Аллаһын биринҹи әсрдәки хидмәтчиләринин һәјаты

Дүлҝәрлик сәнәти

«Мәҝәр бу, дүлҝәрин оғлу дејил?» (МАТТА 13:55).

ИСА ПЕЈҒӘМБӘР тәкҹә «дүлҝәрин оғлу» кими јох, һәм дә «дүлҝәр» кими танынырды (Марк 6:3). Ҝөрүнүр, о, бу сәнәти өҝеј атасы Јусифдән өјрәнмишди.

Дүлҝәрлик ишини ҝөрмәк үчүн Исаја һансы баҹарыг вә аләтләр ҝәрәк иди? О, Назарет сакинләри үчүн һансы әшјалары һазырлајыр вә һансы хидмәтләри ҝөстәрирди? Ушаг јашларындан јијәләндији бу сәнәт онун сонракы һәјатына неҹә тәсир етмишди?

Аилә сәнәти. Ашағыдакы шәкилдән ҝөрдүјүмүз кими, ата бөјүк оғлуна каманабәнзәр бурғудан дүзҝүн истифадә етмәји өјрәдир. Кичик оғул онлара диггәтлә гулаг асыр вә мүшаһидә едир.

Оғланлар, бир гајда олараг, бу сәнәтә 12—15 јашларындан јијәләнирдиләр. Адәтән, онлар буну аталарындан өјрәнирдиләр. Тәлим чох илләр давам едирди вә оғланлар лазыми баҹарыглара јијәләнмәјә чалышырдылар ки, габилијјәтли уста олсунлар. Јусиф дә Иса илә бирҝә чалышараг, үнсијјәт едәрәк вә бу сәнәтин сирринә јијәләнмәсинә көмәк едәрәк, еһтимал ки, онунла чохлу вахт кечирмишди. О, Исанын мәһарәтли дүлҝәр олдуғуну ҝөрәндә, јәгин ки, чох фәрәһләнирди.

Билик, ҝүҹ вә баҹарыг. Дүлҝәр ишләдији ағаҹ нөвләринә јахшы бәләд олмалы иди. О, мүнасиб материалы јашадығы әразидә битән ағаҹлардан, мәсәлән, сәрв, палыд, сидр, әнҹир вә зејтун ағаҹларындан сечә биләрди. Лакин биринҹи әсрдә иншаат материаллары мағазасы вә ја тахта-шалбан анбары олмадығындан дүлҝәрин она лазым олан өлчүдә материал сечмәк имканы јох иди. О, мешәјә јолланыб лазыми ағаҹы тапмалы, ону кәсмәли, сонра да һәмин ағыр тири сүрүјүб емалатханасына ҝәтирмәли иди.

Дүлҝәр бу ағаҹлардан нә һазырлајырды? О, чох вахт емалатханасындан кәнарда саатларла ишләјәрәк ев тикмәк ишиндә башгаларына көмәк едирди: о, тир, чаты, пилләкән вә гапы-пәнҹәрә дүзәлдирди.

Бундан әлавә, дүлҝәр мебелләр дә дүзәлдирди. Шәкилдә онун һазырладығы әшјалардан бәзиләри ҝөстәрилиб: сијирмәси, рәфләри вә гапылары олан шкаф (1), табуретләр (2), кресло вә стуллар (3), мүхтәлиф өлчүдә вә формада столлар (4), еләҹә дә бешикләр. Бәзән онлар һазырладыглары мебелләрә ојма нахышлар вурурдулар. Давамлы вә гәшәнҝ олмасы үчүн онлары мум, гатран, ја да јағла јағлајырдылар.

Дүлҝәрә јерли әкинчиләр дә мүраҹиәт едирдиләр. О, онлар үчүн мөһкәм ағаҹ нөвләриндән бојундуруг (5), јаба, дырмыг вә бел (6) дүзәлдирди. Хыш (котан) (7) мөһкәм олмалы иди, чүнки онун дәмирдән олан һиссәси илә дашлы торпағы шумлајырдылар. Дүлҝәр һәмчинин тахтадан арабалар (8) вә милләри олан, еләҹә дә милсиз тәкәрләр дүзәлдирди. Бундан әлавә, о, дүзәлтдији мебелләри, аләтләри вә арабалары тәмир едирди.

Ҝәлин ҝәнҹ дүлҝәр Исанын ҝөркәмини бир тәсәввүр едәк. Онун дәриси гызмар шәрг ҝүнәши алтында гаралмыш, илләрлә физики ишлә мәшғул олмагдан әзәләләри мөһкәмләнмиш, тахта-шалбанла, мишарла, балта вә чәкиҹлә ишләмәкдән әлләри габар олмушду.

Әјани нүмунәләр мәнбәји. Дәрин руһани һәгигәтләри инсанлара өјрәдәркән Иса садә вә таныш шејләрдән мәһарәтлә нүмунәләр ҝәтирирди. О, бу нүмунәләрдән истифадә едәркән өз дүлҝәрлик тәҹрүбәсинә әсасланырдымы? Бир дәфә Иса издиһама мүраҹиәт едәрәк демишди: «Нијә гардашынын ҝөзүндәки чөпә бахырсан, амма өз ҝөзүндәки тири ҝөрмүрсән?» Тирин нә дәрәҹәдә бөјүк ола биләҹәјинә һамыдан јахшы дүлҝәр бәләд иди (Матта 7:3). Башга вахт исә о демишди: «Әлини хышын үстүнә гојуб архадакы шејләрә бахан адам Аллаһын падшаһлығына лајиг дејил». Ҝөрүнүр, о, хыш да дүзәлдирди (Лука 9:62). Сәмими дәвәтләриндән бириндә Иса демишди: «Бојундуруғуму үзәринизә ҝөтүрүн... Чүнки бојундуруғум раһат, јүкүм јүнҝүлдүр» (Матта 11:29, 30). Әлбәттә, Иса һејванын бојнуну сүртмәјән «раһат» бојундуруг дүзәлтмәји баҹарырыды.

Дүшмәнләри Исаны «дүлҝәрин оғлу» кими чағырмагла ону алчалтмаға чалышырдылар. Буна бахмајараг, биринҹи әсрдә олдуғу кими, мәсиһчиләр бу ҝүн дә бир вахтлар садә дүлҝәр олмуш Иса Мәсиһин изләри илә ҝетмәји өзләринә шәрәф билирләр.

[30-ҹу сәһифәдәки чәрчивә/шәкилләр]

Дүлҝәрин аләт гутусу

Биринҹи әсрдә дүлҝәр, о ҹүмләдән Иса ашағыда ҝәтирилән аләтләрдән истифадә едирди. Диш-диш үлҝүҹүн бәркидилдији тахта мишар (1), ҝүнјә (дүзбуҹаглы вә ја шагули хәтләр чәкмәк үчүн үчбуҹаг формалы хәткеш) (2), шагул (3). Һәмчинин дүлҝәрин аләт гутусунда сәтһин дүзлүјүнү јохламаг үчүн тараз (4), өлчү чубуғу (5), тәнзимләнән дәмир кәскиси олан рәндә (6) вә балта (7).

Дүлҝәр деталлары јонмаг үчүн каманла ишә салынан токар дәсҝаһындан (8) вә јарымдаирәви искәнәдән (9) истифадә едирди. Аләтләр гутусунун үстүндә искәнә илә ишләмәк вә чүј вурмаг үчүн истифадә олунан тахта чәкиҹи (10) ҝөрүрүк. Бурада һәмчинин балаҹа әл мишары (11), сыјырга (12) вә бир нечә мисмар (13) вар. Гутунун јанында дәмир чәкиҹ (14) вә кәрки (15) дурур. Гутунун гапағынын үстүндә һәмчинин бычаг (16) вә мүхтәлиф өлчүлү искәнәләр (17), гутунун јанында исә каманабәнзәр бурғу (18) вар.