Гој Исанын сөзләри сәнин давранышына тәсир етсин!
«Аллаһын ҝөндәрдији Кимсә, Аллаһын кәламларыны сөјләр» (ЈӘҺ. 3:34).
1, 2. Исанын Дағүстү тәблиғиндәки кәлмәләри нәјә бәнзәтмәк олар вә нәјә ҝөрә демәк олар ки, онлар тамамилә ‘Аллаһын кәламларына’ әсасланыб?
ДҮНЈАНЫН ән бөјүк брилјантларындан бири олан 530 каратлыг «Африка улдузу»дур. Бу, һәгигәтән дә чох гијмәтли дашдыр! Амма Исанын Дағүстү тәблиғиндәки руһани кәлмәләр ондан да гијмәтлидир. Бу бизи тәәҹҹүбләндирмир, чүнки Мәсиһин кәламларынын Мәнбәји Јеһовадыр! Мүгәддәс Китабда Иса һаггында дејилир: «Аллаһын ҝөндәрдији Кимсә, Аллаһын кәламларыны сөјләр» (Јәһ. 3:34-36).
2 Ола билсин, Дағүстү тәблиғини Иса отуз дәгигәдән аз вахта сөјләмишдир, бунунла белә, орада Ибраниҹә Мүгәддәс Јазыларын сәккиз китабындан 21 ситат ҝәтирилир. Буна ҝөрә дә, бу нитг тамамилә ‘Аллаһын кәламларына’ әсасланыб. Ҝәлин ҝөрәк, Аллаһын севимли Оғлунун мүкәммәл нитгиндәки бәзи дәјәрли кәламлары неҹә тәтбиг едә биләрик.
«Ҝет әввәлҹә гардашын илә барыш»
3. Шаҝирдләринә кин сахламағын нәтиҹәләри һагда хәбәрдарлыг етдикдән сонра Иса онлара һансы мәсләһәти верди?
3 Бир мәсиһчи кими, биз хошбәхт вә сүлһпәрвәрик, чүнки үзәримиздә Аллаһын мүгәддәс руһу вар, онун сәмәрәсинә исә сүлһ вә севинҹ дахилдир (Галат. 5:22, 23). Иса шаҝирдләринин сүлһ вә хошбәхтлији итирмәләрини истәмирди, буна ҝөрә дә, кин сахламағын өлүмлә нәтиҹәләнә биләҹәјини сөјләди. (Матта 5:21, 22 ајәләрини оху.) Сонра о билдирди: «Беләликлә, әҝәр өз гурбаныны гурбанҝаһ гаршысына ҝәтирдијин заман орада јадына дүшсә ки, гардашынын сәнә гаршы бир шикајәти вар, гурбаныны орада гурбанҝаһын гаршысында гој, ҝет әввәлҹә гардашын илә барыш вә ондан сонра ҝәл, гурбаныны тәгдим ет» (Мат. 5:23, 24).
4, 5. а) Матта 5:23, 24 ајәләриндә Исанын һаггында данышдығы ‘гурбан’ нә ола биләрди? б) Инҹимиш гардашла барышмаг нә дәрәҹәдә ваҹибдир?
4 Исанын бурада хатырлатдығы ‘гурбан’ Јерусәлим мәбәдиндә ҝәтирилән истәнилән тәгдим ола биләрди. Мәсәлән, о вахт һејван гурбанлары Јеһоваја ибадәтин бир һиссәси олдуғу үчүн лабүд сајылырды. Лакин Иса бундан да ваҹиб олан бир шеји — Аллаһа гурбан ҝәтирмәздән әввәл инҹимиш гардашла барышмағын ваҹиблијини вурғулады.
5 Исанын бу сөзләриндән нә өјрәнә биләрик? Башгалары илә неҹә рәфтар етмәјимиз бирбаша Јеһова илә мүнасибәтләримизә тәсир ҝөстәрир (1 Јәһ. 4:20). Гәдимдә инсан башгалары илә јахшы рәфтар етмәјәндә онун Аллаһа ҝәтирдији гурбанлар мәнасыз олурду. (Микеја 6:6-8 ајәләрини оху.)
Тәвазөкарлыг ҝөстәрмәјин ваҹиблији
6, 7. Гәлбинә тохундуғумуз гардашла барышмаға чалышанда тәвазөкарлыг тәзаһүр етдирмәк нәјә ҝөрә ваҹибдир?
6 Гәлбинә дәјдијимиз гардашла барышмаг тәвазөкарлығымыз үчүн сынаг ола биләр. Тәвазөкар инсан ҝүман етдијинә ҝөрә малик олдуғу һүгугларыны мүдафиә етмәк үчүн һәмиманлылары илә мүбаһисәјә ҝиришмир вә өз дедијинин үстүндә дурмур. Бу, гәдим Коринфдә мәсиһчиләр арасында мөвҹуд олан вәзијјәтә ҝәтириб чыхарараг вәзијјәти даһа да ағырлашдырарды. Һәмин вәзијјәтә даир һәвари Павел белә бир дүшүндүрүҹү фикир сөјләмишди: «Аранызда мүһакимәнин олмасы да сизин үчүн бүсбүтүн мәғлубијјәтдир. Бунун әвәзиндә, һагсызлыға гатлашмаг даһа јахшы дејилми? Нә үчүн гәддарлыға дөзмүрсүнүз?» (1 Кор. 6:7).
7 Иса демәди ки, биз гардашымызын јанына өзүмүзүн һаглы, онун исә һагсыз олдуғуну сүбут етмәк үчүн ҝетмәлијик. Мәгсәдимиз гардашла арамызда сүлһү бәрпа етмәк олмалыдыр. Бунун үчүн биз өз һиссләримизи ачыг-ајдын билдирмәлијик. Һәмчинин гаршымыздакы инсанын һиссләринә тохундуғумузу етираф етмәлијик. Әҝәр сәһвә јол вермишиксә, әлбәттә ки, тәвазөкарлыгла үзр истәјәҹәјик.
«Сағ ҝөзүн сәни пис јола чәксә»
8. Исанын Матта 5:29, 30 ајәләриндә дедикләрини гысаҹа данышын.
8 Дағүстү тәблиғиндә Иса мәнәви дәјәрләрә даир сағлам бир мәсләһәт вермишдир. О, гејри-камил бәдән үзвләримизин бизә пис тәсир ҝөстәрә биләҹәјиндән хәбәрдар иди. Буна ҝөрә дә Иса деди: «Әҝәр сағ ҝөзүн сәни пис јола чәксә ону чыхар вә өзүндән хариҹ ет; чүнки сәнин үчүн үзвләриндән биринин јох олмасы, бүтүн бәдәнинин ҹәһәннәмә [«Ҝеһеннаја», ЈД] атылмасындан јахшыдыр. Вә әҝәр сағ әлин сәни пис јола чәксә ону кәс вә өзүндән хариҹ ет; чүнки сәнин үчүн үзвләриндән биринин јох олмасы, бүтүн бәдәнинин ҹәһәннәмә [«Ҝеһеннаја», ЈД] атылмасындан јахшыдыр» (Мат. 5:29, 30).
9. ‘Ҝөзүмүз’ вә ја ‘әлимиз’ бизи неҹә ‘пис јола чәкә’ биләр?
9 Исанын һаггында данышдығы ‘ҝөз’ фикримизи нәјәсә ҹәмләмәк баҹарығымызы вә габилијјәтимизи, ‘әл’ исә әлләримизлә етдијимиз ишләри тәмсил едир. Еһтијаты әлдән версәк, бәдәнимизин бу үзвләри бизи ‘пис јола чәкәр’ вә Аллаһла мүнасибәтләримизи поза биләр (Јар. 5:22; 6:9). Јеһованын сөзүндән чыхмаг истәји јарананда биз гәти аддымлар атмалыјыг, мәҹази мәнада десәк, ‘ҝөзүмүзү чыхартмалы’ вә ја ‘әлимизи кәсиб’ атмалыјыг.
10, 11. Ҹинси әхлагсызлыгдан горунмаға бизә нә көмәк едә биләр?
10 Ҝөзләримизи әхлагсыз шејләрә бахмагдан неҹә сахлаја биләрик? «Ҝөзләрим үчүн әһд етмишәм,— дејә Аллаһдан горхан Әјјуб дејир,— ҝөзүм бир гыза бахармы?» (Әјј. 31:1). Әјјуб евли, һәм дә Аллаһын әхлаг нормаларындан чыхмамаға гәти гәрарлы бир адам иди. Субај вә ја евли олмағымыздан асылы олмајараг, биздә дә белә гәтијјәт олмалыдыр. Ҹинси әхлагсызлыгдан гачынмаг үчүн биз Аллаһы севәнләрдә өзүнә һаким олмаг хүсусијјәти һасил едән руһа ҝөрә јашамалыјыг (Галат. 5:22-25).
11 Ҹинси әхлагсызлыгдан горунмаг үчүн өзүмүздән соруша биләрик: «Китабларда, телевизорда вә ја Интернетдә асанлыгла тапылан әдәбсиз материаллара гаршы ҝөзләримин мәндә һәвәс ојатмасына јол верирәмми?» Ҝәлин һәмчинин шаҝирд Јагубун сөзләрини јадымыздан чыхармајаг: «Һәр кәс өз еһтирасы илә апарылараг вә алданараг имтаһан олунур. Еһтирас исә бојлу галыб ҝүнаһ доғурур. Јетишән ҝүнаһ да өлүм төрәдир» (Јаг. 1:14, 15). Әҝәр Аллаһын һәср олунмуш хидмәтчиси әкс ҹинсдән олан бир кәсә әхлагсыз мотивләрлә ‘бахырса’, о, ҝөзүнү чыхартмаг вә әлини кәсмәк кими гәти дәјишикликләр етмәлидир. (Матта 5:27, 28 ајәләрини оху.)
12. Павелин һансы мәсләһәти әдәбсиз ҹисмани арзулара гаршы мүбаризә апармаға көмәк едә биләр?
12 Әлимиздән налајиг тәрздә истифадә етмәк Јеһованын әхлаг нормаларынын позулмасына ҝәтириб чыхара биләр, бу сәбәбдән әхлаги ҹәһәтдән тәмиз галмаға гәрарлы олмалыјыг. Буна ҝөрә Павелин мәсләһәтинә диггәт јетирмәлијик: «Дахили варлығынызын дүнјәви јөнләрини — ҹинси әхлагсызлыг, натәмизлик, шәһвәт, пис еһтирас вә бүтпәрәстлик олан тамаһкарлығы — өлдүрүн» (Колос. 3:5). «Өлдүрүн» сөзү әдәбсиз ҹисмани арзуларла мүбаризә апармаг үчүн ҝөрмәли олдуғумуз гәти тәдбирләрә ишарә едир.
13, 14. Нәјә ҝөрә әхлагсыз фикир вә һәрәкәтләрдән гачынмаг ваҹибдир?
13 Инсан һәјатыны хилас етмәк үчүн, чох ҝүман ки, әтрафларындан биринин ампутасија олунмасына разылыг верәҹәк. Јеһова илә мүнасибәтләримизи позаҹаг әхлагсыз фикирләр вә әмәлләрдән гачмаг үчүн мәҹази мәнада ҝөзүмүзү вә әлимизи ‘хариҹ етмәк’ ваҹибдир. Әбәди мәһвин символу олан Ҝеһеннадан гачмағын јеҝанә јолу әгли, әхлаги вә руһани тәмизлијимизи горумагдыр.
14 Ҝүнаһы вә гејри-камиллији мирас алдығымыздан әхлаги тәмизлији горумаг үчүн сәј тәләб олунур. Павел демишди: «Бәдәнимә ҹәфа вериб ону көлә едирәм ки, башгаларына вәз етдикдән сонра, өзүм јарышда иштирак етмәкдән мәһрум олмајым» (1 Кор. 9:27). Буна ҝөрә ҝәлин Исанын әхлага даир мәсләһәтинә әмәл етмәјә гәти гәрарлы олаг вә онун фидијә гурбанлығына нашүкүр олдуғумузу ҝөстәрән һәрәкәтләрә јол вермәјәк (Мат. 20:28; Ибр. 6:4-6).
«Верин»
15, 16. а) Сәхавәтли олмагда Иса неҹә нүмунә гојмушду? б) Исанын Лука 6:38 ајәсиндә јазылан сөзләри алтында нә нәзәрдә тутулур?
15 Исанын сөзләри вә бөјүк нүмунәси бизи сәхавәтли олмаға тәшвиг едир. Гејри-камил бәшәријјәтә көмәк етмәк үчүн јер үзүнә ҝәлмәклә о, бөјүк сәхавәт ҝөстәрди. (2 Коринфлиләрә 8:9 ајәсини оху.) Иса көнүллү олараг ҝөјләрдәки иззәтли мөвгејини бурахыб, инсан кими јер үзүнә ҝәлди вә өз һәјатыны ҝүнаһлы бәшәријјәт уғрунда гурбан верди. Онлардан бәзиләри сәмави Падшаһлыгда онун һәмварисләри олмаг сәрвәтини алаҹаг (Ром. 8:16, 17). Иса, шүбһәсиз ки, ашағыдакы сөзләри демәклә сәхавәтли олмаға тәшвиг едирди:
16 «Верин, сизә дә вериләҹәкдир: өлчүлүб-бичилмиш, силкәләниб-басылмыш, долуб-дашмыш, бол бир өлчү илә сизин әтәјинизә төкүләҹәкдир; чүнки һансы өлчү илә өлчсәниз, о өлчү илә дә сизә өлчүләҹәкдир» (Лука 6:38). ‘Әтәјә төкмәк’ ифадәси гәдимдә бәзи сатыҹыларын мүштәриләринин алдыглары шејләри онларын белинә кәмәрлә бағланмыш үст палтарларынын әтәјинә лазымынҹа долдурдугларыны ҝөстәрир. Үрәкдән ҝәлән сәхавәтлилијимиз сајәсиндә, ола билсин, биз дә еһтијаҹ дујдуғумуз заман јахшы пај алаҹағыг (Ваиз 11:2).
17. Јеһова вермәкдә әсас нүмунәни неҹә гојуб вә һансы ишдә сәхавәтли олмаг бизә севинҹ ҝәтирир?
17 Јеһова ҝүләрүзлә верәнләри севир вә мүкафатландырыр. Онун Өзү ваһид Оғлуна «иман едәнләрин һеч бири һәлак олмасын, һамысынын әбәди һәјаты олсун» дејә ону гурбан вермәклә бу саһәдә әсас нүмунә гојду (Јәһ. 3:16). Павел јазыр: «Чох әкән... чох да бичәҹәкдир. Һәр кәс үрәјиндә нијјәт етдији кими версин, кәдәрлә, јахуд мәҹбури јох; чүнки Аллаһ ҝүләр үзлә верәни севир» (2 Кор. 9:6, 7). Вахтымызы, ҝүҹүмүзү вә мадди вәсаитләримизи һәгиги ибадәтин ирәлиләмәсинә сәрф етмәк, әлбәттә, бизә севинҹ вә бол мүкафатлар ҝәтирир. (Сүлејманын мәсәлләри 19:17; Лука 16:9 ајәләрини оху.)
«Өз өнүндә ҹар чәкмә»
18. Һансы тәгдирдә, сәмави Атамыздан ‘мүкафат алмајаҹағыг’?
18 «Еһтијатлы олун, инсанлара өзүнүзү ҝөстәрмәк үчүн јахшылыг етмәјин; јохса Сәмави Атаныздан мүкафат алмазсыныз» (Мат. 6:1). ‘Јахшылыг етмәк’ ифадәси алтында Иса Аллаһа мәгбул олан давраныш тәрзини нәзәрдә тутурду. О, Аллаһа мәгбул ишләри һеч вахт инсанлар гаршысында ҝөрмәли олмадығымызы нәзәрдә тутмурду; чүнки онун өзү шаҝирдләринә демишди ки, онларын ‘нуру инсанлар гаршысында парламалыдыр’ (Мат. 5:14-16). Амма әҝәр бүтүн бунлары, сәһнәдә рол ојнајан актјорлар кими, ‘өзүмүзү ҝөстәрмәк’ вә инсанларын бизә валеһ олмасы үчүн едириксә, ‘мүкафат алмајаҹағыг’. Әҝәр белә мотивләрдән ирәли ҝәләрәк һәрәкәт етсәк, Аллаһла јахын мүнасибәтимиз олмајаҹаг вә Падшаһлығын рәһбәрлији алтында олаҹаг хејир-дуалары ҝөрмәјәҹәјик.
19, 20. а) ‘Сәдәгә верән’ заман «ҹар чәкмә» дејәркән Иса нәји нәзәрдә тутурду? б) Һансы мәнада сол әлимизин етдикләрини сағ әлимиз билмәмәлидир?
19 Әҝәр мотивләримиз дүздүрсә, Исанын нөвбәти нәсиһәтинә әмәл едәҹәјик: «Беләликлә, сәдәгә вердијин заман, икиүзлү адамларын халг гаршысында шөһрәт газанмаг үчүн синагогларда вә күчәләрдә етдикләри кими, өз өнүндә ҹар чәкмә. Доғрусуну сизә дејирәм: онлар мүкафатларыны алдылар» (Мат. 6:2). Һәтта Иса вә онун һәвариләри дә јохсуллара сәдәгә верирдиләр (Јәһ. 12:5-8; 13:29). Биз фәрисејләр кими хејирхаһ ишләримизи инсанларын ҝөзүнә сохмамалыјыг. Иса онлары икиүзлү адландырды, чүнки онлар сәдәгә вердикләрини «синагогларда вә күчәләрдә» нүмајиш етдирирдиләр. Бу икиүзлүләр «мүкафатларыны» там алырдылар. Онларын мүкафаты јалныз инсанларын уҹадан онлары саламламасы вә ја ола билсин, синагогларда танынмыш раввинләрин јанында габаг јерләрдә отурмагдан ибарәт иди, чүнки Јеһова онлара һеч нә вермәјәҹәкди (Мат. 23:6, 7). Бәс Мәсиһин шаҝирдләри неҹә давранмалы идиләр? Иса онлара, еләҹә дә бизә деди:
20 «Сән сәдәгә вердијин заман исә, гој сол әлин сағ әлинин нә етдијини билмәсин. Сәдәгән ҝизли олсун; ҝизлини ҝөрән Атан да сәнә ачыгҹасына әвәзини верәҹәкдир» (Мат. 6:3, 4). Адәтән әлләримиз бирҝә иш ҝөрүр. Буна ҝөрә дә сол әлин сағ әлин нә етдијини билмәмәси о демәкдир ки, хејирхаһ ишләримизи, сол әлимиз сағ әлимизә јахын олдуғу гәдәр бизә јахын олан кәсләрә белә ҹар чәкмәмәлијик.
21. «Ҝизлини ҝөрән» әвәзини неҹә верир?
21 Әҝәр хејирхаһлығымызла өјүнмүрүксә, ‘сәдәгә вермәјимиз’ ҝизли олаҹаг вә «ҝизлини ҝөрән» Атамыз әвәзини верәҹәк. Ҝөјләрдә мәскун олан вә ҝөзә ҝөрүнмәјән сәмави Атамыз бәшәријјәт үчүн «ҝизли» галыр (Јәһ. 1:18, И–93). «Ҝизлини ҝөрән» Јеһова әвәзини о мәнада верир ки, Онунла јахындан мүнасибәт гура билирик, ҝүнаһларымыз бағышланыр вә бизә әбәди һәјат бәхш олунур (Сүл. мәс. 3:32; Јәһ. 17:3; Ефес. 1:8). Бунлар инсанларын вердији иззәтдән гат-гат үстүндүр!
Јадда сахламалы олдуғумуз гијмәтли кәламлар
22, 23. Нәјә ҝөрә Исанын кәламларыны јадда сахламалыјыг?
22 Дағүстү тәблиғ ҝөзәл јөнләри олан руһани даш-гашларла долудур. Бу Дағүстү тәблиғдә олан гијмәтли сөзләр, шүбһәсиз ки, һәтта јашадығымыз тәлатүмлү дүнјада белә бизә севинҹ бәхш едә биләр. Бәли, әҝәр Исанын кәламларыны јадда сахласаг вә онларын һәјатымыза вә давраныш тәрзимизә тәсир етмәсинә јол версәк, хошбәхтлијә наил олаҹағыг.
23 Исанын өјрәтдикләрини ‘ешидиб һәјата кечирән’ һәр кәс хејир-дуа алаҹагдыр. (Матта 7:24, 25 ајәләрини оху.) Буна ҝөрә дә ҝәлин Исанын мәсләһәтләринә гәти сурәтдә әмәл едәк. Исанын Дағүстү тәблиғиндән диҝәр фикирләр бу силсиләдән олан сонунҹу мәгаләдә мүзакирә олунаҹаг.
Неҹә ҹаваб верәрдиниз?
• Гәлбинә тохундуғумуз гардашымызла барышмаг нәјә ҝөрә ваҹибдир?
• ‘Сағ ҝөзүмүз’ бизи пис јола чәкмәсин дејә нә етмәлијик?
• Вермәјә даир нөгтеји-нәзәримиз неҹә олмалыдыр?
[11-ҹи сәһифәдәки шәкил]
Үрәјинә тохундуғумуз һәмиманлымызла ‘барышмаг’ неҹә дә хошдур!
[13-ҹү сәһифәдәки шәкилләр]
Јеһова ҝүләрүзлә верәнләри хејир-дуаландырыр