Чәтин анларда севинҹини гору
«Сәнә пәнаһ ҝәтирәнләрсә гој севинсинләр, гој Сәни даима мәдһ етсинләр» (МӘЗ. 5:11).
1, 2. а) Бу ҝүн чохлу бәдбәхтликләрә сәбәб олан нәдир? б) Бүтүн инсанларын әзијјәт чәкдији фәлакәтләрдән әлавә, һәгиги мәсиһчиләр даһа нәјә таб ҝәтирмәли олурлар?
ЈЕҺОВАНЫН ШАҺИДЛӘРИ бәшәријјәтин мәруз галдығы фәлакәтләрдән сығорта олунмајыблар. Аллаһын бир чох хидмәтчиләри ҹинајәтләрин, мүһарибәләрин вә башга әдаләтсизликләрин гурбаны олмушлар. Тәбии фәлакәтләр, јохсуллуг, хәстәлик вә өлүм чохлу бәдбәхтликләрә сәбәб олур. Һәвари Павелин сөзләри јеринә дүшүр: «Билирик ки, бүтүн хилгәт индијә кими бирликдә фәрјад едиб доғум ағрысы чәкир» (Ром. 8:22). Бундан әлавә, биз өз гејри-камиллијимиздән әзијјәт чәкирик. Биз гәдимдә јашамыш Давуд падшаһын сөзләринә шәрикик: «Тәгсирләрим башымдан ашыр, ағыр јүк тәк онлара ҝүҹүм чатмыр» (Мәз. 38:4).
2 Бүтүн инсанларын әзијјәт чәкдији фәлакәтләрдән әлавә, һәгиги мәсиһчиләр, мәҹази диллә десәк, ‘ишҝәнҹә дирәкләрини’ (ЈД) дашыјырлар (Лука 14:27). Бәли, Иса кими, онун шаҝирдләри дә нифрәт вә тәгибләрлә үзләширләр (Мат. 10:22, 23; Јәһ. 15:20; 16:2). Демәли, јени дүнјанын ҝәтирәҹәји хејир-дуалары ҝөзләдијимиз әрәфәдә Мәсиһин ардынҹа ҝетмәк үчүн бөјүк сәј вә тәһәммүл тәләб олунур (Мат. 7:13, 14; Лука 13:24).
3. Һарадан билирик ки, Аллаһы разы салмаг үчүн мәсиһчиләрин әзаб-әзијјәт чәкмәләри тәләб олунмур?
3 Бәс бу о демәкдирми ки, һәгиги мәсиһчиләр өзләрини севинҹ вә хошбәхтликдән мәһрум едирләр? Сон ҝәләнә гәдәр һәјатымыз јалныз гәм-гүссәдәнми ибарәт олмалыдыр? Ајдындыр ки, Јеһова Онун вәдләринин һәјата кечәҹәјини ҝөзләдијимиз мүддәтдә бизим хошбәхт олмағымызы истәјир. Мүгәддәс Китаб дөнә-дөнә Аллаһын һәгиги хидмәтчиләрини хошбәхт бир халг кими тәсвир едир. (Јешаја 65:13, 14 ајәләрини оху.) «[Јеһоваја] пәнаһ ҝәтирәнләрсә гој севинсинләр, гој Сәни даима мәдһ етсинләр»,— дејә Мәзмур 5:11 ајәсиндә гејд олунур. Бәли, әзаб-әзијјәтләрин ичиндә белә бөјүк севинҹ, гәлб раһатлығы вә мәмнунлуг тапмаг мүмкүндүр. Ҝәлин ҝөрәк, Мүгәддәс Китаб бизә сынаглара синә ҝәрмәјә вә севинҹимизи горумаға неҹә көмәк едә биләр.
Јеһова хошбәхт Аллаһдыр
4. Аллаһын ирадәсинә мәһәл гојулмајанда О, Өзүнү неҹә һисс едир?
4 Јеһованын нүмунәсинә нәзәр салаг. Гадир Аллаһ олдуғу үчүн бүтүн Каинат Онун һакимијјәти алтындадыр. Онун һеч кимә вә һеч нәјә еһтијаҹы јохдур. Мисилсиз гүдрәт саһиби олмасына бахмајараг, руһани оғулларындан бири үсјан галдырыб Шејтан оланда, еһтимал ки, О, чох мәјус олмушду. Башга мәләкләрин дә үсјана гошулмасы, ҝөрүнүр, Она пис тәсир етмишди. Јаратдығы физики варлыгларын шаһ әсәри олан Адәмлә Һәвва Она арха чевирәндә Онун чәкдији ағры-аҹыны тәсәввүр етмәк олар. О вахтдан бу ҝүнә гәдәр милјардларла инсанлар Јеһованын һөкмранлығыны рәдд едирләр (Ром. 3:23).
5. Јеһоваја ән чох үрәк ағрысы ҝәтирән нәдир?
5 Шејтанын галдырдығы үсјан һәлә дә давам едир. Тәхминән 6 000 илдир ки, Јеһова инсанлар арасында һөкм сүрән бүтпәрәстлији, зоракылығы, гатиллик вә ијрәнҹ ҹинси әхлагсызлығы мүшаһидә едир (Јар. 6:5, 6, 11, 12). Үстәлик, чохлу јалан вә күфр ешидир. Һәтта бәзән һәгиги хидмәтчиләри белә Онун һиссләринә тохунур. Бу кими вәзијјәтләрдән бирини Мүгәддәс Китаб белә тәсвир едир: «Нечә дәфә сәһрада Она гаршы чыхдылар, нечә дәфә чөллүкдә Ону кәдәрләндирдиләр! Аллаһы дөнә-дөнә сынадылар, Исраилин Мүгәддәсинин хатиринә дәјдиләр» (Мәз. 78:40, 41). Бәли, хидмәтчиләри Ондан үз дөндәрәндә О пәришан олур (Јер. 3:1-10). Ҝөрүндүјү кими, пис шејләр баш верир вә буну ҝөрмәк Јеһоваја үрәк ағрысы ҝәтирир. (Јешаја 63:9, 10 ајәләрини оху.)
6. Јеһова нараһатчылыг доғуран вәзијјәтләрә неҹә бахыр?
6 Лакин ағры-аҹы вә мәјуслуг уҹбатындан Јеһова әлләрини јанына салмајыб. Чәтинлик јарананда Јеһова гәти аддымлар атды ки, баш верән һадисәләрин аҹы нәтиҹәләрини мүмкүн гәдәр минимума ендирсин. Һәмчинин О, узунмүддәтли тәдбирләр ҝөрдү ки, сонда нијјәти һәјата кечсин. Буна ҝөрә дә Јеһова али һөкмранлығынын бәраәт газанаҹағы вә бунун садиг хидмәтчиләринә хејир-дуалар ҝәтирәҹәји вахты һәсрәтлә ҝөзләјир (Мәз. 104:31). Бәли, Јеһова Она атылан бөһтанлара бахмајараг, ‘хошбәхт Аллаһдыр’ (ЈД) (1 Тим. 1:11; Мәз. 16:11).
7, 8. Ишимиз дүз ҝетмәјәндә Јеһованы неҹә тәглид едә биләрик?
7 Әлбәттә, проблемләри һәлл етмәк баҹарығында Јеһоваја чата билмәрик. Амма ҝәлин бәдбәхтлик үз верәндә Ону тәглид едәк. Ишимиз дүз ҝетмәјәндә руһ дүшкүнлүјү һисс етмәк нормалдыр, амма биз бу һиссләрә гапылыб галмамалыјыг. Јеһованын сурәтиндә јарадылдығымыз үчүн дүшүнмә габилијјәтинә вә мүдриклијә маликик. Вә бунун сајәсиндә проблемләримизи тәһлил едир вә мүмкүн олан һалларда онлары һәлл едирик.
8 Проблемләрин өһдәсиндән ҝәлмәјә көмәк едән мүһүм амилләрдән бири мүәјјән шејләрин садәҹә олараг биздән асылы олмадығыны гәбул етмәкдир. Белә шејләрдән өтрү өзүмүзү үзмәк бизи даһа да мәјус едәр вә һәгиги ибадәтин ҝәтирдији севинҹдән мәһрум едә биләр. Проблеми һәлл етмәк үчүн лазыми тәдбирләр ҝөрдүкдән сонра ону башымыздан атмаг вә даһа сәмәрәли ишләрлә мәшғул олмаг даһа јахшы оларды. Буну Мүгәддәс Китабда гәләмә алынан әһвалатлардан ајдын ҝөрмәк олар.
Мүдрик давранмаг ваҹибдир
9. Ханнанын мүдрик даврандығы нәдән ҝөрүнүр?
9 Шамуел пејғәмбәрин анасы олан Ханнанын нүмунәсинә бахаг. О, кәдәрә гәрг олмушду, чүнки сонсуз иди вә буна ҝөрә ҝүнүсү она истеһза едирди. Бәзән Ханна о гәдәр руһдан дүшүрдү ки, ағламагдан боғазындан чөрәк белә кечмирди (1 Шам. 1:2-7). Бир дәфә о, Јеһованын ибадәтҝаһына ҝәләндә ‘үрәк јанғысы илә дуа едәрәк аҹы-аҹы ағлады’ (1 Шам. 1:10). Ханна үрәјини Јеһоваја бошалдандан сонра баш каһин Ели она јахынлашыб деди: «Саламат ҝет, гој Исраилин Аллаһы сәни мурадына чатдырсын!» (1 Шам. 1:17). Ханна баша дүшдү ки, әлиндән ҝәләни едиб — сонсузлуғуну арадан галдырмаг онун әлиндә дејил. Бу, мүдрик һәрәкәт иди. О, өз «јолу илә ҝетди вә јемәк једи. Артыг чөһрәси кәдәрли дејилди» (1 Шам. 1:18).
10. Павел һәлл едә билмәдији проблемлә үзләшәндә һансы дүшүнҹә тәрзини әкс етдирди?
10 Үзүҹү хәстәликдән әзаб чәкән һәвари Павел дә ејни әһвал-руһијјә тәзаһүр етдирди. Павел бу хәстәлији ‘бәдәнинә [верилән] бир нештәр’ адландырырды (2 Кор. 12:7). Һансы хәстәлији олмасындан асылы олмајараг, Павел ону арадан галдырмаг үчүн Јеһоваја дуа едәрәк әлиндән ҝәләни едирди. Павел проблеми илә әлагәдар Јеһоваја дүз үч дәфә јалвармышды. Үчүнҹү дәфәдән сонра Аллаһ Павелә билдирди ки, бу нештәри мөҹүзәли шәкилдә арадан галдырмајаҹаг. Павел бу факты гәбул едиб диггәтини Јеһоваја там шәкилдә хидмәт етмәјә јөнәлтди. (2 Коринфлиләрә 12:8-10 ајәләрини оху.)
11. Бәдбәхтликләрин өһдәсиндән ҝәлмәкдә дуа вә нијазлар һансы ролу ојнајыр?
11 Бу нүмунәләр о демәк дејил ки, бизи нараһат едән мәсәләләр барәдә артыг Јеһоваја дуа етмәли дејилик (Мәз. 86:7). Әксинә, Аллаһын Кәламы бизи тәшвиг едир: «Һеч нәјин гејдинә галмајын, амма һәр шејдә, дуа вә нијаз едәрәк, өз хаһишләринизи Аллаһа шүкранла билдирин». Јеһова бу ҹүр нијаз вә хаһишләрә неҹә ҹаваб верәҹәк? Мүгәддәс Китаб әлавә едир: «Аллаһын һәр ҹүр ағылдан үстүн олан сүлһү Мәсиһ Иса васитәсилә үрәкләринизи вә дүшүнҹәләринизи горујаҹагдыр» (Филип. 4:6, 7). Дүздүр, ола билсин, Јеһова проблемләримизи истәдијимиз кими һәлл етмәсин, амма дуамыза ҹаваб олараг дүшүнҹәләримизи горуја биләр. Бизи нараһат едән мәсәлә барәдә дуа етдикдән сонра нараһатчылыға гәрг олмағын нә гәдәр тәһлүкәли олдуғуну дәрк едә биләрик.
Аллаһын ирадәсини јеринә јетирмәкдән севинҹ дуј
12. Нәјә ҝөрә узун чәкән руһ дүшкүнлүјү тәһлүкәли ола биләр?
12 Сүлејманын мәсәлләри 24:10 ајәсиндә ачыг дејилир: «Дар ҝүндә тагәтдән дүшсән, неҹә дә зәиф адамсан!» Башга мәсәлдә исә дејилир: «Үрәјин кәдәри көнлү сындырар» (Сүл. мәс. 15:13). Бәзи мәсиһчиләр о гәдәр руһдан дүшмүшләр ки, Мүгәддәс Китабы охумаға вә үзәриндә дүшүнмәјә сон гојмушлар. Артыг онларын дуалары сәтһидир вә ола билсин, өзләрини һәмиманлыларындан тәҹрид едирләр. Ајдын мәсәләдир ки, руһ дүшкүнлүјү илә мүбаризә апармасаг, ахыры пис ола биләр (Сүл. мәс. 18:1, 14).
13. Руһ дүшкүнлүјүнү арадан галдыран вә бизә севинҹ бәхш едән бәзи мәшғулијјәтләр һансылардыр?
13 Мүсбәт әһвал-руһијјә исә диггәтимизи һәјатдан севинҹ вә мәмнунлуг ала биләҹәјимиз шејләрә ҹәмләмәјә көмәк едәҹәк. Давуд јазырды: «Еј Аллаһым, Сәнин истәјинә әмәл етмәк мәнә зөвг верир» (Мәз. 40:8). Һәјатымызда һәр шеј алт-үст оланда хидмәт графикимизи позмаг фикрини ағлымыза белә ҝәтирмәмәлијик. Әслиндә, севинҹ ҝәтирән ишләрлә мәшғул олмаг руһ дүшкүнлүјүнүн өһдәсиндән ҝәлмәјә көмәк едир. Јеһова бизи Онун Кәламыны мүнтәзәм охујуб үзәриндә дүшүнмәјә тәшвиг едир, чүнки билир ки, бу, бизә хошбәхтлик ҝәтирә биләр (Мәз. 1:1, 2; Јаг. 1:25). Һәм Мүгәддәс Јазылардан охудуғумуз, һәм дә мәсиһчи ҝөрүшләриндә ешитдијимиз «хош сөзләр» бизи руһландырыр вә үрәјимизи шад едир (Сүл. мәс. 12:25; 16:24).
14. Аллаһын һансы вәди бу ҝүн бизә севинҹ ҝәтирир?
14 Севинмәк үчүн Аллаһ бизә чохлу сәбәбләр вериб. Онун гуртулуша даир вердији вәд бизә бөјүк хошбәхтлик ҝәтирир (Мәз. 13:5). Бу ҝүн бизимлә нә баш вермәсиндән асылы олмајараг, әминик ки, Аллаһ Ону сәјлә ахтаранлары ахырда мүкафатландыраҹаг. (Ваиз 8:12 ајәсини оху.) Һабаггуг пејғәмбәр буна там әмин олдуғуну ҝөзәл сөзләрлә ифадә едиб: «Әнҹир ағаҹы тумурҹугланмаса да, мејнәләр бар ҝәтирмәсә дә, зејтун ағаҹларына чәкдијим зәһмәт боша чыхса да, тарлалар мәһсул јетишдирмәсә дә, гојун-кечи ағылларда, мал-гара төвләләрдә јох олса да, мән јенә Рәбдә севинҹ тапаҹағам. Хиласымын Аллаһы илә шадлыгдан ҹошаҹағам!» (Һаб. 3:17, 18).
«Нә бәхтијардыр Аллаһы Рәбб олан халг!»
15, 16. Ҝәләҹәк хејир-дуалары ҝөзләдијимиз мүддәтдә Аллаһын һансы әнамларындан зөвг ала биләрик?
15 Јеһова истәјир ки, јени дүнјаны ҝөзләдијимиз мүддәтдә Онун инди вердији јахшы шејләрдән севинҹ дујаг. Мүгәддәс Китабда дејилир: «Мән билирәм ки, инсан үчүн шадлыг етмәкдән вә өмрү боју хејирхаһлыг етмәкдән јахшы шеј јохдур. Һәм дә һәр кәсин јејиб-ичмәји вә ҝөрдүјү ишдән зөвг алмағы Аллаһын бәхшишидир» (Ваиз 3:12, 13). ‘Хејирхаһлыг етмәк’ һәмчинин башгалары үчүн јахшы ишләр ҝөрмәк демәкдир. Иса демишдир ки, вермәк алмагдан даһа бөјүк хошбәхтлик ҝәтирир. Өмүр-ҝүн јолдашымыза, өвладларымыза, валидејнләримизә вә диҝәр гоһум-әгрәбаларымыза јахшылыг етмәк бизә дәрин мәмнунлуг бәхш едир (Сүл. мәс. 3:27). Һәмчинин руһани баҹы-гардашларымыза гаршы меһрибан вә гонагпәрвәр олмаг, еләҹә дә бағышламағы баҹармаг бизә чохлу севинҹ ҝәтирир вә Јеһованы разы салыр (Галат. 6:10; Колос. 3:12-14; 1 Пет. 4:8, 9). Хидмәтимизи фәдакарлыг руһу илә јеринә јетирмәк дә әсил хејир-дуадыр.
16 Јухарыда «Ваиз» китабындан ситат ҝәтирилән ајәләрдә һәјатда бизә зөвг ҝәтирән јемәк вә ичмәк кими садә шејләрдән бәһс едилир. Бәли, һәтта сынаглара мәруз галанда белә Јеһованын бәхш етдији мадди әнамлардан зөвг ала биләрик. Ҝүнәшин һејрәтамиз гүрубу, мөһтәшәм мәнзәрәләр, һејван балаларынын ојнашмасы вә тәбиәтин диҝәр мөҹүзәләри пулсуздур, амма онлар бизә дәрин еһтирам һасил едир вә севинҹ ҝәтирир. Бу кими шејләр үзәриндә дүшүнәндә Јеһоваја мәһәббәтимиз артыр, чүнки һәр јахшы бәхшиш Ондандыр.
17. Нәјин сајәсиндә әзаб-әзијјәтләрдән азад олаҹағыг вә һәләлик бизә нә тәсәлли ҝәтирир?
17 Нәһајәт, Аллаһа олан мәһәббәтин, Онун әмрләринә табе олмағын вә фидјә гурбанлығына иман ҝәтирмәјин сајәсиндә гејри-камил һәјатын ағры-аҹыларындан тамамилә азад олаҹаг вә әбәдијјән севинҹ ичиндә јашајаҹағыг (1 Јәһ. 5:3). Һәләлик исә чәкдијимиз бүтүн әзаб-әзијјәтләрдән Јеһованын аҝаһ олмасы бизә тәсәлли верир. Давуд јазырды: «Мән Сәнин мәһәббәтиндә шад олуб севинәҹәјәм, чүнки мәзлум һалымы ҝөрмүсән, чәкдијим әзабы билмисән» (Мәз. 31:7). Мәһәббәтдән ирәли ҝәләрәк, Јеһова бизи бүтүн әзаб-әзијјәтләрдән азад едәҹәк (Мәз. 34:19).
18. Нәјә ҝөрә Аллаһын халгы арасында севинҹ һөкм сүрмәлидир?
18 Бу вәдләрин јеринә јетмәсини ҝөзләдијимиз мүддәтдә ҝәлин хошбәхт Аллаһымыз Јеһованы тәглид едәк. Ҝәлин бизи руһани ҹәһәтдән тагәтдән салан мәнфи һиссләрдән узаг олаг. Проблемләр јарананда гој дүшүнмәк габилијјәтимиз вә практики мүдриклик бизә јол ҝөстәрсин. Јеһова бизә һиссләримизә һаким олмаға вә бәдбәхтликләрин пис нәтиҹәләрини азалтмаға көмәк едәҹәк. Гој Аллаһын бизә бәхш етдији мадди вә руһани әнамлар бизә севинҹ ҝәтирсин. Аллаһа бағлы галсаг, һәјатдан севинҹ дујаҹағыг, чүнки Аллаһы Јеһова олан халг бәхтијардыр! (Мәз. 144:15).
Сиз нә өјрәндиниз?
• Бәдбәхтликләрлә үзләшәндә Јеһованы неҹә тәглид едә биләрик?
• Мүдриклик бәдбәхтликләрин өһдәсиндән ҝәлмәкдә неҹә көмәк едир?
• Чәтин анларда Аллаһын ирадәсини јеринә јетирмәкдән неҹә севинҹ әлдә едә биләрик?
[16-ҹы сәһифәдәки шәкил]
Дүнјада баш верән писликләр Јеһоваја үрәк ағрысы ҝәтирир
[Иҹазә илә]
© G.M.B. Akash/Panos Pictures
[18-ҹи сәһифәдәки шәкил]
Севинмәк үчүн Јеһова бизә чохлу сәбәбләр вериб