Никаһыны горумаг үчүн әлиндән ҝәләни әсирҝәмә
«Евлиләрә исә мән јох, Ағамыз бу ҝөстәриши верир» (1 КОР. 7:10).
ИЗАҺ ЕДӘ БИЛӘРСӘНМИ?
Һансы мәнада Аллаһ әрлә арвады бир бојундуруг алтында бирләшдириб?
Ағсаггаллар никаһда проблемләри олан мәсиһчиләрә неҹә көмәк едә биләрләр?
Евлилијә неҹә јанашмалыјыг?
1. Мәсиһчиләр никаһа неҹә бахырлар вә нәјә ҝөрә?
МӘСИҺЧИЛӘР евләнәндә Аллаһ гаршысында анд ичирләр. Бу, ҹидди мәсулијјәтдир вә она башдансовду јанашмаг олмаз (Ваиз 5:4—6). Јеһова, никаһын Баниси кими, евли инсанлары «бир бојундуругда» бирләшдириб (Марк 10:9). Өлкә ганунларындан асылы олмајараг, онлар Аллаһын ҝөзүндә бир бојундуруг алтындадырлар. Һәгигәти гәбул етмәздән әввәл вә ја сонра аилә гурмаларына бахмајараг, Јеһованын хидмәтчиләри никаһа Аллаһын ҝөзү илә бахмалыдырлар.
2. Бу мәгаләдә һансы суаллары нәзәрдән кечирәҹәјик?
2 Уғурлу никаһ инсана бөјүк хошбәхтлик ҝәтирә биләр. Бәс әҝәр никаһ телләри ҝәрилмиш вәзијјәтдәдирсә, онда нә етмәк олар? Бу ҹүр никаһы мөһкәмләндирмәк мүмкүндүрмү? Аиләләриндәки сүлһ тәһлүкә алтында олан әрлә арвада нә көмәк едә биләр?
ХОШБӘХТЛИК, ЈОХСА БӘДБӘХТЛИК?
3, 4. Һәјат јолдашы сечими илә әлагәдар ағылсыз гәрар вермәк нә илә нәтиҹәләнә биләр?
3 Мәсиһчинин гурдуғу аилә уғурлу оларса, бу, она хошбәхтлик, Јеһоваја исә шәрәф ҝәтирәр. Амма онун аилә һәјаты алт-үст оланда бу, она, ән јахшы һалда, үрәк ағрысы верә биләр. Аилә гурмаг барәдә фикирләшән субај мәсиһчиләр бу мәсәләдә Аллаһын рәһбәрлијинә лап әввәлдән риајәт едәндә уғурлу никаһ үчүн јахшы тәмәл гојурлар. Һәјат јолдашы сечәркән ағылсыз гәрар верәнләр исә сонрадан пешман вә мәјус олурлар. Мисал үчүн, бәзи ҝәнҹләр аилә һәјатынын мәсулијјәтләрини дашымаға һазыр олмадыглары бир һалда артыг киминләсә ҝөрүшмәјә башлајырлар. Диҝәрләри Интернетдә өзләринә һәјат јолдашы ахтарырлар вә тез-тәләсик евләнмәјә гәрар верәрәк нәтиҹәдә чох бәдбәхт олурлар. Бир башгалары исә ҝөрүшдүкләри мүддәтдә ҹидди ҝүнаһ төрәдирләр вә бунун нәтиҹәсиндә аилә һәјатына башладыглары илк ҝүндән араларында бир-биринә гаршы һөрмәт олмур.
4 Бәзи мәсиһчиләр Аллаһын хидмәтчиси олмајанларла аилә гурурлар вә чох вахт иманларына шәрик олмајан инсанла бир дам алтында јашамағын ҝәтирдији аҹы нәтиҹәләри дадырлар (1 Кор. 7:39). Әҝәр сән дә бу вәзијјәтдәсәнсә, онда Аллаһдан хаһиш ет ки, сәни бағышласын вә көмәк етсин. О пешманчылыг чәкән инсанын кечмишдә бурахдығы сәһвләри арадан ҝөтүрмәсә дә, сынаглара таб ҝәтирмәјә көмәк едир (Мәз. 130:1—4). Үрәјини инди вә әбәди олараг Аллаһы разы салмаға көклә, онда «Рәббин вердији севинҹ» сәнин гүввәтин олаҹаг (Неһ. 8:10).
НИКАҺ ПОЗУЛМАГ ҮЗРӘ ОЛАНДА
5. Никаһда хошбәхт олмајан инсан һансы дүшүнҹә тәрзиндән гачынмалыдыр?
5 Аилә һәјатында хошбәхт олмајан инсаны белә суаллар нараһат едә биләр: «Хошбәхтликдән әсәр-әламәт олмајан аиләми ифласдан горумаға дәјәрми? Каш ки, вахты ҝери гајтарыб һәр шеји башга адамла башлајајдым!» Ола билсин, онлар һәјат јолдашларындан јаха гуртармаг барәдә хәјаллар гурараг белә фикирләширләр: «Һејф дејил субајлыг! Нијә дә бошанмајым? Мүгәддәс Китабда ҝөстәрилән сәбәбә ҝөрә бошана билмәсәм дә, нәјә ҝөрә ајры јашамајым вә һәјатдан јенидән зөвг алмајым?» Бу ҹүр дүшүнмәк вә ја хәјаллара далмаг әвәзинә, мәсиһчи мөвҹуд вәзијјәтдә Аллаһын рәһбәрлијини ахтармалы вә она ујғун шәкилдә давранмаг үчүн вар ҝүҹү илә чалышмалыдыр.
6. Исанын Матта 19:9 ајәсиндә дедији сөзләри изаһ ет.
6 Әҝәр мәсиһчи бошанмалы олубса, јени никаһа дахил олмаг үчүн онун Мүгәддәс Китаб әсасы олмаја биләр. Иса демишди: «Ким арвадыны онун ҹинси әхлагсызлығына ҝөрә дејил, башга сәбәбә ҝөрә бошајыб [өзҝәси илә] евләнирсә, зина едир» (Мат. 19:9). Бурада истифадә олунан «әхлагсызлыг» сөзү алтында зина вә диҝәр ҹидди ҹинси ҝүнаһлар нәзәрдә тутулур. Евлилик ушаг ојунҹағы олмадығы үчүн ҹинси әхлагсызлыгла бағлы олмајан сәбәбә ҝөрә бошанмаг гәрарыны вермәздән өнҹә, һәр шеји дуа едәрәк јахшыҹа ҝөтүр-гој етмәк олдугҹа ваҹибдир.
7. Әҝәр мәсиһчинин никаһы уғурсузлуға дүчар олубса, башгаларында һансы тәәссүрат јарана биләр?
7 Никаһы уғурсузлуға дүчар олан мәсиһчинин, ола билсин ки, руһани вәзијјәтиндә дә проблем вар. Һәвари Павел белә бир ваҹиб суал галдырмышды: «Инсан өз аиләсини идарә едә билмирсә, Аллаһын јығынҹағынын гајғысына неҹә галаҹаг?» (1 Тим. 3:5). Әҝәр мәсиһчи ҹүтлүкләрин никаһы мүвәффәгијјәтсизлијә уғрајырса, онда башгалары елә фикирләшәҹәк ки, онларын дедикләри илә әмәлләри үст-үстә дүшмүр (Ром. 2:21—24).
8. Мәсиһчи ҹүтлүк бошанмаг гәрарына ҝәлирсә, бу, нәдән хәбәр верир?
8 Вәфтиз олунмуш әр-арвад Мүгәддәс Китаб әсасы олмадан ајры јашамағы вә ја бошанмағы планлашдырырса, демәли, онларын Јеһова илә мүнасибәтләриндә һансыса бир чатышмазлыг вар. Бу ону ҝөстәрир ки, онлардан бири, ја да һәр икиси Мүгәддәс Китабын принсипләрини тәтбиг етмир. Әҝәр онлар бүтүн гәлбдән Рәббә ҝүвәнсәјдиләр, никаһларыны горумаг үчүн әлләриндән ҝәләни әсирҝәмәздиләр. (Сүлејманын мәсәлләри 3:5, 6 ајәләрини оху.)
9. Аиләләринин дағылмасына јол вермәјиб сәбирлә давранан мәсиһчиләр һансы мүкафаты алмышлар?
9 Никаһлары позулмаг үзрә олан бир чох мәсиһчиләр сонрадан хошбәхтлијә наил олмушлар. Аиләдә чәтинлик јаранан кими бошанмаға тәләсмәјән мәсиһчиләр сонда јахшы нәтиҹә әлдә едирләр. Ҝәлин дини ҹәһәтдән бөлүнмүш аиләләрә даир бир вәзијјәти нәзәрдән кечирәк. Һәвари Петер јазмышды: «Еј гадынлар, әрләринизә табе олун ки, Аллаһын сөзүнә итаәт етмәјән әрләриниз сизин исмәтли јашајышынызы вә дәрин һөрмәтинизи ҝөрүб, давранышынызла сөзсүз фәтһ едилсинләр» (1 Пет. 3:1, 2). Бәли, мәсиһчинин јахшы давранышы сајәсиндә, ола билсин, онун иманына шәрик олмајан һәјат јолдашы һәгигәти гәбул етсин! Никаһларыны горујанлар Аллаһа шәрәф, бүтүн аиләјә исә бөјүк хејир-дуалар ҝәтирә биләрләр.
10, 11. Никаһда һансы ҝөзләнилмәз проблемләр јарана биләр вә мәсиһчи нәјә әмин ола биләр?
10 Јеһованы разы салмаг истәјән әксәр субај мәсиһчиләр иманларына шәрик олан вә Аллаһа һәср олунмуш шәхслә евләнирләр. Һәтта белә олан һалда тојдан сонра вәзијјәт ҝөзләнилмәдән дәјишә биләр. Надир һалларда онлардан бириндә ҹидди емосионал проблемләр јарана вә ја онлардан бири тојдан сонра гејри-фәал тәблиғчи ола биләр. Ҝәлин тәблиғ ишиндә ҹанла-башла иштирак едән вә гајғыкеш ана олан Линдаa адлы бир баҹынын нүмунәсинә нәзәр салаг. Баҹынын вәфтиз олунмуш әри Мүгәддәс Китаба зидд олан јола гәдәм басанда вә төвбә етмәдији үчүн јығынҹагдан кәнар едиләндә онун аҹиз шәкилдә буну мүшаһидә етмәкдән башга чарәси јох иди. Белә вәзијјәтдә олан мәсиһчијә елә ҝәлә биләр ки, артыг никаһы хилас етмәк гејри-мүмкүндүр. Онда нә етмәк олар?
11 Ола биләр, сәни белә бир суал нараһат едир: «Нә олурса-олсун никаһымы дағылмагдан горумаг үчүн сәј ҝөстәрмәјә дәјәрми?» Сәнин јеринә һеч ким гәрар верә билмәз вә буну етмәмәлидир дә. Бунунла белә, артыг үмидсиз кими ҝөрүнән никаһы позмамаг үчүн әсаслы сәбәбләр вар. Виҹданлары бошанмаға јол вермәдији үчүн никаһда јаранан һәр ҹүр чәтинлијә дөзән мәсиһчиләр Аллаһын ҝөзүндә чох дәјәрлидирләр. (1 Петер 2:19, 20 ајәләрини оху.) Јеһова сәмими-гәлбдән никаһларыны мөһкәмләндирмәјә чалышан мәсиһчиләрә Өз Кәламы вә руһу васитәсилә көмәк едәҹәк.
ОНЛАР КӨМӘК ЕТМӘЈӘ ҺАЗЫРДЫРЛАР
12. Әҝәр ағсаггаллардан көмәк истәсәк, онлар бизә неҹә јанашаҹаглар?
12 Әҝәр сән аилә проблемләри ичиндә итиб-батырсанса, руһани көмәк үчүн јеткин мәсиһчиләрә мүраҹиәт етмәјә тәрәддүд етмә. Аллаһын сүрүсүнү отаран ағсаггаллар бөјүк мәмнунијјәтлә диггәтини Мүгәддәс Јазылардакы мүвафиг мәсләһәтләрә јөнәлдәҹәкләр (Һәв. иш. 20:28; Јаг. 5:14, 15). Фикирләшмә ки, аиләндәки ҹидди проблемләри онларла мүзакирә етсән вә руһани көмәк истәсән, сән вә јолдашын онларын ҝөзүндән дүшәҹәксиниз. Ағсаггаллар сизин, һәгигәтән дә, Аллаһы разы салмаг истәдијинизи ҝөрәндә онларын сизә олан мәһәббәт вә һөрмәти даһа да артаҹаг.
13. 1 Коринфлиләрә 7:10—16 ајәләриндә һансы мәсләһәт јазылыб?
13 Һәјат јолдашы иманына шәрик олмајан мәсиһчи көмәк үчүн ағсаггаллара мүраҹиәт едәндә онлар Павелин бу мәсләһәтини истифадә едә биләрләр: «Евлиләрә исә мән јох, Ағамыз бу ҝөстәриши верир: арвад әриндән ајрылмасын. Ишдир әҝәр ајрылса, онда әрә ҝетмәсин, ја да әри илә барышсын. Әр дә арвадыны атмасын... Еј гадын, нә билирсән, бәлкә, әрини хилас етдин? Јахуд да сән еј әр, нә билирсән, бәлкә, арвадыны хилас етдин?» (1 Кор. 7:10—16). Мәсиһчинин һәјат јолдашы һәгигәти гәбул едәндә бу неҹә дә бөјүк хејир-дуадыр!
14, 15. Һансы һалларда мәсиһчи һәјат јолдашындан ајры јашамағы ҝөтүр-гој едә биләр? Нәјә ҝөрә бу гәрары вермәздән өнҹә, дуа етмәк вә һиссләри тәһлил етмәк ваҹибдир?
14 Бәс һансы һалларда мәсиһчи гадын өз һәјат јолдашындан ајрыла биләр? Бәзиләри мүәјјән ҹидди сәбәбләрә ҝөрә, мәсәлән, әр аиләсини мадди ҹәһәтдән тәмин етмәкдән бојун гачырдығы, арвадынын физики сағламлығына тәһлүкә јаратдығы вә ја ону гәти шәкилдә Јеһоваја хидмәт етмәјә гојмадығы үчүн ајры јашамаг гәрарына ҝәлибләр.
15 Һәјат јолдашындан ајры јашајыб-јашамамаг гәрарыны һәр кәс өзү верир. Лакин вәфтиз олунмуш мәсиһчи гәрар гәбул етмәздән өнҹә бу мәсәлә илә бағлы дуа етмәли вә һиссләрини дүрүст шәкилдә тәһлил етмәлидир. Мәсәлән, мәсиһчинин руһани вәзијјәтинин тәһлүкәдә олдуғуна ҝөрә бүтүн мәсулијјәти онун иманда олмајан һәјат јолдашы дашыјыр, јохса о, өзү шәхси өјрәнмәјә, јығынҹаг ҝөрүшләринә вә хидмәтә сәһләнкар јанашыр?
16. Мәсиһчини бошанмаг гәрарыны тез-тәләсик вермәкдән нә чәкиндирмәлидир?
16 Аллаһла мүнасибәтләримизи вә никаһ әнамыны гијмәтләндирмәјимиз бизи тез-тәләсик бошанмаг гәрарыны вермәкдән чәкиндирмәлидир. Јеһованын хидмәтчиси олан бизләри, илк нөвбәдә, Онун мүгәддәс адынын тәгдис едилмәси марагландырыр. Буна ҝөрә дә биз башга адамла аилә һәјаты гурмаг хатиринә өз аиләмизи дағытмаг үчүн һијләјә әл атмајаҹағыг (Јер. 17:9; Мал. 2:13—16).
17. «Аллаһ сизи меһрибанчылыг ичиндә јашамаға чағырыб» ифадәси һансы вәзијјәтләрә тәтбиг олуна биләр?
17 Иманына шәрик олмајан һәјат јолдашы олан мәсиһчи никаһыны горумаг үчүн әлиндән ҝәләни етмәлидир. Анҹаг онун сидг-үрәкдән ҝөстәрдији сәјләрдән сонра да һәјат јолдашы ону атырса, белә вәзијјәтдә мәсиһчи өзүнү ҝүнаһкар һисс етмәмәлидир. Павел јазмышды: «Анҹаг иманда олмајан тәрәф һәјат јолдашындан ајрылырса, гој ајрылсын. Бу һалда гардашымыз, јахуд баҹымыз никаһ вәзифәсини јеринә јетирмәјә борҹлу дејил. Аллаһ сизи меһрибанчылыг ичиндә јашамаға чағырыб» (1 Кор. 7:15)b.
ҮМИДИНИ ЈЕҺОВАЈА БАҒЛА
18. Никаһыны горумаг мүмкүн олмаса да, сәнин ҝөстәрдијин ҹәһдләр һансы јахшы нәтиҹәләр верә биләр?
18 Никаһынызда һәр һансы бир проблем јаранарса, Јеһовадан ҹәсарәт истәјин вә һәмишә Она архаланын. (Мәзмур 27:14 ајәсини оху.) Јухарыда ады чәкилән Линданын нүмунәсинә гајыдаг. Линда узун илләр әрзиндә никаһыны ифласдан горумаға чалышса да, онун евлилији бошанма илә нәтиҹәләнди. О, вахтынын һәдәр ҝетдијини фикирләширми? Баҹы дејир: «Әлбәттә ки, јох. Мәним сәј ҝөстәрмәјим әтрафдакылар үчүн јахшы шаһидлик олду. Мәним виҹданым тәмиздир. Ән ваҹиби исә, бу илләр әрзиндә бизим гызымыз һәгигәтдә мөһкәмләнди. О бөјүдү вә өзүнү Јеһоваја һәср едиб Она ҹанла-башла хидмәт етмәјә башлады».
19. Мәсиһчи никаһыны хилас етмәјә чалышырса, бу, нә илә нәтиҹәләнә биләр?
19 Мерилин адлы мәсиһчи гадын Аллаһа ҝүвәндији вә никаһыны хилас етмәк үчүн әлавә ҹәһд ҝөстәрдијинә ҝөрә чох севинир. О дејир: «Мән әримдән ајрылмаг фикриндә идим, чүнки о, мәни мадди ҹәһәтдән тәмин етмирди вә руһанилијим үчүн тәһлүкә јарадырды. Әввәлләр әрим јығынҹагда ағсаггал кими хидмәт едирди, лакин сонра о, еһтијатсыз давранараг бир ишә ҝиришди. О, јығынҹаглары бурахмаға башлады вә демәк олар ки, үнсијјәтимиз јох дәрәҹәсиндә иди. Шәһәримиздә төрәдилән террор актындан сонра мән һамыдан узаглашыб өзүмә гапандым. Анҹаг сонрадан баша дүшдүм ки, мәндә дә ҝүнаһ вар имиш. Биз јенидән үнсијјәт етмәјә, аиләви өјрәнмә кечирмәјә вә јығынҹаг ҝөрүшләриндә мүнтәзәм иштирак етмәјә башладыг. Ағсаггаллар да бизә гаршы хејирхаһ идиләр вә бизә чох көмәкләри дәјди. Аиләмиздә һәр шеј өз гајдасына дүшдү. Бир мүддәтдән сонра она јенидән мәсулијјәтләр верилди. Бу, сону хошбәхтликлә нәтиҹәләнән ағыр бир дәрс иди».
20, 21. Никаһла әлагәдар биз нә етмәк әзминдә олмалыјыг?
20 Субај вә ја евли олмағымыздан асылы олмајараг, ҝәлин һәмишә ҹәсарәтлә давранаг вә Јеһоваја архаланаг. Әҝәр никаһымызда проблемләр варса, әрлә арвадын «артыг ики јох, бир [бәдән]» олдуғуну јадда сахлајараг онлары һәлл етмәк үчүн әлимиздән ҝәлән һәр шеј етмәлијик (Мат. 19:6). Ҝәлин унутмајаг ки, әҝәр биз чәтинликләрә гатлашырыгса, иманда олмајан һәјат јолдашымыз, ола билсин, һәгигәтә ҝәләҹәк.
21 Вәзијјәтимиздән асылы олмајараг, ҝәлин һәр аддымымыза диггәт јетирәк ки, бизи мүшаһидә едәнләр үчүн бу, јахшы шаһидлик олсун. Әҝәр никаһымыз дағылмаг үзрәдирсә, ҝәлин дурмадан дуа едәк, дүрүст шәкилдә нијјәтләримизи ҝөтүр-гој едәк, Мүгәддәс Јазылардакы мәсләһәтләри дәриндән арашдыраг вә руһани көмәк үчүн ағсаггаллара мүраҹиәт едәк. Ән ваҹиби исә, гој һәр биримиз һәр бир шејдә Јеһова Аллаһы разы салмаға вә Онун ҝөзәл никаһ әнамыны гијмәтләндирмәјә гәти гәрарлы олаг!
[Һашијәләр]
a Адлар дәјишдирилиб.
b «Өзүнүзү Аллаһын мәһәббәтиндә сахлајын» китабынын 219-дан 221-дәк сәһифәләринә, «Ҝөзәтчи гүлләси»нин 1989-ҹу ил 1 сентјабр сајынын 18 вә 19-ҹу сәһифәләринә (рус.), һәмчинин 1978-ҹи ил 1 феврал сајынын 14-ҹү сәһифәсинә (рус.) бах.
[10–ҹу сәһифәдәки јазы]
Никаһлары дағылмаг үзрә олан мәсиһчиләр бошанмаға тәләсмәјәндә, адәтән, ҝөзәл нәтиҹәләр әлдә едирләр
[12–ҹи сәһифәдәки јазы]
Һәмишә Јеһоваја ҝүвән вә Ондан ҹәсарәт дилә
[9–ҹу сәһифәдәки шәкил]
Проблемләрә бахмајараг, никаһларыны мөһкәмләндирмәјә чалышан мәсиһчи әр-арвадлара Јеһова хејир-дуа верир
[11–ҹи сәһифәдәки шәкил]
Мәсиһчи јығынҹағы тәсәлли вә руһани көмәк мәнбәји ола биләр