Јегованын хатырлатмаларыны чохму севирсиниз?
“Ҹаным сәнин шәһадәтләрини [“хатырлатмаларыны”, ЈД] тутду; вә онлары чох севирәм” (МӘЗМУР 119:167).
1. Јегованын хатырлатмаларына хүсусилә һарада дәфәләрлә раст ҝәлмәк олар?
ЈЕГОВА халгынын хошбәхт олмасыны истәјир. Һәгиги мә’нада хошбәхт олмаг үчүн, биз, әлбәттә ки, Јегованын “шәриәтиндә јери”мәли вә тапшырыгларына риајәт етмәлијик. Бу ишдә бизә Онун хатырлатмалары көмәк едәр. Белә хатырлатмалар һаггында Мүгәддәс Јазыларда, хүсусилә дә, еһтимала ҝөрә Јәһудеја тахтынын ҝәнҹ вариси Һизкија тәрәфиндән јазылан 119-ҹу Мәзмурда дәфәләрлә данышылыр. Бу ҝөзәл нәғмә белә сөзләрлә башланыр: “Јолда камил оланлар нә бәхтијардыр; РӘББИН шәриәтиндә јеријәрләр. Онун шәһадәтләрини [“хатырлатмаларыны”, ЈД] тутанлар нә бәхтијардыр; бүтүн үрәклә ону ахтарарлар” (Мәзмур 119:1, 2).
2. Јегованын хатырлатмалары хошбәхтлијимизлә неҹә әлагәлидир?
2 Биз, Јегованын Кәламындан дәгиг билик әлдә едәрәк вә бу билији һәјатымызда тәтбиг едәрәк Онун “шәриәтиндә јеријир”ик. Лакин гејри-камил олдуғумуз үчүн, хатырлатмалара еһтијаҹымыз вар. “Хатырлатмалар” кими тәрҹүмә олунан Ибрани сөзү алтында, Јегованын ганунларыны, бујругларыны, әмрләрини вә һөкмләрини тәкрарән јадымыза салмасы нәзәрдә тутулур (Матта 10:18—20). Јегованын хатырлатмалары әсасында давранмаға давам едәриксә, хошбәхт ола биләрик, чүнки онлар бизә фәлакәт вә кәдәрлә нәтиҹәләнән руһани тәләләрдән гачынмаға көмәк едәр.
Јегованын хатырлатмаларына бағланын
3. Мәзмур 119:60, 61-ҹи ајәләринә әсасән биз нәјә әмин ола биләрик?
3 Аллаһын хатырлатмалары, мәзмурчу үчүн дәјәрли иди, о охујурду: “Әмрләрини тутмаг үчүн тәләсдим вә ҝеҹикмәдим. Әхлагсызларын торлары мәни сарыды; фәгәт сәнин шәриәтини унутмадым” (Мәзмур 119:60, 61). Јегованын хатырлатмалары тә’гибләрә таб ҝәтирмәкдә бизә көмәк едир, чүнки әминик ки, дүшмәнләрин бизи сарыдыглары торлары сәмави Атамыз парчалаја биләр. Падшаһлыг һаггындакы мүждәни тәблиғ едә билмәјимиз үчүн, О, јолумуздакы манеәләри мүнасиб билдији вахтда арадан галдырыр (Марк 13:10).
4. Аллаһын хатырлатмаларына неҹә һај вермәлијик?
4 Арабир Јегованын хатырлатмалары бизә дүзәлиш верир. Ҝәлин, мәзмурчу кими, белә дүзәлишләри һәр заман миннәтдарлыгла гәбул едәк. О, Аллаһа дуа едәркән деди: “Шәһадәтләрин дә [“хатырлатмаларын”, ЈД] мәним зөвгүмдүр... сәнин шәһадәтләрини [“хатырлатмаларыны”, ЈД] севирәм” (Мәзмур 119:24, 119). Биз, мәзмурчунун малик олдуғундан даһа артыг хатырлатмалара маликик. Јунанҹа Мүгәддәс Јазыларда ситат ҝәтирилән Ибраниҹә Мүгәддәс Јазыларын јүзләрлә ајәси бизә, Јегованын јалныз Мусанын гануну алтында олан халгына вердији тә’лиматлары дејил, Онун мәсиһчи јығынҹағына аид олан нијјәтләрини дә хатырладыр. Аллаһ бизә, ганунлары илә әлагәли шејләри хатырлатмағы мүнасиб ҝөрәндә, биз буну миннәтдарлыгла гәбул едирик. Јегованын “шәһадәтләринә [“хатырлатмаларына”, ЈД] бағланараг”, Јараданымызын наразылығына сәбәб олан, бизи севинҹдән мәһрум едән вә ҝүнаһ доғуран сынаглардан кәнар дуруруг (Мәзмур 119:31).
5. Јегованын хатырлатмаларыны мөһкәм неҹә севә биләрик?
5 Јегованын хатырлатмаларыны нә дәрәҹәдә севә биләрик? Мәзмурчу охујурду: “Ҹаным сәнин шәһадәтләрини [“хатырлатмаларыны”, ЈД] тутду; вә онлары чох севирәм” (Мәзмур 119:167). Әҝәр Јегованын хатырлатмаларыны, әсл мә’нада гајғымыза галан Атанын нәсиһәтләри кими гәбул едәриксә, о заман онлары чох севәрик (1 Петер 5:6, 7). Онун хатырлатмаларына еһтијаҹ дујуруг, бу хатырлатмаларын фајдасыны ҝөрдүкдә исә, онлара олан мәһәббәтимиз ҝетдикҹә артаҹагдыр.
Аллаһын хатырлатмаларына нәјә ҝөрә еһтијаҹ дујуруг?
6. Јегованын хатырлатмаларына еһтијаҹ дујмағымызын сәбәбләриндән бири һансыдыр вә онлары јадымыза салмаға нә көмәк едәр?
6 Јегованын хатырлатмаларына еһтијаҹ дујмағымызын сәбәбләриндән бири, унутган олмағымыздыр. “Уорлд бук” енсиклопедијасында дејилир: “Бир гајда олараг, инсанлар вахт кечдикҹә даһа чох унудурлар. [...] Јә’гин ки, сизин дә дилинизин уҹунда олан ады вә ја башга бир мә’луматы хатырлаја билмәдијиниз анлар олуб. [...] Надир олмајан бу һадисәни, јаддашын гысамүддәтли позулмасы адландырырлар. Алимләр буну, итмиш бир шеји сәлигәсизлик һөкм сүрән отагда ахтармагла мүгајисә едирләр. [...] Һәр һансы бир мә’луматы јадда сахламағын е’тибарлы үсулу - јахшы таныш олдуғунузу дүшүндүкдән сонра һәмин мә’луматы узун мүддәт өјрәнмәкдир” (“World Book Encyclopedia”). Сә’ј ҝөстәрәрәк өјрәнмә вә тәкрарлама, Аллаһын хатырлатмаларыны јадымыза салмаға вә рифаһымыз үчүн онларла әлагәдар давранмаға көмәк едәҹәкдир.
7. Нәјә ҝөрә Аллаһын хатырлатмалары, әввәлләр олдуғундан бу ҝүн даһа ваҹибдир?
7 Бу ҝүн Јегованын хатырлатмаларына әввәлләр олдуғундан даһа чох еһтијаҹ дујуруг, чүнки зәманәмиздә һөкм сүрән әхлагсызлыг јер үзүндә һеч заман олмамышдыр. Јегованын хатырлатмаларына диггәт јетирәриксә, јаланын гурбаны олмамаг вә бу дүнјанын пис јолларына доғру истигамәт ҝөтүрмәмәк үчүн ваҹиб олан анлајышы әлдә едәрик. Мәзмурчу деди: “Бүтүн мүәллимләримдән даһа анлајышлы олдум; чүнки шәһадәтләрин [“хатырлатмаларын”, ЈД] мәним дүшүнҹәмдир. Јашлылардан даһа ағыллы олдум; чүнки сәнин бујруғуну тутдум. Ајагларымы һәр шәр јолундан мүһафизә етдим, та ки, сәнин сөзүнү горујум” (Мәзмур 119:99—101). Аллаһын хатырлатмаларына риајәт едәрәк, “шәр јолундан” гачынар вә “анлајышлары гаранлыглашмыш... Аллаһын һәјатына јад олмуш” инсан күтләләриндән фәргләнәрик (Ефеслиләрә 4:17—19).
8. Иманын сынагларыны мүвәффәгијјәтлә гаршыламагда бизә нә көмәк едәр?
8 Аллаһын хатырлатмалары һәмчинин она ҝөрә ваҹибдир ки, онлар бизә “сонун вахтын”да гаршылашдығымыз чохсајлы сынаглара таб ҝәтирмәк үчүн ҝүҹ верир (Даниел 12:4). Белә хатырлатмалар олмаса, биз “унутган динләјиҹи” вәзијјәтинә дүшәрик (Јагуб 1:25). Лакин Мүгәддәс Китабы, “садиг вә ағыллы гул”ун нәшрләринин көмәклији илә истәр шәхсән, истәрсә дә јығынҹагла бәрабәр сә’јлә өјрәнмәк, иманын сынагларыны мүвәффәгијјәтлә гаршыламагда бизә көмәк едәр (Матта 24:45—47). Бу ҹүр руһани бәхшишләрин көмәклији илә, чәтин анларда Јеговаја мәгбул тәрздә давранмағын үсулуну ҝөрүрүк.
Јығынҹагларымызын ваҹиб ролу
9. “Инсанлар тимсалында һәдијјәләр” кимләрдир вә онлар һәмиманлыларына неҹә көмәк едирләр?
9 Аллаһын хатырлатмаларына олан еһтијаҹымыз гисмән, тә’јин олунмуш гардашлар тәрәфиндән нәсиһәтләр верилән мәсиһчи јығынҹагларынын һесабына тә’мин едилир. Һәвари Павел јазырды ки, Иса “јүксәјә галхдыгда, бир орду әсири дә Өзү илә апарды вә инсанлар тимсалында һәдијјәләр верди” (ЈД). Павел әлавә етди: “О [Мәсиһ] Өзү, кимини һәвари, кимини пејғәмбәр, кимини мүждәчи, кимини ҹәмијјәтин ҝөзәтчиси вә мүәллими тә’јин етди ки, мүгәддәсләр хидмәт ишини иҹра етмәк вә Мәсиһин бәдәнини инкишаф етдирмәк үчүн тә’мин едилсинләр” (Ефеслиләрә 4:8, 11, 12). Ибадәт етмәк үчүн бир јерә топлашдығымыз заман “инсанлар тимсалында һәдијјәләр”ин, јә’ни тә’јин олунмуш ағсаггалларын диггәтимизи Јегованын хатырлатмаларына јөнәлтдикләри үчүн неҹә дә миннәтдар ола биләрик!
10. Ибраниләрә 10:24, 25-ҹи ајәләринин маһијјәти нәдәдир?
10 Аллаһын вердији һәр шеј үчүн олан миннәтдарлығымыз, бизи, һәр һәфтә кечирилән беш јығынҹаг ҝөрүшүнә ҝетмәјә тәшвиг едәҹәкдир. Павел, мүнтәзәм олараг јығышмағын ҝәрәклијини вурғуламышды. О јазырды: “Бир-биримизи мәһәббәтә вә хејирли ишләрә неҹә тәшвиг едәҹәјимизин гајғысына галаг. Бә’зиләринин адәт етдикләри кими өз јығынҹагларымызы тәрк етмәјәк. Амма хүсусән, о Ҝүнүн јахынлашдығыны ҝөрдүјүмүз нисбәтдә бир-биримизи даһа чох үрәкләндирәк” (Ибраниләрә 10:24, 25).
11. Һәр һәфтә кечирилән ҝөрүшләрдән һәр бири бизә һансы фајданы ҝәтирир?
11 Јығынҹагларын бизә вердији фајданы гијмәтләндирирсинизми? Һәр һәфтә кечирилән “Ҝөзәтчи Гүлләси”нин өјрәнилмәси иманымызы мөһкәмләндирир, Јегованын хатырлатмаларына ујғун давранмагда бизә көмәк едир вә “дүнјанын руһуна” гаршы дурмаг үчүн ҝүҹ верир (1 Коринфлиләрә 2:12; Һәвариләрин ишләри 15:31). Ачыг ҝөрүш заманы мә’рузәчиләр Аллаһын Кәламына әсаланмыш өјүдләрлә чыхыш едирләр. Онларын мә’рузәләринә Јегованын хатырлатмалары вә Исанын сөјләдији “әбәди һәјатын сөзләри” дә дахилдир (Јәһја 6:68; 7:46; Матта 5:1—7:29). Теократик хидмәт Мәктәбиндә мүәллимлик габилијјәтләримизи инкишаф етдиририк. Хидмәти ҝөрүш исә, евдән-евә тәблиғ, тәкрар баш чәкмә, Мүгәддәс Китабын евдә өјрәнилмәси заманы вә хидмәтин башга саһәләриндә хош хәбәри даһа јахшы чатдырмаг үчүн чох гијмәтли көмәк тәгдим едир. Китабөјрәнмә групларында инсанларын аз олмасы исә, өзүнә Аллаһын хатырлатмаларыны дахил едән даһа чох ҹаваблар вермәјә имкан јарадыр.
12, 13. Јегованын, Асија өлкәләриндән бириндә јашајан халгы мәсиһчи ҝөрүшләри үчүн миннәтдарлығыны неҹә билдирир?
12 Ҝөрүшләрдә мүнтәзәм иштирак етмәк, бизә Аллаһын әмрләрини хатырладыр вә һәрби әмәлијјатлара, игтисади чәтинликләрә вә иманын диҝәр сынагларына бахмајараг руһән ҝүҹлү галмаг үчүн көмәк едир. Ҝөрүшләрин ваҹиблијини, Асија өлкәләриндән бириндә, евләрини тәрк едән вә тропик мешәдә јашамаға мәҹбур олан 70 мәсиһчи хүсусилә һисс етмишди. Мүнтәзәм олараг ҝөрүшмәјә гәти гәрарлы олан бу инсанлар, мүһарибәнин әһатә етдији шәһәрә гајыдыб, Падшаһлыг Залындан саламат галан һиссәләри сөкдүләр вә ону мешәдә јенидән тикдиләр.
13 Һәмин өлкәнин башга һиссәсиндә, Јегованын, илләрҹә давам едән мүһарибәнин чәтинликләринә таб ҝәтирән хидмәтчиләри, Она сә’јлә хидмәт етмәјә давам едирләр. Һәмин әразидән олан бир ағсаггалдан сорушдулар: “Гардашларын бир јердә галмасына ән чох көмәк едән нә олду?” О, ҹаваб верди: “19 ил әрзиндә бир дәфә дә олсун, јығынҹагдан галмадыг. Бә’зән бомбардман вә ја башга чәтинликләр уҹбатындан, гардашларын бә’зиләри јығынҹаг кечирилән јерә ҝәлә билмирди, лакин ҝөрүшләримизи һеч заман тә’хирә салмырдыг”. Бу әзиз баҹы-гардашларымыз, шүбһәсиз ки, “јығынҹагларымызы тәрк етмәјәк” принсипинин бүтүн ваҹиблијини дәрк едирләр.
14. Јашлы Аннанын нүмунәсиндән биз нә өјрәнирик?
14 Дул олан 84 јашлы Анна “мә’бәддән һеч ајрылмазды”. Буна ҝөрә дә Иса, доғулдугдан гыса мүддәт сонра мә’бәдә ҝәтириләндә о да орада иди (Лука 2:36—38, И—93). Сиз дә јығынҹаглары бурахмамағы гаршыныза мәгсәд гојмусунузму? Конгрессләримизин бүтүн һиссәсиндә иштирак етмәк үчүн виҹданламы сә’ј ҝөстәрирсиниз? Бу јығынҹагларда алдығымыз руһән фајдалы нәсиһәтләр ајдын шәкилдә сүбут едир ки, сәмави Атамыз Өз халгынын гајғысына галыр (Ишаја 40:11). Белә ҝөрүшләр һәмчинин севинҹ бәхш едир вә бу ҝөрүшләрдә иштирак етмәјимизлә Јегованын хатырлатмаларыны гијмәтләндирдијимизи ҝөстәририк (Неһемја 8:5—8, 12).
Јегованын хатырлатмалары илә дүнјадан ајры галмаг
15, 16. Јегованын хатырлатмаларына риајәт етмәјимиз давранышымызда неҹә әкс олунур?
15 Јегованын хатырлатмаларына риајәт етмәклә, бу натәмиз дүнјадан кәнарда дурмагда өзүмүзә көмәк едирик. Мисал үчүн, Аллаһын хатырлатмаларына диггәт јетирәриксә, ҹинси әхлагсызлыгдан горунарыг (Тәснијә 5:18; Сүлејманын мәсәлләри 6:29—35; Ибраниләрә 13:4). Аллаһын хатырлатмаларына ујғун һәрәкәт едәрәк, јалан данышмаг, сәһв давранмаг, оғурлуг етмәк кими јолдан чыхаран һәрәкәтләри мүвәффәгијјәтлә дәф етмәк олар (Чыхыш 20:15, 16; Левилиләр 19:11; Сүлејманын мәсәлләри 30:7—9; Ефеслиләрә 4:25, 28; Ибраниләрә 13:18). Јегованын хатырлатмаларына диггәт јетирмәк бизи һәмчинин гисас алмагдан, кин сахламагдан вә шәр атмагдан да горујуб сахлајар (Левилиләр 19:16, 18; Мәзмур 15:1, 3).
16 Јегованын хатырлатмаларына гулаг асараг, Она хидмәт етмәк үчүн тәгдис едилмиш, јә’ни ајрылмыш вәзијјәтдә оларыг. Бу дүнјадан ајры галмаг неҹә дә ваҹибдир! Јердәки һәјатынын ахырынҹы ҝеҹәси Јеговаја дуа едәрәк, Иса давамчылары үчүн үрәкдән хаһиш етди: “Мән онлара Сәнин сөзүнү вердим вә дүнја онлара нифрәт ејләди; чүнки Мән дүнјадан олмадығым кими, онлар да дүнјадан дејилләр. Мән хаһиш етмирәм ки, Сән онлары дүнјадан ҝөтүрәсән. Хаһиш едирәм ки, онлары шәрдән горујасан. Мән дүнјадан олмадығым кими, онлар да дүнјадан дејилләр. Онлары һәгигәтинлә мүгәддәс ејлә; Сәнин сөзүн һәгигәтдир” (Јәһја 17:14—17). Ҝәлин, Она мүгәддәс химдәт үчүн бизи бу дүнјадан ајыран Аллаһын Кәламыны бундан сонра да гијмәтләндирәк.
17. Аллаһын хатырлатмаларына е’тинасызлыг ҝөстәрәриксә нә баш верәр вә буна ҝөрә нә етмәлијик?
17 Јегованын хидмәтчиләри олан бизләр, Она хидмәт етмәк үчүн мәгбул тәрздә галмаг истәјирик. Лакин, Аллаһын хатырлатмаларына е’тинасыз јанашарыгса, о заман, бу дүнјаја хас олан данышыгларда вә давранышларда, әдәбијјатларда вә әјләнҹәләрдә әкс олунан дүнјанын руһу бизә һаким олаҹагдыр. Тәбии ки, биз пулпәрәст, ловға, тәкәббүрлү, нанкор, нәфсини сахламајан, азғын, рәһмсиз, еһтијатсыз, мәғрур, зөвгү Аллаһдан чох севән олмаг истәмирик - бунлар, Аллаһдан узаглашмыш инсанларын әкс етдирдији бә’зи хүсусијјәтләрдир (2 Тимотејә 3:1—5). Бу пис әшјалар системинин сону јахынлашдығы үчүн, ҝәлин Јегованын хатырлатмаларына ујғун тәрздә давранмаға давам едәк вә беләликлә дә Онун “сөзүнә ҝөрә” өзүмүзү горумаг үчүн дуада Ондан көмәк диләјәк (Мәзмур 119:9).
18. Јегованын хатырлатмаларына риајәт едәриксә, һансы мүсбәт аддымлары атмаға тәшвиг олунаҹағыг?
18 Јегованын хатырлатмалары, јалныз нәји етмәмәли олдуғумузу ҝөстәрмир. Јегованын хатырлатмаларына диггәт јетирәриксә, онлар бизи фәалијјәт ҝөстәрмәјә - бүтүнлүклә Јеговаја ҝүвәнмәјә вә Ону бүтүн үрәјимизлә, ҹанымызла, дүшүнҹәмизлә вә гүввәмизлә севмәјә тәшвиг едәҹәкдир (Тәснијә 6:5; Мәзмур 4:5; Сүлејманын мәсәлләри 3:5, 6; Матта 22:37; Марк 12:30). Аллаһын хатырлатмалары бизи һәмчинин гоншуларымызы да севмәјә тәшвиг едир (Левилиләр 19:18; Матта 22:39). Аллаһа вә гоншуларымыза олан мәһәббәтимиз, Онун ирадәсини јеринә јетирәрәк, һәјат верән “Аллаһ билијини” гоншуларымызла бөлүшмәјимиздә хүсусилә әкс олунур (Сүлејманын мәсәлләри 2:1—5).
Јегованын хатырлатмаларына риајәт етмәк һәјат демәкдир!
19. Јегованын хатырлатмаларына диггәт јетирмәјин практики вә фајдалы олдуғуну башгаларына неҹә ҝөстәрә биләрик?
19 Јегованын хатырлатмаларына диггәт јетирәр вә буну етмәкдә башгаларына да көмәк ҝөстәрәриксә һәм өзүмүзү, һәм дә бизә гулаг асанлары хилас едәрик (1 Тимотејә 4:16). Јегованын хатырлатмаларына диггәт јетирмәјин практики вә фајдалы олдуғуну башгаларына неҹә ҝөстәрә биләрик? Мүгәддәс Китабын принсипләрини өз һәјатымызда тәтбиг етмәклә. Бу, “әбәди һәјата мејлли олан” инсанлары әмин едәҹәкдир ки, ән јахшы јол Аллаһын Кәламында ҝөстәрилмиш јолдур (Һәвариләрин ишләри 13:48, ЈД). Онлар һәмчинин “Аллаһын һәгигәтән арамызда” олдуғуну ҝөрәҹәк вә бу онлары, Күлл-Ихтијар Рәбб Јеговаја ибадәтдә бизә гошулмаға тәшвиг едәҹәкдир (1 Коринфлиләрә 14:24, 25).
20, 21. Јегованын хатырлатмалары вә мүгәддәс руһу сајәсиндә биз нә едә биләрик?
20 Мүгәддәс Јазылары өјрәнмәјә, өјрәндикләримизи практикада тәтбиг етмәјә вә Јегованын руһани бәхшишләриндән там фајда әлдә етмәјә давам едәрәк, Онун хатырлатмаларыны даһа чох севәҹәјик. Әҝәр биз бу хатырлатмалара диггәт јетирәриксә, онлар бизә “Аллаһын бәнзәјишинә ҝөрә һәгиги салеһлик вә мүгәддәсликлә јарадылмыш јени мәнлији ҝејинмәјә” көмәк едәҹәкдир (Ефеслиләрә 4:20—24). Јегованын хатырлатмалары вә Онун мүгәддәс руһу сајәсиндә, биз, Шејтанын һакимијјәти алтында олан дүнјаја хас хүсусијјәтләрдән сәрт шәкилдә фәргләнән мәһәббәт, севинҹ, сүлһ, сәбир, лүтфкарлыг, јахшылыг, сәдагәт, һәлимлик, өзүнә һаким олмаг кими хүсусијјәтләри әкс етдирә биләрик (1 Јәһја 5:19; Галатијалылара 5:22, 23). Буна ҝөрә дә бизә Мүгәддәс Китабын өјрәнилмәси, тә’јин олунмуш ағсаггаллар, һәмчинин јығынҹаг ҝөрүшләри вә конгрессләрин васитәсилә, Јегованын тәләбләри хатырладылдыгда миннәтдар олмалыјыг.
21 Јегованын хатырлатмаларына риајәт етдијимиз үчүн, салеһлик уғрунда әзијјәт чәкдијимиз заман да севинә биләрик (Лука 6:22, 23). Ән тәһлүкәли вәзијјәтләрдә белә, Аллаһын бизи хилас едәҹәјинә әминик. Бу инди, бүтүн инсанларын “Күлл-Ихтијар Аллаһын бөјүк ҝүнүндә баш верәҹәк мүһарибәјә”, Һар-Меҝидона топланаҹағы вахтда хүсусилә ваҹибдир (Вәһј 16:14—16).
22. Јегованын хатырлатмалары илә әлагәдар һансы гәтијјәти әкс етдирмәлијик?
22 Лајиг олмадығымыз әбәди һәјат мүкафатыны алмаг үчүн, Јегованын хатырлатмаларыны мөһкәм севмәли вә онлары виҹданла горујуб сахламалыјыг. Гој биздә дә мәзмурчунун руһу олсун. О охујурду: “Шәһадәтләрин [“хатырлатмаларын”, ЈД] әбәдијјән әдаләтлидир; мәнә анлајыш вер јашајым” (Мәзмур 119:144). Ҝәлин һәмчинин мәзмурчунун сөзләриндә әкс олунан гәтијјәти дә ҝөстәрәк: “Сәни [Јегованы] чағырдым; мәни гуртар вә сәнин шәһадәтләрини [“хатырлатмаларыны”, ЈД] тутум” (Мәзмур 119:146). Ҝәлин сөзүмүз вә ишимизлә сүбут едәк ки, Јегованын хатырлатмаларыны һәгигәтән дә мөһкәм севирик.
Сиз неҹә ҹаваб верәрдиниз?
• Мәзмурчу, Јегованын хатырлатмаларына неҹә јанашырды?
• Биз Јегованын хатырлатмаларына нәјә ҝөрә еһтијаҹ дујуруг?
• Аллаһын хатырлатмалары илә әлагәдар бизим ҝөрүшләримиз һансы ролу ојнајыр?
• Јегованын хатырлатмалары һансы тәрздә бизи бу дүнјадан ајырыр?
[25-ҹи сәһифәдәки шәкил]
Мәзмурчу, Јегованын хатырлатмаларыны чох севирди.
[26 вә 27-ҹи сәһифәләрдәки шәкилләр]
Аннанын нүмунәси әсасында ҝөрүшләри бурахмамағы гаршыныза мәгсәд гојмусунузму?
[28-ҹи сәһифәдәки шәкил]
Јегованын хатырлатмаларына гулаг асараг дүнјадан кәнар дурур, Аллаһа хидмәт үчүн тәмиз вә габилијјәтли олуруг.