Валеһедиҹи ишләрин Јараданыны дәрк един!
“Дур вә Аллаһын валеһедиҹи ишләрини дүшүн [“Аллаһын валеһедиҹи ишләринә гаршы диггәтли ол”, ЈД]” (ЕЈУБ 37:14).
1, 2. Мин доггуз јүз ијирми икинҹи илдә һансы тәәҹҹүблү ачылыш едилди вә бу ачылыш һансы реаксијаја сәбәб олду?
АРХЕОЛОГ вә инҝилис лорду бирликдә, хәзинә ахтарышына чох илләр сәрф етдиләр. Нәһајәт, 1922-ҹи ил нојабрын 26-да археолог Һовард Картерин вә лорд Карнарвонун ҝөстәрдикләри инадкарлыг мүвәффәгијјәтлә нәтиҹәләнди: онлар мисир фир’онларынын басдырылдығы мәшһур Һөкмдарлар вадисиндә фир’он Тутанхамонун мәгбәрәсини ашкар етдиләр. Дивара һөрүлмүш вә гәдим мөһүрләрлә мөһүрләнмиш гапыны диггәтлә јохладыгдан сонра, онлар гапыда дешик ачдылар. Картер әлиндәки шамы еһтијатла дешијә јахынлашдырыб, ичәри бахды.
2 Картер сонрадан хатырлајырды: “Сусдуғум үчүн нараһат олан лорд Карнарвон сәбирсизликлә сорушду: “Сиз нә исә ҝөрүрсүнүзмү?” Ҹавабында садәҹә олараг: ”Бәли, валеһедиҹи шејләр” — дејә билдим”. Мәгбәрәдә, минләрлә сајсыз-һесабсыз ҹаваһиратын арасында халис гызылдан табут да варды. Ола билсин, сиз бу “валеһедиҹи әшјалардан” бә’зиләрини шәкилләрдә вә ја музејләрдә ҝөрмүсүнүз. Лакин бу музеј експонатлары нә гәдәр валеһедиҹи олсалар да, һәр һалда онларын сизин һәјатыныза һеч бир аидијјәти јохдур. Буна ҝөрә дә, ҝәлин инди, билаваситә һәјатымыза аидијјәти олан вә бизим үчүн хүсуси гијмәт дашыјан валеһедиҹи ишләри нәзәрдән кечирәк.
3. Бизим үчүн һәгигәтән дә гијмәтли олан валеһедиҹи ишләр һаггында һарадан өјрәнә биләрик?
3 Һәр һансы мүасир кино вә ја идман улдузундан, сијасәтчи вә ја крал аиләсинин үзвүндән даһа чох диггәтәлајиг олан, чох әсрләр бундан әввәл јашамыш бир инсаны хатырлајаг. О, “шәрг оғулларындан... ән бөјүјү” адландырылмышды. Онун ады бизә танышдыр; о, Ејубдур. Мүгәддәс Китабын бүтөв бир китабы она һәср олунуб. Ејубун мүасирләриндән бири, Елиһу адлы бир ҝәнҹ, она дүзәлиш вермәји өзүнә борҹ билирди. Елиһу сөјләди ки, Ејуб өзүнә вә әтрафындакылара һәддиндән артыг диггәт јетирир. Биз, “Ејуб” китабынын 37-ҹи фәслиндә мүдрик вә һәр биримиз үчүн сон дәрәҹә гијмәтли олан мәсләһәтләр тапаҹағыг (Ејуб 1:1—3; 32:1—33:12).
4. Ејуб 37:14 ајәсиндә јазылан сөзләри демәјә, Елиһуну вадар едән нә олду?
4 Ејубун дүшүнҹә вә ја әмәлләриндә ҝүнаһ ишләтдијини санан јаланчы достлары узун-узады данышдылар (Ејуб 15:1—6, 16; 22:5—10). Елиһу сәбирлә сөһбәтин сонуну ҝөзләјирди. Сонра о, анлајыш вә һикмәтлә сөһбәтә башлады. Елиһунун дедикләринин чоху олдугҹа гијмәтлидир, анҹаг сиз ән ваҹиб фикрә диггәт јетирин: “Буна гулаг вер, еј Ејуб; дур вә Аллаһын валеһедиҹи ишләрини дүшүн [“Аллаһын валеһедиҹи ишләринә гаршы диггәтли ол”, ЈД]” (Ејуб 37:14).
Валеһедиҹи ишләрин Јараданы
5. Елиһунун диггәт јетирдији Аллаһын валеһедиҹи ишләри нә һагда шәһадәт едир?
5 Фикир верин: Елиһунун сөзләринә ҝөрә, Ејуб нә өзүнә, нә Елиһуја, нә дә ки башга бир инсана диггәт јетирмәли дејилди. Елиһу Ејубу, һәмчинин бизи дә, Јегова Аллаһын валеһедиҹи ишләринә гаршы диггәтли олмаға тәшвиг етди. “Аллаһын валеһедиҹи ишләри” ифадәси алтында нәзәрдә тутулан нәдир? Бундан әлавә, сағламлығымыз, мадди вәзијјәтимиз вә ҝәләҹәјимиз барәдә дүшүнәркән, һәмчинин аиләмиз, иш јолдашларымыз вә гоншуларымызла марагланаркән Аллаһын ишләринә гаршы диггәтли олмағымыз нәјә ҝөрә ваҹибдир? Јегова Аллаһын валеһедиҹи ишләри, Онун мүдриклијинә вә бизи әһатә едән мадди варлыглар үзәриндә олан һакимијјәтинә инандырыҹы сурәтәдә шәһадәт едир (Неһемја 9:6; Мәзмур 24:1; 104:24; 136:5, 6). Буну ајдын сурәтдә дәрк етмәк үчүн, ҝәлин “Јешу” китабындан бир парчаны гысаҹа нәзәрдән кечирәк.
6, 7. а) Јегова, Мусанын вә Јешунун ҝүнләриндә һансы валеһедиҹи ишләри етди? б) Мусанын вә Јешунун ҝүнләриндә Аллаһын ҝөстәрдији мө’ҹүзәләрдән биринин шаһиди олсајдыныз, һансы һиссләри кечирәрдиниз?
6 Јегова Гәдим Мисири бәлалара дүчар етди вә даһа сонра Гырмызы дәнизин суларыны ајырды ки, Муса исраиллиләри көләликдән чыхара билсин (Чыхыш 7:1—14:31; Мәзмур 106:7, 21, 22). “Јешу” китабынын 3-ҹү фәслиндә буна бәнзәр һадисә тәсвир олунур. Мусанын вәрәсәси Јешу, Аллаһын халгыны, сујун төрәтдији башга бир манеәни дәф етмәјә вә Вә’д едилән дијара апармаға һазырлашаркән деди: “Өзүнүзү тәгдис един; чүнки сабаһ РӘБ аранызда мө’ҹүзәләр [“валеһедиҹи ишләр”, ЈД] едәҹәкдир” (Јешу 3:5). Бу һансы валеһедиҹи ишләрдир?
7 Мүгәддәс Китабда дејилир ки, Јегова, сујун јаратдығы манеәни — бу дәфә исә Иордан чајыны — ашмаға јенидән имкан верди вә јүз минләрлә киши, гадын вә ушаглар гуру илә кечә билдиләр (Јешу 3:7—17). Әҝәр биз чајын ичиндән јол ачылдығыны вә бүтүн халгын о бири таја кечдијини ҝөрсәјдик, јәгин ки, тәәҹҹүбдән донуб галардыг! Ахы, бу һадисә Аллаһын өз јаратдығы варлыглар үзәриндә олан гејри-ади һакимијјәтини ҝөстәрир. Һәтта бу ҝүн, ҝөзләримизин өнүндә бундан да тәәҹҹүблү ишләр баш верир. Мәһз нә баш вердијини, һәмчинин бизим бу ишләрә нәјә ҝөрә диггәт јетирмәли олдуғумузу, Ејуб 37:5—7 ајәләрини нәзәрдән кечирәркән ҝөрәҹәјик.
8, 9. Ејуб 37:5—7 ајәләриндә һансы валеһедиҹи ишләр һаггында данышылыр вә нәјә ҝөрә биз онларын үзәриндә дүшүнмәлијик?
8 Елиһу деди: “Аллаһ сәсилә валеһедиҹи сурәтдә ҝурулдајар; анлаја билмәдијимиз бөјүк ишләр едәр”. “Валеһедиҹи сурәтдә едәр” дедији заман Елиһу нәји нәзәрдә тутур? О, гар вә јағыш барәдә хатырладыр. Шиддәтли јағыш вә ја гар јағанда фермер тарладакы ишини дајандырмаға мәҹбур олур. Бу заман онун, Аллаһын ишләри һаггында дүшүнмәјә һәм вахты, һәм дә әсасы олур. Биз кәнд тәсәррүфаты илә мәшғул олмасаг да, јәгин ки, гар вә јағыш, бизләрдән һәр биримизин һәјатына тә’сир ҝөстәрир. Јашадығымыз јердән асылы олараг, гар вә јағыш бизим дә мәшғулијјәтләримизә мане ола биләр. О заман бу мө’ҹүзәләрин архасында дуран Шәхс һаггында вә онларын дашыдығы мә’на барәдә дәриндән дүшүнүрүкмү? Сән нә вахтса бунларын үзәриндә дүшүнмүсәнми?
9 Мараглыдыр ки, “Ејуб” китабынын 38-ҹи фәслинин сөзләринә әсасән, Ејуба мә’налы суаллар верәркән, Јегова Аллаһ өзү дә бу ҹүр мүһакимә јүрүдүр. Јараданымыз бу суалларла Ејуба мүраҹиәт етсә дә, һәмин суаллар ејни заманда бизим дә һәјата олан нөгтеји-нәзәримизә, мөвҹудлуғумуза вә ҝәләҹәјимизә аиддир. Беләликлә, Аллаһын нә һагда сорушдуғуна диггәт јетирәк вә Онун бунунла нә демәк истәдији үзәриндә дүшүнәк. Бәли, ҝәлин Ејуб 37:14 ајәсиндәки мүдрик сөзләрә риајәт едәк.
10. “Ејуб” китабынын 38-ҹи фәсли бизә нәји өјрәдир вә бунунла әлагәдар һансы суаллар јараныр?
10 Китабын 38-ҹи фәсли белә сөзләрлә башланыр: “О заман РӘБ гасырғанын ичиндән Ејуба ҹаваб вериб деди: “Билҝисиз сөзләрлә тәгдири гаралдан бу адам ким? Инди гуршағыны белинә вур, киши кими; сәндән сорушум вә мәнә анлат”” (Ејуб 38:1—3). Бу сөзләр — дејиләҹәк нөвбәти сөзләрә бир нөв ҝириш иди. Ејуб онлары ешидәндә, Каинаты Јараданын гаршысында дурдуғуну вә Она һесабат вердијини дәрк етмәли иди. Бу сөзләр бу ҝүн неҹә бизим, еләҹә дә мүасирләримиз үчүн фајдалыдыр. Сонра Аллаһ, Елиһунун дедикләринә тохунараг сорушду: “Мән дүнјанын тәмәлләрини гојаркән, сән һарада идин? Билдир, әҝәр сәндә анлајыш варса. Мадам ки, билирсән, онун өлчүләрини ким гојду? Јахуд ипи онун үзәринә ким чәкди? Онун тәмәлләри нәјин үзәринә бәркидилди? Јахуд онун ҝушә дашыны ким гојду?” (Ејуб 38:4—6).
11. Ејуб 38:4—6 ајәләрини охујаркән, бизим үчүн нә ајдын олур?
11 Һәгигәтән дә, Јер јарадылан заман Ејуб вә бизим һамымыз һарада идик? Бизләрдән ким исә, Јерин лајиһәси һазырланан заман архитектор вә ја онун көмәкчиси кими иштирак едибми? Хәткешлә онун өлчүләрини гејд едибми? Тәбии ки, јох. О вахт инсанлар һәлә мөвҹуд дејилдиләр. Јашадығымыз Јер күрәсини нәһәнҝ евлә мүгајисә едәрәк, Аллаһ сорушур: “Онун ҝушә дашыны ким гојду?” Инсанларын әксәријјәти билир ки, Јер күрәси илә Ҝүнәш арасында олан мәсафә, инсанларын јер үзәриндә јашаја билмәләри үчүн әлверишли шәраит јарадыр. Бундан әлавә, о, дүзҝүн өлчүләрә маликдир. Әҝәр планетимиз хејли бөјүк олсајды, һидроҝен атмосфердә топланар вә Јер күрәсиндә јашамаг мүмкүн олмазды. Анҹаг ким исә “ҝушә дашыны” мәһз лазыми јерә гојмушдур. Буна ҝөрә иззәтә ким лајигдир? Ејубму, бизми, јохса һәр һалда Јегова Аллаһмы? (Сүлејманын мәсәлләри 3:19; Јеремја 10:12).
Инсанлардан ким ҹаваб верә биләр?
12. Ејуб 38:6 ајәсиндә јазылан суал бизә нә һагда хатырладыр?
12 Аллаһ һәмчинин сорушур: “Онун тәмәлләри нәјин үзәринә бәркидилди?” Јахшы суалдыр. Ејуба таныш олмајан “ҹазибә” термини, ҝәрәк ки, бизә јахшы мә’лумдур. Биз һамымыз билирик ки, Јер күрәси өз јериндә, јә’ни “тәмәлләри” үзәриндә бөјүк күтләјә малик олан Ҝүнәшин ҹазибә гүввәси сајәсиндә дајаныр. Бәс ҹазибәнин, јә’ни гравитасијанын нә демәк олдуғуну ахыра кими баша дүшән вармы?
13, 14. а) Гравитасија илә әлагәдар инсан нәји е’тираф етмәјә мәҹбурдур? б) Ејуб 38:6 ајәсиндә јазылан сөзләр бизи нәјә тәшвиг етмәлидир?
13 Бу јахынларда ишыг үзү ҝөрән “Изаһ едилмиш Каинат” (“The Universe Explained”) адлы китабын мүәллифи е’тираф едир ки, “гравитасија — ән таныш, лакин ејни заманда да ән аз анлашылан тәбии һадисәдир”. Сонра бу китабда әлавә едилир: “Елә тәәссүрат јараныр ки, гравитасија бош фәзада бир анда, өзү дә анлашылмаз бир тәрздә јајылыр. Лакин сон илләрдә физикләр, гравитасијанын гравитон адланан зәррәҹикләрдән тәшкил олунмуш далғалар шәклиндә јајылмасы фәрзијјәсини ирәли сүрмүшләр... Анҹаг онларын мөвҹудлуғуна һеч ким әмин дејил”. Мүәллифин сөзләри үзәриндә дүшүнәк.
14 Јегованын Ејуба бу суаллары вердији вахтдан, елм 3 000 ил әрзиндә инкишаф етмишдир. Лакин инсанларын јашаја билмәси үчүн, Јери лазыми орбитдә сахлајан гравитасијаны нә биз, нә дә физика мүтәхәссисләри там изаһ едә билмирик (Ејуб 26:7; Ишаја 45:18). Бунунла биз сизи, гравитасијанын бүтүн сирләрини анламаға тәшвиг етмирик. Анҹаг Аллаһын валеһедиҹи ишләриндән биринә диггәт јетирсәк, артыг Она башга ҹүр јанашмаға башлајаҹағыг, елә дејилми? Аллаһын мүдриклији вә билији Она олан еһтирамымызы даһа да ҝүҹләндирмирми? Онун һаггында даһа чох өјрәнмәјә тәшвиг олунмуругму?
15-17. а) Ејуб 38:8—11 ајәләриндә нәјә диггәт јетирилир вә бунунла әлагәдар һансы суаллар јараныр? б) Океанлар вә онларын Јер күрәсинин сәтһи үзәриндә пајланмасы һаггында биликләримизлә әлагәдар нәји е’тираф етмәли олуруг?
15 Бунунла Јараданын суаллары битмир. О давам едир: “Јахуд дәнизи гапыларла ким гапады; ана бәтниндән чыхыб фышгырдығы заман; она булудлары палтар вә гаты гаранлығы гундаг етдијим заман вә она мәһдудијјәтими гојдуғум, гапылары вә килидләри гојдуғум заман вә: бураја гәдәр ҝәләҹәксән вә о бири тәрәфә кечмәјәҹәксән, мәғрур далғаларын бурада дураҹаг, дедијим заман?” (Ејуб 38:8—11).
16 Бурада хатырладылан дәнизләрин “гапанмасына” гит’әләр, океанлар, һәмчинин габарма вә чәкилмәләр дә дахилдир. Бүтүн бунлары инсан һансы мүддәт әрзиндә мүшаһидә едиб, арашдырыр? Бу арашдырмалар мин илләрдир ки, давам едир, ачылышларын әксәријјәти исә сон јүз ил әрзиндә едилмишдир. Елә тәәссүрат јарана биләр ки, бу ҝүн бу һагда артыг һәр шеј мә’лум олмалыдыр. Лакин сиз, 2001-ҹи ил әрзиндә бу суалла ҹидди сурәтдә мәшғул олсајдыныз вә сон мә’луматлары әлдә етмәк үчүн дүнјанын ән бөјүк китабханаларынын ҝениш вәсаитләриндән вә Интернетдән истифадә етсәјдиниз, нә ашкар едә биләрдиниз?
17 Ҝениш јајылмыш бир арајыш китабчасында дејилир: “Континентал платформаларын вә океан һөвзәләринин Јер күрәсинин сәтһи үзәриндә пајланмасы, һәмчинин гурунун үмуми шәкли, артыг узун мүддәтдир ки, елми тәдгигләр вә нәзәри мәсәләләр үчүн мараглы суал олараг галыр”. Бундан сонра енсиклопедијада мүмкүн олан дөрд изаһат верилир, лакин дејилир ки, бунлар садәҹә “чохсајлы фәрзијјәләрдән бир нечәсидир”. Лүғәтдә исә, фәрзијјә сөзү — “бир шеј һаггында тәхмини мүлаһизә, ҝүман, еһтимал” кими изаһ олунур.
18. Ејуб 38:8—11 ајәләрини нәзәрдән кечирәркән, һансы нәтиҹәјә ҝәлирсиниз?
18 Бу, Ејуб 38:8—11 ајәләриндә охудуғумуз суалларын вахтында верилдијини гејд етмирми? Гит’әләр вә океанлар Јер үзүндә бизим әмәјимиз сајәсиндә јерләшдирилмәјиб. Ајын ҹазибә гүввәси габарма вә чәкилмәләрә сәбәб олур, һәм дә нәзәрә алмаг лазымдыр ки, габарма заманы су, бир гајда олараг, инсанлар јашајан әразиләри басмыр; бунун белә олмасы үчүн Ајы гурашдыран да биз дејилик. Амма биз, бүтүн бу валеһедиҹи ишләрин Јараданынын ким олдуғуну билирик (Мәзмур 33:7; 89:9; Сүлејманын мәсәлләри 8:29; Һәвариләрин ишләри 4:24; Вәһј 14:7).
Јеговаја, лајиг олдуғу иззәти верин
19. Ејуб 38:12—14 ајәләриндәки физики һадисәләр һансы шаиранә үсулла тәсвир олунур?
19 Јерин фырланмасыны да инсан әмәјинин нәтиҹәси адландырмаг олмаз. Бунун сајәсиндә сәһәр чох вахт валеһедиҹи ҝөзәлликлә ачылмаға башлајыр — бу һагда Ејуб 38:12—14 ајәләриндә дејилир. Ҝүн чыханда јерин релјефи даһа ајдын ҝөрүнүр. Бу, мөһүрүн тә’сири илә ҝилин өз формасыны дәјишмәсинә бәнзәјир. Јерин фырланмасы һаггында бир гәдәр дүшүндүкдән сонра, бизә онун һәддиндән артыг тез дөвр етмәдијинә јалныз тәәҹҹүбләнмәк галыр, әкс тәгдирдә, бизә мә’лум олдуғу кими, бүтүн бунлар фәлакәтлә нәтиҹәләнәрди. Лакин Јер һәддиндән артыг аста да фырланмыр, јохса ҝүнләр вә ҝеҹәләр даһа узун оларды. Истидән вә сојугдан инсан һәјаты гејри-мүмкүн оларды. Нә јахшы ки, Јер күрәсинин фырланмасынын сүр’әтини инсанлар јох, Аллаһ тә’јин етмишдир! (Мәзмур 148:1—5).
20. Ејуб 38:16, 18 ајәләриндә галдырылан суаллара сиз неҹә ҹаваб верәрдиниз?
20 Инди исә тәсәввүр един ки, Аллаһ сизә бир сыра јени суаллар верир: “Дәнизин гајнагларына гәдәр ендинми? Јахуд дәрјаларын дибләриндә ҝәздинми?” Бу суаллара һәтта океанограф белә там ҹаваб верә билмәзди! “Дүнјанын ҝенишлијини анладынмы? Әҝәр бунун һамысыны билирсәнсә, билдир” (Ејуб 38:16, 18). Бизләрдән кимсә, бүтүн јер үзүнү ҝәздијини вә онун һәр јерини — јахуд чох һиссәсини тәдгиг етдијини сөјләјә биләрми? Јер күрәсинин бүтүн ҝөзәл мәнзәрәләринә вә мө’ҹүзәләринә диггәт јетирмәк үчүн нечә инсан өмрү јашамаг лазымдыр? Бу ҹүр кечән өмүр неҹә дә ҝөзәл оларды!
21. а) Ејуб 38:19 ајәсиндә јазылан тәбиәт һадисәләрини елм неҹә изаһ едир? б) Ҝүнәш ишығы һаггындакы биликләримиз бизи нәјә тәшвиг етмәлидир?
21 Ејуб 38:19 ајәсиндә верилән чәтин суаллара диггәт јетирәк: “Ишығын отурдуғу јер, онун јолу һарада, бәс гаранлыг, онун јери һарадыр ки?” (Ејуб 38:19). Алимләрин фикри јәгин ки, сизә мә’лумдур. Онлар узун мүддәт һесаб едирдиләр ки, ләпәләрин ноһурда јајылдығы кими, ишыг да далғалар шәклиндә јајылыр. Сонра 1905-ҹи илдә Алберт Ејнштејн, ишығын енержи зәррәҹикләри шәклиндә һәрәкәт етмәси фәрзијјәсини ирәли сүрдү. Ејнштејнин изаһатыны һәгигәтин сон мәрһәләси адландырмаг олармы? Бу јахынларда дәрҹ олунмуш енсиклопедијада белә бир суал верилир: “Ишыг далғадырмы, јохса зәррәҹик?” Вә гејд олунур: “Ҝөрүндүјү кими, [ишыг] ејни заманда һәм далға, һәм дә зәррәҹик ола билмәз, чүнки бу ики форма [далғалар вә зәррәҹикләр] арасында фәрг олдугҹа бөјүкдүр. Даһа гәти десәк, ишыг нә далғадыр, нә дә зәррәҹик”. Беләликлә, инсан бу ҹәһәтдән Аллаһын ишләрини там мә’нада изаһ едә билмир. Бунунла белә, Ҝүнәш ишығы — билаваситә вә долајысы илә — бизи иситмәјә давам едир. Биткиләрин Ҝүнәш ишығына реаксија ҝөстәрмәси сајәсиндә, гида илә тә’мин олунур вә оксиҝенлә нәфәс алырыг. Биз охуја билир, бизә әзиз олан инсанларын үзүнү ҝөрүр, ҝүнүн батмасына бахыб һәзз алырыг вә с. Биз бүтүн бунларда Аллаһын валеһедиҹи ишләрини ҝөрмәли дејиликми? (Мәзмур 104:1, 2; 145:5; Ишаја 45:7; Јеремја 31:35).
22. Вахтилә Давуд Аллаһын валеһедиҹи ишләринә неҹә һај верди?
22 Бәс Аллаһын валеһедиҹи ишләри үзәриндә дүшүнмәк, биздә јалныз һөрмәткар горху, һејрәт вә Онун ҹалалы гаршысында валеһлик һиссими ојатмалыдыр? Һеч дә елә дејил. Кечмишдә мәзмурчу Давуд е’тираф едирди ки, Аллаһын бүтүн ишләрини дәрк етмәк гејри-мүмкүндүр. О јазырды: “Ја РӘБ Аллаһым, јаратдығын харигәләр вә бизим үчүн дүшүнҹәләрин чохдур; сәнә бәнзәјән јохдур. Онлары е’лан едиб сөјләмәк истәсәм, саја ҝәлмәз” (Мәзмур 40:5). Әлбәттә ки, Давуд Аллаһын валеһедиҹи ишләри һаггында сусаҹағыны нәзәрдә тутмурду. Буна Давудун, Мәзмур 9:1 ајәсиндә ифадә олунан гәтијјәтли әһвал-руһијјәси шәһадәт едир: “Бүтүн үрәјимлә РӘББӘ шүкр едәҹәјәм; бүтүн мө’ҹүзәләрини анладаҹағам”.
23. Аллаһын валеһедиҹи ишләри сиздә һансы һиссләри ојадыр вә сиз башгаларына һансы көмәји ҝөстәрә биләрсиниз?
23 Мәҝәр бу бизим дә үрәјимизә тә’сир етмирми? Мәҝәр әһатәсиндә олдуғумуз, Аллаһын јаратдыгларынын ҹалалы Јарадан һаггында, Онун валеһедиҹи ишләри вә ҝәләҹәкдә һәјата кечирмәк истәдији нијјәтләри һаггында данышмаға бизи тәшвиг етмирми? Ҹаваб ајдындыр: биз “Онун иззәтини милләтләр арасында, валеһедиҹи ишләрини бүтүн халглар арасында е’лан” етмәлијик (Мәзмур 96:3—5). Јарадан һаггында өјрәндикләримизи башгалары илә бөлүшәркән, Аллаһын валеһедиҹи ишләринә ҝөрә дәрин миннәтдарлығымызы тәзаһүр етдиририк. Һәтта бу инсанлар атеист ҹәмијјәтиндә тәрбијә алмыш олсалар белә, бизим шүурлу вә инандырыҹы дәлилләримиз, онлары Аллаһын мөвҹуд олдуғуну гәбул етмәјә тәшвиг едә биләр. Бундан әлавә, еһтимал ки, онлар “һәр шеји” Јарадан барәдә даһа чох өјрәнмәк вә валеһедиҹи ишләрин Јараданы Јеговаја хидмәт етмәк истәјәҹәкләр (Вәһј 4:11).
Сиз неҹә ҹаваб верәрдиниз?
• Ејуб 37:14 ајәсиндә јазылан чағырышы охујаркән, сиз Аллаһын јаратдығы һансы ишләр барәдә дүшүнүрсүнүз?
• “Ејуб” китабынын 37-ҹи вә 38-ҹи фәсилләриндә тәсвир олунан һансы һадисәләри елм дәгиг изаһ едә билмир?
• Сиз, Аллаһын валеһедиҹи ишләри барәдә дүшүнәркән һансы һиссләри кечирирсиниз вә бу ҹүр дүшүнҹәләр сизи нәјә тәшвиг едир?
[7-ҹи сәһифәдәки шәкил]
Дәнизи гапајан вә онун суларыны сахлајан кимдир?
[7-ҹи сәһифәдәки шәкил]
Јер күрәсинин бүтүн ҝушәләрини ҝәзәрәк, Аллаһын јаратдыгларынын ҝөзәллијиндән ким һәзз алыб?