Мәһәббәтли чобанлара табе олун
«Өз рәисләринизә итаәт един, онлара табе олун» (ИБРАНИЛӘРӘ 13:17).
1, 2. Јеһованын вә Исанын мәһәббәтли Чобанлар олдугларыны һансы ајәләр ҝөстәрир?
ЈЕҺОВА АЛЛАҺ вә Онун Оғлу Иса Мәсиһ мәһәббәтли Чобанлардыр. Јешаја пејғәмбәрлик етмишди: «Будур, Худавәнд Рәбб Өз гүввәси илә ҝәлир, О, гүдрәтлә һөкм едәҹәк... О Өз сүрүсүнү чобан кими отараҹаг, гузулары гуҹағына алаҹаг, синәсиндә ҝәздирәҹәк, сағмал һејванларын гајғысыны чәкиб отараҹаг» (Јешаја 40:10, 11).
2 Һәгиги ибадәтин бәрпа олунмасы һаггындакы бу пејғәмбәрлик илк дәфә б. е. ә. 537-ҹи илдә јәһудиләр вәтәнләринә гајыданда јеринә јетди (2 Салнамәләр 36:22, 23). О, икинҹи дәфә 1919-ҹу илдә мәсһ олунмушлар ‘Бөјүк Бабилдән’ Кирдән дә бөјүк олан Иса Мәсиһ тәрәфиндән азад оланда јеринә јетди (Вәһј 18:2; Јешаја 44:28). Јеһова бу гүдрәтли Падшаһдан истифадә едәрәк гојунлары топлајыр вә нәвазишлә онларын гајғысына галыр. Иса да өзү һаггында демишди: «Јахшы чобан Мәнәм; Мәнимкиләри таныјырам... Мәнимкиләр дә Мәни таныјырлар» (Јәһја 10:14, 15).
3. Гојунларла рәфтарындан Јеһованын мәһәббәт долу гајғысы неҹә ҝөрүнүр?
3 Јешаја 40:10, 11 ајәләриндә Јеһованын Өз халгынын гејдинә нәвазишлә галдығы тәсвир едилир (Мәзмур 23:1-6). Јер үзүндә хидмәт едәркән Иса да өз давамчыларынын вә үмумијјәтлә һамынын гајғысына галырды (Матта 11:28-30; Марк 6:34). Һәм Јеһова, һәм дә Иса халга лагејд јанашан вә утанмадан ону истисмар едән Исраил чобанларынын, јә’ни рәһбәрләринин инсафсызлығына нифрәт едирди (Језекел 34:2-10; Матта 23:3, 4, 15). Јеһова сөз верирди: «Мән сүрүмү хилас едәҹәјәм. Онлар даһа гарәт малы олмајаҹаг вә гојунла гојун арасында Мән һөкм едәҹәјәм. Башларына онлары отаран јеҝанә чобан олараг гулум Давуду гојаҹағам. Онлары о отараҹаг, чобанлары да о олаҹаг» (Језекел 34:22, 23). Бу системин сонунда Давуддан да бөјүк олан Иса Мәсиһ Јеһованын јер үзүндәки бүтүн хидмәтчиләринин, һәм мәсһ едилмишләрин, һәм дә ‘башга гојунларын’ үзәриндә тә’јин етдији ‘јеҝанә чобандыр’ (Јәһја 10:16).
Јеһованын јығынҹаға бәхш етдији һәдијјәләр
4, 5. а) Јеһова халгына һансы дәјәрли һәдијјәни вериб? б) Иса јығынҹаға һансы һәдијјәни бәхш едиб?
4 Хидмәтчиләри үзәринә ‘јеҝанә чобаны’ — Иса Мәсиһи гојмагла Јеһова мәсиһчи јығынҹағына дәјәрли һәдијјә бәхш етди. Бу сәмави Рәһбәр һаггында Јешаја 55:4 ајәсиндә пејғәмбәрлик едилмишди: «Будур, ону үммәтләрә шаһид, башчы вә һөкмдар етдим». Һәм мәсһ олунмушларын, һәм дә ‘бөјүк издиһамын’ үзвләри арасында бүтүн милләтләрдән, гәбиләләрдән, халглардан вә дилләрдән инсанлар вардыр (Вәһј 5:9, 10; 7:9). Онлар «јеҝанә чобан» олан Иса Мәсиһин рәһбәрлији алтында ‘тәк сүрүнү’ — бејнәлхалг јығынҹағы тәшкил едирләр.
5 Иса да өз нөвбәсиндә јер үзүндәки јығынҹағына гијмәтли һәдијјә бәхш етмишдир. О, Јеһованы вә онун өзүнү тәглид едән сәдагәтли ағсаггаллары сүрүнүн гајғысына мәһәббәтлә галмаг үчүн тә’јин етмишдир. Һәвари Павел Ефесдәки мәсиһчиләрә мәктубунда бу һәдијјәдән данышараг јазырды: «“Јүксәјә галхды вә бир орду әсири дә Өзү илә апарды. О, инсанлара [«инсанлар тимсалында», ЈД] һәдијјәләр верди”. Мүгәддәсләрин хидмәт ишләри үчүн мүкәммәлләшмәси вә Мәсиһин Бәдәнинин инкишафы үчүн, кими һәвари, кими пејғәмбәр, кими мүждәчи, кими чобан вә кими дә мүәллим тә’јин етди» (Ефеслиләрә 4:8, 12, 13, И–93).
6. Вәһј 1:16, 20 ајәләриндә мәсһ олунмуш ағсаггаллар неҹә тәсвир олунурлар вә башга гојунлар сырасындан олан ағсаггаллар һаггында нә демәк олар?
6 «Инсанлар тимсалында һәдијјәләр» Јеһова вә Исанын сүрүнү нәвазишлә отармаг үчүн мүгәддәс руһ васитәсилә тә’јин етдији ағсаггаллардыр (Һәвариләрин ишләри 20:28, 29). Лап әввәлләр ағсаггалларын һамысы мәсһ олунмушлар идиләр. Мәсһ едилмишләрин јығынҹағында хидмәт едән бу ағсаггаллар Вәһј 1:16, 20 ајәләриндә Мәсиһин сағ әлиндә тутдуғу, јә’ни нәзарәти алтында олан ‘улдузлар’ вә ја ‘мәләкләр’ кими тәсвир олунурлар. Ахыр ҝүнләрдә мәсһ олунмуш ағсаггалларын сајы ҝет-ҝедә азалдығы үчүн јығынҹагдакы ағсаггалларын әксәријјәти башга гојунлардандыр. Онлар мүгәддәс руһун рәһбәрлији алтында Рәһбәрлик Шурасынын нүмајәндәләри тәрәфиндән тә’јин олундугларындан, демәк олар ки, бу ағсаггаллар да Јахшы Чобан Иса Мәсиһин сағ әлиндә, јә’ни нәзарәти алтындадырлар (Јешаја 61:5, 6). Ағсаггалларымыз јығынҹағын Башы олан Мәсиһә табе олдуглары үчүн биз онларла һәр бир саһәдә әмәкдашлыг етмәлијик (Колослулара 1:18).
Ағсаггаллара итаәт едир вә табе олуруг
7. Һәвари Павел ағсаггаллара неҹә мүнасибәт ҝөстәрмәји мәсләһәт едирди?
7 Бизим сәмави Чобанларымыз Јеһова Аллаһ вә Иса Мәсиһ биздән јығынҹагдакы мәс’ул гардашлара итаәт едиб, онлара табе олмағымызы ҝөзләјир (1 Петер 5:5). Һәвари Павел Аллаһдан илһам алараг јазмышды: «Аллаһын кәламыны сизә нағыл едән рәисләринизи јада салын. Онларын јашајышынын нәтиҹәсинә бахараг, иманларыны тәглид един. Өз рәисләринизә итаәт един, онлара табе олун; чүнки һесабат верәҹәк оланлар кими, онлар һәр заман сизин ҹанларынызын гејдинә галырлар. Онлара табе олун ки, онлар буну ҹан чәкә-чәкә дејил, севинҹлә етсинләр. Чүнки әҝәр буну ҹан чәкә-чәкә етсәләр, сизә фајда олмаз» (Ибраниләрә 13:7, 17).
8. Павел бизи нәјә ‘бахмаға’ сәсләјир вә биз неҹә ‘итаәт етмәлијик’?
8 Диггәт јетирин ки, һәвари Павел бизи ағсаггалларын сәдагәтли давранышынын ҝәтирдији нәтиҹәјә ‘бахмаға’, јә’ни диггәтлә мүшаһидә етмәјә вә бу иман нүмунәләрини тәглид етмәјә чағырырды. Бундан башга о, бизә мәсләһәт ҝөрүр ки, ағсаггалларын рәһбәрлијинә итаәт едиб, табе олаг. Мүгәддәс Китаб алими Р. Т. Франс изаһ едир ки, «орижинал јунан әлјазмасында “итаәт един” ифадәси ади итаәткарлығы билдирмир, о, һәрфи мә’нада “әмин олмаг” демәкдир, бу да өз нөвбәсиндә онларын рәһбәрлијини һәвәслә гәбул етмәји билдирир». Ағсаггаллара она ҝөрә табе олуруг ки, Аллаһын Кәламы бизи буна сәсләјир. Биз һәм дә әминик ки, онлар Падшаһлыг ишинин ирәлиләмәсини вә бизим јахшылығымызы истәјирләр. Онларын рәһбәрлијини һәвәслә гәбул етсәк, бунун бизә мүтләг хејри дәјәҹәк.
9. Итаәт етмәклә јанашы, ‘табе олмаг’ нә үчүн ваҹибдир?
9 Бәс әҝәр ағсаггалын мәсләһәтинин о гәдәр дә дүзҝүн олдуғуна әмин дејиликсә, онда неҹә? Бах елә бу заман онлара табе олмаг ҝәрәкдир. Һәр шеј ајдындырса, мәсләһәт үрәјимизҹәдирсә, онда итаәт етмәјә нә вар ки? Анҹаг ҝөстәриши баша дүшмәјәндә она әсасән һәрәкәт етмәјә разылашсаг, ағсаггаллара һәгигәтән дә табе олдуғумузу ҝөстәрәҹәјик. Сонралар һәвари олан Петер дә табе олмаға һазыр олдуғуну ҝөстәрмишди (Лука 5:4, 5).
Һәвәслә әмәкдашлыг етмәк үчүн дөрд сәбәб
10, 11. Ағсаггаллар һансы мә’нада Аллаһын Кәламыны биринҹи әсрдә вә бизим ҝүнләрдә нағыл едибләр?
10 Јухарыда ситат ҝәтирилән Ибраниләрә 13:7, 17 ајәләриндә һәвари Павел ағсаггаллара итаәт едиб табе олмағын дөрд сәбәбини ҝәтирир. Биринҹиси одур ки, онлар бизә ‘Аллаһын кәламыны нағыл едибләр’. Унутма ки, Исанын јығынҹаға бәхш етдији «инсанлар тимсалында һәдијјәләр» ‘мүгәддәсләрин мүкәммәлләшмәси’ үчүндүр (Ефеслиләрә 4:11, 12). О, биринҹи әсрдәки мәсиһчиләрин дүшүнҹә тәрзини вә давранышыны садиг ағсаггалларын васитәсилә дүзәлдирди. Бу ағсаггаллардан бә’зиләри Аллаһдан илһам алараг јығынҹаглара мәктублар јазмышдылар. О, еркән мәсиһчиләрә рәһбәрлик вермәк вә онлары мөһкәмләндирмәк үчүн руһла тә’јин олунмуш ағсаггаллардан истифадә едирди (1 Коринфлиләрә 16:15-18; 2 Тимотејә 2:2; Титуса 1:5).
11 Бу ҝүн Иса садиг вә ағыллы гулун васитәсилә бизә рәһбәрлик едир. Бу гулу исә Рәһбәрлик Шурасы вә ағсаггаллар тәмсил едир (Матта 24:45). «Баш Чобан» Иса Мәсиһә һөрмәтдән ирәли ҝәләрәк биз Павелин мәсләһәтинә гулаг асырыг: «Аранызда зәһмәт чәкәнләрә вә Рәбб јолунда сизә рәислик едәнләрә вә сизә нәсиһәт верәнләрә һөрмәт един» (1 Петер 5:4; 1 Салоникилиләрә 5:12; 1 Тимотејә 5:17).
12. Ағсаггаллар һәр заман ҹанларымызын гејдинә неҹә галырлар?
12 Мәсиһчи ағсаггаллары илә әмәкдашлыг етмәјин икинҹи сәбәби ‘онларын һәр заман ҹанларымызын гејдинә галмасыдыр’. Онлар бизим мүнасибәтимиздә вә ја давранышымызда руһанилијимиз үчүн тәһлүкә јарадаҹаг нә исә ҝөрәндә дүзәлмәјимиз үчүн мәсләһәт верирләр (Галатијалылара 6:1). Јунан дилиндән «һәр заман гејдинә галмаг» кими тәрҹүмә олунан ифадә һәрфи мә’нада «јатмамаг, ојаг дурмаг» кими тәрҹүмә олунур. Бир илаһијјатчынын сөзләринә ҝөрә бу, ‘чобанын сајыглығынын һеч заман зәифләмәмәси’ демәкдир. Онлар руһани сајыглығы горумагла јанашы, бизим рифаһымыз үчүн һәтта ҝеҹә јухусуна да һарам гатырлар. Бәс белә исә «гојунларын бөјүк Чобаны» Иса Мәсиһ кими сүрүнүн мәһәббәтлә гајғысына галан бу ағсаггалларла ҹанла-башла әмәкдашлыг етмәли дејиликми? (Ибраниләрә 13:20).
13. Ағсаггаллар вә бүтүн мәсиһчиләр кимә вә нәјә ҝөрә ҹаваб верәҹәкләр?
13 Үчүнҹү сәбәб ондан ибарәтдир ки, ағсаггаллар «һесабат верәҹәк оланлар кими» ҹанларымызын гејдинә галырлар. Ағсаггаллар баша дүшүрләр ки, онлар сәмави Чобанлар Јеһова Аллаһын вә Иса Мәсиһин рәһбәрлији алтында хидмәт едирләр (Језекел 34:22-24). Гојунларын Саһиби онлары ‘Өз Оғлунун ганы баһасына әлдә етмиш’ Јеһовадыр вә ағсаггаллар сүрү илә неҹә рәфтар етдикләринә ҝөрә Она һесабат верәҹәкләр. Онлар сүрү илә ‘рәһмлә’ давранмалыдырлар (Һәвариләрин ишләри 20:28, 29). Беләликлә биз дә рәһбәрлијинә ҝөстәрдијимиз мүнасибәтә ҝөрә Аллаһ гаршысында ҹаваб верәҹәјик (Ромалылара 14:10-12). Тә’јин олунмуш ағсаггаллара итаәт етмәклә јығынҹағын Башы Мәсиһә табе олдуғумузу ҝөстәририк (Колослулара 2:19).
14. Ағсаггалларын «ҹан чәкә-чәкә» хидмәт етмәләринә нә сәбәб ола биләр вә бунун нәтиҹәси нә олар?
14 Павел мәсиһчи ағсаггалларына табе олмағын дөрдүнҹү сәбәбини белә изаһ едирди: «Онлар буну ҹан чәкә-чәкә дејил, севинҹлә етсинләр. Чүнки әҝәр буну ҹан чәкә-чәкә етсәләр, сизә фајда олмаз» (Ибраниләрә 13:17). Тә’лим вермәк, сүрүнүн гејдинә галмаг, тәблиғ ишиндә рәһбәрлији үзәрләринә ҝөтүрмәк, аиләләрини доландырмаг вә јығынҹагдакы проблемләри һәлл етмәк ағсаггаллар үчүн чох бөјүк мәс’улијјәтдир (2 Коринфлиләрә 11:28, 29). Әҝәр онларла әмәкдашлыг етмәсәк, јүкләрини артырмыш олуруг. Онлар да өз ишләрини «ҹан чәкә-чәкә» ҝөрәҹәкләр. Бизим әмәкдашлыг етмәмәјимиз Јеһованы наразы салыр вә бизә зијан вурур. Анҹаг ағсаггаллара лајигинҹә һөрмәт ҝөстәриб, онларла әмәкдашлыг етсәк, онлар өз вәзифәләрини севинҹлә јеринә јетирәҹәк вә бу да Падшаһлығын тәблиғи ишинин јекдилликлә вә севинҹлә һәјата кечирилмәсинә көмәк едәҹәк (Ромалылара 15:5, 6).
Табе олдуғумузу әмәлдә ҝөстәририк
15. Ағсаггаллара итаәт етдијимизи вә табе олдуғумузу неҹә ҝөстәрә биләрик?
15 Ағсаггалларла бир чох саһәләрдә әмәкдашлыг едә биләрик. Саһәдәки шәраитә ујғунлашмаг үчүн ағсаггаллар тәблиғ үчүн ҝөрүшләри елә ҝүнләрдә вә саатларда кечирә биләрләр ки, сәнә өз графикиндә дәјишиклик етмәк лазым ҝәлә биләр. Бу тәдбирләрдә иштирак етмәк үчүн әлиндән ҝәләни ет. Бу сәнә ҝөзләмәдијин хејир-дуалары ҝәтирәҹәк. Бәлкә хидмәти нәзарәтчи китабөјрәнмәјә баш чәкир. Ҝәлин чалышаг һәмин һәфтә әрзиндә тәблиғдә мүмкүн гәдәр чох иштирак едәк. Теократик Хидмәт Мәктәбиндә сәнә тапшырыг верилиб? Чалыш һәмин ҝөрүшү бурахма вә тапшырығыны јеринә јетир. Китабөјрәнмә нәзарәтчиси Падшаһлыг Залынын јығышдырылмасында сизин групун нөвбәси олдуғуну дејир? Ҝәлин имканымыз вә ҝүҹүмүз дахилиндә онунла әмәкдашлыг едәк. Бу вә башга үсулларла Јеһованын вә Онун Оғлунун сүрүнүн гајғысына галмаг үчүн тә’јин етдији гардашлара табе олдуғумузу ҝөстәрәрик.
16. Әҝәр ағсаггал рәһбәрлијә ујғун давранмырса, нә үчүн бу бизим итаәтсизлик ҝөстәрмәјимизә бәраәт газандырмыр?
16 Бә’зән елә ола биләр ки, ағсаггал садиг гулун вә онун Рәһбәрлик Шурасынын ҝөстәришләринә ујғун давранмасын. Әҝәр о белә давам етсә, онда ‘ҹанларымызын Чобанына вә Нәзарәтчиси’ Јеһоваја ҹаваб вермәли олаҹаг (1 Петер 2:25). Анҹаг ағсаггалларын сәһвә јол вермәси бизим итаәтсизлик ҝөстәрмәјимизә бәраәт газандырмыр. Јеһова итаәтсизлијә вә үсјанкарлыға хејир-дуа вермир (Сајлар 12:1, 2, 9-11).
Јеһова һәвәслә әмәкдашлыг едәнләрә хејир-дуа верир
17. Ағсаггалларымыза неҹә мүнасибәт бәсләмәлијик?
17 Јеһова Аллаһ билир ки, тә’јин етдији ағсаггаллар гејри-камил инсанлардыр. Буна бахмајараг, О онлардан истифадә едәрәк Өз руһунун васитәсилә халгынын гајғысына галыр. Ағсаггаллара вә бизим һамымыза верилән ‘ән үстүн гүдрәт Аллаһа аиддир’ (2 Коринфлиләрә 4:7). Буна ҝөрә дә садиг ағсаггалларымыз васитәсилә һәјата кечирдији һәр шејә ҝөрә Јеһоваја миннәтдар олмалы вә онларла һәвәслә әмәкдашлыг етмәлијик.
18. Ағсаггалларымыза табе олмагла биз нәји нүмајиш етдиририк?
18 Ағсаггаллар әлләриндән ҝәләни едирләр ки, Јеремја 3:15 ајәсиндә Јеһованын Өз сүрүсү үзәринә гојаҹағы ағсаггаллара бәнзәсинләр: «Үрәјимә јатан чобанлары сизә верәҹәјәм, сизә ағыл вә мүдрикликлә рәһбәрлик едәҹәкләр». Сөзсүз ки, арамызда олан ағсаггаллар Јеһованын халгына тә’лим верәрәк вә онлары мүдафиә едәрәк тә’рифәлајиг иши һәјата кечирирләр. Ҝәлин һәмишә онларла һәвәслә әмәкдашлыг едәрәк, онлара итаәт едиб, табе олараг ағыр зәһмәтләрини гијмәтләндирдијимизи ҝөстәрәк. Белә етмәклә биз сәмави Чобанларымыз Јеһова Аллаһ вә Иса Мәсиһә миннәтдар олдуғумузу нүмајиш етдирәҹәјик.
Тәкрар үчүн суаллар
• Јеһова Аллаһ вә Иса Мәсиһ мәһәббәтли Чобанлар олдугларыны неҹә ҝөстәрмишләр?
• Итаәт етмәклә јанашы нә үчүн табе олмаг да ҝәрәкдир?
• Һансы јолларла ағсаггаллара табе олдуғумузу ҝөстәрә биләрик?
[27-ҹи сәһифәдәки шәкил]
Мәсиһчи ағсаггаллар Мәсиһин рәһбәрлијинә табе олурлар.
[29-ҹу сәһифәдәки шәкилләр]
Јеһованын тә’јин етдији ағсаггаллара табе олдуғумузу мүхтәлиф јолларла ҝөстәрә биләрик.