Исанын сөзләри бизә неҹә бәхтијарлыг ҝәтирә биләр?
«Иса... даға чыхды; вә... шаҝирдләри Онун јанына ҝәлдиләр. Вә О... онлара өјүд верди» (МАТ. 5:1, 2).
1, 2. а) Иса Дағүстү тәблиғини һансы шәраитдә сөјләмишди? б) Иса өз нитгинә неҹә башлады?
ЕРАМЫЗЫН 31-ҹи илидир. Иса Галилејада тәблиғинә гыса ара вериб, Пасха бајрамыны гејд етмәк үчүн Јерусәлимә јолланыр (Јәһ. 5:1). Галилејаја гајыданда Аллаһдан 12 һәварисини сечмәкдә көмәк диләјәрәк бүтүн ҝеҹәни дуа едир. Нөвбәти ҝүн о, хәстәләри сағалданда әтрафына чохлу адамлар топлашыр. О, дағын јамаҹында әјләшиб, шаҝирдләрини вә орада топлашанлары өјрәтмәјә башлајыр (Мат. 4:23–5:2; Лука 6:12-19).
2 Иса өз нитгинә — Дағүстү тәблиғинә бәхтијарлығын Аллаһла јахын мүнасибәтләрдән асылы олдуғуну демәклә башлајыр. (Матта 5:1-12 ајәләрини оху.) Бәхтијарлыг һәјатдан дәрин мәмнунлуг дујмаг вә севинҹ һиссидир. Иса бәхтијарлығын доггуз сәбәбини мүзакирә едәрәк мәсиһчиләрин нә үчүн хошбәхт олдуғуну ҝөстәрир; о вахтдан тәхминән 2 000 ил кечсә дә, бу сөзләр өз дәјәрини итирмәјиб. Ҝәлин онларын һәр бирини нәзәрдән кечирәк.
«Руһән јохсуллар»
3. Руһани тәләбатлары дәрк етмәк нә демәкдир?
3 «Руһән јохсуллар нә бәхтијардырлар! Чүнки Сәмави Сәлтәнәт онларындыр» (Мат. 5:3). «Руһән јохсуллар», јәни руһани тәләбатларыны дәрк едәнләр Аллаһын рәһбәрлијинә вә мәрһәмәтинә мөһтаҹ олдугларыны дәрк едәнләрдир.
4, 5. а) Нәјә ҝөрә руһани тәләбатларыны дәрк едәнләр бәхтијардырлар? б) Руһани тәләбатларымызы неҹә өдәјә биләрик?
4 Руһани тәләбатларыны дәрк едәнләр бәхтијардырлар, чүнки «Сәмави Сәлтәнәт онларындыр». Исаны Мәсиһ кими гәбул етмәк еркән шаҝирдләрин гаршысында онунла бирҝә Аллаһын сәмави Падшаһлығында һөкмранлыг етмәк имканы ачмышды (Лука 22:28-30). Истәр Мәсиһин һәмварисләри олаг, истәрсә дә Падшаһлығын рәһбәрлији алтында јерүзү Ҹәннәтдә јашамаг үмидимиз олсун, јалныз руһани тәләбатларымызы вә тамамилә Аллаһдан асылы олдуғумузу һәгигәтән дәрк етдијимиз заман хошбәхтлијә наил ола биләрик.
5 Лакин һеч дә һамы руһани тәләбатларыны дәрк етмир, чүнки онларда иман јохдур вә онлар мүгәддәс шејләри гијмәтләндирмирләр (2 Салон. 3:1, 2; Ибр. 12:16). Руһани тәләбатларымызы өдәмәк үчүн Мүгәддәс Китабы сәјлә өјрәнмәк, шаҝирд һазырламаг ишиндә чалышганлыгла иштирак етмәк вә мүнтәзәм шәкилдә мәсиһчи ҝөрүшләринә ҝәлмәк сон дәрәҹәдә ваҹибдир (Мат. 28:19, 20; Ибр. 10:23-25).
Јаслы оланлар «бәхтијардырлар»
6. «Јаслы оланлар» кимләрдир вә нәјә ҝөрә онлар «бәхтијардырлар»?
6 «Јаслы оланлар нә бәхтијардырлар! Чүнки онлар тәсәлли тапаҹаглар» (Мат. 5:4). «Јаслы оланлар»а да руһани тәләбатларыны дәрк едән инсанлара хас олан хүсусијјәтләр хасдыр. Онлар өз талеләриндән шикајәт етдикләри үчүн јаслы дејилләр. Әксинә, буна сәбәб онларын өз ҝүнаһлы вәзијјәтләри вә бәшәријјәтин гејри-камиллији уҹбатындан мөвҹуд олан шәраитләрдә јашамаларыдыр. Бәс нәјә ҝөрә ‘јаслы оланлар бәхтијар’ адланыр? Чүнки онлар Аллаһа вә Мәсиһә иман ҝәтирир вә Јеһова илә сых мүнасибәтдән тәскинлик тапырлар (Јәһ. 3:36).
7. Шејтан дүнјасынын тәклиф етдији шејләрә биз неҹә јанашмалыјыг?
7 Шејтан дүнјасында түғјан едән гејри-салеһлик бизи кәдәрләндирирми? Бу дүнјанын тәклиф етдији шејләрә биз неҹә јанашырыг? Һәвари Јәһја јазмышды: «Дүнјада олан һәр шеј, јәни ҹисмани еһтирас, ҝөзләрин еһтирасы вә һәјатын тәкәббүрү Атадан дејил» (1 Јәһ. 2:16). Бәс әҝәр «бу дүнјанын руһуну»н, јәни Аллаһдан узаглашмыш инсан ҹәмијјәтиндә һөкм сүрән әһвал-руһијјәнин руһанилијимизи јаваш-јаваш јејиб битирдијини һисс едириксә, нә етмәлијик? Ҝәлин сәјлә дуа едәк, Аллаһын Кәламыны өјрәнәк вә ағсаггаллардан јардым истәјәк. Нараһатчылығымыза нә сәбәб олурса-олсун, Јеһоваја јахынлашдыгҹа ‘тәсәлли тапаҹағыг’ (1 Кор. 2:12; Мәз. 119:52; Јаг. 5:14, 15).
«Һәлимләр нә бәхтијардырлар!»
8, 9. Һәлим олмаг нә демәкдир вә нәјә ҝөрә һәлимләр бәхтијар адландырылыр?
8 «Һәлимләр нә бәхтијардырлар! Чүнки јери мирас алаҹаглар» (Мат. 5:5). «Һәлимлик» зәиф олмаг вә ја ријакарҹасына нәзакәт ҝөстәрмәк демәк дејил (1 Тим. 6:11). Әҝәр биз һәлимиксә, Јеһованын ирадәсини јеринә јетирәҹәк вә Онун рәһбәрлијинә һај верәҹәјик. Бу һәм дә өзүнү һәмиманлыларымызла вә башга адамларла давранышымызда да бүрузә верәҹәк. Бу ҹүр һәлимлик тәзаһүр етдирмәк Павелин вердији мәсләһәтә мүвафигдир. (Ромалылара 12:17-19 ајәләрини оху.)
9 Нәјә ҝөрә һәлимләр бәхтијардыр? Чүнки һәлим олан Исанын дедији кими, белә инсанлар «јери мирас алаҹаглар». Иса, бир Падшаһ кими, Јер күрәсинин әсас Варисидир (Мәз. 2:8; Мат. 11:29; Ибр. 2:8, 9). Онун һәлим ‘һәмварисләри’ дә јери мирас алаҹаглар (Ром. 8:16, 17). Исанын Падшаһлығы алтында, јер үзүндә бир чох башга һәлим инсанлар да әбәди јашајаҹаг (Мәз. 37:10, 11).
10. Әҝәр биз һәлим дејиликсә, бу, хидмәтдә алаҹағымыз мәсулијјәтләримизә вә башгалары илә мүнасибәтимизә неҹә тәсир едәҹәк?
10 Иса кими биз дә һәлим олмалыјыг. Туталым, биз давакарлыға мејллијик. Инсанлара гаршы белә агрессив вә әдавәтли мүнасибәтимиз уҹбатындан онлар биздән кәнар ҝәзә биләрләр. Мәсәлән, әҝәр бир гардаш јығынҹагда мәсулијјәтләрә ҹан атырса, бу хүсусијјәт онун тәјинат алмасына мане олаҹаг (1 Тим. 3:1, 3). Павел Титуса Критдәки мәсиһчиләрә ‘гејри-давакар, мүлајим олуб, бүтүн инсанлара там һәлимлик ҝөстәрмәји’ даима хатырлатмағы тапшырды (Тит. 3:1, 2). Белә һәлимлик башга инсанлар үчүн әсил хејир-дуадыр!
Онлар ‘салеһлијә ҹан атырлар’
11-13. а) Салеһлијә ҹан атмаг вә сусамаг нә демәкдир? б) Салеһлијә ҹан атыб сусајанлар неҹә «дојаҹаглар»?
11 «Салеһлијә ҹан атыб сусајанлар нә бәхтијардырлар! Чүнки онлар дојаҹаглар» (Мат. 5:6). Исанын нәзәрдә тутдуғу салеһлик Аллаһын ирадәсинә вә тәләбләринә табе олараг дүзҝүн оланы етмәк демәкдир. Мәзмурчу Јеһованын ‘һөкмләринин һәсрәтини чәкмәкдән үрәјинин ағрыдығыны’ дејир (Мәз. 119:20). Бәс биз салеһлији нә дәрәҹәдә гијмәтләндиририк? Она ҹан атырыгмы?
12 Иса салеһлијә ҹан атанлары вә онун үчүн сусајанлары бәхтијар адландырыр, чүнки онлар «дојаҹаглар», јәни тәләбатлары тамамилә тәмин олунаҹаг. Бу, ерамызын 33-ҹү илинин Пентикост ҝүнүндән сонра мүмкүн олду, чүнки о вахт Јеһованын мүгәддәс руһу ‘дүнјанын салеһлик барәсиндәки сәһвләрини ифша етмәјә’ башлады (Јәһ. 16:8). Јеһова мүгәддәс руһу васитәсилә бәзи адамлары ‘салеһлик тәрбијәси үчүн фајдалы’ олан Јунанҹа Мүгәддәс Јазылары гәләмә алмаға илһамландырды (2 Тим. 3:16). Бундан савајы, Аллаһын руһу бизә Онун ‘бәнзәјишинә ҝөрә һәгиги салеһликлә јарадылмыш јени мәнлији ҝејмәјә’ көмәк едир (Ефес. 4:24). Мәҝәр төвбә едәрәк Исанын фидијә гурбанлығы әсасында ҝүнаһларынын бағышланмасыны диләјән инсанларын Аллаһ гаршысында ‘бәраәт алмаларынын’, јәни салеһ елан олунмаларынын мүмкүн олдуғуну билмәк бизә тәсәлли вермирми? (Ромалылара 3:23, 24 ајәләрини оху.)
13 Әҝәр јерүзү үмидинә маликиксә, салеһлијә сусузлуғумуз салеһлијин һөкм сүрәҹәји јени дүнјада әбәди һәјаты аланда тамамилә тәмин олунаҹаг. Һәләлик исә ҝәлин Јеһованын нормаларына ујғун јашамаға гәти гәрарлы олаг. Иса демишди: «Әввәлҹә Аллаһын Сәлтәнәтини вә Онун салеһлијини ахтарын» (Мат. 6:33). Исанын сөзләринә ујғун јашасаг, Аллаһа хидмәтдә ишимиз чох олаҹаг вә биз бундан хошбәхтлик әлдә едәҹәјик (1 Кор. 15:58).
Нәјә ҝөрә «мәрһәмәтли оланлар» бәхтијардырлар?
14, 15. Биз мәрһәмәти неҹә тәзаһүр етдирә биләрик вә «мәрһәмәтли оланлар» нәјә ҝөрә бәхтијардырлар?
14 «Мәрһәмәтли оланлар нә бәхтијардырлар! Чүнки онлара мәрһәмәт едиләҹәкдир» (Мат. 5:7). «Мәрһәмәтли оланлар» башгаларынын һалына аҹыјыр вә дәрдләринә шәрик олурлар. Иса шәфгәтдән ирәли ҝәләрәк, бир чохларынын изтирабларына мөҹүзәли шәкилдә сон гојмушдур (Мат. 14:14). Јеһова төвбә едәнләри бағышладығы кими, инсанлар да онлара гаршы ҝүнаһ ишләдәнләри бағышлајанда мәрһәмәт ҝөстәрмиш олурлар (Чых. 34:6, 7; Мәз. 103:10). Биз мәрһәмәти һәмчинин еһтијаҹы оланларын һалыны јүнҝүлләшдирәҹәк меһрибан сөзләримизлә вә хејирхаһ әмәлләримизлә дә тәзаһүр етдирә биләрик. Мәрһәмәт ҝөстәрмәјин ән јахшы үсулларындан бири башгалары илә Мүгәддәс Китаб һәгигәтләрини бөлүшмәкдир. Иса шәфгәтдән ирәли ҝәләрәк, издиһама «чох шејләр өјрәтмәјә башлады» (Марк 6:34).
15 Исанын: «Мәрһәмәтли оланлар нә бәхтијардырлар! Чүнки онлара мәрһәмәт едиләҹәкдир» сөзләри илә разылашмаг үчүн тутарлы сәбәбимиз вар. Әҝәр башгаларына гаршы мәрһәмәтли олсаг, ола билсин, онлар да бизә гаршы мәрһәмәтли олаҹаглар. Аллаһ бизә һөкм едән заман башгаларына ҝөстәрдијимиз мәрһәмәти јада сала вә буна мүвафиг олараг бизә һөкм чыхара биләр (Јаг. 2:13). Ҝүнаһларын бағышланмасы вә әбәди һәјат јалныз мәрһәмәтли оланлар үчүндүр (Мат. 6:15).
Нәјә ҝөрә «үрәји тәмиз оланлар» бәхтијардырлар?
16. «Үрәји тәмиз» олмаг нә демәкдир вә бу хүсусијјәтә малик оланлар Аллаһы неҹә ҝөрүрләр?
16 «Үрәји тәмиз оланлар нә бәхтијардырлар! Чүнки онлар Аллаһы ҝөрәҹәкләр» (Мат. 5:8). ‘Үрәјимизин тәмизлији’ бағлы олдуғумуз шејләрдә, арзуларымызда вә мотивләримиздә өзүнү бүрузә верәҹәк. Биз ‘пак үрәкдән ҝәлән мәһәббәти’ тәзаһүр етдирәҹәјик (1 Тим. 1:5). Дахилән тәмиз олсаг, биз ‘Аллаһы ҝөрәҹәјик’. Бу о демәк дејил ки, биз Аллаһы физики ҝөзләрлә ҝөрәҹәјик, ахы Аллаһы «ҝөрән адам сағ галмаз» (Чых. 33:20). Лакин Иса Аллаһын кејфијјәтләрини мүкәммәл сурәтдә әкс етдирдији үчүн дејә билмишди: «Мәни ҝөрән, Атаны ҝөрмүш олур» (Јәһ. 14:7-9). Јеһованын јер үзүндәки хидмәтчиләри кими, Онун бизим үчүн етдији ишләрә диггәт јетирмәклә ‘Аллаһы ҝөрә’ биләрик (Әјј. 42:5). Мәсһ олунмуш мәсиһчиләр исә ҝөјләр һәјатына дирилдиләндә сәмави Аталарыны там мәнада ҝөрүрләр (1 Јәһ. 3:2).
17. Үрәјимизин тәмиз олмасы өзүнү неҹә бүрузә верәҹәк?
17 Үрәји тәмиз олан инсан мәнәви вә әхлаги ҹәһәтдән пак олдуғу үчүн Јеһованын ҝөзүндә натәмиз олан шејләр һагда дүшүнмүр (1 Салн. 28:9; Јешаја 52:11). Әҝәр үрәјимиз тәмиздирсә, сөзләримиз вә әмәлләримиз дә тәмиз олаҹаг вә Аллаһа хидмәтимиздә һеч бир ријакарлыг олмајаҹаг.
‘Сүлһпәрвәрләрә Аллаһын Оғуллары дејиләҹәк’
18, 19. ‘Сүлһпәрвәр’ инсанлар неҹә давранырлар?
18 «Сүлһпәрвәрләр нә бәхтијардырлар! Чүнки онлара Аллаһын оғуллары дејиләҹәк» (Мат. 5:9). Сүлһпәрвәр инсанлары давранышларындан танымаг олар. Әҝәр биз Исанын нәзәрдә тутдуғу адамлар кими давранырыгса, демәли, биз сүлһпәрвәрик вә һеч кимә ‘јаманлыг әвәзинә јаманлыг етмирик’. Әксинә олараг, ‘һәмишә һамыја јахшылыг етмәјә чалышырыг’ (1 Салон. 5:15).
19 Матта 5:9 ајәсиндә «сүлһпәрвәрләр» кими тәрҹүмә олунан јунан сөзүнүн һәрфи мәнасы «сүлһ јараданлар» демәкдир. Сүлһпәрвәр инсан олмаг үчүн фәал сурәтдә сүлһ јаратмаға ҹан атмалыјыг. Сүлһ јарадан инсанлар ‘әзиз достлары ајыраҹаг’ һеч бир шеј етмирләр (Сүл. мәс. 16:28). Сүлһпәрвәр инсанлар кими, биз «һамы илә бәрабәр сүлһ ичиндә јашамаг» үчүн гәтијјәтли аддымлар атырыг (Ибр. 12:14).
20. Бу ҝүн кимләр «Аллаһын оғуллары» адланыр вә нәтиҹәдә даһа кимләр Аллаһын өвладлары олаҹаг?
20 Сүлһпәрвәр инсанлара ‘Аллаһын оғуллары дејиләҹәји’ үчүн онлар бәхтијардырлар. Садиг мәсһ олунмушлар Јеһова тәрәфиндән оғуллуға ҝөтүрүлүр вә онлар «Аллаһын оғуллары»дырлар. Онлар Аллаһын өвладлары олараг артыг индидән Аллаһла јахын мүнасибәтләрә маликдирләр, чүнки Мәсиһә иман ҝәтирир вә бүтүн үрәкдән «мәһәббәт вә сүлһ гајнағы олан Аллаһ»а ибадәт едирләр (2 Кор. 13:11; Јәһ. 1:12). Бәс Исанын «башга» сүлһпәрвәр ‘гојунлары’ барәдә нә демәк олар? Миниллик Һөкмранлығы заманы Иса онларын «Әбәди Ата»сы олаҹаг, лакин миниллијин сонунда о өзү Јеһоваја табе олаҹаг, онлар исә там мәнада Аллаһын оғуллары олаҹаглар (Јәһ. 10:16; Јешаја 9:6; Ром. 8:21; 1 Кор. 15:27, 28).
21. Әҝәр биз «руһа ҝөрә јашајырыг»са, неҹә давранаҹағыг?
21 Әҝәр биз «руһа ҝөрә јашајырыг»са, сүлһпәрвәрлик башгаларынын нәзәринә чарпан кејфијјәтләримиздән бири олаҹаг. Биз ‘бир-биримизи һирсләндирмәјәҹәјик’ (Галат. 5:22-26). Әксинә, ‘бүтүн адамларла сүлһдә олмаға’ чалышаҹағыг (Ром. 12:18).
Тәгиб едиләнләр нә бәхтијардырлар!
22-24. а) Салеһлик уғрунда тәгиб едиләнләрин бәхтијар олмалары үчүн һансы сәбәбләр вар? б) Нөвбәти ики мәгаләдә нә мүзакирә олунаҹаг?
22 «Салеһлик уғрунда тәгиб едиләнләр нә бәхтијардырлар! Чүнки Сәмави Сәлтәнәт онларындыр» (Мат. 5:10). Иса хошбәхтлијин 9-ҹу сәбәбини дедикдән сонра әлавә едир: «Мәнә ҝөрә инсанлар сизи тәһгир вә тәгиб едәҹәкләри, јалан сөјләјиб сизә һәр ҹүр бөһтан атаҹаглары заман сиз нә бәхтијарсыныз! Севинин вә шадланын! Чүнки ҝөјләрдә мүкафатыныз бөјүкдүр; чүнки сиздән габаг пејғәмбәрләри дә белә тәгиб етмишләр» (Мат. 5:11, 12).
23 Гәдим заманларда јашајан пејғәмбәрләр кими, мәсиһчиләр дә «салеһлик уғрунда» тәһгир, тәгиб олунаҹагларыны вә онлара гаршы јалан сөјләјиб бөһтан атаҹагларыны билирләр. Лакин бу кими имтаһанлара сәдагәтлә таб ҝәтирәрәк Јеһованы разы салмағымыз вә Она иззәт ҝәтирмәјимиз бизә мәмнунлуг бәхш едир (1 Пет. 2:19-21). Чәкдијимиз изтираблар Јеһоваја хидмәтдән дујдуғумуз севинҹи нә инди, нә дә ҝәләҹәкдә зәифләдә биләр. Һәмчинин бу изтираблар бизим Мәсиһлә бәрабәр ҝөјләрдә падшаһлыг етмәк вә ја онун һакимијјәтинин тәбәәләриндән бири кими јер үзүндә әбәди һәјаты алмаг севинҹимизи әскилдә билмәз. Белә хејир-дуалар Аллаһын лүтфкар, хејирхаһ вә сәхавәтли олмасынын сүбутудур.
24 Биз Дағүстү тәблиғдән чох шеј өјрәнә биләрик. Нөвбәти ики мәгаләдә бәзи башга фикирләр мүзакирә олунаҹаг. Ҝәлин ҝөрәк, Иса Мәсиһин һәмин ҝөстәришләрини неҹә тәтбиг едә биләрик.
Неҹә ҹаваб верәрдиниз?
• Нәјә ҝөрә руһани тәләбатларыны дәрк едәнләр бәхтијардырлар?
• Нәјә ҝөрә «һәлимләр» бәхтијар адланырлар?
• Мәсиһчиләр тәгиб олунсалар да, нәјә ҝөрә бәхтијардырлар?
• Исанын бәхтијар олмаға даир садаладығы сәбәбләрдән һансы сәнә даһа бөјүк тәәссүрат бағышлады?
[7-ҹи сәһифәдәки шәкил]
Исанын бәхтијар олмаға даир садаладығы сәбәбләр инди дә өз дәјәрини итирмәјиб
[8-ҹи сәһифәдәки шәкил]
Мәрһәмәт ҝөстәрмәјин ән јахшы үсулларындан бири һәгигәти башгалары илә бөлүшмәкдир