Өзүмүзү Падшаһлығын вәтәндашлары кими апараг
«Хош хәбәрә лајиг јашајын» (ФИЛИП. 1:27).
НЕҸӘ ҸАВАБ ВЕРӘРДИН?
Падшаһлығын вәтәндашлары кимләр ола биләр?
Падшаһлығын дилини, тарихини вә ганунларыны өјрәнмәк нә демәкдир?
Падшаһлығын вәтәндашлары Аллаһын ганунларыны севдикләрини неҹә ҝөстәрирләр?
1, 2. Нәјә ҝөрә Павелин мәсләһәти Филипи јығынҹағы үчүн хүсуси мәна кәсб едирди?
ҺӘВАРИ ПАВЕЛ Филипи јығынҹағыны хош хәбәрә лајиг тәрздә јашамаға тәшвиг едирди. (Филипилиләрә 1:27 ајәсини оху.) Бурада «лајиг јашајын» кими тәрҹүмә олунан јунан ифадәсини «өзүнүзү вәтәндашлар кими апарын» кими дә тәрҹүмә етмәк олар. Бу ифадә Филипи јығынҹағы үчүн хүсуси мәна кәсб едирди. Нәјә ҝөрә? Чүнки Филипи шәһәри сакинләринә Рома вәтәндашлығынын мүәјјән нөвүнүн верилдији сечилмиш шәһәрләр групуна дахил иди. Филипидә, еләҹә дә бүтүн Рома империјасында јашајан Рома вәтәндашлары өз мөвгеләри илә фәхр едирдиләр вә Рома ганунлары алтында хүсуси шәкилдә мүһафизә олунурдулар.
2 Анҹаг Филипи јығынҹағынын үзвләринин фәхр етмәк үчүн даһа бөјүк сәбәби вар иди. Павел онлара хатырлатмышды ки, мәсһ олунмуш мәсиһчиләр кими, онларын вәтәндашлығы ҝөјләрдәдир (Филип. 3:20). Онлар ади инсан империјасынын јох, Аллаһын Падшаһлығынын вәтәндашлары идиләр вә буна ҝөрә дә тајы-бәрабәри олмајан мүдафиә вә үстүнлүкләрә саһиб идиләр (Ефес. 2:19—22).
3. а) Кимләрин Аллаһын Падшаһлығынын вәтәндашлары олмаг имканы вар? б) Бу мәгаләдә нәји нәзәрдән кечирәҹәјик?
3 Павелин «өзүнүзү вәтәндашлар кими апарын» нәсиһәти, әсас етибарилә, Мәсиһлә бирҝә ҝөјдә һөкмранлыг едәҹәк мәсиһчиләрә аиддир (Филип. 3:20). Даһа ҝениш мәнада исә буну Аллаһын Падшаһлығынын јердә јашајаҹаг тәбәәләринә аид етмәк олар. Нәјә ҝөрә? Чүнки бүтүн һәср олунмуш мәсиһчиләр ејни Падшаһа — Јеһова Аллаһа ибадәт едирләр вә Онун бүтүн хидмәтчиләринә олан тәләбләри ејнидир (Ефес. 4:4—6). Бу ҝүн бәзиләри инкишаф етмиш өлкәнин вәтәндашлығыны алмаг үчүн чох сәј ҝөстәрирләр. Ҝөрүн онда биз Аллаһын Падшаһлығынын вәтәндашы олмаг имканымызы нә гәдәр гијмәтләндирмәлијик! Бу шәрәфи даһа чох гијмәтләндирәк дејә ҝәлин инсан һөкумәтинин вәтәндашы олмаг үчүн тәләбләрлә Аллаһын Падшаһлығынын вәтәндашы олмаг үчүн тәләбләр арасындакы бәзи охшарлыглары нәзәрдән кечирәк. Сонра исә Аллаһын Падшаһлығынын вәтәндашы олмаг шәрәфиндән мәһрум олмамаг үчүн етмәли олдуғумуз үч шеји нәзәрдән кечирәҹәјик.
ВӘТӘНДАШЛЫГ АЛМАГ ҮЧҮН ТӘЛӘБЛӘР
4. Пак дил нәдир вә биз бу дилдә неҹә данышырыг?
4 Дили өјрән. Бәзи һөкумәтләр вәтәндашлыг алмаг үчүн әризә верәнләрдән дөвләтин дилини өјрәнмәји тәләб едирләр. Һәтта вәтәндашлыг алдыгдан сонра да онлар јени дилдә сәлис данышана гәдәр, ола билсин, бир нечә ил кечсин. Онлар грамматик гајдалары тез мәнимсәјә биләрләр, лакин сөзләри дүзҝүн тәләффүз етмәји өјрәнмәк үчүн вахт лазымдыр. Ејнилә, Аллаһын Падшаһлығы өз вәтәндашларындан Мүгәддәс Китабда «пак дил» адланан дили өјрәнмәји тәләб едир. (Сефанја 3:9 ајәсини оху.) Пак дил нәдир? Бу, Мүгәддәс Китабын Аллаһ вә Онун нијјәтләри һагда өјрәтдији һәгигәтдир. Биз Аллаһын ганун вә принсипләринә ујғун даврананда бу дилдә «данышырыг». Аллаһын Падшаһлығынын вәтәндашлары Мүгәддәс Китабын әсас тәлимләрини тез бир заманда өјрәнә вә вәфтиз олуна биләрләр. Бунунла белә, вәфтиздән сонра онлар пак дилдә даһа јахшы «данышмаг» үчүн пүхтәләшмәлидирләр. Неҹә? Һәр биримиз Мүгәддәс Китабдан өјрәндијимиз принсипләрлә онлары тәтбиг етмәк арасындакы бошлуглары долдурмалыјыг.
5. Нәјә ҝөрә биз Јеһованын тәшкилатынын тарихи барәдә мүмкүн гәдәр чох өјрәнмәлијик?
5 Тарихи өјрән. Вәтәндашлыг алмаг истәјән шәхсдән өлкәнин тарихини өјрәнмәк тәләб олуна биләр. Буна бәнзәр шәкилдә, Аллаһын Падшаһлығынын вәтәндашы олмаг истәјәнләр онун барәсиндә мүмкүн гәдәр чох мәлумат әлдә етмәјә чалышмалыдырлар. Ҝәлин гәдим Исраилдә хидмәт едән Гораһын оғулларынын нүмунәсинә нәзәр салаг. Онлар Јерусәлими, орадакы ибадәт јерини чох севирдиләр вә шәһәрин тарихи барәдә данышмағы хошлајырдылар. Онлара ән чох тәсир бағышлајан шәһәрин вә ибадәт јеринин ҝөзәллији јох, Јерусәлимин «бөјүк Падшаһын [јәни Јеһованын] шәһәри» олмасы иди. Чүнки бу шәһәр тәмиз ибадәтин мәркәзи сајылырды. Мәһз бурада Јеһованын Гануну өјрәдилирди. Јерусәлимин Падшаһы Јеһова Исраил халгыны идарә едирди вә Өз севҝи долу хејирхаһлығыны онлара ҝөстәрирди. (Мәзмур 48:1, 2, 9, 12, 13 ајәләрини оху.) Онлар кими, сәндә дә Јеһованын тәшкилатынын јерүзү һиссәсинин тарихи һагда өјрәнмәк вә данышмаг истәји вармы? Јеһованын тәшкилаты вә Онун Өз халгына неҹә дәстәк олдуғу барәдә даһа чох өјрәндикҹә Аллаһын Падшаһлығы сәнин үчүн бир о гәдәр реал олаҹаг. Онда Падшаһлыг һагда хош хәбәри тәблиғ етмәк истәјин тәбии шәкилдә артаҹаг (Јер. 9:24; Лука 4:43).
6. Нәјә ҝөрә Јеһованын биздән Падшаһлығын ганун вә принсипләрини өјрәнмәјимизи ҝөзләмәси мәнтигәујғундур?
6 Ганунлары өјрән. Инсан һөкумәтләри өз тәбәәләриндән өлкәнин ганунларыны өјрәнмәји вә онлара табе олмағы тәләб едир. Бәс онда Јеһованын биздән Падшаһлығын бүтүн вәтәндашлары үчүн тәсис етдији ганун вә принсипләрини өјрәнмәјимизи, еләҹә дә онлара табе олмағымызы ҝөзләмәси нә гәдәр јәгиндир? (Јешаја 2:3; Јәһ. 15:10; 1 Јәһ. 5:3). Инсан ганунларында чох вахт чатышмазлыглар олур, үстәлик, онлар әдаләтсиз ола биләр. Онлардан фәргли олараг, Јеһованын «гануну камилдир» (Мәз. 19:7). Биз Аллаһын ганунларындан зөвг алырыгмы? Онун Кәламыны һәр ҝүн охујуругму? (Мәз. 1:1, 2). Аллаһын ганунларыны өјрәнмәјин јеҝанә јолу шәхсән өзүмүзүн ону арашдырмағымыздыр. Һеч кәс буну бизим јеримизә едә билмәз.
ПАДШАҺЛЫҒЫН ВӘТӘНДАШЛАРЫ АЛЛАҺЫН ГАНУНЛАРЫНЫ СЕВИРЛӘР
7. Падшаһлығын вәтәндашлары һансы јүксәк нормаја әсасән јашајырлар?
7 Падшаһлығын вәтәндашлары олараг галмаг үчүн биздән јалныз Аллаһын нормаларыны билмәк јох, һәмчинин онлары севмәк дә тәләб олунур. Бир чох инсанлар јалныз дилдә өз өлкәләринин ганунларыны гәбул етдикләрини вә онлары севдикләрини дејирләр. Бунунла белә, һансыса ганун онлара сәрф етмәјәндә вә онлары һеч кәс ҝөрмәјәндә ону асанлыгла позурлар. Чох вахт беләләри башгаларынын рәғбәтини газанмаг хатиринә садәҹә ҝөздән пәрдә асырлар (Колос. 3:22). Падшаһлығын вәтәндашлары исә даһа јүксәк нормаја әсасән јашајырлар. Һәтта һеч кәс бизи кәнардан ҝөрмәјәндә белә биз Аллаһын ганунларына ҹанла-башла табе олуруг. Нәјә ҝөрә? Чүнки биз һәмин ганунлары тәсис едән Јеһова Аллаһы севирик (Јешаја 33:22; Лука 10:27 ајәсини оху).
8, 9. Аллаһын ганунларыны үрәкдән севдијини неҹә мүәјјән едә биләрсән?
8 Бәс сән Аллаһын ганунларыны үрәкдән севдијини неҹә мүәјјән едә биләрсән? Бунун үчүн сәнә, ола билсин, һәр кәсин шәхси иши кими ҝөрүнән ҝејим вә хариҹи ҝөрүнүш кими мәсәләләрлә әлагәдар мәсләһәт вериләркән неҹә реаксија ҝөстәрдијини тәһлил ет. Ола билсин, Падшаһлығын вәтәндашы олмаздан әввәл сән ачыг-сачыг вә ја неҹә ҝәлди ҝејинирдин. Анҹаг Аллаһа мәһәббәтин артдыгҹа Она шәрәф ҝәтирән тәрздә ҝејинмәји өјрәндин (1 Тим. 2:9, 10; 1 Пет. 3:3, 4). Инди исә, туталым, сән фикирләширсән ки, ҝејим тәрзин әдәблидир. Бәс әҝәр ағсаггал сәнә јахынлашыб десә ки, ҝејим тәрзин јығынҹагда бир чох тәблиғчиләри бүдрәдир, онда неҹә давранаҹагсан? Өзүнү мүдафиә етмәјә, һиддәтләнмәјә, јахуд да инадкарлыг ҝөстәрмәјә башлајаҹагсанмы? Падшаһлығын ән ваҹиб ганунларындан бири одур ки, онун бүтүн вәтәндашлары Мәсиһи тәглид етмәлидирләр (1 Пет. 2:21). Исанын нүмунәси барәдә һәвари Павел јазмышды: «Ҝәлин һәр биримиз јахынымызын хејри вә гүввәтләнмәси үчүн чалышаг. Ахы Мәсиһ дә өз хејрини дүшүнмүрдү» (Ром. 15:2, 3). Јеткин мәсиһчи јығынҹагда сүлһү горумаг хатиринә һиддәтләнмәдән башгаларынын виҹданыны нәзәрә алмаға һазырдыр (Ром. 14:19—21).
9 Инди исә ҝәлин даһа ики ваҹиб саһәјә — ҹинси әлагә вә никаһа даир нөгтеји-нәзәримизә диггәт јетирәк. Һәлә ки Аллаһын Падшаһлығынын вәтәндашы олмајанлар һомосексуализмә нормал баха, порнографијаны зәрәрсиз әјләнҹә һесаб едә, хәјанәтә вә бошанмаја исә һәр кәсин шәхси иши кими јанаша биләрләр. Падшаһлығын вәтәндашлары белә дардүшүнҹәликдән вә худбин мүнасибәтдән азад олублар. Бахмајараг ки бир чох мәсиһчиләр әввәлләр әхлагсыз һәјат тәрзи сүрүрдүләр, анҹаг инди онлар ҹинси әлагәјә вә никаһа Аллаһдан олан әнам кими бахырлар. Онлар Јеһованын јүксәк нормаларыны гијмәтләндирир вә тамамилә разыдырлар ки, ҹинси әхлагсызлыгла мәшғул олмаға давам едән инсанлар Падшаһлығын вәтәндашлары олмаг шәрәфинә лајиг дејилләр (1 Кор. 6:9—11). Лакин ејни заманда онлар баша дүшүрләр ки, үрәк һијләҝәрдир (Јер. 17:9). Бу сәбәбдән онлар јүксәк әхлаг нормаларына риајәт етмәкдә онлара көмәк едән хәбәрдарлыглары гијмәтләндирирләр.
ПАДШАҺЛЫҒЫН ВӘТӘНДАШЛАРЫ ХӘБӘРДАРЛЫГЛАРЫ ГИЈМӘТЛӘНДИРИРЛӘР
10, 11. Аллаһын Падшаһлығы вахтлы-вахтында нә барәдә хәбәрдарлыг едир вә бу кими хәбәрдарлыглар һагда сән нә дүшүнүрсән?
10 Инсан һөкумәтләри бәзән сакинләрини әрзаг вә дәрманларын сағламлыға вура биләҹәји зијан барәдә хәбәрдар едирләр. Сөзсүз ки, әрзагларын вә дәрман препаратларынын һамысы зәрәрли дејил. Лакин әҝәр һансыса мәһсул тәһлүкә мәнбәјидирсә, һөкумәт вәтәндашларыны горумаг үчүн хәбәрдарлыг едә биләр. Әҝәр һөкумәт буну етмәзсә, ишинә сәһләнкар јанашмагда иттиһам олунаҹаг. Ејнилә, Аллаһын Падшаһлығы әхлаги вә руһани сағламлығымыза тәһлүкә јарада биләҹәк мәсәләләр барәдә вахтлы-вахтында хәбәрдарлыг едир. Мәсәлән, Интернет үнсијјәт етмәк, тәһсил алмаг вә әјләнмәк үчүн фајдалы бир васитәдир. Аллаһын тәшкилаты Интернетдән истифадә едир вә онун көмәјилә чохлу хејирли ишләр һәјата кечирир. Бунунла белә, бир чох Интернет сајтлары әхлаги вә руһани ҹәһәтдән тәһлүкә мәнбәјидир. Порнографик веб-сајтлар Падшаһлығын вәтәндашларынын руһани сағламлығы үчүн хүсусилә тәһлүкәлидир. Артыг нечә илләрдир ки, садиг нөкәр синфи белә сајтларын нә гәдәр тәһлүкәли олдуғу илә бағлы хәбәрдарлыглар едир. Бизә руһән сағлам галмаға көмәк едән бу хәбәрдарлыглары чох гијмәтләндиририк!
11 Сон илләрдә сосиал шәбәкә кими танынан Интернет сајтлары чох мәшһурлашыб. Онлардан еһтијатла истифадә етдијимиз тәгдирдә, фајдасыны ҝөрә биләрик. Анҹаг бу сајтлар зәрәрли дә ола биләр. Сосиал шәбәкәдә үнсијјәт едән инсанлар пис достларын тәсиринә мәруз гала биләрләр (1 Кор. 15:33). Мәһз елә бу сәбәбә ҝөрә Аллаһын тәшкилаты белә сајтларын истифадәси илә бағлы өлчүлүб-бичилмиш хәбәрдарлыглар едир. Сән садиг нөкәрин сосиал шәбәкәләрлә бағлы дәрҹ етдији сон мәгаләләрин һамысыны охумусанмы? Онлары охумадан белә сајтлардан истифадә етмәк неҹә дә ағылсызлыг оларды!a Бу, ҝүҹлү дәрманын әкс ҝөстәришләри илә таныш олмадан ону гәбул етмәјә бәнзәјир.
12. Нәјә ҝөрә хәбәрдарлыглара мәһәл гојмамаг ағылсызлыгдыр?
12 Садиг нөкәр тәрәфиндән верилән хәбәрдарлыглара мәһәл гојмајанлар гачылмаз олараг һәм өзләринә, һәм дә онлары севән инсанлара зәрәр вурурлар. Порнографијаја алудә оланлар вә әхлагсызлыг едәнләрин бәзиләри өзләрини инандырыблар ки, Јеһова онларын әмәлләрини ҝөрмүр. Әмәлләримизи Јеһовадан ҝизләтмәјин мүмкүн олдуғуну дүшүнмәк неҹә дә ағылсызлыгдыр! (Сүл. мәс. 15:3; Ибраниләрә 4:13 ајәсини оху). Аллаһ белә инсанлара көмәк етмәк истәдији үчүн онларын јанына Өз тәмсилчиләрини ҝөндәрир (Галат. 6:1). Лакин һөкумәт мүәјјән һәрәкәтләрә ҝөрә инсанлары вәтәндашлыгдан мәһрум етдији кими, Јеһова да Онун ганунларыны позан вә төвбә етмәјән инсанлары Падшаһлығын вәтәндашлығындан мәһрум едәҹәкb (1 Кор. 5:11—13). Анҹаг Јеһова мәрһәмәтли Аллаһдыр. Төвбә едиб пис әмәлләриндән әл чәкән инсанлар јенидән Јеһова гаршысында јахшы ад газана вә Падшаһлығын вәтәндашлары олараг гала биләрләр (2 Кор. 2:5—8). Бу ҹүр мәһәббәтли Падшаһа хидмәт етмәк неҹә дә бөјүк шәрәфдир!
ПАДШАҺЛЫҒЫН ВӘТӘНДАШЛАРЫ ТӘҺСИЛИ ГИЈМӘТЛӘНДИРИРЛӘР
13. Падшаһлығын вәтәндашлары тәһсилә дәјәр вердикләрини неҹә ҝөстәрирләр?
13 Бир чох һөкумәтләр вәтәндашларынын тәһсил алмалары үчүн чох зәһмәт чәкирләр. Онлар инсанларын јазыб-охуја билмәләри, сәнәтә јијәләнмәләри үчүн мәктәбләр тикирләр. Падшаһлығын вәтәндашлары јашадыглары өлкәнин һөкумәтинин бу кими сәјләрини гијмәтләндирирләр вә чалышганлыгла јазыб-охумағы, о ҹүмләдән өзләрини мадди ҹәһәтдән тәмин етмәји өјрәнирләр. Амма Аллаһын Падшаһлығынын вәтәндашлары кими алдыглары тәһсил онлар үчүн даһа гијмәтлидир. Мәсиһчи јығынҹағы васитәсилә Јеһова инсанлара савад верир. Валидејнләр балаҹа ушаглары илә бирҝә охумаға тәшвиг олунурлар. Һәр ај садиг нөкәр Мүгәддәс Китаба әсасланан «Ҝөзәтчи гүлләси» вә «Ојанын!» журналлары гисминдә материал чап едир. Әҝәр сән ај әрзиндә һәр ҝүн бир нечә сәһифә охусан, онда Падшаһлығын вердији тәһсиллә ајаглашаҹагсан.
14. а) Биз һансы тәлими алырыг? б) Аиләви ибадәт ахшамы илә бағлы верилән һансы мәсләһәтләри тәтбиг етмисән?
14 Һәр һәфтә Падшаһлығын вәтәндашлары јығынҹаг ҝөрүшләриндә тәлим алырлар. Мисал үчүн, Теократик Хидмәт Мәктәби алтмыш илдән чохдур ки, бу мәктәбә јазыланлара Аллаһын Кәламыны мәһарәтлә өјрәтмәјә көмәк едир. Сән бу мәктәбә јазылмысанмы? Сон илләрдә садиг нөкәр хүсуси шәкилдә аиләләри һәр һәфтә аиләви ибадәт ахшамы кечирмәјә тәшвиг едир. Бу, аиләдә бирлији мөһкәмләндирир. Сән нәшрләримиздәки бу мәсләһәтләри тәтбиг етмисәнми?c
15. Бизим лајиг ҝөрүлдүјүмүз ән бөјүк шәрәфләрдән бири һансыдыр?
15 Инсанлар истәјирләр ки, үзв олдуглары партијаны даһа чох инсан дәстәкләсин, һәтта бунун үчүн евдән-евә ҝедирләр. Падшаһлығын вәтәндашлары һәм күчәләрдә, һәм дә евдән-евә сәјлә тәблиғ едәрәк Аллаһын Падшаһлығыны даһа бөјүк мигјасда дәстәкләјирләр. Кечән ҝөрүшдә арашдырылан мәгаләдә гејд олундуғу кими, Јеһованын Падшаһлығыны бәјан едән «Ҝөзәтчи гүлләси» журналы бүтүн дүнјада ән ҝениш јајылан журналдыр! Аллаһын Падшаһлығы һагда башгаларына данышмаг бизим лајиг ҝөрүлдүјүмүз ән бөјүк шәрәфләрдән биридир. Бәс сән тәблиғ ишиндә сәјлә иштирак едирсәнми? (Мат. 28:19, 20).
16. Сән Аллаһын Падшаһлығынын лајигли вәтәндашы олдуғуну неҹә ҝөстәрә биләрсән?
16 Тезликлә Аллаһын Падшаһлығы јер үзүнү идарә едән јеҝанә һөкумәт олаҹаг. О јалныз бизим руһанилијимизә јох, һәмчинин ҝүндәлик һәјатымызын һәр бир саһәсинә нәзарәт едәҹәк. Онда сән јахшы вәтәндаш олаҹагсанмы? Јашадығымыз дөвр буну сүбут етмәк үчүн мүнасиб вахтдыр. Гој сәнин ҝүн әрзиндә вердијин гәрарлар Јеһованы иззәтләндирсин вә Аллаһын Падшаһлығынын лајигли вәтәндашы олдуғуну ҝөстәрсин (1 Кор. 10:31).
[Һашијәләр]
a Мәсәлән, «Ҝөзәтчи гүлләси»нин 2011-ҹи ил октјабр—декабр сајынын 16-дан 19-дәк сәһифәләринә; 2012-ҹи ил јанвар—март сајынын 12-дән 15-дәк сәһифәләринә, еләҹә дә «Ојанын!» журналынын 2012-ҹи ил феврал сајынын 3-дән 9-дәк сәһифәләринә (рус.) бах.
b «Ҝөзәтчи гүлләси»нин 2012-ҹи ил 15 март сајынын 30 вә 31-ҹи сәһифәләринә бах.
c «Ҝөзәтчи гүлләси»нин 2011-ҹи ил 15 август сајынын 6 вә 7-ҹи сәһифәләринә вә «Бизим Падшаһлыг Хидмәтимиз» вәрәгәсинин 2011-ҹи илин јанвар ајынын 3-дән 6-дәк сәһифәләринә бах.
[14–ҹү сәһифәдәки јазы]
Сән Интернетлә бағлы Мүгәддәс Китаб әсасында верилән хәбәрдарлыглара диггәт јетирирсәнми?
[12–ҹи сәһифәдәки шәкил]
Гораһын оғуллары кими, сән дә тәмиз ибадәти вә онун тарихини севирсәнми?
[15–ҹи сәһифәдәки шәкил]
Аиләви ибадәт ахшамы сәнә, еләҹә дә аилә үзвләринә Падшаһлығын јахшы вәтәндашлары олмаға көмәк едә биләр