Һиссә 10
Аллаһын гурдуғу валеһедиҹи јени дүнја
1, 2. Јер үзүнү тәмизләјәҹәк Һар-Меҝидон мүһарибәсиндән сонра нә баш верәҹәк?
АЛЛАҺЫН јер үзүнү тәмизләјәҹәк Һар-Меҝидон мүһарибәсиндән сонра нә баш верәҹәк? Парлаг јени бир ера башланаҹаг. Артыг Аллаһын һөкмранлығына садиг олдугларыны сүбут едән вә Һар-Меҝидонда сағ галан инсанлар јени дүнјаја дахил олаҹаглар. Бәшәр аиләси үзәринә Аллаһын ҝөзәл хејир-дуалары төкүлән заман, тарихин бу јени дөврү неҹә дә валеһедиҹи олаҹагдыр!
2 Сағ галанлар, Аллаһын Падшаһлығынын рәһбәрлији алтында Ҹәннәти гурмаға башлајаҹаглар. Онлар өз ҝүҹләрини, о заман јашајаҹаг инсанлара фајда ҝәтирән тәмәннасыз мәшғулијјәтләрә сәрф едәҹәкләр. Јер үзү бәшәријјәт үчүн ҝөзәл, сүлһлә долу, ләззәт верән јашајыш јеринә чеврилмәјә башлајаҹагдыр.
Пислик әдаләтлә әвәз олунаҹагдыр
3. Һар-Меҝидондан дәрһал сонра һансы јүнҝүллүк һисс едиләҹәкдир?
3 Бүтүн бунлар Шејтан дүнјасынын мәһв едилмәси сајәсиндә мүмкүн олаҹагдыр. Араја әдавәт салан јалан динләр, иҹтимаи гурулушлар вә ја һакимијјәтләр артыг олмајаҹаг. Шејтанын алдадыҹы тәблиғаты артыг инсанлары чашдырмајаҹаг. Белә тәблиғаты јајмагла мәшғул олан тәшкилатларын һамысы Шејтанын системи илә бирликдә јох олаҹаглар. Бирҹә тәсәввүр един: Шејтан дүнјасынын зәһәрли атмосфери тамамилә тәмизләнәҹәк! Неҹә дә раһатлыг олаҹаг!
4. Тә’лимдә баш верәҹәк дәјишиклији тәсвир един.
4 О заман инсан рәһбәрликләринин мәһведиҹи әгидәләри Аллаһдан ҝәлән инкишафетдириҹи тә’лимлә әвәз едиләҹәк. “Бүтүн оғулларын Рәбб тәрәфиндән өјрәдилмиш олаҹаг” (Ишаја 54:13). Илдән илә давам едән бу фајдалы тә’лим сајәсиндә “сулар дәнизи неҹә долдурурса, дүнја да Рәбб билҝиси илә долу олаҹаг” (Ишаја 11:9). Инсанлар артыг пислијә өјрәнмәјәҹәкләр, лакин ‘дүнјада јашајанлар доғрулуға өјрәнәҹәкләр’ (Ишаја 26:9). Инкишафетдириҹи фикир вә давраныш тәрзи адәт һалына чевриләҹәк (Һәвариләрин ишләри 17:31; Филипилиләрә 4:8).
5. Бүтүн писликләрлә вә пис инсанларла нә баш верәҹәкдир?
5 Беләликлә, артыг гатиллик, зоракылыг, зорлама, сојғунчулуг вә ја диҝәр ҹинајәтләр олмајаҹаг. Артыг һеч ким башгаларынын пис әмәлләриндән әзаб чәкмәјәҹәкдир. Сүлејманын мәсәлләри 10:30 ајәсиндә дејилир: “Салеһ олан әбәдијјән сарсылмаз, фәгәт писләр мәмләкәтдә јашамајаҹаглар”.
Мүкәммәл сағламлыг бәрпа едилир
6, 7. а) Падшаһлығын рәһбәрлији һансы амансыз факта сон гојаҹагдыр? б) Иса јер үзүндә оланда буну неҹә ҝөстәрди?
6 Јени дүнјада илк үсјанын бүтүн аҹынаҹаглы нәтиҹәләри әкс истигамәт алаҹаг. Мәсәлән, Падшаһлығын рәһбәрлији хәстәликләри вә гоҹалығы арадан галдыраҹаг. Бу ҝүн сиз нисби сағламлыға малик олсаныз да, гачылмаз сүбутлар вар ки, инсан јаша долдугҹа ҝөзләри, ешитмә габилијјәти зәифләјир, дишләри төкүлүр, дәриси гырышыр, дахили органларында позғунлуг баш верир вә ахырда да өлүр.
7 Лакин улу валидејнләримиздән мирас алдығымыз бу үзүҹү нәтиҹәләр тезликлә кечмишдә галаҹаг. Јер үзүндә оларкән Исанын сағламлыға даир ҝөрдүјү ишләри хатырлајырсынызмы? Мүгәддәс Китаб дејир: “Онун јанына бөјүк бир издиһам ҝәлди вә араларында топаллар, корлар, дилсизләр, чолаглар вә даһа башга бир чохлары вар иди. Онлары Исанын ајаглары јанына гојдулар; вә Иса онлары сағалтды. Дилсизи данышан, чолағы сағлам, кору ҝөрән вә топалы јеријән ҝөрдүјү заман, халг тәәҹҹүбләнди” (Матта 15:30, 31).
8, 9. Јени дүнјада камил сағламлыг бәрпа едилән заман дујулаҹаг хошбәхтлији тәсвир един.
8 Јени дүнјада бүтүн хәстәликләр арадан галдырылан заман неҹә дә бөјүк хошбәхтлик олаҹаг! Пис сағламлыг уҹбатындан јаранан бу әзаблар үзүндән бир даһа изтираб чәкмәјәҹәјик. “Орада јашајан: Хәстәјәм, демәјәҹәк”. “О заман корларын ҝөзләри ачылаҹаг, карларын да гулаглары ешидәҹәк. О заман топал адам марал кими сычрајаҹаг вә дилсизин дили тәрәннүм едәҹәк” (Ишаја 33:24; 35:5, 6).
9 Мәҝәр һәр сәһәр ојанаркән там сағламлыға саһиб олдуғунузу дујмагдан һәзз алмајаҹагсынызмы? Јашлы инсанларын ҝәнҹлик чағларындакы гүввәләринә говушдугларыны вә Адәмлә Һәвванын башланғыҹда саһиб олдуглары камилијјә наил олаҹагларыны билмәк, онлары мәмнун етмәјәҹәкми? Мүгәддәс Китаб вә’д едир: “Әти [бәдәни] ушағынкындан көрпә олар; ҝәнҹлији ҝүнләринә дөнәр” (Ејуб 33:25). Ејнәкләри, ешитмә гурғуларыны, голтугағаҹларыны, әлил арабаларыны вә дәрманлары тулламаг неҹә дә мәмнунлуг ҝәтирәҹәк! Хәстәханалара, һәкимләрә вә диш һәкимләринә бир даһа еһтијаҹ олмајаҹаг.
10. Өлүмлә нә олаҹаг?
10 Бу ҹүр ҝөзәл сағламлыға саһиб олан инсанлар өлмәк истәмәјәҹәкләр. Вә онлар өлмәјәҹәкләр, чүнки артыг бәшәријјәт мирас алынмыш гејри-камиллијин вә өлүмүн әсарәтиндә олмајаҹаг. “Аллаһ Онун [Мәсиһин] бүтүн дүшмәнләрини ајагларынын алтына салынҹаја кими... падшаһлыг етмәлидир. Јох едиләҹәк ахырынҹы дүшмән исә, өлүмдүр”. “Аллаһын ән’амы... әбәди һәјатдыр”. (1 Коринфлиләрә 15:25, 26, И–93; Ромалылара 6:23; һәмчинин Ишаја 25:8 ајәсинә дә бахын.)
11. “Вәһј” китабында јени дүнјанын хејир-дуалары неҹә јекунлашдырылыр?
11 Мүгәддәс Китабын сонунҹу китабы, гајғыкеш Аллаһын Ҹәннәтдә инсан аиләсинә верәҹәји бу хејир-дуалара јекун вурараг дејир: “Аллаһ онларын ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр, чүнки әввәлки шејләр кечиб ҝетди” (Вәһј 21:3, 4).
Өлүләрин ҝери гајтарылмасы
12. Иса, Аллаһын она вердији дирилтмә баҹарығыны неҹә ҝөстәрди?
12 Иса хәстәләри сағалтмагдан вә шикәстләрә шәфа вермәкдән даһа артыг иш ҝөрүрдү. О, өлүләри дә дирилдирди. Бунунла Иса, Аллаһын она гејри-ади дирилтмәк габилијјәти вердијини ҝөстәрди. Иса, гызы өлән адамын евинә ҝәлдикдә баш верән һадисәни хатырлајырсынызмы? Иса өлән гыза деди: “Гызҹығаз, сәнә галх дејирәм!” Бәс нәтиҹәси неҹә олду? “Гыз да о анда галхыб ҝәзмәјә башлады”. Орадакы инсанлар буну ҝөрдүкдә “чох һејрәтләндиләр”. Онлар хошбәхтликләрини ҝизләдә билмәдиләр! (Марк 5:41, 42; һәмчинин Лука 7:11-16; Јәһја 11:1-45 ајәләринә дә бахын.)
13. Һансы инсанлар дирилдиләҹәкләр?
13 Јени дүнјада “һәм салеһ, һәм дә салеһ олмајан өлүләрин дирилдилмәси олаҹагдыр” (Һәвариләрин ишләри 24:15). О заман Иса, Аллаһын она вердији гүввәни өлүләри дирилтмәк үчүн истифадә едәҹәк, чүнки о демишдир: “Дирилмә вә һәјат Мәнәм; Мәнә иман едән өлсә дә јашајар” (Јәһја 11:25). О, һәмчинин демишдир: “Гәбирләрдә [Аллаһын јаддашында] оланларын һамысы Онун [Исанын] сәсини ешидәҹәкләр вә гәбирләриндән чыхаҹаглар” (Јәһја 5:28).
14. Өлүмлә бәрабәр нәләр арадан галдырылаҹаг?
14 Өләнләр бир-биринин ардынҹа груп һалында дирилиб өз әзизләринә говушан заман, бүтүн јер үзүндә неҹә дә бөјүк севинҹ олаҹагдыр! Артыг гәзет сәһифәләриндә сағ галан кәсләри кәдәрләндирәҹәк башсағлыглары дәрҹ олунмаг әвәзинә, еһтимал ки, һәтта бүтүн бунларын әкси — онлары севәнләрин севинҹинә сәбәб олаҹаг јени дириләнләр һаггында е’ланлар дәрҹ олунаҹаг. Беләликлә, артыг дәфн мәрасимләри, дәфн тонгаллары, крематоријалар вә гәбиристанлыглар олмајаҹаг!
Доғрудан да сүлһ ичиндә бир дүнја
15. Миканын пејғәмбәрлији там мә’нада неҹә јеринә јетәҹәкдир?
15 Һәјатын һәр бир саһәсиндә һәгиги сүлһ һөкм сүрәҹәк. Мүһарибәләр, мүһарибәләри төрәдәнләр вә силаһ истеһсалы кими ишләр кечмишдә галаҹаг. Нә үчүн? Чүнки араја әдавәт салан милли, тајфа вә ирги мәнафеләр јох олаҹагдыр. О заман там мә’нада “милләт милләтә гаршы гылынҹ галдырмајаҹаг вә артыг ҹәнҝ етмәји өјрәнмәјәҹәкләр” (Мика 4:3).
16. Аллаһ мүһарибәләрин өһдәсиндән неҹә ҝәләҹәк?
16 Бәшәријјәтин гана сусамыш мүһарибәләрлә долу тарихинә нәзәр салсаг, бу, тәәҹҹүблү ҝөрүнә биләр. Лакин бунлар бәшәријјәтин инсан вә Шејтан рәһбәрлији алтында олдуғуна ҝөрә баш верирди. Падшаһлығын рәһбәрлији алтындакы јени дүнјада исә нөвбәти шејләр баш верәҹәк: “Ҝәлин, Рәббин ишләрини ҝөрүн... Јерин уҹуна гәдәр мүһарибәләри дурдурар; јајы гырар вә мизрағы парчалар; ҹәнҝ арабаларыны атәшдә јандырар” (Мәзмур 46:8, 9).
17, 18. Јени дүнјада инсанлар вә һејванлар арасында һансы мүнасибәтләр олаҹагдыр?
17 Еден бағында олдуғу кими, инсан вә һејванлар арасында да сүлһ олаҹагдыр (Тәквин 1:28; 2:19). Аллаһ дејир: “Чөл һејванлары илә вә ҝөјләрин гушлары илә торпагда сүрүнәнләрлә о ҝүн онлар үчүн әһд кәсәҹәјәм... вә онлары тәһлүкәсизликдә јашадаҹағам” (Һошеа 2:18).
18 Сүлһ нә дәрәҹәдә ҝениш јајылаҹагдыр? “Гурд гузу илә бәрабәр јашајаҹаг вә пәләнҝ оғлагла бәрабәр јатаҹаг; вә бузов вә ҝәнҹ аслан вә бәсләнмиш өкүз бир јердә олаҹаг; вә онлары балаҹа бир ушаг отараҹаг”. Һејванлар бир даһа инсанлара вә бир-бирләринә тәһлүкә јаратмајаҹаглар. Һәтта “аслан өкүз кими саман јејәҹәк”! (Ишаја 11:6-9; 65:25).
Јер үзүнүн Ҹәннәтә чеврилмәси
19. Јер үзү нәјә чевриләҹәкдир?
19 Бүтүн јер үзү бәшәријјәт үчүн Ҹәннәт мәканына чевриләҹәкдир. Бу сәбәбә ҝөрә Иса, она иман едән кишијә вә’д едә билди: “Сән мәнимлә бәрабәр ҹәннәтдә олаҹагсан”. Мүгәддәс Китабда дејилир: “Чөл вә гураг јер шадланаҹаг; вә әһалисиз јер севинәҹәк вә нәрҝиз кими чичәкләнәҹәк... чүнки чөлдә сулар вә сәһрада селләр фышгыраҹаг” (Лука 23:43; Ишаја 35:1, 6).
20. Нә үчүн аҹлыг бир даһа бәшәријјәтә сыхынты ҝәтирмәјәҹәк?
20 Аллаһын рәһбәрлији алтында аҹлыг милјонларла инсана бир даһа сыхынты ҝәтирмәјәҹәк. ‘Јердә, дағлар башында, буғда боллуғу олаҹаг; сәмәрәси... далғаланаҹаг’. “Сәһра ағаҹы мејвәсини верәҹәк вә јер мәһсулуну верәҹәк вә өз торпаглары үзәриндә тәһлүкәсиз олаҹаглар” (Мәзмур 72:16; Һезекиел 34:27).
21. Евсизлик, харабалыг вә ҹинајәтлә долу әразиләри нә ҝөзләјир?
21 Артыг орада јохсуллуг, евсиз-ешиксиз инсанлар, харабалыглар вә ҹинајәтлә долу әразиләр олмајаҹаг. “Евләр тикәҹәкләр вә јашајаҹаглар; бағлар салаҹаглар вә мејвәсини јејәҹәкләр. Онлар тикиб дә башгасы јашамајаҹаг; онлар әкиб дә башгасы јемәјәҹәк”. “Һәр кәс өз асмасы алтында вә әнҹир ағаҹы алтында отураҹаг; вә онлары горхудан олмајаҹаг” (Ишаја 65:21, 22; Мика 4:4).
22. Мүгәддәс Китабда Аллаһын рәһбәрлијинин хејир-дуалары неҹә тәсвир олунур?
22 Ҹәннәтдә инсанлар бу вә бу кими бир чох башга хејир-дуалар алаҹаглар. Мәзмур 145:16 ајәсиндә дејилир: “[Еј Аллаһ] әлини ачырсан вә һәр јашајаны диләјинә ҝөрә дојурурсан”. Тәәҹҹүблү дејил ки, Мүгәддәс Китабын пејғәмбәрлији бәјан едир: “Һәлимләр дүнјаны мирас алаҹаглар вә сүлһ боллуғунда ләззәт тапаҹаглар... салеһләр јери мирас алар вә онда әбәдијјән јашајарлар” (Мәзмур 37:11, 29).
Кечмишин мәһв едилмәси
23. Аллаһын Падшаһлығы чәкдијимиз бүтүн изтирабларын әвәзини неҹә өдәјәҹәкдир?
23 Кечән алты мин ил әрзиндә бәшәр аиләсинә тохунан бүтүн зәрәр Аллаһын Падшаһлығынын рәһбәрлији алтында арадан галдырылаҹаг. О заман инсанларын дујаҹаглары севинҹ, чәкдикләри һәр бир изтирабдан артыг олаҹагдыр. Кечмишдә чәкдијимиз изтирабларла әлагәдар һәр-һансы пис хатирәләр артыг бизи нараһат етмәјәҹәк. Инсанларын ҝүндәлик һәјатларында олаҹаг инкишафетдириҹи фикирләр вә фәалијјәтләр ҝет-ҝедә әзабвериҹи хатирәләри силәҹәк.
24, 25. а) Ишаја нәјин олаҹағыны әввәлҹәдән хәбәрдарлыг етмишдир? б) Биз нә үчүн әмин ола биләрик ки, кечмишдә чәкдијимиз изтираблардан јалныз думанлы хатирәләр галаҹаг?
24 Гајғыкеш Аллаһ бәјан едир: “Мән јени ҝөјләр [бәшәријјәт үзәриндә һөкм сүрән ҝөјдәки јени һөкумәт] илә јени јер [салеһ инсан ҹәмијјәти] јаратмагдајам; вә әввәлки шејләр анылмајаҹаг вә фикрә ҝәлмәјәҹәк. Анҹаг јарадмагда олдуғумла мәсрур олаҹагсыныз вә әбәдијјән севинҹлә ҹошаҹагсыныз”. “Бүтүн дүнја истираһәт едир вә сусмуш; бирдән тәрәннүмлә ҹошарлар” (Ишаја 14:7; 65:17, 18).
25 Беләликлә, Аллаһ узун мүддәт давам едән бу пис вәзијјәти өз Падшаһлығы васитәсилә тамамилә дәјишәҹәкдир. Аллаһ кечмишдә чәкдијимиз һәр бир зәрәрин әвәзини артыгламасы илә өдәјән хејир-дуалары әбәдијјән вермәклә өзүнүн бөјүк гајғыкешлијини тәзаһүр етдирәҹәкдир. О заман кечмишдә чәкдијимиз чәтинликләр, һәтта онлары хатырламаг истәсәк дә, зеһнимиздә јалныз думанлы бир хатирәјә чевриләҹәкдир.
26. Аллаһ кечмишдә чәкдијимиз һәр бир изтирабын әвәзини нә үчүн өдәјәҹәкдир?
26 Беләликлә, Аллаһ бу дүнјада чәкдијимиз бүтүн изтирабларын әвәзини өдәјәҹәкдир. О билир ки, гејри-камил доғулмағымыз бизим ҝүнаһымыз дејил, чүнки гејри-камиллији улу валидејнләримиздән мирас алмышыг. Шејтан дүнјасында анадан олмағымыз да бизим ҝүнаһымыз дејил, чүнки әҝәр Адәм вә Һәвва садиг галсајдылар, бунун әвәзиндә Ҹәннәтдә доғулардыг. Беләликлә, Аллаһ үзәримизә дүшән бу ағыр кечмишин әвәзини артыгламасы илә өдәјәҹәкдир.
27 Јени дүнјада бәшәријјәт, Ромалылара 8:21, 22 ајәләриндә әввәлҹәдән хәбәрдарлыг едилән азадлығы һисс едәҹәкдир: “Хилгәт өзү дә чүрүклүјә олан көләлијиндән азад олунуб Аллаһын өвладларынын иззәтли азадлығына говушаҹагдыр. Чүнки билирик ки, бүтүн хилгәт индијә кими бирликдә фәрјад едиб доғум ағрысы чәкир”. О заман инсанлар, “Падшаһлығын ҝәлсин; ҝөјдә олдуғу кими, јердә дә Сәнин ирадән олсун” дуасынын тамамилә јеринә јетдијини ҝөрәҹәкләр (Матта 6:10, И–93). Јер үзүндәки Ҹәннәтдәсон дәрәҹә ҝөзәл шәраитләр, ҝөјдә олан шәраитләрин әкси олаҹагдыр.
27. Һансы пејғәмбәрликләр јени дүнјада мө’ҹүзәли шәкилдә тамамилә јеринә јетәҹәк?
[23-ҹү сәһифәдә олан шәкил]
Јени дүнјада гоҹалар ҝәнҹлик ҝүнләриндәки гүввәләринә говушаҹаглар.
[24-ҹү сәһифәдә олан шәкил]
Јени дүнјада бүтүн хәстәликләр вә шикәстликләр арадан галдырылаҹаг.
[25-ҹи сәһифәдә олан шәкил]
Јени дүнјада өлүләр дирилдиләҹәкләр.
[26-ҹы сәһифәдә олан шәкил]
“Артыг ҹәнҝ етмәји өјрәнмәјәҹәкләр”.
[27-ҹи сәһифәдә олан шәкилләр]
Ҹәннәтдә инсанлар вә һејванлар арасында там һәмрә’јлик олаҹагдыр.
“Аллаһ әлини ачаҹаг вә һәр јашајаны диләјинә ҝөрә дојураҹаг”.
[28-ҹи сәһифәдә олан шәкил]
Аллаһын Падшаһлығы чәкдијимиз бүтүн изтирабларын әвәзини өдәјәҹәкдир.