Јеһованын Кәламы ҹанлыдыр
«Јәһја» китабындан диггәтәлајиг фикирләр
МӘСИҺИН һәјаты вә хидмәти барәдә Аллаһдан илһам алараг јазан сонунҹу адам ‘Исанын севдији шаҝирд’ Јәһја олмушдур (Јәһ. 21:20). Јәһјанын ерамызын 98-ҹи илиндә јаздығы Мүждәдә әввәлки үч Мүждәдә дејиләнләрдән чох аз шеј тәкрар олунур.
Һәвари Јәһја Мүждәни конкрет бир мәгсәдлә јазмышдыр. О, мәгсәдини белә изаһ едир: «Исанын, Аллаһын Оғлу Мәсиһ олдуғуна иман едәсиниз вә иман етмәклә Онун ады илә сиздә һәјат олсун дејә, бунлар јазылмышдыр» (Јәһ. 20:31). Онун јаздыглары бизим үчүн доғрудан да чох бөјүк әһәмијјәт кәсб едир (Ибр. 4:12).
«БУДУР... АЛЛАҺ ГУЗУСУ»
Вәфтизчи Јәһја Исаны ҝөрүб дејир: «Будур, дүнјанын ҝүнаһыны арадан галдыран Аллаһ Гузусу!» (Јәһ. 1:29). Иса Самаријада, Галилејада, Јәһудејада вә Иордан чајынын шәрг саһилиндә тәблиғ едиб, тәлим вердији вә бир чох гүдрәтли ишләр ҝөрдүјү заман ‘чох кимсәләр Онун јанына ҝәлиб, Она иман едирләр’ (Јәһ. 10:41, 42).
Исанын ҝөстәрдији ән һејрәтамиз мөҹүзәләрдән бири Лазарын дирилмәсидир. Артыг дөрд ҝүндүр ки, өлү олан инсанын һәјата гајытмасыны ҝөрәндә чохлары Исаја иман едир. Анҹаг баш каһинләр вә фәрисејләр исә Исаны өлдүрмәји гәрара алырлар. Буна ҝөрә дә, Иса ‘орадан сәһраја јахын дијара, Ефраим адланан шәһәрә ҝедир’ (Јәһ. 11:53, 54).
Мүгәддәс Китаб суалларына ҹаваблар:
1:35, 40 — Вәфтизчи Јәһја илә дуран Андрејин јанындакы шаҝирд ким иди? Јазычы Вәфтизчи Јәһјаја һәмишә «Јәһја» дејә мүраҹиәт едир, өзүнү исә Мүждәдә һеч вахт ады илә танытмыр. Буна ҝөрә дә ады чәкилмәјән шаҝирд, еһтимал ки, Мүждәни јазан Јәһја олмушдур.
2:20 — Һансы мәбәд «гырх алты илә тикилиб»? Јәһудиләр Јәһудеја падшаһы Һиродун Зеруббабилин мәбәдини бәрпа етмәсини нәзәрдә тутурдулар. Тарихчи Иосифә ҝөрә бу иш Һиродун һакимијјәтинин 18-ҹи илиндә, јәни б. е. ә. 18/17-ҹи илләрдә башламышдыр. Мәбәдин мүгәддәс јери вә башга әсас һиссәләри сәккиз илә тикилмишдир. Анҹаг мәбәддәки ишләр ерамызын 30-ҹу илинин Пасхасына гәдәр вә һәтта ондан сонра да давам етмишдир. Буна ҝөрә дә 30-ҹу илдә јәһудиләр дедиләр ки, онун тикилмәси 46 илә баша ҝәлиб.
5:14 — Хәстәлик инсанын ҝүнаһ ишләтмәсинин нәтиҹәсидирми? Бу һәр заман белә олмур. Исанын шәфа вердији киши 38 ил иди ки, мирас алдығы гејри-камиллик уҹбатындан хәстә иди (Јәһ. 5:1-9). Иса демәк истәјирди ки, мәрһәмәт ҝөстәрилән киши хилас јолу илә ҝетмәли вә биләрәкдән ҝүнаһ ишләтмәмәлидир ки, хәстәликдән дә бетәр бәлаја дүчар олмасын. Елә ола биләрди ки, о, бағышланмаз ҝүнаһ ишләтсин вә дирилмәјә лајиг ҝөрүлмәсин (Мат. 12:31, 32; Лука 12:10; Ибр. 10:26, 27).
5:24, 25 — ‘Өлүмдән һәјата кечәнләр’ кимләрдир? Иса бир вахтлар руһани ҹәһәтдән өлү олан, лакин онун сөзүнү ешидиб она иман ҝәтирән вә ҝүнаһлы јолларындан дөнән инсанлар һаггында данышырды. Онлар о мәнада ‘өлүмдән һәјата кечирләр’ ки, үзәрләриндән өлүм һөкмү ҝөтүрүлүр вә Аллаһа иман етдикләри үчүн онлара әбәди һәјат үмиди верилир (1 Пет. 4:3-6).
5:26; 6:53 — «Өзүндә» вә ја ‘дахилиндә һәјат олмаг’ нә демәкдир? Иса Мәсиһ үчүн бу, Аллаһдан ики хүсуси баҹарығы — инсанлара Јеһованын гаршысында бәраәт газандырмаг вә өлүләри дирилтмәклә һәјат вермәк гүввәси — алмаг демәкдир. Исанын давамчылары үчүн ‘дахилиндә һәјат олмаг’ әбәди һәјаты алмаг демәкдир. Мәсһ олунмуш мәсиһчиләр бу һәјаты ҝөјләр һәјатына дириләркән әлдә едирләр. Јер үзүндә јашамаг үмидинә малик олан садиг инсанлар исә јалныз Мәсиһин Миниллик һөкмранлығынын сонунда баш верәҹәк ахырынҹы сынагдан кечәндән сонра әбәди һәјаты алаҹаглар (1 Кор. 15:52, 53; Вәһј 20:5, 7-10).
6:64 — Иса Јәһуда Искарјоту сечәндә Јәһуданын ону әлә верәҹәјини билирдими? Ҝөрүнүр, јох. Анҹаг ерамызын 32-ҹи илиндә бир дәфә Иса һәвариләринә деди: «Сизләрдән бири иблисдир». Еһтимал ки, һәмин вахт о, Јәһуда Искарјотда дүзҝүн олмајан мејлләрин баш галдырдығыны ҝөрмүшдү. Иса Јәһуданын ону әлә верәҹәјини бу мәнада «әввәлҹәдән» билирди (Јәһ. 6:66-71).
Бизим үчүн ибрәт дәрсләри:
2:4. Иса Мәрјәмә ҝөстәрмәк истәјирди ки, Аллаһын вәфтиз вә мәсһ олунмуш Оғлу олдуғу үчүн о, ҝөстәриши сәмави Атасындан алмалыдыр. Иса хидмәтинә тәзә башласа да, она тапшырылан ишин вахтыны, еләҹә дә өзүнү гурбан верәрәк өләҹәји вахты јахшы билирди. Һәтта Мәрјәм кими јахын аилә үзвү дә онун Аллаһын ирадәсини јеринә јетирмәсинә гарыша билмәзди. Биз дә Јеһоваја ејни гәтијјәтлә хидмәт етмәлијик.
3:1-9. Јәһуди рәиси Накдимонун нүмунәсиндән ики ибрәт дәрси алырыг. Биринҹиси, Накдимон касыб дүлҝәр оғлунун Аллаһ тәрәфиндән ҝөндәрилмиш бир мүәллим олдуғуну етираф едәрәк тәвазөкар, узагҝөрән олдуғуну вә өз руһани еһтијаҹларыны баша дүшдүјүнү ҝөстәрди. Бу ҝүн дә һәгиги мәсиһчиләрә тәвазөкар олмаг лазымдыр. Икинҹиси, Иса јер үзүндә оларкән Накдимон онун шаҝирди олмады. Јәгин бунун сәбәби инсан горхусу, Синедриондакы мөвгејинә бағлылыг вә ја вар-дөвләтә мәһәббәт иди. Бундан өзүмүзә ваҹиб дәрс ҝөтүрүрүк: белә шејләрин бизә «ишҝәнҹә дирәјини ҝөтүрүб» (ЈД) Исаны изләмәјә мане олмасына јол вермәмәлијик (Лука 9:23).
4:23, 24. Ибадәтимизин Аллаһа мәгбул олмасы үчүн, биздән Мүгәддәс Китабда ачылан һәгигәтләрә ујғун вә мүгәддәс руһун рәһбәрлији алтында ибадәт етмәк тәләб олунур.
6:27. ‘Әбәди һәјат верән баги јемәји’, јәни даими јемәји әлдә етмәк үчүн руһани еһтијаҹларымызы өдәмәјә сәј ҝөстәрмәлијик. Әҝәр белә едириксә, бәхтијарыг (Мат. 5:3).
6:44. Јеһова шәхсән Өзү бизим гајғымыза галыр. О, тәблиғ иши васитәсилә һәр биримизи тапыр, руһу васитәсилә Мүгәддәс Китаб һәгигәтләрини баша дүшүб онлары тәтбиг етмәјә көмәк едир, беләликлә дә бизи Оғлуна јахынлашдырыр.
11:33-36. Емосијалары бүрузә вермәк зәифлик әламәти дејил.
«МӘНИМ АРДЫМҸА ҜӘЛ»
Ерамызын 33-ҹү илинин Пасха бајрамы јахынлашыр. Иса Бејтанјаја гајыдыр. О, 9 нисанда сыпаја миниб Јерусәлимә ҝәлир. 10 нисанда исә јенидән мәбәдә ҝирир. Атасынын адынын иззәтләнмәси үчүн етдији дуаја ҹаваб олараг ҝөјдән сәс ҝәлир: «Һәм иззәтләндирдим, һәм дә иззәтләндирәҹәјәм» (Јәһ. 12:28).
Пасха јемәјини јејәркән Иса давамчыларына сон мәсләһәтләрини верир вә онлар үчүн дуа едир. Иса һәбсә алыныр, мүһакимә олунуб едам едилдикдән сонра Аллаһ тәрәфиндән дирилдилир.
Мүгәддәс Китаб суалларына ҹаваблар:
14:2 — Иса өз садиг давамчылары үчүн ҝөјләрдә јери неҹә һазырлајаҹагды? Иса Аллаһын һүзуруна ҝедиб ганынын дәјәрини Она тәгдим етмәклә јени әһди гүввәјә миндирәҹәкди. О, һәм дә Падшаһлыг һакимијјәтини алмалы иди. Бундан сонра мәсһ олунмуш давамчыларынын сәмави һәјат үчүн дирилмәси башлајаҹагды (1 Салон. 4:14-17; Ибр. 9:12, 24-28; 1 Пет. 1:19; Вәһј 11:15).
19:11 — Иса Пилатла сөһбәтиндә ону әлә верән һаггында данышаркән Јәһуда Искарјотуму нәзәрдә тутурду? Еһтимал ки, Иса тәкҹә Јәһуданы вә ја һәр һансы башга шәхси јох, онун өлдүрүлмәсиндә әли оланларын һамысыны нәзәрдә тутурду. Бура Јәһуда, «баш каһинләр вә бүтүн Синедрион», һәтта Бараббанын азад едилмәсини истәјән ‘халг’ да дахил иди (Мат. 26:59-65; 27:1, 2, 20-22).
20:17 — Иса Мәҹдәлли Мәрјәмә нә үчүн «мәнә тохунма» деди? Адәтән «тохунмаг» кими тәрҹүмә олунан јунан сөзү һәм дә «јапышмаг», «бәрк-бәрк тутмаг», «сарылмаг», «бурахмамаг» мәналарыны верир. Иса Мәҹдәлли Мәрјәмин она садәҹә тохунмасына етираз етмирди, чүнки гәбрин јанында башга гадынлара ‘ајагларына сарылмаға’ иҹазә вермишди (Мат. 28:9). Ҝөрүнүр, Мәрјәм Исанын ҝөјә галхаҹағыны вә бир даһа ону ҝөрмәјәҹәјини фикирләшдији үчүн ондан бәрк-бәрк тутмушду. Ону һәлә ҝетмәдијинә архајын етмәк үчүн Иса деди ки, ону тутмаг әвәзинә, ҝедиб дирилмә хәбәрини шаҝирдләрә чатдырсын.
Бизим үчүн ибрәт дәрсләри:
12:36. «Нур өвладлары» олмаг, јәни нур сачмаг үчүн бизә Аллаһын Кәламы олан Мүгәддәс Китабдан дәгиг билик әлдә етмәк лазымдыр. Сонра һәмин биликдән истифадә едәрәк инсанлары руһани гаранлыгдан Аллаһын нуруна ҝәтирмәлијик.
14:6. Аллаһын лүтфүнү газанмағын јеҝанә јолу Иса Мәсиһдир. Јалныз Исаја иман етмәклә вә онун нүмунәсини изләмәклә Јеһоваја јахынлаша биләрик (1 Пет. 2:21).
14:15, 21, 23, 24; 15:10. Аллаһын ирадәсинә табе олмаг бизә Аллаһын вә Онун Оғлунун мәһәббәтиндә галмаға көмәк едир (1 Јәһ. 5:3).
14:26; 16:13. Јеһованын мүгәддәс руһу мүәллим кими хидмәт едир вә әввәл өјрәндикләримизи јадымыза салыр. О, һәм дә Мүгәддәс Китаб һәгигәтләринин ачыгланмасында бөјүк рол ојнајыр. Беләликлә, о бизә даһа чох биликли, һикмәтли, дәрракәли, ағыллы вә узагҝөрән олмаға көмәк едә биләр. Буна ҝөрә дә биз мәтанәтлә дуа етмәли, хүсусилә дә бу руһу хаһиш етмәлијик (Лука 11:5-13).
21:15, 19. Иса Петердән сорушду ки, ону «бунлардан», јәни габагларындакы балыглардан чох севирми. Иса бунунла вурғулады ки, Петер балыгчылығы бурахыб бүтүн вахтыны Исанын архасынҹа ҝетмәјә сәрф етмәлидир. Гој бу Мүждәдәки һадисәләр Исаны ҹәлбедиҹи шејләрдән чох севмәк гәтијјәтимизи мөһкәмләндирсин. Бәли, ҝәлин бүтүн үрәкдән Исанын ардынҹа ҝедәк.
[31-ҹи сәһифәдәки шәкил]
Накдимонун нүмунәсиндән нә өјрәнә биләрик?