Јеһованын Кәламы ҹанлыдыр
«Матта» китабындан диггәтәлајиг фикирләр
ИСАНЫН һәјаты вә хидмәти һаггында һәјәҹанландырыҹы мәлуматы илк дәфә гәләмә алан шәхс онун јахын досту, кечмиш верҝијыған Матта олмушдур. Ибрани дилиндә јазылыб, сонрадан јунан дилинә тәрҹүмә олунан «Маттанын Мүждәси» ерамызын тәхминән 41-ҹи илиндә тамамланмышдыр. Бу китаб Ибраниҹә Мүгәддәс Јазыларла Јунанҹа Мүгәддәс Јазылар арасында көрпү кими әлагә јарадыр.
Ҝөрүнүр, әсас етибарилә јәһудиләр үчүн јазылмыш бу мәналы вә тәшвигедиҹи «Мүждә» Исаны вәд олунмуш Мәсиһ вә Аллаһын Оғлу кими тәгдим едир. Бурадакы мәлуматы диггәтлә арашдырсаг, һәгиги Аллаһа, Онун вәдләринә вә Иса Мәсиһә иманымыз мөһкәмләнәҹәк (Ибр. 4:12).
«СӘМАВИ СӘЛТӘНӘТ ЈАХЫНДЫР»
Матта һадисәләрин хроноложи ардыҹыллығындан кәнара чыхмалы олса да, илк нөвбәдә Падшаһлыг мөвзусуну вә Исанын тәлимләрини вурғулајыр. Мәсәлән, Исанын Дағүстү тәблиғи хидмәтинә башладыгдан тәхминән бир ил сонра сөјләдијинә бахмајараг, о, китабын әввәлиндә јазылыб.
Галилејада хидмәти заманы Иса мөҹүзәләр ҝөстәрир, 12 һәварисинә тәблиғә даир мәсләһәтләр верир, фәрисејләри ифша едир вә Падшаһлыг һаггында мәсәлләр чәкир. Сонра о, ‘Галилејадан чыхыб Иордан чајынын о бири тајында јерләшән Јәһудеја дијарына ҝәлир’ (Мат. 19:1). Јолда Иса шаҝирдләринә дејир: ‘Будур, Јерусәлимә галхырыг. Инсан Оғлу өлүмә мәһкум едиләҹәк, үчүнҹү ҝүн исә дириләҹәкдир’ (Мат. 20:18, 19).
Мүгәддәс Китаб суалларына ҹаваблар:
3:16 — Иса вәфтиз олан заман ҝөјләр һансы мәнада ачылды? Ҝөрүнүр, бу, Исанын ҝөјдәки һәјатынын јадына дүшмәсини ҝөстәрир.
5:21, 22 — Нә даһа ҹиддидир: гәзәби үрәкдә сахламаг, јохса үзә вурмаг? Иса хәбәрдарлыг етди ки, гардашына гәзәбләниб, үрәјиндә она кин бәсләмәк ҹидди ҝүнаһдыр. Анҹаг үрәјиндәки гәзәби тәһгирамиз сөзләрлә үзә вурмаг даһа ҹиддидир, белә һәрәкәт едән адам јерли мәһкәмәдә дејил, али мәһкәмә гаршысында ҹаваб вермәлидир.
5:48 — Доғруданмы ‘Сәмави Атамыз кими камил олмаг’ мүмкүндүр? Бәли, нисби мәнада бу мүмкүндүр. Бурада Иса мәһәббәт һаггында данышыр, динләјиҹиләринә севҝидә Аллаһы тәглид етмәји вә камил, јәни мәһәббәтдә мүкәммәл олмағы дејирди (Мат. 5:43-47). Бу неҹә мүмкүн иди? Дүшмәнләринә дә мәһәббәт ҝөстәрмәклә.
7:16 — Һәгиги дини һансы ‘бәһрәләрдән’ танымаг олар? Бу бәһрәләр өзүнә тәкҹә давранышымызы дахил етмир. Бура бизим етигадларымыз, һансы тәлимләри рәһбәр тутмағымыз да дахилдир.
10:34-38 — Аиләнин парчаланмасында Мүгәддәс Јазылары ҝүнаһландырмаг олармы? Әлбәттә ки јох. Наразылыглар иманда олмајан аилә үзвләринин тутдуғу мөвгејә ҝөрә јараныр. Онлар мәсиһчилији гәбул етмәјә вә ја она гаршы чыха биләрләр ки, бу да аиләдә парчаланмаја ҝәтириб чыхарыр (Лука 12:51-53).
11:2-6 — Әҝәр Јәһја Аллаһын Исадан разы галдығыны дедијини ешитдији үчүн Исанын Мәсиһ олдуғуну артыг билирдисә, онда нә үчүн Исанын «Ҝәлмәли олан» олуб-олмадығыны сорушду? Ола биләр, Јәһја шәхсән Исанын өзүндән тәсдиг ҹавабы алмаг истәјирди. Бундан башга, Јәһја билмәк истәјирди ки, Падшаһлыг гүдрәти илә ҝәләрәк, јәһудиләрин үмидләрини һәјата кечирән ‘башга’ адам да олаҹагмы. Исанын ҹавабы ҝөстәрди ки, ондан сонра һеч ким ҝәлмәјәҹәк.
19:28 — Исраилин мүһакимә едиләҹәк ‘он ики гәбиләси’ нәји тәмсил едир? Онлар руһани Исраилин 12 гәбиләсини тәмсил етмир (Галат. 6:16; Вәһј 7:4-8). Исанын бу сөзләри дедији һәвариләр руһани Исраилин үзвләринин һакимләри дејил, онун бир һиссәси олаҹагдылар. Иса онлара ‘сәлтәнәт тапшырды’ вә онлар ‘Аллаһа хидмәт үчүн падшаһ вә каһин’ олаҹагдылар (Лука 22:28-30; Вәһј 5:10). Руһани Исраил ‘дүнјаны мүһакимә етмәлидир’ (1 Кор. 6:2). Беләликлә, сәмави тахтларда отуранларын мүһакимә етдији ‘Исраилин он ики гәбиләси’, ҝөрүнүр, падшаһ вә каһин синфинә дахил олмајан, Кәффарә ҝүнүндә 12 гәбилә илә тәсвир едилән бәшәријјәти тәмсил едир (Лев., фәс. 16).
Бизим үчүн ибрәт дәрсләри:
4:1-10. Бу һадисә Шејтанын садәҹә пислик дејил, реал шәхсијјәт олдуғуну ҝөстәрир. О бизи ширникләндирмәк үчүн ‘ҹисмани еһтирас, ҝөзләрин еһтирасы вә һәјатын тәкәббүрүндән’ истифадә едир. Буна бахмајараг, Мүгәддәс Јазылардакы принсипләрә әмәл етмәклә Аллаһа садиг гала биләрик (1 Јәһ. 2:16).
5:1–7:29. Руһани тәләбатларынызы дәрк един. Сүлһпәрвәр олун. Әхлагсыз фикирләри рәдд един. Вәдинизә әмәл един. Дуа едәркән руһани шејләри мадди мараглардан үстүн тутун. Аллаһ гаршысында зәнҝин олун. Әввәлҹә Падшаһлығы вә Аллаһын салеһлијини ахтарын. Мүһакимә етмәјин. Аллаһын ирадәсини јеринә јетирин. Дағүстү тәблиғдә неҹә дә фајдалы өјүдләр верилмишдир!
9:37, 38. Биз шаҝирд һазырламаг ишиндә сәјлә иштирак едәрәк, мәһсулун Саһибиндән ‘мәһсулуну јығмаға ишчиләр ҝөндәрмәси’ үчүн етдијимиз хаһишә ујғун давранмалыјыг (Мат. 28:19, 20).
10:32, 33. Иманымыз барәдә данышмагдан һеч вахт горхмамалыјыг.
13:51, 52. Падшаһлығын һәгигәтләрини анламағымыз башгаларыны өјрәтмәк вә бу хәзинәләри онларла бөлүшмәк мәсулијјәтини үзәримизә гојур.
14:12, 13, 23. Мәгсәдјөнлү тәрздә дүшүнмәк үчүн һәрдән тәк галмаг ваҹибдир (Марк 6:46; Лука 6:12).
17:20. Руһани инкишафымыза әнҝәл төрәдән даға бәнзәр манеәләри дәф етмәк вә чәтинликләрин өһдәсиндән ҝәлмәк үчүн бизә иман лазымдыр. Јеһоваја вә Онун вәдләринә иманымызы мөһкәмләндирмәјә бармагарасы бахмамалыјыг (Марк 11:23; Лука 17:6).
18:1-4; 20:20-28. Нүфуза сусајан гејри-камиллик вә дини тәрбијә уҹбатындан ад-сан Исанын шаҝирдләрини һәддиндән артыг дүшүндүрүрдү. Ҝүнаһлы мејлләрдән өзүмүзү горумаг вә малик олдуғумуз имтијаз вә мәсулијјәтләрә дүзҝүн јанашмаг үчүн өзүмүздә һәлимлик тәрбијә етмәлијик.
‘ИНСАН ОҒЛУ ӘЛӘ ВЕРИЛӘҸӘКДИР’
Иса ерамызын 33-ҹү или 9 нисанда ‘ешшәјә минәрәк’ Јерусәлимә ҝәлир (Мат. 21:5). Нөвбәти ҝүн о, мәбәдә ҝәлиб, ораны тәмизләјир. Нисанын 11-и мәбәддә тәлим верир, дин алимләрини вә фәрисејләри ифша едир, сонра шаҝирдләринә ‘ҝәлишинин вә дөврүн сонунун әламәтләрини’ сөјләјир (Мат. 24:3). Сәһәриси ҝүн онлара дејир: «Ики ҝүн сонра Пасха бајрамы башлајаҹағыны билирсиниз. Вә Инсан Оғлу чармыха чәкилмәк үчүн әлә вериләҹәкдир» (Мат. 26:1, 2).
Нисанын 14-дүр. Јахынлашан өлүмүнүн Хатирә Ҝеҹәсини тәсис едәндән сонра, Иса әлә верилир, һәбс едилир, ишҝәнҹәләрә мәруз галыр вә дирәк үзәриндә өлдүрүлүр. Үчүнҹү ҝүндә дирилдилир. Ҝөјә галхмаздан әввәл Иса давамчыларына тапшырыг верир: «Беләликлә, ҝедин, бүтүн халглары шаҝирдим един» (Мат. 28:19).
Мүгәддәс Китаб суалларына ҹаваблар:
22:3, 4, 9 — Тој зијафәтинә үч чағырыш нә заман баш вериб? Ерамызын 29-ҹу илиндә Иса давамчылары илә тәблиғ етмәјә башлајанда ҝәлин синфини јығмаг үчүн илк чағырыш башланды вә б. е. 33-ҹү илинәдәк давам етди. Икинҹи чағырыш б. е. 33-ҹү илиндә мүгәддәс руһун верилдији Пентикост ҝүнүндән 36-ҹы илә кими давам етди. Һәр ики чағырыш анҹаг јәһудиләрә, јәһуди прозелитләринә вә самаријалылара үнванланмышды. Анҹаг үчүнҹү дәфә адамлары ‘шәһәрдән чыхан јоллардан’ (ЈД), јәни сүннәтсиз гејри-јәһудиләрдән чағырырлар. Бу, ерамызын 36-ҹы илиндә Рома ордусунун јүзбашысы Корнелиус илә сөһбәтдән башлајараг бизим ҝүнләрәдәк давам едир.
23:15 — Нә үчүн прозелитләр, јәни фәрисејләрин имана ҝәтирдији адамлар фәрисејләрдән «ики гат артыг ҹәһәннәмлик» идиләр? Прозелитләрин бәзиләри әввәлләр, ола билсин, гаты ҝүнаһкар олмушлар. Онлар фәрисејләрин ифрата варан тәлимләрини гәбул етмәклә өзләринин мәһкум олунмуш мүәллимләриндән дә бетәр ифратчы олурдулар. Беләликлә, прозелитләр фәрисејләрдән ики гат артыг «ҹәһәннәмлик» идиләр.
27:3-5 — Јәһуда нәјә ҝөрә пешманчылыг чәкирди? Јәһуданын пешманчылығынын һәгиги төвбә олдуғуну ҝөстәрән һеч нә јохдур. Аллаһдан әфв диләмәк әвәзинә, о өз сәһвини баш каһинләрә вә ағсаггаллара етираф етди. ‘Өлүмлә нәтиҹәләнән ҝүнаһ’ ишләдәрәк Јәһуда јериндә олараг өзүнү ҝүнаһкар вә чарәсиз һисс едирди (1 Јәһ. 5:16). Онун пешманчылығы вәзијјәтинин үмидсизлијиндән ирәли ҝәлирди.
Бизим үчүн ибрәт дәрсләри:
21:28-31. Јеһова үчүн әсл әһәмијјәт кәсб едән шеј Онун ирадәсини јеринә јетирмәјимиздир. Мәсәлән, биз Падшаһлығын тәблиғи вә шаҝирд һазырламаг ишиндә сәјлә чалышмалыјыг (Мат. 24:14; 28:19, 20).
22:37-39. Бу ики ән бөјүк әмр Аллаһын Өз хидмәтчиләринә олан тәләбләринә неҹә дә ајдын јекун вурур!
[Иҹазә илә]
© 2003 BiblePlaces.com
[31-ҹи сәһифәдәки шәкилләр]
Мәһсул јығымында сәјлә иштирак едирсәнми?
Матта Падшаһлыг мөвзусуну вурғулајыр