Аллаһын Кәламыны шәхсән өјрәнмәкдән зөвг алын
“Сәнин бүтүн ишләрини дәрин дүшүнәрәм вә сәнин етдикләрин һаггында дүшүнҹәјә даларам” (МӘЗМУР 77:12).
1, 2. а) Дәриндән дүшүнмәјә нәјә ҝөрә вахт ајырмалыјыг? б) Дәриндән дүшүнмәк вә ја дүшүнҹәјә далмаг нә демәкдир?
ИСА МӘСИҺИН шаҝирдләри олан бизләри, Аллаһла олан мүнасибәтимиз вә Она һансы мәгсәдлә хидмәт етмәјимиз дәриндән нараһат етмәлидир. Лакин бу ҝүн инсанларын башы о гәдәр гарышыгдыр ки, отуруб сакитҹә дүшүнмәјә вахтлары јохдур. Онлар мадди не’мәтләр топламаға, әшјалар әлдә етмәјә вә мә’насыз зөвг далынҹа дүшмәјә алудә олублар. Бу ҹүр бош ҹәһдләрдән гачынмаға бизә нә көмәк едәр? Биз һәр ҝүн гида вә јуху кими ваҹиб шејләрә хүсуси вахт ајырдығымыз кими, Јеһованын ишләри һаггында дәриндән дүшүнмәјә дә вахт ајырмалыјыг (Тәснијә 8:3; Матта 4:4).
2 Дәриндән дүшүнмәк үчүн һәрдән вахт ајырырсанмы? Үмумијјәтлә, дәриндән дүшүнмәк вә ја дүшүнҹәјә далмаг нә демәкдир? Бу, “бир шеј һаггында дәрин фикрә ҝетмәк, дәриндән дүшүнмәк” мә’наларыны верир. Јә’ни нә исә һаггында тәләсмәдән, ҹидди сурәтдә вә дәриндән фикирләшмәк. Бу бизим үчүн нә мә’на дашыјыр?
3. Руһани тәрәгги билаваситә нә илә бағлыдыр?
3 Һәр шејдән әввәл, бу бизә Павелин өз әмәкдашы Тимотејә јаздығы сөзләри хатырлатмалыдыр: “Мән ҝәлинҹәјә гәдәр, Мүгәддәс Јазылары ҹәмијјәтә охумагла, нәсиһәт вә тә’лим вермәклә мәшғул ол. [...] Бу ишләрә фикир вер [“бу шејләрин үзәриндә дәриндән дүшүн”, ЈД] вә онларла мәшғул ол ки, сәнин тәрәггин һамыја ашкар олсун”. Бәли, Тимотејдән тәрәгги едәҹәји ҝөзләнилирди, бу исә, Павелин сөзләриндән ҝөрүндүјү кими, билаваситә руһани шејләрин үзәриндә дәриндән дүшүнмәклә бағлы иди. Бу инди дә беләдир. Руһани тәрәггидән зөвг алмаг үчүн, Аллаһын Кәламы илә бағлы олан шејләрин ‘үзәриндә дәриндән дүшүнмәли’ вә ‘онларла мәшғул олмалыјыг’ (1 Тимотејә 4:13-15).
4. Јеһованын Кәламы үзәриндә мүнтәзәм олараг дәриндән дүшүнмәкдә бизә нә көмәк едә биләр?
4 Дәриндән дүшүнмәк үчүн ән мүнасиб вахт сәнин өзүндән вә аиләнин графикиндән асылыдыр. Чохлары Мүгәддәс Китаб ајәләринин үзәриндә сәһәрләр, “Мүгәддәс Јазылары ҝүндәлик арашдырмаг” брошүрасыны охујан заман дүшүнүрләр. Бүтүн дүнја үзрә Бејт-Елләрдә хидмәт едән 20 минә јахын көнүллү хидмәтчи ҝүнләрини 15 дәгигә әрзиндә Мүгәддәс Китаб ајәсини мүзакирә етмәклә башлајыр. Ҝүндәлик ајәјә даир Бејт-Ел аиләсинин јалныз бир нечә үзвүнүн шәрһ вермәсинә бахмајараг, башгалары охунуланларын вә дејиләнләрин үзәриндә дүшүнүрләр. Башга Шаһидләр исә Јеһованын Кәламынын үзәриндә ишә ҝедәркән дүшүнүрләр. Онлар Мүгәддәс Китабын, “Ҝөзәтчи Гүлләси” вә “Ојанын!” журналларынын аудиолентә алынмыш јазысына гулаг асырлар. Бу ҹүр аудиокасетләр бир сыра дилләрдә бурахылыр. Евдар гадынларын чоху иш ҝөрәркән бу касетләри динләјирләр. Демәк олар ки, онлар: “Рәббин ишләрини анырам; чүнки көһнә вахтдан олан мө’ҹүзәләрини анарам. Вә сәнин бүтүн ишләрини дәрин дүшүнәрәм вә сәнин етдикләрин һаггында дүшүнҹәјә даларам” — дејә јазан мәзмурчу Асафы тәглид едирләр (Мәзмур 77:11, 12).
Дүзҝүн әһвал-руһијјә фајдалы сәмәрәләр ҝәтирир
5. Шәхси өјрәнмә бизим үчүн нәјә ҝөрә ваҹиб олмалыдыр?
5 Телевизија, видеомагнитофон вә компүтер әсри һесаб олунан мүасир дөврдә гираәтә мараг нәзәрә чарпаҹаг дәрәҹәдә азалыб. Лакин бу вәзијјәт Јеһованын Шаһидләринә тә’сир етмәли дејил. Чүнки Мүгәддәс Китабы охумаг, бизи Јеһоваја бағлајан һәјат јолудур. Мин илләр бундан әввәл, Јешу Мусадан сонра Исраил халгынын рәһбәри олду. Јеһованын хејир-дуасына саһиб олмаг үчүн, Јешу Аллаһын Кәламыны өзү охумалы иди (Јешу 1:8; Мәзмур 1:1, 2). Бу тәләб бизә дә аиддир. Лакин бә’зи инсанлара, кифајәт гәдәр тәһсил алмадыгларына ҝөрә, охумаг чәтин вә јоруҹу ҝәлә биләр. Бу һалда, Аллаһын Кәламыны охумаг вә өјрәнмәк истәји инкишаф етдирмәкдә бизә нә көмәк едә биләр? Ҹавабы, Сүлејманын мәсәлләри 2:1-6 ајәләриндә, Сүлејман падшаһын сөзләриндә тапа биләрик. Ҝәлин Мүгәддәс Китабы ачаг вә бу ајәләри охујаг. Сонра исә бирликдә мүзакирә едәк.
6. Биз Аллаһ һаггында билијә неҹә јанашмалыјыг?
6 Һәмин ајәләр ибрәтамиз сөзләрлә башлајыр: “Оғлум, әҝәр сөзләрими гәбул етсән, әмрләрими һифз еләсән, гулағыны һикмәтә тәрәф чевирсән, үрәјини дәрракәјә тәрәф мејл етдирсән...” (Сүлејманын мәсәлләри 2:1, 2, МКШ). Бу сөзләр нәји ҝөстәрир? Бурадан ҝөрүнүр ки, һәр биримиз мәс’улијјәт дашыјырыг. Бу ајәдә “әҝәр сөзләрими гәбул етсән” шәртинә диггәт јетирәк. Бәли, мәһз “әҝәр”, чүнки инсанларын әксәријјәти Аллаһын Кәламына диггәтли дејилләр. Аллаһын Кәламыны өјрәнмәкдән севинҹ әлдә етмәк үчүн, биз Јеһованын сөзләрини үрәкдән гәбул етмәли вә онлара, итирмәк истәмәдијимиз бир хәзинә кими јанашмалыјыг. Ҝүндәлик гајғыларын бизә, Аллаһын Кәламына е’тинасыз јанашаҹаг, һәтта онун доғрулуғуна шүбһә едәҹәк дәрәҹәдә һаким кәсилмәсинә вә ја диггәтимизи јајындырмасына јол вермәли дејилик (Ромалылара 3:3, 4).
7. Нәјә ҝөрә имкан дахилиндә мәсиһчи ҝөрүшләриндә иштирак етмәли вә диггәтли олмалыјыг?
7 Мәсиһчи ҝөрүшләриндә Аллаһын Кәламы изаһ олунан заман, ‘гулағымызы һикмәтә тәрәф чевиририкми’? (Ефеслиләрә 4:20, 21). Үрәјимизи дәрракәли олмаға мејлләндиририкми? Мә’рузәчи тәҹрүбәли олмаса да, Аллаһын Кәламыны өјрәтдији үчүн, бизим диггәтимизә лајигдир. Сөзсүз ки, гулағымызы Јеһованын һикмәтинә тәрәф чевирмәк үчүн, биз имкан дахилиндә мәсиһчи ҝөрүшләриндә иштирак етмәлијик (Сүлејманын мәсәлләри 18:1). Әҝәр ким исә ерамызын 33-ҹү илинин Пентикост ҝүнүндә Јерусәлимдә јухары отагда кечирилән ҝөрүшү бурахмышдыса, һәмин адамын сонрадан нә гәдәр тәәссүфләндијини тәсәввүр ет! Буҝүнкү ҝөрүшләримиздә, о вахтлар олдуғу кими, гејри-тәбии шејләр баш вермәсә дә, орада әсас дәрслијимиз олан Мүгәддәс Китаб мүзакирә олунур. Демәли, әҝәр диггәтлијиксә вә дејиләнләри Мүгәддәс Китабдан изләјириксә, һәр ҝөрүш бизим үчүн хејир-дуа ола биләр (Һәвариләрин ишләри 2:1-4; Ибраниләрә 10:24, 25).
8, 9. а) Шәхси өјрәнмә биздән нә тәләб едир? б) Гызылын гијмәти илә Аллаһ һаггындакы дәгиг билијин гијмәтини неҹә мүгајисә едәрдиниз?
8 Мүдрик падшаһ даһа сонра дејир: “Ҝерчәк, әҝәр идракы чағырарсан вә анлајыша сәсини јүксәлдәрсәнсә...” (Сүлејманын мәсәлләри 2:3). Бу сөзләр биздә һансы һәвәси ојатмалыдыр? Әлбәттә ки, Јеһованын Кәламыны анламаг үчүн ҝүҹлү истәк! Бу сөзләрдә, анлајыша наил олмаг, Јеһованын ирадәсини дәрк етмәк мәгсәдилә һәвәслә өјрәнмә илә мәшғул олмаг фикри вурғуланыр. Бу, Сүлејманын нөвбәти сөзләриндән вә ҝәтирдији нүмунәдән ҝөрүндүјү кими, сөзсүз ки, сә’ј тәләб едир (Ефеслиләрә 5:15-17).
9 О давам едир: “Әҝәр ҝүмүш ахтарар кими ону [анлајышы] ахтарарсан вә хәзинәләр арашдырар кими ону арашдырарсанса...” (Сүлејманын мәсәлләри 2:4). Бу сөзләр, гијмәтли сајылан ҝүмүш вә гызыл кими металларын ахтарышына әсрләр әрзиндә вахт сәрф едән гызылчыхарданлары хатырладыр. Гызыл үстүндә инсанлар гәтлә јетирилмишләр. Башгалары гызылын ахтарышына һәјатларыны һәср етмишләр. Бәс гызыл доғруданмы бу гәдәр гијмәтлидир? Сәһрада сусузлугдан өлмәк үзрә олсајдын, нәји үстүн тутардын: гызыл күлчәсини, јохса бир стәкан сују? Анҹаг инсанлар сүн’и вә дәјишкән гијмәтли гызылы неҹә дә сә’јлә ахтарырлар!a Һикмәти, дәрракәни ахтармагда, һәмчинин Аллаһы вә Онун ирадәсини дәрк етмәкдә биз даһа чох сә’ј ҝөстәрмәлијик. Бәс бу ахтарышлар һансы фајданы ҝәтирир? (Мәзмур 19:7-10; Сүлејманын мәсәлләри 3:13-18).
10. Аллаһын Кәламыны өјрәнириксә, нәји тапа биләрик?
10 Сүлејман давам едир: “Рәбб горхусуну о заман анлајаҹагсан вә Аллаһ билијини тапаҹагсан” (Сүлејманын мәсәлләри 2:5). Биз ҝүнаһлы инсанларын “Аллаһ билијини”, јә’ни Каинатын Јараданы олан Күлл-Ихтијар Рәбб Јеһова һаггында билик тапа билмәјимиз неҹә дә валеһедиҹи фикирдир! (Мәзмур 73:28; Һәвариләрин ишләри 4:24). Бу дүнјанын философлары вә һикмәтли инсанлары јүз илләрдир ки, һәјатын вә Каинатын сирләрини өјрәнмәјә ҹан атырлар. Лакин онлар “Аллаһ билијини” тапмаға мүвәффәг олмурлар. Нә үчүн? Чүнки бу билијин Аллаһын Кәламы олан Мүгәддәс Китабда мин илләрлә олмасына бахмајараг, онлар буну чох садә бир шеј кими рәдд едир вә нәтиҹә е’тибарилә, һәмин билији гијмәтләндириб, анлаја билмирләр (1 Коринфлиләрә 1:18-21).
11. Шәхси өјрәнмә һансы фајдалары ҝәтирир?
11 Сүлејман даһа бир тәшвигедиҹи амил ҝәтирир: “Рәбб һикмәт верир; ағзындан билик вә анлајыш чыхар” (Сүлејманын мәсәлләри 2:6). Јеһова һикмәт, билик вә анлајыш ахтармаг истәјәнләрин һамысына, ону көнүллү сурәтдә вә сәхавәтлә верир. Аллаһын Кәламыны шәхсән өјрәнмәк сә’ј, шәхси интизам вә гурбанлар тәләб етсә дә, буну гијмәтләндирмәк үчүн, сөзсүз ки, бүтүн әсасларымыз вар. Һәр һалда Мүгәддәс Китаб әлимиздә чап едилмиш шәкилдә вар вә кечмишдә олдуғу кими, ону әллә көчүрмәк лазым ҝәлмир (Тәснијә 17:18, 19).
Јеһоваја лајиг шәкилдә давранмаг
12. Аллаһ һаггында билик әлдә етмәкдә мәгсәдимиз нә олмалыдыр?
12 Биз шәхси өјрәнмә илә һансы мәгсәдлә мәшғул олмалыјыг? Башгаларындан јахшы ҝөрүнмәк үчүнмү? Билијимизи башгаларына нүмајиш етдирмәк үчүнмү? Ҹанлы Мүгәддәс Китаб енсиклопедијасы олмаг үчүнмү? Хејр. Мәгсәдимиз — Мәсиһин тәравәт ҝәтирән руһунда башгаларына һәмишә көмәк етмәјә һазыр олараг, әмәлләримиздә мәсиһчи олмагдыр (Матта 11:28-30). Һәвари Павел хәбәрдарлыг етмишдир: “Билик инсаны ловғаландырыр, мәһәббәт исә руһән инкишаф етдирир” (1 Коринфлиләрә 8:1). Буна ҝөрә дә, Јеһоваја мүраҹиәт едәркән Мусанын тәзаһүр етдирдији тәвазөкарлыг руһуна саһиб олмалыјыг: “Мәнә јолларыны инди билдир, та ки, ҝөзүндә лүтф тапым дејә сәни таныјым” (Чыхыш 33:13). Бәли, биз билији башгаларына тәәссүрат бағышламаг үчүн дејил, Аллаһы мәмнун етмәк үчүн арзуламалыјыг. Тәвазөкар вә Јеһоваја лајиг хидмәтчиләр олмалыјыг. Бу мәгсәдә неҹә наил ола биләрик?
13. Аллаһа лајиг хидмәтчи олмаг үчүн нә лазымдыр?
13 Аллаһы неҹә мәмнун етмәклә әлагәдар Павел Тимотејә мәсләһәт вермишдир: “Чалыш ки, өзүнү Аллаһа сынагдан чыхмыш, утанмаға әсасы олмајан вә һәгигәт сөзүнү доғрулугла өјрәдән бир ишчи кими тәгдим едәсән” (2 Тимотејә 2:15). “Доғрулугла өјрәдән” ифадәси, “дүз кәсмәк” мә’насыны верән гәдим јунан дилинин мүрәккәб фе’лидир (“Kingdom Interlinear”). Бә’зи алимләрин фикринҹә, бу фе’ли парчаны үлҝү үзрә кәсән дәрзијә, тарлада шырым ачан ҹүтчүјә вә саирәјә даир истифадә етмәк олар. Һәр неҹә олса да, нәтиҹә дүзҝүн, јә’ни дәгиг олмалыдыр. Беләликлә, Тимотеј Аллаһа лајиг вә мәгбул хидмәтчи олмаг үчүн ‘чалышмалы’ иди ки, онун тә’лими вә давранышы һәгигәт сөзүнә мүвафиг олсун (1 Тимотејә 4:16).
14. Шәхси өјрәнмәмиз давраныш вә сөзләримизә неҹә тә’сир ҝөстәрмәлидир?
14 Павел Колос шәһәриндәки һәмиманлыларыны тәшвиг едәркән дә һәмин фикри вурғуламышды: “Рәббә лајиг шәкилдә һәрәкәт едиб, Ону һәр ҹәһәтдән разы саласыныз; һәр ҹүр хејирли ишдә сәмәрә вериб, Аллаһы танымагда тәрәгги едәсиниз” (Колослулара 1:10). Бурада Павел ‘Рәббә лајиг шәкилдә давранышы һәр ҹүр хејирли ишдә сәмәрә вермәклә вә Аллаһы танымагда тәрәгги етмәклә’ әлагәләндирир. Башга сөзләрлә десәк, Јеһова үчүн јалныз билији нә гәдәр гијмәтләндирмәмиз дејил, Онун Кәламына давранышларымыз вә сөзләримиздә нә дәрәҹәдә садиг галмағымыз да ваҹибдир (Ромалылара 2:21, 22). Јә’ни әҝәр Аллаһы мәмнун етмәк истәјириксә, шәхси өјрәнмәмиз бизим дүшүнҹә тәрзимизә вә давранышымыза тә’сир ҝөстәрмәлидир.
15. Әглимизи вә дүшүнҹә тәрзимизи неҹә горуја биләр вә она неҹә нәзарәт едә биләрик?
15 Бу ҝүн Шејтан, нәјин баһасына олурса-олсун, әглимизин апардығы мүбаризәјә тә’сир ҝөстәрәрәк руһанилијимизи мәһв етмәк нијјәтиндәдир (Ромалылара 7:14-25). Буна ҝөрә дә, Аллаһымыз Јеһоваја лајиг олмаг үчүн, әглимизи вә дүшүнҹә тәрзимизи горумалы, она нәзарәт етмәлијик. Силаһымыз, “һәр дүшүнҹәни Мәсиһә итаәт етсин дејә әсир” едән “Аллаһ билијидир”. Буну биләрәк биз Мүгәддәс Китабын ҝүндәлик өјрәнмәсинә даһа һәвәслә вахт ајыраҹағыг, чүнки әглимиздән худбин вә ҹисмани фикирләри чыхармаг истәјирик (2 Коринфлиләрә 10:5).
Анлајышымыза көмәк едән вәсаитләр
16. Биз Јеһованын тә’лиминдән неҹә фајдалана биләрик?
16 Јеһованын тә’лими һәм руһани, һәм дә физики ҹәһәтдән фајдалыдыр. Бу тә’лим, сәмәрәдән вә практики дәјәрдән узаг дини нәзәријјә дејил. Биз охујуруг: “Фајдалы оланы сәнә өјрәдән, јеријәҹәјин јолда сәни ҝүдән, Аллаһын Рәбб мәнәм” (Ишаја 48:17). Бәс Јеһова бизи фајдалы јол илә неҹә апарыр? Әввәла, Онун Кәламы олан Мүгәддәс Китаба саһибик. Бу бизим даим мүраҹиәт етдијимиз әсас дәрсликдир. Елә бу сәбәбдән, мәсиһчи ҝөрүшләриндә дејиләнләри Мүгәддәс Китабы ачараг һәмишә изләмәјимиз јахшы олар. Бунун фајдалы олдуғу, “Һәвариләрин ишләри” китабынын 8-ҹи фәслиндә тәсвир едилән һәбәшистанлы хәдимлә баш верән һадисәдән ҝөрүнүр.
17. Һәбәшистанлы хәдимлә бағлы һадисәдә нә баш верди вә бу нәји ҝөстәрир?
17 Һәбәшистанлы хәдим јәһудилији гәбул етмишди. О, Аллаһа сәмими гәлбдән инаныр вә Мүгәддәс Јазылары өјрәнирди. Хәдим арабасында ҝедәркән Ишајанын пејғәмбәрлијини охујурду. Бу заман онун арабасынын јанында гачан Филип ондан сорушду: “Охудуғуну һеч анлајырсанмы?” Хәдим нә ҹаваб верди? “Мәнә јол ҝөстәрән олмаса неҹә анлаја биләрәм?” Вә Филипдән риҹа етди ки, арабаја миниб онун јанында отурсун”. Сонра Филип мүгәддәс руһдан рәһбәрлик алараг, хәдимә Ишајанын пејғәмбәрлијини анламаға көмәк етди (Һәвариләрин ишләри 8:27-35). Бу һадисә нәји ҝөстәрир? Мүгәддәс Китабы тәкбашына охумағын кифајәт олмадығыны. Јеһова, Онун Кәламыны вахтында анлаја билмәјимиз үчүн, мүгәддәс руһунун көмәји илә садиг вә ағыллы гулдан истифадә едир. О, буну неҹә едир? (Матта 24:45-47; Лука 12:42).
18. Садиг вә ағыллы гул синфи бизә неҹә көмәк едир?
18 Иса гул синфинин “ағыллы вә садиг” адландырса да, онун сәһвләрә јол вермәјәҹәјини демәмишди. Мәсһ едилмиш садиг гардашлардан ибарәт олан бу груп јенә дә гејри-камил мәсиһчиләрдән ибарәтдир. Онлар ән јахшы нијјәтләрдән ирәли ҝәләрәк даврансалар да, биринҹи әсрдә јашамыш гардашлары кими, һәрдән сәһвә јол верә биләрләр (Һәвариләрин ишләри 10:9-15; Галатијалылара 2:8, 11-14). Лакин онларын нијјәти тәмиздир вә Јеһова, Онун Кәламына вә вә’дләринә олан иманымызы мөһкәмләндирән вәсаитләрлә бизи тәҹһиз етмәк үчүн, онлардан истифадә едир. Шәхси өјрәнмә үчүн садиг вә ағыллы гулун тәгдим етдији ән әсас көмәк “Мүгәддәс Јазыларын Јени Дүнја Тәрҹүмәси”дир. Һал-һазырда бу тәрҹүмә там, јахуд гисмән 42 дилдә мөвҹуддур вә 114 милјон нүсхәдә чап едилмишдир. Бу вәсаитдән шәхси өјрәнмә заманы фајдалы шәкилдә неҹә истифадә едә биләрик? (2 Тимотејә 3:14-17).
19. “Мүгәддәс Јазыларын гејдләрлә Јени Дүнја Тәрҹүмәси”нин шәхси өјрәнмә заманы көмәк едәҹәк бә’зи сәҹијјәви хүсусијјәтләри һансылардыр?
19 “Мүгәддәс Јазыларын гејдләрлә Јени Дүнја Тәрҹүмәси”ндә чарпаз ситатларла верилмиш сүтунлар, һашијәләр, гыса симфонија (“Мүгәддәс Китаб сөзләринин индекси”), “Һашијәләрдәки сөзләрин индекси” вә 43 мөвзунун ҝениш мүзакирә олундуғу Әлавә бәнд, хәритәләр вә ҹәдвәлләр мөвҹуддур. “Мүгәддимә”дә, Мүгәддәс Китабын бу надир тәрҹүмәси үчүн истифадә едилән чохсајлы мәнбәләр һаггында бәһс едилир. Әҝәр бу тәрҹүмә сәнин баша дүшдүјүн дилдә варса, һөкмән онун сәҹијјәви хүсусијјәтләри илә таныш ол вә онлары тәтбиг ет. Һәр неҹә олса да, Мүгәддәс Китаб өјрәнмә үчүн әсас вәсаитдир. Вә “Мүгәддәс Јазыларын Јени Дүнја Тәрҹүмәси”нин үстүнлүјү ондадыр ки, бу мәнбә диггәти Аллаһын Падшаһлығынын һөкмранлығына јөнәлтмәклә јанашы, Аллаһын адынын нә дәрәҹәдә әһәмијјәтли олдуғуну да лајигинҹә вурғулајыр (Мәзмур 149:1-9; Даниел 2:44; Матта 6:9, 10).
20. Шәхси өјрәнмә илә бағлы һансы суаллар инди ҹаваб тәләб едир?
20 Мүгәддәс Китабы анламамыз үчүн даһа һансы көмәк тәләб олунур? Шәхси өјрәнмә үчүн вахты неҹә тапмаг олар? Өјрәнмәни даһа сәмәрәли неҹә етмәк олар? Өјрәнмә бизим башгалары илә олан мүнасибәтимизә неҹә тә’сир ҝөстәрмәлидир? Руһани ирәлиләјишимизин бу ваҹиб саһәләри нөвбәти мәгаләдә мүзакирә олунаҹагдыр.
[Һашијә]
a 1979-ҹу илдән гызылын гијмәти ашағадакы гајдада ениб-галхмышдыр: 1980-ҹи илдә ән јүксәк һәддә, грамы 27,33 доллара чатмышды, 1999-ҹу илдә исә олдугҹа ашағы, грамы 8,13 доллара гәдәр енмишди.
Хатырлајырсынызмы?
• Дәриндән дүшүнмәк нә демәкдир?
• Аллаһын Кәламыны өјрәнмәјә неҹә јанашмалыјыг?
• Шәхси өјрәнмә илә һансы нијјәтләрдән ирәли ҝәләрәк мәшғул олмалыјыг?
• Мүгәддәс Китабы өјрәнмәк үчүн һансы вәсаитләримиз вар?
[21-ҹи сәһифәдәки шәкил]
Бејт-Ел аиләсинин үзвләри һәр ҝүнү Мүгәддәс Китаб ајәсини мүзакирә етмәклә башлајараг руһани ҹәһәтдән мөһкәмләнирләр.
[21-ҹи сәһифәдәки шәкилләр]
Јол ҝедәркән Мүгәддәс Китаба әсасланан аудиокасетләри динләмәклә вахтдан сәмәрәли истифадә етмиш олуруг.
[22-ҹи сәһифәдәки шәкил]
Инсанлар гызыл әлдә етмәк үчүн вахт вә гүввәләрини әсирҝәмәмишләр. Сән Аллаһын Кәламыны өјрәнмәкдә сә’ј ҝөстәрирсәнми?
[Иҹазә илә]
Courtesy of California State Parks, 2002
[23-ҹү сәһифәдәки шәкилләр]
Мүгәддәс Китаб әбәди һәјата јол ачан хәзинәдир.