«Сизә рәһбәрлик едәнләри унутмајын»

ҺӘВАРИ Булусун дедији бу сөзләр Ибраниләрә 13:7 ајәсиндә јазылыб. Ерамызын 33-ҹү илинин Әллинҹи ҝүн бајрамындан етибарән Мәсиһ Исанын һәвариләри рәһбәрлик шурасы гисминдә фәалијјәт ҝөстәрмәјә башлады. Бу шура ҝәнҹ мәсиһи јығынҹагларына рәһбәрлик едирди (Һәв. 6:2—4). Артыг 49-ҹу илдә рәһбәрлик шурасы тәкҹә Исанын һәвариләриндән ибарәт дејилди. Сүннәт мәсәләси һәлл олунанда рәһбәрлик шурасына Јерусәлимдәки һәвариләрлә јанашы ағсаггаллар да дахил иди (Һәв. 15:1, 2). Бүтүн мәсиһиләрә аид олан мәсәләләри һәлл етмәк онларын өһдәсинә дүшүрдү. Онлар јығынҹаглара мәктуб вә гәрарларыны ҝөндәрирдиләр. Бунун сајәсиндә мәсиһиләрин иманы мөһкәмләнир вә араларында һәмрәјлик һөкм сүрүрдү. Јығынҹаглар рәһбәрлик шурасынын гәрарларына табе олурдулар, нәтиҹәдә, Јеһова Аллаһдан бол бәрәкәт алыр вә ҝүнү-ҝүндән чичәкләнирдиләр (Һәв. 8:1, 14, 15; 15:22—31; 16:4, 5; Ибр. 13:17).

² Һәвариләрин өлүмүндән сонра мәсиһиләр арасында дөнүклүк баш галдырды (2 Салон. 2:3—12). Иса буғда вә алаг отлары мәсәлиндә пејғәмбәрлик етдији кими, буғдаларын (мәсһ олунмуш мәсиһиләр) арасына алаг тохуму (сахта мәсиһиләр) сәпиләҹәкди. Әсрләр боју онлар бичин вахтына, јәни «бу дөврүн јекуну»на гәдәр бир јердә бөјүмәли идиләр (Мәт. 13:24—30, 36—43). Бүтүн бу дөвр әрзиндә Мәсиһ јер үзүндә давамчыларына рәһбәрлик вермәк үчүн һеч бир каналдан истифадә етмирди, рәһбәрлик шурасы да јох иди, бунунла белә, о, мәсһ олунмуш мәсиһиләрдән разы иди (Мәт. 28:20). Лакин Иса демишди ки, бичин вахты вәзијјәт дәјишәҹәк.

³ Иса дөврүн јекунунун «әламәт»инин бир һиссәси олан мәсәли чәкмәздән әввәл белә бир суал вермишди: «Садиг вә ағыллы нөкәр, ҝөрәсән, кимдир?» (Мәт. 24:3, 42—47). О билдирмишди ки, садиг нөкәр Аллаһын халгына «вахтлы-вахтында» руһани гиданы вермәлидир. Мәсиһ биринҹи әсрдә рәһбәрлији тәк бир инсанын јох, бир груп инсанын васитәсилә верирди. Бу ҝүн, дөврүн јекунунда онун рәһбәрлик вермәк үчүн истифадә етдији садиг нөкәр дә бир инсан дејил.

«САДИГ ВӘ АҒЫЛЛЫ НӨКӘР» КИМДИР?

⁴ Давамчыларына гида вермәк ишини Мәсиһ кимә тапшырмышды? Мәнтигә ујғундур ки, јер үзүндә јашајан мәсһ олунмуш мәсиһиләрә. Мүгәддәс Китабда онлар «падшаһ... тајфасы» адланыр вә дејилир ки, бу кәсләрә онлары «гаранлыгдан Өз һејрәтамиз нуруна чағыранын “әзәмәтли сифәтләрини бәјан етмәк”» тапшырылыб (1 Бут. 2:9; Мәл. 2:7; Вәһј 12:17). Бәс мәсһ олунмуш мәсиһиләрин һамысы садиг нөкәр групуна дахилдир? Хејр. Иса, гадын вә ушаглары чыхмагла, 5000 нәфәрә мөҹүзә илә јемәк верәндә јемәји шаҝирдләринә өтүрмүш, шаҝирдләри исә ҹамаата пајламышды (Мәт. 14:19). О, чох сајда инсаны бир нечә нәфәрин васитәсилә дојуздурмушду. Бу ҝүн о, руһани гиданы да ејни јолла тәгдим едир.

⁵ Демәли, «садиг вә ағыллы нөкәрбашы» мәсһ олунмуш гардашлардан ибарәт кичик групдур. Онлар Мәсиһин һүзуру заманы руһани гиданын һазырланыб пајланмасында шәхсән иштирак едирләр (Лука 12:42). Бу ахырзаманда «садиг вә ағыллы нөкәр» групуну тәшкил едән мәсһ едилмиш гардашларын һамысы баш идарәдә чалышыр. Һал-һазырда Јеһованын Шаһидләринин Рәһбәрлик Шурасы бу мәсһ едилмиш гардашлардан ибарәтдир.

⁶ Шура Мәсиһин рәһбәрлији алтында Мүгәддәс Китабын јеринә јетән пејғәмбәрликләри барәдә мәлумат дәрҹ едир вә илаһи принсипләри һәјатымызда тәтбиг етмәклә бағлы вахтлы-вахтында мәсләһәтләр верир. Бу руһани гида Јеһованын Шаһидләринин јығынҹаглары васитәсилә пајланылыр (Әшј. 43:10; Гал. 6:16). Пејғәмбәрләрин дөврүндә етибарлы нөкәри ешикағасы гојурдулар. Ејнилә, садиг вә ағыллы нөкәрә дә иман әһлинин гајғысына галмаг тапшырылыб. Садиг вә ағыллы нөкәрә мүлкијјәт, мүждәчилик иши, бөјүк топланты програмларынын һазырланмасы, нәзарәтчиләр тәјин етмәк вә Мүгәддәс Китаба әсасланан әдәбијјатлар дәрҹ етмәк етибар олунуб. Бүтүн бунлар «евдәки гуллугчуларын» рифаһына хидмәт едир (Мәт. 24:45).

⁷ Бәс «евдәки гуллугчулар» кимдир? Садә дилдә десәк, гиданы гәбул едәнләр. Әввәл-әввәл евдәки гуллугчулар анҹаг мәсһ олунмушлардан ибарәт иди. Сонра евдәки гуллугчулара «диҝәр гојунлардан» ибарәт бөјүк издиһам да гошулду (Јәһ. 10:16). Һәр ики груп садиг нөкәрин һазырладығы руһани сүфрәдән гидаланыр.

⁸ Бөјүк мүсибәтдә Мәсиһ Аллаһын бу дүнјаја кәсдији һөкмү иҹра етмәјә ҝәләндә о, «бүтүн әмлакынын идарәсини» садиг нөкәрә тапшыраҹаг (Мәт. 24:46, 47). Садиг нөкәр групуна дахил олан мәсиһиләр сәмави мүкафатларыны алаҹаглар. Онлар 144 000 нәфәрин јер үзүндә галан һиссәси илә бирликдә Мәсиһин сәмави падшаһлығында һакимијјәт сүрәҹәкләр. Даһа јер үзүндә садиг вә ағыллы нөкәр олмајаҹаг, буна ҝөрә дә Јеһова вә Иса Падшаһлығын јер үзүндәки тәбәәләринә рәһбәрлији «әмир» тәјин олунан кәсләрин васитәсилә верәҹәк (Зәб. 45:16).

НӘЈӘ ҜӨРӘ БИЗӘ РӘҺБӘРЛИК ЕДӘНЛӘРИ УНУТМАМАЛЫЈЫГ?

⁹ Бизә рәһбәрлик едәнләри унутмамаға вә онлара етибар етмәјә сәбәбләр чохдур. Бәс бу бизә һансы фајданы ҝәтирир? Һәвари Булус белә ҹаваб верир: «Онлар һесабат верәҹәк адамлар кими ҝеҹә-ҝүндүз сизин гејдинизә галырлар. Гојун онлар буну аһ-зарла јох, севинҹлә етсинләр ки, сизә зәрәр дәјмәсин» (Ибр. 13:17). Бизә рәһбәрлик едәнләрә табе олмаг, итаәт етмәк ваҹибдир, чүнки онлар даима бизим руһани рифаһымызы дүшүнүр вә хејримизә чалышырлар.

¹⁰ 1 Коринфлиләрә 16:14 ајәсиндә һәвари Булус белә дејир: «Һәр бир иши мәһәббәтлә ҝөрүн». Аллаһын халгы илә бағлы верилән гәрарлар да ән үлви кејфијјәт олан мәһәббәтә әсасланыр. 1 Коринфлиләрә 13:4—8 ајәләриндә бу кејфијјәтә белә тәриф верилир: «Мәһәббәт сәбирли вә хејирхаһдыр. Мәһәббәт пахыл дејил, ловғаланмыр, гүррәләнмир, налајиг давранмыр, өз хејрини ҝүдмүр, тез өзүндән чыхмыр, она едилән пислијин һесабыны тутмур. Һагсызлыға севинмир, әксинә, һәгигәтә шадланыр. Һәр шејә гатлашыр, һәр шејә инаныр, һәр шејә үмид едир, һәр шејә дөзүр. Мәһәббәт һеч вахт түкәнмир». Јеһованын садиг бәндәләринин хејринә верилән бүтүн гәрарларын көкүндә мәһәббәт дурдуғу үчүн тәшкилатдан ҝәлән рәһбәрлијә там етибар едә биләрик. Бундан әлавә, бу, Јеһова Аллаһын мәһәббәтинин тәзаһүрүдүр.

¹¹ Биринҹи әсрдә олдуғу кими, бу ҝүн дә Јеһова Өз халгына гејри-камил инсанлар васитәсилә рәһбәрлик верир. Бәли, Јеһова кечмишдә Өз нијјәтини әсасән гејри-камил инсанларын әли илә һәјата кечирирди. Мәсәлән, Нуһ пејғәмбәр ҝәми тикмиш вә бәшәријјәти ҝөзләјән фәлакәти бәјан етмишди (Јар. 6:13, 14, 22; 2 Бут. 2:5). Муса пејғәмбәрә Исраил халгыны Мисирдән чыхартмаг тапшырылмышды (Чых. 3:10). Гејри-камил инсанлар Аллаһын руһунун илһамы илә Мүгәддәс Китабы јазыблар (2 Тим. 3:16; 2 Бут. 1:21). Јеһованын мүждәчилик вә шаҝирд һазырламаг ишинә рәһбәрлији гејри-камил инсанлара тапшырмасы бизим Онун тәшкилатына етибарымызы зәифләтмир. Әксинә, иманымызы мөһкәмләндирир, чүнки Јеһованын көмәји олмадан тәшкилат бүтүн бу ишләри ҝөрә билмәзди. Садиг нөкәрин чохлу чәтинликләрдән вә сынаглардан кечмәси ҝөстәрир ки, Аллаһын руһу онун үзәриндәдир. Јеһова тәшкилатынын јердәки һиссәсинә бол хејир-бәрәкәт верир. Бу сәбәбдән биз бүтүн гәлбимизлә бу тәшкилаты дәстәкләмәли вә она етибар етмәлијик.

ЕТИБАРЫМЫЗЫ НЕҸӘ ҜӨСТӘРӘ БИЛӘРИК?

¹² Јығынҹагдакы мәсул шәхсләр садиг нөкәрә етибар етдикләрини үзәрләринә дүшән иши үрәкдән вә дүрүстлүклә иҹра етмәклә ҝөстәрирләр (Һәв. 20:28). Падшаһлыг мүждәчиләри кими биз бөјүк һәвәслә ев-ев шаһидлик ишиндә иштирак едир, тәкрарән инсанларын јанына ҝедир вә Мүгәддәс Китаб дәрсләри кечиририк (Мәт. 24:14; 28:19, 20). Садиг нөкәрин һазырладығы руһани немәтләрдән там фајда әлдә етмәк үчүн ибадәт ҝөрүшләринә, еләҹә дә бөјүк топлантылара һазырлашмалы вә бу тәдбирләрдә иштирак етмәлијик. Биз бу ҝөрүшләрдә баҹы-гардашларымызла үнсијјәт едәндә бир-биримизи руһландырырыг (Ибр. 10:24, 25).

¹³ Тәшкилата етибарымызы һәмчинин ианә етмәклә ҝөстәрмиш олуруг (Мәс. 3:9, 10). Баҹы-гардашларымыз мадди ҹәһәтдән корлуг чәкәндә јубанмадан онлара көмәк едирик (Гал. 6:10; 1 Тим. 6:18). Биз буну гардашлыг мәһәббәтиндән ирәли ҝәләрәк едирик вә буну Јеһоваја вә Онун тәшкилатына бизә етдији јахшылыглара ҝөрә миннәтдарлығымызы билдирмәк үчүн бир фүрсәт билирик (Јәһ. 13:35).

¹⁴ Биз тәшкилата етибар етдијимизи онун гәрарларыны дәстәкләмәклә дә ҝөстәририк. Буна рајон нәзарәтчиләринин вә јығынҹаг ағсаггалларынын ҝөстәришләринә тәвазөкарлыгла әмәл етмәк дахилдир. Бизә «рәһбәрлик едәнләрин» сырасында бу гардашлар да вар, одур ки биз онлара итаәт етмәли вә табе олмалыјыг (Ибр. 13:7, 17). Һансыса гәрарын нәјә әсасландығыны баша дүшмәсәк дә, әминик ки, онлары гәбул етсәк, хејир тапарыг. Нәтиҹәдә, Јеһова Онун Кәламына вә тәшкилатына табе олдуғумуз үчүн бизә хејир-дуа верир. Бунунла биз Ағаја, Иса Мәсиһә итаәт етмиш олуруг.

¹⁵ Бәли, садиг вә ағыллы нөкәрә етибар етмәјә чохлу сәбәбләр вар. Бу дөврүн аллаһы Шејтан Јеһованы вә тәшкилаты бәднам етмәк үчүн дәридән-габыгдан чыхыр (2 Кор. 4:4). Ҝәлин Шејтанын фәндинә ујмајаг! (2 Кор. 2:11). О, вахтынын аз олдуғуну, тезликлә дибсиз гујуја атылаҹағыны билир, буна ҝөрә дә мүмкүн гәдәр чох инсаны Јеһовадан узаглашдырмаг истәјир (Вәһј 12:12). Шејтан бизи нә гәдәр чох Аллаһдан узаглашдырмаға чалышырса, биз бир о гәдәр Аллаһа јахын олмалыјыг. Ҝәлин Јеһоваја вә халгыны идарә етмәк үчүн истифадә етдији канала етибар едәк. Бу, арамыздакы бирлији мөһкәмләндирир.