Даима Јеһоваја үз тутун
«Рәббә әбәдилик үз тутмушам». МӘЗ. 16:8
1. Мүгәддәс Китаб һадисәләри бизә неҹә тәсир едә биләр?
ЈЕҺОВАНЫН Кәламында Онун бәшәријјәтә мүнасибәтинә даир диггәтәлајиг һадисәләр вар. Орада, Аллаһын нијјәтиндә рол ојнајан бир чох инсанлардан бәһс едилир. Сөзсүз ки, онларын сөзләри вә әмәлләри биздә мараг доғурмаг үчүн Мүгәддәс Китабда јазылан садә һекајәләр дејил. Белә һадисәләр әслиндә бизи Аллаһа даһа да јахынлашдыра биләр (Јаг. 4:8).
2, 3. Мәзмур 16:8 ајәсиндәки сөзләри неҹә баша дүшмәлијик?
2 Һамымыз Мүгәддәс Китабдакы мәшһур шәхсләрдән — Ибраһим, Сара, Муса, Рут, Давуд, Естер, һәвари Павел вә башгаларындан чох шеј өјрәнә биләрик. Анҹаг аз танынан адамларын һадисәсиндән дә фајдаланмаг мүмкүндүр. Мүгәддәс Китабдакы һадисәләр үзәриндә дүшүнмәк, мәзмурчунун «Рәббә әбәдилик үз тутмушам, сағымда олдуғу үчүн сарсылмарам» сөзләринә мүвафиг давранмағымыза көмәк едә биләр (Мәз. 16:8). Бу сөзләрин мәнасы нәдир?
3 Әсҝәр гылынҹыны адәтән сағ әлиндә тутурду вә сол әлиндәки галханы илә сағ тәрәфини горуја билмирди. Лакин сағ тәрәфиндә досту олардыса, ону горујурду. Јеһованы даима јадымызда сахласаг вә Онун ирадәсини јеринә јетирсәк, О бизи горујаҹаг. Буна ҝөрә дә ҝәлин ҝөрәк, Мүгәддәс Китаб һадисәләрини нәзәрдән кечирмәјимиз Јеһоваја ‘әбәдилик үз тутмағымыз’ үчүн иманымызы неҹә мөһкәмләндирә биләр.
Јеһова дуаларымыза ҹаваб верир
4. Мүгәддәс Јазылардан Јеһованын дуалара ҹаваб вердијини ҝөстәрән нүмунә чәкин.
4 Даима Јеһоваја үз тутарыгса, О, дуаларымыза ҹаваб верәҹәк (Мәз. 65:2; 66:19). Бунун доғрулуғуну, Ибраһимин евиндә бүтүн ишләри идарә едән гулбашынын, еһтимал ки, Елиезерин һадисәси сүбут едир. Ибраһим ону Месопотамијаја, оғлу Исһага Аллаһдан горхан арвад алмаға ҝөндәрди. Елиезер Аллаһын рәһбәрлији үчүн дуа етди вә Ривга онун дәвәләринә су верәндә, о бу һадисәнин дуасына ҹаваб олдуғуну анлады. Елиезер сәмими-гәлбдән дуа етдијинә ҝөрә Исһагын үрәјинә јатан бир гыз тапды (Јар. 24:12-14, 67). Дүздүр, Ибраһимин нөкәринә верилән тапшырыг хүсуси иди. Мәҝәр биз дә онун кими, Јеһованын дуаларымызы ешитдијинә әмин олмалы дејиликми?
5. Нәјә ҝөрә дејә биләрик ки, Јеһоваја үрәкдә гыса дуа етмәјин дә көмәји ола биләр?
5 Бәзи һалларда Аллаһдан көмәк алмаг үчүн гысаҹа дуа етмәли ола биләрик. Бир дәфә фарс падшаһы Артахшаста өз сагиси Неһемјанын кәдәрли олдуғуна фикир верди. Падшаһ сорушду: «Сән мәндән нә диләјирсән?» Неһемја дәрһал ‘ҝөјләрин Аллаһына дуа етди’. Бу вәзијјәтдә Неһемјанын үрәјиндә етдији дуа узун ола билмәзди. Амма Аллаһ Өз хидмәтчисинин дуасына ҹаваб верди, чүнки Јерусәлимин диварларыны бәрпа етмәк үчүн падшаһ Неһемјаја көмәк етди. (Неһемја 2:1-8 ајәләрини оху.) Бәли, һәтта үрәкдә сөјләнилән гыса дуанын да көмәји ола биләр.
6, 7. а) Дуа етмәклә бағлы Епафра бизә һансы нүмунәни гојуб? б) Нәјә ҝөрә башгалары үчүн дуа етмәлијик?
6 Һәмиманлыларымыз үчүн етдијимиз дуаларын ҹавабыны һәмишә дәрһал ҝөрмәсәк дә, ‘бир-биримиз үчүн дуа етмәјә’ тәшвиг олунуруг (Јаг. 5:16). ‘Мәсиһин садиг хидмәтчиси’ Епафра һәмиманлылары үчүн тәкидлә дуа едирди. Павел Ромадан јаздығы мәктубунда дејирди: «Иса Мәсиһин гулу вә сиздән [колослулардан] олан Епафра сизә салам ҝөндәрир. О, һәр заман дуаларында сизин үчүн мүбаризә апарыр ки, Аллаһын истәдији һәр шејдә камил олуб, етимадла долараг, мөһкәм дурасыныз. Онун һаггында шәһадәт едирәм ки, сизин үчүн Лаодикијада вә Ијераполисдә оланлар үчүн бөјүк сәј ҝөстәрир» (Колос. 1:7; 4:12, 13).
7 Колос, Лаодикија вә Ијераполис Кичик Асијанын ејни әразисиндә јерләшән шәһәрләр иди. Ијераполисдәки мәсиһчиләр Кибела илаһәсинә ситајиш едәнләр арасында јашајырдылар, Лаодикијада јашајан мәсиһчиләри вар-дөвләтә алудә олан инсанлар әһатә едирди, Колос мәсиһчиләри исә инсан фәлсәфәсинин тәсири алтына дүшмәк тәһлүкәсиндә идиләр (Колос. 2:8). Колосдан олан Епафранын һәмиманлылары үчүн ‘дуаларында мүбаризә апармасы’ тәәҹҹүблү дејилди. Мүгәддәс Китабда Епафранын дуаларына неҹә ҹаваб верилдији дејилмир, амма о, һәмиманлылары үчүн дурмадан дуа едирди. Биз дә белә давранмалыјыг. Дүздүр, биз ‘башгаларынын ишинә мүдахилә етмирик’, анҹаг ҝүман ки, гоһумларымызын вә ја достларымызын шиддәтли иман сынағына мәруз галдығыны билирик (1 Пет. 4:15). Онлар үчүн дуа етмәјимиз неҹә дә јахшы оларды! Башгаларынын дуалары Павелә көмәк етдији кими, бизим дуаларымыз да јахшы нәтиҹәләр верә биләр (2 Кор. 1:10, 11).
8. а) Һарадан билирик ки, ефесли ағсаггаллар дуа етмәјин ваҹиблијини анлајырдылар? б) Аллаһа дуа етмәјә неҹә јанашмалыјыг?
8 Бәс биз дуа етмәк шәрәфини гијмәтләндирән вә мүнтәзәм дуа едән инсан кими танынырыгмы? Павел Ефес ағсаггаллары илә ҝөрүшдүкдән сонра «диз чөкүб, һамысы илә бәрабәр дуа етди». Сонра «һамы чох ағлады вә Павелин бојнуна сарылыб, ону өпүрдүләр. Онлары ән чох кәдәрләндирән, онун үзүнү артыг ҝөрмәјәҹәкләринә даир дедији сөзләр иди» (Һәв. иш. 20:36-38). Һәмин ағсаггалларын адларыны билмәсәк дә, бу һадисә ҝөстәрир ки, онлар дуа етмәјин ваҹиблијини анлајырдылар. Әлбәттә, биз дә Аллаһа дуа етмәк шәрәфини гијмәтләндирмәли вә ‘пак әлләримизи галдыранда’ сәмави Атамызын бизә ҹаваб верәҹәјинә әмин олмалыјыг (1 Тим. 2:8).
Аллаһа там итаәт един
9, 10. а) Селофхадын гызлары һансы нүмунәни гојмушлар? б) Селофхадын гызларынын итаәткарлығы субај мәсиһчинин никаһа даир нөгтеји-нәзәринә неҹә тәсир едә биләр?
9 Јеһованы даима јадда сахламаг Она итаәткар олмағымыза көмәк едәҹәк вә нәтиҹәдә бол-бол хејир-дуалар бичәҹәјик (Ганун. т. 28:13; 1 Шам. 15:22). Бу исә итаәткарлыг тәләб едир. Ҝәлин беш баҹынын — Мусанын ҝүнләриндә јашајан Селофхадын гызларынын һадисәсинә нәзәр салаг. Исраилдә әнәнәви олараг мирас атадан оғула кечирди. Селофхад исә оғуллары олмадан өлдү вә Јеһова гәрар верди ки, онун бүтүн мүлкү гызларына верилсин. Амма бир шәрт варды: мүлк һәмин тајфада галсын дејә, онлар Менашше нәслиндән олан оғланлара әрә ҝетмәли идиләр (Сај. 27:1-8; 36:6-8).
10 Селофхадын гызлары әмин идиләр ки, Аллаһа итаәт етсәләр, мәсәлә һәлл олунаҹаг. Мүгәддәс Китабда дејилир: «Рәббин Мусаја әмр етдијинә әмәл едәрәк Селофхадын гызлары Махла, Тирса, Хогла, Милка вә Ноа әмиси оғланларына әрә ҝетдиләр. Онлар Јусиф оғлу Менашше нәсилләринә мәнсуб кишиләрә әрә ҝетдиләр. Она ҝөрә дә ирси аталарынын мәнсуб олдуғу гәбилә вә нәсил ичиндә галды» (Сај. 36:10-12). Бу итаәткар баҹылар Јеһованын әмринә табе олдулар (Јешуа 17:3, 4). Ејни әминлији тәзаһүр етдирәрәк, руһән јеткин субај мәсиһчиләр дә Аллаһа итаәткар олдугларыны ‘Рәббә бағлы олан’ инсанла аилә гурмагла ҝөстәрирләр (1 Кор. 7:39).
11, 12. Аллаһа етибар етдијини Калев неҹә ҝөстәрди?
11 Исраилли Калев кими, биз дә Јеһоваја там итаәт етмәлијик (Ганун. т. 1:36). Б. е. ә. 16-ҹы әсрдә, исраиллиләр Мисирдән азад едилдикдән сонра, Муса Кәнан торпағына 12 кәшфијјатчы ҝөндәрди. Онлардан јалныз икиси — Калев вә Јешуа халгы Аллаһа там етибар етмәјә вә һәмин дијара дахил олмаға тәшвиг етди (Сај. 14:6-9). Тәхминән 40 ил сонра, Калев вә Јешуа сағ идиләр вә Јеһованын дедикләринә там әмәл едирдиләр, Аллаһ да Јешуанын васитәсилә исраиллиләри Вәд едилмиш дијара апарды. Он сәдагәтсиз кәшфијјатчы исә исраиллиләрин 40 ил сәһрада долашдыглары вахт әрзиндә өлдүләр (Сај. 14:31-34).
12 Сәһрада сағ галанлардан ән бөјүјү олан Калев Јешуанын өнүндә дуруб деди: «Мән сәмими гәлблә Аллаһым Рәббин ардынҹа ҝетдим». (Јешуа 14:6-9 ајәләрини оху.) Сәксән беш јашлы Калев, Аллаһын она вәд етдији дағлыг јерин верилмәсини хаһиш етди. Һәмин јер, дүшмәнләрин сакин олдуғу бөјүк вә гала диварлы шәһәрләр иди (Јешуа 14:10-15).
13. Сынагларымыза бахмајараг, нә етсәк хејир-дуа аларыг?
13 Садиг вә итаәткар Калев кими, биз дә ‘сәмими гәлблә [Јеһованын] ардынҹа ҝетсәк’, О бизә хејир-дуа верәҹәк. Гаршылашдығымыз манеәләр бөјүк олса да, ‘сәмими гәлблә [Јеһованын] ардынҹа ҝетмәк’ бизә көмәк олаҹаг. Амма һәјатымыз боју буну етмәк, Калевә олдуғу кими, бизә дә чәтин ола биләр. Сүлејман падшаһ һакимијјәтинин илк илләриндә Јеһоваја итаәткар олса да, гоҹа јашында арвадлары онун үрәјини јаланчы аллаһлара ибадәтә јөнәлтдиләр вә о, «атасы Давуддан фәргли олараг, Рәббә тамамилә хидмәт етмәди» (1 Пад. 11:4-6). Гаршылашдығымыз сынаглардан асылы олмајараг, һәмишә Аллаһа там итаәт етмәли вә даима Она үз тутмалыјыг.
Һәмишә Јеһоваја ҝүвәнин
14, 15. Јеһоваја ҝүвәнмәјә даир Наоминин нүмунәсиндән нә өјрәнирик?
14 Биз, хүсусилә ҝәләҹәјимиз үмидсиз кими ҝөрүндүјүндән мәјус олдугда Аллаһа ҝүвәнмәлијик. Әрини вә ики оғлуну итирмиш ағбирчәк Наоминин нүмунәсинә бахаг. О, Моавдан Јәһудаја гајыданда кәдәрлә дејирди: «Мәнә Наоми [«хош»] демәјин, мәнә Мара [«аҹы»] дејин, чүнки Күлли-Ихтијар һәјатымы аҹы етди. Мән бурадан долу чыхдым, Рәбб мәни бош гајтарды. Бир һалда ки Рәбб мәни иттиһам етди, Күлли-Ихтијар башыма мүсибәт ҝәтирди, даһа нијә мәни Наоми чағырырсыныз?» (Рут 1:20, 21).
15 Наоминин гәм-гүссә ичиндә олмасына бахмајараг, «Рут» китабыны диггәтлә охујанда онун Јеһоваја ҝүвәндијини ҝөрүрүк. Онун вәзијјәти көкүндән дәјишди. Наоминин дул ҝәлини Рут Боазын арвады олду вә бир оғлан ушағы дүнјаја ҝәтирди. Наоми ушаға дајәлик етди. Мүгәддәс Китабда дејилир: «Гоншу гадынлар она ад гојуб дедиләр: “Наоми үчүн оғул доғулуб”. Онун адыны Овед гојдулар. О, Давудун атасы олан Јессејин атасыдыр» (Рут 4:14-17). Һәм Наоми, һәм дә Рут дириләҹәкләр вә онда Наоми биләҹәк ки, Рут Мәсиһ олан Исанын улу нәнәси олуб (Мат. 1:5, 6, 16). Наоминин һадисәсиндә олдуғу кими, хошаҝәлмәз вәзијјәтимизин неҹә дәјишәҹәји бизә дә мәлум олмаја биләр. Буна ҝөрә дә, Сүлејманын мәсәлләри 3:5, 6 ајәләриндә јазылдығы кими, ҝәлин һәмишә Јеһоваја ҝүвәнәк. Бу ајәләр бизи тәшвиг едир: «Бүтүн гәлбинлә Рәббә ҝүвән, өз идракына етибар етмә. Бүтүн јолларында Ону таны, О сәнин јолларыны дүзәлдәр».
Мүгәддәс руһа архаланын
16. Гәдим Исраилдә Аллаһын мүгәддәс руһу бәзи ағсаггаллара неҹә көмәк едирди?
16 Даима Јеһоваја үз тутсаг, О, мүгәддәс руһу васитәсилә бизә јол ҝөстәрәҹәк (Галат. 5:16-18). Исраил ‘халгынын јүкүнү’ дашымагда Мусаја көмәк етмәк үчүн сечилән 70 ағсаггалын үзәриндә Аллаһын руһу варды. Јалныз Елдад вә Медадын ады чәкилсә дә, мүгәддәс руһ онларын һамысыны алдыглары тапшырығы јеринә јетирмәјә габил етмишди (Сај. 11:13-29). Шүбһә јохдур ки, әввәлләр сечилән ағсаггаллар кими, онлар да баҹарыглы, Аллаһдан горхан, етибарлы вә дүрүст идиләр (Чых. 18:21). Белә хүсусијјәтләри мүасир мәсиһчи ағсаггаллар да тәзаһүр етдирирләр.
17. Ибадәт чадырынын тикинтисиндә Јеһованын мүгәддәс руһунун һансы ролу олмушдур?
17 Јеһованын мүгәддәс руһу сәһрада ибадәт чадырынын тикинтисиндә ваҹиб рол ојнамышды. Јеһова Бесалелә ‘Өз руһу илә һикмәт, дәрракә, билик вә һәр ҹүр мәһарәт’ верәҹәјини вәд едәрәк, ону ибадәт чадырынын гурулмасында баш уста тәјин етмишди (Чых. 31:3-5). ‘Үрәкләринә һикмәт гојулан’ адамлар Бесалел вә көмәкчиси Оһолиавла бәрабәр бу ҝөзәл тапшырығы јеринә јетирирдиләр. Үстәлик, көнлү истәјән адамлары Јеһованын руһу бол ианәләр ҝәтирмәјә тәшвиг едирди (Чых. 31:6; 35:5, 30-34). Һәмин руһ Аллаһын мүасир хидмәтчиләрини дә Падшаһлығын марагларыны дәстәкләмәк үчүн әлләриндән ҝәләни етмәјә тәшвиг едир (Мат. 6:33). Бизим мүәјјән баҹарығымыз ола биләр, амма Јеһованын Өз халгына вердији тапшырығы иҹра етмәјимиз үчүн Аллаһдан мүгәддәс руһ истәмәли вә онун бизи истигамәтләндирмәсинә јол вермәлијик (Лука 11:13).
Һәмишә Јеһоваја еһтирам един
18, 19. а) Аллаһын мүгәддәс руһу биздә һансы әһвал-руһијјәни һасил едир? б) Биз Шимеон вә Аннанын нүмунәсиндән нә өјрәндик?
18 Даима Јеһоваја үз тутмаг үчүн мүгәддәс руһ биздә еһтирам һасил едир. Аллаһын гәдим халгына дејилмишди: «Еј Исраил нәсли, Она еһтирам един!» (Мәз. 22:23). Биринҹи әсрдә Јерусәлимдә Аллаһа еһтирам едән јашлы адамлардан икиси Шимеон вә Анна иди. (Лука 2:25-38 ајәләрини оху.) Шимеон Мәсиһлә бағлы пејғәмбәрликләрә инанырды вә «Исраилин тәсәлли тапаҹағыны ҝөзләјирди». Аллаһ мүгәддәс руһундан Шимеона вермиш вә ону Мәсиһи ҝөрәнә кими јашајаҹағына әмин етмишди. Бу белә дә олду. Ҝүнләрин бир ҝүнү, ерамыздан әввәл 2-ҹи илдә анасы Мәрјәм вә өҝеј атасы Јусиф көрпә Исаны мәбәдә ҝәтирдиләр. Шимеон мүгәддәс руһла долараг Мәсиһ һаггында пејғәмбәрлик сөјләди вә Иса ишҝәнҹә дирәјинә мисмарлананда Мәрјәмин гәм-гүссә чәкәҹәјини деди. ‘Рәббин Мәсиһини’ әлинә аланда Шимеонун дујдуғу бөјүк севинҹи тәсәввүрүнә ҝәтир! Шимеон Аллаһа еһтирам ҝөстәрмәкдә биз мәсиһчиләрә дә ҝөзәл нүмунә гојуб!
19 Аллаһа еһтирам бәсләјән 84 јашлы дул Анна ‘мәбәд әразисиндән һеч ајрылмырды’. О, ‘оруҹ тутуб дуа едәрәк’, ҝеҹә-ҝүндүз Јеһоваја мүгәддәс хидмәти иҹра едирди. Көрпә Иса мәбәдә ҝәтириләндә Анна да орада иди. О, ҝәләҹәк Мәсиһи ҝөрдүјүнә ҝөрә неҹә дә миннәтдар иди! Анна «Рәбби мәдһ едиб Јерусәлимдә гуртулуш ҝөзләјәнләрин һамысына бу Көрпә һаггында данышды». О бу хош хәбәри башгалары илә бөлүшдү. Шимеон вә Анна кими, буҝүнкү јашлы мәсиһчиләр дә чох шаддырлар ки, Јеһоваја Онун Шаһиди кими хидмәт етмәк һеч вахт ҝеҹ дејил.
20. Јашымыздан асылы олмајараг, нә етмәлијик вә нә үчүн?
20 Биз, јашымыздан асылы олмајараг, даима Јеһоваја үз тутмалыјыг. Белә едәриксә, Онун Падшаһлығы вә харигәләри һаггында башгаларына данышмаг үчүн ҝөстәрдијимиз сәјимизә Аллаһ хејир-дуа верәҹәк (Мәз. 71:17, 18; 145:10-13). Јеһоваја иззәт ҝәтирмәк истәјириксә, Она хош ҝәлән хүсусијјәтләр тәзаһүр етдирмәлијик. Бәс бу хүсусијјәтләр һаггында Мүгәддәс Китабын башга нүмунәләрини арашдырмагла нә өјрәнә биләрик?
Неҹә ҹаваб верәрдиниз?
• Јеһованын дуалары ешитдијини һарадан билирик?
• Аллаһа нә үчүн там итаәт етмәлијик?
• Мәјус олсаг да, нә үчүн һәмишә Јеһоваја ҝүвәнмәлијик?
• Аллаһын мүгәддәс руһу Онун халгына неҹә көмәк едир?
[4-ҹү сәһифәдәки шәкил]
Јеһова Неһемјанын дуасына ҹаваб верди
[5-ҹи сәһифәдәки шәкил]
Наоминин хејир-дуа алдығыны билмәк Јеһоваја ҝүвәнмәјимизә көмәк едәҹәк