Јеһова бизим ҝүндәлик еһтијаҹларымызын гајғысына галыр
“Нараһат олмајын. Чүнки... Атаныз... бунлара еһтијаҹ дујдуғунузу билир” (ЛУКА 12:29, 30).
1. Јеһова һејванларын гајғысына неҹә галыр?
НӘ ВАХТСА сәрчәнин вә ја башга бир гушун бош торпагда јем ахтардығыны ҝөрмүсәнми? Јәгин тәәҹҹүб етмисән ки, бу јолла нә тапмаг олар? Дағүстү тәблиғиндә Иса сөјләди ки, Јеһованын гушларын гајғысына галмасындан биз нә исә өјрәнә биләрик. О тәшвиг едирди: “Ҝөјүн гушларына бахын, онлар нә әкир, нә бичир, нә дә амбарларда топлајырлар; вә сәмави Атаныз онлары једиздирир. Сиз онлардан даһа дәјәрли дејилсинизми?” (Матта 6:26). Јеһованын бүтүн јаратдыгларыны гида илә тә’мин етмә үсулуна анҹаг тәәҹҹүбләнмәк олар (Мәзмур 104:14, 21; 147:9).
2, 3. Исанын ҝүндәлик чөрәјимиз һаггындакы дуаја аид нәсиһәтиндә һансы руһани һәгигәтләр әкс олунур?
2 Белә исә, Иса нүмунәви дуаја “ҝүндәлик чөрәјимизи бизә бу ҝүн вер” хаһишини нәјә ҝөрә дахил етмишдир? (Матта 6:11). Бу садә хаһишдә дәрин руһани һәгигәтләр әкс олунур. Биринҹиси, бу хаһиш, Јеһованын бүтүн еһтијаҹларымызы тә’мин едән Бөјүк мәнбә олдуғуну јадымыза салыр (Мәзмур 145:15, 16). Инсанлар әкә вә сулаја биләрләр, лакин истәр руһани, истәрсә дә физики ҹәһәтдән, јалныз Аллаһ бөјүдә биләр (1 Коринфлиләрә 3:7). Једијимиз вә ичдијимиз нә варса, Аллаһын ән’амыдыр (Һәвариләрин ишләри 14:17). Һәр ҝүн Ондан еһтијаҹларымызын гајғысына галмасыны хаһиш едәндә, Онун гајғысыны гијмәтләндирдијимизи ҝөстәририк. Әлбәттә ки, әҝәр ишләмәјә гадириксә, бу хаһиш бизи ишләмәк мәс’улијјәтиндән азад етмир (Ефеслиләрә 4:28; 2 Салониклиләрә 3:10).
3 Икинҹиси, “ҝүндәлик чөрәјимиз” сөзләри ону билдирир ки, ҝәләҹәк һаггында һәддиндән артыг нараһат олмалы дејилик. Сонра Иса дејир: “Беләликлә: “Нә јејәҹәјик?”, “Нә ичәҹәјик?”, “Нә ҝејәҹәјик” — дејә гајғы чәкмәјин. Чүнки бүтпәрәстләр бүтүн бу шејләри ахтарарлар; сәмави Атаныз да бүтүн бу шејләрә еһтијаҹыныз олдуғуну билир. Фәгәт әввәлҹә Онун Падшаһлығыны вә Онун салеһлијини ахтарын; вә бүтүн бу шејләр сизә артырылаҹагдыр. Буна ҝөрә, сабаһ үчүн гајғы чәкмәјин; зира сабаһкы ҝүн өзү үчүн гајғы чәкәҹәкдир. Һәр ҝүнә өз дәрди јетәр” (Матта 6:31-34, И–93). “Ҝүндәлик чөрәјимиз” һаггындакы дуа садә һәјат тәрзи сүрмәјә вә “әлиндәки илә кифајәтләнәрәк Аллаһ јолу илә јеримә”јә ҝөзәл нүмунә кими хидмәт едир (1 Тимотејә 6:6-8).
Ҝүндәлик руһани гида
4. Руһани гиданын зәрурилијини Исанын вә исраиллиләрин һәјатында баш верән һансы һадисәләр вурғулајыр?
4 Ҝүндәлик чөрәк һаггындакы дуамыз бизә һәм дә ҝүндәлик олараг руһани гиданы гәбул етмәјин зәрурәти барәдә хатырлатмалыдыр. Иса узунмүддәтли оруҹдан сонра чох аҹ олса да, Шејтанын дашлары чөрәјә чевирмәк кәләјини нөвбәти сөзләрлә инкар етди: “Инсан јалныз чөрәклә јашамаз, лакин Аллаһын ағзындан чыхан һәр бир сөзлә јашар” (Матта 4:4). Бурада Иса, Мусанын исраиллиләрә сөјләдији сөзләри ситат ҝәтирир: “[Јеһова] сәни алчалтды вә сәни аҹ бурахды вә инсанын јалныз чөрәклә јашамадығыны, фәгәт Рәббин ағзындан чыхан һәр шејлә инсанын јашадығыны сәнә билдирсин дејә, сәнин билмәдијин вә аталарынын билмәдикләри маннаны сәнә једиртди” (Тәснијә 8:3). Исраиллиләрә манна вермәклә Јеһова онлары јалныз физики гида илә тә’мин етмирди, һәм дә онлара руһани ҹәһәтдән ибрәт дәрси верирди. Мәсәлән, онлар “һәр ҝүн чыхыб бир ҝүнлүк” азугә топламалы идиләр. Әҝәр онлар бир ҝүнә лазым оландан артыг азугә топлајырдыларса, галаны гохумаға вә гурдламаға башлајырды (Чыхыш 16:4, 20). Лакин онлар шәнбә ҝүнүнә дә јетсин дејә ики дәфә артыг топлајанда бу һал баш вермирди (Чыхыш 16:5, 23, 24). Беләликлә, маннанын сајәсиндә онларын ағылларында белә бир фикир ајдын сурәтдә һәкк олмушду ки, онлар итаәткар олмалыдырлар вә онларын һәјаты јалныз чөрәкдән дејил, һәм дә ‘Аллаһын ағзындан чыхан һәр бир сөздән’ асылыдыр.
5. Јеһова бизи ҝүндәлик олараг руһани гида илә неҹә тә’мин едир?
5 Јеһованын Өз Оғлу васитәсилә вердији руһани гиданын ҝүндәлик олараг гәбулуна биз дә еһтијаҹ дујуруг. Буну нәзәрә алараг Иса “садиг вә ағыллы гул”а Јеһованын бүтүн хидмәтчиләринә “вахтлы-вахтында... јемәк” вермәји һәвалә едиб (Матта 24:45). Садиг гул Мүгәддәс Китабы өјрәнмәк үчүн јардымчы вәсаитләр тимсалында бол руһани гида илә тә’мин етмәклә јанашы, һәм дә бизи Мүгәддәс Китабы ҝүндәлик охумаға тәшвиг едир (Јешу 1:8; Мәзмур 1:1-3). Әҝәр Јеһованын ирадәсини өјрәнмәк вә ону јеринә јетирмәк үчүн ҝүндәлик олараг сә’ј ҝөстәририксә, Иса кими биз дә руһани јардым әлдә едә биләрик (Јәһја 4:34).
Ҝүнаһларын бағышланмасы
6. Һансы борҹлара ҝөрә бағышланмағымызы хаһиш етмәлијик вә Јеһова онлары һансы шәртләрлә бағышламаға һазырдыр?
6 Нүмунәви дуадакы нөвбәти хаһиш бу ҹүрдүр: “Бизә борҹлу оланлары бағышладығымыз кими, бизим борҹларымызы да бағышла” (Матта 6:12). Иса борҹ ҝөтүрүлмүш пуллардан данышмырды. О, ҝүнаһларымызын бағышланмасыны нәзәрдә тутурду. Нүмунәви дуада олан бу хаһиши Лука бу ҹүр јазмышдыр: “Ҝүнаһларымызы бағышла, чүнки биз дә бизә борҹлу олан һәр адамы бағышлајырыг” (Лука 11:4). Беләликлә, биз ҝүнаһ ишләдәндә, санки Јеһоваја борҹлу олуруг. Лакин әҝәр биз сәмими гәлбдән төвбә едириксә, “дөнүр” вә Ондан Мәсиһин фидијә гурбанлығы әсасында бағышланмағымызы хаһиш едириксә, севән Атамыз бу борҹу “силмәјә” һазырдыр (Һәвариләрин ишләри 3:19, И–93; 10:43; 1 Тимотејә 2:5, 6).
7. Бағышланмағымыз һаггында нәјә ҝөрә һәр ҝүн дуа етмәлијик?
7 Башга бир фикрә бахаг. Биз Јеһованын әдаләтли нормаларына мүвафиг ола билмәјәндә, ҝүнаһ ишләдирик. Мирас алдығымыз ҝүнаһ уҹбатындан һамымыз сөздә, әмәлләрдә вә фикирләримиздә ҝүнаһ ишләдир вә ја етмәли олдуғумуз шеји етмирик (Ваиз 7:20; Ромалылара 3:23; Јагуб 3:2; 4:17). Буна ҝөрә дә, ҝүн әрзиндә ишләтдијимиз сәһвләри јадымыза сала билиб-билмәмәјимиздән асылы олмајараг, ҝүндәлик дуаларымыза ҝүнаһларымызын бағышланмасы һаггында хаһиши дахил етмәк лазымдыр (Мәзмур 19:12; 40:12).
8. Бағышланма һаггындакы дуа бизи һансы ишләрә тәшвиг етмәлидир вә нәтиҹәдә нә әлдә едирик?
8 Биз, Мәсиһин фидијә гурбанлығына иман ҝәтирәрәк, доғрулугла өзүмүзү јохладыгдан, пешманчылыг дујдугдан вә төвбә етдикдән сонра ҝүнаһларын бағышланмасы барәдә дуа етмәлијик (1 Јәһја 1:7-9). Дуамызын сәмими олдуғуну ҝөстәрмәк үчүн, бағышланма һаггында олан хаһиш “төвбәјә лајиг ишләр”лә мүшајиәт олунмалыдыр (Һәвариләрин ишләри 26:20). О заман инана биләрик ки, Јеһова бизим ҝүнаһларымызы бағышламаға һазырдыр (Мәзмур 86:5; 103:8-14). Нәтиҹәдә биз, һеч бир шејлә мүгајисә олунмајан гәлб раһатлығыны — “Аллаһын һәр ҹүр ағылдан үстүн олан сүлһү”нү әлдә едирик; бу ҹүр сүлһ ‘Мәсиһ Иса васитәсилә үрәкләримизи вә дүшүнҹәләримизи горујаҹагдыр’ (Филипилиләрә 4:7). Лакин нүмунәви дуадан ҝөрүнүр ки, ҝүнаһларымызын бағышланмасы үчүн биз даһа нә исә етмәлијик.
Бағышланмаг үчүн өзүмүз бағышламалыјыг
9, 10. а) Иса нүмунәви дуанын һансы һиссәсини изаһ етди вә бу нәји вурғулајыр? б) Бағышламағын ваҹиблијини Иса даһа неҹә ҝөстәрди?
9 Мараглыдыр ки, “бизә борҹлу оланлары бағышладығымыз кими, бизим борҹларымызы да бағышла” хаһиши, нүмунәви дуада Исанын изаһ етдији јеҝанә һиссәдир. Дуанын сонунда о әлавә етди: “Чүнки инсанларын тәгсирләрини бағышласаныз, сәмави Атаныз сизи дә бағышлар. Амма сиз инсанларын ҝүнаһларыны бағышламасаныз, Атаныз да сизин ҝүнаһларынызы бағышламаз” (Матта 6:14, 15). Беләликлә, Иса олдугҹа ајдын тәрздә ҝөстәрди ки, анҹаг биз өзүмүз бағышламаға һазыр олдуғумуз һалда Јеһова бизи бағышлајаҹагдыр (Марк 11:25).
10 Башга бир һалда Иса әјани нүмунәнин әсасында ҝөстәрди ки, Јеһованын бизи бағышламасыны истәјириксә, бизим өзүмүзүн бағышлајан олмағымыз ҝәрәкдир. О, бир гулун бөјүк борҹуну сәхавәтлә бағышлајан бир падшаһ һаггында данышды. Сонрадан падшаһ һәмин адамы, башга бир гула олдугҹа аз борҹу бағышламадығы үчүн, сәрт шәкилдә ҹәзаландырды. Әјани нүмунәнин сонунда Иса деди: “Һәр бириниз гардашларынызын тәгсирләрини үрәкдән бағышламасаныз, Сәмави Атам да сизә елә едәр” (Матта 18:23-35). Ибрәт дәрси ајдындыр: Јеһованын бизләрдән һәр биримизә бағышладығы ҝүнаһ борҹу, кимин исә бизә гаршы ишләтдији һәр һансы ҝүнаһлардан олдугҹа бөјүкдүр. Бундан әлавә, Јеһова бизи һәр ҝүн бағышлајыр. Буна ҝөрә дә, шүбһәсиз ки, башгалары надир һалларда бизә гаршы ҝүнаһ ишләдәндә биз дә онлары бағышлаја биләрик.
11. Јеһованын бизи бағышламасыны истәјириксә, һәвари Павелин вердији һансы нәсиһәтә риајәт едәҹәјик вә бу һансы ҝөзәл бәһрәләри ҝәтирәҹәк?
11 Һәвари Павел јазырды: “Бир-биринизә гаршы лүтфкар, шәфгәтли олун вә Аллаһ Мәсиһдә сизи бағышладығы кими, сиз дә бир-биринизи бағышлајын” (Ефеслиләрә 4:32). Гаршылыглы бағышлама мәсиһчиләр арасында сүлһә сәбәб олур. Павел һәм дә дә’вәт едирди: “Аллаһын сечилмишләри, мүгәддәсләри вә севимлиләри кими үрәкдән шәфгәт, хејирхаһлыг, тәвазөкарлыг, һәлимлик вә сәбирлилик ҝејин; бир-биринизә тәһәммүл един вә биринизин диҝәриндән шикајәти варса, бағышласын. Мәсиһ сизи бағышладығы кими, сиз дә бир-биринизи бағышлајын. Бүтүн бунларла јанашы, камил бирлијин бағы олан мәһәббәти ҝејин” (Колослулара 3:12-14). Бүтүн бунлар, Исанын бизә өјрәтдији дуада нәзәрдә тутулур, хүсусилә дә нөвбәти сөзләрдә: “Бизә борҹлу оланлары бағышладығымыз кими, бизим борҹларымызы да бағышла”.
Имтаһандан мүдафиә
12, 13. а) Нүмунәви дуанын нөвбәти хаһиши һансы мә’наны дашымыр? б) Бөјүк Аздыран кимдир вә “бизи имтаһана чәкмә” хаһишинин мә’насы нәдир?
12 Нүмунәви дуада нөвбәти хаһиш беләдир: “Бизи имтаһана чәкмә” (Матта 6:13). Иса, Јеһовадан бизи имтаһана чәкмәмәсини хаһиш етмәли олдуғумузму нәзәрдә тутурду? Бу белә дејил, чүнки шаҝирд Јагуб Аллаһын илһамы алтында јазмышды: “Имтаһан олунан заман, гој һеч ким: “Аллаһ мәни имтаһан едир”,— демәсин. Чүнки Аллаһ писликлә имтаһан олунмур вә Өзү дә һеч кими имтаһан етмир” (Јагуб 1:13). Һәлә үстәлик мәзмурчу јазырды: “Әҝәр нөгсанлары һесаба алсан, еј Јеһова, ја Рәбб, ким дура биләр?” (Мәзмур 130:3). Јеһова бизим һәр бир сәһвимизи ҝөрмәјә чалышмыр вә әлбәттә ки, бизи ҝүнаһа да итәләмәк истәмир. Онда нүмунәви дуанын бу һиссәси һансы мә’наны дашыјыр?
13 Әҝәр бизи ҝүнаһа итәләмәк, һијләҝәрликлә әлә алмаг вә һәтта удмаг истәјән кәс варса, о да Шејтан Иблисдир (Ефеслиләрә 6:11). О, бөјүк Аздырандыр (1 Салониклиләрә 3:5). “Бизи имтаһана чәкмә” дејә дуа едәндә, биз Јеһовадан хаһиш едирик ки, имтаһан заманы јыхылмамыза јол вермәсин. Ондан бизә көмәк етмәсини хаһиш едирик ки, “Шејтан бизә үстүн ҝәлмәсин” вә биз имтаһанда тәслим олмајаг (2 Коринфлиләрә 2:11). Бизим дуамыз, “Уҹа Оланын өртүјүндә” галмаг вә бүтүн ишләриндә Јеһованын һөкмранлығыны гәбул едәнләрә тәгдим олунан руһани мүдафиәни алмаг арзусуну әкс етдирир (Мәзмур 91:1-3).
14. Имтаһан олундуғумуз заман Јеһованын јардымына бел бағлајырыгса, Онун бизи тәрк етмәјәҹәјинә һәвари Павел бизи неҹә әмин едир?
14 Биз әмин ола биләрик ки, әҝәр буну үрәкдән арзу едириксә вә истәјимизи дуаларда вә әмәлләрдә ҝөстәририксә, Јеһова бизи һеч заман тәрк етмәјәҹәк. Һәвари Павел бизи әмин едир: “Сиз һәр инсанын башына ҝәләндән башга бир имтаһана мә’руз галмадыныз. Аллаһ садигдир; О, ҝүҹүнүздән артыг имтаһан олунманыза разылыг вермәз, лакин имтаһан илә јанашы, гуртулушу да тә’мин едәҹәкдир ки, таб ҝәтирә биләсиниз” (1 Коринфлиләрә 10:13).
“Шәрдән хилас ет”
15. Нәјә ҝөрә бизә, Шәрдән хилас олмаг һаггында дуа етмәк әввәлләр олдуғундан даһа ваҹибдир?
15 Јунанҹа Мүгәддәс Јазыларын ән е’тибарлы әлјазмаларына әсасән, Исанын нүмунәви дуасынын сонунҹу сөзләри беләдир: “Бизи шәрдән хилас ет”a (Матта 6:13). Иблисдән мүдафиә бу сон вахтларда һәр заман олдуғундан даһа ваҹибдир. Шејтан вә онун ҹинләри һал-һазырда “Аллаһын әмрләринә риајәт едиб, Исаја олан шәһадәтләринә бағлы галан” мәсһ едилмишләрин галығы илә вә онларын “бөјүк... издиһам”дан олан һәмкарлары илә мүһарибә апарырлар (Вәһј 7:9; 12:9, 17). Һәвари Петер мәсиһчиләрә өјүд верирди: “Ајыг дурун, сајыг олун. Чүнки дүшмәниниз олан шејтан, нә’рә чәкән вә ашырмаг үчүн кимисә ахтаран аслан кими ҝәзир. Мөһкәм иманла она гаршы дурун” (1 Петер 5:8, 9). Шејтан бизим шаһидлик ишимизи дајандырмаг истәјир вә өзүнүн јердәки — дини, коммерсија вә ја сијаси тәбәгәдә олан нүмајәндәләринин васитәсилә бизи горхутмаға чалышыр. Лакин әҝәр биз гәтијјәтлә дуруругса, Јеһова бизи хилас едәҹәкдир. Шаҝирд Јагуб јазырды: “Аллаһа табе олун, иблисә исә гаршы дурун вә о, сиздән гачаҹагдыр” (Јагуб 4:7).
16. Јеһова Өз хидмәтчиләринә имтаһан заманы неҹә көмәк едә биләр?
16 Јеһова Оғлунун имтаһан олунмасына јол верди. Лакин Иса мүдафиә олунмаг үчүн Мүгәддәс Јазылардан истифадә едәрәк Иблисә гаршы дурдугдан сонра, Јеһова мәләкләрини ҝөндәрди ки, ону мөһкәмләндирсинләр (Матта 4:1-11). Буна бәнзәр тәрздә, әҝәр биз иманла дуа едир вә Јеһованы сығынаҹаг јеримиз едириксә, О, бизә көмәк үчүн мәләкләриндән истифадә едир (Мәзмур 34:7; 91:9-11). Һәвари Петер јазырды: “Рәбб Она ихлас едәнләри имтаһандан неҹә хилас етмәји, салеһ олмајанлары да... гијамәт ҝүнүнә кими ҹәза алтында неҹә сахламағы билир” (2 Петер 2:9).
Там гуртулуш јахынлашыр
17. Нүмунәви дуада Иса үстүнлүкләри дүзҝүн ардыҹыллыгла неҹә јерләшдирмишди?
17 Нүмунәви дуада Иса үстүнлүкләри дүзҝүн ардыҹыллыгла јерләшдирмишдир. Бизим үчүн ән башлыҹасы Јеһованын бөјүк вә мүгәддәс адыны мүгәддәс тутмагдыр. Буна Хиласкар Падшаһлығын васитәсилә наил олунаҹаг дејә, дуа едирик ки, Падшаһлыг ҝәлсин вә бүтүн гејри-камил инсан падшаһлыгларыны, јә’ни һөкумәтләрини мәһв етсин, һәмчинин Аллаһын ирадәсинин ҝөјдә олдуғу кими јердә дә јеринә јетмәсини тә’мин етсин. Бизим Ҹәннәт дүнјасындакы әбәди һәјата үмидимиз, јалныз Јеһованын ады мүгәддәс тутуланда вә Онун әдаләтли һөкмранлығы бүтүн Каинатда танынанда һәјата кечәҹәк. Ән ваҹиб олан бүтүн бу шејләр һаггында дуа етдикдән сонра, ҝүндәлик еһтијаҹларымыз, ҝүнаһларымызын бағышланмасы вә Шәрин — Шејтан Иблисин имтаһан вә кәләјиндән хилас олмаг барәсиндә дуа едә биләрик.
18, 19. Исанын нүмунәви дуасы ајыг галмагда вә үмидимизи “сона гәдәр мөһкәм” сахламагда бизә неҹә көмәк едир?
18 Бизим Шәрдән вә онун әхлагсыз системиндән там гуртулушумуз јахынлашыр. Шејтан ‘бөјүк гәзәбини’ јер үзүндәки инсанларын, хүсусилә дә Јеһованын садиг хидмәтчиләринин үзәринә төкмәк үчүн “вахтынын аз” олдуғуну чох ҝөзәл билир (Вәһј 12:12, 17). Иса ‘дөврүн сонунун’ әсас әламәтини тәсвир едәрәк, бә’зиләринин һәлә гаршыда һәјата кечәҹәји һәјәҹанландырыҹы һадисәләри габагҹадан сөјләди (Матта 24:3, 29-31). Биз бу һадисәләри ҝөрәндә, гуртулуша олан үмидимиз даһа мөһкәм олаҹаг. Иса демишдир: “Бу ишләр јеринә јетмәјә башладыгда јухары бахын вә башынызы галдырын, чүнки гуртулушунуз јахынлашыр” (Лука 21:25-28).
19 Исанын шаҝирдләринә өјрәтдији гыса нүмунәви дуа, сонун јахынлашдығы вахтда дуаларымыза нәји дахил етмәјә даир бизә сағлам рәһбәрлик верир. Әмин ола биләрик ки, Јеһова лап сона гәдәр һәр ҝүн бизим руһани вә мадди еһтијаҹларымызын гајғысына галаҹагдыр. Дуаларымыза мүнасибәтдә ајыглығы горујуб сахламагла, “башланғыҹда биздә олан е’тимады сона гәдәр мөһкәм һифз” едә биләрик (Ибраниләрә 3:14; 1 Петер 4:7).
[Һашијә]
a Мүгәддәс Китабын бә’зи тәрҹүмәләриндә, мәсәлән Инҹилдә, Рәббин дуасынын ахырында мәдһ сөзләри ҝәтирилир: “Чүнки падшаһлыг, гүдрәт вә иззәт әбәди олараг Сәниндир. Амин” (И–93). Мүгәддәс Китаба даир бир әсәрдә дејилир: “Даһа е’тибарлы [әлјазмаларда]... мәдһ сөзләри јохдур” (“The Jerome Biblical Commentary”).
Тәкрар үчүн суаллар
• “Ҝүндәлик чөрәјимиз” һаггындакы хаһиш нә илә әлагәдардыр?
• “Бизә борҹлу оланлары бағышладығымыз кими, бизим борҹларымызы да бағышла” хаһишини изаһ един.
• Јеһовадан бизи имтаһана чәкмәмәји хаһиш едәндә нә нәзәрдә тутулур?
• Нәјә ҝөрә “бизи шәрдән хилас ет” дејә дуа етмәлијик?
[25-ҹи сәһифәдәки шәкилләр]
Биз башгаларыны бағышламалыјыг ки, Јеһова да бизи бағышласын.