Ән бөјүк Миссионери тәглид един
«Мән Мәсиһи тәглид етдијим кими, сиз дә мәни тәглид един». 1 КОР. 11:1
1. Иса Мәсиһи нә үчүн тәглид етмәлијик?
ҺӘВАРИ Павел ән бөјүк Миссионери — Иса Мәсиһи тәглид едирди. О, һәмиманлыларыны да тәшвиг едирди: «Мән Мәсиһи тәглид етдијим кими, сиз дә мәни тәглид един» (1 Кор. 11:1). Һәвариләринин ајагларыны тәвазөкарлыгла јумагла тәвазөкарлыг дәрси вердикдән сонра Иса онлара деди: «Мәним сизә етдијим кими сиз дә едәсиниз дејә, сизә бир нүмунә ҝөстәрдим» (Јәһ. 13:12-15). Биз мүасир мәсиһчиләр дә Иса Мәсиһи сөзләримиздә, әмәлләримиздә вә хүсусијјәтләримизлә тәглид етмәк мәсулијјәти дашыјырыг (1 Пет. 2:21).
2. Рәһбәрлик Шурасы тәрәфиндән миссионер тәјин олунмасан да, хидмәтә неҹә јанаша биләрсән?
2 Әввәлки мәгаләдән өјрәндик ки, миссионер хош хәбәри башгаларына чатдырмаг үчүн ҝөндәрилән мүждәчидир. Бунунла бағлы Павел бәзи мараглы суаллар галдырмышды. (Ромалылара 10:11-15 ајәләрини оху.) Һәваринин «вәз едән јохдурса, неҹә ешидәҹәкләр?» суалына диггәт јетирин. Сонра о, Јешајанын пејғәмбәрлијиндән ситат ҝәтирди: «Сүлһ хәбәри ҝәтирән... мүждәчинин ајаглары неҹә дә ҝөзәлдир!» (Јешаја 52:7). Сән хариҹи өлкәләрдә тәблиғ етмәк үчүн миссионер тәјин едилмәсән дә, хош хәбәрин сәјли тәблиғчиси кими Исадан нүмунә ҝөтүрмәклә мүждәчи руһуну өзүндә инкишаф етдирә биләрсән. Кечән ил Падшаһлығын 6 957 852 тәблиғчиси 236 өлкә вә әразидә ‘мүждәчи ишини јеринә јетирмишди’ (2 Тим. 4:5).
«Биз һәр шеји атыб Сәнин ардынҹа ҝәлдик»
3, 4. Иса ҝөјдә нәләри гојуб ҝәлди вә биз онун давамчысы олмаг үчүн нә етмәлијик?
3 Иса јер үзүндәки тапшырығыны јеринә јетирмәк үчүн сәмави һәјатыны вә иззәтини гојуб, өзүнү ‘һеч едәрәк гул сурәтинә салды’ (Филип. 2:7). Мәсиһи тәглид етмәк үчүн нә гәдәр чох шеј етсәк дә, бу онун јер үзүндә етдикләри илә мүгајисә олуна билмәз. Лакин биз Шејтанын дүнјасында имтина етдијимиз шејләрә ҝөрә һејфсиләнмәсәк, онун давамчылары кими сарсылмаз гала биләрик (1 Јәһ. 5:19).
4 Бир дәфә һәвари Петер Исаја деди: «Будур, биз һәр шеји атыб Сәнин ардынҹа ҝәлдик» (Мат. 19:27). Петер, Андреј, Јагуб вә Јәһја Исанын дәвәтини ешидән кими торларыны атыб, онун ардынҹа ҝетдиләр. Онлар балыгчылыг пешәсини атараг хидмәтә сарылдылар вә бу онларын ән ваҹиб мәшғулијјәти олду. Әксәријјәтимизә Исанын ардынҹа ҝетмәк үчүн ‘һәр шејимизи’ атмаг лазым ҝәлмәјиб. Анҹаг Мәсиһин давамчысы вә Јеһованын сәмими хидмәтчиси олмаг үчүн биз ‘өзүмүзү инкар етмәли’ олмушуг (Мат. 16:24). Белә һәјат јолу бол-бол хејир-дуалар ҝәтириб. (Матта 19:29 ајәсини оху.) Мәсиһи тәглид едәндә тәзаһүр етдирдијимиз мүждәчи руһу үрәјимизи севиндирир, әләлхүсус да Аллаһа вә Онун севимли Оғлуна јахынлашмагда башгаларына азаҹыг да олса көмәјимиз дәјәндә.
5. Бәзи мүһаҹирләр Мүгәддәс Китаб һәгигәтини өјрәндикдән сонра нә етмәк гәрарына ҝәлирләр? Нүмунә чәкин.
5 Суринамын мәркәзиндә јашајан бразилијалы Валмир гызылчыхаран иди. О, әхлагсыз һәјат сүрүр вә сәрхошлуг едирди. О, бир дәфә шәһәрдә оланда Јеһованын Шаһидләри онунла Мүгәддәс Китабы өјрәнмәјә башладылар. О, һәр ҝүн өјрәнирди вә һәјатында чохлу дәјишикликләр едиб, тезликлә вәфтиз олунду. Валмир ҝөрәндә ки, иши Мүгәддәс Китаб тәләбләринә ујғун јашамағы чәтинләшдирир, өз ҝәлирли бизнесини сатыб, аиләсинә руһани хәзинәләр тапмаға көмәк етмәк мәгсәдилә Бразилијаја гајытды. Бир чох мүһаҹирләр Мүгәддәс Китаб һәгигәтини өјрәнәндән сонра гоһумларына вә диҝәрләринә Јеһоваја јахынлашмаға көмәк етмәк үчүн зәнҝин өлкәләрдә малик олдуглары ишләрини бурахыб вәтәнләринә гајыдырлар. Падшаһлығынын бу ҹүр тәблиғчиләри әсл мүждәчи руһу тәзаһүр етдирирләр.
6. Падшаһлығын тәблиғчиләринә бөјүк еһтијаҹ олан јерләрә көчә билмириксә, нә едә биләрик?
6 Бир чох Шаһидләр Падшаһлығын тәблиғчиләринә бөјүк еһтијаҹ олан әразиләрә көчә билмишләр. Бәзиләри, һәтта башга өлкәләрә ҝетмишләр. Ола билсин, бунлардан һансыныса етмәјимиз мүмкүн дејил, амма хидмәтдә һәмишә әлимиздән ҝәләни етмәклә Исаны тәглид едә биләрик.
Јеһова лазыми тәлими верир
7. Өз баҹарыгларыны инкишаф етдирмәк истәјән Падшаһлығын тәблиғчиләри үчүн һансы Мәктәбләр вар?
7 Иса Өз Атасындан тәлим алдығы кими, биз дә Јеһованын һал-һазырда тәгдим етдији тәлимдән фајдалана биләрик. Иса өзү демишдир: «Пејғәмбәрләрин китабларында: “Онларын һамысыны да Аллаһ өјрәдәҹәкдир” дејә јазылмышдыр» (Јәһ. 6:45; Јешаја 54:13). Бу ҝүн бизи Падшаһлығын тәблиғчиси кими һазырлајан Мәктәбләр вар. Шүбһәсиз, һәр биримиз јығынҹагларымызда кечирилән Теократик Хидмәт Мәктәбиндән һансыса фајданы әлдә етмишик. Пионерләрин Пионер Хидмәти Мәктәбини кечмәк үстүнлүјү вар. Бир чох тәҹрүбәли пионерләр бу Мәктәби икинҹи дәфә кечмишләр. Ағсаггаллар вә хидмәти көмәкчиләр тәлим вермә габилијјәтләрини инкишаф етдирмәк вә һәмиманлыларына даһа јахшы көмәк етмәк үчүн Падшаһлыг Хидмәти Мәктәбиндә охумушлар. Бир чох субај ағсаггаллар вә хидмәти көмәкчиләр тәблиғ ишиндә диҝәрләринә көмәк етмәји өјрәдән Хидмәти Тәкмилләшдирмә Мәктәбиндә тәлим алмышлар. Һәмчинин башга өлкәләрә миссионер тәјинаты алан бир чох баҹы-гардашлар Ҝөзәтчи Гүлләсинин Мүгәддәс Китаб Мәктәби Ҝилеадда охумушлар.
8. Јеһовадан тәлим алмаг имканыны бәзи гардашлар нә дәрәҹәдә гијмәтләндирирләр?
8 Јеһованын Шаһидләриндән бир чоху бу Мәктәбләрдә тәлим алмаг үчүн һәјатларында мүәјјән дәјишикликләр етмишләр. Канададан олан Југи, Хидмәти Тәкмилләшдирмә Мәктәбиндә охумаг үчүн ишиндән чыхмалы олду, чүнки мүдири мәзунијјәтә чыхмасына иҹазә вермәди. Југи дејир: «Мән һеч тәәссүфләнмирәм. Мүдиријјәт истисна һал кими мәнә иҹазә версәјди, әвәзиндә ширкәтдән һеч вахт ајрылмамаг шәртилә ишләмәјими тәләб едә биләрди. Инди исә мән Јеһованын верәҹәји һәр бир тапшырығы гәбул етмәјә һазырам». Аллаһын вердији тәлимдән фајдаланмаг үчүн чохлары әввәлләр јүксәк гијмәтләндирдикләри шејләрдән имтина етмишләр (Лука 5:28).
9. Мүгәддәс Китаб тәлими вә ҝүҹлү сәјин бөјүк наилијјәтләр әлдә етмәјә көмәк етдијинә даир нүмунә чәкин.
9 Мүгәддәс Китаб тәлими вә ҝүҹлү сәј бөјүк наилијјәтләр әлдә етмәјә көмәк едир (2 Тим. 3:16, 17). Ҝәлин Гватемалада јашајан Саулонун нүмунәсинә нәзәр салаг. Онда анаданҝәлмә ҹүзи ағыл зәифлији вар иди вә мүәллимәләриндән бири онун анасына деди ки, ушағын мәјус олмамасы үчүн ону охумаға мәҹбур етмәмәлидир. Сауло охумағы өјрәнмәмиш мәктәбдән чыхды. Лакин бир Шаһид «Охумагла вә јазмагла мәшғул ол» (инҝ.) брошүрасынын көмәјилә она охумағы өјрәтди. Нәтиҹәдә, Сауло һәтта Теократик Хидмәт Мәктәбиндә чыхышлар да едирди. Бир гәдәр сонра Саулонун анасы евдән-евә тәблиғ едәндә һәмин мүәллимәјә раст ҝәлди. О, Саулонун охумағы өјрәндијини ешидәндә анасындан хаһиш етди ки, ҝәлән һәфтә өзү илә ону да ҝәтирсин. Сауло ҝәләндә мүәллимәси ондан сорушду: «Сән мәнә нә өјрәтмәк истәјирсән?» Сауло «Мүгәддәс Китаб әслиндә нә өјрәдир?» китабындан бир абзас охуду. Мүәллимәси деди: «Инана билмирәм ки, инди сән мәни өјрәдирсән». Ҝөз јашларыны сахлаја билмәјән мүәллимә, Саулону гуҹаглады.
Үрәкләри тәшвиг едән тәлим
10. Мүгәддәс Китаб һәгигәтини өјрәтмәкдә бизә көмәк едән һансы ҝөзәл вәсаит вар?
10 Иса бирбаша Јеһовадан алдығы тәлимләрә вә Аллаһын Кәламындакы рәһбәрлијә әсасән өјрәдирди (Лука 4:16-21; Јәһ. 8:28). Биз Исанын мәсләһәтләринә әмәл етмәклә вә Мүгәддәс Јазылара әсасән өјрәтмәклә ону тәглид едирик. Буна ҝөрә дә һамымыз ејни дүшүнҹәдә вә ејни рәјдәјик, бу исә бирлијимизә сәбәб олур (1 Кор. 1:10). Биз неҹә дә миннәтдарыг ки, «садиг вә ағыллы гул» тәлимләримиздә бирлији горумаг вә мүждәчи ишимизи јеринә јетирмәк үчүн бизи Мүгәддәс Китаба әсасланан әдәбијјатларла тәмин едир! (Мат. 24:45; 28:19, 20). Бу нәшрләриндән бири, һал-һазырда 179 дилдә олан «Мүгәддәс Китаб өјрәдир» китабыдыр.
11. Ефиопијада олан бир баҹымыз «Мүгәддәс Китаб өјрәдир» нәшри васитәсилә мүгавимәтин өһдәсиндән неҹә ҝәлди?
11 Аллаһын Кәламыны «Мүгәддәс Китаб өјрәдир» нәшри васитәсилә өјрәнмәк һәтта мүгавимәт ҝөстәрәнләрин үрәјини јумшалда биләр. Ефиопијада јашајан Лула адлы пионер баҹымыз бир гадынла Мүгәддәс Китаб өјрәнмәси кечирирди. Бир дәфә өјрәнмә заманы бу гадынын гоһуму отурдуглары отаға ҝириб деди ки, белә өјрәнмәјә еһтијаҹлары јохдур. Лула «Мүгәддәс Китаб өјрәдир» китабынын 15-ҹи фәслиндә ҝәтирилән сахта пул нүмунәсиндән истифадә едәрәк сакитҹә онунла мүлаһизә јүрүтмәјә башлады. Гадын сакитләшди вә онлара өјрәнмәни давам етдирмәјә иҹазә верди. Лула нөвбәти дәфә ҝәләндә һәмин гадын да орада иди вә о хаһиш етди ки, онунла да Мүгәддәс Китаб өјрәнмәси кечирилсин, һәтта буна ҝөрә пул да тәклиф етди! О, һәфтәдә үч дәфә өјрәнирди вә јахшы руһани наилијјәтләр әлдә етди.
12. Ҝәнҹләрин Мүгәддәс Китаб һәгигәтләрини еффектив сурәтдә неҹә өјрәдә биләҹәјинә даир нүмунә чәкин.
12 Ҝәнҹләр дә «Мүгәддәс Китаб өјрәдир» китабынын васитәсилә диҝәрләринә көмәк едә биләрләр. Һавај адаларында јашајан 11 јашлы Киану мәктәбдә бу китабы охујурду. Бу заман синиф јолдашларындан бири она јахынлашыб сорушду: «Киану, сән нијә бајрамларда иштирак етмирсән?» Киану китабын Әлавәләр бөлмәсиндәки «Бајрамлара мүнасибәтимиз неҹә олмалыдыр?» башлығы алтында олан мәлуматы охуду. Сонра о, китабын мүндәриҹатыны ачды вә ону марагландыран мөвзуну сечмәји тәклиф етди. Мүгәддәс Китаб өјрәнмәси башланды. Кечән хидмәт или Јеһованын Шаһидләри 6 561 426 Мүгәддәс Китаб өјрәнмәси кечирибләр вә онларын әксәријјәти бу китаб васитәсилә кечирилиб. Бәс сән өјрәнмә кечирмәк үчүн бу вәсаитдән истифадә едирсәнми?
13. Мүгәддәс Китаб өјрәнмәси инсанлара неҹә тәсир ҝөстәрә биләр?
13 Аллаһын Кәламыны «Мүгәддәс Китаб өјрәдир» нәшри васитәсилә өјрәнмәк Јеһованын ирадәсини јеринә јетирмәк истәјәнләрә ҝүҹлү тәсир бағышлаја биләр. Норвечдә хүсуси пионер кими хидмәт едән бир әр-арвад Замбијадан олан бир аилә илә Мүгәддәс Китаб өјрәнмәси башлады. Онларын үч гызы вар иди вә даһа ушагларынын олмасыны истәмирдиләр. Гадын һамилә галанда онлар аборт етдирмәк гәрарына ҝәлдиләр. Һәкимә ҝетмәздән бир нечә ҝүн габаг онлар «Һәјата дүзҝүн мүнасибәт» фәслини кечмишдиләр. Бу фәсилдә тәсвир едилән ана бәтниндәки ушаг шәкли онлара елә ҝүҹлү тәсир етди ки, фикирләриндән дашындылар. Онлар руһән инкишаф етмәјә давам едирдиләр вә доғулан оғулларына онларла өјрәнмә кечирән гардашын адыны гојдулар.
14. Өјрәтдикләримизә әсасән јашамаг һансы ҝөзәл нәтиҹәләри верә биләр?
14 Исанын тәлим үсулунун ән ваҹиб ҹәһәти, өјрәтдикләринә өзүнүн әмәл етмәси иди. Исаја бу саһәдә бәнзәјән Јеһованын Шаһидләринин ҝөзәл давранышы бир чохларыны валеһ едир. Јени Зеландијада бир иш адамынын машынындан чантасыны оғурламышдылар. О бу һагда полисә хәбәр верәндә, полис она деди: «Чантанызы јалныз Јеһованын Шаһиди тапарса, ону ҝери алаҹағыныза үмид едә биләрсиниз». Почталјон ишләјән бир баҹы онун чантасыны тапды. Бундан хәбәр тутан һәмин иш адамы баҹынын евинә ҝәлди. Гијмәтли сәнәдләринин јериндә олдуғуну ҝөрәндә о раһат нәфәс алды. Баҹы она деди: «Мән Јеһованын Шаһидијәм, буна ҝөрә чантаны сизә гајтарырам». Полисин сәһәр дедији сөзләр чантанын саһибинин јадына дүшдү вә ону тәәҹҹүб бүрүдү. Бәли, һәгиги мәсиһчиләр Иса Мәсиһи тәглид едәрәк Мүгәддәс Китаб һәгигәтләринә ујғун јашајырлар (Ибр. 13:18).
Исанын инсанлара мүнасибәтини тәглид един
15, 16. Инсанлары чатдырдығымыз хош хәбәрә неҹә ҹәлб едә биләрик?
15 Исанын инсанлара мүнасибәти онларын диггәтини бәјан етдији мүждәјә јөнәлдирди. Онун мәһәббәти вә тәвазөкарлығы садә инсанлары ҹәлб едирди. Иса јанына ҝәлән инсанлара шәфгәтлә јанашырды, онлары сағалдыр вә хош сөзләрлә тәсәлли верирди. (Марк 2:1-5 ајәләрини оху.) Биз мөҹүзәләр ҝөстәрә билмәсәк дә, инсанларла мүнасибәтимиздә һәгигәтә ҹәлб едән хүсусијјәтләри — мәһәббәти, тәвазөкарлығы вә шәфгәти тәзаһүр етдирә биләрик.
16 Тарја адлы хүсуси пионер, Сакит океанын ҹәнубунда, Кирибатинин ән узаг адаларын бириндә јашајан Бејер адлы јашлы бир кишијә тәблиғ едәндә шәфгәт ҝөстәрмәк өз бәһрәсини верди. Киши гулаг асмаг истәмәдијини билдирсә дә, Тарја онун ифлиҹ олдуғуна диггәт јетирди вә она јазығы ҝәлди. Баҹы ондан сорушду: «Хәстә вә јашлы инсанлара Аллаһын нә вәд етдијини һеч ешитмисинизми?» Сонра о, Јешајанын пејғәмбәрлијиндән бир парча охуду. (Јешаја 35:5, 6 ајәләрини оху.) Бу, Бејерә мараглы ҝәлди вә деди: «Нечә илдир ки Мүгәддәс Китаб охујурам вә јаныма динимдән олан миссионерләр ҝәлир, амма бу сөзләри һеч вахт Мүгәддәс Китабда ҝөрмәмишәм». Бејерлә Мүгәддәс Китаб өјрәнмәси башланды вә о, јахшы руһани наилијјәтләр әлдә етди. О шикәст олса да, инди вәфтиз олунмуш гардашдыр вә бу уҹгар јердә олан групда ҝөрүшләр апарыр, бүтүн адада хош хәбәри тәблиғ едир.
Мәсиһи тәглид етмәјә давам един
17, 18. а) Мүвәффәгијјәтли мүждәчи олмаг үчүн нә едә биләрсән? б) Өз хидмәтләринә ҹидди јанашанлар нәјин шаһиди олаҹаглар?
17 Хидмәтдә баш верән бу фәрәһләндириҹи һадисәләр дөнә-дөнә ҝөстәрир ки, Иса Мәсиһин тәзаһүр етдирдији хүсусијјәтләри өзүмүздә јетишдирир вә тәзаһүр етдиририксә, бир мүждәчи кими мүвәффәгијјәтли ола биләрик. Буна ҝөрә дә, сәјли мүждәчиләр кими Иса Мәсиһи тәглид етмәлијик.
18 Биринҹи әсрдә бәзиләри Исанын шаҝирди оланда Петер сорушду: «Бизим нәјимиз олаҹаг?» Ҹавабында Иса деди: «Һәр ким Мәним адым наминә евләрини, гардашларыны, баҹыларыны, атасыны, анасыны, арвадыны, ушагларыны вә јахуд тарлаларыны атмышса, јүз дәфә артыг алаҹаг вә әбәди һәјаты мирас ҝөтүрәҹәкдир» (Мат. 19:27-29). Әҝәр биз ән бөјүк Миссионер олан Иса Мәсиһи тәглид етмәјә давам етсәк, бу сөзләрин һәгигәт олдуғунун өзүмүз шаһиди олаҹағыг.
Неҹә ҹаваб верәрдиниз?
• Јеһова бизи мүждәчи олмаға неҹә өјрәдир?
• Нәјә ҝөрә «Мүгәддәс Китаб өјрәдир» нәшри хидмәтдә сәмәрәлидир?
• Инсанлара мүнасибәтимиздә Исаны неҹә тәглид едә биләрик?
[17-ҹи сәһифәдәки шәкил]
Иса Петери, Андреји, Јагубу вә Јәһјаны давамчысы олмаға дәвәт едәндә онлар дәрһал һај вердиләр
[19-ҹу сәһифәдәки шәкил]
«Мүгәддәс Китаб өјрәдир» кими нәшрләр тәлимдә бирлијимизи горумаға көмәк едир