Башгалары илә неҹә рәфтар етмәлијик?

«Инсанларын сизинлә неҹә рәфтар етмәсини истәјирсинизсә, сиз дә онларла елә рәфтар един» (ЛУКА 6:31).

1, 2. а) Дағүстү тәблиғ нәдир? б) Бу вә нөвбәти мәгаләдә биз нәји нәзәрдән кечирәҹәјик?

ИСА МӘСИҺ һәгигәтән дә Бөјүк Мүәллим олмушду. Исаја гаршы чыхан дин рәһбәрләри ону һәбс етмәк үчүн мүһафизләр ҝөндәрәндә, онлар әлибош гајыдыб дедиләр: «Инсанлар арасында бу Адам кими данышан әсла олмамышдыр» (Јәһ. 7:32, 45, 46). Исанын мәһарәтлә сөјләдији нитгләриндән бири Дағүстү тәблиғи иди. Бу нитг «Маттанын Мүждәси»нин 5-7-ҹи фәсилләриндә јазылыб вә буна бәнзәр мәлуматы Лука 6:20-49 ајәләриндә тапмаг оларa.

² Ола билсин, Дағүстү тәблиғдә дејиләнләр арасында ән чох танынмыш фикир чох вахт «Гызыл ганун» адландырылан фикирдир. Бу бизим диҝәр инсанларла неҹә рәфтар етмәјимизлә бағлыдыр. Иса демишдир: «Инсанларын сизинлә неҹә рәфтар етмәсини истәјирсинизсә, сиз дә онларла елә рәфтар един» (Лука 6:31). О, инсанлар үчүн нә гәдәр хејирхаһ ишләр етмишдир! Иса хәстәләрә шәфа верир вә һәтта өлүләри дирилдирди. Онун тәблиғ етдији хош хәбәрә һај верәнләр исә даһа бөјүк хејир-дуалар әлдә едирдиләр. (Лука 7:20-22 ајәләрини оху.) Јеһованын Шаһидләри олан бизләр ејни ишлә, јәни Падшаһлығы мүждәләмәк иши илә мәшғул олмагдан севинҹ дујуруг (Мат. 24:14; 28:19, 20). Биз бу вә нөвбәти мәгаләдә Исанын Дағүстү тәблиғиндә тәблиғ вә диҝәр инсанларла неҹә рәфтар етмәли олдуғумуз барәдә бәзи парчалары нәзәрдән кечирәҹәјик.

Һәлим олун

3. Һәлимлик сөзүнә неҹә тәриф верәрдиниз?

³ Иса демишди: «Һәлимләр нә бәхтијардырлар! Чүнки јери мирас алаҹаглар» (Мат. 5:5). Мүгәддәс Јазыларда һәлимлијин зәифлик олмадығы ҝөстәрилир. Һәлимлик, Аллаһын тәләбләринә риајәт едәркән тәзаһүр етдирдијимиз мүлајимликдир. Бу кејфијјәт инсанларла рәфтарымызда әкс олунур. Мәсәлән, биз ‘һеч кимә пислик әвәзинә пислик етмирик’ (Ром. 12:17-19).

4. Нәјә ҝөрә һәлимләр бәхтијардыр?

⁴ Һәлимләр бәхтијардыр, чүнки «јери мирас алаҹаглар». ‘Һәлим вә гәлбдән тәвазөкар’ олан Иса ‘һәр шејин вариси тәјин едилиб’ вә буна ҝөрә дә бир Падшаһ кими Јер күрәсинин баш Варисидир (Мат. 11:29; Ибр. 1:2; Мәз. 2:8). Пејғәмбәрлик едилмишдир ки, сәмави Падшаһлыгда ‘бәшәр оғлу’ Мәсиһин һакимијјәт шәрикләри олаҹаг (Дан. 7:13, 14, 21, 22, 27). ‘Мәсиһин һәмварисләри’ олан 144 000 мәсһ олунмуш һәлим мәсиһчи онунла бирҝә Јери мирас алаҹаг (Ром. 8:16, 17; Вәһј 14:1). Падшаһлығын тәбәәләри олаҹаг диҝәр һәлим инсанлара исә јер үзүндә әбәди һәјат вериләҹәк (Мәз. 37:11).

5. Иса кими һәлим олмағымызын һансы фајдасы вар?

⁵ Әҝәр кобуд олсајдыг, бу, башгаларыны һөвсәләдән чыхарар вә биздән кәнар ҝәзмәјә вадар едәрди. Амма Мәсиһ кими һәлим оланда јығынҹағын хошаҝәлән вә руһландырыҹы үзвү олуруг. Һәлимлик Аллаһын руһунун сәмәрәсинин тәркиб һиссәсидир. ‘Руһа ҝөрә јашадығымыз [вә] рәфтар етдијимиз’ тәгдирдә Аллаһын фәал гүввәси биздә бу кејфијјәти јетишдирир. (Галатијалылара 5:22-25 ајәләрини оху.) Шүбһәсиз, һамымыз Јеһованын мүгәддәс руһу илә идарә едилән һәлим инсанлар сырасында олмаг истәјирик!

Мәрһәмәтли оланлар нә бәхтијардыр!

6. Мәрһәмәтли адам һансы нәзәрәчарпан кејфијјәтләрә маликдир?

⁶ Иса Дағүстү тәблиғиндә бунлары да демишди: «Мәрһәмәтли оланлар нә бәхтијардырлар! Чүнки онлара мәрһәмәт едиләҹәкдир» (Мат. 5:7). Мәрһәмәтли адам имкансызлара дәрин шәфгәт вә хејирхаһлыгла јанашыр, онларын гајғысына галыр вә онлара рәһм едир. Исанын хәстәләрә ‘јазығы ҝәлдији’ вә ја ‘онлара аҹыдығы’ үчүн мөҹүзәли шәкилдә шәфа верирди (Мат. 14:14; 20:34). Буна ҝөрә дә шәфгәт вә гајғыкешлик бизи мәрһәмәт ҝөстәрмәјә тәшвиг етмәлидир (Јаг. 2:13).

7. Шәфгәт Исаны нәјә тәшвиг едирди?

⁷ Иса бир аз истираһәт етмәк истәјәндә издиһамла гаршылашды вә «онлара јазығы ҝәлди; чүнки чобансыз гојунлар кими идиләр». Бу сәбәбдән «онлара чох шејләр өјрәтмәјә башлады» (Марк 6:34). Башгалары илә Падшаһлыг һаггында хош хәбәри бөлүшәндә вә Аллаһын бөјүк мәрһәмәти һаггында данышанда бизим дә севинҹимиз бөјүк олур!

8. Мәрһәмәтли оланлар нәјә ҝөрә хошбәхтдирләр?

⁸ Мәрһәмәтли оланлар она ҝөрә хошбәхтдирләр ки, «онлара мәрһәмәт едиләҹәкдир». Инсанларла мәрһәмәтли даврананда адәтән онлар да ејни ҹүр һәрәкәт едирләр (Лука 6:38). Үстәлик, Иса демишди: «Инсанларын тәгсирләрини бағышласаныз, сәмави Атаныз сизи дә бағышлар» (Мат. 6:14). Јалныз мәрһәмәтли оланларын ҝүнаһлары бағышланаҹаг вә Аллаһ онлара лүтф ҝөстәрәҹәк, бу исә онлара хошбәхтлик ҝәтирир.

Нәјә ҝөрә «сүлһпәрвәрләр» бәхтијардыр?

9. Сүлһпәрвәриксә, неҹә давранаҹағыг?

⁹ Хошбәхтлијә сәбәб олан диҝәр амили гејд едәрәк Иса деди: «Сүлһпәрвәрләр нә бәхтијардырлар! Чүнки онлара Аллаһын оғуллары дејиләҹәк» (Мат. 5:9). Бурада «сүлһпәрвәр» кими тәрҹүмә едилән јунан сөзү һәрфи мәнада «сүлһ јарадан» демәкдир. Әҝәр биз сүлһ јараданыгса, ‘әзиз достлары ајыран’ гејбәт кими шејләрә ҝөз јуммајаҹаг вә ја өзүмүз бу ҹүр әмәлләрдә иштирак етмәјәҹәјик (Сүл. мәс. 16:28). Сөзләримиз вә әмәлләримизлә һәм баҹы-гардашларымызла, һәм дә диҝәр инсанларла сүлһдә олмаға ҹан атаҹағыг (Ибр. 12:14). Хүсусилә дә Јеһова Аллаһла сүлһдә олмаг үчүн әлимиздән ҝәләни едәҹәјик. (1 Петер 3:10-12 ајәләрини оху.)

10. Нәјә ҝөрә сүлһпәрвәрләр бәхтијардырлар?

¹⁰ Иса деди ки, ‘сүлһпәрвәрләр’ «Аллаһын оғуллары» адландырылаҹағына ҝөрә бәхтијардырлар. Мәсһ едиләнләр Исанын Мәсиһ олдуғуна инандыглары үчүн ‘Аллаһын оғуллары олмаг һаггыны алырлар’ (Јәһ. 1:12; 1 Пет. 2:24). Бәс Исанын сүлһпәрвәр олан ‘башга гојунлары’ һаггында нә демәк олар? Мәсиһ өзүнүн сәмави һәмварисләри илә Миниллик Һөкмранлығы дөврүндә ‘башга гојунларын’ ‘Әбәди Атасы’ олаҹаг (Јәһ. 10:14, 16; Јешаја 9:6; Вәһј 20:6). Һәмин дөврүн сонунда бу сүлһ јарадан инсанлар сөзүн әсл мәнасында Аллаһын јердәки өвладлары олаҹаглар (1 Кор. 15:27, 28).

11. ‘Јухарыдан назил олан һикмәтин’ бизә рәһбәрлик етмәсинә јол версәк, диҝәрләри илә неҹә давранаҹағыг?

¹¹ Биз «сүлһ верән Аллаһ» Јеһова илә сых мүнасибәтдә олмаг үчүн, сүлһпәрвәрлик дә дахил олмагла, Онун хүсусијјәтләрини тәглид етмәлијик (Филип. 4:9). ‘Јухарыдан назил олан һикмәтин’ бизә рәһбәрлик етмәсинә јол версәк, диҝәрләри илә сүлһпәрвәрҹәсинә давранаҹағыг (Јаг. 3:17). Бәли, биз бәхтијар сүлһ јараданлар олаҹағыг.

«Гој сизин нурунуз... парласын»

12. а) Иса руһани нур һаггында нә демишдир? б) Бизим нурумуз неҹә парлаја биләр?

¹² Инсанлара Аллаһдан руһани нур алмаға көмәк едәндә онларла ән јахшы тәрздә рәфтар етмиш олуруг (Мәз. 43:3). Иса шаҝирдләрини ‘дүнјанын нуру’ адландырды вә онлары тәшвиг етди: «Гој сизин нурунуз инсанларын гаршысында елә парласын ки, хејирхаһ ишләринизи ҝөрсүнләр». Иса шаҝирдләринин руһани һәгигәтләри «инсанларын гаршысында», јәни бәшәријјәтин рифаһы үчүн бәјан едәҹәкләрини нәзәрдә тутурду. (Матта 5:14-16 ајәләрини оху.) Инсанлара хејирхаһлыг едәндә вә хош хәбәри ‘бүтүн дүнјада’, јәни «бүтүн халгларда» тәблиғ едәндә бизим нурумуз парлајыр (Мат. 26:13; Марк 13:10). Бизә неҹә дә шәрәфли иш тапшырылыб!

13. Бизи нәдән танымаг олур?

¹³ Иса демишди: «Дағын зирвәсиндә гурулан шәһәр ҝизли гала билмәз». Белә шәһәри ҝөрмәк асандыр. Падшаһлығын тәблиғчиләри олан бизләр јахшы ишләримизә, һәмчинин тәмкинлилик вә исмәт кими хүсусијјәтләримизә ҝөрә танынырыг (Тит. 2:1-14).

14. а) Биринҹи әсрдә истифадә едилән чырағы тәсвир един. б) Руһани нурумузу габын алтында ҝизләтмәмәк нә демәкдир?

¹⁴ Иса чырағын јандырылмасындан вә евдә оланларын һамысыны ишыгландырсын дејә онун габын алтына јох, чырагданын үстүнә гојулмасындан данышмышды. Биринҹи әсрдә ҝилдән дүзәлдилмиш чыраглардан ҝениш истифадә едиләрди, пилтәси кәтандан һазырланарды вә адәтән јанаҹаг кими зејтун јағындан истифадә едәрдиләр. Ону чох вахт тахта вә ја метал чырагданын үстүнә гојардылар ки, «евдә оланларын һамысыны ишыгландырсын». Инсанлар јанан чырағы тутуму 9 литр олан бөјүк өлчү габынын алтына гојмаздылар. Иса истәмирди ки, шаҝирдләри руһани нурларыны мәҹази бөјүк габын алтында ҝизләтсинләр. Буна ҝөрә дә мүгавимәтләрин, јахуд тәгибләрин бизи Мүгәддәс Китаб һәгигәтләрини ҝизләтмәјә вә ја өзүмүздә сахламаға вадар етмәсинә һеч вахт јол вермәмәлијик — нурумуз һәмишә парламалыдыр.

15. ‘Хејирхаһ ишләримиз’ бәзи инсанлара неҹә тәсир едир?

¹⁵ Иса јанан чыраг барәдә бәһс етдикдән сонра шаҝирдләринә деди: «Гој сизин нурунуз инсанларын гаршысында елә парласын ки, хејирхаһ ишләринизи ҝөрсүнләр вә Ҝөјләрдәки Атаныза һәмд етсинләр». ‘Хејирхаһ ишләримизи ҝөрән’ бәзи инсанлар Аллаһын хидмәтчиләри олараг Она ‘һәмд едирләр’. Буна ҝөрә дә ҝәлин дүнјада ‘улдузлар кими парламаға’ давам едәк! (Филип. 2:15).

16. ‘Дүнјанын нуру’ олмаг нә демәкдир?

¹⁶ ‘Дүнјанын нуру’ олан бизләрдән Падшаһлыг һаггында тәблиғ етмәк вә шаҝирдләр һазырламаг тәләб олунур. Анҹаг бу јеҝанә тәләб дејил. Һәвари Павел јазырды: «Ишыг өвладлары кими һәрәкәт един, чүнки Руһун бәһрәси һәр ҹүр јахшылыгда, салеһликдә вә һәгигәтдәдир» (Ефес. 5:8, 9). Биз һәмишә Аллаһын јүксәк нормаларына мүвафиг давранмалыјыг. Бунун үчүн һәвари Петерин мәсләһәтинә риајәт етмәк лазымдыр: «Иман ҝәтирмәјәнләр арасында мүсбәт һәјат сүрүн ки, писликедәнләрмишсиниз кими сизә ифтира атсалар да, хејирли ишләринизи ҝөрүб, Аллаһын онлара јахынлашдығы ҝүндә, Она иззәт версинләр» (1 Пет. 2:12). Бәс һәмиманлымызла мүнасибәтимиз ҝәрҝинләширсә, онда нә етмәли?

«Гардашын илә барыш»

17-19. а) Матта 5:23, 24 ајәләриндә һансы ‘гурбандан’ сөһбәт ҝедир? б) Әввәлҹә гардашла барышмаг нә үчүн ваҹибдир вә Иса буну неҹә ҝөстәрди?

¹⁷ Дағүстү тәблиғиндә Иса шаҝирдләринә хәбәрдарлыг етди ки, гардашларына кин сахламасынлар вә нифрәт етмәсинләр. Шаҝирдләр, хәтринә дәјдикләри гардашла тез барышмалы идиләр. (Матта 5:21-25 ајәләрини оху.) Исанын мәсләһәтинә диггәтлә нәзәр салаг. Әҝәр гурбаны гурбанҝаһын гаршысына ҝәтирдијин заман јадына дүшсәјди ки, гардашынын сәнә гаршы шикајәти вар, онда нә етмәли идин? Гурбаны гурбанҝаһын гаршысында гојуб, ҝедиб гардашынла барышмалы идин. Сонра исә гајыдыб гурбаныны тәгдим едә биләрдин.

¹⁸ ‘Гурбан’ адәтән Јеһованын мәбәдиндә тәгдим едилән әнам иди. Һејван гурбанлары чох ваҹиб иди, чүнки гурбан ҝәтирмәји Мусанын Гануну алтында олан Исраил халгынын ибадәтинин бир һиссәси кими Аллаһ әмр етмишди. Лакин гардашынын сәнә гаршы шикајәти олдуғу тәгдирдә бу мәсәләни һәлл етмәк гурбаны тәгдим етмәкдән даһа ваҹиб сајылырды. Иса демишди: «Гурбаныны орада гурбанҝаһын гаршысында гој, ҝет әввәлҹә гардашын илә барыш вә ондан сонра ҝәл, гурбаныны тәгдим ет». Ганунда јазылан гурбанлары тәгдим етмәздән өнҹә гардашла барышмаг лазым иди.

¹⁹ Иса бу сөзләри демәклә хүсуси тәгдимләри вә конкрет ҝүнаһлары нәзәрдә тутмурду. Буна ҝөрә дә, әҝәр инсан гардашынын она гаршы шикајәти олдуғуну јада салырдыса, гурбан ҝәтирмәји тәхирә салмалы иди. Әҝәр о, һејван гурбаны ҝәтирирдисә, дири һејваны јандырма гурбанлары үчүн олан «гурбанҝаһын гаршысында» — мәбәдин каһинләр һәјәтиндә гојмалы иди. Проблемини һәлл етдикдән сонра гајыдыб гурбаныны ҝәтирә биләрди.

20. Гардашымыза гәзәблијиксә, нәјә ҝөрә проблеми тез һәлл етмәлијик?

²⁰ Аллаһын нөгтеји-нәзәринҹә, гардашларла мүнасибәтимиз һәгиги ибадәтин ваҹиб һиссәсидир. Әҝәр Јеһованын хидмәтчиси һәмиманлысы илә лазыми тәрздә рәфтар етмирдисә, һејван гурбанлары әбәс иди (Мик. 6:6-8). Ҝөрдүјүмүз кими, Иса шаҝирдләрини ‘тез барышмаға’ тәшвиг едирди (Мат. 5:25, И-93). Павел дә буна бәнзәр сөзләри јазмышды: «Гәзәбләнәндә ҝүнаһ ишләмәјин; гој сиз гәзәбләниркән ҝүнәш батмасын вә иблисә јер вермәјин» (Ефес. 4:26, 27). Гәзәбләнмәјә әсасымыз олса белә, биз гәзәбләнмиш вәзијјәтдә галмамаг вә Иблисә биздән истифадә етмәсинә имкан вермәмәк үчүн мәсәләни дәрһал һәлл етмәлијик (Лука 17:3, 4).

Башгалары илә һәмишә һөрмәтлә рәфтар един

21, 22. а) Бу мәгаләдә мүзакирә етдијимиз Исанын мәсләһәтләрини неҹә тәтбиг едә биләрик? б) Нөвбәти мәгаләдә нә мүзакирә олунаҹаг?

²¹ Исанын Дағүстү тәблиғиндә вердији бәзи мәсләһәтләри нәзәрдән кечирмәјимиз диҝәрләри илә хејирхаһҹасына вә һөрмәтлә рәфтар етмәјимизә көмәк етмәлидир. Һамымыз гејри-камил олсаг да, Исанын мәсләһәтләрини тәтбиг едә биләрик, чүнки нә о, нә дә сәмави Атамыз бизләрдән едә биләҹәјимиздән артыг шеј ҝөзләмирләр. Дуаларын көмәји илә, сәмими сәјимизлә вә Јеһова Аллаһын хејир-дуасы илә биз һәлим, мәрһәмәтли вә сүлһпәрвәр ола биләрик. Биз Јеһованын иззәти үчүн парлајан руһани нуру әкс етдирә биләрик. Үстәлик, арамызда инҹиклик јаранарса, гардашымызла барышмаг үчүн әлимиздән ҝәләни едә биләрик.

²² Јеһова Аллаһын гәбул етдији ибадәтә гоншуларымызла јахшы рәфтар етмәк дахилдир (Марк 12:31). Нөвбәти мәгаләдә башгаларына хејирхаһлыг етмәкдә бизә көмәк едәҹәк Дағүстү тәблиғдән диҝәр мәсләһәтләри нәзәрдән кечирәҹәјик. Инди исә, мүзакирә етдијимиз мәгаләдә Исанын мәһарәтлә сөјләдији нитгиндән өјрәндијимиз мәсләһәтләр үзәриндә дүшүнәрәк өзүмүздән соруша биләрик: «Мән диҝәрләри илә неҹә рәфтар едирәм?»

[Һашијә]

еҹә ҹаваб верәрдиниз?

• Һәлим олмаг нә демәкдир?

• Нәјә ҝөрә «мәрһәмәтли оланлар» бәхтијардырлар?

• Бизим нурумуз неҹә парлаја биләр?

• Нәјә ҝөрә гардашымызла тез барышмалыјыг?

[4-ҹү сәһифәдәки шәкил]

Падшаһлыг һагда хош хәбәри бәјан етмәк нурумузун парламасы үчүн ваҹибдир

[5-ҹи сәһифәдәки шәкил]

Мәсиһчиләр Аллаһын јүксәк нормаларына мүвафиг давранмалыдырлар

[6-ҹы сәһифәдәки шәкил]

Гардашынла барышмаг үчүн әлиндән ҝәләни ет