Јеһованын халгы бәхтијардыр
«Руһән јохсуллар [«руһани тәләбатларыны дәрк едәнләр», ЈД] нә бәхтијардырлар!» (МАТТА 5:3).
1. Әсл бәхтијарлыг нәдир вә о нәји ҝөстәрир?
БӘХТИЈАРЛЫГ — Јеһованын халгынын малик олдуғу гијмәтли әмлакдыр. Мәзмурчу Давуд нида едирди: «Нә бәхтијардыр Аллаһы Рәбб [«Јеһова», ЈД] олан халг!» (Мәзмур 144:15). Бәхтијарлыг — дәрин мәмнунлуг вә севинҹ һиссидир. Әсл бәхтијарлыг, бизи бүтүнлүклә әһатә едән бир һиссдир; бу һисс, Јеһованын бизә хејир-дуа вердијини дәрк етмәкдән һасил олур (Сүлејманын мәсәлләри 10:22). Бу ҹүр бәхтијарлыг бизим сәмави Атамызла јахын гаршылыглы мүнасибәтимиз олдуғуну вә Онун ирадәсини јеринә јетирдијимизи ҝөстәрир (Мәзмур 112:1; 119:1, 2). Иса Мәсиһ хошбәхт олмағымыз үчүн доггуз сәбәб садаламышдыр. Бунлары бу вә нөвбәти мәгаләдә нәзәрдән кечирәрәк, «хошбәхт Аллаһ» олан Јеһоваја садиг хидмәт едәнләрин нә дәрәҹәдә хошбәхт олдугларыны баша дүшәҹәјик (1 Тимотејә 1:11, ЈД).
Руһани тәләбатларын дәрк едилмәси
2. Иса хошбәхтлик һаггында нә вахт данышмышдыр вә о, өз тәблиғинә нәдән башламышдыр?
2 Иса ерамызын 31-ҹи илиндә бүтүн дөврләрин ән мәшһур нитгини сөјләмишдир. Һәмин нитг Дағүстү тәблиғ адланыр, чүнки Иса ону Галилеја дәнизи јахынлығындакы дағын дөшүндә сөјләмишдир. Маттанын Мүждәсиндә охујуруг: «Иса издиһамы ҝөрүб даға чыхды; вә Өзү отурдугда, шаҝирдләри Онун јанына ҝәлдиләр. Вә О, сөз ачыб онлара белә өјүд верди: “Руһән јохсуллар [«руһани тәләбатларыны дәрк едәнләр», ЈД] нә бәхтијардырлар!”». Бир тәрҹүмәдә Исанын ҝириш сөзләри һәрфи олараг белә тәрҹүмә едилмишдир: «Руһән сәдәгә ахтаранлар бәхтијардырлар» (Матта 5:1-3). Башга бир тәрҹүмәдә исә бу ифадә белә верилмишдир: «Һагг-Таалаја олан тәләбатларыны дәрк едәнләр хејир-дуа алырлар».
3. Һәлимлик хошбәхт олмағымыза неҹә көмәк едир?
3 Дағ дөшүндә сөјләдији тәблиғиндә Иса изаһ етди ки, инсан өз руһани тәләбатларыны дәрк етсә, даһа да хошбәхт олар. Һәлим мәсиһчиләр ҝүнаһкар олдугларыны там сурәтдә е’тираф едәрәк, Мәсиһин гурбанлығы әсасында Јеһовадан онлары бағышламасыны диләјирләр (1 Јәһја 1:9). Беләликлә онлар гәлб раһатлығына вә һәгиги хошбәхтлијә наил олурлар. «Асилији бағышланан, ҝүнаһы әфв олунан инсан нә бәхтијардыр!» (Мәзмур 32:1; 119:165).
4. а) Руһани тәләбатларымызы дәрк етдијимизи вә јахынларымызын руһани тәләбатларынын гајғысына галдығымызы неҹә ҝөстәрә биләрик? б) Руһани тәләбатларымызы дәрк етмәклә, биз неҹә даһа да хошбәхт олуруг?
4 Өз руһани тәләбатларымызы дәрк етмәјимизин сајәсиндә ҝүндәлик олараг Мүгәддәс Китабы охумаға, «садиг вә ағыллы гул»ун вахтлы-вахтында тәгдим етдији руһани гиданы мәмнунијјәтлә дадмаға вә мүнтәзәм олараг јығынҹаг ҝөрүшләриндә иштирак етмәјә тәшвиг олунуруг (Матта 24:45; Мәзмур 1:1, 2; 119:111; Ибраниләрә 10:25). Јахынларымыза олан мәһәббәт һисси бизи тәшвиг едир ки, онларын да руһани тәләбатларынын гајғысына галаг вә Падшаһлыг һаггындакы хош хәбәри сә’јлә тәблиғ едәрәк, Аллаһын һәгигәтләрини онлара да өјрәдәк (Марк 13:10; Ромалылара 1:14-16). Биз Мүгәддәс Китаб һәгигәтләрини башгалары илә бөлүшәрәк, даһа хошбәхт олуруг (Һәвариләрин ишләри 20:20, 35). Падшаһлыға олан ҝөзәл үмид вә онун ҝәтирәҹәји хејир-дуалар һаггында дүшүнәндә, даһа да хошбәхт олуруг. Мәсһ едилмиш мәсиһчиләрин «кичик сүрү»сүнүн Падшаһлыға олан үмиди, Мәсиһлә бирликдә идарә едәҹәкләри ҝөјләрдәки өлмәз һәјатла бағлыдыр (Лука 12:32; 1 Коринфлиләрә 15:50, 54). ‘Башга гојунлар’ үчүн исә бу үмид, Падшаһлығын рәһбәрлији алтында јер үзүндә олаҹаг Ҹәннәтдәки әбәди һәјатла бағлыдыр (Јәһја 10:16; Мәзмур 37:11; Матта 25:34, 46).
Јаслылар неҹә бәхтијар ола биләрләр?
5. а) «Јаслы оланлар нә бәхтијардырлар» ифадәси нә демәкдир? б) Јаслы оланлар тәсәллини неҹә тапырлар?
5 Исанын хатырлатдығы бәхријарлыг үчүн нөвбәти сәбәб илк бахышдан зиддијјәтли ҝөрүнүр: «Јаслы оланлар нә бәхтијардырлар! Чүнки онлар тәсәлли тапаҹаглар» (Матта 5:4). Мәҝәр јаслы адам хошбәхт ола биләрми? Исанын сөзләрини баша дүшмәк үчүн онун нәји нәзәрдә тутдуғуну ајдынлашдырмаг тәләб олунур. Шаҝирд Јагуб бизим ҝүнаһлы вәзијјәтимизин кәдәрләнмәк үчүн сәбәб олдуғуну изаһ етмишдир. О јазмышдыр: «Еј ҝүнаһкарлар, әлләринизи тәмизләјин! Еј мүтәрәддидләр, үрәкләринизи сафлашдырын! Кәдәрләнин, јас тутун, ағлајын! Гој ҝүлүшүнүз јаса, севинҹиниз дә гәмә дөнсүн! Рәббин һүзурунда алчалын, О исә сизи јүксәлдәҹәкдир» (Јагуб 4:8-10). Өз ҝүнаһлы вәзијјәтләри уҹбатындан һәгигәтән дә кәдәрли оланлар Мәсиһин фидијә гурбанлығына иман ҝәтирәрәк вә сәмими гәлбдән төвбә едиб, Јеһованын ирадәсини јеринә јетирәрәк, ҝүнаһларынын бағышланаҹағыны биләндә тәсәлли тапырлар (Јәһја 3:16; 2 Коринфлиләрә 7:9, 10). Беләликлә онлар Јеһова илә дәјәрли гаршылыглы мүнасибәтләр вә Она хидмәт едәрәк вә иззәт ҝәтирәрәк әбәди јашамаг үмидини газанырлар. Онлар бундан хошбәхтлик вә севинҹ дујурлар (Ромалылара 4:7, 8).
6. Бә’зиләри һансы мә’нада јаслыдырлар вә онлар тәсәллини нәдә тапырлар?
6 Исанын сөзләри һәмчинин јер үзүндә баш верән ијрәнҹликләрә ҝөрә јаслы оланлара да аиддир. Иса өзү Јешаја 61:1-3 ајәләриндә јазылан сөзләри өзүнә аид етди: «Худавәнд Рәббин Руһу үзәримдәдир, чүнки фәгирләрә мүждәни билдирмәк үчүн О мәни мәсһ етди. Гәлбләри сыныг оланларын јараларыны сарымаг... јаслыларын һамысына тәсәлли вермәк үчүн... Рәбб мәни ҝөндәрди». Бу тапшырыг јер үзүндә јашајан мәсһ едилмиш мәсиһчиләрә дә аиддир, онлар бу тапшырығы өз көмәкчиләри олан «башга гојунлар»ла бирликдә јеринә јетирирләр. Мәҹази диллә десәк, онларын һамысы «орада [христиан дүнјасыны тәмсил едән дөнүк Јерусәлимдә] едилән бүтүн ијрәнҹ ишләрдән өтрү аһ-налә едән адамларын алнына ишарә гој»урлар (Језекел 9:4). Бу ҹүр јаслы оланлара Падшаһлыг һаггындакы хош хәбәр тәсәлли верир (Матта 24:14). Онлар Шејтанын бу пис дүнјасынын тезликлә Јеһованын салеһлик өмүр сүрәҹәк јени дүнјасы илә әвәз олунаҹағыны биләндә, өзләрини хошбәхт һисс едирләр.
Һәлимләр бәхтијардырлар
7. «Һәлимлик» ифадәси һансы мә’наны дашымыр?
7 Иса Дағүстү тәблиғинә нөвбәти сөзләрлә давам едир: «Һәлимләр нә бәхтијардырлар! Чүнки јери мирас алаҹаглар» (Матта 5:5). Бә’зиләри һәлимлијин зәифлик олдуғуну дүшүнүрләр. Лакин бу белә дејил. Бир Мүгәддәс Китаб алими «һәлимләр» кими тәрҹүмә олунан сөзү изаһ едәрәк јазыр: «[Һәлим] инсанын ән ҝөркәмли хүсусијјәти тамамилә өзүнә һаким олмагдыр. Бу, нә ирадәсизлик, нә һәссаслыг, нә дә ки, пассивликдир. Бу, өзүнү идарә етмәји баҹаран ҝүҹлү инсанын хүсусијјәтидир». Иса өзү һаггында демишдир: «Мән һәлим вә гәлбдән тәвазөкарам» (Матта 11:29). Бунунла белә о, әдаләтли принсипләри гәтијјәтлә мүдафиә едирди (Матта 21:12, 13; 23:13-33).
8. Һәлимлик нә илә сых бағлыдыр вә бу хүсусијјәт инсанларла мүнасибәтимиздә нә үчүн ваҹибдир?
8 Беләликлә, һәлимлик өзүнә һаким олмаг баҹарығы илә сых бағлыдыр. Һәвари Павел руһун сәмәрәсини тәсвир едәркән бу ики хүсусијјәти бирҝә хатырлатмышдыр (Галатијалылара 5:22, 23). Һәлимлији мүгәддәс руһун көмәјилә јетишдирмәк лазымдыр. Мәсиһчи шәхсијјәтинә хас олан бу хүсусијјәт јығынҹагдакы баҹы-гардашларла вә башга инсанларла сүлһдә олмаға көмәк едир. Павел јазырды: «Шәфгәт, хејирхаһлыг, тәвазөкарлыг, һәлимлик вә сәбирлилик ҝејин; бир-биринизә тәһәммүл един вә биринизин диҝәриндән шикајәти варса, бағышласын» (Колослулара 3:12, 13).
9. а) Нәјә ҝөрә һәлимлик јалныз инсанларла мүнасибәтдә тәләб олунмур? б) Һәлимләр һансы мә’нада «јери мирас алаҹаглар»?
9 Лакин һәлимлик јалныз инсанларла мүнасибәтдә тәзаһүр олунмур. Бу хүсусијјәти Јеһованын һөкмранлығына көнүллү сурәтдә табе олмағымызла да әкс етдиририк. Буна даир ән бөјүк нүмунәни Иса Мәсиһ вермишдир. Јер үзүндә јашајан заман о, һәлим иди. Вә Атасынын ирадәсинә там шәкилдә табе олурду (Јәһја 5:19, 30). Иса јер үзүнү сөзүн әсл мә’насында мирас алаҹаг, чүнки о, јерин Һөкмдары тә’јин олунмушдур (Мәзмур 2:6-8; Даниел 7:13, 14). Онун јер үзәриндә падшаһлыг етмәк үчүн «инсанлар арасындан» сечилмиш 144 000 «һәмварисләри» вар (Ромалылара 8:17; Вәһј 5:9, 10; 14:1, 3, 4; Даниел 7:27). Мәсиһ вә онун һакимијјәт шәрикләри гојунларла мүгајисә олунан милјонларла хошбәхт инсанлары идарә едәҹәкләр. Һәмин инсанларын үзәриндә мәзмурун нөвбәти пејғәмбәрлик сөзләри јеринә јетәҹәкдир: «Мәзлумлар [һәлимләр] өлкәни мүлк олараг алаҹаг, әмин-аманлығын боллуғундан зөвг тапаҹаг» (Мәзмур 37:11; Матта 25:33, 34, 4 6).
Салеһлијә сусајанлар бәхтијардырлар
10. «Салеһлијә ҹан атыб сусајанлар» неҹә доја биләрләр?
10 Иса бәхтијарлығын нөвбәти сәбәби һагда белә демишдир: «Салеһлијә ҹан атыб сусајанлар нә бәхтијардырлар! Чүнки онлар дојаҹаглар» (Матта 5:6). Мәсиһчиләр үчүн салеһлик принсипләрини Јеһова тә’јин едир. Буна ҝөрә дә салеһлијә сусајанлар, әслиндә Аллаһын рәһбәрлијинә сусамыш олурлар. Бу ҹүр инсанлар ҝүнаһлы вәзијјәтләрини вә гејри-камил олдугларыны кәскин сурәтдә һисс едир вә Јеһованын илтифатыны газанмағы чох истәјирләр. Онлар Аллаһын Кәламындан өјрәнәндә ки, төвбә едиб, Мәсиһин фидијә гурбанлығы әсасында бағышланмағы диләмәклә Аллаһын ҝөзүндә салеһ сајыла биләрләр, чох хошбәхт олурлар! (Һәвариләрин ишләри 2:38; 10:43; 13:38, 39; Ромалылара 5:19).
11, 12. а) Мәсһ едилмиш мәсиһчиләр салеһлијә неҹә наил олурлар? б) «Башга гојунлар» салеһлијә олан сусузлугларыны неҹә тә’мин едирләр?
11 Иса демишдир ки, белә инсанлар бәхтијардырлар, она ҝөрә ки, онлар «дојаҹаглар», тә’мин едиләҹәкләр (Матта 5:6). Мәсиһлә ҝөјдә падшаһлыг етмәјә дә’вәт олунан мәсһ едилмиш мәсиһчиләр «јашамаг үчүн» салеһ е’лан олунурлар (Ромалылара 5:1, 9, 16-18). Јеһова онлары руһани мә’нада оғуллуға ҝөтүрүр. Онлар Мәсиһин сәмави Падшаһлығында падшаһ вә каһинләр олмаг үчүн онун һәмварисләри олурлар (Јәһја 3:3; 1 Петер 2:9).
12 «Башга гојунлар» јашамаг үчүн һәлә ки, салеһ е’лан олунмамышлар. Бунунла белә Јеһова онлары мүәјјән дәрәҹәдә салеһ сајыр, чүнки онлар Мәсиһин төкүлән ганына иман едирләр (Јагуб 2:22-25; Вәһј 7:9, 10). Онлар Јеһованын достлары кими салеһ е’лан олунур вә «бөјүк мәшәггәт» заманы азад олунаҹаглар (Вәһј 7:14). Онларын салеһлијә олан сусузлуглары «јени ҝөјләр»ин рәһбәрлији алтында «салеһлик өмүр» сүрәҹәк ‘јени јерин’ бир һиссәси олдуглары заман даһа чох тә’мин олунаҹагдыр (2 Петер 3:13; Мәзмур 37:29).
Мәрһәмәтли оланлар бәхтијардырлар
13, 14. Мәрһәмәтли олдуғумузу әмәлдә неҹә ҝөстәрә биләрик вә бунун бизим өзүмүз үчүн фајдасы нәдәдир?
13 Иса Дағүстү тәблиғинә давам едәрәк демишдир: «Мәрһәмәтли оланлар нә бәхтијардырлар! Чүнки онлара мәрһәмәт едиләҹәкдир» (Матта 5:7). Мәһкәмә иҹраатында мәрһәмәт етмәк адәтән әфвлә әлагәдар истифадә олунур. Әфв етмә — ҹинајәткарын ганун тәрәфиндән нәзәрдә тутулан ҹәзадан азад едилмәси вә ја ҹәзасынын јүнҝүлләшдирилмәсидир. Мүгәддәс Китабда исә «мәрһәмәт» кими тәрҹүмә олунан сөз әсас е’тибарилә рәһм вә шәфгәт һиссиндән ирәли ҝәләрәк мәһрум едилмиш инсанлара көмәк етмәјә һазыр олмаг мә’насыны дашыјыр. Беләликлә, мәрһәмәтли оланлар өз шәфгәтләрини әмәлдә ҝөстәрирләр. Исанын мәсәлиндәки хејирхаһ самаријалы — фәлакәтә дүшән адама мәрһәмәт ҝөстәрмәјә даир ҝөзәл нүмунә вермишдир (Лука 10:29-37).
14 Мәрһәмәтли оланларын нә дәрәҹәдә хошбәхт олдугларыны дәрк етмәк үчүн көмәјә еһтијаҹ дујанлара јахшылыг етмәк ҝәрәкдир (Галатијалылара 6:10). Исанын инсанлара үрәји јанырды. Бир дәфә «онлара јазығы ҝәлди; чүнки чобансыз гојунлар кими идиләр. Вә онлара чох шејләр өјрәтмәјә башлады» (Марк 6:34). Иса инсанларын һәр шејдән чох руһани көмәјә еһтијаҹ дујдугларыны баша дүшүрдү. Биз дә инсанларла ән чох еһтијаҹ дујдуглары «Падшаһлыг һаггында... Мүждә»ни бөлүшмәклә шәфгәт вә мәрһәмәт тәзаһүр етдирә биләрик (Матта 24:14). Һәмчинин јашлылара, дуллара, јетимләрә көмәк едә вә ‘ҹәсарәтсизләрә’, јә’ни кәдәрли оланлара тәсәлли верә биләрик (1 Салониклиләрә 5:14; Сүлејманын мәсәлләри 12:25; Јагуб 1:27). Бунун сајәсиндә биз хошбәхтлик әлдә етмәклә бәрабәр, һәм дә өз үзәримиздә Јеһованын мәрһәмәтини һисс едәҹәјик (Һәвариләрин ишләри 20:35; Јагуб 2:13).
Үрәји тәмиз оланлар вә сүлһпәрвәрләр
15. Үрәји тәмиз вә сүлһпәрвәр олмаға неҹә наил олмаг олар?
15 Бәхтијарлығын алтынҹы вә једдинҹи сәбәбини Иса белә ифадә етмишдир: «Үрәји тәмиз оланлар нә бәхтијардырлар! Чүнки онлар Аллаһы ҝөрәҹәкләр. Сүлһпәрвәрләр нә бәхтијардырлар! Чүнки онлара Аллаһын оғуллары дејиләҹәк» (Матта 5:8, 9). Үрәк јалныз әхлаги ҹәһәтдән дејил, һәм дә руһани ҹәһәтдән тәмиз олмалыдыр; бундан әлавә үрәк бүтүнлүклә Јеһоваја садиг олмалыдыр (1 Салнамәләр 28:9; Мәзмур 86:11). Сүлһпәрвәр инсанлар исә мәсиһчи гардашлары илә, еләҹә дә әлләриндән ҝәлдији гәдәр башга инсанларла сүлһү горујурлар (Ромалылара 12:17-21). Онлар ‘сүлһ ахтарыр’ вә она ҹан атырлар (1 Петер 3:11).
16, 17. а) Нәјә ҝөрә мәсһ едилмишләр «Аллаһын оғуллары» адланырлар вә онлар һансы тәрздә «Аллаһы ҝөрәҹәкләр»? б) «Башга гојунлар» Аллаһы неҹә ҝөрүрләр? ҹ) «Башга гојунлар» неҹә вә нә вахт там мә’нада «Аллаһын оғуллары» олаҹаглар?
16 Тәмиз үрәкли сүлһпәрвәр инсанлара вә’д едилир ки, онлара «Аллаһын оғуллары дејиләҹәк» вә онлар «Аллаһы ҝөрәҹәкләр». Јеһова руһдан доғулан мәсһ едилмиш мәсиһчиләри онлар һәлә јердә јашајаркән оғуллуға ҝөтүрүр (Ромалылара 8:14-17). Дирилдикдән сонра ҝөјә дахил олараг, онлар Мәсиһлә бирликдә Јеһованын һүзурунда хидмәт едир вә һәгигәтән дә Ону ҝөрүрләр (1 Јәһја 3:1, 2; Вәһј 4:9-11).
17 Сүлпәрвәр «башга гојунлар» онларын «Әбәди Ата»сы олан Јахшы Чобана, јә’ни Иса Мәсиһә табе олараг Јеһоваја хидмәт едирләр (Јәһја 10:14, 16; Јешаја 9:6). Мәсиһин Миниллик һөкмранлығындан сонра сонунҹу сынаға таб ҝәтирәнләр јер үзүндә јашајаҹаг өвладлар кими Јеһова тәрәфиндән өвладлыға ҝөтүрүләҹәкләр вә «Аллаһын өвладларынын иззәтли азадлығына говушаҹаглар» (Ромалылара 8:21; Вәһј 20:7, 9). Онлар бу аны ҝөзләјәрәк Јеһованы Ата адландырырлар, чүнки онлар һәјатларыны Она һәср етмиш вә Онун Һәјатверән олдуғуну гәбул едирләр (Јешаја 64:8). Гәдимдә јашамыш Әјјуб вә Муса кими, онлар Аллаһы иманын ҝөзләри илә «ҝөрүр»ләр (Әјјуб 42:5; Ибраниләрә 11:27). Онлар ‘үрәјин ҝөзләри’ илә бахараг вә Аллаһ һаггында дәгиг билик әлдә едәрәк, Јеһованын ҝөзәл кејфијјәтләрини ҝөрүр вә Онун ирадәсини јеринә јетирәрәк, Аллаһы тәглид етмәјә чалышырлар (Ефеслиләрә 1:18; Ромалылара 1:19, 20; 3 Јәһја 11).
18. Иса һәгиги хошбәхтлијин һансы илк једди сәбәбини хатырлатды?
18 Өјрәндик ки, руһани тәләбатларыны дәрк едәнләр, јаслылар, һәлимләр, салеһлијә ҹан атыб сусајанлар, мәрһәмәтли оланлар вә сүлһпәрвәрләр Јеһоваја хидмәтдән һәгиги хошбәхтлик дујурлар. Лакин белә инсанлар һәмишә гаршыдурмаларла, һәтта тә’гибләрлә гаршылашырлар. Бу онларын хошбәхтлијини позурму? Бу суалы нөвбәти мәгаләдә мүзакирә едәҹәјик.
Тәкрар
• Руһани тәләбатларыны дәрк едәнләр һансы ҹәһәтләрдән хошбәхтдирләр?
• Јаслылар тәсәллини неҹә тапырлар?
• Һәлимлији неҹә тәзаһүр етдирмәк олар?
• Нәјә ҝөрә мәрһәмәтли, үрәји тәмиз вә сүлһпәрвәр олмалыјыг?
[7-ҹи сәһифәдәки шәкил]
Руһән јохсуллар нә бәхтијардырлар!
[7-ҹи сәһифәдәки шәкилләр]
Салеһлијә ҹан атыб сусајанлар нә бәхтијардырлар!
[7-ҹи сәһифәдәки шәкил]
Мәрһәмәтли оланлар нә бәхтијардырлар!