Будур, Јеһованын үрәји истәјән Гул!

«Будур... үрәјим истәјән... гулум!» (ЈЕШАЈА 42:1).

1. Јеһованын халгы, хүсусилә дә Хатирә Ҝеҹәси әрәфәсиндә нә етмәјә тәшвиг олунур вә нә үчүн?

МӘСИҺИН өлүмүнүн Хатирә Ҝеҹәси јахынлашдығы әрәфәдә Аллаһын халгы Павелин: «Иманымызын Баниси вә Камилләшдириҹиси олан Исаја бахаг» мәсләһәтинә әмәл етмәјә тәшвиг олунур. О әлавә едир: «Ҝүнаһкарлар тәрәфиндән Она гаршы олан бу гәдәр мүхалифәтә таб ҝәтирән Шәхси фикирләшин ки, ҹаныныз јорулуб, тагәтдән дүшмәјәсиниз» (Ибр. 12:2, 3). Диггәтимизи ән јүксәк зирвәси фидијә гурбанлығы олан Мәсиһин садиглик нүмунәсинә јөнәлтмәк мәсһ олунмушлара вә диҝәр гојунлара Јеһоваја даима садиг галмаға вә ‘тагәтдән дүшмәмәјә’ көмәк едәҹәк. (Галатијалылара 6:9 ајәси илә мүгајисә ет.)

2. Јешајанын Аллаһын Оғлу барәдә јаздығы пејғәмбәрликләрдән нә өјрәнә биләрик?

² Јеһова Јешаја пејғәмбәри Оғлу барәдә бир сыра пејғәмбәрликләр јазмаға илһамландырмышды. Бу пејғәмбәрликләр бизә ‘иманымызын Баниси вә Камилләшдириҹиси олан Исаја бахмаға’, јәни диггәтимизи она јөнәлтмәјә көмәк едәҹәкa. Онлардан Исанын хүсусијјәтләри, изтираблары барәдә, һәмчинин онун Падшаһ вә Сатыналан кими неҹә уҹалдығыны өјрәнирик. Һәмин пејғәмбәрликләр бу ил ҹүмә ахшамы апрелин 9-да ҝүнбатандан сонра гејд едәҹәјимиз Хатирә Ҝеҹәсинин мәғзини даһа дәриндән баша дүшмәјимизә көмәк едир.

Гулун кимлији мүәјјән едилир

3, 4. а) «Јешаја» китабында «гул» сөзү кимләрә аиддир? б) «Јешаја» китабынын 42, 49, 50, 52 вә 53-ҹү фәсилләриндә бәһс едилән Гулун ким олдуғуну Мүгәддәс Китаб өзү неҹә ачыглајыр?

³ Јешајанын китабында «гул» сөзүнә дәфәләрлә раст ҝәлинир. Бәзән бу сөзүн алтында пејғәмбәрин өзү нәзәрдә тутулур (Јешаја 20:3; 44:26). Бәзән исә бүтүн Исраил халгы, јәни Јагуб нәзәрдә тутулур (Јешаја 41:8, 9; 44:1, 2, 21). Бәс «Јешаја» китабынын 42, 49, 50, 52 вә 53-ҹү фәсилләриндәки Гул һаггында мөһтәшәм пејғәмбәрликләр кимә аиддир? Јунанҹа Мүгәддәс Јазылар бу фәсилләрдә бәһс едилән Јеһованын Гулунун ким олдуғуну ајдын ҝөстәрир. Мараглыдыр ки, мүгәддәс руһ мүждәчи Филипи «Һәвариләрин ишләри» китабында хатырланан һәбәшистанлы хадимин јанына ҝөндәрәндә о бу пејғәмбәрликләрдән бирини охујурду. Мүгәддәс Китабларымызда Јешаја 53:7, 8 ајәләриндә олан сөзләри охујан хадим Филипдән сорушду: «Сәндән риҹа едирәм, де ҝөрүм, пејғәмбәр буну кимин үчүн сөјләјир? Өзү үчүн, јохса башгасы үчүн?» Филип дәрһал изаһ етди ки, Јешаја бурада Мәсиһ Иса һаггында данышыр (Һәв. иш. 8:26-35).

⁴ Иса һәлә көрпә икән Шимон адында салеһ бир адам руһ тәрәфиндән илһамланараг, Јешаја 42:6 вә 49:6 ајәләриндә пејғәмбәрлик едилдији кими, ‘Көрпә Исанын милләтләри ајдынладаҹаг ишыг’ олаҹағыны бәјан етди (Лука 2:25-32). Үстәлик, Иса сынаға чәкилән ҝеҹә онун неҹә алчалдылаҹағы һагда Јешаја 50:6-9 ајәләриндә габагҹадан хәбәр верилмишди (Мат. 26:67; Лука 22:63). Ерамызын 33-ҹү илинин Пентикост ҝүнүндән сонра һәвари Петер Исанын Јеһованын «Гулу» олдуғуну ачыг-ајдын ҝөстәрди. (Јешаја 52:13; 53:11; Һәвариләрин ишләри 3:13, 26 ајәләрини оху.) Мәсиһ һаггындакы бу пејғәмбәрликләрдән нә өјрәнирик?

Јеһова Өз Гулуна тәлим верир

5. Гул һансы тәлими алыб?

⁵ Јешајанын Аллаһын Гулу һаггындакы пејғәмбәрликләриндән бири ваһид Оғул јер үзүнә ҝәлмәздән өнҹә Атасы илә араларындакы јахын мүнасибәтләр һаггында бизә мәлумат верир. (Јешаја 50:4-9 ајәләрини оху.) Гулун өзү Јеһованын ону өјрәтдијини ҝөстәрәрәк дејир: «О... гулағымы ојадыр ки, савадлы адамлар [«шаҝирдләр», КМ] кими динләјә билим» (Јешаја 50:4). Бүтүн бу вахт әрзиндә Јеһованын Гулу Атасына гулаг асыр вә Ондан өјрәнир, бунунла да итаәткар бир шаҝирд олур. Каинатын Јараданындан тәлим алмаг неҹә дә надир шәрәфдир!

6. Гул Атасына там итаәткар олдуғуну неҹә ҝөстәрди?

⁶ Бу пејғәмбәрликдә Гул Атасыны «Худавәнд Рәбб» адландырыр. Бу ҝөстәрир ки, Гул Јеһованын Каинатын Али Һөкмдары олдуғу кими ваҹиб һәгигәти гәбул едир. Гул: «Худавәнд Рәбб гулағымы ачды, мән гаршы дурмадым, ҝери чәкилмәдим» сөзләрилә Атасына там итаәт етдијини ҝөстәрир (Јешаја 50:5). Јеһова Каинаты вә инсаны јараданда о, Јараданын јанында «маһир уста» (ЈД) кими фәалијјәт ҝөстәрирди. «Маһир уста» ‘һәр ҝүн фәрәһләнирди, [Јеһованын] һүзурунда һәмишә севинирди. Јаратдығы аләмә ҝөрә севинирди, бәшәр өвладларына ҝөрә фәрәһләнирди’ (Сүл. мәс. 8:22-31).

7. Нәдән ҝөрүнүр ки, Гул сынагларла үзләшәндә Атасынын ону дәстәкләдијинә әмин иди?

⁷ Гулун алдығы бу тәлим вә бәшәријјәтә бәсләдији мәһәббәт ону јер үзүндә гаршылашдығы чәтин сынаглара һазырламышды. Шиддәтли тәгибләрә бахмајараг, о бурада да Атасынын ирадәсини јеринә јетирмәкдән севинҹ дујурду (Мәз. 40:8; Мат. 26:42; Јәһ. 6:38). Јер үзүндә сынагларла үзләшдији мүддәт әрзиндә Иса әмин иди ки, Атасы ондан разыдыр вә ону дәстәкләјир. Иса Јешајанын пејғәмбәрлијиндәки кими дејә билди: «Мәнә һагг газандыран јахындадыр. Мәнимлә ким мүбаһисә етмәк истәјир?.. Мәнә көмәк едән Худавәнд Рәбдир» (Јешаја 50:8, 9). Јеһова, Јешајанын башга бир пејғәмбәрлијиндә ҝөстәрилдији кими, садиг Гулу јер үзүндә хидмәт едән заман она һәгигәтән дә көмәк едирди.

Гулун јер үзүндәки хидмәти

8. Јешаја 42:1 ајәсиндә һаггында пејғәмбәрлик едилән Јеһованын ‘сечилмиш гулунун’ Иса олдуғуну нә сүбут едир?

⁸ Ерамызын 29-ҹу илиндә Иса вәфтиз олунан заман нә баш вердији һагда Мүгәддәс Китабда дејилир: «Мүгәддәс Руһ... Онун үзәринә енди вә ҝөјдән: “Сән Мәним севимли Оғлумсан, Сәндән чох мәмнунам”, — дејән бир сәс ҝәлди» (Лука 3:21, 22). Белә етмәклә Јеһова Јешајанын пејғәмбәрлијиндә хатырланан ‘сечилмиш гулунун’ ким олдуғуну ајдын ҝөстәрди. (Јешаја 42:1-7 ајәләрини оху.) Јер үзүндәки хидмәти әрзиндә Иса бу пејғәмбәрлији мөһтәшәм шәкилдә јеринә јетирди. Матта өз Мүждәсиндә Јешаја 42:1-4 ајәләрини ситат ҝәтириб Исаја тәтбиг едир (Мат. 12:15-21).

9, 10. а) Иса хидмәти заманы Јешаја 42:3 ајәсиндәки пејғәмбәрлији неҹә јеринә јетирди? б) Мәсиһ јер үзүндә оланда әдаләти неҹә јајырды вә о нә заман ‘јер үзүндә әдаләти гураҹаг’?

⁹ Јәһуди дин рәһбәрләри өз халгындан олан ади инсанлары алчалдырдылар (Јәһ. 7:47-49). Онларла кобуд рәфтар етдикләри үчүн һәмин инсанлары ‘әзилмиш гамыша’ вә ‘көзәрән пилтәјә’ бәнзәтмәк оларды. Лакин Иса касыблара вә мәзлумлара шәфгәтлә јанашырды (Мат. 9:35, 36). Онлары мәһәббәтлә дәвәт едирди: «Еј бүтүн јорғунлар вә јүкләри ағыр оланлар, Мәним јаныма ҝәлин вә Мән сизә раһатлыг верәрәм» (Мат. 11:28). Үстәлик, Иса Јеһованын јахшыја вә писә даир нормалары һагда өјрәтмәклә ‘әдаләти јајырды’ (Јешаја 42:3). О, һәмчинин ҝөстәрди ки, Аллаһын Гануну дәрракә вә мәрһәмәтлә тәтбиг олунмалыдыр (Мат. 23:23). Иса ајры-сечкилик етмәдән һәм варлылара, һәм дә касыблара тәблиғ етмәклә әдаләт тәзаһүр етдирирди (Мат. 11:5; Лука 18:18-2).

¹⁰ Јешајанын пејғәмбәрлијиндә һәм дә дејилир ки, Јеһованын ‘сечилмиши’ ‘јер үзүндә әдаләти гураҹаг’ (Јешаја 42:4). О, Аллаһын Падшаһлығынын Падшаһы кими, бүтүн инсан һөкумәтләрини мәһв едиб өз әдаләтли рәһбәрлији илә әвәз едәндә бу пејғәмбәрлији тез бир заманда јеринә јетирәҹәк. О, ‘салеһлијин өмүр сүрәҹәји’ јени бир дүнја јарадаҹаг (2 Пет. 3:13; Дан. 2:44).

«Нур» вә «әһд»

11. Иса һансы мәнада биринҹи әсрдә «милләтләрә нур» иди вә о, милләтләрә бу ҝүн неҹә нур сачыр?

¹¹ Иса, Јешаја 42:6 ајәсиндә дејилдији кими, һәгигәтән дә «милләтләрә нур» олду. Јерүзү хидмәти заманы о, әсас етибарилә јәһудиләрә руһани нур сачырды (Мат. 15:24; Һәв. иш. 3:26). Амма о демишди: «Мән дүнјанын Нурујам» (Јәһ. 8:12). О, јалныз јәһудиләри вә диҝәр халглары руһән маарифләндирдијинә ҝөрә дејил, һәм дә өз камил инсан һәјатыны бүтүн бәшәријјәт уғрунда гурбан вердијинә ҝөрә нур иди (Мат. 20:28). Дирилдикдән сонра о, шаҝирдләринә «дүнјанын ән узаг јерләринә гәдәр» она шаһид олмағы тапшырды (Һәв. иш. 1:8). Хидмәт етдикләри мүддәтдә Павел вә Барнаба «милләтләрә нур» олмаг ифадәсини ситат ҝәтирәрәк гејри-јәһудиләр арасында иҹра етдикләри тәблиғ ишинә тәтбиг етдиләр. (Һәв. иш. 13:46-48; мүгајисә ет: Јешаја 42:6.) Бу иш һәлә дә давам едир, чүнки Исанын јер үзүндәки мәсһ олунмуш гардашлары вә онларын һәмкарлары инсанлара руһани нур чатдырыр вә «милләтләрә нур» олан Исаја иман ҝәтирмәјә көмәк едирләр.

12. Јеһова Өз Гулуну ‘халглар үчүн’ неҹә ‘әһд етди’?

¹² Һәмин пејғәмбәрликдә Јеһова сечилмиш Гулуна демишди: «Сәни горујаҹағам, сәни халгым үчүн әһд едәҹәјәм» (Јешаја 42:6). Шејтан Исаны вар ҝүҹү илә мәһв етмәјә вә јер үзүндәки хидмәтини сонадәк јеринә јетирмәсинә мане олмаг истәјирди, лакин өлүм вахты ҝәлинҹәјә гәдәр Јеһова ону горуду (Мат. 2:13; Јәһ. 7:30). Сонра Јеһова Исаны дирилтди вә ону јер үзүндәки халглар үчүн «әһд», јәни вәд етди. Бу мүгәддәс вәд әмин едир ки, Аллаһын садиг Гулу инсанлары руһани зүлмәтдән чыхарараг «милләтләрә нур» олмаға давам едәҹәк. (Јешаја 49:8, 9 ајәләрини оху.)b

13. Јерүзү хидмәти заманы Иса ‘зүлмәтдә отуранлары’ неҹә азад едирди вә о буну бу ҝүн неҹә едир?

¹³ Бу вәдә мүвафиг олараг Јеһованын сечилмиш Гулу ‘корларын ҝөзләрини ачаҹаг, зиндандан дустаглары, зүлмәтдә, һәбсханада отуранлары азад едәҹәкди’ (Јешаја 42:7). Иса буну јерүзү хидмәти заманы јалан дини әнәнәләри ифша етмәклә вә Падшаһлыг һаггында хош хәбәри тәблиғ етмәклә едирди (Мат. 15:3; Лука 8:1). Беләликлә дә о, сонралар онун шаҝирди олан јәһудиләри руһани зиндандан азад етди (Јәһ. 8:31, 32). Иса милјонларла гејри-јәһудиләрә дә руһани азадлыг бәхш етди. О, давамчыларына ‘ҝедиб, бүтүн халглары шаҝирди етмәји’ тапшырды вә ‘дөврүн сонуна гәдәр’ онларла олаҹағыны вәд етди (Мат. 28:19, 20). Һал-һазырда Иса Мәсиһ үмумдүнја тәблиғ ишинә ҝөјләрдән нәзарәт едир.

Јеһова Өз ‘Гулуну’ уҹалтды

14, 15. Јеһова Өз Гулуну неҹә вә нә үчүн уҹалтды?

¹⁴ Јеһова Гулу һаггында башга бир пејғәмбәрликдә дејир: «Будур, Мәним гулум уғур газанаҹаг, о јүксәлдиләҹәк, уҹалдылаҹаг, чох иззәтләнәҹәк» (Јешаја 52:13). Оғлу Онун али һөкмранлығына табе олдуғу вә ән шиддәтли сынаглар гаршысында садиг галдығы үчүн Јеһова ону уҹалтды.

¹⁵ Һәвари Петер демишдир: «Иса Мәсиһ ҝөјә галхыб, Аллаһын сағындадыр. Мәләкләр, һакимијјәт вә гүдрәт саһибләри дә Она табе едилдиләр» (1 Пет. 3:22). Буна бәнзәр сөзләри Павел дә јазмышдыр: «О Өз тәвазөкарлығыны ҝөстәрди вә өлүмәдәк, һәтта чармыха [«ишҝәнҹә дирәјинә», ЈД] чәкилмәклә өлүмәдәк итаәткарлыг етди. Буна ҝөрә дә Аллаһ Ону чох уҹалтды вә Она бүтүн адлардан үстүн олан ады бәхш етди ки, ҝөјдә, јердә вә јерин алтында оланларын һамысы Исанын адына һөрмәтлә диз чөксүн. Вә Ата Аллаһын иззәти үчүн һәр дил играр етсин ки, Иса Мәсиһ Рәббдир» (Филип. 2:8-11).

16. Иса 1914-ҹү илдә неҹә ‘чох иззәтләндирилди’ вә о вахтдан нәләри һәјата кечириб?

¹⁶ Јеһова 1914-ҹү илдә Исаны даһа да јүксәлтди. Јеһова Исаја Падшаһлыг тахты верәндә о, ‘чох иззәтләндирилди’ (Мәз. 2:6; Дан. 7:13, 14). О вахтдан Мәсиһ ‘дүшмәнләринин үзәриндә һөкмранлыг едир’ (Мәз. 110:2). Иса илк нөвбәдә Шејтаны вә онун ҹинләрини јерин һүдудларына атараг онлары мәғлубијјәтә уғратды (Вәһј 12:7-12). Сонра Мәсиһ, Бөјүк Кир кими давранараг, мәсһ олунмуш гардашларынын јер үзүндәки галығыны ‘Бөјүк Бабилин’ пәнҹәсиндән гуртарды (Вәһј 18:2; Јешаја 44:28). Үмумдүнја тәблиғ ишинә рәһбәрлик етмәси сајәсиндә онун руһани гардашларынын галығы, сонра исә ‘кичик сүрүнүн’ садиг һәмкарлары олан милјонларла ‘башга гојунлар’ јығылмаға башланды (Вәһј 12:17; Јәһ. 10:16; Лука 12:32).

17. Јешајанын «гул» һаггында пејғәмбәрлијиндән нә өјрәндик?

¹⁷ Шүбһәсиз ки, Јешајанын китабындакы мөһтәшәм пејғәмбәрликләри өјрәнмәк Падшаһымыз вә Сатыналанымыз олан Мәсиһә миннәтдарлығымызы даһа да артырды. Јерүзү хидмәти заманы онун бир оғул кими итаәткарлыг ҝөстәрмәси јерә ҝәлмәздән әввәл Атасынын јанында алдығы тәлими әкс етдирирди. Иса өз хидмәти вә индијәдәк тәблиғ ишинә рәһбәрлик етмәси илә «милләтләрә нур» олдуғуну ҝөстәрди. Нөвбәти мәгаләдән ҝөрәҹәјимиз кими, Аллаһын Гулу һаггындакы башга бир пејғәмбәрлик онун әзаб чәкәҹәјини вә өзүнү уғрумузда гурбан верәҹәјини ҝөстәрир. Бизә онун өлүмүнүн Хатирә Ҝеҹәси јахынлашдығы әрәфәдә бу һагда дәриндән ‘фикирләшмәк’ ҝәрәкдир (Ибр. 12:2, 3).

[Һашијәләр]

Тәкрар үчүн суаллар

• Јешајанын пејғәмбәрлијиндәки «гул» кимдир вә биз буну һарадан билирик?

• Јеһова Өз Гулуна һансы тәлими вериб?

• Нәјә ҝөрә Иса «милләтләрә нур» адланыр?

• Гул неҹә уҹалдылды?

[21-ҹи сәһифәдәки шәкил]

Јешајанын пејғәмбәрлијиндә бәһс едилән ‘гулун’ Мәсиһ Иса олдуғуну Филип ајдын ҝөстәрди

[23-ҹү сәһифәдәки шәкил]

Иса, Јеһованын сечилмиш Гулу кими, касыблара вә мәзлумлара шәфгәтлә јанашырды

[24-ҹү сәһифәдәки шәкил]

Атасы Исаны уҹалтды вә она Падшаһлыг тахты верди