Јеһова халгыны неҹә гуртармағы билир

«Јеһова Она садиг инсанлары сынаглардан неҹә гуртармағы... јахшы билир» (2 ПЕТ. 2:9).

НӘЈӘ ҜӨРӘ БИЗ ӘМИН ОЛА БИЛӘРИК КИ, ЈЕҺОВА...

нијјәтини һәјата кечирмәк үчүн һадисәләрин ҝедишатына тәсир ҝөстәрә биләр?

халгыны хилас етмәк үчүн Өз ҝүҹүндән истифадә едәҹәк?

бөјүк мүсибәт заманы һадисәләрин ҝедишатындан хәбәрдар олаҹаг?

1. «Бөјүк мүсибәт» заманы јер үзүндә һансы шәраит һөкм сүрәҹәк?

ШЕЈТАН дүнјасы Аллаһын һөкмүнә гәфләтән дүчар олаҹаг (1 Салон. 5:2, 3). «Рәббин мөһтәшәм ҝүнү» јахынлашдыгҹа јер үзүндә хаос даһа да артаҹаг (Сеф. 1:14—17). Чәтинликләр вә чатышмазлыглар ҝүндәлик һәјатын ајрылмаз һиссәсинә чевриләҹәк. Һәмин вахт о гәдәр әзаб-әзијјәт олаҹаг ки, «беләси дүнја јаранандан бәри олмамышдыр». (Матта 24:21, 22 ајәләрини оху.)

2, 3. а) «Бөјүк мүсибәт» заманы Аллаһын халгы нә илә үзләшәҹәк? б) Ҝәләҹәк һадисәләрә таб ҝәтирмәјимиз үчүн бизи нә мөһкәмләндирә биләр?

² «Бөјүк мүсибәт»ин сонуна јахын «Магог өлкәсиндән олан» Гог бүтүн гүввәсини топлајыб Аллаһын халгына һүҹум етмәк истәјәҹәк. Бу һүҹум әрәфәсиндә «ҝүҹлү бир орду... өлкәни бүрүјән бир булуд кими» Аллаһын халгына гаршы чыхаҹаг (Јез. 38:2, 14—16). Һеч бир инсан тәшкилаты Јеһованын халгыны мүдафиә етмәјәҹәк. Онларын хиласы јалныз вә јалныз Аллаһдан асылы олаҹагдыр. Дүшмәнләр Аллаһын хидмәтчиләрини мәһв етмәк истәјәндә онлар өзләрини неҹә апараҹаглар?

³ Әҝәр сән Јеһованын хидмәтчисисәнсә, Онун Өз халгыны бөјүк мүсибәтдә хилас едәҹәјинә вә буна гадир олдуғуна инанырсанмы? Һәвари Петер јазмышды: «Јеһова Она садиг инсанлары сынаглардан неҹә гуртармағы, гејри-салеһләри исә мәһв олаҹаглары Һөкм ҝүнүнә гәдәр неҹә сахламағы јахшы билир» (2 Пет. 2:9). Јеһованын кечмишдә халгыны неҹә хилас етдији үзәриндә дүшүнмәк бизи ҝәләҹәк һадисәләрә таб ҝәтирмәјимиз үчүн мөһкәмләндирәҹәк. Ҝәлин Јеһованын Өз халгыны гуртармаг баҹарығына малик олдуғуна даир әминлијимизи артыраҹаг үч нүмунәјә нәзәр салаг.

ҮМУМДҮНЈА ДАШГЫНЫНДАН САҒ ЧЫХАНЛАР

4. Дашгындан әввәл һансы ишләр һәјата кечирилмәли иди?

⁴ Илк өнҹә Нуһун ҝүнләриндә баш верән Дашгына нәзәр салаг. Јеһованын нијјәтинин јеринә јетмәсиндә вахт мүһүм рол ојнајырды. Јер үзү сулара гәрг олмамышдан әввәл, нәһәнҝ ҝәминин тикинтиси баша чатмалы вә һејванлар сағ-саламат бу ҝәмијә јерләшдирилмәли иди. «Јарадылыш» китабында дејилмир ки, Јеһова әввәлҹә Нуһа ҝәми тикмәји тапшырды, сонра да Дашгынын вахтыны тәјин етди, бәлкә, бирдән тикинти даһа чох вахт апарар вә Дашгынын вахтыны дәјишмәк лазым ҝәләр. Әксинә, Аллаһ Нуһа ҝәми тикмәклә бағлы ҝөстәриш вермәздән хејли өнҹә артыг Дашгынын вахтыны тәјин етмишди. Биз буну һарадан билирик?

5. Јеһованын Јарадылыш 6:3 ајәсиндәки сөзләри нәјә аиддир вә бу гәрары О, нә заман вермишди?

⁵ Мүгәддәс Китабда дејилир ки, Јеһова артыг ҝөјдә гәрарыны вермишди. Јарадылыш 6:3 (ЈД) ајәсиндә О демишди: «Мән әтдән-гандан олан инсана сонсузадәк дөзмәјәҹәјәм. Беләликлә, онун өмрүнә јүз ијирми ил галыб». Белә демәклә Аллаһ инсанларын орта һесабла нә гәдәр јашајаҹагларыны нәзәрдә тутмурду — О, јер үзүнү писликләрдән тәмизләјәҹәји вахты тәјин етмишдиa. Дашгын бизим ерадан әввәл 2370-ҹи илдә баш вердији үчүн белә бир нәтиҹәјә ҝәлирик ки, Аллаһ бу гәрары ерамыздан әввәл 2490-ҹы илдә вермишди. Һәмин вахт Нуһун 480 јашы варды (Јар. 7:6). Тәхминән 20 илдән сонра, ерамыздан әввәл 2470-ҹи илдә Нуһун оғуллары дүнјаја ҝәлмәјә башлады (Јар. 5:32). Дашгына тәхминән јүз ил галса да, Јеһова Нуһа инсанларын хиласында ојнајаҹағы хүсуси ролуну һәлә дә ачыгламамышды. Аллаһ һәлә нә гәдәр ҝөзләјәҹәкди?

6. Јеһова Нуһа ҝәми тикмәк тапшырығыны нә вахт вермишди?

⁶ Ҝөрүнүр, Јеһова нијјәтини Нуһа ачыглајана гәдәр узун мүддәт кечмишди. Биз нәјин әсасында белә нәтиҹәјә ҝәлирик? Мүгәддәс Китабда дејилир ки, Аллаһ Нуһа ҝәми тикмәји тапшыранда онун оғуллары артыг бөјүмүшдүләр вә евли идиләр. Јеһова она демишди: «Әһдими сәнинлә бағлајырам. Сән оғулларын, арвадын вә ҝәлинләринлә бирҝә ҝәмијә минәрсән» (Јар. 6:9—18). Буна ҝөрә дә, ҝүман ки, Нуһ ҝәми тикмәк тапшырығыны аланда Дашгына 40 вә ја 50 ил галмышды. 

7. а) Нуһ вә аиләси иман саһиби олдугларыны неҹә нүмајиш едирдиләр? б) Аллаһ Нуһа Дашгынын вахтыны нә заман ачыглады?

⁷ Јәгин ки, ҝәмини тикәркән Нуһ вә аиләси Аллаһын Өз нијјәтини неҹә һәјата кечирәҹәји вә Дашгынын нә заман башлајаҹағы барәдә дүшүнүрдүләр. Һәр шеји тәфәррүаты илә билмәмәләринә бахмајараг, онлар ҝәмини тикмәји дајандырмадылар. Мүгәддәс Китабда охујуруг: «Нуһ һәр шеји етди: Аллаһ она неҹә әмр етмишдисә, о да һәр шеји еләҹә јеринә јетирди» (Јар. 6:22). Дашгына једди ҝүн галмыш Јеһова, нәһајәт ки, Нуһа Дашгынын дәгиг вахтыны деди. Бу вахт кифајәт иди ки, Нуһ вә аиләси һејванлары ҝәмијә јығсынлар. «Нуһун өмрүнүн алты јүзүнҹү илиндә, икинҹи ајын он једдинҹи ҝүнү»ндә ҝөјләрин пәнҹәрәләри ачыланда артыг һәр шеј һазыр иди (Јар. 7:1—5, 11).

8. Дашгын барәдә олан һадисә Јеһованын Өз халгыны нә заман хилас етмәк лазым олдуғуну билдијинә даир әминлијимизи неҹә мөһкәмләндирир?

⁸ Бу әһвалат ҝөстәрир ки, Јеһова нәинки нијјәтини јеринә јетирмәјин ән јахшы вахтыны билир, һәм дә Өз хидмәтчиләрини хилас етмәјә гадирдир. Бу дүнја өз сонуна јахынлашдыгҹа биз әмин ола биләрик ки, Јеһованын планлашдырдығы һәр бир шеј Онун тәјин етдији ҝүндә вә саатда јеринә јетәҹәк (Мат. 24:36; Һабаггуг 2:3 ајәсини оху).

ГЫРМЫЗЫ ДӘНИЗДӘ ГУРТУЛУШ

9, 10. Јеһова фирону вә онун гошунуну тәләјә салмаг үчүн халгындан неҹә истифадә етмишди?

⁹ Мүгәддәс Китабда Дашгын барәдә јазыланлардан өјрәндик ки, Јеһова нијјәтини јеринә јетирмәк үчүн һадисәләрин нә заман баш верәҹәјинә там нәзарәт едир. Арашдыраҹағымыз икинҹи нүмунәдән биз даһа һансы сәбәбә ҝөрә Јеһованын Өз халгыны хилас етмәјә гадир олдуғуна ҝүвәнә биләҹәјимизи ҝөрәҹәјик: О, ирадәсини һәјата кечирмәк үчүн түкәнмәз ҝүҹүндән истифадә едәҹәк. Јеһова һәр бир вәзијјәтдә хидмәтчиләрини хилас етмәјә гадирдир, буна ҝөрә дә дүшмәнләрини тәләјә салмаг үчүн бәзән онлардан истифадә едир. Исраиллиләри Мисир әсарәтиндән азад едәндә Јеһова мәһз бу үсулдан истифадә етмишди.

¹⁰ Мисирдән чыхан исраиллиләрин сајы тәхминән үч милјон иди. Јеһова Мусаја халгы елә бир јолла апармағы тапшырмышды ки, фиронда исраиллиләрин өз јолларыны аздыглары фикри јаранды. (Чыхыш 14:1—4 ајәләрини оху.) Гошуну илә бирҝә кечмиш гулларынын ардынҹа дүшәрәк онлары Гырмызы дәниздә тәләјә салмаг фүрсәти әлинә дүшән фирон бундан һеч ҹүр имтина едә билмәди. Исраиллиләр үчүн, санки, һәр шеј битмишди (Чых. 14:5—10). Амма әслиндә тәһлүкәдә олан онлар дејилди. Чүнки Јеһова халгы наминә вәзијјәтә мүдахилә етмәјә һазыр иди.

11, 12. а) Јеһова исраиллиләри неҹә хилас етди? б) Бунун нәтиҹәси нә олду вә биз бу һадисәдән нә өјрәнирик?

¹¹ Исраиллиләрә бәләдчилик едән «булуд дирәји» онларын архасына кечәрәк фиронун гошунунун онлара јахынлашмасына әнҝәл төрәтди вә дүшмән тәрәфә гаранлыг чөкдү. Лакин исраиллиләрин олдуғу тәрәфи бу дирәк ҝеҹә вахты мөҹүзәви шәкилдә ишыгландырырды. (Чыхыш 14:19, 20 ајәләрини оху.) Јеһова ҝүҹлү шәрг күләји илә дәниз суларыны јарараг јери «гуруја чевирди». Шүбһәсиз, бунун үчүн хејли вахт лазым иди, чүнки Мүгәддәс Китабда јазылыб ки, күләк «бүтүн ҝеҹә»ни әсирди вә јалныз бундан сонра «Исраил өвладлары дәнизин ортасында гуру јердән кечдиләр». Дөјүш арабалары сүрән мисирлиләрлә мүгајисәдә исраиллиләр ләнҝ һәрәкәт едирдиләр. Анҹаг јенә дә мисирлиләрин исраиллиләрә чатмасы гејри-мүмкүн иди, чүнки онлар үчүн Јеһова дөјүшүрдү. Јеһова мисирлиләрин «арасына гарышыглыг салды. О, арабаларын чархларыны елә ләнҝитди ки, арабалар ҝүҹлә һәрәкәт етди» (Чых. 14:21—25).

¹² Бүтүн исраиллиләр сағ-саламат дәнизин о бири саһилинә чыханда Јеһова Мусаја әмр етди: «Әлини дәнизин үзәринә узат ки, сулар Мисирлиләрин, дөјүш арабаларынын вә сүвариләрин үзәринә гајытсын». Әсҝәрләр үзәрләринә ҝәлән «сулардан гачмаг истәјәндә Рәбб онлары итәләјиб дәнизин ортасына атды». Онлар үчүн һеч бир үмид јери јох иди. «Онлардан бир нәфәр дә олсун сағ галмады» (Чых. 14:26—28). Јеһова халгыны һәр бир вәзијјәтдән хилас етмәк үчүн кифајәт гәдәр ҝүҹү олдуғуну ҝөстәрди.

ЈЕРУСӘЛИМИН МӘҺВИ ЗАМАНЫ ХИЛАС

13. Иса һансы ҝөстәриши вермишди вә онун давамчыларыны һансы суал нараһат едә биләрди?

¹³ Јеһова нијјәтини јеринә јетирмәк үчүн һадисәләрин неҹә ҹәрәјан едәҹәјини дәгиг билир. Буну үчүнҹү нүмунәдән — биринҹи әсрдә Јерусәлимин мүһасирәси заманы баш верән һадисәләрдән ҝөрә биләрик. Ерамызын 70-ҹи илиндә шәһәр јерлә јексан едилмәздән өнҹә, Јерусәлим вә Јәһудејада јашајан мәсиһчиләрин сағ галмасы үчүн Јеһова Оғлу васитәсилә ҝөстәришләр вермишди. Иса демишди: «Даниел пејғәмбәрин дедији виранәлик ҝәтирән ијрәнҹ шејин мүгәддәс јердә дурдуғуну ҝөрәндә... гој Јәһудејада оланлар дағлара гачсын» (Мат. 24:15, 16). Бәс бу пејғәмбәрлијин нә заман јеринә јетмәјә башлајаҹағыны Исанын давамчылары неҹә биләҹәкдиләр?

14. Һадисәләрин ҝедишаты Исанын давамчыларына онун сөзләринин мәғзини баша дүшмәјә неҹә көмәк етди?

¹⁴ Һадисәләр инкишаф етдикҹә Исанын сөзләринин мәнасы даһа ајдын олурду. Ерамызын 66-ҹы илиндә Сестиј Галлын рәһбәрлик етдији Рома ордусу Јәһудејада үсјаны јатыздырмаг үчүн Јерусәлимә ҝәлди. Зилотлар кими танынан јәһуди үсјанкарлары мәбәд галасында ҝизләндиләр. Бундан хәбәр тутан Рома әсҝәрләри мәбәд диварынын алтыны газмаға башладылар. Ајыг-сајыг мәсиһчиләр бүтүн бу баш верәнләрин нә демәк олдуғуну баша дүшдүләр: бүтпәрәст Рома ордусу өз бајраглары илә («ијрәнҹ шеј») мәбәд диварынын («мүгәддәс јер») јанында дурурду. Исанын давамчылары үчүн «дағлара [гачмағын]» вахты ҝәлди. Шәһәр мүһасирәдә олдуғу бир һалда бу, неҹә мүмкүн иди? Һадисәләрин ҝедишаты ҝөзләнилмәдән дәјишди.

15, 16. а) Иса һансы конкрет ҝөстәриши вермишди вә давамчыларынын она әмәл етмәси нә үчүн ваҹиб иди? б) Хиласымыз нәдән асылы олаҹаг?

¹⁵ Намәлум сәбәбдән Сестиј Галл вә онун ордусу Јерусәлимдән ҝери чәкилди. Зилотлар онлары тәгиб етмәјә башладылар. Дөјүшчүләрин шәһәри тәрк етмәләри сајәсиндә Исанын давамчылары үчүн ҝөзләнилмәдән гачмаға имкан јаранды. Иса онлара ајдын шәкилдә тапшырмышды ки, мал-мүлкләрини гојуб шәһәри јубанмадан тәрк етсинләр. (Матта 24:17, 18 ајәләрини оху.) Онларын ҹәлд тәрпәнмәси, һәгигәтәнми, ваҹиб иди? Тезликлә ҹаваб ајдын олаҹагды. Бир нечә ҝүндән сонра гајыдан зилотлар Јерусәлим вә Јәһудеја сакинләрини үсјанда онлара гошулмаға мәҹбур етдиләр. Јәһуди груплашмаларынын һакимијјәт уғрунда бир-бири илә мүбаризә апармалары уҹбатындан шәһәрдә вәзијјәт гәфләтән писләшди. Шәһәрдән гачмаг ҝет-ҝедә мүшкүл мәсәләјә чеврилирди. Ерамызын 70-ҹи илиндә ромалылар гајыданда артыг гачмаг мүмкүн дејилди (Лука 19:43). Јубаныб вахтында шәһәри тәрк етмәјәнләр тәләдә идиләр! Исанын ҝөстәришинә әмәл едән мәсиһчиләр дағлара гачараг һәјатларыны хилас етдиләр. Онлар өз тәҹрүбәләриндән ҝөрдүләр ки, Јеһова Өз халгыны неҹә хилас етмәји билир. Бу һадисәдән биз нә өјрәнирик?

¹⁶ Бөјүк мүсибәт заманы мәсиһчиләрә Аллаһын Кәламындакы вә тәшкилатындан ҝәлән ҝөстәришләрә әмәл етмәк лазым ҝәләҹәк. Мисал үчүн, Иса давамчыларына дағлара гачмағы әмр етмишди. Биз дә бөјүк мүсибәт заманы «гачмаг» барәдә ҝөстәриш алаҹағыг, анҹаг бунун нә олаҹағыны јалныз заман ҝөстәрәҹәкb. Лакин биз әмин ола биләрик ки, һәмин ҝөстәришләрә риајәт етмәјин вахты ҝәләндә Јеһова онларын мәнасыны бизә ачыглајаҹаг. Хиласымыз итаәткарлығымыздан асылы олаҹағы үчүн инди өзүмүздән сорушмалыјыг: «Јеһованын бу ҝүн халгына вердији ҝөстәришләрә мән дәрһал әмәл едирәм, јохса јубанырам?» (Јаг. 3:17).

ЈЕҺОВА ГАРШЫДАКЫ ҺАДИСӘЛӘРӘ ТАБ ҜӘТИРМӘЈИМИЗ ҮЧҮН БИЗИ МӨҺКӘМЛӘНДИРИР

17. Һабаггугун пејғәмбәрлијиндән Аллаһын халгына едиләҹәк һүҹум барәдә нә өјрәнирик?

¹⁷ Инди ҝәлин јухарыда хатырланан Гогун һүҹумуна гајыдаг. Һабаггуг пејғәмбәр дә бунунла әлагәдар пејғәмбәрлик сөјләмишди: «Ешитдим, варлығым ләрзәјә ҝәлди, сәсиндән додагларым әсди. Санки сүмүкләрим әриди, дизләрим титрәди. Амма бизә һүҹум едән халгын [дүшмән ордусунун Аллаһын әлиндән] фәлакәтә дүшдүјү ҝүнү сәбирлә ҝөзләјәҹәјәм» (Һаб. 3:16). Аллаһын халгынын үзәринә ҝәлән фәлакәт барәдә ешитмәк кифајәт иди ки, пејғәмбәрин горхудан гарны ағрысын, додаглары титрәсин вә тагәтдән дүшсүн. Һабаггугун бу ҹүр реаксијасы ҝөстәрир ки, Гог бүтүн гүввәсини топлајыб үстүмүзә һүҹум чәкмәк истәјәндә вәзијјәтимиз аҹынаҹаглы ҝөрүнәҹәк. Лакин пејғәмбәр сәбирлә вә тәлаша дүшмәдән Јеһованын бөјүк ҝүнүнү ҝөзләмәјә һазыр иди вә Аллаһын Өз халгыны хилас едәҹәјинә зәррә гәдәр дә шүбһә етмирди. Биз дә Јеһоваја бу ҹүр етибар етмәлијик (Һаб. 3:18, 19).

18. а) Нәјә ҝөрә бизә едиләҹәк һүҹумдан горхмаг үчүн һеч бир әсас јохдур? б) Нөвбәти мәгаләдә нә мүзакирә олунаҹаг?

¹⁸ Бу үч нүмунәдән сонра биздә аз да олсун шүбһә галмады ки, Јеһова халгыны неҹә хилас етмәји чох јахшы билир. Мүмкүн дејил ки, Аллаһын нијјәти баш тутмасын — зәфәр Јеһованындыр. Бу мөһтәшәм гәләбәни өз ҝөзләримизлә ҝөрмәк үчүн сонадәк садиг галмалыјыг. Јеһова бизә нөгсансызлығымызы горумаға неҹә көмәк едир? Бу мөвзу нөвбәти мәгаләдә мүзакирә олунаҹаг.

[Һашијә]

[24–ҹү сәһифәдәки шәкил]

Нәјә ҝөрә демәк олар ки, тәһлүкәдә олан исраиллиләр дејилдиләр?