Һөкм ҝүнү нәдир?

ҺӨКМ ҝүнүнү неҹә тәсәввүр едирсиниз? Чохлары елә дүшүнүр ки, һәмин ҝүн милјардларла инсан Аллаһын тахты гаршысында дураҹаг вә һәр бир инсана һөкм кәсиләҹәк. Бә’зиләри мүкафат олараг ҝөјләр сәадәтинә говушаҹаг, диҝәрләри исә әбәди ишҝәнҹәләрә мә’руз галаҹаглар. Лакин Мүгәддәс Китаб буну өјрәтмир. Һөкм ҝүнү Аллаһын Кәламында дәһшәтли бир вахт кими дејил, үмид вә дирчәлиш дөврү кими тәсвир едилир.

Һәвари Јәһја Вәһј 20:11, 12 ајәләриндә Һөкм ҝүнүнү белә тәсвир едир: «Бөјүк ағ бир тахт вә онда Отураны ҝөрдүм. Јер вә ҝөј Онун һүзурундан гачды; вә онлар үчүн бир мәкан тапылмады. Вә мән, өлүләри, кичикләри вә бөјүкләри тахтын гаршысында дуран ҝөрдүм. Тумарлар ачылды вә һәјат китабы олан башга бир тумар да ачылды. Өлүләр, китабларда јазыланлара әсасән, өз әмәлләринә ҝөрә мүһакимә олунду». Бәс инсанлары ким мүһакимә едәҹәк?

Бәшәријјәтин Али Һакими Јеһова олса да, О, һөкм етмәк сәлаһијјәтини башгасына һәвалә етмишдир. Кимә? Һәвари Павелин дедикләринә әсасән, «Аллаһ елә бир ҝүн тә’јин етди ки, о ҝүн сечдији Адам васитәси илә дүнјаја әдаләтлә һөкм едәҹәкдир» (Һәвариләрин ишләри 17:31). Тә’јин олунмуш бу Һаким — дирилдилмиш Иса Мәсиһдир (Јәһја 5:22). Һөкм ҝүнү нә заман башланаҹаг? О нә гәдәр давам едәҹәк?

«Вәһј» китабындан өјрәнирик ки, Һөкм ҝүнү Һар-Меҝидон мүһарибәсиндә Шејтанын системинин мәһв едилмәсиндән сонра башланаҹагa (Вәһј 16:14, 16; 19:19–20:3). Һар-Меҝидондан сонра Шејтан вә онун ҹинләри мин иллијә дибсиз дәринлијә атылаҹаглар. Исанын 144 000 һәмвариси «Мәсиһ илә бәрабәр мин ил» падшаһлыг вә һөкм едәҹәк (Вәһј 14:1-3; 20:1-4; Ромалылара 8:17). Ҝөрүндүјү кими, Һөкм ҝүнү 24 саат дејил, мин ил сүрәҹәк.

Бу мүддәт әрзиндә Иса Мәсиһ «дириләрә вә өлүләрә һөкм едәҹәк» (2 Тимотејә 4:1). ‘Дириләр’ — Һар-Меҝидондан сағ чыхан ‘бөјүк издиһамдыр’ (Вәһј 7:9-17). Һәвари Јәһја һөкм олунмаг үчүн «тахтын гаршысында дуран» өлүләри дә ҝөрмүшдү. Исанын вә’д етдији кими, «гәбирләрдә оланларын һамысы Онун [Мәсиһин] сәсини ешидәҹәкләр вә гәбирләриндән чыхаҹаглар», јә’ни дириләҹәкләр (Јәһја 5:28, 29; Һәвариләрин ишләри 24:15). Инсанлара нәјин әсасында һөкм олунаҹаг?

Һәвари Јәһјанын ҝөрүнтүсүндән өјрәнирик ки, «тумарлар ачылды» вә «өлүләр, китабларда јазыланлара әсасән, өз әмәлләринә ҝөрә мүһакимә олунду». Бу тумарларда кечмишдә ишләдилән ҝүнаһлармы јазылыб? Хејр, инсанлара өлмәздән әввәл ишләтдикләри ҝүнаһлара ҝөрә һөкм олунмајаҹаг. Биз буну һарадан билирик? Мүгәддәс Китабда дејилир: «Өлмүш адам ҝүнаһдан азад олмушдур» (Ромалылара 6:7). Буна ҝөрә дә, мәҹази дилдә десәк, дириләнләрин һәјаты јени сәһифәдән башлајаҹаг. Демәли, бурада хатырланан тумарлар — Аллаһын ҝәләҹәкдә верәҹәји ҝөстәришләрдир. Һәм Һар-Меҝидондан сағ чыханларын, һәм дә дириләнләрин әбәди јашамалары Аллаһын әмрләринә, о ҹүмләдән Јеһованын мин ил әрзиндә верәҹәји јени ҝөстәришләрә әмәл етмәләриндән асылыдыр. Ҝөрдүјүмүз кими, инсанлара Һөкм ҝүнү әрзиндә едәҹәкләри әмәлләринә ҝөрә һөкм олунаҹаг.

Һөкм ҝүнүндә милјонларла инсан Аллаһын ирадәси илә илк дәфә таныш олаҹаг вә Онун нормаларына ујғун јашаја биләҹәк. Бу, үмумдүнја маарифләндирмә ишинин сајәсиндә мүмкүн олаҹаг. Һәгигәтән дә, «дүнјанын сакинләри доғрулуғу» өјрәнәҹәкләр (Јешаја 26:9). Анҹаг һамы Аллаһын ирадәсини јеринә јетирмәк истәмәјәҹәк. Јешаја 26:10 ајәсиндә дејилир: «Пис адама рәһм етсәләр дә, о, доғрулуғу өјрәнмәз, доғрулуг һөкм сүрән өлкәдә дә һагсызлыг едәр, Рәббин бөјүклүјүнү ҝөрмәз». Һөкм ҝүнү әрзиндә бүтүн пис инсанлар әбәдијјән мәһв едиләҹәк (Јешаја 65:20).

Инсанлар Һөкм ҝүнүнүн сонунда ҝүнаһдан азад олунаҹаг вә сөзүн әсл мә’насында ‘һәјата гајыдаҹаглар’ (Вәһј 20:5). Бәшәријјәтә башланғыҹдакы камиллик гајтарылаҹаг (1 Коринфлиләрә 15:24-28). Сонра сонунҹу сынаг башланаҹаг. Шејтан дибсиз дәринликләрдән азад едиләҹәк вә ахырынҹы дәфә инсанлары аздырмаға ҹәһд ҝөстәрәҹәк (Вәһј 20:3, 7-10). Таб ҝәтирәнләр Мүгәддәс Китабын нөвбәти пејғәмбәрлијинин һәјата кечдијинә әмин олаҹаглар: «Салеһләр өлкәни мүлк олараг алаҹаг, онлар орада әбәди мәскән салаҹаг» (Мәзмур 37:29). Бәли, Һөкм ҝүнү Аллаһа садиг олан инсанлара хејир-дуа ҝәтирәҹәк!