Јахшыны писдән ајырд едә билирсинизми?

“Рәббә нәјин мәгбул олдуғуну өјрәнмәјә чалышын” (ЕФЕСЛИЛӘРӘ 5:10).

1. Бу ҝүн һәјаты чәтинләшдирән нәдир вә нәјә ҝөрә?

“ЈА РӘБ, билирәм ки, инсанын јолу өз әлиндә дејилдир; аддымларыны доғрултмаг јеријән инсанын әлиндә дејилдир” (Јеремја 10:23). Јеремјанын мүдрикликлә апардығы мүшаһидә бу ҝүн бизим үчүн даһа бөјүк мә’на дашыјыр. Нәјә ҝөрә? Мүгәддәс Китабда габагҹадан дејилән “чәтин анлар”да јашадығымыза ҝөрә (2 Тимотејә 3:1). Һәр ҝүн, бизи гәрар гәбул етмәјә вадар едән гејри-ади вәзијјәтләрлә гаршылашырыг. Ваҹиб вә ја әһәмијјәтсиз олмасындан асылы олмајараг, алынан гәрарлар рифаһымыза — физики, емосионал вә руһани вәзијјәтимизә ҝүҹлү тә’сир ҝөстәрир.

2. Ҝүндәлик һәјатымызда етдијимиз сечимләр нәјә ҝөрә ади кими ҝөрүнә биләр вә Аллаһа һәср олунмуш мәсиһчиләр белә сечимә неҹә јанашырлар?

² Чох вахт ҝүндәлик һәјатымызда алдығымыз гәрарлар садә вә ја ади ҝөрүнүр. Мәсәлән, һәр ҝүн ҝејәҹәјимизи, јејәҹәјимизи, ҝөрүшәҹәјимиз адамы вә саирәни сечмәли олуруг. Бунлары, демәк олар ки, һеч дүшүнмәдән, автоматик олараг едирик. Бәс доғруданмы бүтүн бунлар ади ишләрдир? Аллаһа һәср олунмуш биз мәсиһчиләр, ҝејимимизә, јејиб-ичмәјимизә, данышыг вә давранышымыза чох диггәтли олмалыјыг. Бүтүн бунлар, Күлл-Ихтијар Јегова Аллаһа хидмәт етдијимизи әкс етдирмәлидир. Һәвари Павелин сөзләрини јада салаг: “Јејирсинизсә, ичирсинизсә, нә едирсинизсә һәр шеји Аллаһын иззәти үчүн един” (1 Коринфлиләрә 10:31; Колослулара 4:6; 1 Тимотејә 2:9, 10).

3. Сечим һансы һалларда даһа ҹидди әһәмијјәт кәсб едир?

³ Бә’зән сечим даһа ҹидди әһәмијјәт кәсб едир. Мәсәлән, аилә гурмаг вә ја гурмамаг гәрары инсана өмрү боју ҝүҹлү тә’сир ҝөстәрәҹәкдир. Һәмчинин аилә гурмаг истәдијин кәси — өмрүн боју сәнә һәјат јолдашы олаҹаг шәхси дә дүзҝүн сечмәк олдугҹа ваҹибдирa (Сүлејманын мәсәлләри 18:22). Бундан әлавә, сечдијимиз дост-танышлар, тәһсил, иш вә һәтта әјләнҹә белә руһанилијимизә вә демәли, әбәди рифаһымыза ваҹиб, бә’зән дә һәлледиҹи тә’сир ҝөстәрир (Ромалылара 13:13, 14; Ефеслиләрә 5:3, 4).

4. а) Бизим үчүн һансы габилијјәт олдугҹа ваҹибдир? б) Һансы суаллары нәзәрдән кечирмәлијик?

⁴ Бүтүн бу гәрарлары гәбул етмәк үчүн, әлбәттә ки, биз јахшыны писдән, јахуд садәҹә олараг јахшы ҝөрүнәни вә һәгигәтән дә јахшы оланы ајырд етмәји баҹармалыјыг. Мүгәддәс Китаб хәбәрдар едир: “Јол вар ки, инсанын гаршысында дүз ҝөрүнүр, амма сону өлүмдүр” (Сүлејманын мәсәлләри 14:12, МКШ). Буна ҝөрә дә биздә белә суаллар јарана биләр: Јахшыны писдән ајырд етмәји неҹә өјрәнә биләрик? Гәрар гәбул етмәли олдугда рәһбәрлији һарада ахтармалыјыг? Инсанлар кечмишдә вә мүасир дөврдә неҹә давранырдылар вә бу нә илә нәтиҹәләнирди?

Дүнјанын “фәлсәфәси вә бош һијләси”

5. Илк мәсиһчиләр неҹә дүнјада јашајырдылар?

⁵ Биринҹи әсрин мәсиһчиләри, јунан-рома дәјәрләринин вә идеалларынын һөкм сүрдүјү дүнјада јашајырдылар. Бир тәрәфдән, ромалыларын һәјат тәрзинә бир чохларында һәсәд һисси ојадан раһатлыг вә ҹаһ-ҹалал мәхсус иди. Диҝәр тәрәфдән исә, әгли даирәләри јалныз Платон вә Аристотелин дејил, еләҹә дә јени ҹәрәјанларын — епикурчуларын вә стоистләрин фәлсәфи нөгтеји-нәзәрләри һәјәҹана ҝәтирирди. Һәвари Павел өзүнүн икинҹи миссионер сәјаһәти заманы Афинаја ҝәләндә, ону “бошбоғаз” адландыран вә өзләрини ондан үстүн тутан епикурчу вә стоист философлары онунла мүбаһисә етмәјә башладылар (Һәвариләрин ишләри 17:18).

6. а) Биринҹи әсрдә мәсиһчиләрин бә’зиләрини ҹәлб едән нә иди? б) Павел нә барәдә хәбәрдарлыг едирди?

⁶ Илк мәсиһчиләрдән бә’зиләрини, онлары әһатә едән инсанларын ловға давранышлары вә һәјат тәрзләринин өзүнә ҹәлб етмәсинин сәбәбини анламаг чәтин дејил (2 Тимотејә 4:10). Һәмин ҹәмијјәтә мәхсус олан кәсләр, бу ҹәмијјәтин тәгдим етдији бүтүн не’мәтләрдән вә имтијазлардан истифадә едирдиләр, онлар тәрәфиндән гәбул олунан гәрарлар исә, ҝуја тамамилә дүзҝүн иди. Елә ҝәлирди ки, ҝуја дүнја, Аллаһа һәср олунмуш мәсиһчиләрин һәјатында олмајан дәјәрли шејләри тәгдим едә биләрди. Лакин һәвари Павел хәбәрдарлыг едирди: “Гардашлар, диггәтли олун ки, Мәсиһә дејил, инсан ән’әнәсинә, дүнјанын ибтидаи гүввәтләринә әсасланараг, фәлсәфә вә бош һијлә илә кимсә сизи әсир алмасын” (Колослулара 2:8). Павел бу сөзләри нәјә ҝөрә дејирди?

7. Әслиндә дүнјанын мүдриклији нә дәрәҹәдә гијмәтлидир?

⁷ Павел бу хәбәрдарлығы, дүнја тәрәфиндән ҹәлб олунан инсанларын дүшүнҹәләриндә ҝизләнән тәһлүкәни дәрк етдији үчүн јазмышды. Онун “фәлсәфә вә бош һијлә” ифадәләрини истифадә етмәси хүсусилә диггәтә лајигдир. “Фәлсәфә” сөзү һәрфи мә’нада “мүдриклијә мәһәббәт вә сә’ј ҝөстәрмәк” демәкдир. Бу хүсусијјәтләр өзлүјүндә фајдалы ола биләр. Мүгәддәс Китаб, хүсусилә дә “Сүлејманын мәсәлләри” китабында, дәгиг билији вә һикмәти ахтармаға тәшвиг едир (Сүлејманын мәсәлләри 1:1—7; 3:13—18). Амма Павел “фәлсәфәни” “бош һијләләрлә” бир араја ҝәтирди. Башга сөзләрлә десәк, Павел дүнјанын мүдриклијини бош вә алдадыҹы санырды. Бу мүдриклик әсасы олан бир шеј кими тәәссүрат бағышласа да, үфүрүлмүш шар кими, дахили бош иди. Әлбәттә ки, дүнјанын “фәлсәфәси вә бош һијләси” кими гејри-реал бир шејә ҝүвәнәрәк јахшыны писдән ајырд етмәк ағылсызлыг, һәтта тәһлүкәли оларды.

“Писә јахшы вә јахшыја пис дејәнләр”

8. а) Мәсләһәт үчүн инсанлар кимләрә мүраҹиәт едирләр? б) Инсанлар һансы мәсләһәтләри алырлар?

⁸ Буҝүнкү вәзијјәт һеч дә фәргли дејил. Експертләрин чоху, демәк олар ки, инсан һәјатынын бүтүн саһәсинә тохунан суалларла мәшғулдурлар. Чохсајлы мүтәхәссисләр — аилә вә никаһ саһәсиндә мәсләһәтчиләр, иҹмалчылар, јаланчы психологлар, мүнәҹҹимләр, спиритизмлә мәшғул оланлар вә башгалары — пул алдыгдан сонра бөјүк мәмнунијјәтлә мәсләһәт верирләр. Бәс бу мәсләһәтләр бир фајда верирми? Бу ҹүр мәсләһәтләр чох вахт Мүгәддәс Китабын әхлаг нормаларыны арха плана салыб, әвәзиндә “јени әхлаг” тәгдим едир. Мәсәлән, Канаданын “Глоб енд мејл” гәзетиндә һакимијјәтин, “ејни ҹинсә аид олан кәсләрин” никаһыны гејдә алмамасы барәдә нәшр олунмуш бир мәгаләдә дејилирди: “Бир-бирләринә мәһәббәт вә сәдагәт бәсләјән кәсләр тәсадүф нәтиҹәсиндә ејни ҹинсә мәхсус олдуглары үчүн, онларын ән истәкли арзуларыны 2000-ҹи илдә һәјата кечирмәкдән имтина етмәк ҹәфәнҝијат сајылыр”. Инсанлар бу ҝүн һәр шејә јол верир вә һеч нәји мүһакимә етмирләр. Һәр шеј нисби сајылыр; мүтләг јахшылыг вә пислик һаггында анлајыш артыг мөвҹуд дејил (Мәзмур 10:3, 4).

9. Ҹәмијјәтдә һөрмәт саһиби олан инсанлар чох вахт неҹә давранырлар?

⁹ Башгалары исә гәрар гәбул едәркән, иҹтимаи вә мадди ҹәһәтдән мүвәффәгијјәтә наил олан — зәнҝин вә танынмыш кәсләри тәглид едирләр. Бу ҹүр адамлар мүасир ҹәмијјәтдә бөјүк һөрмәт саһиби олсалар да, дүзлүк вә е’тибар кими хејирхаһ әмәлләри чох вахт јалныз сөздә әкс етдирирләр. Чохлары һакимијјәт вә газанҹ далынҹа гачаркән, виҹдан әзабы чәкмәдән мүхтәлиф һијләләрә әл атыр вә әхлаг нормаларыны тапдалајырлар. Бә’зиләри, шан-шөһрәтә вә мәшһурлуға ҹан атараг, сабит дәјәрләрә вә нормалара дүшүнҹәсиз тәрздә е’тинасыз јанашыр, чох гәрибә вә рүсвајчы давранышы үстүн тутурлар. Нәтиҹәдә ҹәмијјәт јалныз өз мәнфәәтини ҝүдмәјә башлајыр, сәһләнкарлыға јол верир вә белә ҹәмијјәтдә өзбашыналыг гануну һөкм сүрмәјә башлајыр. Сөһбәт нәјин јахшы вә пис олдуғундан дүшәндә инсанларын өзләрини чашгын вә аҹиз һисс етмәләринә тәәҹҹүбләнмәк лазымдырмы? (Лука 6:39).

10. Ишајанын јахшылыг вә пислик барәдә дедији сөзләрин дүзҝүн олдуғуну нә сүбут едир?

¹⁰ Һәр тәрәфдән, јанлыш рәһбәрлик әсасында гәбул едилән дүшүнҹәсиз гәрарларын зәрәрли нәтиҹәләрини ҝөрүрүк: позулмуш никаһлар, бәдбәхт аиләләр, наркотикләрдән вә спиртли ичкиләрдән суи-истифадә, идарәолунмаз јенијетмәләрин гулдур дәстәләри, ҹинси әхлагсызлыг, ҹинси јол илә кечән хәстәликләр — бунлар јалныз бә’зи нүмунәләрдир. Доғрусу, нәјин јахшы вә нәјин пис олдуғу барәдә сөһбәт дүшәндә инсанлар бүтүн нормалары вә бир-бирләрини анламагда онлара көмәк едә биләҹәк дәјәрләри унудурларса, башга нәтиҹә ҝөзләмәк олармы? (Ромалылара 1:28—32). Бу вәзијјәт дәгиглији илә, Ишаја пејғәмбәрин сөзләринә мүвафигдир: “Писә јахшы вә јахшыја пис дејәнләрин; гаранлығы ишыг јеринә вә ишығы гаранлыг јеринә гојанларын; аҹыны ширин јеринә вә ширини аҹы јеринә гојанларын вај башына! Өз ҝөзләриндә һикмәтли оланларын вә өзләрини ағыллы ҝөрәнләрин вај башына!” (Ишаја 5:20, 21).

11. Нәјин јахшы вә нәјин пис олдуғуну гәрара аларкән инсанын өзүнә ҝүвәнмәси нәјә ҝөрә һикмәтли давраныш дејил?

¹¹ Аллаһ, “өз ҝөзләриндә һикмәтли олан” јәһудиләри мәс’улијјәтә ҹәлб етдији үчүн, нәјин јахшы вә нәјин пис олдуғуну гәрара аларкән өзүмүзә ҝүвәнмәмәк бизим үчүн даһа чох ваҹибдир. Бу ҝүн инсанларын чоху, “үрәјинин сәсинә гулаг ас” вә “өзүн билдијин кими давран” мәсләһәтинә риајәт едир. Бу һикмәтли давранышдырмы? Мүгәддәс Китабын ҝөстәрдији кими, јох. Ахы Мүгәддәс Китаб: “Үрәк һәр шејдән зијадә алдадыҹыдыр вә чох чүрүкдүр; ону ким анлаја биләр?” дејир (Јеремја 17:9). Гәрар гәбул едәркән мәҝәр сиз алдадыҹы вә “чүрүк” адамын мәсләһәтинә риајәт едәрдинизми? Әлбәттә ки, јох. Даһа доғрусу, бу ҹүр адамы динләјәрәк, онун дедикләринин әксинә давранардыныз. Елә буна ҝөрә дә, Мүгәддәс Китаб бизә хатырладыр: “Өз ағлына ҝүвәнән ахмаг олар, һикмәтлә ҝәзиб-доланан гуртулар” (Сүлејманын мәсәлләри 3:5—7; 28:26, МКШ).

Ҝәлин Аллаһа мәгбул олан шејләри өјрәнәк

12. Биз “Аллаһын ирадәсини” нә үчүн дәрк етмәлијик?

¹² Нәјин јахшы вә нәјин пис олдуғуну гәрара аларкән нә дүнјанын мүдриклијинә, нә дә өзүмүзә ҝүвәнмәли дејиликсә бәс онда нә етмәлијик? Һәвари Павелин тамамилә ајдын сурәтдә вердији мәсләһәтинә гулаг асаг: “Бу зәманәјә ујғунлашмајын, анҹаг Аллаһын јахшы, мәгбул вә камил ирадәсинин нә олдуғуну дәрк етмәк үчүн ағлынызын јениләнмәси илә көкүндән дәјишин” (Ромалылара 12:2). Биз Аллаһын ирадәсини нә үчүн дәрк етмәлијик? Буну етмәјин ајдын вә тутарлы сәбәбини Јегова Мүгәддәс Китабда ҝөстәрир: “Ҝөјләр неҹә јердән јүксәкдирсә, јолларым сизин јолларыныздан вә дүшүнҹәләрим сизин дүшүнҹәләриниздән елә јүксәкдир” (Ишаја 55:9). Буна ҝөрә дә, сағлам дүшүнҹә вә ја һиссләримизә ҝүвәнмәк әвәзинә, ҝәлин “Рәббә нәјин мәгбул олдуғуну өјрәнмәјә” чалышаг (Ефеслиләрә 5:10).

13. Исанын Јәһја 17:3 ајәсиндәки сөзләри, Аллаһа мәгбул олан шејләри дәрк етмәјин зәрурилијини неҹә гејд едир?

¹³ Иса Мәсиһ бунун зәрурилијини: “Әбәди һәјат о демәкдир ки, Сәни, ваһид һәгиги Аллаһы вә ҝөндәрдијин Иса Мәсиһи танысынлар [“дәрк етсинләр”, ЈД]”, дејәркән ҝөстәрди (Јәһја 17:3). Бурада “дәрк етмәк” кими тәрҹүмә олунан ифадә, “танымаг” сөзүндән даһа дәрин мә’на дашыјыр. Вајнын лүғәтиндә дејилдији кими, “дәрк етмәк” ифадәси, “дәрк едәнлә дәрк олунан објект арасындакы гаршылыглы мүнасибәтин мөвҹуд олдуғуну ҝөстәрир: [бу ифадә], дәрк олунан објектин, ону дәрк едәнин ҝөзүндә дәјәрли вә ја ваҹиб олдуғуна ишарә едир” (“Vine’s Expository Dictionary”). Бир адамла гаршылыглы мүнасибәтдә олмаг, садәҹә онун кимлијини вә адыны билмәкдән даһа артыг мә’на дашыјыр. Һәмчинин һәмин адамын нәји хошлајыб хошламадығыны, нәји гијмәтләндирдијини, һансы принсипләр әсасында јашадығыны билмәк вә бу принсипләрә һөрмәт етмәк лазымдыр (1 Јәһја 2:3; 4:8).

Дәркетмә габилијјәтимизи инкишаф етдирәк

14. Павелин сөзләринә ҝөрә, руһән көрпә оланларла јеткин инсанлар арасындакы фәрг нәдән ибарәтдир?

¹⁴ Јахшыны писдән ајырд етмәји неҹә өјрәнмәк олар? Бу суалын ҹавабыны, Павелин I әсрдә јашајан јәһуди мәсиһчиләринә үнванладығы сөзләрдән тапмаг олар. О јазмышды: “Сүдлә бәсләнән һәр кәс салеһлик һаггындакы кәламда тәҹрүбәсиздир; чүнки о, көрпә ушагдыр. Гүввәтли јемәк исә, дәркетмә габилијјәтләрини тәтбиг етмәк васитәсилә јахшыны писдән ајырд етмәјә алышдыран јеткинләр үчүн тә’јин олунуб”. Бурада Павел, әввәлки ајәдә “Аллаһын сөзләринин ибтидаи гајдалары” кими тәсвир етдији “сүд” сөзүнү, “дәркетмә габилијјәтләрини тәтбиг етмәк васитәсилә јахшыны писдән ајырд етмәјә алышдыран јеткинләр үчүн” тә’јин олунан “гүввәтли јемәк” илә мүгајисә етди (Ибраниләрә 5:12—14, ЈД).

15. Аллаһ һаггында дәгиг билик алмаг үчүн нәјә ҝөрә ҹәһдлә чалышмаг лазымдыр?

¹⁵ Демәли, Аллаһын Кәламы олан Мүгәддәс Китабдакы нормалары дәгиг дәрк етмәк үчүн, һәр шејдән әввәл ҹәһдлә чалышмалыјыг. Аллаһын Кәламында, бизә нәјин ҹаиз олуб-олмадығыны мүәјјән едән гајда-ганунлар сијаһысы тапаҹағымыза үмид етмирик. Мүгәддәс Китаб белә китаб дејил. Павел изаһ едирди: “Һәр Мүгәддәс Јазы, Аллаһдан илһам алмыш вә тә’лим, тәкзиб, ислаһ, салеһлик тәрбијәси үчүн фајдалыдыр ки, Аллаһ бәндәси камил [“һәр шејдә тәҹрүбәли”, ЈД] олуб, һәр ҹүр хејирли иш үчүн тәҹһиз едилсин” (2 Тимотејә 3:16, 17). Тә’лим, тәкзиб вә ислаһ олунмагдан фајда алмағымыз үчүн фикирләшмәк вә дәриндән дүшүнмәк лазымдыр. Бу, сә’ј тәләб едир, амма әлдә едилән нәтиҹә буна дәјәр: биз “һәр шејдә тәҹрүбәли” олаҹаг вә “һәр хејирли иш үчүн тәҹһиз” едиләҹәјик (Сүлејманын мәсәлләри 2:3—6).

16. “Дәркетмә габилијјәтини инкишаф етдирмәк” нә демәкдир?

¹⁶ Бундан әлавә, Павелин ҝөстәрдији кими, јеткин инсанлар “дәркетмә габилијјәтләрини... јахшыны писдән ајырд етмәјә алышдырыблар”. Биз, мүзакирә едилән суалын әсас мәтләбинә чатдыг. “Дәркетмә габилијјәтләрини... алышдырыблар” ифадәси һәрфи мә’нада “ҝимнаст кими, һиссетмә органларыны алышдырыблар” демәкдир (“Kingdom Interlinear Translation”). Тәҹрүбәли ҝимнаст мүәјјән аләтдә — һалгаларда вә ја дирәк үзәриндә бир ојун иҹра едәндә, санки үмумдүнја ҹазибә гүввәсинә, јахуд тәбиәтин диҝәр ганунларына зидд ҝөрүнән чох ҹәлд һәрәкәтләр едә билир. О һәмишә өз бәдәнини бүтүнлүклә идарә едир вә ојуну мүвәффәгијјәтлә баша чатдырмаг үчүн јеринә јетирилмәси лазым ҝәлән һәрәкәтләри, демәк олар ки, гејри-иради олараг һисс едир. Бүтүн бунлар, фасиләсиз мәшгләрин нәтиҹәсидир.

17. Биз һансы мә’нада ҝимнастлара бәнзәмәлијик?

¹⁷ Әҝәр гәрарларымызын вә сечимимизин һәмишә мүдрик олмасыны истәјириксә, ҝимнаст кими, һиссләримизи руһани мә’нада алышдырмыш олмалыјыг. Һиссләримизи вә бәдәнимизи даима бүтүнлүклә идарә етмәлијик (Матта 5:29, 30; Колослулара 3:5—10). Мисал үчүн, ҝөзләринизи әхлагсызлыға бахмамаға, гулагларынызы исә налајиг маһны вә сөһбәтләри ешитмәмәјә өјрәдирсинизми? Доғрудур, бу кими шејләр бизи һәр тәрәфдән әһатә едир. Лакин онларын үрәјимиздә вә зеһнимиздә көк салмасына јол вериб вермәмәји өзүмүз сечмәлијик. Биз мәзмурчуну тәглид едә биләрик. О дејирди: “Алчаг шеји ҝөзүмүн өнүнә гојмарам; позғунларын ишиндән мән нифрәт ејләрәм; о мәнә јапышмаз... јалан сөјләјән, ҝөзләримин өнүндә дурмајаҹагдыр” (Мәзмур 101:3, 7).

Өјрәндикләринизи тәтбиг етмәклә дәркетмә габилијјәтинизи инкишаф етдирин

18. Дәркетмә габилијјәтини инкишаф етдирмәји изаһ едәркән Павелин ишләтдији “тәтбиг етмәк васитәсилә” ифадәси алтында нә нәзәрдә тутулур?

¹⁸ Ҝәлин јадда сахлајаг ки, дәркетмә габилијјәтимизи “тәтбиг етмәк васитәсилә” јахшыны писдән ајырд етмәјә алышдыра биләрик. Башга сөзләрлә десәк, һәр дәфә бир гәрар гәбул етмәк лазым ҝәләндә, бу мәсәләдә Мүгәддәс Китабын һансы принсипләринә тохунулдуғуну вә онлары неҹә тәтбиг едәҹәјимизи ајдынлашдырмағы өјрәнмәлијик. Сизә лазым олан мә’луматлары, “садиг вә ағыллы гул” васитәсилә тәгдим олунан әдәбијјатларын көмәјилә тапмағы вәрдиш един (Матта 24:45). Сөзсүз ки, көмәк үчүн јеткин мәсиһчиләрә мүраҹиәт етмәк олар. Бунунла белә, Јегованын Кәламыны тәдгиг етмәк үчүн ҝөстәрдијимиз сә’ј, Онун рәһбәрлији вә руһу барәдә етдијимиз дуалар, нәһајәтдә бол-бол сәмәрә верәҹәкдир (Ефеслиләрә 3:14—19).

19. Дәркетмә габилијјәтимизи тәдриҹән инкишаф етдирәриксә, һансы хејир-дуалары алаҹағыг?

¹⁹ Дәркетмә габилијјәтимизи тәдриҹән инкишаф етдирдикҹә чалышмалыјыг ки, “инсанларын кәләкбазлығы илә, бизи јолдан чыхармаг үчүн һазырладыглары һијләләрлә, һәр ҹүр тә’лимин күләји илә чалхаланан вә ора-бура сүрүкләнән көрпә ушаглар олмајаг” (Ефеслиләрә 4:14). Малик олдуғумуз биликләрә вә Аллаһын ирадәси барәдә олан анлајышымыза әсасланараг, һәм бөјүк, һәм дә кичик ишләрдә бизә фајда ҝәтирәҹәк, һәмиманлыларымызы мөһкәмләндирәҹәк, ән ваҹиби исә, сәмави Атамызын гәлбини севиндирәҹәк мүдрик гәрарлар гәбул едә биләрик (Сүлејманын мәсәлләри 27:11). Бу доғрудан да бөјүк хејир-дуа, чәтин анларымызда исә мүдафиәдир!

[Һашијә]

Изаһ едә биләрсинизми?

• Мүдрик гәрарлар гәбул етмәк үчүн нә лазымдыр?

• Нәјин јахшы вә нәјин пис олдуғуну гәрара аларкән, дүнјанын мәшһур адамларыны тәглид етмәк вә өз һиссләримизә ҝүвәнмәк нә үчүн һикмәтли давраныш дејил?

• Гәрарлар гәбул едәркән Аллаһа нәјин мәгбул олдуғуну нә үчүн дәгиг билмәлијик вә буну неҹә өјрәнә биләрик?

• “Дәркетмә габилијјәтләрини... алышдырмаг” нә демәкдир?

[20-ҹи сәһифәдәки шәкил]

Зәнҝин вә мәшһур инсанлардан рәһбәрлик ҝөзләмәк фајдасыздыр.

[22-ҹи сәһифәдәки шәкил]

Ҝимнаст кими һиссләримизи вә бәдәнимизи бүтүнлүклә идарә етмәлијик.