Охуҹуларын суаллары
Иса Мәсиһ 12 һәварисини тәблиғ етмәјә ҝөндәрәндә онлара әса ҝөтүрмәји вә сәндәл ҝејмәји тапшырмышдымы?
Матта, Марк вә Лука Исанын һәвариләрини тәблиғ етмәјә ҝөндәрмәси һагда јазырлар. Бәзиләри иддиа едирләр ки, бу парчаларда зиддијјәтләр вар. Лакин орада дејиләнләри мүгајисә едәндә мараглы нәтиҹәјә ҝәлмәк олар. Ҝәлин илк өнҹә Маркын вә Луканын јаздыгларыны мүгајисә едәк. Марк дејир: «Иса әмр етди ки, онлар өзләри илә јола әсадан башга һеч нә ҝөтүрмәсинләр. Нә чөрәк, нә һејбә ҝөтүрсүнләр, нә дә пул кисәләринә мис пул гојсунлар. Тәкҹә сәндәлләрини ҝејсинләр. Өзләри илә дәјишәк көјнәк дә ҝөтүрмәсинләр» (Марк 6:7—9). Лука исә јазыр: «Өзүнүзлә јола һеч нә ҝөтүрмәјин; нә әса, нә һејбә, нә чөрәк, нә ҝүмүш пул, нә дә дәјишәк көјнәк ҝөтүрүн» (Лука 9:1—3). Бу ајәләр илк бахышдан бир-биринә зидд кими ҝөрүнүр. «Маркын јаздығы Хош Хәбәр»ә әсасән, һәвариләр өзләри илә әса ҝөтүрмәли вә сәндәлләрини ҝејинмәли идиләр, анҹаг Лука гејд едир ки, онлар һеч нә, һәтта әса белә ҝөтүрмәмәли идиләр. Маркдан фәргли олараг, Лука сәндәлләрин адыны чәкмир.
Исанын бу һадисәдә нә демәк истәдијини баша дүшмәк үчүн һәр үч китабда раст ҝәлән бир ифадәјә диггәт јетирмәлијик. Јухарыдакы абзасда ситат ҝәтирилән парчаларда, еләҹә дә Матта 10:5—10 ајәләриндә һәвариләрә дејилир ки, онлар «дәјишәк көјнәк», јәни икинҹи көјнәк ҝөтүрмәсинләр. Ҝөрүнүр, һәр һәваринин әјниндә бир көјнәк варды. Беләликлә, јола дүшәркән икинҹисини ҝөтүрмәли дејилдиләр. Онларын ајагларында бир ҹүт сәндәл дә вар иди. Марк гејд едир ки, онлар «тәкҹә» ајагларындакы ‘сәндәлләри ҝејиниб’ ҝетмәли идиләр. Бәс әса барәдә нә демәк олар? «Јәһуди енсиклопедијасы»нда гејд олунур: «Гәдимдә јәһудиләр арасында өзләри илә һәмишә әса ҝөтүрмәк адәти варды» (Јар. 32:10). Маркын сөзләринә әсасән, һәвариләр Исанын онлара ҝөстәриш вердији заман әлләриндә олан әсадан савајы, ‘өзләри илә јола башга һеч нә ҝөтүрмәмәли идиләр’. Беләликлә, бу үч парчада Исанын һәвариләрә вердији бир ҝөстәриш вурғуланыр — онлар дәрһал јола дүшмәли идиләр, јәни ҝедиб әлавә әшјалар ҝөтүрмәмәли идиләр.
Бу фикри һәмин һадисәнин шаһиди олан вә сонрадан ону гәләмә алан Матта да вурғулајыр. Иса демишди: «Кисәнизә гызыл, ҝүмүш вә ја мис пул гојмајын. Өзүнүзлә нә һејбә, нә дәјишәк көјнәк, нә сәндәл, нә дә әса ҝөтүрмәјин, чүнки зәһмәткеш рузијә лајигдир» (Мат. 10:9, 10). Һәвариләрин ајагларындакы сәндәлләр вә әлләриндәки әсалар барәдә нә демәк олар? Иса онлара бу әшјалары атмағымы тапшырды? Јох, о садәҹә деди ки, бу кими әшјалар әлдә етмәк үчүн вахт сәрф етмәсинләр. Нәјә ҝөрә Иса онлара белә ҝөстәриш верди? «Чүнки зәһмәткеш рузијә лајигдир». Исанын әмринин мәғзи олан бу сөзләр онун Дағүстү тәблиғиндәки: «“Нә јејәҹәјик?”, “нә ичәҹәјик?” вә ја “нә ҝејәҹәјик?” — дејә һеч вахт нараһат олмајын», — чағырышына ујғун иди (Мат. 6:25—32).
Бу үч парчада дејиләнләр илк бахышдан зиддијјәтли ҝөрүнсә дә, онларын һамысында ејни фикир вурғуланыр. Һәвариләр әлләриндә нә вар идисә, онларла јола дүшмәли идиләр вә әлавә әшјалар ҝөтүрмәк үчүн өз тапшырыгларындан јајынмамалы идиләр. Нәјә ҝөрә? Чүнки онларын гајғысына Јеһова галаҹагды.