Јеһованын сөзүнә ҝүвәнин

«Сәнин сөзләринә ҝүвәнирәм» (МӘЗМУР 119:42).

1. Јүз он доггузунҹу мәзмурун јазычысы вә онун әһвал-руһијјәси һаггында нә демәк олар?

ЈҮЗ ОН ДОГГУЗУНҸУ мәзмуру Јеһованын сөзүнү бүтүн гәлби илә севән бир инсан бәстәләмишдир. Ола билсин, бу, Јәһуда тахтынын вариси Хизгија олмушдур. Илһамланмыш бу маһныдакы дујғулар падшаһ кими хидмәт етдији мүддәтдә ‘Рәбдән јапышан’ Хизгијанын әһвал-руһијјәси илә һәмаһәнҝдир (2 Падшаһлар 18:3-7). Ајдын олан одур ки, мәзмурчу руһани тәләбатларыны дәрк едирди (Матта 5:3).

2. Јүз он доггузунҹу мәзмурун әсас мөвзусу нәдир вә о неҹә тәртиб едилмишдир?

² Јүз он доггузунҹу мәзмурун әсас мөвзусу — Аллаһын сөзүнүн, јә’ни хәбәринин дәјәрли олмасыдырa. Еһтимал ки, бу мәзмурун јадда јахшы галмасы үчүн о акростих (һәр мисрасынын баш һәрфләри бир сөз вә ја ҹүмлә әмәлә ҝәтирән ше’р) формасында јазылмышдыр. Бу поетик әсәрин 176 ајәсинин баш һәрфләри ардыҹыллығына ҝөрә гәдим ибрани әлифбасыны әмәлә ҝәтирәҹәк формада бәстәләнмишдир. Ибраниҹә орижинал мәтндә мәзмурун 22 бәндиндән һәр бири ејни һәрфлә башланан 8 мисрадан ибарәтдир. Бу мәзмурда Аллаһын сөзү, ганунлары, өјүдләри, јә’ни хатырлатмалары, јоллары, гајда-ганунлары, әмрләри, һөкмләри вә вә’дләри һаггында данышылыр. Бу вә нөвбәти мәгаләдә 119-ҹу мәзмур Ибраниҹә Мүгәддәс Јазыларын дәгиг тәрҹүмәси әсасында мүзакирә олунаҹаг. Јеһованын гәдимдәки вә буҝүнкү хидмәтчиләринин нүмунәләри үзәриндә дүшүнмәк, бу илһамланмыш маһныны даһа чох гијмәтләндирмәјә вә Аллаһа Онун јазылы Кәламы олан Мүгәддәс Китаба ҝөрә миннәтдарлығымызы артырмаға көмәк едәҹәк.

Аллаһын сөзүнә итаәт един вә хошбәхт олун

3. Гүсурсуз олмағын нә демәк олдуғуну изаһ един вә нүмунә әсасында ҝөстәрин.

³ Һәгиги хошбәхтлик Рәббин ганунунда јеримәјимиздән асылыдыр (Мәзмур 119:1-8). Әҝәр буну едириксә, Јеһова бизи «јолумузда гүсурсуз» һесаб едәҹәк (Мәзмур 119:1, ЈД). Гүсурсуз олмаг камил олмаг демәк дејил, лакин бу, Јеһова Аллаһын ирадәсини вар гүввә илә јеринә јетирмәк үчүн чалышмаг демәкдир. «Нуһ салеһ вә өз нәсли арасында гүсурсуз бир адам иди» чүнки о, «Аллаһа јахын иди». Бу садиг инсан Јеһованын ҝөстәрдији кими јашадығы үчүн, аиләси илә бирликдә Дашгындан саламат чыхды (Јарадылыш 6:9; 1 Петер 3:20). Јеһованын ирадәсини јеринә јетирәрәк ‘гајда-ганунларына бағлы галсаг’, бу дүнјанын сону ҝәләндә биз дә сағ гала биләрик (Мәзмур 119:4).

4. Һәјатда хошбәхтлијимиз вә мүвәффәгијјәтимиз нәдән асылыдыр?

⁴ Әҝәр Јеһоваја ‘сәмими гәлбдән шүкүр едәрәк гајдаларына әмәл етсәк’, О бизи һеч заман тәрк етмәз (Мәзмур 119:7, 8). Аллаһ ‘Ганун китабында јазылан һәр шејә дәгиг әмәл етмәк үчүн ҝеҹә-ҝүндүз онун үзәриндә дүшүнмәк’ мәсләһәтинә риајәт едән Исраил халгынын рәһбәри Јешуаны тәрк етмәди. Буна ҝөрә дә о, уғурлу олду вә мүдрикликлә давранды (Јешуа 1:8). Һәјатынын сон ҝүнләриндә Јешуа Аллаһы иззәтләндирмәјә давам етдији үчүн исраиллиләрә буну хатырлатды: «Бүтүн гәлбинизлә вә варлығынызла билирсиниз ки, Аллаһыныз Рәббин һаггынызда дедији бүтүн јахшы шејләрдән һеч бири боша чыхмады» (Јешуа 23:14). Һәм Јешуа, һәм дә 119-ҹу мәзмурун јазычысы кими Јеһованы иззәтләндирәрәк вә Онун сөзүнә е’тибар едәрәк биз дә хошбәхтлик вә мүвәффәгијјәт тапа биләрик.

Аллаһын сөзү бизи тәмиз сахлајыр

5. а) Руһани тәмизлији неҹә горујуб сахламаг олар? б) Ҹидди ҝүнаһ ишләдән ҝәнҹ адама нә көмәк едәр?

⁵ Аллаһын «сөзләринә бағлы галмагла» өзүмүзү руһән тәмиз сахлаја биләрик (Мәзмур 119:9-16). Һәтта валидејнләримиз бизә јахшы нүмунә вермәсәләр дә, буну етмәк мүмкүндүр. Атасынын бүтпәрәст олмасына бахмајараг, Хизгија өз јолуну, еһтимал ки, бүтпәрәст адәтләри рәдд етмәклә тәмизләди. Бәс бизим ҝүнләрдә Аллаһын ҝәнҹ хидмәтчиси ҹидди ҝүнаһ ишләдәрсә, неҹә давранмалы? Төвбә, дуалар, валидејнләрин гајғысы вә ағсаггалларын севҝи долу јардымы һәмин ҝәнҹә Хизгијаја бәнзәр тәрздә өз јолуну писликдән тәмиз сахламагда көмәк едәр (Јагуб 5:13-15).

6. Һансы гадынлар өз јолларыны тәмизләдиләр вә өзләрини Аллаһын «сөзләринә бағлы галмагла» тәмиз сахладылар?

⁶ Јүз он доггузунҹу мәзмурун јазылмасындан чох-чох әввәлләр јашајан Рахав вә Рут да өз јолларыны тәмизләдиләр. Рахав кән’анлы бир фаһишә иди, лакин өз иманына ҝөрә Јеһованын хидмәтчиси кими танынды (Ибраниләрә 11:30, 31). Моавлы Рут аллаһларыны тәрк едәрәк Јеһоваја, Онун исраиллиләрә вердији Гануна мүвафиг олараг хидмәт етмәјә башлады (Рут 1:14-17; 4:9-13). Диҝәр халглардан олан бу гадынларын һәр икиси Аллаһын «сөзләринә бағлы галмагла» өзләрини тәмиз сахладылар вә Иса Мәсиһин улу нәнәләри олмаг кими ҝөзәл шәрәфә лајиг ҝөрүлдүләр (Матта 1:1, 4-6).

7. Даниел вә онун үч досту руһани тәмизлији горумагда бизә неҹә нүмунә вердиләр?

⁷ «Ҹаванлығындан бәри инсан үрәјинин фикирләринин һәмишә пис олмасына бахмајараг», ҝәнҹ адамлар, һәтта Шејтанын тә’сири алтында олан пис дүнјада белә өз јолларыны тәмиз сахлаја биләрләр (Јарадылыш 8:21; 1 Јәһја 5:19). Даниел вә үч ибрани ҝәнҹ Бабилә әсир апарылсалар да, өзләрини Аллаһын «сөзләринә бағлы галмагла» тәмиз сахлајырдылар. Мәсәлән, онлар ‘падшаһын једији јемәкләрлә өзләрини мурдар етмәдиләр’ (Даниел 1:6-10). Бабиллиләр Мусанын ганунуна ҝөрә јејилмәси гадаған олунан натәмиз һејванлары јејирдиләр (Левилиләр 11:1-31; 20:24-26). Онлар өлдүрүлән һејванын ганыны һәмишә ахытмырдылар, әти бу ҹүр истифадә етмәләри исә Аллаһын ган һаггындакы ганунуна зидд иди (Јарадылыш 9:3, 4). Бу вәзијјәтдә ҝәнҹләрин падшаһын једији јемәкләрдән имтина етмәләри тәәҹҹүблү дејил! Аллаһ горхусуна малик олан бу ҝәнҹләр руһани тәмизликләрини сахламагла бизә јахшы нүмунә гојдулар.

Аллаһын сөзү садиг галмаға көмәк едир

8. Аллаһын ганунларыны дәрк етмәк вә һәјатымызда тәтбиг етмәк үчүн биз һансы әһвал-руһијјәјә вә биликләрә малик олмалыјыг?

⁸ Аллаһын сөзүнә олан мәһәббәт Јеһоваја садиг галмағымыз үчүн ваҹиб амилдир (Мәзмур 119:17-24). Әҝәр биз дә мәзмурчунун әһвал-руһијјәсинә маликиксә, онда Аллаһын «ганунунун харигәләрини» анламаға ҝүҹлү истәјимиз олаҹаг. Даима Јеһованын ‘һөкмләринин һәсрәтини чәкәҹәк’ вә ‘өјүдләриндән [«хатырлатмаларындан», ЈД] зөвг алаҹағыг’ (Мәзмур 119:18, 20, 24). Јеһоваја јениҹә һәср олунмушугса да, ‘һијләсиз сүдү андыран кәламы арзулајырыгмы’? (1 Петер 2:1, 2). Аллаһын ганунларыны даһа јахшы дәрк етмәк вә һәјатымызда тәтбиг етмәк үчүн, Мүгәддәс Китабын әсас тә’лимләрини баша дүшмәлијик.

9. Инсанларын тәләбләри Аллаһын ганунуна зидд оланда неҹә давранмалыјыг?

⁹ Биз Аллаһын хатырлатмаларыны севә биләрик, лакин «башчылар» һансыса сәбәбләр уҹбатындан бизим үчүн гәсд гурурларса нә етмәли? (Мәзмур 119:23, 24). Бу ҝүн рәһбәрләр бизи тез-тез инсан тәләбләрини Аллаһын ганунларындан үстүн тутмаға мәҹбур етмәјә чалышырлар. Инсанларын тәләбләри Аллаһын ирадәсинә зидд оланда неҹә давранмалыјыг? Јеһованын сөзүнә олан мәһәббәтимиз Она садиг галмагда бизә көмәк едәҹәк. Иса Мәсиһин тә’гиб олунан һәвариләри кими биз дә дејәҹәјик: «Инсанлардан артыг, Аллаһа итаәт етмәк ҝәрәкдир» (Һәвариләрин ишләри 5:29).

10, 11. Ән ағыр шәраитләрдә белә Јеһованын гаршысындакы нөгсансызлығымызы неҹә горујуб сахлаја биләҹәјимизи нүмунә әсасында изаһ един.

¹⁰ Һәтта ән чәтин шәраитләрдә белә Јеһоваја садиг гала биләрик (Мәзмур 119:25-32). Буна наил олмаг истәјириксә, Јеһовадан өјрәнмәјә һазыр олмалы вә рәһбәрлик алмаг үчүн сәмимијјәтлә дуа етмәлијик. Биз һәм дә «сәдагәт јолуну» сечмәлијик (Мәзмур 119:26, 30).

¹¹ Јүз он доггузунҹу мәзмурун еһтимал едилән јазычысы Хизгија, һәр тәрәфдә һөкм сүрән бүтпәрәстлијә вә ҝүман ки, сарај адамларынын истеһзаларына бахмајараг, «сәдагәт јолуну» сечди. Һәмин вахт онун ‘кәдәрдән ҹанынын үзүлдүјүнү’ тәсәввүр етмәк олар (Мәзмур 119:28). Лакин Хизгија Аллаһа ҝүвәнирди, о јахшы падшаһ иди вә ‘Рәббин ҝөзүндә доғру олан ишләр едирди’ (2 Падшаһлар 18:1-5). Јеһоваја ҝүвәнәрәк биз дә бүтүн сынаглара таб ҝәтирәр вә нөгсансызлығымызы горујуб сахлаја биләрик (Јагуб 1:5-8).

Јеһованын сөзү ҹәсарәт верир

12. Шәхсән биз Мәзмур 119:36, 37 ајәләриндәки принсипләри һәјатымызда неҹә тәтбиг едә биләрик?

¹² Аллаһын сөзүнү рәһбәр тутмағымыз, һәјати чәтинликләрин өһдәсиндән ҝәлмәк үчүн зәрури олан ҹәсарәти верир (Мәзмур 119:33-40). Јеһованын ганунларына ‘бүтүн гәлбимизлә’ бағлы галмаг үчүн биз Онун рәһбәрлијини һәлимлик вә һазырлыгла гәбул едирик (Мәзмур 119:33, 34). Мәзмурчу кими биз дә Аллаһа јалварырыг: «Сәрвәт јығмаг [«пис газанҹ», КМ] истәјини гәлбимдән чыхарт, мејлими Сәнин өјүдләринә тәрәф јөнәлт» (Мәзмур 119:36). Биз һәвари Павел кими һәр шејдә дүрүст олмаға чалышырыг (Ибраниләрә 13:18). Әҝәр иш јериндә биздән дүзҝүн олмајан бир иши ҝөрмәји хаһиш едирләрсә, Аллаһын әмрләринә бағлы галмаг үчүн бүтүн ҹәсарәтимизи топламалыјыг. Јеһова исә бу ҹүр давранышымыза һәмишә хејир-дуа верир. О, бүтүн ҝүнаһлы арзуларымызы нәзарәт алтында сахламаға көмәк едир. Буна ҝөрә ҝәлин дуа едәк: «Гојма ҝөзләрим фани шејләрә бахсын» (Мәзмур 119:37). Биз һеч вахт Аллаһын нифрәт етдији шејләри арзуламајаҹағыг (Мәзмур 97:10). Бу бизи, Аллаһа мәгбул олмајан һәр шејдән, о ҹүмләдән порнографија вә спиритизмдән гачынмаға тәшвиг едәҹәк (1 Коринфлиләрә 6:9, 10; Вәһј 21:8).

13. Исанын тә’гиб олунан шаҝирдләри ҹәсарәтлә тәблиғ етмәк үчүн лазым олан гүввәни неҹә әлдә етдиләр?

¹³ Аллаһын сөзүнү дәгиг билмәјимиз әминликлә тәблиғ етмәк үчүн бизә ҹәсарәт верир (Мәзмур 119:41-48). Ҹәсарәт исә, бизи ‘тәһгир едәнләрә лајигинҹә ҹаваб вермәк’ үчүн лазымдыр (Мәзмур 119:42). Бә’зән Исанын тә’гиб олунан шаҝирдләринин вәзијјәтиндә ола биләрик. Онлар дуа едирдиләр: «Ја Рәбб... Өз гулларына гүввә вер ки, Сәнин сөзүнү там ҹәсарәтлә сөјләсинләр». Аллаһ онларын дуасына неҹә ҹаваб верди? Онларын һамысы «Мүгәддәс Руһла долмушду вә Аллаһын сөзүнү ҹәсарәтлә сөјләјирди». Сөзүнү ҹәсарәтлә тәблиғ етмәк үчүн Һөкмдар Аллаһ бизә дә гүввә верир (Һәвариләрин ишләри 4:24-31).

14. Павел кими ҹәсарәтлә шаһидлик етмәкдә бизә нә көмәк едәр?

¹⁴ Әҝәр «һәгигәт» сөзләрини севир вә һәмишә Аллаһын ‘ганунуна бағлы галырыгса’, горхмадан вә чәкинмәдән тәблиғ етмәк үчүн биз дә ҹәсарәт тапаҹағыг (Мәзмур 119:43, 44). Аллаһын Кәламы олан Мүгәддәс Китабы сә’јлә тәдгиг етмәјимиз бизә Онун өјүдләри, јә’ни хатырлатмалары барәдә «падшаһларын һүзурунда» данышмаға көмәк едәҹәк (Мәзмур 119:46). Дуанын вә Јеһованын руһунун сајәсиндә бизим данышдыгларымыз доғру вә мүнасиб олаҹаг (Матта 10:16-20; Колослулара 4:6). Павел биринҹи әсрин рәһбәрләринә Аллаһын хатырлатмалары һаггында ҹәсарәтлә данышырды. Мәсәлән, Павел Рома валиси Феликсә шаһидлик етди, вали дә онун «Мәсиһ Исаја иман һаггында данышдығыны динләди» (Һәвариләрин ишләри 24:24, 25). Павел һәм дә һөкмдар Фестусун вә падшаһ Агриппанын гаршысында шаһидлик етди (Һәвариләрин ишләри 25:22–26:32). Јеһованын көмәји илә биз дә ‘Мүждәдән утанмајан’ ҹәсарәтли шаһидләр ола биләрик (Ромалылара 1:16).

Аллаһын Кәламы тәсәлли верир

15. Инсанлар бизә истеһза едәндә, Аллаһын Кәламындан неҹә тәсәлли тапа биләрик?

¹⁵ Јеһованын Кәламы бизә түкәнмәз тәсәлли верир (Мәзмур 119:49-56). Елә анлар олур ки, тәсәллијә хүсусилә еһтијаҹ дујуруг. Јеһованын Шаһидләри кими ҹәсарәтлә данышсаг да, Аллаһа дүшмән олан «ловғалар» бә’зән бизә ‘истеһза едирләр’ (Мәзмур 119:51). Лакин биз дуа едәндә Аллаһын Кәламында јазылан мүсбәт фикирләри јада салыр вә бунунла ‘тәсәлли тапырыг’ (Мәзмур 119:52). Јалварараг дуа етдијимиз заман чәтин анларда олдугҹа зәрури олан, бизә тәсәлли вә ҹәсарәт верән Мүгәддәс Китаб ганунларыны вә принсипләрини јада сала биләрик.

16. Тә’гибләрә бахмајараг, Аллаһын хидмәтчиләри һеч заман нә етмәмишдиләр?

¹⁶ Мәзмурчуја истеһза едән ловғалар Аллаһа һәср олунмуш халгын үзвләри — исраиллиләр иди. Онлар өзләрини неҹә дә рүсвај едирдиләр! Онлардан фәргли олараг, ҝәлин һеч заман Аллаһын ганунларындан јајынмајаг (Мәзмур 119:51). Насизм дөврүндә олдуғу кими, сәрт сынаглар гаршысында Аллаһын минләрлә хидмәтчиләри Онун Кәламында јазылмыш ганун вә принсипләрә зидд давранмагдан бојун гачырмышлар. Онлар бу ҝүн дә белә давранырлар (Јәһја 15:18-21). Јеһоваја итаәт етмәк бизим үчүн чәтин дејил, чүнки Онун әмрләри бир нәғмә тәк көнлү ачыр (Мәзмур 119:54; 1 Јәһја 5:3).

Јеһованын сөзүнә ҝөрә миннәтдар олун

17. Аллаһын сөзүнә ҝөрә олан миннәтдарлығымыз бизи нәјә тәшвиг едир?

¹⁷ Аллаһын сөзүнә ҝөрә олан миннәтдарлығымызы бу сөзә мүвафиг јашамагла сүбут едирик (Мәзмур 119:57-64). Мәзмурчу Јеһованын ‘сөзләринә бағлы галмаг үчүн вә’д етмишдир’, һәтта ‘адил һөкмләринә ҝөрә Она шүкүр етмәк үчүн ҝеҹә јарысы галхырды’. Әҝәр ҝеҹә јухумуз гачыбса, онда Јеһоваја дуамызда миннәтдарлыг етмәк үчүн неҹә дә ҝөзәл имканымыз вар! (Мәзмур 119:57, 62). Јеһованын сөзүнә олан һөрмәтимиз биздә Онун тә’лимләрини ахтармаг һәвәси ојадыр вә Ондан «горханларын», јә’ни Аллаһа еһтирам бәсләјән инсанларын севинҹли «дост»лары едир (Мәзмур 119:63, 64). Јер үзүндә бундан јахшы достлар ола биләрми?!

18. ‘Пис адамлар бизә кәмәнд атанда’ Јеһова бизим дуаларымыза неҹә ҹаваб верир?

¹⁸ Үрәкдән дуа едиб Јеһовадан бизи өјрәтмәсини һәлимликлә хаһиш едәндә, Онун бизә лүтф ҝөстәрмәсини арзулајырыг. ‘Пис адамлар бизә кәмәнд атаркән’ дуа етмәк хүсусилә ваҹибдир (Мәзмур 119:58, 61). Јеһова бизи, Падшаһлығын тәблиғи вә шаҝирдләрин һазырланмасы ишиндә бизә манеә төрәдән дүшмәнләрин ‘кәмәндиндән’ азад едә биләр (Матта 24:14; 28:19, 20). Фәалијјәтимиз гадаға алтында олан өлкәләрдә белә һаллар дәфәләрлә баш вермишдир.

Аллаһын сөзүнә иман един

19, 20. Чәкдијимиз әзабларын бизә һансы хејри вар?

¹⁹ Аллаһа вә Онун сөзүнә олан иман бизә сынаглара таб ҝәтирмәкдә вә Онун ирадәсини јеринә јетирмәкдә көмәк едир (Мәзмур 119:65-72). Ловға инсанлар ‘јаланлары илә она гара јахсалар да’ мәзмурчу охујурду: «Чәкдијим әзабын хејри мәнә бу олуб: Сәнин гајдаларыны өјрәнирәм» (Мәзмур 119:66, 69, 71). Јеһованын хидмәтчиләри әзаб чәкдикләри һалда һансы хејирдән данышмаг олар?

²⁰ Әзаблара мә’руз галанда биз һәмишә Јеһоваја үрәкдән јалварырыг, бу исә бизи Она јахынлашдырыр. Аллаһын Кәламы олан Мүгәддәс Китабы тәдгиг етмәјә чох вахт ајырыр вә бу Кәламын принсипләрини тәтбиг етмәк үчүн даһа чох сә’ј ҝөстәририк. Бу бизә севинҹ вә хошбәхтлик ҝәтирир. Лакин әҝәр сынаглар заманы сәбирсизлик вә ловғалыг кими пис мејлләримиз үзә чыхырса, онда нә етмәли? Үрәкдән ҝәлән дуаларымызын, Аллаһын Кәламынын вә мүгәддәс руһунун көмәји илә биз өз нөгсанларымызын өһдәсиндән ҝәлиб, даһа јахшы тәрздә ‘јени мәнлији ҝејинә’ биләрик (Колослулара 3:9-14). Бундан әлавә, иманымыз мөһкәмләнир (1 Петер 1:6, 7). Һәвари Павелин кечмәли олдуғу сынаглар онун хејринә хидмәт етмишдир, чүнки онларын сајәсиндә Јеһоваја даһа чох ҝүвәнмәји өјрәнмишдир (2 Коринфлиләрә 1:8-10). Чәтинликләр заманы биз нә исә өјрәнмәјә чалышырыгмы?

Даима Јеһоваја ҝүвәнин

21. Аллаһ ловғалары утандыранда нә баш верир?

²¹ Јеһованын сөзү Она ҝүвәнмәк үчүн бизә мөһкәм әсас верир (Мәзмур 119:73-80). Әҝәр һәгигәтән дә Јарадана ҝүвәнириксә, утанмаға һеч бир әсасымыз јохдур. Лакин башга инсанларын һәрәкәтләри уҹбатындан бә’зән тәсәллијә еһтијаҹ дујур вә Јеһоваја јалварырыг: «Ловғалары утандыр» (Мәзмур 119:76-78). Бу ҹүр инсанлары утандырмагла Јеһова онларын пис әмәлләрини ифша едир вә Өзүнүн мүгәддәс адыны иззәтләндирир. Әминликлә демәк олар ки, Аллаһын халгынын тә’гибчиләри һеч заман мүвәффәгијјәтә наил олмајаҹаглар. Мәсәлән, онлар бүтүн гәлбләри илә Аллаһа ҝүвәнән Јеһованын Шаһидләрини һеч заман мәһв едә билмәмиш вә буну едә билмәјәҹәкләр дә (Сүлејманын мәсәлләри 3:5, 6).

22. «Түстү ичиндәки тулуг кими олдум» дејәндә мәзмурчу нәји нәзәрдә тутурду?

²² Тә’гибләр заманы Аллаһын сөзү Она олан е’тибарымызы мөһкәмләндирир (Мәзмур 119:81-88). Мәзмурчу ловға инсанлар тәрәфиндән тә’гиб едиләндә, өзүнү «түстү ичиндәки тулуг кими» һисс едирди (Мәзмур 119:83, 86). Мүгәддәс Китабын јазылдығы дөврләрдә һејванларын дәрисиндән һазырланмыш тулугларда су, шәраб вә диҝәр мајеләр сахлајырдылар. Тулуг истифадә олунмајанда, баҹасы олмајан отагда оҹаға јахын јердә асылырдыса, бүзүшүб гурујурду. Чәтинликләр вә ја тә’гибләр заманы сиз дә «түстү ичиндәки тулуг кими» олурсунузму? Әҝәр олурсунузса, онда Јеһоваја ҝүвәниб дуа един: «Мәһәббәтинә ҝөрә мәнә һәјат вер, ағзындан чыхан өјүдләрә [«хатырлатмалара», ЈД] бағлы галым» (Мәзмур 119:88).

23. Мәзмур 119:1-88 ајәләрини тәдгиг едәрәк нәји нәзәрдән кечирдик вә Мәзмур 119:89-176 ајәләрини тәдгиг етмәјә давам етмәздән әввәл өзүмүздән нә соруша биләрик?

²³ Јүз он доггузунҹу мәзмурун биринҹи һиссәси, Јеһованын сөзүнә ҝүвәнән вә гајда-ганунларыны, хатырлатмаларыны вә әмрләрини севән хидмәтчиләринә Онун мәһәббәтлә јанашдығыны ҝөстәрди (Мәзмур 119:16, 47, 64, 70, 77, 88). Садиг инсанларын Аллаһын ‘сөзләринә бағлы галмасы’ Ону севиндирир (Мәзмур 119:9, 17, 41, 42). Бу поетик мәзмурун галан һиссәсини тәдгиг етмәздән әввәл сиз өзүнүздән соруша биләрсиниз: «Јеһованын сөзләринин јолларымы ишыгландырмасына изн верирәмми?»

[Һашијә]

Неҹә ҹаваб верәрдиниз?

• Һәгиги хошбәхтлик нәдән асылыдыр?

• Аллаһын сөзү руһән тәмиз галмағымыза неҹә көмәк едир?

• Аллаһын сөзү бизи неҹә ҹәсарәтләндирир вә руһландырыр?

• Нәјә ҝөрә Јеһоваја вә Онун сөзүнә иман етмәк лазымдыр?

[5-ҹи сәһифәдәки шәкилләр]

Рут, Рахав вә Бабилдә сүрҝүндә олан ибрани ҝәнҹләр Аллаһын «сөзүнә бағлы» галдылар.