Мин ил вә әбәдијјәт боју сүлһ!
«Аллаһ һәр кәс үчүн һәр шеј олсун» (1 КОР. 15:28).
ИЗАҺ ЕДӘ БИЛӘРСИНИЗМИ?
Нөвбәти ајәләрдәки пејғәмбәрликләрин јеринә јетмәси сизин үчүн һансы мәнаны кәсб едир?
1. Бөјүк издиһамы һансы ҝөзәл ҝәләҹәк ҝөзләјир?
ТӘСӘВВҮР едирсиниз, башда әдаләтли вә шәфгәтли һөкмдар олан һөкумәт өз тәбәәләри үчүн мин ил әрзиндә нәләр етмәјә гадирдир?! Белә бир ҝөзәл ҝәләҹәк сајы мәлум олмајан бөјүк издиһамы ҝөзләјир. Бу пис системә сон гојулан заман һәмин издиһам «бөјүк мүсибәтдән» сағ чыхаҹаг (Вәһј 7:9, 14).
2. Бәшәријјәт 6000 ил әрзиндә нәләр чәкиб?
2 Алты мин ил әрзиндә бәшәријјәт мүстәгил шәкилдә өз-өзүнү идарә етмәјә чалышырды. Бу, мисли ҝөрүнмәмиш ағры вә әзаб-әзијјәтләр төрәтмишди. Та гәдимдә Мүгәддәс Китабда белә сөзләр јазылмышды: «Бир адамын башга адама ағалыг етмәси башына бәла олур» (Ваиз 8:9). Бу ҝүн гаршымызда һансы мәнзәрә ачылыр? Мүһарибә вә иғтишашлардан савајы, касыбчылыг, хәстәликләр, әтраф мүһитин чиркләнмәси, иглимин дәјишмәси вә бу кими диҝәр дәһшәтли проблемләр дүнјаны өз ағушуна алыб. Һөкумәт нүмајәндәләри хәбәрдарлыг едирләр ки, санки, һеч нә баш вермирмиш кими јашамаға давам етсәк, бу, фәлакәтлә нәтиҹәләнәҹәк.
3. Миниллик Һөкмранлыг заманы нә баш верәҹәк?
3 Иса Мәсиһин вә онун 144 000 һакимијјәт шәрикинин һөкмранлығы заманы Аллаһын Падшаһлығы инсанлара вә онларын мәскәни олан Јер күрәсинә вурулан бүтүн зәрәри тәдриҹән арадан галдыраҹаг. Миниллик Һөкмранлыг заманы Јеһова Аллаһын нөвбәти севиндириҹи вәди ҝерчәкләшәҹәк: «Мән јени ҝөјләр вә јени јер јарадырам. Әввәлки ишләр бир даһа хатырланмајаҹаг, һеч јада дүшмәјәҹәк» (Јешаја 65:17). Инди онлары ҝөрмәсәк дә, гаршыда бизи һансы ҝөзәл һадисәләр ҝөзләјир? Ҝәлин Аллаһын Кәламындакы пејғәмбәрликләрин көмәјилә һәлә «ҝөзлә ҝөрүнмәјән» бу ҝөзәл һадисәләрә нәзәр салаг (2 Кор. 4:18).
ОНЛАР ЕВЛӘР ТИКИБ ҮЗҮМ БАҒЛАРЫ САЛАҸАГ
4. Чохлары неҹә шәраитдә јашајыр?
4 Ким истәмәз ки, өзүнүн вә аиләсинин тәһлүкәсиз вә архајын јашадығы шәхси еви олсун? Бизим ҝүнләрдә әксәр инсанларын мүнасиб евләринин олмамасы ҹидди проблемдир. Инсанлар әһалиси һәддән артыг сых олан шәһәрләрдә јашајырлар. Чохлары харабалыгларда, мүвәггәти кома вә дахмаларда мәскунлашмаг мәҹбуријјәтиндәдир. Шәхси ев онлар үчүн әлчатмаз бир арзудур.
5, 6. а) Јешаја 65:21 вә Микеја 4:4 ајәләри неҹә јеринә јетәҹәк? б) Бу хејир-дуаны алмаг истәјириксә, биздән нә тәләб олунур?
5 Падшаһлығын рәһбәрлији алтында инсанларын шәхси евә саһиб олмаг истәкләри ҝерчәкләшәҹәк, чүнки Јешајанын пејғәмбәрлијиндә вәд олунур: «Онлар евләр тикиб орада мәскунлашаҹаг, үзүм бағлары салаҹаг, бәһрәләриндән јејәҹәк» (Јешаја 65:21). Анҹаг шәхси евә саһиб олмагла иш битмир. Бу ҝүн дә бәзиләринин өз евләри вар, һәтта маликанә вә ја виллаларда јашајанлар да аз дејил. Бунунла белә, онлар даима малијјә бөһраны нәтиҹәсиндә евләрини итирәҹәјиндән, јахуд да даһа дәһшәтлиси, гарәт олунаҹагларындан горхурлар. Падшаһлығын рәһбәрлији алтында һәр шеј неҹә дә фәргли олаҹаг! Микеја пејғәмбәр јазмышды: «Һәр кәс өз мејнәсинин, әнҹир ағаҹынын алтында әјләшәҹәк, онлары горхудан олмајаҹаг» (Мик. 4:4).
6 Бу мөһтәшәм ҝәләҹәји өз ҝөзләримизлә ҝөрмәк үчүн биздән нә тәләб олунур? Әлбәттә ки, һәр биримизин мүнасиб евә еһтијаҹы вар. Лакин, ола билсин, борҹа-хәрҹә ҝириб хәјалларымыздакы евә инди саһиб олмаг әвәзинә, мәҝәр диггәтимизи Јеһованын вәдинә ҹәмләмәк даһа мүдрик олмазды? Исанын өзү барәдә дедији сөзләри јадымыза салаг: «Түлкүләрин дә, ҝөј гушларынын да јувасы вар, амма инсан Оғлунун башыны гојмаға белә јери јохдур» (Лука 9:58). Исанын ән јахшы ев тикмәк, јахуд да алмаг үчүн һәм баҹарығы, һәм дә ҝүҹү варды. Бәс нә үчүн о, буну етмәди? Чүнки Иса ону Падшаһлығы һәјатында биринҹи јерә гојмагдан јајындыраҹаг һәр бир шејдән узаг дурмаг истәјирди. Биз дә онун нүмунәсини изләјәрәк ҝөзүмүзү тох, јәни мадди нараһатчылыгдан узаг сахлаја биләрикми? (Мат. 6:33, 34).
«ГУРДЛА ГУЗУ БИР ЈЕРДӘ ОТЛАЈАҸАГ»
7. Јеһованын илкин нијјәтинә ҝөрә, инсанларла һејванлар арасында һансы мүнасибәт олмалы иди?
7 Јеһова инсаны ән ахырда, јер үзүндәки бүтүн мәхлугларын таҹы кими јаратды. Јеһова Маһир Уста олан илкин оғлу Иса Мәсиһә Өз нијјәти һагда демишди: «Өз сурәтимизә вә бәнзәримизә ҝөрә инсаны јарадаг. Гој о, дәниздәки һејванлара, ҝөјдәки гушлара, јердәки һејванлара, бүтүн јер үзүнә вә јердә сүрүнән ҹанлыларын һамысына һөкмранлыг етсин» (Јар. 1:26). Беләҹә Адәмлә Һәвваја вә демәк олар ки, бүтүн инсанлара һејванат аләми үзәриндә һөкмранлыг етмәк иши һәвалә олунмушду.
8. Бу ҝүн һејванлара һансы давраныш хасдыр?
8 Инсанлар үчүн бүтүн һејванлары өзләринә табе етдирмәк вә онларла сүлһ ичиндә јашамаг мүмкүндүрмү? Бир чохлары ит вә пишик кими ев һејванларыны севирләр. Бәс вәһши һејванлар һагда нә демәк олар? Бир һесабатда дејилир: «Вәһши һејванлара јахын јашајан вә онлары тәдгиг едән алимләр ашкар етмишләр ки, бүтүн мәмәлиләр емосионал мәхлуглардыр». Әлбәттә, тәһлүкә илә үзләшән һејванлар горхунҹ вә вәһши олурлар. Бәс онлар бәзиләринин инҹә адландырдығы һиссләри тәзаһүр етдирмәјә гадирдирми? Һәмин һесабатда әлавә олунур: «Мәһз балаларыны јетишдирдији вахтда мәмәлиләрин ән бөјүк хүсусијјәти — зәриф һиссләр ҝөстәрмәк кими бөјүк баҹарыглары үзә чыхыр».
9. Һејванларла әлагәдар һансы дәјишиклији ҝөзләјә биләрик?
9 Буна ҝөрә дә Мүгәддәс Китабда инсанларла һејванлар арасында сүлһүн бәргәрар олунаҹағы һагда охујанда тәәҹҹүбләнмәли дејилик. (Јешаја 11:6—9; 65:25 ајәләрини оху.) Нәјә ҝөрә? Ҝәлин Нуһ вә аиләси Дашгындан сонра ҝәмидән чыханда Аллаһын онлара дедији сөзләри хатырлајаг: «Бүтүн һејванлар... сиздән горхуб дәһшәтә ҝәләҹәк». Бу, һејван нәслинин кәсилмәмәси үчүн иди (Јар. 9:2, 3). Мәҝәр Јеһова инсанлара һејванлар үзәриндә әзәлдән вердији һакимијјәти бәрпа етмәк үчүн бу горху вә дәһшәтин мүәјјән гисмини арадан галдырмаг игтидарында дејил? (Һушә 2:18). Һәмин вахт јер үзүндә јашајаҹаг инсанлары неҹә дә мараглы һәјат ҝөзләјир!
«АЛЛАҺ ИНСАНЛАРЫН ҜӨЗЛӘРИНДӘН БҮТҮН ЈАШЛАРЫ СИЛӘҸӘК»
10. Бу ҝүн инсанлар һансы сәбәбләрә ҝөрә ҝөз јашы төкүрләр?
10 Сүлејман «сәма алтында едилән бүтүн зүлмләри» ҝөрәндә үрәкағрысы илә деди: «Мәзлумларын ҝөз јашларыны ҝөрдүм, онлара тәсәлли верән јох иди» (Ваиз 4:1). Бу ҝүн дә вәзијјәт ејнидир, һәтта, ола билсин, ондан да бетәрдир. Мәҝәр арамызда мүәјјән сәбәбләрә ҝөрә ҝөз јашы төкән јохдур? Дүздүр, бәзән бу, севинҹ ҝөз јашлары олур. Анҹаг үмумиликдә ҝөз јашлары үрәкдә олан дәрин јараларын әксидир.
11. Һансы Мүгәддәс Китаб һадисәләри һагда охујанда көврәлирсиниз?
11 Мүгәддәс Китабда охудуғумуз бир чох тәсирли һадисәләри јадымыза салаг. 127 јашында Сара өләндә «Ибраһим јас тутуб ағламагдан өтрү Саранын ҹәсәдинин јанына ҝетди» (Јар. 23:1, 2). Наоми дул галмыш ики ҝәлини илә сағоллашанда «онлар һөнкүрүб ағладылар» вә сонра «јенә дә бәркдән ағлашдылар» (Рут 1:9, 14). Падшаһ Хизгија өлүмҹүл хәстәлијә тутуланда Јеһоваја дуа едиб «аҹы-аҹы ағлады» вә бу, Онун үрәјинә тәсир етди (2 Пад. 20:1—5). Бәс бизләрдән ким Петерин Исаны данмасы һагда охујанда долухсунмур? Хорузун банламасыны ешидән Петер «чөлә чыхыб аҹы-аҹы ағлады» (Мат. 26:75).
12. Падшаһлыг бәшәријјәти әсил раһатлыға неҹә говушдураҹаг?
12 Башы бәлалардан ајылмајан бәшәријјәтин тәсәлли вә раһатлыға еһтијаҹы вар. Инсанларын бу еһтијаҹы Миниллик Һөкмранлыг заманы тәмин олунаҹаг: «Аллаһ инсанларын ҝөзләриндән бүтүн јашлары силәҹәк. Артыг нә өлүм, нә дәрд, нә фәрјад, нә дә ағры олаҹаг» (Вәһј 21:4). Неҹә дә ҝөзәлдир ки, јени дүнјада кәдәр, фәрјад, ағры-аҹыдан әсәр-әламәт галмајаҹаг. Аллаһ һәтта бәшәријјәтин ахырынҹы дүшмәни олан өлүмү дә арадан галдыраҹағыны вәд едир. Бу, неҹә олаҹаг?
«ГӘБИРЛӘРДӘ ОЛАНЛАРЫН ҺАМЫСЫ» ДИРИЛӘҸӘК
13. Адәмин ҝүнаһа батмасындан бәри өлүм инсанлара неҹә тәсир едир?
13 Адәм ҝүнаһа батандан бәри өлүм, бир падшаһ кими, бүтүн бәшәријјәт үзәриндә һөкмранлыг едир. Өлүм ҝөзәҝөрүнмәз дүшмән, һәр бир ҝүнаһлы инсанын гачылмаз агибәти вә өлчүјәҝәлмәз кәдәр, гәм-гүссә мәнбәјидир (Ром. 5:12, 14). «Өлүм горхусу» илә јашајан милјонларла инсанлар «көләлик әсарәтиндә»дирләр (Ибр. 2:15).
14. Өлүм арадан галдырыланда бунун нәтиҹәси нә олаҹаг?
14 Мүгәддәс Китабда «сонунҹу дүшмән» адландырылан өлүмүн мәһв едиләҹәји вахтдан данышылыр (1 Кор. 15:26). Бундан ики груп инсан фајдаланаҹаг. Һал-һазырда јашајан бөјүк издиһам өлүмү дадмадан вәд едилмиш јени дүнјаја дахил олаҹаг вә әбәди јашаја биләҹәк. Өлүм әсарәтиндә олан милјардларла инсанлар исә дириләҹәкләр. Һар-Маҝедону сағ кечәнләр дирилән инсанлары гаршылајанда јер үзүндә һөкм сүрәҹәк бөјүк севинҹ вә һәјәҹаны тәсәввүр едирсиниз? Мүгәддәс Китабда гәләмә алынан дирилмә һадисәләринин бәзиләринә јахындан нәзәр салдыгда һәмин вахты, аз да олса, тәсәввүр едә биләрик. (Марк 5:38—42; Лука 7:11—17 ајәләрини оху.)
15. Әзизиниз дириләндә һансы һиссләри кечирәҹәксиниз?
15 «Севинҹи јерә-ҝөјә сығмырды» вә «Аллаһы мәдһ етмәјә... башладылар» ифадәләринә диггәт јетирәк. Әҝәр сән дә һәмин вахт орада олсајдын, јәгин ки, ејни һиссләри кечирәрдин. Һәгигәтән дә, өлән әзизләримизин дирилмәсини ҝөрмәк гејри-ади севинҹ вә фәрәһә сәбәб олаҹаг. Иса демишди: «Елә бир саат ҝәлир ки, гәбирләрдә оланларын һамысы онун сәсини [ешидиб]... дириләҹәкләр» (Јәһ. 5:28, 29). Бизләрдән һеч биримиз һеч вахт буна бәнзәр һадисә ҝөрмәмишик; бу, ҝөзлә ҝөрүнмәјән шејләрин арасында ән мөһтәшәмләриндән бири олаҹаг.
«АЛЛАҺ ҺӘР КӘС ҮЧҮН ҺӘР ШЕЈ» ОЛАҸАГ
16. а) Һәлә ҝөзлә ҝөрүнмәјән хејир-дуалар барәдә нәјә ҝөрә шөвглә данышмалыјыг? б) Павел Коринфдәки мәсиһчиләри руһландырмаг үчүн онлара нә демишди?
16 Бәли, бу кешмәкешли дөврдә Јеһоваја садиг галан һәр бир инсаны неҹә дә ҝөзәл ҝәләҹәк ҝөзләјир! Бу мөһтәшәм хејир-дуалар һәлә ҝөзлә ҝөрүнмәсә дә, онлары мөһкәм јадда сахламаг диггәтимизи ваҹиб шејләрә ҹәмләмәјә вә бу дүнјанын тез кечиб-ҝедән ҹазибәдарлығына алданмамаға көмәк едәҹәк (Лука 21:34, 35; 1 Тим. 6:17—19). Аиләви өјрәнмә вә ибадәт заманы, һәмиманлыларымызла үнсијјәт едәндә, еләҹә дә Мүгәддәс Китабы өјрәтдијимиз вә хош хәбәрә мараг ҝөстәрән инсанларла мүзакирә апаранда ҝәлин ҝөзәл үмидимиз барәдә шөвглә данышаг. Бу, үмидимизи зеһнимиздә вә үрәјимиздә ҹанлы сахламаға көмәк едәҹәк. Һәвари Павел һәмиманлыларыны мәһз белә руһландырырды. О, санки, онлары Мәсиһин Миниллик Һөкмранлығынын сонуна апармышды. Павелин 1 Коринфлиләрә 15:24, 25, 28 ајәләриндәки сөзләрин там мәғзини тәсәввүр етмәјә чалышын. (Ајәләри оху.)
17, 18. а) Јеһова һансы мәнада бәшәр тарихинин та башланғыҹында «һәр кәс үчүн һәр шеј» олуб? б) Иса бирлик вә һармонијаны бәрпа етмәк үчүн нә едәҹәк?
17 Миниллијин сонунда һәјатын неҹә олаҹағыны тәсвир етмәк үчүн «Аллаһ һәр кәс үчүн һәр шеј [олаҹаг]» сөзләриндән јахшы сөзләр тапа билмәрик. Бу, нә демәкдир? Ҝәлин хәјалән Еден бағына — камил инсанлар олан Адәмлә Һәвванын Јеһованын сүлһ вә һармонија ичиндә јашајан үмумдүнја аиләсинин үзвү олдуглары вахтлара гајыдаг. Каинатын Али Һөкмдары Јеһова јаратдыглары бүтүн мәхлуглары — мәләкләри вә инсанлары бирбаша идарә едирди. Онлар шәхсән Јеһова илә үнсијјәт едирдиләр, Она ибадәт едир вә хејир-дуаларыны алырдылар. О, «һәр кәс үчүн һәр шеј» иди.
18 Шејтанын тәсиринә ујараг илк инсанлар Јеһованын һөкмранлығына гаршы чыханда бу һармонија позулду. Лакин 1914-ҹү илдән етибарән Аллаһын Падшаһлығы бирлик вә һармонијаны бәрпа етмәк үчүн тәдриҹән аддымлар атыр (Ефес. 1:9, 10). Миниллик Һөкмранлыг заманы һал-һазырда «ҝөзлә ҝөрүнмәјән» мөһтәшәм хејир-дуалар ҝерчәкләшәҹәк. Бундан сонра «сон» ҝәләҹәк, јәни Мәсиһин Миниллик Һөкмранлығы битәҹәк. Бәс сонра нә баш верәҹәк? «Ҝөјдәки вә јердәки бүтүн һакимијјәт» Исаја верилсә дә, о, шөһрәтпәрәст дејил. О, Јеһованын мөвгејинә ҝөз дикмәјиб. Иса тәвазөкарлыгла «падшаһлығы өз Атасы Аллаһа тәһвил верәҹәк». О, гејри-ади мөвге вә һакимијјәтиндән Аллаһа тәриф уҹалтмаг үчүн истифадә едәҹәк (Мат. 28:18; Филип. 2:9—11).
19, 20. а) Падшаһлығын бүтүн тәбәәләри Јеһованын али һөкмранлығыны гәбул етдикләрини неҹә ҝөстәрәҹәкләр? б) Бизи һансы мөһтәшәм ҝәләҹәк ҝөзләјир?
19 Артыг о вахт Падшаһлығын јердәки тәбәәләри камиллијә јетишәҹәкләр. Онлар Исанын нүмунәсини изләјәрәк Јеһованын али һөкмранлығыны тәвазөкарлыгла вә көнүл хошлуғу илә гәбул едәҹәкләр. Әҝәр онлар сонунҹу имтаһандан уғурла кечсәләр, һәгигәтән дә, буну етмәк истәдикләрини ҝөстәрмиш олаҹаглар (Вәһј 20:7—10). Сонра инсан вә мәләкләр арасындан олан үсјанкарлар әбәдилик мәһв едиләҹәкләр. Бу неҹә дә ҝөзәл вә севиндириҹи вахт олаҹаг! Јеһованын ҝөјдәки вә јердәки аиләси фәрәһлә «һәр кәс үчүн һәр шеј» олан Јеһоваја һәмд едәҹәк. (Мәзмур 99:1—3 ајәләрини оху.)
20 Гаршыда бизи ҝөзләјән Падшаһлығын мөһтәшәм хејир-дуалары сизи Аллаһын ирадәсини ҹанла-башла јеринә јетирмәјә тәшвиг едирми? Шејтан дүнјасынын тәклиф етдији бош үмид вә тәсәллини рәдд едирсинизми? Јеһованын али һөкмранлығыны дәстәкләмәк гәтијјәтинизи мөһкәмләндирәҹәксинизми? Гој әмәлләриниздән ҝөрүнсүн ки, сиз буну әбәдијјәт боју етмәк истәјирсиниз. Онда сиз јалныз миниллик әрзиндә јох, әбәдијјәт боју сүлһ вә фираванлыгдан зөвг алмаг шәрәфинә лајиг ҝөрүләҹәксиниз!
[11–ҹи сәһифәдәки шәкил]
Иса Падшаһ вәзифәсини там иҹра етдикдән сонра тәвазөкарлыгла һакимијјәти Атасына тәһвил верәҹәк