Аллаһын биринҹи әсрдәки хидмәтчиләринин һәјаты. Ев ишләри
«Онлар јолларына давам едәркән Иса бир кәндә ҝирди. Бурада Марта адлы бир гадын Ону өз евинә дәвәт етди. Онун Мәрјәм адлы бир баҹысы варды; о, Исанын ајаглары јанында отуруб Онун сөзүнү динләјирди. Марта исә ишин чохлуғундан чашмышды вә [Исаја] јахынлашыб деди: “ ...Мәҝәр баҹымын мәни јалныз хидмәт етмәјә бурахмасы Сәни нараһат етмирми? Она де ки, мәнә көмәк етсин”. Иса исә она ҹаваб вериб деди: “Марта! Марта! Сән чох шејләр үчүн үзүлүб тәлаш едирсән. Анҹаг бирҹә шејә еһтијаҹ вар. Мәрјәм исә ондан алынмајаҹаг јахшы пајы сечмишдир”» (ЛУКА 10:38—42).
МАРТА биринҹи әсрдә јашајан иманлы гадынлардан бири иди вә о, зәһмәтсевәрлији илә башгаларынын һөрмәтини газанмышды. О заманлар ев ишләринә ҹидди фикир верән вә аиләсинин еһтијаҹларынын гајғысына галан гадын јахшы гадын һесаб олунурду.
Һәмин дөврдә Аллаһа хидмәт едән гадынларын өз иманларыны башгалары илә бөлүшмәк мәсулијјәти дә варды (Матта 28:19, 20; Һәвариләрин ишләри 2:18). Бунунла белә, Мүгәддәс Јазылар онлары ев ишләринә фикир вермәјә тәшвиг едирди (Титус 2:5). Онларын ҝөрдүјү чохсајлы ев ишләриндән бәзиләри һансылар иди вә биз Исанын Мәрјәм барәдә дедији сөзләрдән нә өјрәнә биләрик?
Ишләри башындан ашырды. Јәһуди гадын сәһәр тездән, еһтимал ки, ҝүн доғмамыш артыг иш башында олурду (Сүлејманын мәсәлләри 31:15). Аиләси үчүн сыјыг биширдикдән сонра оғулларыны ибадәт јериндә фәалијјәт ҝөстәрән мәктәбә апарырды. Гыз ушаглары исә евдә галырдылар. Онлар ҝәләҹәкдә баҹарыглы арвад олмаг үчүн ев ишләрини ҝөрмәји өјрәнирдиләр.
Ана гызлары илә бирликдә әввәлҹә биринҹи дәрәҹәли ишләри ҝөрүрдү: чырагданы зејтун јағы илә долдурур (1), еви сүпүрүр (2) вә кечи сағырды (3). Бундан сонра онлар бир ҝүнлүк чөрәк биширмәк үчүн һазырлыглар ҝөрүрдүләр. Илк әввәл гызлар буғданы гарышыглардан тәмизләјиб, (4) ону әл дәјирманында үјүдүрдүләр (5). Аналары исә алынан кәпәкли уна су вә маја әлавә едиб хәмир јоғурурду (6). Хәмир аҹыјана гәдәр о, башга ишләри ҝөрүрдү. Бу арада гызлар тәзәҹә сағылмыш кечи сүдүндән јағ вә ја пендир һазырлајырдылар (7).
Ҝүнортаја јахын ана гызлары илә бирликдә ҝүндәлик азугә алмаг үчүн базара ҝедирди (8). Бир тәрәфдән әдвијјатын әтри, мал-гаранын бөјүрмәси, гојун-гузунун мәләшмәси, диҝәр тәрәфдән исә гијмәти ашағы салмаға чалышан алыҹыларын сәси ҝәлирди. Онлар мејвә-тәрәвәз вә гуру балыг алырдылар. Әҝәр о, Аллаһын хидмәтчиси идисә, алыш-вериш едәркән иманы барәдә башгаларына да данышырды (Һәвариләрин ишләри 17:17).
Өвладларынын тәрбијәсинә ҹидди јанашан ана базара ҝедиб-ҝәләркән јолда онлара Мүгәддәс Китаб принсипләрини вә онларын фајдасыны изаһ едирди (Ганунун тәкрары 6:6, 7). Ола билсин, о һәмчинин өз гызларына пулу гәнаәтлә хәрҹләмәји дә өјрәдирди (Сүлејманын мәсәлләри 31:14, 18).
Гадынларын һәр ҝүн ҝөрдүјү ишләрдән бири дә суја ҝетмәк иди (9). Орада онлар гујудан су чәкир вә еһтимал ки, бу заман бир-бири илә ордан-бурдан данышырдылар. Евә ҝәләндән сонра ана гызлары илә бирликдә чөрәк биширмәјә башлајырды. Әввәлҹә онлар хәмири күндәләјир, сонра да онлары јастылајыб гызмар тәндирә јапырдылар (10). Адәтән, тәндир һәјәтдә олурду. Бу арада онлар сөһбәт едир вә әтрафы бүрүјән чөрәк әтриндән һәзз алырдылар.
Даһа сонра палтар јумаг үчүн јахынлыгдакы чаја јолланырдылар (11). Гадынлар әввәлҹә палтарлары мүәјјән битки күлүндән дүзәлдилмиш сабунла јахшыҹа јујурдулар. Онлары јахалајыб сыхдыгдан сонра колларын вә дашларын үзәринә сәрирдиләр.
Ана вә гызлары евә гајыданда јасты дама чыхыр вә јујулмуш пал-палтардан ҹырыг-сөкүк оланлары јамајырды (12). Онлары јеринә јығдыгдан сонра ана гызларына нахыш вурмағын вә тохумағын сирләрини өјрәдирди (13). Бир дә ҝөзләрини ачырдылар ки, шам јемәји биширмәјин вахтыдыр (14). О вахткы инсанлара гонагпәрвәрлик ҝөстәрмәк хас иди вә онлар гонағын гаршысына чөрәк, мејвә-тәрәвәз, пендир, гуру балыг, сәрин су, бир сөзлә, Аллаһын јетирдији наз-немәтдән гојурдулар.
Артыг јатмаг вахтыдыр. Ана ушагларындан һансынын дизиндә јара олуб-олмадығыны јохлајыр вә јарасына зејтун јағы сүртүр. Валидејнләр чырағын титрәјән аловунун ишығы алтында өвладларына Мүгәддәс Јазылардан бир һекајә данышырлар вә бирҝә дуа едирләр. Бир аздан онларын худмани евләринә сүкут чөкүр. Әр өмүр-ҝүн јолдашыны Мүгәддәс Китабын бу сөзләри илә тәрифләјир: «Хејирхаһ арвад тапан кимдир? О, јагутлардан даһа гијмәтлидир». Бәли, о, һәгигәтән дә бу сөзләрә лајигдир (Сүлејманын мәсәлләри 31:10).
Онлар ‘јахшы пајы сечмишләр’. Доғрудан да, биринҹи әсрдә евдар гадынларын ишләри башындан ашырды (Лука 10:40). Бу ҝүн дә гадынларын, хүсусилә ушаглы аналарын башлары ишдән ачылмыр. Мүасир мәишәт аваданлыглары гадынларын бәзи ев ишләрини хејли асанлашдырса да, бир чох аналар тәкҹә ев ишләрини ҝөрмүрләр. Онлар аиләләрини доландырмаг үчүн ишләмәли дә олурлар.
Чәтинликләрә рәғмән Аллаһа хидмәт едән бир чох гадынлар, мәгаләнин әввәлиндә ады чәкилән Мәрјәм кими, руһани ишләрә хүсуси өнәм верирләр (Матта 5:3). Онлар Мүгәддәс Китабда јазыланлара ујғун олараг аиләләринин гајғысына галырлар (Сүлејманын мәсәлләри 31:11—31). Бунунла јанашы, онлар Иса пејғәмбәрин Мартаја дедији сөзә әсасән дә јашајырлар. Аллаһа јахын олан гадын кими, сөзсүз ки, о, алдығы мәсләһәтә ҹидди јанашды. Бу ҝүн дә Аллаһдан горхан гадынлар јол вермирләр ки, ев ишләри Аллаһ һаггында өјрәнмәләринә (15) вә ја иманлары барәдә башгаларына данышмаларына мане олсун (Матта 24:14; Ибраниләрә 10:24, 25). Бу ҹүр давранмагла онлар ‘јахшы пајы сечмиш’ олурлар (Лука 10:42). Белә гадынлар Аллаһ, Иса Мәсиһ вә аиләләри тәрәфиндән јүксәк гијмәтләндирилир (Сүлејманын мәсәлләри 18:22, КМ).