Падшаһ Мәсиһә сәдагәтлә хидмәт един

«Она һакимијјәт, иззәт вә падшаһлыг верилмишди ки, бүтүн халглара, милләтләрә вә дилләрә мәнсуб адамлар она хидмәт етсин» (ДАНИЕЛ 7:14).

1, 2. Биз һарадан билирик ки, Мәсиһин Падшаһлыг һакимијјәти б. е. 33-ҹү илиндә һәлә там бәргәрар олмамышды?

ҺАНСЫ һөкмдар тәбәәләри уғрунда ҹанындан кечмиш, падшаһлыг етмәк үчүн јенидән һәјата гајытмышдыр? Һансы падшаһ јердә јашајыб, тәбәәләринин е’тибар, сәдагәтини газанмыш вә сонра ҝөјдән идарә етмәјә башламышдыр? Бунлары вә даһа чох шејләри едән јеҝанә шәхсијјәт Иса Мәсиһдир (Лука 1:32, 33). Мәсиһ дирилиб ҝөјә галхдыгдан сонра ерамызын 33-ҹү или Пентикост ҝүнүндә Аллаһ «бүтүн шејләрин үзәриндә рәһбәр олмаг үзрә, Ону иманлылар ҹәмијјәтинә верди» (Ефеслиләрә 1:20-22, И–93; Һәвариләрин ишләри 2:32-36). Беләликлә, Иса һөкмранлыг етмәјә башлады, анҹаг онун һакимијјәти мәһдуд иди. Онун илк тәбәәләри руһани Исраили, јә’ни ‘Аллаһын Исраилини’ тәшкил едән руһла мәсһ едилмиш мәсиһчиләр олдулар (Галатијалылара 6:16; Колослулара 1:13).

² Һәмин Пентикост ҝүнүндән тәхминән 30 ил сонра һәвари Павел тәсдиг етди ки, Мәсиһин Падшаһлыг һакимијјәти һәлә там бәргәрар олмамышды, лакин о, ‘Аллаһын сағында отуруб, бундан сонра дүшмәнләринин ајагларынын алтына кәтил олараг гојулмасыны ҝөзләјирди’ (Ибраниләрә 10:12, 13). Сонра ерамызын биринҹи әсринин сонларында гоҹа һәвари Јәһја она верилән вәһјдә ҝөрмүшдү ки, Каинатын Һөкмдары Јеһова Исаны рәсми сурәтдә јени тә’сис едилмиш Падшаһлығын Падшаһы тә’јин едир (Вәһј 11:15; 12:1-5). Биз тарихин елә бир мәрһәләсиндә јашајырыг ки, Мәсиһин 1914-ҹү илдә ҝөјдә Падшаһ кими һөкмранлыға башладығыны тәсдиг едән әсаслы сүбутлары ҝөрүрүкa.

3. а) 1914-ҹү илдән Падшаһлыг һаггында хош хәбәрә һансы јенилик дахил олду? б) Биз өзүмүзә һансы суаллары верә биләрик?

³ Беләликлә, 1914-ҹү илдән е’тибарән Падшаһлыг һаггында хош хәбәрә јенилик дахил олду. Мәсиһ «дүшмәнләринин ортасында», Аллаһын ҝөјдә тә’јин етдији Падшаһ кими фәал сурәтдә һөкмранлыг етмәјә башлады (Мәзмур 110:1, 2, КМ; Матта 24:14; Вәһј 12:7-12). Онун бүтүн јер үзүндә олан сәдагәтли тәбәәләри бәшәр тарихиндә индијәдәк ҝөрүнмәмиш Мүгәддәс Китабын үмумдүнја тә’лим програмында иштирак едәрәк һәвәслә онун һакимијјәтинә табе олурлар (Даниел 7:13, 14; Матта 28:18). ‘Сәлтәнәтин Оғуллары’ олан руһла мәсһ едилмиш мәсиһчиләр ‘Мәсиһин сәфирләри’ кими хидмәт едирләр. Аллаһын Падшаһлығынын нүмајәндәләри кими фәалијјәт ҝөстәрән Мәсиһин ‘башга гојунларындан’ ибарәт издиһам онлара сәдагәтлә көмәклик ҝөстәрир (Матта 13:38; 2 Коринфлиләрә 5:20; Јәһја 10:16). Буна бахмајараг, һәр биримиз Мәсиһин һакимијјәтинә һәгигәтән дә табе олуб-олмадығымызы тәһлил етмәлијик. Биз она бүтүнлүклә сәдагәтлијикми? Ҝөјдә идарә едән Падшаһа сәдагәтимизи неҹә ҝөстәрә биләрик? Ҝәлин әввәлҹә Мәсиһә сәдагәтли олмаг үчүн һансы сәбәбләрин олдуғуну мүзакирә едәк.

Сәдагәтә лајиг Падшаһ

4. Иса тә’јин олунмуш Падшаһ кими едәҹәји ишләри јер үзүндә хидмәт етдији заман неҹә ҝөстәрди?

⁴ Биз Мәсиһә, ҝөзәл хүсусијјәтләринә вә бизим үчүн етдикләринә ҝөрә миннәтдарлыгдан ирәли ҝәләрәк садиг галырыг (1 Петер 1:8). Иса тә’јин олунмуш Падшаһ кими, Аллаһын гојдуғу вахтда һөкмранлыг едәндә бүтүн дүнјада һансы ишләр ҝөрәҹәјини јердә јашајаркән кичик мигјасда нүмајиш етдирмишди. О, аҹлары дојдурур, хәстәләри, корлары, топаллары, карлары вә лаллары сағалдырды. О, һәтта өлүләри һәјата гајтарырды (Матта 15:30, 31; Лука 7:11-16; Јәһја 6:5-13). Бундан башга, Исанын јердәки һәјатыны нәзәрдән кечирдикдә Јерин ҝәләҹәк Һөкмдары кими онун һансы хүсусијјәтләр, хүсусилә фәдакар мәһәббәт ҝөстәрәҹәјини өјрәнирик (Марк 1:40-45). Бунунла әлагәдар Наполеон Бонапартын белә сөзләр сөјләдији дејилир: «Исҝәндәр, Сезар, Бөјүк Карл вә мән империјалар јаратмышыг. Лакин бу даһи әсәрләримиз неҹә јарадылыб? Зор ҝүҹүнә! Јалныз Иса Мәсиһ өз Падшаһлығыны мәһәббәт үзәриндә гуруб вә милјонларла инсан онун уғрунда һәјатындан белә кечмәјә һазырдыр».

5. Инсанлары Исаја ҹәлб едән нә иди?

⁵ Иса һәлим вә гәлбдән тәвазөкар олдуғу үчүн јорғун вә јүкләри ағыр оланлар онун ибрәтамиз тә’лимләриндән вә хејирхаһлығындан тәравәт алырдылар (Матта 11:28-30). Ушаглар өзләрини онун јанында раһат һисс едирдиләр. Тәвазөкар вә ағыллы инсанлар һәвәслә онун шаҝирди олурдулар (Матта 4:18-22; Марк 10:13-16). Нәзакәтли вә һөрмәтҹил давранышы сајәсиндә Иса, Аллаһ горхусу олан бир чох гадынларын сәдагәтини газанмышды. Хидмәтлә мәшғул олдуғу үчүн бу гадынларын бир чоху вахтыны, ҝүҹүнү вә вәсаитини әсирҝәмәјәрәк онун гејдинә галырдылар (Лука 8:1-3).

6. Лазар өләндә Исанын һансы зәриф һиссләри өзүнү бүрузә вермишди?

⁶ Исанын ән зәриф һиссләри севимли досту Лазар өләндә өзүнү бүрузә верди. Марта вә Мәрјәмин изтираблары ону о дәрәҹәдә риггәтә ҝәтирмишди ки, о, кәдәрдән инилдәди вә «ағлады». Бахмајараг ки, Иса Лазары тезликлә дирилдәҹәјини билирди, ҝүҹлү үрәкағрысы вә кәдәрдән «үрәји чох сыхылды». Сонра мәһәббәт вә шәфгәт һиссиндән ирәли ҝәләрәк Иса Аллаһын вердији сәлаһијјәтдән истифадә едиб Лазары дирилтди (Јәһја 11:11-15, 33-35, 38-44).

7. Нәјә ҝөрә Иса сәдагәтимизә лајигдир? (Һәмчинин 31-ҹи сәһифәдәки чәрчивәјә бахын.)

⁷ Биз Исанын салеһлијә олан ҝүҹлү мәһәббәти, ријакарлыг вә пислијә олан нифрәти гаршысында еһтирам һисси дујуруг. О, тамаһкар таҹирләри ики дәфә ҹәсарәтлә мә’бәддән говмушду (Матта 21:12, 13; Јәһја 2:14-17). Бундан башга, јер үзүндә јашајанда һәр ҹүр чәтинлијә мә’руз галмыш, бизим бу ҝүн үзләшдијимиз проблем вә әзабларла о да үзләшмишди (Ибраниләрә 5:7-9). Иса, һәмчинин әдаләтсизлик вә әдавәтин гурбаны олмағын нә демәк олдуғуну да билирди (Јәһја 5:15-18; 11:53, 54; 18:38–19:16). Сонда, Иса Аллаһын ирадәсини јеринә јетирмәк вә тәбәәләринә әбәди һәјат вермәк үчүн ҹәсарәтлә өзүнү амансыз өлүмә тәслим етди (Јәһја 3:16). Мәсиһин бу хүсусијјәтләри хидмәтинизи сәдагәтлә давам етдирмәјә сизи тәшвиг етмирми? (Ибраниләрә 13:8; Вәһј 5:6-10). Бәс Падшаһ Исанын тәбәәси олмаг үчүн нә тәләб олунур?

Тәбәә олмаг үчүн тәләбләр

8. Мәсиһин тәбәәләри һансы тәләбләрә мүвафиг олмалыдырлар?

⁸ Белә бир мүгајисәјә диггәт јетирин: башга өлкәнин вәтәндашлығыны алмаг үчүн мүәјјән тәләбләрә ҹаваб вермәк лазымдыр. Инсандан нүмунәви вәтәндаш олмасы вә мүәјјән сағламлыг нормаларына мүвафиг олмасы ҝөзләнилә биләр. Буна бәнзәр шәкилдә Мәсиһин тәбәәләри дә јүксәк әхлаг нормалары вә јахшы руһани сағламлыға малик олмалыдырлар (1 Коринфлиләрә 6:9-11; Галатијалылара 5:19-23).

9. Биз Мәсиһә сәдагәтли олдуғумузу неҹә ҝөстәрә биләрик?

⁹ Иса Мәсиһ, һаглы олараг тәбәәләриндән өзүнә вә Падшаһлығына гаршы сәдагәт тәләб едир. Тәбәәләр, Исанын тә’јин олунмуш Падшаһ кими јер үзүндә јашајанда вердији тә’лимләрә мүвафиг һәјат сүрмәклә сәдагәтли олдугларыны ҝөстәрирләр. Мәсәлән, онлар Падшаһлығын марагларыны вә Аллаһын ирадәсини мадди мәнфәәтдән үстүн тутурлар (Матта 6:31-34). Онлар ән ағыр сынаг алтында белә Мәсиһин хүсусијјәтләрини тәглид етмәјә чалышырлар (1 Петер 2:21-23). Бундан башга, Мәсиһин тәбәәләри онун нүмунәсини изләјәрәк башгаларына јахшылыг етмәк үчүн әлләриндән ҝәләни едирләр (Матта 7:12; Јәһја 13:3-17).

10. Мәсиһә сәдагәтимизи а) аиләдә, б) јығынҹагда неҹә тәзаһүр етдирә биләрик?

¹⁰ Исанын давамчыларынын сәдагәти онларын аилә мүнасибәтләриндән дә ҝөрүнүр. Мәсәлән, әр арвады вә ушаглары илә мүнасибәтиндә мәсиһчи хүсусијјәтләрини әкс етдирмәклә ҝөјдәки Падшаһа сәдагәтини ҝөстәрир (Ефеслиләрә 5:25, 28-30; 6:4; 1 Петер 3:7). Гадын исә Мәсиһә олан сәдагәтини әдәбли давранышы вә ‘һәлим вә сакит руһу’ илә тәзаһүр етдирир (1 Петер 3:1-4; Ефеслиләрә 5:22-24). Ушаглара ҝәлдикдә исә, онлар Мәсиһин итаәткарлыг нүмунәсини тәглид етмәклә сәдагәтли олдугларыны ҝөстәрирләр. Ушаглыгда Иса, валидејнләринин гејри-камил олдуғуна бахмајараг, онларын итаәтиндән чыхмырды (Лука 2:51, 52; Ефеслиләрә 6:1). Мәсиһин тәбәәләри «башгаларынын дәрдләринә шәрик, гардаш севән» вә «шәфгәтли» олмагла ону сәдагәтлә тәглид едирләр. Онлар Мәсиһ кими тәвазөкар олмаға чалышыр, ‘пислијә писликлә, сөјүшә дә сөјүшлә ҹаваб вермирләр’ (1 Петер 3:8, 9; 1 Коринфлиләрә 11:1).

Гануна табе олан тәбәәләр

11. Мәсиһин тәбәәләри һансы ганунлара табедирләр?

¹¹ Һәр һансы бир өлкәнин вәтәндашлығыны алмаг истәјән инсанлар һәмин өлкәнин ганунларына табе олдуглары кими, Мәсиһин тәбәәләри дә һәјатларыны онун тә’лимләринә вә әмрләринә ујғунлашдырараг ‘Мәсиһин Ганунуна’ табе олурлар (Галатијалылара 6:2). Онлар, хүсусән дә ‘Һөкмдарын [мәһәббәт] Ганунуна’ садиг јашајырлар (Јагуб 2:8). Бу ганунлара нә дахилдир?

12, 13. ‘Мәсиһин Ганунуна’ неҹә табе ола биләрик?

¹² Мәсиһин давамчылары гејри-камилдирләр вә онларын да зәифликләри вардыр (Ромалылара 3:23). Буна ҝөрә дә, ‘бир-бириләрини вар гүввә илә сәмими гәлбдән севмәкдән’ өтрү ‘онлар гардашлара ријасыз мәһәббәт’ инкишаф етдирмәлидирләр (1 Петер 1:22). ‘Биринин диҝәриндән шикајәти варса’ мәсиһчиләр ‘тәһәммүл едәрәк бағышламагла’ Мәсиһин ганунуна сәдагәтлә әмәл едирләр. Бу гануна табе олмаг бир-бирләринин гејри-камиллијинә ҝөз јуммаға вә бир-бирини севмәјә сәбәбләр тапмаға көмәк едир. Сән, мәһәббәтли Падшаһымыза табе олараг бир-бирини «камил бирлијин бағы олан мәһәббәтлә» севән инсанларын арасында олдуғуна ҝөрә миннәтдар дејилсәнми? (Колослулара 3:13, 14).

¹³ Бундан башга, Иса баша салды ки, Онун нүмунә гојдуғу мәһәббәт инсанларын бир-биринә ҝөстәрдикләри мәһәббәтдән даһа үстүндүр (Јәһја 13:34, 35). Әҝәр јалныз бизи севәнләри севириксә, «хүсуси бир шеј» етмирик. Белә мәһәббәт натамам вә гејри-мүкәммәлдир. Иса тәшвиг едирди ки, һәтта бизә әдавәт бәсләјән вә тә’гиб едәнләри белә принсипләрә әсасланан мәһәббәтлә севәрәк Атасынын мәһәббәтини тәглид едәк (Матта 5:46-48). Бу мәһәббәт, һәмчинин Падшаһлығын тәбәәләрини, онлара тапшырылан әсас иши сәдагәтлә давам етдирмәјә тәшвиг едир. Сөһбәт һансы ишдән ҝедир?

Сәдагәт сынагдан кечирилир

14. Тәблиғ иши нә үчүн бу дәрәҹәдә ваҹибдир?

¹⁴ Падшаһлығын тәбәәләринин ‘Аллаһын Сәлтәнәтини ҹидди шәкилдә бәјан етмәк’ кими мүһүм бир тапшырығы вардыр (Һәвариләрин ишләри 28:23). Бу иши јеринә јетирмәк чох ваҹибдир, чүнки Хиласкар Падшаһлыг Јеһованын Али һөкмранлығына бәраәт газандыраҹагдыр (1 Коринфлиләрә 15:24-28). Биз хош хәбәри е’лан едәндә, ону ешидәнләрин Аллаһын Падшаһлығынын тәбәәләри олмаг имканы јараныр. Бундан башга, Падшаһ Мәсиһ бәшәријјәти мәһз бу хәбәрә ҝөстәрдији мүнасибәт әсасында мүһакимә едәҹәкдир (Матта 24:14; 2 Салониклиләрә 1:6-10). Беләликлә, Исаја сәдагәтимизи, биринҹи нөвбәдә, Падшаһлығы тәблиғ етмәк әмрини јеринә јетирмәклә ҝөстәририк (Матта 28:18-20).

15. Нә үчүн мәсиһчиләрин иманы сынаға чәкилир?

¹⁵ Шејтан тәблиғ ишинә мүгавимәт ҝөстәрмәк үчүн һәр бир үсула әл атыр, инсан һөкмдарлары Аллаһын Исаја вердији һакимијјәти танымырлар (Мәзмур 2:1-3, 6-8). Иса өз давамчыларыны хәбәрдар етмишди: «Гул ағасындан үстүн дејилдир. Әҝәр Мәни тә’гиб етдиләрсә, сизи дә тә’гиб едәҹәкләр» (Јәһја 15:20). Беләликлә, Мәсиһин давамчылары сәдагәтләри сынаға чәкилән руһани мүһарибәдә иштирак едирләр (2 Коринфлиләрә 10:3-5; Ефеслиләрә 6:10-12).

16. Падшаһлығын тәбәәләри «Аллаһынкыны Аллаһа» неҹә верирләр?

¹⁶ Аллаһын Падшаһлығынын тәбәәләри, ҝөзәҝөрүнмәз Падшаһларына сәдагәти горујурлар, лакин бунунла јанашы инсан һакимијјәтләринә һөрмәтсизлик ҝөстәрмирләр (Титуса 3:1, 2). Иса демишди: «Гејсәринкини гејсәрә, Аллаһынкыны Аллаһа верин» (Марк 12:13-17). Мәсиһин тә­бә­әлә­ри Аллаһын ганунуна зидд ҝетмәјән дөвләт ганунларына табе олурлар (Ромалылара 13:1-7). Лакин јәһуди Али Мәһкәмәси Аллаһын ганунларына гаршы чыхараг, Исанын шаҝирдләринә тәблиғи дајандырмағы әмр едәндә, онлар гәтијјәтлә, ејни заманда һөрмәтлә «инсанлардан артыг, Аллаһа итаәт етмәк ҝәрәкдир» дејә ҹаваб вермишдиләр (Һәвариләрин ишләри 1:8; 5:27-32).

17. Сәдагәтимиз сынаға чәкиләркән нә үчүн ҹәсарәтли олмалыјыг?

¹⁷ Әлбәттә, Мәсиһин тәбәәләри тә’гибләр гаршысында Падшаһларына садиг галмаг үчүн ҹәсарәтли олмалыдырлар. Лакин Иса демишди: «Мәнә ҝөрә инсанлар сизи тәһгир вә тә’гиб едәҹәкләри, јалан сөјләјиб сизә һәр ҹүр бөһтан атаҹаглары заман сиз нә бәхтијарсыныз! Севинин вә шадланын! Чүнки ҝөјләрдә мүкафатыныз бөјүкдүр» (Матта 5:11, 12). Мәсиһин еркән давамчылары бу сөзләрин доғрулуғуна өз шәхси тәҹрүбәләриндән әмин олмушдулар. Һәтта тәблиғи дајандырмадыгларына ҝөрә дөјүлдүкдә белә онлар севинирдиләр, «чүнки Рәбб Исанын ады үчүн тәһгир едилмәјә лајиг ҝөрүлмүшдүләр. Вә һәр ҝүн мә’бәддә вә евдән-евә тә’лим вермәкдән вә Исанын Мәсиһ олдуғуну мүждәләмәкдән ваз кечмирдиләр» (Һәвариләрин ишләри 5:41, 42). Сиз дә чәтинлик, хәстәлик, еһтијаҹ вә мүгавимәтләрлә үзләшдијиниз заман сәдагәтинизи горудуғунуза ҝөрә тә’рифә лајигсиниз (Ромалылара 5:3-5; Ибраниләрә 13:6).

18. Исанын Понти Пилата дедији сөзләр нә демәкдир?

¹⁸ Падшаһ тә’јин олунан Иса Рома валиси Понти Пилата демишди: «Мәним Сәлтәнәтим бу дүнјадан дејилдир; әҝәр Мәним Сәлтәнәтим бу дүнјадан олсајды, нөкәрләрим ҹәһд едәрдиләр ки, Мән јәһуди идарәчиләрә тәслим едилмәјим; лакин инди Мәним Сәлтәнәтим бурадан дејилдир» (Јәһја 18:36). Буна ҝөрә, Сәмави Падшаһлығын тәбәәләри нә силаһ галдырыр, нә дә ҹәмијјәтдәки тоггушмалара гошулурлар. «Әмин-аманлыг Һөкмдары»на садиг галараг онлар дүнјанын зиддијјәтли мәсәләләриндә тамамилә битәрәф мөвге тутурлар (Јешаја 2:2-4; 9:6, 7).

Сәдагәтли тәбәәләрин алаҹағы әбәди мүкафатлар

19. Нә үчүн Мәсиһин тәбәәләри ҝәләҹәјә инамла бахырлар?

¹⁹ «Шаһларын Шаһы» олан Мәсиһин сәдагәтли тәбәәләри ҝәләҹәјә инамла бахырлар. Онлар тезликлә Исанын гејри-ади ҝүҹүнү нүмајиш етдирәҹәјини сәбирсизликлә ҝөзләјирләр (Вәһј 19:11–20:3; Матта 24:30). Падшаһлығын руһла мәсһ олунмуш сәдагәтли оғуллары мисилсиз мүкафатларыны — Мәсиһлә бирликдә ҝөјдә падшаһ олаҹаглары вахты сәбирсизликлә ҝөзләјирләр (Матта 13:38; Лука 12:32). Мәсиһин сәдагәтли «башга гојунлары» да сәбирсизликлә Падшаһларынын онлардан разы галдығыны ҝөстәрән сөзләри сөјләјәҹәјини ҝөзләјирләр: «Еј сизләр, Атамын мүбарәкләри, ҝәлин, дүнја јаранандан бәри сизин үчүн һазырланмыш олан Сәлтәнәти мирас алын» (Јәһја 10:16; Матта 25:34). Гој Падшаһлығын бүтүн тәбәәләри Падшаһ Мәсиһә сәдагәтлә хидмәт етмәјә гәти гәрарлы олсунлар!

[Һашијә]

Изаһ едә биләрсинизми?

• Нә үчүн Мәсиһ бизим сәдагәтимизә лајигдир?

• Мәсиһин тәбәәләри она сәдагәтләрини неҹә тәзаһүр етдирирләр?

• Биз нә үчүн Падшаһ Мәсиһә сәдагәтли олмаг истәјирик?

[31-ҹи сәһифәдәки чәрчивә]

МӘСИҺИН БӘ’ЗИ ҜӨЗӘЛ ХҮСУСИЈЈӘТЛӘРИ

Гәрәзсизлик (Јәһја 4:7-30)

Шәфгәт (Матта 9:35-38; 12:18-21; Марк 6:30-34; Ибраниләрә 4:15, 16)

Фәдакар мәһәббәт (Јәһја 13:1; 15:12-15)

Сәдагәт (Матта 4:1-11; 28:20; Марк 11:15-18)

Мүлајимлик (Матта 15:21-28)

[29-ҹу сәһифәдәки шәкил]

Бир-биримизә мәһәббәт тәзаһүр етдирмәклә, ‘Мәсиһин Ганунуна’ сәдагәтлә табе олуруг.

[31-ҹи сәһифәдәки шәкилләр]

Мәсиһин хүсусијјәтләри она сәдагәтлә хидмәт етмәјә сәни тәшвиг едирми?