Јеһовадан ләззәт ал

“Рәбдән... ләззәт ал; О да сәнә үрәјинин диләкләрини верәҹәкдир” (МӘЗМУР 37:4).

1, 2. Һәгиги хошбәхтлијин мәнбәји кимдир вә Давуд бу факта диггәти неҹә јөнәлдир?

“РУҺӘН јохсуллар нә бәхтијардырлар... Мәрһәмәтли оланлар нә бәхтијардырлар... Сүлһпәрвәрләр нә бәхтијардырлар!” Хошбәхт олмаға даир бу вә даһа алты рә’ј, мүждәчи Матта тәрәфиндән јазылмыш Исанын мәшһур Дағүстү тәблиғинин валеһедиҹи башланғыҹы олмушдур (Матта 5:3-11). Исанын сөзләри бизи әмин едир ки, хошбәхтлијә наил олмаг мүмкүндүр.

² Гәдим Исраилин падшаһы Давудун бәстәләдији мәзмур бизим диггәтимизи һәгиги хошбәхтлијин мәнбәји олан Јеһоваја јөнәлдир. Давуд јазырды: “Рәбдән... ләззәт ал; О да сәнә үрәјинин диләкләрини верәҹәкдир” (Мәзмур 37:4). Бәс Јеһованын вә Онун шәхсијјәтинин бир чох башга чаларлары һаггындакы билик бизә неҹә ләззәт верә биләр? Онун артыг етдикләрини вә Өз нијјәтини һәјата кечирәрәк едәҹәкләрини нәзәрдән кечирмәк, “үрәјинин диләкләрини”н јеринә јетирәҹәјинә даир сәнә неҹә үмид верә биләр? Ҹаваблары, Мәзмур 37:1-11 ајәләринә дәриндән нәзәр салмагла тапа биләрик.

‘Гибтә етмә’

3, 4. Мәзмур 37:1 ајәсинә әсасән, Давуд һансы мәсләһәти верди вә бу мәсләһәт бу ҝүн нәјә ҝөрә актуалдыр?

³ Биз пислијин артдығы “чәтин анлар”да јашајырыг. Биз һәвари Павелин сөзләринин һәјата кечдијини ҝөрүрүк: “Пис адамлар вә сахтакарлар исә, алдадыб алданараг, ҝетдикҹә даһа бетәр олаҹаглар” (2 Тимотејә 3:1, 13). Биз, пис адамларын заһири наилијјәтләри вә тәрәггиләри уҹбатындан неҹә дә асанлыгла кәдәрләнә биләрик! Бүтүн бунлар бизи јајындырар вә диггәтимизи руһани шејләрә ҹәмләшдирмәјә мане ола биләр. Диггәт јетирәк ҝөрәк, “Мәзмур” китабынын 37-ҹи фәслинин башланғыҹындакы сөзләр бизи бу тәһлүкә барәдә неҹә хәбәрдар едир: “Пислик едәнләр үчүн үзүлмә, нә дә фәсад ишләдәнләрин һалына гибтә ет”.

⁴ Күтләви информасија васитәләри бизи һәр ҝүн һагсызлыглар барәсиндә олан мә’лумат атәшинә тутур. Виҹдансыз коммерсантлар алдадыр вә ҹәзасыз галырлар. Ҹинајәткарлар көмәксиз инсанлары истисмар едирләр. Гатилләри тута вә ја ҹәзаландыра билмирләр. Әдаләтин тәһриф олунмасына даир бу кими нүмунәләр биздә гәзәб һисси ојада биләр вә ја бизи раһатлыгдан мәһрум едә биләр. Ганунсуз инсанларын заһири наилијјәтләри биздә һәтта гибтә һисси ојада биләр. Лакин әҝәр биз кәдәрләнәриксә, бунунла вәзијјәт јахшылашармы? Пис инсанларын заһири тәрәггиләринә гибтә едәриксә, бу онларын агибәтини дәјишәрми? Јох, бир дә јох! Һәгигәтән дә бизим “үзүлмәјә” әсасымыз јохдур. Нәјә ҝөрә?

5. Пис инсанлар нәјә ҝөрә отла мүгајисә олунурлар?

⁵ Мәзмурчу ҹаваб верир: “Зира онлар от кими тез бичиләҹәкләр вә јашыл сәбзә кими солаҹаглар” (Мәзмур 37:2). Јашыл сәбзә ҝөзәл ҝөрүнә биләр, лакин тезликлә гурујур вә мәһв олур. Буна бәнзәр вәзијјәт ганунсузларын да башына ҝәләҹәк. Онларын ҝөрүнән тәрәггиләри өтүб-кечәндир. Онлар өләндә, сахта јолла әлдә етдикләри вар-дөвләтләри онлара көмәк етмәјәҹәк. Нәтиҹәдә һәр кәс әмәлинә ҝөрә алаҹаг. Павел јазырды: “Ҝүнаһын әвәзи өлүмдүр” (Ромалылара 6:23). Пис вә јарамаз адамлар һеч нә јох, әввәл-ахыр өз “әвәзләрини” алаҹаглар. Неҹә дә мә’насыз һәјат тәрзидир! (Мәзмур 37:35, 36; 49:16, 17).

6. Мәзмур 37:1, 2 ајәләриндә бизим үчүн һансы ибрәт дәрси вар?

⁶ Белә олан һалда ганунсуз инсанларын тезкечән тәрәггиләринин бизи өзүмүздән чыхармасына јол вермәлијикми? Мәзмур 37-ҹи фәслин биринҹи ики ајәсиндә нөвбәти ибрәт дәрси вар: Јол вермәк олмаз ки, онларын наилијјәтләри уҹбатындан, биз сечдијимиз Јеһоваја хидмәт јолундан сапынаг. Ҝәлин, диггәтимизи руһани хејир-дуалара вә руһани мәгсәдләрә ҹәмләшдирәк (Сүлејманын мәсәлләри 23:17).

“Рәббә ҝүвән вә јахшылыг ет”

7. Биз нәјә ҝөрә Јеһоваја ҝүвәнмәлијик?

⁷ Мәзмурчу бизи тәшвиг едир: “Рәббә ҝүвән вә јахшылыг ет” (Мәзмур 37:3а). Нараһатчылыглар вә ја һәтта шүбһәләр бизи әлдән саланда, биз бүтүнлүклә Јеһоваја ҝүвәнмәлијик. О, там руһани тәһлүкәсизлијә зәманәт верир. Муса јазырды: “Уҹа Оланын өртүјүндә отуран, Гадирин көлҝәсиндә сакин олар” (Мәзмур 91:1). Јашадығымыз системдә мөвҹуд олан ганунсузлуғун артмасы бизи нараһат едәндә, биз Јеһоваја даһа чох ҝүвәнмәлијик. Мәсәлән, ајағымыз бурхуланда, достумузун голундан јапышмаг имканына севинирик. Ејни тәрздә дә, сәдагәтлә јеримәјә чалышанда, Јеһованын көмәјинә еһтијаҹ дујуруг (Ишаја 50:10).

8. Мәсиһчи хидмәтиндәки иштиракымыз ганунсуз инсанларын тәрәгги етмәсинә һәддиндән артыг нараһат олмамагда бизә неҹә көмәк едә биләр?

⁸ Әҝәр биз һәлим инсанлары ахтарсаг вә онлара Јеһованын нијјәтинин дәгиг билијини әлдә етмәјә көмәк етсәк, ганунсуз инсанларын тәрәгги етмәләри бизи аз нараһат едәҹәк. Ганунсузлуғун артдығыны нәзәрә алараг, биз башгаларына көмәк етмәк ишиндә тамамилә иштирак етмәлијик. Һәвари Павел дејирди: “Јахшылыг етмәји вә малынызы башгалары илә бөлүшдүрмәји јаддан чыхармајын, чүнки бу ҹүр гурбанлар Аллаһа мәгбулдур”. Едә биләҹәјимиз ән бөјүк “јахшылыг”, башгалары илә Аллаһын Падшаһлығы һаггындакы иззәтли хош хәбәри бөлүшмәкдир. Бизим үмумхалг гаршысындакы тәблиғ хидмәтимиз һәгигәтән дә “һәмд гурбаны”дыр (Ибраниләрә 13:15, 16; Галатијалылара 6:10).

9. Давудун “мәмләкәтдә отур” нәсиһәтини изаһ един.

⁹ Давуд давам едир: “Мәмләкәтдә отур вә онун сәдагәти илә бәслән” (Мәзмур 37:3б). Давудун ҝүнләриндә “мәмләкәт” кими танынан әрази, Јеһова тәрәфиндән Исраил халгы үчүн ајрылмыш Вә’д едилән дијар иди. Сүлејманын һакимијјәти заманы онун сәрһәдләри шималда Дандан, ҹәнубда Беер-шебаја гәдәр узанырды. Бу, исраиллиләрин јашајыш јери иди (1 Краллар 4:25). Бу ҝүн Јер күрәсинин һансы һиссәсиндә јашасаг да, биз бүтүн планетин салеһлик ичиндәки јени дүнјада Ҹәннәтә чевриләҹәји вахты ҝөзләјирик. Бу арада исә биз руһани тәһлүкәсизликдә јашајырыг (Ишаја 65:13, 14).

10. Биз садиг галанда нә баш верир?

¹⁰ Әҝәр садиг галсаг, онда нә олаҹаг? Аллаһдан илһам алмыш мәсәл бизә хатырладыр: “Садиг адамын бәрәкәтләри чохдур” (Сүлејманын мәсәлләри 28:20). Һарада јашасаг да, хош хәбәри имканымыз чатан һәр бир кәсә сәдагәтлә тәблиғ едириксә, Јеһова бизи мүтләг мүкафатландырыр. Мәсәлән, Френк вә Роза 40 ил әввәл Шотландијанын шималындакы бир шәһәрдә пионер хидмәтинә тә’јинат алмышлар. Онларын ҝәлишинә јахын орада олан азсајлы мараглананлар артыг һәгигәтдән узаглашмышдылар. Һеч бир шејә бахмадан, пионер әр-арвад тәблиғ вә шаҝирдләри һазырламаг ишинә башладылар. Инди һәмин шәһәрдә чичәкләнән јығынҹаг вар. Јеһова һәгигәтән дә пионерләрин садиглијинә хејир-дуа верди. Френк һәлимликлә сөјләјир: “Бизим әввәлки кими һәгигәтдә јеримәјимиз вә Јеһоваја јарарлы олмағымыз артыг ән бөјүк хејир-дуадыр”. Бәли, биз садиг галанда чохлу гијмәтли хејир-дуалар алырыг.

“Рәбдән... ләззәт ал”

11, 12. а) Биз “Рәбдән... ләззәт”и неҹә ала биләрик? б) Шәхси өјрәнмә заманы гаршыја һансы мәгсәдләри гојмаг олар вә еһтимал ки, бунун нәтиҹәси неҹә олаҹаг?

¹¹ Јеһова илә олан мүнасибәтләримиз мөһкәм олсун вә Она үрәкдән ҝүвәнә биләк дејә, биз “Рәбдән... ләззәт” алмалыјыг (Мәзмур 37:4а). Бунун үчүн нә етмәлијик? Нә гәдәр чәтин олса да, өз ишләримизә гәрг олмаг әвәзинә, диггәтимизи Јеһоваја ҹәмләшдирмәк лазымдыр. Буну етмәјин бир үсулу Онун Кәламыны охумаға вахт ајырмагдыр (Мәзмур 1:1, 2). Мүгәддәс Китабы охумаг сәнә ләззәт верирми? Әҝәр сән Јеһова һаггында даһа чох өјрәнмәк мәгсәди илә охујурсанса, бу сәнә ләззәт верәҹәк. Балаҹа бир парчаны охујандан сонра өзүндән нәјә ҝөрә сорушмајасан: “Бу ајәләрдән Јеһова һаггында нә өјрәндим?” Еһтимал ки, Мүгәддәс Китабы охудуғун заман гејд дәфтәрчәни вә ја кағыз парчасыны әлинин алтында сахламағын нә гәдәр фајдалы олдуғуну гијмәтләндирәҹәксән. Һәр дәфә охудуғун һиссәнин кәсб етдији мә’на үзәриндә дүшүнмәк үчүн дајананда, јадына Аллаһын е’ҹазкар хүсусијјәтләриндән бирини салаҹаг бир нечә сөз јаз. Башга бир мәзмурда Давуд охујурду: “Ағзымын сөзләри вә үрәјимин дүшүнҹәси сәнин өнүндә мәгбул олсунлар, ја Рәбб, гајам вә гуртарыҹым” (Мәзмур 19:14). Диггәтимизи Аллаһын Кәламына ҹәмләшдирәндә, бу, Јеһоваја мәгбул олур вә бизә ләззәт верир.

¹² Өјрәнмәнин вә дәриндән дүшүнмәнин сајәсиндә хошбәхтлији неҹә дуја биләрик? Биз гаршымыза, Јеһова вә Онун јоллары һаггында даһа чох билмәк мәгсәди гоја биләрик. “Дүнјада јашамыш ән бөјүк инсан” вә “Јеһоваја јахынлаш”a кими китабларда, үзәриндә миннәтдарлыг һисси илә дәриндән дүшүнә биләҹәјимиз чох шејләр вар. Јеһова исә өз нөвбәсиндә, Давудун салеһләри әмин етдији кими “сәнә үрәјинин диләкләрини верәҹәкдир” (Мәзмур 37:4б). Ҝөрүндүјү кими мәһз бу ҹүр әминлик, һәвари Јәһјаны нөвбәти сөзләри јазмаға тәшвиг етмишдир: “Аллаһын гаршысында малик олдуғумуз ҹәсарәт исә бундан ибарәтдир ки, әҝәр биз Онун ирадәсинә ујғун шәкилдә бир шеј диләјириксә, О бизи ешидир. Вә әҝәр биз билириксә ки, О һәр диләдијимизи ешидир, биз Ондан диләмиш олдугларымызы алдығымызы да билирик” (1 Јәһја 5:14, 15).

13. Сон илләр әрзиндә бир чох өлкәләрдә тәблиғ ишинин һансы тәрздә ҝенишләнмәси мүшаһидә едилмишдир?

¹³ Аллаһа садиг хидмәтчиләр кими, биз һәр шејдән чох Јеһованын һөкмранлығына һагг газандырылдығыны ҝөрмәји арзу едирик (Сүлејманын мәсәлләри 27:11). Әввәлләр тоталитар вә ја диктатор режими һөкм сүрән өлкәләрдә гардашлар тәрәфиндән бөјүк тәблиғ ишинин апарылдығыны ешидәндә, мәҝәр үрәкләримиз севинҹ һисси илә долуб-дашмырмы? Јашадығымыз системин сона чатаҹағы вахта гәдәр тәблиғ ишинин даһа һансы тәрздә ҝенишләнәҹәјини ҝөрмәји сәбирсизликлә ҝөзләјирик. Јеһованын Гәрб өлкәләриндәки бир чох хидмәтчиләри тәләбәләрә, гачгынлара вә Гәрбдә мүвәггәти олараг јашајан, һәм дә дин азадлығындан истифадә едән башга инсанлара фәал сурәтдә тәблиғ едирләр. Сәмими гәлбдән арзу едирик ки, бу инсанлар евләринә гајытдыгдан сонра онлары, мәҹази мә’нада десәк, зүлмәт гаранлыг әһатә етсә дә, һәгигәт ишығына нур сачмаға јол версинләр (Матта 5:14-16).

“Јолуну Рәббә бурах”

14. Јеһоваја ҝүвәнә биләҹәјимизи ҝөстәрән һансы сүбутларымыз вар?

¹⁴ Үзәримиздә нараһатчылыгларын вә диҝәр проблемләрин ағыр јүкүнү һисс едәндә, јүнҝүллүк тапмағын мүмкүн олдуғуну билмәк неҹә дә севинҹ ҝәтирир! Јүнҝүллүјү неҹә тапа биләрик? Давуд дејир: “Јолуну Рәббә бурах вә она ҝүвән; О да јеринә јетирәҹәкдир” (Мәзмур 37:5). Јеһованын е’тибарлы дајаг олдуғуна јығынҹагларымызда чохлу сүбутлар вар (Мәзмур 55:22). Таммүддәтли хидмәтчиләр — истәр пионерләр, сәјјаһ нәзарәтчиләр, миссионерләр ја да ки, Бејт-Елдә хидмәт едән көнүллү ишчиләр — Јеһованын гајғысынын дәјишилмәзлијинә шаһидлик едә биләрләр. Нәјә ҝөрә онларын арасында таныдығын кәсләрлә сөһбәт едиб, Јеһованын онлара неҹә көмәк етдијини сорушмајасан? Шүбһәсиз ки, сән, һәтта чәтин анларда белә Јеһованын әлинин һеч заман гыса олмадығыны ҝөстәрән чохлу әһвалатлар ешидәҹәксән. Јеһова һәмишә һәјат үчүн зәрури олан шејлә тә’мин едир (Мәзмур 37:25; Матта 6:25-34).

15. Аллаһын халгынын салеһлији неҹә нур сачыр?

¹⁵ Јеһова бизим ҝүвәнҹ јеримиз оланда вә биз бүтүнлүклә Она е’тибар едәндә, үзәримиздә мәзмурчунун нөвбәти сөзләри һәјата кечә биләр: “[О,] сәнин салеһлијини нур кими вә һаггыны ҝүнорта вахты кими чыхараҹагдыр” (Мәзмур 37:6). Јеһованын Шаһидләри олан бизләр һаггында тез-тез јалан данышырлар. Лакин Јеһова сәмими гәлбли инсанларын ҝөзләрини ачыр вә үмумхалг гаршысындакы хидмәтимизи Јеһоваја вә јахынларымыза олан мәһәббәтдән ирәли ҝәләрәк јеринә јетирдијимизи баша дүшмәкдә онлара көмәк едир. Бизим дүзҝүн давранышымызы чохлары јалан сурәтдә тәгдим етсәләр дә, о һамыја ашкардыр. Јеһова бизә бүтүн мүгавимәт вә тә’гибләрин өһдәсиндән ҝәлмәкдә көмәк едир. Нәтиҹәдә Аллаһын халгынын салеһлији ҝүнорта ҝүнәши кими нур сачыр (1 Петер 2:12).

“Сүкут ет вә... сәбирлә ҝөзлә”

16, 17. Мәзмур 37:7 ајәсинә әсасән инди нә етмәк лазымдыр вә нәјә ҝөрә?

¹⁶ Мәзмурчунун нөвбәти сөзләри бунлардыр: “Рәббин өнүндә сүкут ет вә Ону сәбирлә ҝөзлә; јолунда баҹарыглы олан үчүн, һијлә гуран адам үчүн үзүлмә” (Мәзмур 37:7). Бурада Давуд вурғулајыр ки, Јеһованын ишә башлајаҹағы вахты сәбирлә ҝөзләмәк лазымдыр. Јашадығымыз системин сону һәлә ҝәлмәсә дә, бу, шикајәт етмәк үчүн әсас дејил. Мәҝәр Јеһованын мәрһәмәтинин вә сәбринин бизим әввәлҹә дүшүндүјүмүздән даһа артыг олдуғуну ҝөрмәдикми? Ҝәлин, сон ҝәләнәдәк, хош хәбәри фәал сурәтдә тәблиғ едәрәк Јеһованы сәбирлә ҝөзләјәк (Марк 13:10). Инди, бизи севинҹдән вә руһани тәһлүкәсизликдән мәһрум едә билән дүшүнүлмәмиш һәрәкәтләрдән гачынмағын әсл вахтыдыр. Инди, Шејтан дүнјасынын позуҹу тә’сиринә даһа ҝүҹлү мүгавимәт ҝөстәрмәјин вахтыдыр. Әхлаги тәмизлијимизи горумағын вә һеч бир вәҹһлә Јеһованын гаршысындакы тәмиз вәзијјәтимизлә риск етмәмәјин вахтыдыр. Ҝәлин бундан сонра да әхлагсыз фикирләри говаг вә әкс ҹинсә вә ја һәтта өз ҹинсимизә гаршы јарашмајан давранышлардан гачынаг (Колослулара 3:5).

¹⁷ Давуд бизә мәсләһәт верир: “Һиддәтдән чәкин, гәзәби бурах; үзүлмә, о анҹаг шәр ҝәтирәр. Чүнки шәрирләр кәсилиб атылаҹаг; фәгәт Рәбби ҝөзләјәнләр дүнјаны мирас алаҹаглар” (Мәзмур 37:8, 9). Бәли, биз Јеһованын јер үзүндән бүтүн писликләри вә онлара ҝөрә ҹавабдеһ олан кәсләри көкүндән силәҹәји вахты — һәмин вахт исә чох јахындыр — әминликлә ҝөзләјә биләрик.

“Бир аз ҝөзлә”

18, 19. Мәзмур 37:10 ајәсиндәки сөзләр сизи неҹә руһландырыр?

¹⁸ “Бир аз ҝөзлә вә пис јох олаҹагдыр; онун јерини арашдыраҹагсан вә јох олаҹагдыр” (Мәзмур 37:10). Бу системин вә Јеһовадан мүстәгил олмағын ҝәтирдији фәлакәтин тезликлә сона чатаҹағыны ҝөстәрән бу сөзләр бизи неҹә дә руһландырыр! Инсанлар һансы нөв һакимијјәт формалары јаратсалар да, онларын һамысы тутарсыз олмушдур. Инди исә, һәгиги теократијаја, Аллаһын һөкмранлығына — Иса Мәсиһин әлиндә олан Јеһованын Падшаһлығына гајытмағын вахты ҝәлиб чатмышдыр. Падшаһлыг, дүнја ишләри үзәриндәки бүтүн рәһбәрлији өз әлинә алаҹаг вә Аллаһын Падшаһлығынын бүтүн дүшмәнләрини јох едәҹәк (Даниел 2:44).

¹⁹ Јени дүнјада Аллаһын Падшаһлығынын рәһбәрлији алтында, “пис” адамы ахтарсан да тапа билмәјәҹәксән. Чүнки о заман Јеһоваја гаршы үсјан галдыран һәр бир кәс дәрһал јох едиләҹәк. Аллаһын һөкмранлығына һүҹум едән вә ја Онун һакимијјәтинә табе олмаг истәмәјән һеч бир кәс олмајаҹаг. Сәни әһатә едән бүтүн инсанлар Јеһованы разы салмаг арзусунда сәнинлә һәмфикир олаҹаглар. Ҝөзәл тәһлүкәсизлик һөкм сүрәҹәк, чүнки килидләр, һасарлар — там е’тибары вә хошбәхтлији позан һеч бир шеј олмајаҹаг! (Ишаја 65:20; Мика 4:4; 2 Петер 3:13).

20, 21. а) Мәзмур 37:11 ајәсиндәки “һәлимләр” кимләрдир вә онлар “сүлһ боллуғуну” һарада тапырлар? б) Әҝәр Бөјүк Давуду тәглид етсәк бизи һансы хејир-дуалар ҝөзләјир?

²⁰ О заман “һәлимләр дүнјаны мирас алаҹаглар” (Мәзмур 37:11а). “Һәлимләр” кимләрдир? “Һәлимләр” кими тәрҹүмә олунан сөз, “табе етдирмәк, алчалтмаг, һөрмәтдән салмаг” фе’линдән әмәлә ҝәлиб. Бәли, “һәлимләр”, онлара гаршы төрәдилән һагсызлыгларын Јеһова тәрәфиндән кәнар едиләҹәјини итаәткарлыгла ҝөзләјәнләрдир. Онлар “сүлһ боллуғунда ләззәт тапаҹаглар” (Мәзмур 37:11б). Биз артыг бу ҝүн мәсиһчи јығынҹағынын руһани Ҹәннәтиндәки сүлһ боллуғунда ләззәт тапырыг.

²¹ Һәлә ки, фәлакәтләрдән азад олунмамышыг, бири-биримизә көмәк едир вә кәдәрли оланлара тәсәлли веририк. Бунун сајәсиндә Јеһованын халгы дахили мәмнунлуг һисси дујур. Ағсаггал тә’јин олунмуш гардашлар салеһлик уғрунда изтирабларын өһдәсиндән ҝәлмәкдә бизә көмәк едәрәк, руһани, бә’зән исә физики тәләбатларымызын гајғысына галырлар (1 Салониклиләрә 2:7, 11; 1 Петер 5:2, 3). Арамызда олан сүлһ неҹә дә гијмәтлидир! Һәм дә јахынлашан сүлһ ичиндәки Ҹәннәтдә әбәди һәјата үмидимиз вар. Буна ҝөрә дә ҝәлин, Јеһоваја олан гејрәти ону сона гәдәр сәдагәтлә хидмәт етмәјә тәшвиг едән Бөјүк Давуду, Иса Мәсиһи тәглид едәк (1 Петер 2:21). Бу ҹүр давранмагла ‘Рәбдән ләззәт алаҹаг’ вә Ону севинҹлә мәдһ едәҹәјик.

[Һашијә]

Ҹаваб верә биләрсинизми?

• Мәзмур 37:1, 2 ајәләриндән һансы ибрәт дәрсләрини әлдә етдиниз?

• Сиз ‘Рәбдән ләззәт’и неҹә ала биләрсиниз?

• Јеһоваја ҝүвәнә биләҹәјимизә һансы сүбутларымыз вар?

[22-ҹи сәһифәдәки шәкил]

Мәсиһчиләр ‘фәсад ишләдәнләрин һалына гибтә етмирләр’.

[24-ҹү сәһифәдәки шәкил]

“Рәббә ҝүвән вә јахшылыг ет”.

[25-ҹи сәһифәдәки шәкил]

Јеһова һаггында баҹардыгҹа чох билик әлдә етмәклә, Ондан ләззәт ал.

[26-ҹы сәһифәдәки шәкил]

“Һәлимләр дүнјаны мирас алаҹаглар”.