Нөгсансызлыг јолу илә јери
«Мән исә камалла [«нөгсансызлыгда», ЈД] ҝәзирәм» (МӘЗМУР 26:11).
1, 2. а) Инсанлар Аллаһын һөкмранлыг һүгугу илә бағлы мүбаһисәли суала неҹә ҹәлб олунмушлар? б) Шүурлу мәхлуглар Јеһованын тәрәфини тутдугларыны неҹә ҝөстәрә биләрләр?
ШЕЈТАН Еден бағында үсјан галдырараг, Аллаһын јаратдығы бүтүн варлыгларын үзәриндәки һакимијјәтинин әдаләтли олдуғуну шүбһә алтына гојду. Даһа сонра о бәјан етди ки, инсанлар Аллаһа өз хејрләри үчүн хидмәт едирләр (Әјјуб 1:9-11; 2:4). Беләликлә инсанлар Јеһованын һөкмранлыг һүгугу илә бағлы мүбаһисәли суала ҹәлб олундулар.
2 Аллаһын јердә вә ҝөјдә јаратдығы варлыгларын өзләрини неҹә апармаларындан асылы олмајараг, О Өз Һөкмранлыг мөвгејини итирмир, лакин бунунла белә онлар бу мүбаһисәли суалда кимин тәрәфини тутдугларыны ҝөстәрмәк имканына маликдирләр. Онлар буну неҹә едә биләрләр? Өз давранышлары, јә’ни нөгсансызлыг јолу илә јеријиб-јеримәмәкләри илә. Беләликлә, бүтүн шүурлу мәхлуглар мәһз өз нөгсансызлыгларынын әсасында мүһакимә олуна биләрләр.
3. а) Әјјуб вә Давуд Јеһовадан нәји хаһиш едирдиләр? б) Нөгсансызлыгла бағлы һансы суаллар јараныр?
3 Әјјуб әминликлә демишдир: «Гој Аллаһ мәни һагг тәрәзисиндә чәксин, камил [«нөгсансыз», ЈД] олдуғуму ҝөрсүн» (Әјјуб 31:6). Гәдим Исраилин падшаһы Давуд да Јеһовадан бу һагда хаһиш етмишдир: «Мәни һаглы чыхар, ја Рәбб, чүнки мән камалла [«нөгсансызлыгда», ЈД] ҝәзмишәм, сарсылмадан Рәббимә ҝүвәнмишәм» (Мәзмур 26:1). Бизим дә нөгсансызлыг јолу илә јеримәјимиз һәјати ваҹибдир. Бәс нөгсансызлыг нәдир вә нөгсансызлыг јолу илә јеримәк нә мә’на дашыјыр? Нөгсансызлығы горумагда бизә нә көмәк едәҹәк?
«Мән нөгсансызлыгда ҝәзмишәм»
4. Нөгсансызлыг нәдир?
4 Мүгәддәс Китабда нөгсансызлыг сөзү алтында дүзҝүнлүк, гүсурсузлуг вә салеһлик нәзәрдә тутулур. Лакин нөгсансызлыг дүзҝүн әмәлләрдән даһа артыг мә’на дашыјыр. Бу, әхлаги ҹәһәтдән сағлам вә үрәк бүтөвлүјү илә Јарадана сәдагәтли олмаг демәкдир. Аллаһла сөһбәтиндә Шејтан Әјјубун нијјәтләрини шүбһә алтында гојду: «Әлини узадыб онун әтинә вә сүмүјүнә тохун, о, ҝөзүнүн габағында мүтләг Сәнә лә’нәт едәҹәк» (Әјјуб 2:5). Демәли, нөгсансызлыг дүзҝүн әмәлләрдән башга үрәјин дүзҝүн нијјәтләрини дә нәзәрдә тутур.
5. Нәдән ҝөрүнүр ки, нөгсансыз олмаг камил олмаг демәк дејил?
5 Нөгсансыз олмаг камил олмаг демәк дејил. Давуд падшаһ гејри-камил иди вә һәјатында бир нечә дәфә ҹидди сәһвләрә јол вермишди. Бунунла белә, Мүгәддәс Китабда онун һаггында «үрәк нөгсансызлығы илә» јеријән инсан кими данышылыр (1 Падшаһлар 9:4, ЈД). Нә үчүн? Чүнки Давуд Јеһованы севирди. Онун үрәји Аллаһа садиг иди. О, өз сәһвләрини көнүллү олараг е’тираф едир, төһмәти гәбул едир вә өз јолларыны дүзәлдирди. Давудун нөгсансызлығы барәдә онун өз Аллаһы Јеһоваја олан һәдсиз сәдагәти вә мәһәббәти әсасында мүһакимә јүрүтмәк олар (Ганунун тәкрары 6:5, 6).
6, 7. Нөгсансызлыгда јеримәк нә демәкдир?
6 Нөгсансызлыг һәјатын мүәјјән саһәси илә, мәсәлән, динлә мәһдудлашмыр, инсанын бүтүн һәјатына тә’сир ҝөстәрир. Давуд нөгсансызлыгда «јеријирди». Бир әсәрдә дејилир ки, «“јеримәк” фе’ли “һәјат јолуна” вә ја “һәјат тәрзинә” аид ола биләр» («Тһе Неw Ынтерпретер’с Библе»). Өз јолларында нөгсансыз оланлар һаггында мәзмурчу охујурду: «Нә бәхтијардыр Онун [Аллаһын] өјүдләринә әмәл едәнләр, бүтүн гәлби илә Ону ахтаранлар. Һәгигәтән, онлар фитнәкарлыг етмәзләр, Рәббин јолунда ҝәзәрләр» (Мәзмур 119:1-3). Нөгсансыз инсан һәмишә Аллаһын ирадәсини јеринә јетирмәјә вә Онун јолу илә јеримәјә ҹан атыр.
7 Нөгсансызлыгда јеријән кәс, һәтта чәтин шәраитләрдә белә Аллаһа садиг галыр. Бизим нөгсансызлығымыз, сынаглара мәтанәтлә таб ҝәтирмәкдә, бәдбәхтликләр заманы руһ мөһкәмлијини горумагда вә бу пис дүнјанын ширникдириҹи тә’сирләринә тәслим олмамагда ифадә олунур. Өз садиглијимизлә биз Јеһованын гәлбини севиндиририк, чүнки бу заман О, Ону утандырана нә ҹаваб верәҹәјини билир (Сүлејманын мәсәлләри 27:11). Әјјуб кими биз дә өзүмүз үчүн гәти гәрар гәбул едә биләрик: «Сон нәфәсимә гәдәр камиллијимдән [«нөгсансызлығымдан», ЈД] әл чәкмәјәҹәјәм» (Әјјуб 27:5). Бәс нөгсансызлыгда јеримәјә бизә нә көмәк едәҹәк? Ҹавабы 26-ҹы Мәзмурда тапаҹағыг.
«Гәлбими, бөјрәкләрими саф ет»
8. Давудун, Јеһованын онун бөјрәкләрини вә үрәјини тәдгиг етмәси барәдә хаһиш етмәсиндән нә өјрәнирик?
8 Давуд дуа едирди: «Ја Рәбб, мәни сынагдан кечир, Сән мәни имтаһан ет, гәлбими, фикирләрими [«бөјрәкләрими», ЈД] саф ет» (Мәзмур 26:2). Бөјрәкләр бәдәнин дәринликләриндә јерләшир. Онлар ән ҝизлин фикирләри вә һиссләри тәмсил едир. «Үрәк» алтында исә инсанын дахили варлығы — нијјәтләри, һиссләри вә дүшүнҹәләри нәзәрдә тутулур. Давуд, Јеһованын ону диггәтлә сынагдан кечирмәсини хаһиш етмәклә истәјирди ки, Аллаһ онун ҝизлин фикирләрини вә һиссләрини тәдгиг етсин.
9. Јеһова бизим символик бөјрәкләримизи вә үрәјимизи һансы мә’нада сафлашдырыр?
9 Давуд Аллаһдан хаһиш едирди ки, онун бөјрәкләрини вә үрәјини саф етсин. Јеһова бизим дахили варлығымызы неҹә саф едир? Давуд тәрәннүм едирди: «Мәнә нәсиһәт верән Рәббә алгыш едирәм, һәтта ҝеҹәләр дә виҹданым [«бөјрәкләрим», ЈД] мәнә ағыл өјрәдир» (Мәзмур 16:7). Бу нә демәкдир? Бу о демәкдир ки, Аллаһын мәсләһәтләри Давуда ҝүҹлү тә’сир бағышлајыр, дахилиндә јашајыр, онун ән ҝизлин фикирләрини вә һиссләрини ислаһ едәрәк, она өјүд-нәсиһәт верирди. Әҝәр биз Мүгәддәс Китабын, Аллаһын нүмајәндәләринин вә ја тәшкилатынын васитәсилә алдығымыз нәсиһәтләрин үзәриндә миннәтдарлыгла дүшүнүрүксә вә Аллаһын мәсләһәтләрини бүтүн гәлбимизлә гәбул едириксә, ејни шеј бизимлә дә ола биләр. Јеһовадан бизи сафлашдырмасыны мүнтәзәм олараг хаһиш етмәјимиз нөгсансызлыг јолу илә ҝетмәјимизә көмәк едәҹәк.
«Мәһәббәтин ҝөзүмүн өнүндә дурур»
10. Аллаһын һәгигәтиндә јеримәкдә Давуда нә көмәк едирди?
10 Давуд дуа едирди: «Мәһәббәтин ҝөзүмүн өнүндә дурур, Сәнин сәдагәтинлә [һәгигәтиндә] ҝәзирәм» (Мәзмур 26:3). Давуд Јеһованын Өз мәһәббәтини неҹә тәзаһүр етдирдијини ҝөзәл билирди вә бунун үзәриндә миннәтдарлыгла дүшүнүрдү. О белә охујурду: «Рәббә алгыш ет, еј көнлүм, унутма етдији јахшылыглары». Давуд Аллаһын јахшылыгларындан бирини хатырлајараг давам едирди: «Рәбб бүтүн мискинләрә һагг-әдаләт ҝөстәрир. Јолларыны Мусаја, әмәлләрини Исраил өвладларына ҝөстәриб» (Мәзмур 103:2, 6, 7). Ола билсин, Давуд «мискинләр» дедикдә, Мусанын ҝүнләриндә мисирлиләрин сыхышдырдыглары исраиллиләри нәзәрдә тутурду. Јеһованын Өз хиласедиҹи гүввәсини Мусаја неҹә ҝөстәрмәси үзәриндә дүшүнмәк, шүбһәсиз ки, Давудун үрәјинә ҝүҹлү тә’сир бағышлајыр вә Аллаһын һәгигәтиндә јеримәк гәтијјәтини мөһкәмләндирирди.
11. Нөгсансызлыг јолу илә јеримәкдә бизә нә көмәк едәҹәк?
11 Аллаһын Кәламыны мүнтәзәм олараг өјрәнмәк вә өјрәндикләримизин үзәриндә дүшүнмәк нөгсансызлыг јолу илә јеримәкдә бизә дә көмәк едәҹәк. Мисал үчүн, Потифарын арвадынын әхлагсызлыға јөнәлдән тәклифиндән гачан Јусифин нүмунәси бизи иш јериндә, мәктәбдә вә башга јерләрдә бу кими ширникдириҹи шејләрдән гачмаға тәшвиг едәҹәк (Јарадылыш 39:7-12). Бәс әҝәр биз мадди фираванлыг, јахуд јүксәк вәзифә вә нүфуз вә’д едән ҹәлбедиҹи тәклифләрлә гаршылашырыгса, онда неҹә? Биз Мисирин ҹаһ-ҹалалыны рәдд едән Мусанын нүмунәсинә маликик (Ибраниләрә 11:24-26). Әјјубун тәһәммүлүнү јадда сахлајараг, шүбһәсиз ки, биз насазлыглара вә һәјати чәтинликләрә рәғмән Јеһоваја садиглијимизи горумаг гәтијјәтиндә мөһкәмләнәҹәјик (Јагуб 5:11). Бәс әҝәр бизи тә’гиб едирләрсә? Онда ширләр олан гујуја атылмыш Даниелин нүмунәси бизә ҹәсарәт верәҹәкдир (Даниел 6:16-22).
«Јаланчы инсанларла отурмурам»
12, 13. Биз неҹә достлуглардан узаг дурмалыјыг?
12 Давуд нөгсансызлығы горумагда она даһа нәјин көмәк етдијини хатырлатды: «Јаланчы инсанларла отурмурам, икиүзлүләрлә јолдашлыг етмирәм, јарамазларын мәҹлисинә нифрәт едирәм, писләрлә отурмурам» (Мәзмур 26:4, 5). Давуд һәтта писләрлә отурмурду да. О, пис достлуглара нифрәт едирди.
13 Бәс биз? Елә алынмырмы ки, биз телевизија верилишләринә, филмләрә вә Интернет сәһифәләринә тамаша едәркән јаланчы инсанларла отуруб-дуруруг? Ич үзләрини ҝизләдән инсанлардан узаг гачырыгмы? Мәктәбдә вә ја ишдә ким исә һијләҝәр нијјәтдән ирәли ҝәләрәк јаландан өзүнү бизә дост кими ҝөстәрә биләр. Мәҝәр биз Аллаһын һәгигәтиндә јеримәјән кәсләрлә јахын достлуг јаратмаг истәјирикми? Һәлә өзләрини сәмими кими ҝөстәриб, бизи Јеһоваја хидмәт јолундан аздырмаг истәјән дөнүкләр дә вар. Бәс мәсиһчи јығынҹағында икили һәјат сүрәнләр һагда нә демәк олар? Онлар да өзләринин әсл маһијјәтләрини ҝизләдирләр. Һазырда хидмәти көмәкчи кими хидмәт едән Ҹејсонун ҝәнҹлик достлары мәһз белә олмушлар. О хатырлајыр: «Бир дәфә онлардан бири мәнә деди: “Бизим инди неҹә јашамағымыз ваҹиб дејил, чүнки јени дүнја ҝәләнәдәк биз һамымыз өләҹәјик. Нәји әлдән вердијимизи дә һеч заман билмәјәҹәјик”. Онун сөзләри мәни ајылтды. Јени дүнја ҝәлән заман мән өлү олмаг истәмирәм». Ҹејсон һәмин ҝәнҹләрлә достлуғу кәсмәклә мүдрик давранды. Һәвари Павел хәбәрдарлыг едирди: «Алданмајын: пис достлуг јахшы әхлагы позар» (1 Коринфлиләрә 15:33). Пис достлуглардан узаг дурмаг неҹә дә ваҹибдир!
‘Бүтүн харигәләрини бәјан етмәк үчүн’
14, 15. Биз һансы мә’нада Јеһованын «гурбанҝаһынын башына» доланырыг?
14 Давуд давам едир: «Ја Рәбб, ҝүнаһсызлыг ичиндә әлләрими јујурам, гурбанҝаһынын башына доланырам». Нә үчүн? ‘Шүкүр сәсими уҹалтмаг, бүтүн харигәләрини бәјан етмәк үчүн’ (Мәзмур 26:6, 7). Давуд, Јеһоваја ибадәт етмәк вә Ону мәдһ етмәк үчүн әхлаги ҹәһәтдән тәмиз галмағы арзу едирди.
15 Чадырдакы, даһа сонра исә мә’бәддәки мүгәддәс хидмәтин һәр бир нөвү «сәмави һәгигәтләрин ин’икасына вә көлҝәсинә» хидмәт едирди (Ибраниләрә 8:5; 9:23). Гурбанҝаһ Јеһованын ирадәсини — Иса Мәсиһин бәшәријјәтин хиласы үчүн вердији фидијәни гәбул етмәк һазырлығыны тәмсил едирди (Ибраниләрә 10:5-10). Биз һәмин гурбанлыға иман ҝәтирәрәк, демәк олар ки, ‘ҝүнаһсызлыг ичиндә әлләримизи јујур’ вә Јеһованын ‘гурбанҝаһынын башына доланырыг’ (Јәһја 3:16-18).
16. Нәјә ҝөрә Аллаһын мө’ҹүзәли ишләри һаггында башгаларына данышмаг бизим өзүмүзә фајда ҝәтирир?
16 Мәҝәр фидијә гурбанлығы сајәсиндә мүмкүн олан бүтүн шејләр һаггында дүшүндүкдә, үрәјимиз Јеһоваја вә Онун ваһид Оғлуна гаршы миннәтдарлыг һисси илә долмурму? Буна ҝөрә дә ҝәлин башгаларына Аллаһын мө’ҹүзәли ишләриндән — инсанын Еден бағында јарадылмасындан тутмуш Аллаһын јени дүнјасында һәр шејин јениләшәҹәји һагда данышаг (Јарадылыш 2:7; Һәвариләрин ишләри 3:21). Падшаһлығын тәблиғиндә вә шаҝирдләрин һазырланмасы ишиндә фәал иштирак етмәк бизи неҹә дә е’тибарлы руһани мүдафиә илә тә’мин едир! (Матта 24:14; 28:19, 20). Беләликлә бизим ҝәләҹәјә олан үмидимиз даһа мөһкәм, Аллаһын вә’дләринә иманымыз даһа сарсылмаз, Јеһоваја вә јахынларымыза олан мәһәббәтимиз исә даһа да ҝүҹлү олаҹагдыр.
«Мәскәнин олан еви... севирәм»
17, 18. Мәсиһчи ҝөрүшләринә биз неҹә јанашмалыјыг?
17 Гурбанҝаһла бирҝә чадыр Исраилдә Јеһоваја ибадәтин мәркәзи иди. Давуд фәрәһ ичиндә тәрәннүм едирди: «Ја Рәбб, мәскәнин олан еви, ҹәлалынын сакин олдуғу јери севирәм» (Мәзмур 26:8).
18 Биз Јеһова һаггында даһа чох өјрәнмәк мәгсәдилә јығышмағы севирикми? Бизим дөврүмүздә һәгиги Аллаһа ибадәтин мәркәзи — мүнтәзәм олараг руһани тә’лим кечирилән Падшаһлыг Залларыдыр. Бундан әлавә, илдән-илә вилајәт, рајон вә хүсуси бирҝүнлүк конгресләр кечирилир. Бу ҝөрүшләрин һамысында Јеһованын нәсиһәтләри сәсләнир. Әҝәр биз онлары ‘чох севириксә’, онда бөјүк арзу илә ҝөрүшләрә ҝәләҹәк вә програма диггәтлә гулаг асаҹағыг (Мәзмур 119:167). Сәмими олараг бизим гајғымыза галан, нөгсансызлыг јолундан мөһкәм јапышмагда бизә көмәк едән һәмиманлыларла бирликдә олмаг неҹә дә хошдур! (Ибраниләрә 10:24, 25).
«Ҹанымы алма»
19. Давуд һансы ҝүнаһлы ишләрә гарышмаг истәмирди?
19 Аллаһын һәгигәтиндә јеримәјәнләрлә нә баш верәҹәјини ҝөзәл билдији үчүн, Давуд Јеһоваја јалварырды: «Мәни ҝүнаһкарлара гатыб апарма, гатилләрлә бирҝә ҹанымы алма. Онлар пис нијјәти әлләриндә тутублар, сағ әлләрини рүшвәтлә долдурублар» (Мәзмур 26:9, 10). Давуд чиркин әмәлләрлә мәшғул олан пис нијјәтли инсанларла вә ја рүшвәтхорлугда ҝүнаһкар оланларла ортаг бир шејә малик олмаг истәмирди.
20, 21. Неҹә ола биләр ки, биз пис инсанларын јолуна ајаг басарыг?
20 Мүасир дүнја әхлагсызлыға гәрг олуб. Телевизија верилишләри, журналлар вә кинофилмләр чиркин әмәлләрә, о ҹүмләдән ҹинси әхлагсызлыға тәшвиг едир (Галатијалылара 5:19). Бә’зиләри чох вахт әхлагсыз һәрәкәтләрә ҝәтириб чыхаран порнографијанын гулуна чеврилирләр. Бу тә’сирә хүсусилә дә ҝәнҹләр мејллидирләр. Бә’зи өлкәләрдә оғланын гызла ҝөрүшмәси ади һал кими гәбул едилмишдир, јенијетмәләр исә һеч кимлә ҝөрүшә чыхмајанда өзләрини нараһат һисс едирләр. Бир чохлары, никаһа дахил олмаг үчүн чох ҝәнҹ олмаларына бахмајараг, һәддиндән артыг јахын мүнасибәтләрә ҝириширләр. Онлар әкс ҹинсә гаршы мејлләринин гаршысыны ала билмәјиб, әхлагсыз һәјат тәрзинә гәдәм гојараг, ҹинси әхлагсызлыға јол верирләр.
21 Позуҹу тә’сирә бөјүкләр дә мејллидирләр. Ишҝүзар саһәдә әјрилик, егоизмә мејллилик, нөгсансызлығын надир һалларда раст ҝәлинән бир хүсусијјәт олдуғуна шәһадәт едир. Дүнјанын јоллары инсанлары Јеһовадан јалныз узаглашдырыр. Буна ҝөрә дә ҝәлин ‘пислијә нифрәт едәк вә јахшылығы севәк’ ки, бундан сонра да нөгсансызлыг јолу илә јеријәк (Амос 5:15).
«Лүтфүнлә мәни гуртар»
22-24. а) 26-ҹы Мәзмурун јекун сөзләри бизә неҹә тәсәлли верир? б) Нөвбәти мәгаләдә сөһбәт һансы тәләдән ҝедәҹәк?
22 Давуд өз маһнысыны белә сөзләрлә баша чатдырыр: «Мән исә камалла [«нөгсансызлыгда», ЈД] ҝәзирәм, лүтфүнлә мәни гуртар. Ајағым дүзлүк үстүндә дурур, ҹәмијјәтин ичиндә Рәббә алгыш едәҹәјәм» (Мәзмур 26:11, 12). Давуд өз нөгсансызлығыны горумаг гәтијјәтини хиласла әлагәләндирир. Неҹә дә тәсәлливериҹи бир фикирдир! Биз ҝүнаһлы инсанлар олсаг да, нөгсансызлыг јолунда мөһкәм дајансаг, Јеһова бизә көмәк едәҹәк.
23 Ҝәлин бүтүн һәјат тәрзимизлә ҝөстәрәк ки, биз Аллаһа һөрмәт едир вә Онун һакимијјәтинә табе олмаг истәјирик. Дуада Јеһовадан хаһиш едәк ки, ән ҝизлин дүшүнҹәләримизи вә һиссләримизи тәдгиг етсин вә сафлашдырсын. Аллаһын Кәламыны сә’јлә өјрәнәрәк, даим нәзәримизи Онун һәгигәтинә јөнәлдәк. Ҝәлин пис достлуглардан узаг дураг. Јеһованы јығынҹагларда иззәтләндирәк, Падшаһлығы сә’јлә тәблиғ едәк, инсанлара Иса Мәсиһин шаҝирдләри олмагда көмәк едәк вә бу дүнјанын Аллаһла олан дәјәрли мүнасибәтләримизи тәһлүкәјә мә’руз гојмасына јол вермәјәк. Вар гүввәмизлә нөгсансызлыг јолу илә јеримәјә ҹан атараг әмин ола биләрик ки, Јеһова бизә лүтф ҝөстәрәҹәк.
24 Нөгсансызлығы һәјатын һәр бир саһәсиндә горумаг лазым ҝәлдији үчүн, бир һијләҝәр тәлә барәсиндә унутмамаг лазымдыр: бу, спиртли ичкиләрдән суи-истифадә етмәкдир. Бу тәләјә дүшмәмәк үчүн нә етмәли олдуғумузу ҝәлән мәгаләдә мүзакирә едәҹәјик.
Хатырлајырсынызмы?
• Нәјә ҝөрә бүтүн шүурлу варлыглар өз нөгсансызлыглары әсасында мүһакимә олуна биләрләр?
• Нөгсансызлыг нәдир вә онун јолу илә јеримәк нә демәкдир?
• Нөгсансызлыг јолу илә јеримәкдә бизә нә көмәк едәр?
• Нөгсансызлығы горумаг үчүн биз нәдән узаг гачмалыјыг?
[24-ҹү сәһифәдәки шәкил]
Јеһовадан ән ҝизлин дүшүнҹәләрини тәдгиг етмәсини тез-тезми хаһиш едирсән?
[24-ҹү сәһифәдәки шәкил]
Јеһованын ишләри барәдә дүшүнүрсәнми?
[25-ҹи сәһифәдәки шәкилләр]
Сынаглар заманы нөгсансызлығы горумагла, биз Јеһованын үрәјини севиндиририк.