Аранызда зәһмәт чәкәнләрә һөрмәт ҝөстәрин
«Гардашлар, сиздән риҹа едирик ки, Ағамызын ишиндә зәһмәт чәкән, сизә рәһбәрлик едән вә нәсиһәт верәнләрә һөрмәт ҝөстәрәсиниз» (1 САЛОН. 5:12).
1, 2. а) Павел «Салоникилиләрә биринҹи мәктуб»уну јазанда орадакы јығынҹагда вәзијјәт нә јердә иди? б) Павел салоникилиләри нәјә тәшвиг етди?
ТӘСӘВВҮР ЕТ КИ, сән ерамызын биринҹи әсриндә јашајырсан вә Авропада илк јаранан јығынҹаглардан бири олан Салоники јығынҹағынын үзвүсән. Һәвари Павел бурадакы гардашлары мөһкәмләндирмәк үчүн хејли вахт сәрф етмишди. Ола билсин, о, башга јығынҹаглардакы кими, бурада да јығынҹаға рәһбәрлик етмәк үчүн ағсаггаллар тәјин етмишди (Һәв. иш. 14:23). Лакин јығынҹаг јаранандан сонра јәһудиләр Павеллә Силаны шәһәрдән говмаг мәгсәдилә издиһам тәшкил етдиләр. Шәһәрдә галан мәсиһчиләр, јәгин ки, өзләрини атылмыш һисс едирдиләр, һәтта бәлкә дә, горху ичиндә идиләр.
2 Павелин тәмәли јениҹә гојулмуш јығынҹаға ҝөрә нә үчүн нараһат олдуғуну баша дүшмәк чәтин дејил. О, ҝери гајытмаг истәсә дә, Шејтан һәр дәфә онун јолуну кәсирди. Буна ҝөрә дә о, јығынҹағы руһландырмаг үчүн Тимотеји ҝөндәрди (1 Салон. 2:18; 3:2). Тимотеј јахшы хәбәрләрлә гајыданда Павел салоникилиләрә мәктуб јазмаг гәрарына ҝәлди вә бу мәктубда һәм дә онлары үзәрләриндә рәһбәрлик едәнләрә һөрмәт ҝөстәрмәјә тәшвиг етди. (1 Салоникилиләрә 5:12, 13 ајәләрини оху.)
3. Салоникидәки мәсиһчиләрин ағсаггаллара бөјүк һөрмәт ҝөстәрмәјә һансы сәбәбләри вар иди?
3 Салоники јығынҹағында рәһбәрлик едән гардашлар Павел, онун әмәкдашлары вә Јерусәлимдә олан ағсаггаллар гәдәр тәҹрүбәли дејилдиләр. Ахы бу јығынҹаг һеч бир ил јох иди ки мөвҹуд иди! Буна бахмајараг, јығынҹаг үзвләринин онлар үчүн «зәһмәт чәкән», «рәһбәрлик едән» вә «нәсиһәт верәнләрә» ҝөрә миннәтдар олмаға, еләҹә дә онлара «бөјүк еһтирам вә мәһәббәт» ҝөстәрмәјә сәбәбләри вар иди. Сонра Павел: «Бир-биринизлә меһрибан олун», — дејәрәк онлара мәсләһәт вермишди. Әҝәр сән Салоникидәки јығынҹағын үзвү олсајдын, ағсаггалларын ағыр зәһмәтини гијмәтләндирмәздин? Аллаһын Мәсиһ васитәсилә вердији «инсанлар тимсалында һәдијјәләр»ә неҹә јанашырсан? (Ефес. 4:8).
«Зәһмәт чәкән»
4, 5. Павелин ҝүнләриндә јығынҹаға тәлим вермәк нәјә ҝөрә зәһмәт тәләб едирди вә нәјә ҝөрә ејни шеји бизим ҝүнләр һагда да демәк олар?
4 Павели вә Силаны Веријаја јолладыгдан сонра Салоникидәки ағсаггаллар һансы мәнада зәһмәт чәкирдиләр? Шүбһәсиз, онлар Павелдән нүмунә ҝөтүрәрәк Мүгәддәс Китабын көмәјилә јығынҹаға тәлим верирдиләр. Ола билсин, сән Салоникидәки мәсиһчиләрин Аллаһын Кәламыны гијмәтләндирдијинә шүбһә едирсән. Ахы Мүгәддәс Китабда дејилир ки, веријалылар «Салоники јәһудиләринә нисбәтән даһа алиҹәнаб идиләр вә... Мүгәддәс Јазылары һәр ҝүн диггәтлә арашдырырдылар» (Һәв. иш. 17:11). Амма бу ајәдә сөһбәт мәсиһчиләрдән јох, үмумиликдә јәһудиләрдән ҝедир. Мәсиһчи оланлар исә «Аллаһын сөзүнү инсан сөзү кими дејил,.. Аллаһын сөзү кими» гәбул етдиләр (1 Салон. 2:13). Ағсаггаллар да бу инсанлары руһани гида илә тәмин етмәк үчүн чох зәһмәт чәкирдиләр.
5 Бу ҝүн садиг вә ағыллы нөкәр Аллаһын сүрүсүнә «вахтлы-вахтында јемәк пајларыны» верир (Мат. 24:45). Бу нөкәрин рәһбәрлији алтында ағсаггаллар баҹы-гардашлары руһани гида илә тәмин етмәк үчүн чох зәһмәт чәкирләр. Јығынҹагдакы баҹы-гардашларын кифајәт гәдәр Мүгәддәс Китаба әсасланан әдәбијјаты вар. Бәзи дилләрдә исә «Ҝөзәтчи Гүлләси нәшрләринин индекси», «Ҝөзәтчи Гүлләсинин китабханасы» (ҸД-РОМ) вә һәр декабр сајында чап олунан «Ҝөзәтчи Гүлләси»нин тематик индекси кими вәсаитләри әлдә етмәк мүмкүндүр. Јығынҹағын руһани тәләбатларынын гајғысына галан ағсаггаллар ҝөрүшләрә һазырлашмаг үчүн чохлу вахт сәрф едирләр ки, тәјин олунмуш материалы еффектив сурәтдә јығынҹаға тәгдим етсинләр. Ағсаггалларын јығынҹагда вә конгресләрдә етдикләри чыхышлара һазырлашмаг үчүн нә гәдәр вахт сәрф етдикләрини һеч билирсән?
6, 7. а) Павел Салоникидәки ағсаггаллара һансы нүмунәни гојмушду? б) Нәјә ҝөрә бу ҝүн ағсаггаллара Павелин нүмунәсини изләмәк чәтин ола биләр?
6 Салоникидәки ағсаггаллар Павелин сүрүнү отармагда гојдуғу ҝөзәл нүмунәни һәмишә јадда сахлајырдылар. О, буну садәҹә борҹ һиссиндән ирәли ҝәләрәк етмирди. Әввәлки мәгаләдә дејилдији кими, Павел онларла «көрпәсини әмиздириб әзизләјән бир ана кими» нәвазишлә давранырды. (1 Салоникилиләрә 2:7, 8 ајәләрини оху.) О, онларын уғрунда өз ҹаныны белә вермәјә һазыр иди! Ағсаггаллар да сүрүнү онун кими отармалы идиләр.
7 Мәсиһчи ағсаггаллар нәвазишлә сүрүнүн гајғысына галмагла Павелин нүмунәсини изләјирләр. Бәзи баҹы-гардашлар тәбиәтҹә истиганлы вә үнсијјәтҹил дејил. Бунунла белә, ағсаггаллар онлары баша дүшмәјә вә ҝөзәл хүсусијјәтләрини ҝөрмәјә чалышырлар. Дүздүр, гејри-камил олдугларындан ағсаггаллар үчүн һәр кәсә мүсбәт нөгтеји-нәзәрлә бахмаг әсил мүбаризә ола биләр. Амма онлар һамы илә мүлајим давранмаг вә Мәсиһ кими јахшы чобан олмаг үчүн әлләриндән ҝәләни едирләр. Мәҝәр буна ҝөрә онлар тәрифә лајиг дејилләр?
8, 9. Ағсаггаллар ҝеҹә-ҝүндүз бизим рифаһымызы неҹә дүшүнүрләр?
8 Биз ағсаггаллара табе олмалыјыг. Нәјә ҝөрә? Павелин јаздығы кими, онлар «ҝеҹә-ҝүндүз» бизим рифаһымызы дүшүнүрләр (Ибр. 13:17). Бу, бизә сүрүнү горумаг үчүн јухуларындан ваз кечмәли олан чобанлары хатырлада биләр. Бу ҝүн руһани чобанлар, јәни ағсаггаллар зәиф сәһһәти олан, јахуд руһани вә ја емосионал ҹәһәтдән әзијјәт чәкән баҹы-гардашлара көмәк етмәк үчүн бәзән өз јухуларыны гурбан вермәли олурлар. Мәсәлән, Хәстәханаларла әлагә комитәләриндә чалышан гардашлар тәҹили вәзијјәт јарананда ҝеҹә јарысы дурмаг лазым ҝәлсә белә, буну етмәјә һазырдырлар. Биз белә вәзијјәтләрлә үзләшәндә онларын ҝөстәрдикләри көмәјә ҝөрә үрәкдән миннәтдарыг!
9 Реҝионал тикинти вә јардым комитәләриндә хидмәт едән гардашлар һәмиманлыларына көмәк етмәк үчүн вар ҝүҹләри илә чалышырлар. Онлар бизим дәстәјимизә лајигдир! 2008-ҹи илдә Мјанмада Нәрҝиз гасырғасындан сонра онларын јерли баҹы-гардашлара неҹә јардым етдикләринә нәзәр салаг. Бөјүк зијан дәјмиш Иравади чајынын делтасында јерләшән Ботингон јығынҹағына чатмаг үчүн көнүллүләр ҹәсәдләрлә долу олан әразидән кечмәли олмушдулар. Јерли гардашлар илк көнүллүләри вә араларында кечмиш рајон нәзарәтчиләрини ҝөрәндә уҹадан гышгырдылар: «Бахын, бу ки бизим рајон нәзарәтчимиздир! Јеһова бизи хилас етди!» Ҝеҹә-ҝүндүз чалышан ағсаггалларын ағыр зәһмәтини гијмәтләндирирсән? Бәзән јығынҹагда мүрәккәб проблемләр јараныр вә онлары һәлл етмәк мәгсәдилә ағсаггаллардан ибарәт хүсуси комитә тәшкил едилир. Бу ағсаггаллар өз наилијјәтләри илә өјүнмүрләр; онларын көмәјиндән јарарлананлар бу гардашлара үрәкдән миннәтдардырлар (Мат. 6:2—4).
10. Ағсаггалларын ҝөрдүјү һансы иш пәрдә архасында галыр?
10 Бир чох ағсаггалларын кағыз ишләри дә аз дејил. Мәсәлән, ағсаггаллар шурасынын координатору һәфтәлик ҝөрүшләрин ҹәдвәлини һазырлајыр. Јығынҹағын катиби тәблиғ хидмәти һагда ајлыг вә иллик һесабаты тәртиб едир. Теократик Хидмәт Мәктәбинин нәзарәтчиси мәктәбдә чыхыш едәҹәк шаҝирдләри тәјин едир. Һәр үч ајдан бир јығынҹағын малијјә һесабатлары јохланылыр. Ағсаггаллар филиалдан ҝәлән мәктублары охујур вә иманда бирлији горумаға көмәк едән рәһбәрлији тәтбиг едирләр (Ефес. 4:3, 13). Бу зәһмәткеш ағсаггалларын сајәсиндә «һәр шеј әдәб-әрканла вә низамла» јеринә јетирилир (1 Кор. 14:40).
«Сизә рәһбәрлик едән»
11, 12. Јығынҹаға кимләр рәһбәрлик едир вә бу, өзүнә нәји дахил едир?
11 Павел Салоникидәки зәһмәткеш ағсаггаллар барәдә һәмчинин јазмышды ки, онлар јығынҹаға «рәһбәрлик [едирләр]» (1 Салон. 5:12). Орижинал мәтндә бу ајәдә истифадә олунан сөз «гаршыда дурмаг» мәнасыны верир вә ону «истигамәтләндирмәк, башчылыг етмәк» кими дә тәрҹүмә етмәк олар. Павел бу ифадә алтында јығынҹағын бүтүн ағсаггалларыны нәзәрдә тутурду. Бу ҝүн ағсаггалларын әксәријјәти һәрфи мәнада јығынҹаг гаршысында дуруб ҝөрүшләри кечирирләр. Сәдрлик едән гардашларын инди ағсаггаллар шурасынын координатору адланмасы бизә онлара бир бәдәнин үзвү кими бахмаға көмәк едир.
12 Јығынҹаға «рәһбәрлик етмәк» јалныз она тәлим вермәкдән ибарәт дејил. 1 Тимотејә 3:4 ајәсиндә истифадә олунан «идарә етмәк» ифадәси ејни мәнаны дашыјыр. Павел јазыр ки, нәзарәтчи «аиләсини јахшы идарә етмәли, ушаглары итаәткар вә тәрбијәли олмалыдыр». «Идарә етмәк» ифадәси өзүнә јалныз ушаглара тәлим-тәрбијә вермәји јох, һәмчинин аиләјә башчылыг етмәји вә ушаглары өз итаәтиндә сахламағы да дахил едир. Бәли, ағсаггаллар јығынҹаға башчылыг едир вә һамыја Јеһованын итаәтиндә галмаға көмәк едирләр (1 Тим. 3:5).
13. Нәјә ҝөрә ағсаггалларын јекдил гәрара ҝәлмәләри үчүн вахт тәләб олуна биләр?
13 Јығынҹаға јахшы рәһбәрлик етмәк үчүн ағсаггаллар јығынҹағын тәләбатларыны мүәјјәнләшдирир вә она көмәк етмәјин үсулларыны бирликдә мүзакирә едирләр. Кимсә дүшүнә биләр ки, бүтүн гәрарлары бир ағсаггал версә, даһа јахшы олар. Лакин биринҹи әсрдәки рәһбәрлик шурасындан нүмунә ҝөтүрәрәк мүасир ағсаггаллар шурасы бүтүн мәсәләләри өз араларында ачыг шәкилдә мүзакирә едир вә рәһбәрлији Мүгәддәс Китабда ахтарырлар. Онларын мәгсәди Аллаһын Кәламындакы принсипләри өз јығынҹагларынын тәләбатларына тәтбиг етмәкдир. Буну даһа јахшы етмәләри үчүн ағсаггаллар бу ҝөрүшә һазырлашмалы, јәни Мүгәддәс Јазылары, еләҹә дә садиг вә ағыллы нөкәрин тәгдим етдији рәһбәрлији арашдырмалыдырлар. Әлбәттә, бунун үчүн чох вахт тәләб олунур. Биринҹи әсрдә рәһбәрлик шурасы сүннәт мәсәләсини мүзакирә едәндә араларында фикир ајрылығы јаранмышды. Бу ҝүн дә ағсаггаллар арасында фикир ајрылығы јаранарса, Мүгәддәс Китаба әсасланан јекдил гәрара ҝәлмәләри үчүн онлара әлавә вахт ајырмаг вә тәдгигат апармаг лазым ҝәлә биләр (Һәв. иш. 15:2, 6, 7, 12—14, 28).
14. Ағсаггалларын бир бәдән кими, бирлик ичиндә әмәкдашлыг етдијини гијмәтләндирирсәнми? Нәјә ҝөрә?
14 Бәс әҝәр бир ағсаггал дедијинин үстүндә дурурса, өз фикирләрини јеритмәјә чалышырса, јахуд да биринҹи әсрдәки Диотреф кими, нифаг салырса, нә баш верә биләр? (3 Јәһ. 9, 10). Әлбәттә, бүтүн јығынҹаг бундан әзијјәт чәкәҹәк. Шејтан биринҹи әсрдә јығынҹагларда сүлһү позмаға чалышырды вә әмин ола биләрик ки, о, бу ҝүн дә буну етмәк истәјир. Шејтан инсаны ҝүнаһлы арзуларынын далынҹа дүшмәјә тәһрик едә биләр, мәсәлән, бу, јүксәк мөвге тутмаг истәји ола биләр. Буна ҝөрә дә ағсаггаллар тәвазөкар олмалы вә бәдән кими, бирҝә фәалијјәт ҝөстәрмәлидирләр. Бир-бирләри илә бәдән кими әмәкдашлыг едән ағсаггалларын тәвазөкарлығыны биз јүксәк гијмәтләндиририк, елә дејилми?
«Сизә... нәсиһәт верәнләрә»
15. Ағсаггаллар һансыса баҹыја вә ја гардаша нәсиһәт верәндә буну һансы нијјәтдән ирәли ҝәләрәк едирләр?
15 Сонра Павел ағсаггалларын үзәринә дүшән чәтин, ејни заманда, ваҹиб вәзифәни вурғулајыр; о, сүрүјә нәсиһәт вермәк мәсулијјәтиндән данышыр. Јунанҹа Мүгәддәс Јазыларда «нәсиһәт вермәк» кими тәрҹүмә олунан јунан сөзүнү јалныз һәвари Павел истифадә едир. Бу ифадә алтында ҹидди, лакин һеч бир әдавәт чалары олмајан мәсләһәт нәзәрдә тутулур (Һәв. иш. 20:31; 2 Салон. 3:15). Мәсәлән, Павел коринфлиләрә јазмышды: «Елә билмәјин ки, бунлары, сизи хәҹаләтли етмәк үчүн јазырам, хејр, мән сизи өз севимли балаларым билиб сизә өјүд-нәсиһәт верирәм» (1 Кор. 4:14). Павел башгаларына ҝөрә сәмими-гәлбдән нараһат олдуғу үчүн нәсиһәт верирди.
16. Ағсаггаллар башгаларына нәсиһәт верәркән нәји јадда сахламалыдырлар?
16 Ағсаггаллар баша дүшүрләр ки, башгаларына нәсиһәт верәркән буну һансы тәрздә етдикләринә диггәт јетирмәлидирләр. Бу чох ваҹибдир. Онлар Павелдән нүмунә ҝөтүрәрәк мүлајим, мәһәббәтли вә гајғыкеш олмаға чалышырлар. (1 Салоникилиләрә 2:11, 12 ајәләрини оху.) Әлбәттә, ағсаггал «тәлим верәркән Аллаһын етимада лајиг сөзүнә бағлы галмалыдыр ки, сағлам тәлимин сајәсиндә... гардашлары үрәкләндирсин» (Тит. 1:5—9).
17, 18. Ағсаггал сәнә нәсиһәт верәндә нәји јадда сахламалысан?
17 Ағсаггаллар гејри-камил олдуглары үчүн һәрдән дедикләри сөзә ҝөрә сонрадан пешман олурлар (1 Пад. 8:46; Јаг. 3:8). Һәмчинин онлар билирләр ки, баҹы-гардашлар мәсләһәт аланда бу, онлара, адәтән, «севинҹ јох, гәм ҝәтирир» (Ибр. 12:11). Буна ҝөрә дә ағсаггал кимәсә нәсиһәт вермәздән өнҹә бу һагда чохлу дүшүнүр вә Јеһоваја дуа едир. Әҝәр ағсаггал сәнә мәсләһәт верибсә, онун сәнә ҝөрә сәмими-гәлбдән нараһат олдуғуну гијмәтләндирирсәнми?
18 Тәсәввүр ет ки, хәстәләнмисән, амма бунун сәбәбини билмирсән. Сонра һәким сәнә дәгиг диагноз гојур, анҹаг буну гәбул етмәк сәнин үчүн чәтиндир. Мәҝәр буна ҝөрә һәкимә гәзәбләнәҹәксән? Әлбәттә ки, јох. Һәтта о, сәнә әмәлијјат олунмағы тәклиф етсә белә, бунун сәнә көмәк едәҹәјинә үмид едәрәк разылашаҹагсан. Һәкимин хәстәлијин барәдә мәлуматы сәнә неҹә чатдырдығы һиссләринә тохуна биләр. Бәс сән јол верәҹәксәнми ки, бу, верәҹәјин гәрара тәсир етсин? Чох ҝүман ки, јох. Бу ҝүн Јеһова вә Иса сәнә һәгигәтдә инкишаф етмәјә вә руһанилијини мөһкәмләндирмәјә көмәк етмәк үчүн инсанлардан истифадә едә биләрләр. Буна ҝөрә дә јол вермә ки, мәсләһәтин верилмә тәрзи ону гәбул етмәјинә мане олсун.
Ағсаггаллары гијмәтләндир
19, 20. Сән «инсанлар тимсалында һәдијјәләр» олан ағсаггаллары гијмәтләндирдијини неҹә ҝөстәрә биләрсән?
19 Әҝәр хүсусилә сәнин үчүн һазырланмыш һәдијјә алсајдын, нә едәрдин? Јәгин, ондан истифадә едәрәк ону гијмәтләндирдијини ҝөстәрәрдин. Ағсаггалларын чыхышларына диггәтлә гулаг асмагла вә онларын вурғуладыглары фикирләри тәтбиг етмәјә чалышмагла бу һәдијјәләрә ҝөрә миннәтдар олдуғуну ҝөстәрә биләрсән. Һәмчинин буну јығынҹагда дүшүнүлмүш шәрһләр вермәклә дә етмәк олар. Ағсаггалларын рәһбәрлик етдији һәр ишдә, о ҹүмләдән саһә хидмәтиндә онлары дәстәклә. Әҝәр һансыса ағсаггалын вердији мәсләһәт сәнә көмәк едибсә, нәјә ҝөрә буну она демәјәсән? Үстәлик, ағсаггал јығынҹагда сәјлә чалыша билсин дејә аиләси онунла кечирмәли олдуғу вахты гурбан верир.
20 Һәгигәтән дә, арамызда зәһмәт чәкән, бизә рәһбәрлик едән вә нәсиһәт верән ағсаггаллара миннәтдар олмаг үчүн тутарлы сәбәбләримиз вар. Бу гардашлар, һәгигәтән дә, Јеһованын бизә «инсанлар тимсалында» вердији һәдијјәләрдир!
Јадыныздадырмы?
• Салоникидәки мәсиһчиләрин онлара рәһбәрлик едән гардашлара ҝөрә миннәтдар олмалары үчүн һансы сәбәбләри вар иди?
• Јығынҹағындакы ағсаггаллар сәнин үчүн неҹә зәһмәт чәкирләр?
• Ағсаггалларын јығынҹаға рәһбәрлик етмәси шәхсән сәнә һансы фајданы ҝәтирир?
• Ағсаггал бизә нәсиһәт верәндә нәји јадда сахламалыјыг?
[27 сәһифәдәки шәкил]
Аллаһын сүрүсүнү отаран ағсаггалларын зәһмәтини гијмәтләндирирсәнми?