Билирсинизми?
Аллаһ Петерә Корнилинин евинә ҝетмәји бујурмамышдан габаг, онун даббағын евиндә галмасындан нә өјрәнә биләрик?
▪ «Һәвариләрин ишләри» китабында гејд олунур ки, «Петер бир мүддәт Јаффада» еви дәниз кәнарында олан «даббағ Шимонун евиндә галды» (Һәвариләрин ишләри 9:43; 10:6). Јәһудиләрин фикринҹә, даббағ иши натәмиз вә ашағы сәвијјәли иш сајылырды. Талмудда ҝөстәрилдији кими, даббағ иши һәтта пејин јығмагдан да бетәр һесаб олунурду. Шимеон һәмишә өлү һејванларын ҹәсәди илә ишләдији үчүн о, натәмиз сајылырды (Левилиләр 5:2; 11:39). Бәзи мәнбәләрә әсасән, еһтимал ки, Шимеон даббағ ишиндә дәниз сујундан истифадә едирди вә фәрз едилир ки, онун даббағханасы шәһәрдән кәнарда јерләширди, чүнки дәридән үфунәт ији ҝәлирди.
Бунунла белә, Петер Шимеонун евиндә галырды. Бундан ҝөрүнүр ки, о, Исанын нүмунәсини изләјәрәк јәһудиләрин арасында натәмиз сајылан инсанларла бағлы јајылан јанлыш фикирләри рәдд едирди (Матта 9:11; Лука 7:36—50).
Исанын: «Сән өзүн буну дедин» сөзләри һансы мәнаны дашыјыр?
▪ Јәһудиләрин баш каһини Кајафа Исадан: «Аллаһын Оғлу Мәсиһ сәнсән?» — дејә сорушанда Иса она белә ҹаваб верди: «Сән өзүн буну дедин» (Матта 26:63, 64). Бу сөзләр һансы мәнаны дашыјырды?
Иса Мәсиһ Кајафанын суалындан јајынмаға чалышмырды. «Сән өзүн буну дедин» — ифадәси, ҝүман ки, дејилән сөзүн һәгигәт олдуғуну ҝөстәрән јәһуди идиому иди. Мәсәлән, ерамызын ЫВ әсриндә тәртиб олунан јәһудиләрин дини китабы Јерусәлим Талмудунда бир јәһудидән данышылыр. Ондан раввинин өлүб-өлмәдијини хәбәр аланда о белә ҹаваб вериб: «Буну сән дедин». Онун бу ҹавабы раввинин, доғрудан да, өлдүјүнү тәсдигләјирди.
Иса гәбул едирди ки, сөзләрини тәсдигләмәси үчүн баш каһинин она анд вердирмәјә ихтијары чатыр. Үстәлик, онун сусмасыны Мәсиһ олдуғуну инкар етмәси кими баша дүшә биләрдиләр. Буна ҝөрә дә, Иса: «Сән өзүн буну дедин», — сөзләрилә баш каһинин суалына мүсбәт ҹаваб вермиш олду. Ејни һадисә Мүгәддәс Китабын «Марк» китабында гејдә алыныб вә орада дејилир ки, Кајафа бирбаша Исаја суал верәндә о, ҹәсарәтлә: «Бәли, мәнәм» — дејә ҹаваб верди. (Марк 14:62; һәмчинин Матта 26:25 вә Марк 15:2 ајәләринә бахын.)
[26–ҹы сәһифәдәки шәкил]
Фес шәһәриндә даббағхана (Мәракеш)