәс Китабда јазылан дирилмәләрдән тәсәлли алмаг үчүн нә етмәлијик?
10 Өлүм горхусу гаршысында тәсәлли ахтарырсынызмы? Онда Мүгәддәс Китабда гәләмә алынан дирилмәләр сизә көмәк едәр. Онлары охујанда, үзәриндә дүшүнәндә, һадисәләри ҝөзүнүзүн өнүндә ҹанландыранда дирилмә сизин үчүн даһа ҝерчәк олаҹаг (Ромалылара 15:4). Бу, нағыл дејил. Дирилдиләнләр тарихин мүәјјән дөврүндә, мүәјјән јерләрдә јашајан бизим кими инсанлар идиләр. Ҝәлин гысаҹа бир нүмунәнин — Мүгәддәс Китабда гәләмә алынмыш илк дирилмәнин үзәриндә дајанаг.
11, 12. а) Сарфатда јашајан дул гадынын башына һансы фәлакәт ҝәлди вә онун илк сөзләри нә олду? б) Јеһова Илјасын васитәсилә дул гадын үчүн нә етди?
11 Белә бир сәһнәни тәсәввүрүнүзә ҝәтирин. Бир нечә һәфтәдир ки, Илјас пејғәмбәр Сарфат шәһәриндә јашајан дул гадынын евинин јухары отағында галыр. Чәтин зәманәдир. Гураглыг, аҹлыг һөкм сүрүр. Ҹамаат гырылыр. Јеһова һәлим дул гадыны иманына ҝөрә мүкафатландырды: онун бир дәфәлик јемәји галмышды вә балаҹа оғлу илә бирликдә аҹындан өлмәк үзрә иди ки, Аллаһ Илјаса мө’ҹүзә ҝөстәрмәк үчүн ҝүҹ верди, белә ки нә күпдә ун түкәнди, нә дә габда јағ. Анҹаг инди гадынын башына бәла ҝәлир. Ушаг гәфләтән хәстәләнир вә чох кечмәмиш өлүр. Јазыг дул гадынын вәзијјәтини тәсәввүр един! Әрсиз јашамаг онсуз да чәтин иди, бир тәрәфдән дә јеҝанә өвладыны итирди. Баш верән фаҹиәдә о, Илјасы вә онун Аллаһы Јеһованы ҝүнаһландырыр. Пејғәмбәр нә едәҹәк?
12 Илјас дул гадыны јанлыш иттиһамларына ҝөрә мәзәммәт етмир. О дејир: «Оғлуну мәнә вер». Илјас ушағы јухары отаға апарыб, һәјатынын өзүнә гајытмасы үчүн тәкрар-тәкрар дуа едир. Ахырда Јеһова онун дуасына ҹаваб верир. Нәфәси өзүнә гајыдан ушағын синәси галханда Илјасын үзүндәки севинҹи бир тәсәввүрүнүзә ҝәтирин! Ушаг ҝөзләрини ачыр, онларда һәјат гығылҹымлары ҝөрүнүр. Илјас ушағы ашағы дүшүрүб, «бах оғлун сағдыр» дејәрәк анасына гајтарыр. Гадынын севинҹи ашыб-дашыр: «Инди билдим ки, сән Аллаһ адамысан вә сәнин ағзында Рәббин сөзү һагдыр» (1 Падшаһлар 17:8-24). Инди гадынын Јеһоваја вә Онун елчисинә олан иманы даһа мөһкәмдир.
13. Илјасын дул гадынын оғлуну дирилтмәси нәјә ҝөрә бизә тәсәлли ҝәтирир?
13 Белә бир һадисәнин үзәриндә дүшүнмәк, сөзсүз, сизә чох бөјүк тәсәлли ҝәтирир. Ачыг-ајдын ҝөрүнүр ки, Јеһова дүшмәнимиз олан өлүмү мәғлуб етмәјә гадирдир. Өлүләр дириләндә дул гадын кими минләрлә инсанын дујаҹағы севинҹи тәсәввүр един! Јеһова Оғлу васитәсилә өлүләри дүнја мигјасында дирилдәндә ҝөјләрдә севинҹин һәдди-һүдуду олмајаҹаг (Јәһја 5:28, 29). Өлүм доғмаларыныздан кимисә апарыбмы? Јеһованын өләнләри дирилтмәјә гадир олдуғуну вә буну едәҹәјини билмәк неҹә дә ҝөзәлдир!
Үмидин вә һәјат тәрзин
14. Дирилмә үмиди һәјатына неҹә тә’сир ҝөстәрә биләр?
14 Дирилмә үмиди сәнин индики һәјат тәрзинә неҹә тә’сир ҝөстәрә биләр? Чәтинлик, проблемләр, тә’гиб вә тәһлүкә илә үзләшәркән бу үмид сәнә ҝүҹ верәр. Шејтан истәјир ки, сән өлүмдән о гәдәр горхасан ки, нөгсансызлығыны асанлыгла һансыса бош тәһлүкәсизлик вә’динә дәјишәсән. Унутма ки, Шејтан Јеһоваја демишди: «Инсан ҹанына ҝөрә һәр шејини верәр» (Әјјуб 2:4). Бу сөзләрлә Шејтан, сән дә дахил олмагла, һамымыза шәр атыб. Доғруданмы сән тәһлүкә илә гаршылашанда Аллаһа хидмәт етмәји дајандыраҹагсан? Дирилмә үмиди үзәриндә дүшүнәрәк сән һәмишә сәмави Атамызын ирадәсини јеринә јетирмәјә әзмли олаҹагсан.
15. Тәһлүкә илә үзләшәндә Исанын Матта 10:28 ајәсиндә јазылан сөзләриндән неҹә тәсәлли ала биләрик?
15 Иса демишди: «Бәдәни өлдүрүб ҹаны өлдүрә билмәјәнләрдән... горхмајын; анҹаг даһа артыг ҹәһәннәмдә һәм бәдәни, һәм ҹаны һәлак етмәјә гадир Оландан горхун» (Матта 10:28). Шејтанын вә ја онун хидмәтчиләринин өнүндә ваһимәјә дүшмәмәлијик. Дүздүр, кимләрсә бизә зәрәр јетирә, һәтта өлдүрә биләр. Лакин әлләриндән ҝәлән ән бөјүк пислик белә мүвәггәтидир. Јеһова садиг хидмәтчиләринә дәјән һәр зәрәри, һәтта өлүмү арадан галдырмаға гадирдир вә буну мүтләг едәҹәк. Биз јалныз Јеһовадан горхмалы, Она дәрин еһтирам бәсләмәлијик. Јалныз О, һәм бәдәнимизи, һәм ҹанымызы ҹәһәннәмдә мәһв едәрәк, һәјатымызы вә ҝәләҹәјә олан үмидимизи әлимиздән алмаға гадирдир. Хошбәхтликдән, О сәнинлә белә шејин баш вермәсини истәмир (2 Петер 3:9). Дирилмә үмиди сајәсиндә, Аллаһын хидмәтчиләри олан бизләр өзүмүзү тәһлүкәсизликдә һисс едирик. Нә гәдәр ки Јеһоваја садигик, әбәди һәјата үмид едә биләрик, Шејтан вә онун тәрәфдарлары бунун гаршысында ҝүҹсүздүрләр (Мәзмур 118:6; Ибраниләрә 13:6).
16. Дирилмә үмиди һәјатда нәјә үстүнлүк верәҹәјимизә неҹә тә’сир едир?
16 Дирилмә үмиди бизим үчүн ҝерчәк олса, һәјата мүнасибәтимизи формалашдыраҹаг. Биз дәрк едирик ки, «јашајырыгса да, өлүрүксә дә, һәмишә Рәббиник» (Ромалылара 14:7, 8). Буна ҝөрә дә нәјә үстүнлүк верәҹәјимизи мүәјјән едәндә Павелин мәсләһәтинә риајәт едирик: «Бу зәманәјә ујғунлашмајын, анҹаг Аллаһын јахшы, мәгбул вә камил ирадәсинин нә олдуғуну дәрк етмәк үчүн ағлынызын јениләнмәси илә көкүндән дәјишин» (Ромалылара 12:2). Бир чох инсанлар һәр өтәри истәјин, арзунун архасынҹа гачырлар. Һәјат онлара гыса ҝөрүндүјү үчүн кеф далынҹа гачмагдан санки ағылларыны итирмишләр вә әҝәр нәҹәсә ибадәт едирләрсә дә, бу, Аллаһын ‘камил ирадәсинә’ ујғун дејил.
17, 18. а) Јеһованын Кәламында инсан һәјатынын гыса олдуғу неҹә ҝөстәрилир, анҹаг Аллаһ бизим үчүн нә истәјир? б) Биз нәјә ҝөрә һәр ҝүн Јеһоваја һәмд етмәк истәјирик?
17 Бәли, һәјат инди гысадыр. Тәхминән 70-80 илә «өмрүмүз тез битир, учуб ҝедир» (Мәзмур 90:10). Инсанлар от, көлҝә, нәфәс кими ҝәлди-ҝедәрдирләр (Мәзмур 103:15; 144:3, 4). Анҹаг Аллаһ истәмирди ки, биз бир нечә илә бөјүјүб боја-баша чатаг, дүнјаҝөрүшүмүзү артырараг јердә галан өмрүмүзү хәстәлик, гоҹалыг ичиндә кечириб өлүмә доғру ҝедәк. Јеһова инсанлары әбәди јашамаг истәји илә јаратды. Мүгәддәс Китабда дејилир: «Әбәдијјәти дә инсанларын үрәјинә гојду» (Ваиз 3:11). Мәҝәр Аллаһ гәддардырмы ки, әввәлҹә бизә белә арзу версин, сонра исә ону әлчатмаз етсин? Хејр, «Аллаһ мәһәббәтдир» (1 Јәһја 4:8). О, өлән инсанлары дирилдәҹәк вә онлара әбәди һәјат үмидини верәҹәк.
18 Дирилмә үмиди сајәсиндә, тәһлүкәсиз ҝәләҹәји әлдә едә биләрик. Инди бүтүн исте’дад вә баҹарығымызы инкишаф етдирмәјин вахты дејил! Учурума ҝедән бу дүнјадан «там истифадә» етмәмәлијик (1 Коринфлиләрә 7:29-31; 1 Јәһја 2:17). Бизә һәгиги үмиди олмајан инсанлардан фәргли олараг, гијмәтли ән’ам верилиб: биз билирик ки, әҝәр Јеһова Аллаһа садиг галсаг, әбәдијјәт бојунҹа Ону иззәтләндирәҹәк, һәјатдан зөвг алаҹағыг. Буна ҝөрә дә, ҝәлин дирилмәнин баш верәҹәјинә бизи әмин едән Јеһоваја һәр ҝүн һәмд едәк!
Неҹә ҹаваб верәрдиниз?
• Дирилмәјә мүнасибәтимиз неҹә олмалыдыр?
• Дирилмәнин мүтләг олаҹағыны нә ҝөстәрир?
• Дирилмә үмиди тәсәлли ҝәтирсин дејә, нә етмәк лазымдыр?
• Дирилмә үмиди һәјат тәрзинә неҹә тә’сир едә биләр?
[20-ҹи сәһифәдәки шәкил]
Әјјуб билирди ки, Јеһова салеһләри дирилтмәк һәсрәтиндәдир.
[21-ҹи сәһифәдәки шәкил]
«Бах оғлун сағдыр».