Мәсиһи рәһбәриниз кими гәбул едирсинизми?
“Өзүнүзә “рәһбәр”... дедиртмәјин, чүнки Рәһбәриниз бирдир - Мәсиһдир” (МАТТА 23:10, ЈД).
1. Мәсиһчиләрин јеҝанә Рәһбәри кимдир?
НИСАН ајынын 11-и, чәршәнбә ахшамы иди. Үч ҝүндән сонра Исаны е’дам етмәли идиләр. Бу онун мә’бәдә сон ҝәлиши иди. Һәмин ҝүн Иса, ораја топлашан чохсајлы инсанлара вә шаҝирдләринә ваҹиб һәгигәти өјрәтди. О деди: “Өзүнүзә “Рабби” дедиртмәјин; чүнки сизин Мүәллиминиз бирдир, о да Мәсиһдир вә сиз һамыныз гардашсыныз. Јер үзүндә кимсәјә ата демәјин; чүнки Атаныз бирдир, сәмави Атадыр. Өзүнүзә “рәһбәр” дә дедиртмәјин, чүнки Рәһбәриниз бирдир - Мәсиһдир” (Матта 23:8-10, ЈД). Ајдындыр ки, Иса Мәсиһ мәсиһчиләрин Рәһбәридир.
2, 3. Јеһоваја табе олмағымыз вә Онун тә’јин етдији Рәһбәри гәбул етмәјимиз ҝүндәлик һәјатымызда неҹә әкс олунур?
2 Мәсиһин рәһбәрлијинә риајәт етмәк һәјатымыза чох ҝөзәл тә’сир едир! Јеһова Аллаһ бу Рәһбәрин ҝәлиши һаггында Ишаја пејғәмбәрин васитәсилә әввәлҹәдән демишдир: “Еј сизләр, һәр сусајан вә парасы олмајан, сулара ҝәлин; ҝәлин сатын алын вә јејин; ҝәлин дә, парасыз вә бәдәлсиз шәраб вә сүд алын. [...] Мәни јахшы динләјин вә јахшы олан шеји јејин вә јағлы шеј илә ҹаныныз ләззәт тапсын [...]. Будур, мән ону шаһид олараг милләтләрә, рәис [“рәһбәр”, ЈД] вә әмир олараг милләтләрә вердим” (Ишаја 55:1-4).
3 Ишаја һамыја таныш олан сују, сүдү вә шәрабы мәҹаз кими истифадә едәрәк, Јеһоваја вә Онун тә’јин етдији “рәһбәрә вә әмирә” табе олмағын ҝүндәлик һәјатымызда неҹә әкс олундуғуну ҝөстәрир. Бу, исти ҝүндә бир истәкан сәрин су кими, бизә сәринлик ҝәтирир, һәгигәтә вә салеһлијә олан јанғымызы сөндүрүр. Сүд көрпәләри гиданландырыб, бөјүмәләринә көмәк етдији кими, “сүдү андыран кәлам” да бизә гүввәт верир, руһани инкишафымызы тәнзимләјир вә Аллаһла олан мүнасибәтимизи мөһкәмләдир (1 Петер 2:1-3). Бајрам заманы шәрабын үрәјә севинҹ ҝәтирдијини ким инкар едәр? Ејни сөзү һәгиги Аллаһа хидмәт һаггында да демәк олар, чүнки бу хидмәт, Аллаһ тәрәфиндән тә’јин едилән Рәһбәрин изләри илә ҝедәркән үрәјимизи севиндирир (Тәснијә 16:15). Һәр биримизә - ҝәнҹләрә вә јашлылара, кишиләрә вә гадынлара - Мәсиһи Рәһбәримиз кими гәбул етдијимизи ҝүндәлик һәјатымызда ҝөстәрмәјимиз олдугҹа ваҹибдир. Бу ишдә бизә нә көмәк едә биләр?
Ҝәнҹлр, “һикмәтдә... тәрәгги” един
4. а) Иса 12 јашында оланда, Јерусәлимә Пасха бајрамына ҝедәркән нә баш верди? б) Ҹәми 12 јашы олан Иса һансы биликләрә малик иди?
4 Исанын ушаглығы һаггында мә’луматымыз аз олса да, нөвбәти епизоддан бу һагда нә исә өјрәнә биләрик. Исанын һәмин вәзијјәтдәки давранышы, ҝәнҹләрә ҝөзәл нүмунәдир. Иса 12 јашында оланда, валидејнләри ону өзләри илә Јерусәлимә, һәр ил гејд олунан Пасха бајрамына апардылар. Елә олду ки, Иса орада Мүгәддәс Јазылар барәдә сөһбәтә башлады, доғмалары исә евә онсуз гајытдыгларыны һисс етмәдиләр. Һәјәҹан ичиндә олан Јусиф вә Мәрјәм үч ҝүндән сонра ону мә’бәддә тапдылар. “О, мүәллимләрин арасында отуруб онлары динләјир, суаллар верирди”. Бундан әлавә, “Ону динләјәнләрин һамысы Онун зәкасына вә ҹавабларына тәәҹҹүбләнирдиләр”. Тәсәввүр един ки, Иса артыг 12 јашында икән руһани ҹәһәтдән дәрин мә’налы суаллар вермәклә бәрабәр, дәрракәли ҹаваблар вермәји дә баҹарырды! Шүбһәсиз ки, бу саһәдә она валидејнләринин тәрбијәси көмәк етмишди (Лука 2:41-50).
5. Ушаглар Мүгәддәс Китабын аиләви өјрәнмәсинә олан мүнасибәтләрини неҹә јохлаја биләрләр?
5 Ушаглар, әҝәр валидејнләриниз Аллаһын садиг хидмәтчиләридирләрсә, еһтимал ки, аиләниздә мүнтәзәм олараг Мүгәддәс Китабын аиләви өјрәнмәси кечирилир. Сиз буна неҹә мүнасибәт ҝөстәрирсиниз? Нә үчүн нөвбәти суаллар үзәриндә дүшүнмәјәсиниз: Мүгәддәс Китабын аиләви өјрәнмәсинә там үрәкдән көмәк едирәмми? Аиләдә тә’сис едилмиш гајда-ганунлары позмамаға чалышыраммы? (Филипилиләрә 3:16). Мүзакирәләрдә фәал иштирак едирәмми? Јери ҝәләндә, өјрәнилән материалы һәјатда неҹә тәтбиг етмәјә даир суаллар верирәмми? Руһән ирәлиләјәрәк, јеткинләр үчүн тә’јин едилән “гүввәтли јемәјә” иштаһа инкишаф етдирирәмми? (Ибраниләрә 5:13, 14).
6, 7. Мүгәддәс Китабын ҝүндәлик охунмасы ҝәнҹләрә һансы дәјәрли көмәји тәгдим едир?
6 Мүгәддәс Китабын ҝүндәлик охунмасы програмы да ваҹиб рол ојнајыр. Мәзмурчу охујурду: “Нә бәхтијардыр о адам ки... әхлагсызларын дәрнәјиндә отурмаз; анҹаг зөвгү Рәббин шәриәтиндәдир. Вә ҝеҹә-ҝүндүз онун шәриәтини дәрин дүшүнүр” (Мәзмур 1:1, 2). Мусанын вәрәсәси Јешу ҝеҹә-ҝүндүз Аллаһын ганунлары һаггында дүшүнүрдү. Бу, она мүдрик давранмаға вә Аллаһын вердији тапшырығы мүвәффәгијјәтлә јеринә јетирмәјә көмәк етди (Јешу 1:8). Рәһбәримиз Иса Мәсиһ демишдир: “Инсан јалныз чөрәклә јашамаз, лакин Аллаһын ағзындан чыхан һәр бир сөзлә јашар” (Матта 4:4). Әҝәр физики гидаја һәр ҝүн еһтијаҹ дујуругса, онда руһани ҹәһәтдән мүнтәзәм шәкилдә гидаланмаг нә гәдәр ваҹибдир!
7 Руһани тәләбатларыны дәрк едәрәк, Никол 13 јашында Мүгәддәс Китабы ҝүндәлик охумаға башладыa. Инди 16 јашында олан бу гыз, Мүгәддәс Китабы бүтүнлүклә охујуб гуртармыш вә икинҹи дәфә охумаға башлајараг, артыг јарыја чатмышдыр. Онун үсулу садәдир. Никол дејир: “Мән ҝүндә азы бир фәсил охумағы гәрара алдым”. Мүгәддәс Китабы бу тәрздә ҝүндәлик охумаг она неҹә көмәк едир? О ҹаваб верир: “Бу ҝүн пис тә’сирләр олдугҹа чохдур. Мәктәбдә иманым һәр ҝүн сынаға мә’руз галыр. Аллаһын Кәламыны ҝүндәлик охумағым, бу дүнјанын тәзјигинә мүгавимәт ҝөстәрмәјә тәшвиг едән Мүгәддәс Китабдакы әмр вә принсипләри дәрһал хатырламағыма көмәк едир. Бунунла да, өзүмү Јеһоваја вә Исаја јахын һисс едирәм”.
8. Иса синагога ҝетмәк адәтинә неҹә јанашырды вә ҝәнҹләр ону неҹә тәглид едә биләрләр?
8 Иса “адәти үзрә” синагогда Мүгәддәс Јазыларын охунмасыны динләјир вә иштирак едирди (Лука 4:16; Һәвариләрин ишләри 15:21). Бу, Мүгәддәс Китабын охунуб, тәдгиг едилдији јығынҹаг ҝөрүшләриндә мүнтәзәм олараг иштирак етмәк үчүн ҝәнҹләрин тәглид едәҹәкләри ҝөзәл нүмунәдир! 14 јашлы Ричард миннәтдарлыг һисси илә дејир: “Јығынҹаг ҝөрүшләри мәним үчүн чох гијмәтлидир. Орада нәјин јахшы, нәјин пис, нәјин әхлаги, нәјин әхлагсыз олдуғу даима хатырланыр вә һәмчинин бу вә ја диҝәр вәзијјәтләрдә Мәсиһин неҹә давранаҹағы гејд олунур. Өз сәһвләримдән ибрәт дәрси алмалы олмурам”. Бәли, “Рәббин шәһадәти [“хатырлатмасы”, ЈД] садигдир; тәҹрүбәсиз адама һикмәт верәр” (Мәзмур 19:7). Никол да һәр һәфтә кечирилән беш јығынҹаг ҝөрүшләринин һәр бириндә иштирак етмәји гәти гәрара алыб. О, јығынҹаглара һазырлашмаг үчүн ики-үч саат вахт сәрф едир (Ефеслиләрә 5:15, 16).
9. Ҝәнҹләр һикмәтдә неҹә тәрәгги едә биләрләр?
9 Ҝәнҹлик илләри - ваһид һәгиги Аллаһ вә Онун ҝөндәрдији Иса Мәсиһ һаггында билик әлдә етмәјин ҝөзәл вахтдыр (Јәһја 17:3). Ола билсин, сиз, комик китаблара, видеоојунлара, һәмчинин телевизија верилишләринә вә интернетдән мә’лумат ахтармаға чохлу вахт һәср едән ҝәнҹләр таныјырсыныз. Ахы камил Рәнбәримиз Мәсиһин нүмунәсинә малик олдуғумуз һалда, нәјә ҝөрә онлары тәглид едәк? Иса, Јеһова һаггында өјрәнмәји ушаглыгдан хошлајырды. Бу она һансы фајданы ҝәтирирди? Руһани шејләрә олан мәһәббәти сајәсиндә “Иса... һикмәтдә... тәрәгги едирди” (Лука 2:52). Сиз дә тәрәгги едә биләрсиниз.
“Бир-биринизә табе олун”
10. Аилә һәјатынын әмин-аманлығына вә хошбәхтлијинә көмәк едән нәдир?
10 Аилә инсанын әмин-аманлыг вә мәмнунлуг дујдуғу тәһлүкәсиз лиман ола биләр. Лакин даима баш верән мүбаһисәләр уҹбатындан дөјүш мејданына да чеврилә биләр (Сүлејманын мәсәлләри 21:19; 26:21). Мәсиһин рәһбәрлијинә риајәт етмәклә аиләнин әмин-аманлығына вә хошбәхтлијинә көмәк етмиш олуруг. Әслиндә, Исанын нүмунәси аиләдә мүнасибәтләрин неҹә гурулмалы олдуғуну ҝөстәрир. Мүгәддәс Китабда дејилир: “Аллаһ горхусу илә бир-биринизә табе олун. Гадынлар! Рәббә табе олур кими, әрләринизә табе олун. Чүнки бәдәнин хиласкары олан Мәсиһ иманлылар ҹәмијјәтинин Башы олдуғу кими, әр дә арвадын башыдыр. [...] Әрләр, арвадларынызы севин, неҹә ки, Мәсиһ дә иманлылар ҹәмијјәтини севди вә онун уғрунда Өзүнү фәда етди” (Ефеслиләрә 5:21-25). Һәвари Павел Колосдакы јығынҹаға јазырды: “Еј ушаглар, һәр вәҹһлә валидејнләринизә итаәт един; чүнки бу, Рәббә мәгбулдур” (Колослулара 3:18-20).
11. Әр Мәсиһи өз Рәһбәри кими неҹә гәбул едир?
11 Бу мәсләһәтә риајәт етмәк, о демәкдир ки, аиләдә әр башчылығы өз үзәринә ҝөтүрүр, арвады она сәдагәтлә көмәк едир, ушаглар исә валидејнләринә табе олурлар. Лакин әрин башчылығы јалныз дүзҝүн тәрздә иҹра едилдикдә аиләјә хошбәхтлик ҝәтирир. Бу заман мүдрик әр мүтләг Рәһбәри олан Иса Мәсиһи тәглид едәҹәк (1 Коринфлиләрә 11:3). Иса, сонрадан ҹәмијјәтдә “бүтүн варлыгларын үзәриндә баш” тә’јин олунмасына бахмајараг, о, јер үзүнә “хидмәт едилмәк үчүн дејил, хидмәт етмәјә” ҝәлмишди (Ефеслиләрә 1:22; Матта 20:28). Бунун кими мәсиһчи әр дә башчылығы өз мәнфәәтини ҝүдмәк мәгсәди илә дејил, һәјат јолдашынын, ушагларынын, јә’ни бүтүн аиләнин гејдинә галараг иҹра едир (1 Коринфлиләрә 13:4, 5). О, башчысы олан Иса Мәсиһин Аллаһа мәгбул хүсусијјәтләрини тәглид етмәјә чалышыр. Иса кими, әр дә “һәлим вә гәлбдән тәвазөкар”дыр (Матта 11:28-30). Әҝәр бир сәһвә јол верәрсә, һәјат јолдашына: “Үзр истәјирәм” вә јахуд “Сән һаглысан” кими сөзләри демәкдә чәтинлик чәкмәјәҹәк. Әҝәр әр јахшы нүмунә верирсә, һәјат јолдашына да көмәкчи вә ја рәфигә ролуну јеринә јетирмәк, ондан өјрәнмәк вә она көмәк етмәк асан олаҹаг (Тәквин 2:20; Малаки 2:14).
12. Гадына башчылыг принсипинә табе олмагда нә көмәк едә биләр?
12 Гадын исә өз нөвбәсиндә әринә табе олмалыдыр. Лакин әҝәр она бу дүнјанын руһу тә’сир едирсә, башчылыг принсипинә олан нөгтеји-нәзәри дәјишилә биләр вә кишијә табе олмаг фикри онун үчүн јолверилмәз ҝөрүнә биләр. Мүгәддәс Китаб гадынын әринә табе олмасы барәдә дедикдә, әрин онун үзәриндә һөкмранлыг едәҹәјини нәзәрдә тутмур (Ефеслиләрә 5:24). Мүгәддәс Китабда, һәмчинин дејилир ки, аиләнин мәс’улијјәти әрин, јә’ни атанын үзәринә дүшүр, бу исә Мүгәддәс Китабын мәсләһәтләринә риајәт едилдикдә, аиләнин әмин-аманлығына вә низам-интизамына көмәк едир (Филипилиләрә 2:5).
13. Табечилик мәсәләсиндә Иса ушаглара неҹә нүмунә верди?
13 Ушаглар валидејнләринә итаәт етмәлидирләр. Иса бу саһәдә ҝөзәл нүмунә верди. 12 јашлы Иса үч ҝүн Јерусәлимдә галдығы һәмин һадисәдән сонра, “онларла [валидејнләри илә] ҝетди вә Назаретә ҝәлди; вә онлара” итаәт етди (Лука 2:51). Ушагларын валидејнләринә итаәт етмәләри, аиләдә сүлһ вә һәмрәј’лијә сәбәб олаҹаг. Аилә үзвләринин һамысы Мәсиһин рәһбәрлијинә табе оланда, аилә там хошбәхтлик ичиндә јашајыр.
14, 15. Аиләдә чәтинликләрлә гаршылашдыгда бизә нә көмәк едәҹәк? Нүмунә ҝәтирин.
14 Аиләдә, һәтта чәтин вәзијјәтләр јарананда белә, мүвәффәгијјәтин ачары, Исаја табе олмаг вә онун рәһбәрлијинә риајәт етмәкдән ибарәтдир. Мәсәлән, 35 јашлы Ҹерри, јенијетмә гызы олан Лана илә евләндикдән сонра, онлар ҝөзләнилмәз чәтинликлә гаршылашдылар. Ҹерри дејир: “Билирдим ки, јахшы аилә башчысы олмаг үчүн, Мүгәддәс Китабын аиләләрә хошбәхтлик ҝәтирән принсипләрини тәтбиг етмәк зәруридир. Амма тезликлә онлары даһа мүдрик вә фәрасәтли шәкилдә тәтбиг етмәјин лазым олдуғуну анладым”. Өҝеј гызы анасы илә ону бир-бириндән ајырдығыны дүшүнәрәк, Ҹерријә чох гәзәбләнирди. Гызын сөзләринин вә һәрәкәтләринин сәбәбини ҝөрмәкдә Ҹерријә фәрасәтли олмаг көмәк етди. О, бу ҹүр чәтин вәзијјәтдән неҹә чыхды? Ҹерри сөјләјир: “Биз Лана илә сөзләшдик ки, әҝәр ушағы ҹәзаландырмаг лазым ҝәләрсә, илк вахтлар буну Лана етсин, мән исә диггәтими өҝеј гызымла јахшы мүнасибәтләр гурмаға јөнәлдим”. Бир гәдәр вахтдан сонра, онлар бу үсулун мүвәффәгијјәтли олдуғуну ҝөрдүләр.
15 Аиләдә чәтин вәзијјәтләр јарананда, фәрасәт, аилә үзвләринин сөзләринин вә һәрәкәтләринин сәбәбини ҝөрмәкдә көмәк едир. Аллаһын принсипләрини дүзҝүн тәтбиг етмәк үчүн бизә мүдриклик дә лазымдыр. Мәсәлән, Иса, ганахмадан әзијјәт чәкән гадынын она нә үчүн тохундуғуну ајдын баша дүшдүјүнә ҝөрә, онунла мүдрик вә һәлим давранды (Левилиләр 15:25-27; Марк 5:30-34). Мүдриклик вә фәрасәт Рәһбәримиз Мәсиһә хас олан хүсусијјәтдир (Сүлејманын мәсәлләри 8:12). Онун кими давранырыгса, хошбәхт олаҹағыг.
Әввәлҹә Падшаһлығы ахтарын
16. Һәјатымызда әсас јердә нә дурмалыдыр вә Иса буну өз нүмунәсиндә неҹә ҝөстәрди?
16 Иса, онун рәһбәрлијини гәбул едәнләрин һәјатында нәјин әсас јердә дурмалы олдуғуну ајдын ҝөстәрди. О деди: “Фәгәт әввәлҹә Онун Падшаһлығыны вә Онун [Аллаһын] салеһлијини ахтарын” (Матта 6:33, И-93). Буну неҹә етмәји Иса өз нүмунәси илә ҝөстәрди. Иса вәфтиз олундугдан сонра 40 ҝүн оруҹ тутдуғу, дүшүндүјү вә Аллаһа дуа етдији заман, Шејтан Иблис “дүнјанын бүтүн падшаһлыгларыны” тәклиф етмәклә ону сынаға чәкди. Тәсәввүр един, әҝәр Иблисин тәклифини гәбул етсәјди Иса нәләрә малик оларды! Лакин Иса диггәтини Атасынын ирадәсини јеринә јетирмәјә јөнәлтмишди. О, һәмчинин Шејтан дүнјасындакы аллаһсыз һәјатын гыса олдуғуну да анлајырды. О, Иблисин тәклифини дәрһал рәдд едиб деди: “Рәбб Аллаһына сәҹдә гыл вә јалныз Она гуллуг ет”, дејә јазылмышдыр”. Иса бундан тез сонра тәблиғ едиб: “Төвбә един, чүнки Ҝөјләрин Падшаһлығы јахындыр”,- демәјә... башлады” (Матта 4:2, 8-10, 17, И-93). Иса јер үзүндәки һәјатынын сонуна гәдәр Аллаһын Падшаһлығынын таммүддәтли тәблиғчиси иди.
17. Падшаһлығын мәнафејинин һәјатымызда әсас јери тутдуғу нәдән ҝөрүнүр?
17 Биз, Рәһбәримиз Мәсиһи тәглид етмәли вә һәјатымызда әсас мәгсәдин јүксәкмаашлы иш вә ја карјеранын олмасына јол вермәмәлијик (Марк 1:17-21). Дүнјәви ишләрә алудә олуб, Падшаһлығы икинҹи плана гојмаг неҹә дә ағылсызлыг оларды! Иса бизә, Падшаһлыг һаггындакы мүждәни тәблиғ етмәк вә шаҝирдләр һазырламаг ишини һәвалә едиб (Матта 24:14; 28:19, 20). Әлбәттә, бизим аилә вә ја диҝәр мәс’улијјәтләримиз ола биләр, амма ахшам вахтларымызы вә истираһәт ҝүнләримизи мәсиһчи фәалијјәтинә - тәблиғ вә инсанлары өјрәтмәк ишинә һәср етмәјә шадыг. Кечән 2001-ҹи хидмәт или әрзиндә 780 000 нәфәрин Падшаһлығын таммүддәтли тәблиғчиләри, јә’ни пионер хидмәт етмәләри бизи неҹә дә руһландырыр!
18. Хидмәтимиздән севинҹ әлдә етмәкдә бизә нә көмәк едир?
18 “Инҹил” китабы Исаны фәал, ејни заманда һәссас инсан кими тәсвир едир. Әтрафындакы инсанларын руһани еһтијаҹларыны ҝөрдүкдә, Иса онлара аҹыјыр вә көнүллү сурәтдә көмәк едирди (Марк 6:31-34). Инсанлара мәһәббәт вә онлара сәмими гәлбдән көмәк етмәк истәји бизи һәрәкәтә ҝәтирирсә, хидмәт бизә даһа чох севинҹ ҝәтирәҹәк. Бәс белә истәји неҹә инкишаф етдирә биләрик? Ҹејсон адлы бир ҝәнҹ дејир: “Јенијетмә оланда хидмәти чох севмирдим”. Тәблиғ ишинә мәһәббәт инкишаф етдирмәкдә она нә көмәк етди? Ҹејсон сөјләјир: “Аиләмиздә шәнбә ҝүнүнүн сәһәрләрини һәмишә тәблиғә һәср едирдик. Бу мәним үчүн чох фајдалы олду, чүнки хидмәтдә нә гәдәр чох иштирак едир вә онун сәмәрәләрини ҝөрүрдүмсә, тәблиғ етмәк бир о гәдәр дә чох хошума ҝәлирди”. Биз дә мүнтәзәм сурәтдә вә сә’јлә тәблиғ етмәлијик.
19. Мәсиһин рәһбәрлијинә даир биз нәјә гәти гәрарлы олмалыјыг?
19 Мәсиһин рәһбәрлијинә риајәт едәрәк, биз һәгигәтән дә тәравәт вә севинҹ алырыг. Бу ҹүр давранмагла ҝәнҹләр билик вә мүдриклик әлдә етмәкдә тәрәгги едәҹәкләр. Аилә һәјатында сүлһ вә хошбәхтлијимиз артаҹаг, хидмәтимиз исә севинҹ вә мәмнунлуг ҝәтирәҹәк. Буна ҝөрә дә, гој һәјатымызын һәр бир ҝүнү вә гәбул етдијимиз гәрарлар Мәсиһи Рәһбәримиз кими гәбул етдијимизи ҝөстәрсин (Колослулара 3:23, 24). Лакин Иса Мәсиһ өз рәһбәрлијини даһа бир үсулла - мәсиһчи јығынҹағынын васитәсилә дә һәјата кечирир. Нөвбәти мәгалә бунун бизә һансы фајданы ҝәтирдијини ҝөстәрәҹәк.
[Һашијә]
a Бә’зи адлар дәјишдирилиб.
Хатырлајырсынызмы?
• Аллаһын тә’јин етдији Рәһбәрә табе олмаг бизә һансы фајданы ҝәтирир?
• Ҝәнҹләр Мәсиһин рәһбәрлијинә риајәт етмәк истәкләри олдуғуну неҹә ҝөстәрә биләрләр?
• Мәсиһин рәһбәрлијинә табе олмаг аилә һәјатына неҹә тә’сир ҝөстәрир?
• Мәсиһи Рәһбәримиз кими гәбул етдијимизә, хидмәтимиз неҹә шәһадәт едир?
[9-ҹу сәһифәдәки шәкилләр]
Ҝәнҹлик илләри - Аллаһ вә Онун тә’јин етдији Рәһбәр һаггында билик әлдә етмәјин ҝөзәл вахтыдыр.
[10-ҹу сәһифәдәки шәкил]
Мәсиһин рәһбәрлијинә табе олмаг аилә һәјатында хошбәхтлијә көмәк едир.
[12-ҹи сәһифәдәки шәкилләр]
Иса әввәлҹә Падшаһлығы ахтарырды. Бәс сиз?