Јеһованын ганунларындан зөвг алырсанмы?
“Нә бәхтијардыр о адам ки... зөвгү Рәббин шәриәтиндәдир [ганунундадыр]” (МӘЗМУР 1:1, 2).
1. Јеһованын хидмәтчиси олан бизләр нәјә ҝөрә хошбәхтик?
ЈЕҺОВА бизә, Өз садиг хидмәтчиләринә, көмәк едир вә хејир-дуа верир. Әлбәттә ки, биз чохлу сынагларла гаршылашырыг. Бунунла белә, биз һәгиги хошбәхтлијә маликик. Бу да ајдындыр, чүнки биз хошбәхт Аллаһа хидмәт едирик вә Онун мүгәддәс руһу үрәкләримиздә севинҹ һисси һасил едир (1 Тимотејә 1:11; Галатијалылара 5:22). Севинҹ һисси — јахшы бир шеји ҝөзләмәк вә ја алмаг сајәсиндә јаранан һәгиги хошбәхтлик дујғусудур. Вә Сәмави Атамыз, сөзсүз ки, бизә јахшы бәхшишләр верир (Јагуб 1:17). Бу сәбәбдән, бизим хошбәхт олмағымыз тәәҹҹүблү дејил!
2. Биз һансы Мәзмурлары мүзакирә едәҹәјик?
2 “Мәзмурлар” китабында хошбәхтлијә бөјүк диггәт јетирилир. Бу, мәсәлән, 1-ҹи вә 2-ҹи Мәзмурлардан ҝөрүнүр. Иса Мәсиһин илк давамчылары икинҹи Мәзмуру исраил падшаһы Давуда аид едирдиләр (Һәвариләрин ишләри 4:25, 26). Биринҹи Мәзмурун мүәллифи Аллаһдан илһам алмыш нәғмәсини нөвбәти сөзләрлә башлајыр: “Нә бәхтијардыр о адам ки, писләрин өјүдү илә јеримәз” (Мәзмур 1:1). Бу вә нөвбәти мәгаләдә 1-ҹи вә 2-ҹи Мәзмурун севинмәк үчүн бизә һансы әсаслары вердијини нәзәрдән кечирәҹәјик.
Хошбәхтлијин ачары
3. Мәзмур 1:1 ајәсинә әсасән, мө’мин инсан нәјә ҝөрә хошбәхтдир?
3 Биринҹи Мәзмур мө’мин инсанын нәјә ҝөрә хошбәхт олдуғуну изаһ едир. Бә’зи сәбәбләрә ишарә едәрәк мәзмурчу охујур: “Нә бәхтијардыр о адам ки, писләрин өјүдү илә јеримәз вә ҝүнаһкарларын јолунда дурмаз вә ришхәндчиләрин дәрнәјиндә отурмаз” (Мәзмур 1:1).
4. Нәјә ҝөрә Зәкәријјә илә Елизаветин нүмунәси тәглид едилмәјә лајигдир?
4 Һәгигәтән хошбәхт олмаг үчүн, биз Јеһованын әдаләтли тәләбләрини јеринә јетирмәлијик. Вәфтизчи Јәһјанын валидејнләри олмаг шәрәфинә лајиг олдугларына ҝөрә севинҹ һисси дујан Зәкәријјә илә Елизавет “Аллаһ гаршысында салеһ олуб Рәббин бүтүн әмр вә еһкамларына гүсурсуз әмәл едирди”ләр (Лука 1:5, 6). Онлар кими даврансаг вә “писләрин өјүдү”нү гәтијјәтлә рәдд етсәк, биз дә хошбәхт ола биләрик.
5. “Ҝүнаһкарларын јолундан” узаг дурмагда бизә нә көмәк едә биләр?
5 Әҝәр пис адамларын дүшүнҹә тәрзини рәдд едириксә, ‘ҝүнаһкарларын јолунда дурмајаҹағыг’. Биз үмумијјәтлә бу ҹүр инсанларын тез-тез јығылдыглары — әхлагсыз әјләнҹәләрә јол верилән вә ја пис ад газанмыш јерләрдә олмајаҹағыг. Бәс биздә ҝүнаһкарларын пис давранышыны тәглид етмәк мејли јаранырса, онда неҹә? О заман ҝәлин дуа едәк ки, Аллаһ бизә һәвари Павелин сөзләринә мүвафиг сурәтдә давранмагда көмәк етсин: “Имансызларла ејни бојундуруға ҝирмәјин. Ахы салеһлик илә ганунсузлуг арасында нә ортаглыг ола биләр? Ишыгла гаранлыг арасында нә шәриклик ола биләр?” (2 Коринфлиләрә 6:14). Әҝәр биз Аллаһа үмид едир вә ‘үрәјимиз тәмиздирсә’, ҝүнаһкарларын дүшүнҹә вә һәјат тәрзләрини рәдд едәҹәк, тәмиз мәгсәд вә истәјә, һабелә “ријасыз имана” малик олаҹағыг (Матта 5:8; 1 Тимотејә 1:5).
6. Өзүмүзү ришхәндчиләрдән горумаг нә үчүн лазымдыр?
6 Әҝәр Јеһованы разы салмаг истәјириксә, онда, сөзсүз ки, ‘ришхәндчиләрин дәрнәјиндә отурмалы’ дејилик. Бә’зи инсанлар мө’минлијә ришхәндлә јанашырлар, лакин вахтилә мәсиһчи олуб, сонрадан дөнүк чыхан кәсләр бу “ахыр ҝүнләрдә” хүсуси нифрәтлә ришхәнд едирләр. Һәвари Петер һәмиманлыларыны хәбәрдар етмишдир: “Севимлиләрим... Һәр шејдән габаг буну билин ки, ахыр ҝүнләрдә өз еһтирасларына ҝөрә һәрәкәт едән ришхәндчиләр истеһза едәрәк ҝәләҹәк вә дејәҹәкләр: “Бәс Онун вә’д едилмиш зүһуру һаны? Чүнки әҹдадымыз ҝөзләрини һәјата јумандан бәри һәр шеј илк јаранан заман олдуғу кими галыр” (2 Петер 3:1-4). Һеч вахт ‘ришхәндчиләрин дәрнәјиндә отурмуругса’, онлары мүтләг јахалајаҹаг фәлакәтдән гачынаҹағыг (Сүлејманын мәсәлләри 1:22-27).
7. Нә үчүн Мәзмур 1:1 ајәсиндә јазылмыш сөзләрә ҹидди јанашмалыјыг?
7 Әҝәр 1-ҹи Мәзмурун башланғыҹ сөзләринә диггәт јетирмәсәк, Мүгәддәс Јазылары өјрәнәрәк әлдә етдијимиз руһани дәјәрләри итирә биләрик. Сонра вәзијјәтимиз ҝет-ҝедә писләшә биләр. Мәсәлән, әввәлҹә биз писләрин өјүдү илә јеримәјә башлајырыг. Сонра артыг онларла мүнтәзәм олараг үнсијјәт едирик. Вахт кечдикҹә биз һәтта ришхәндчиләрә, демәк олар ки, хаин дөнүкләрә чеврилирик. Сөзсүз ки, ҝүнаһкарларла достлуғумуз биздә пис әһвал-руһијјә ојада вә Јеһова Аллаһымызла олан мүнасибәтләримизи мәһв едә биләр (1 Коринфлиләрә 15:33; Јагуб 4:4). Ҝәлин, белә шејин башымыза ҝәлмәсинә һеч заман јол вермәјәк!
8. Дүшүнҹәләримизи руһани шејләрә ҹәмләшдирмәкдә бизә нә көмәк едәҹәк?
8 Дуа дүшүнҹәләримизи руһани шејләрә ҹәмләшдирмәјә вә писләрлә достлугдан гачынмаға көмәк едәҹәк. Һәвари Павел јазырды: “Һеч нәјин гејдинә галмајын, амма һәр шејдә, дуа вә нијаз едәрәк, өз хаһишләринизи Аллаһа шүкранла билдирин. Вә Аллаһын һәр ҹүр ағылдан үстүн олан сүлһү Мәсиһ Иса васитәсилә үрәкләринизи вә дүшүнҹәләринизи горујаҹагдыр”. Һәвари Павел “доғру, еһтирамлы, әдаләтли, пак, ҹазибәли, е’тибарлы олан нә варса, әҝәр бир фәзиләт вә тә’рифә лајиг бир шеј варса” онлар һаггында дүшүнмәјә тәшвиг едирди (Филипилиләрә 4:6-8). Ҝәлин Павелин мәсләһәтинә мүвафиг сурәтдә давранаг вә һеч заман писләрин сәвијјәсинә енмәјәк.
9. Пис әмәлләрдән гачынсаг да, бүтүн инсанлара неҹә көмәк етмәјә чалышырыг?
9 Пис әмәлләри рәдд етсәк дә, Рома валиси Феликсә “салеһликдән, нәфсинә һаким олмагдан вә Аллаһын ҝәләҹәк һөкмүндән” данышан һәвари Павели тәглид едәрәк, инсанлара нәзакәтлә шаһидлик едирик (Һәвариләрин ишләри 24:24, 25; Колослулара 4:6). Биз бүтүн инсанлара мәрһәмәтлә јанашараг онлара Падшаһлыг һаггындакы хош хәбәри тәблиғ едирик. Биз әминик ки, “әбәди һәјата тә’јин олунанлар”, јә’ни мејлли оланлар имана малик олаҹаг вә Аллаһын ганунундан зөвг алаҹаглар (Һәвариләрин ишләри 13:48).
О, Јеһованын ганунундан зөвг алыр
10. Шәхси өјрәнмә заманы охунулан парчанын дүшүнҹәмизә вә үрәјимизә силинмәз из бурахмасына нә көмәк едәҹәк?
10 Мәзмурчу хошбәхт инсаны тәсвир едәрәк, сөзүнә давам едир: “Анҹаг зөвгү Рәббин шәриәтиндәдир [ганунундадыр]. Вә ҝеҹә-ҝүндүз онун шәриәтини дәрин дүшүнүр [“аһәстә сәслә охујур”, ЈД]” (Мәзмур 1:2). Биз, Аллаһын хидмәтчиләри кими, Јеһованын ганунундан зөвг алырыг. Шәхси өјрәнмә илә мәшғул олан вә өјрәндикләримизин үзәриндә дүшүнән заман, әҝәр мүмкүндүрсә, ‘аһәстә сәслә охујараг’ сөзләри уҹадан тәләффүз едә биләрик. Мүгәддәс Китабдан һәр һансы парчаны бу шәкилдә охумағымыз, дүшүнҹәмизә вә үрәјимизә силинмәз из бурахаҹагдыр.
11. Мүгәддәс Китабы нә үчүн “ҝеҹә-ҝүндүз” охумалыјыг?
11 “Садиг вә ағыллы гул” бизи Мүгәддәс Китабы һәр ҝүн охумаға тәшвиг едир (Матта 24:45). Биз Јеһованын инсанлара тәгдим етдији хош хәбәрлә јахындан таныш олмағы чох арзуладығымыз үчүн, Мүгәддәс Китабы “ҝеҹә-ҝүндүз” охујуруг. Бәли, Мүгәддәс Китабы ҝеҹә вахты бу вә ја диҝәр сәбәбләр үзүндән јухуја ҝедә билмәдикдә дә охуја биләрик. Петер бизи тәшвиг едир: “Анадан тәзә олмуш көрпәләр кими, һијләсиз сүдү андыран кәламы арзулајын ки, онунла бөјүјүб гуртулуша наил оласыныз” (1 Петер 2:1, 2). Сән Мүгәддәс Китабы һәр ҝүн охумагдан вә ҝеҹәләр Аллаһын нијјәтләри вә Кәламы үзәриндә дүшүнмәкдән зөвг алырсанмы? Мәзмурчу бундан зөвг алырды (Мәзмур 63:6).
12. Әҝәр Јеһованын ганунундан зөвг алырыгса, нә едәҹәјик?
12 Бизим әбәди хошбәхтлијимиз Аллаһын ганунундан зөвг алмағымыздан асылыдыр. Аллаһын гануну камил вә һагдыр, ону тутмагда бөјүк мүкафат вар (Мәзмур 19:7-11). Шаҝирд Јагуб јазырды: “Ким камил гануна, азадлыг ганунуна диггәтлә бахыб она бағлы галарса вә унутган динләјиҹи дејил, иҹраедиҹидирсә, өз әмәлиндә хошбәхт олаҹагдыр” (Јагуб 1:25). Әҝәр һәгигәтән дә Јеһованын ганунундан зөвг алырыгса, онда елә бир ҝүн олмајаҹаг ки, биз руһани шејләрин үзәриндә дүшүнмәјәк. Биздә “Аллаһын дәрин дүшүнҹәләрини” тәдгиг етмәк вә әввәлҹә Аллаһын Падшаһлығыны ахтармаг истәји ојанаҹагдыр (1 Коринфлиләрә 2:10-13; Матта 6:33).
О адам ағаҹ кимидир
13-15. Биз һансы мә’нада сујун кәнарында әкилмиш ағаҹ кими ола биләрик?
13 Салеһ инсаны тәсвир едәрәк мәзмурчу давам едир: “Ахар сулар кәнарында әкилән ағаҹ кими барыны мөвсүмүндә верәр, јарпағы солмаз, етдији һәр ишдә уғур газанар” (Мәзмур 1:3, МКШ). Биз, Јеһованын хидмәтчиләри, башга гејри-камил инсанлар кими, һәјатда чәтинликләрлә гаршылашырыг (Ејуб 14:1). Биз иманымызла әлагәдар тә’гибләрдән вә башга сынаглардан әзијјәт чәкә биләрик (Матта 5:10-12). Лакин ҝүҹлү күләјә давам ҝәтирән сағлам ағаҹ кими, биз Аллаһын көмәклији илә бу сынагларын өһдәсиндән мүвәффәгијјәтлә ҝәлә билирик.
14 Түкәнмәз су мәнбәјинин кәнарында әкилмиш ағаҹ исти һавада вә ја гураглыг заманы гурумур. Әҝәр биздә Аллаһа мәгбул горху варса, биз түкәнмәз Мәнбәдән — Јеһова Аллаһдан гүввә әлдә едәҹәјик. Гүввәни Аллаһда ахтаран Павел дејирди: “Мәни Мөһкәмләндирән [Јеһова] васитәсилә һәр шеји етмәјә гадирәм” (Филипилиләрә 4:13, И–93). Бизә рәһбәрлик едән вә бизи руһән мөһкәмләндирән Јеһованын мүгәддәс руһудур, буна ҝөрә дә, мәҹази мә’нада десәк, биз “гурумуруг”, јә’ни барсыз галыб, руһән өлмүрүк. Биз Аллаһа хидмәтдә сәмәрә ҝәтирир, һәмчинин Онун руһунун сәмәрәсини тәзаһүр етдиририк (Јеремја 17:7, 8; Галатијалылара 5:22, 23).
15 Мәзмурчу “кими” олараг тәрҹүмә едилән ибрани сөзүнү ишләдәрәк, мүгајисәдән истифадә едир. О, үмуми характерә малик олан ики мүхтәлиф шеји мүгајисә едир. Инсанлар ағаҹа бәнзәмир, лакин сујун кәнарында әкилмиш ағаҹын сых јарпаглары, јәгин ки, мәзмурчуја Јеһованын ганунундан зөвг алан кәсләрин әлдә етдикләри руһани уғурлары хатырладырды. Әҝәр Аллаһын ганунуну севириксә, ҝүнләримиз ағаҹын ҝүнләри кими олаҹагдыр. Бәли, биз әбәди јашаја биләҹәјик (Јәһја 17:3).
16. Нә үчүн вә һансы мә’нада ‘етдијимиз һәр ишдә уғур газанырыг’?
16 Биз салеһлик јолу илә ҝедәркән, Јеһова сынаг вә чәтинликләрин өһдәсиндән ҝәлмәјимизә көмәк едир. Биз Аллаһа хидмәтдән севинҹ әлдә едир вә бар веририк (Матта 13:23; Лука 8:15). ‘Етдијимиз һәр ишдә уғур газанырыг’, чүнки бизим әсас мәгсәдимиз — Јеһованын ирадәсини јеринә јетирмәкдир. Онун нијјәтләри һәмишә мүвәффәгијјәтлә јеринә јетир вә биз Онун тәләбләриндән зөвг алырыг, елә буна ҝөрә дә руһани уғурлар әлдә едирик (Тәквин 39:23; Јешу 1:7, 8; Ишаја 55:11). Бу, сынагларла гаршылашдығымыз заман да беләдир (Мәзмур 112:1-3; 3 Јәһја 2).
Пис адамларын заһири мүвәффәгијјәти
17, 18. а) Мәзмурчу пис адамлары нә илә мүгајисә етди? б) Пис адамлар мадди ҹәһәтдән мүвәффәгијјәтли олсалар да, онларын нәјә ҝөрә ҝәләҹәји јохдур?
17 Пис адамларын ҝәләҹәји, салеһләрин ҝәләҹәјиндән неҹә дә фәргләнир! Һәрдән елә ҝәлә биләр ки, пис адамлар мадди ҹәһәтдән уғур әлдә едирләр, лакин онлар руһани ҹәһәтдән һеч дә мүвәффәгијјәтли дејилләр. Бу, мәзмурчунун нөвбәти сөзләриндән ајдын ҝөрүнүр: “Пис адамлар белә дејил, онлар анҹаг јелин совурдуғу саман чөпүнә бәнзәр. Буна ҝөрә пис адамлар һөкм ҝүнүндә, ҝүнаһкарла салеһләрин мәҹлисиндә дајана билмәз” (Мәзмур 1:4, 5, МКШ). Мәзмурчунун “пис адамлар белә дејил” сөзләринә диггәт јетир. О, ону нәзәрдә тутур ки, пис адамлар индиҹә онун бәһрәли вә узунөмүрлү ағаҹларла мүгајисә етдији мө’мин инсанлар кими дејилләр.
18 Пис адамлар мадди ҹәһәтдән мүвәффәгијјәтли олсалар да, онларын ҝәләҹәји јохдур (Мәзмур 37:16; 73:3, 12). Онлар, Мәсиһин мирасын бөлүнмәсинә даир суала ҹаваб верәркән чәкдији мәсәлдәки ағылсыз варлы адама бәнзәјирләр. Иса орада иштирак едәнләрә деди: “Диггәтли олун, һәр нөв тамаһкарлыгдан өзүнүзү сахлајын, чүнки инсан һәјаты онун вар дөвләтинин чохлуғундан асылы дејилдир”. Бу фикри ајдынлашдырараг, Иса бир варлы инсан һаггында мәсәл чәкди. Һәмин адамын торпағы елә бол мәһсул верир ки, бүтүн дөвләтини бир јерә топламаг үчүн анбарларыны сөкүб даһа бөјүкләрини тикмәк гәрарына ҝәлир. Бундан сонра һәмин инсан јејиб-ичиб, кеф чәкмәји гәрарлашдырыр. Лакин Аллаһ дејир: “Ағылсыз! Сәнин ҹаныны елә бу ахшам алаҹаглар; сәнин һазырладығын шејләр бәс кимә галаҹаг?” Өз фикрини гејд едәрәк Иса әлавә едир: “Аллаһ гаршысында зәнҝин олмаг әвәзинә, өзү үчүн дөвләт топлајан һәр бир адамын агибәти белә олур” (Лука 12:13-21).
19, 20. а) Гәдим вахтларда тахыл дөјмә вә хәлбирләмәк ишинин неҹә баш вердијини тәсвир един. б) Пис адамлар нә үчүн “саман чөпүнә” бәнзәјирләр?
19 Пис адамлар “Аллаһ гаршысында зәнҝин” дејилләр. Онларын вәзијјәти о гәдәр мүвәггәти вә давамсыздыр ки, белә инсанлар саман чөпү илә — тахыл дөјүлән вахты сүнбүлүн, саплағын галығы вә диҝәр туллантылар илә мүгајисә олунурлар. Гәдим вахтларда топланмыш мәһсулу адәтән һүндүрлүкдә јерләшән хырмана — тахылы дөјмәк үчүн истифадә олунан мејдана ҝәтирирдиләр. Сүнбүлү дөјмәк вә буғданы самандан ајырмаг үчүн һејванларын сүнбүлләрин үзәриндән сүрүдүкләри тохмагдан — ити дашлардан вә ја алтында дәмир бычаглардан ибарәт олан киршәдән истифадә олунурду. Сонра хырдаланмыш гарышығы күрәк вә ја јаба илә күләјә гаршы һүндүрлүјә атырдылар (Ишаја 30:24). Нәтиҹәдә буғдалар хырмана дүшүр, күләш бир тәрәфә јығылыр, саманы исә күләк апарырды (Рут 3:2). Бундан сонра буғданы хырда дашлардан вә диҝәр зибилләрдән ајырараг хәлбирдән кечирир, сонра исә ја сахлајыр, ја да үјүдүрдүләр (Лука 22:31). Саман исә бир дәфәлик мәһв олурду.
20 Неҹә ки, буғда торпаға дүшүб, галыр, саманы исә күләк совурур, еләҹә дә салеһләр галаҹаг, пис адамлар исә мәһв олаҹагдыр. Сөзсүз ки, биз ганунсуз инсанларын бир аздан мәһв олаҹагларына шадыг. Онлар олмајан заман, Јеһованын ганунундан зөвг алан инсанлар чохлу хејир-дуалар әлдә едәҹәкләр. Итаәткар инсанлар нәтиҹәдә Аллаһын ән’амы олан әбәди һәјаты мирас алаҹаглар (Матта 25:34-46; Ромалылара 6:23).
“Салеһләрин јолу” хејир-дуалыдыр
21. “Рәбб салеһләрин јолуну биләр” нә демәкдир?
21 Биринҹи Мәзмур бу сөзләрлә баша чатыр: “Рәбб салеһләрин јолуну биләр, фәгәт писләрин јолу јох олар” (Мәзмур 1:6). “Рәбб салеһләрин јолуну биләр” нә демәкдир? Әҝәр биз салеһлик јолу илә ҝедириксә, әмин ола биләрик ки, сәмави Атамыз бизим мө’мин һәјат тәрзимизи гәбул едәҹәк вә Өз хидмәтчиләри кими бизә илтифат ҝөстәрәҹәкдир. Биз исә өз нөвбәмиздә, Аллаһын һәгигәтән дә гејдимизә галдығына там әмин олараг бүтүн нараһатчылығымызы Онун үзәринә гоја биләрик вә һәтта гојмалыјыг да (Һезекиел 34:11; 1 Петер 5:6, 7).
22, 23. Пис адамларын башына нә ҝәләҹәк вә салеһләри нә ҝөзләјир?
22 “Салеһләрин јолу” әбәдијјән вар олаҹагдыр, анҹаг ислаһ олмаг истәмәјән ҝүнаһкарлар мәһв олаҹаглар, чүнки онларын үзәриндә Јеһованын һөкмү јеринә јетәҹәк. Онларла бәрабәр онларын “јолу”, јә’ни һәјат тәрзләри дә јох олаҹагдыр. Биз Давудун сөзләринин јеринә јетәҹәјинә әмин ола биләрик: “Бир аз ҝөзлә, пис јох олаҹаг, јерини ахтарсан белә, тапылмајаҹаг. Мәзлумлар өлкәни мүлк олараг алаҹаг, әмин-аманлығын боллуғундан зөвг тапаҹаг. Салеһләр өлкәни мүлк олараг алаҹаг, онлар орада әбәди мәскән салаҹаг” (Мәзмур 37:10, 11, 29, МКШ).
23 Артыг пис адамларын олмајаҹағы јер үзүндәки Ҹәннәтдә јашамаг шәрәфинә лајиг ҝөрүлсәк, неҹә дә дәрин севинҹ һисси дујаҹағыг! О заман һәлимләр вә салеһләр Јеһованын ганунундан һәмишә зөвг алараг һәгиги сүлһдән ләззәт дујаҹаглар. Лакин буна гәдәр Јеһованын “фәрманы” јеринә јетмәлидир (Мәзмур 2:7а). Нөвбәти мәгалә бу фәрманын нә олдуғуну вә онун бизим вә бүтүн бәшәријјәт үчүн нә мә’на дашыдығыны ҝөрмәкдә көмәк едәҹәкдир.
Сиз неҹә ҹаваб верәрдиниз?
• Мө’мин инсан нә үчүн хошбәхтдир?
• Јеһованын ганунундан зөвг алдығымыз нәдән ҝөрүнүр?
• Инсан һансы мә’нада сујун кәнарында әкилмиш ағаҹ кими ола биләр?
• Салеһләрин јолу пис адамларын јолундан нә илә фәргләнир?
[9-ҹу сәһифәдәки шәкил]
Дуа пис адамларла достлугдан гачынмағымыза көмәк едәҹәкдир.
[10-ҹу сәһифәдәки шәкил]
Салеһ инсан нәјә ҝөрә ағаҹла мүгајисә олунур?