Аллаһын севдији кәсләр арасында варсанмы?
“Ким әмрләримә малик олуб онлара риајәт едәрсә, Мәни севән одур. Мәни севән, Атам тәрәфиндән севиләҹәкдир” (ЈӘҺЈА 14:21).
1, 2. а) Јеһова бәшәријјәти севдијини неҹә ҝөстәрди? б) Ерамызын 33-ҹү илинин 14 нисан ахшамында Иса һансы мәрасими тә’сис етди?
ЈЕҺОВА јаратдығы инсанлары севир. О, бәшәријјәти “елә севди ки, ваһид Оғлуну она верди; буну она ҝөрә етди ки, Она иман едәнләрин һеч бири һәлак олмасын, һамысынын әбәди һәјаты олсун” (Јәһја 3:16). Иса Мәсиһин өлүмүнүн Хатирә Ҝеҹәсиндән габаг, биз мәсиһчиләр даһа чох дәрк етмәлијик ки, Јеһова “бизи севди вә Өз Оғлуну бизим ҝүнаһларымызын әфвини тә’мин едән гурбан кими ҝөндәрди” (1 Јәһја 4:10).
2 Ерамызын 33-ҹү илинин 14 нисанында, ахшамдан бир гәдәр кечмиш, Иса Мәсиһ вә 12 һәвариси, исраиллиләрин Мисирдән азад едилдикләрини хатырладан Пасханы гејд етмәк үчүн, Јерусәлимдә үст отаға топлашдылар (Матта 26:17-20). Онлар јәһуди бајрамыны гејд етдикдән сонра, Иса Јәһуда Искарјоту ҝөндәрди вә сонрадан мәсиһчиләр тәрәфиндән Мәсиһин өлүмүнүн Хатирә Ҝеҹәси адланан ахшам јемәјини тә’сис етдиa. Јанында галан 11 һәварисинә Иса өзүнүн физики бәдәнини вә ганыны тәмсил едән мајасыз чөрәк илә шәраб верди. Бу барәдә әтрафлы мә’лумат Матта, Марк вә Луканын Мүждәсиндә, еләҹә дә бу һадисәни “Рәббин ахшам јемәји” адландыран һәвари Павелин мәктубунда јазылыб (1 Коринфлиләрә 11:20, И-93; Матта 26:26-28; Марк 14:22-25; Лука 22:19, 20).
3. Исанын өз шаҝирдләри илә бирликдә ахырынҹы дәфә үст отагда олмалары барәдә јалныз һәвари Јәһја һансы ваҹиб мә’луматлары хатырладыр?
3 Мараглыдыр ки, һәвари Јәһја чөрәк вә шәрабын өтүрүлмәсини хатырлатмыр. Еһтимал ки, бунун сәбәби, онун өз Мүждәсини јаздығы вахт (тәхминән б. е. 98-ҹи илиндә) бу мәрасимин артыг илк мәсиһчиләр арасында кечирилмәси иди (1 Коринфлиләрә 11:23-26). Лакин өз өлүмүнүн Хатирә Ҝеҹәсини тә’сис етмәздән әввәл вә сонра Мәсиһин дедикләри, һәмчинин етдикләри барәдә бизә ваҹиб мә’луматлары тәгдим едән јеҝанә шәхс, Аллаһдан илһам алан Јәһја олмушдур. Бу һәјәҹанландырыҹы тәфсилатлар, Јәһјанын јаздығы Мүждәнин ән азы беш фәслиндә тәсвир олунур. Бу фәсилләрдән, Аллаһын һансы инсанлары севдији бизә мә’лум олур. Ҝәлин Јәһјанын јаздығы Мүждәнин 13-дән 17-дәк олан фәсилләрини нәзәрдән кечирәк.
Мәсиһин мәһәббәт нүмунәсиндән өјрәнин
4. а) Мәсиһин өлүмүнүн Хатирә Ҝеҹәсини тә’сис едәркән, Иса Мәсиһин шаҝирдләри илә етдији сөһбәтин әсас мөвзусуну Јәһја неҹә гејд едир? б) Јеһованын Исаны севмәсинин ваҹиб сәбәбләриндән бирини сөјләјин.
4 Мәһәббәт - Иса Мәсиһин өз һәвариләринә сөјләдији сон нәсиһәти дә дахил етмәклә, һәмин фәсилләрин әсас мөвзусуну тәшкил едир. Бу фәсилләрдә “мәһәббәт” сөзүнүн мүхтәлиф формаларына 33 дәфә раст ҝәлмәјимиз тәәҹҹүблү дејил. Мәсиһин өз Атасы Јеһоваја вә шаҝирдләринә бәсләдији дәрин мәһәббәт, бу фәсилләрдә олдуғу кими башга һеч бир јердә белә ајдын шәкилдә ифадә олунмур. Иса Мәсиһин Јеһоваја олан мәһәббәти бүтүн Инҹилдә ашкар ҝөстәрилсә дә, Исанын “Мән Атаны севирәм” сөзләрини тәкҹә Јәһја гејд етмишдир (Јәһја 14:31). Иса һәмчинин Јеһованын ону севдијини дә сөјләјир вә бунун сәбәбини изаһ едир: “Атам Мәни севдији кими, Мән дә сизи севдим; Мәним мәһәббәтимдә галын. Мән Атамын әмрләрини јеринә јетириб Онун мәһәббәтиндә галырам. Әҝәр сиз дә Мәним әмрләрими јеринә јетирсәниз, Мәним мәһәббәтимдә галаҹагсыныз” (Јәһја 15:9, 10). Јеһова өз Оғлуну она ҝөрә севир ки, о, Атасына там үрәкдән итаәт едир. Иса Мәсиһин бүтүн давамчылары үчүн неҹә дә ҝөзәл нүмунәдир!
5. Иса Мәсиһ шаҝирдләринә олан мәһәббәтини неҹә тәзаһүр етдирди?
5 Исанын өз давамчыларына бәсләдији дәрин мәһәббәт, онун һәвариләри илә сон ҝөрүшү һаггында Јәһјанын јаздыгларынын лап башланғыҹында гејд едилир. Јәһја јазыр: “Пасха бајрамындан әввәл бу дүнјадан Атанын јанына көчәҹәји саатын ҝәлдијини билән Иса дүнјада Өзүнә аид оланлары севмиш олараг, онлары сона гәдәр севди” (Јәһја 13:1). Һәмин унудулмаз ахшамда Иса, башгаларына мәһәббәтлә гајғы ҝөстәрмәјә даир јадда галан дәрс верди: о, һәвариләринин ајагларыны јуду. Иса, шаҝирдләринин һәм онун, һәм дә гардашлары үчүн көнүллү сурәтдә етмәли олдуглары иши ҝөрдү. Онлар исә бу фүрсәти әлдән вердиләр. Иса шаҝирдләринә деди: “Мадам ки, Мән Рәбб вә Мүәллим олдуғум һалда ајагларынызы јудум, сиз дә бир-биринизин ајагларыны јумаға борҹлусунуз. Чүнки Мәним сизә етдијим кими сиз дә едәсиниз дејә, сизә бир нүмунә ҝөстәрдим” (Јәһја 13:14, 15). Мәсиһчиләр өз гардашларына севинҹлә хидмәт етмәлидирләр (Матта 20:26, 27; Јәһја 13:17).
Јени әмрә риајәт един
6, 7. а) Мәсиһин өлүмүнүн Хатирә Ҝеҹәси илә әлагәдар Јәһја һансы ваҹиб тәфсилаты хатырладыр? б) Иса өз шаҝирдләринә һансы јени әмри верди вә бу әмрдәки јенилик нәдән ибарәт иди?
6 Нисанын 14-ү ҝеҹәсиндә үст отагда баш верәнләри тәсвир едәркән, Јәһуда Искарјотун отагдан чыхмасыны јалныз Јәһја хатырладыр (Јәһја 13:21-30). Инҹилдә верилән мә’луматлардан ајдын олур ки, Иса өз өлүмүнүн Хатирә Ҝеҹәсини, јалныз бу сатгынын ҝедишиндән сонра тә’сис етди. Сонра о, садиг һәвариләринә сон мәсләһәт вә нәсиһәтләр верәрәк, онларла һәртәрәфли сөһбәт етди. Биз Хатирә Ҝеҹәсини гејд етмәјә һазырлашаркән, Исанын һәмән ахшамда дедикләрини өјрәнмәјә хүсуси мараг ҝөстәрмәлијик, чүнки биз дә Аллаһын севдији кәсләрин арасында олмаг истәјирик.
7 Иса Мәсиһ өз өлүмүнүн Хатирә Ҝеҹәсини тә’сис етдикдән сонра, онун шаҝирдләринә вердији биринҹи әмри бир гәдәр гејри-ади сәсләнирди. О деди: “Сизә бир-биринизи севәсиниз дејә јени бир әмр верирәм: сизи севдијим кими сиз дә бир-биринизи севин. Әҝәр бир-биринизә гаршы мәһәббәтиниз олса, бундан һәр кәс Мәним шаҝирдләрим олдуғунузу биләҹәк” (Јәһја 13:34, 35). Бу әмр һансы мә’нада јени иди? Һәмин ахшам бир гәдәр сонра, Иса өз сөзләрини изаһ етди: “Мәним әмрим будур: Бир-биринизи Мән сизи севдијим кими севин. Һеч кимдә, бир нәфәрин достлары уғрунда ҹаныны вермәсиндән даһа бөјүк мәһәббәт јохдур” (Јәһја 15:12, 13). Мусанын ганунуна әсасән исраиллиләр јахынларыны өзләри кими севмәли идиләр (Левилиләр 19:18). Амма Исанын әмринә даһа артыг тәләб дахил иди. Мәсиһ онлары севдији кими, мәсиһчиләр дә бир-бирләрини севмәли вә гардашлары уғрунда ҹанларындан кечмәјә һазыр олмалыдырлар.
8. а) Фәдакар мәһәббәт өзүнә нәји дахил едир? б) Јеһованын Шаһидләри фәдакар мәһәббәти бу ҝүн неҹә тәзаһүр етдирирләр?
8 Мәсиһин өлүмүнүн Хатирә Ҝеҹәси илә әлагәдар бүтүн јығынҹаглар, еләҹә дә ајрылыгда һәр биримиз өзүмүзү јохламалыјыг ки, мәсиһчини фәргләндирән хүсусијјәтә - Мәсиһин мәһәббәти кими мәһәббәтә доғрудан да маликикми. Мәсиһчинин өз әмәлләриндә дәфәләрлә фәдакарлыгла әкс етдирдији бу ҹүр мәһәббәт ону ҝөстәрир ки, мәсиһчи өз гардашыны әлә вермәкдәнсә өлмәјә һазырдыр. Әксәр һалларда бу ҹүр “мәһәббәт”, гардашларына вә башга инсанлара көмәк вә хидмәт едәрәк, өз шәхси мәнафејини көнүллү сурәтдә гурбан вермәк мә’насыны дашыјыр. Һәвари Павел бу саһәдә ҝөзәл нүмунә вермишдир (2 Коринфлиләрә 12:15; Филипилиләрә 2:17). Бүтүн дүнјада Јеһованын Шаһидләри, фәдакарлыг руһу ҝөстәрмәклә, һәмиманлыларына вә бүтүн инсанлара көмәк етмәклә, еләҹә дә гүввә вә вахтларыны өз јахынларына Мүгәддәс Китаб һәгигәтини тәблиғ етмәјә сәрф етмәклә танынырлар (Галатијалылара 6:10)b.
Дәјәрли мүнасибәтләри гијмәтләндирин
9. Аллаһ вә Онун Оғлу илә дәјәрли мүнасибәтимизи горумаг үчүн, биз нәји севинҹлә едирик?
9 Јеһованын вә Оғлу Иса Мәсиһин бизә тәзаһүр етдирдикләри мәһәббәтдән дәјәрли бир шеј ола билмәз. Лакин бу мәһәббәтә малик олмаг вә ону дујмаг үчүн нә исә етмәлијик. Иса, шаҝирдләри илә бирҝә кечирдији ахырынҹы ҝеҹәдә деди: “Ким әмрләримә малик олуб онлара риајәт едәрсә, Мәни севән одур. Мәни севән, Атам тәрәфиндән севиләҹәкдир; Мән дә ону севәҹәјәм вә Өзүмү она ҝөстәрәҹәјәм” (Јәһја 14:21). Әҝәр Аллаһ вә Онун Оғлу илә мүнасибәтләримизи јүксәк гијмәтләндиририксә, демәли, онларын әмрләринә севинҹлә риајәт едирик. Бу өзүнә, фәдакар мәһәббәт ҝөстәрмәјә даир јени әмри вә һәмчинин дирилдикдән сонра Мәсиһин вердији тапшырығы - хош хәбәри гәбул едән кәсләрдән “шаҝирдләр һазырламаға” (ЈД) чалышараг “халга тәблиғ едиб шаһидлик етмәји” дахил едир (Һәвариләрин ишләри 10:42; Матта 28:19, 20).
10. Мәсһ едилмишләр вә “башга гојунлар” кимләрлә дәјәрли мүнасибәтә маликдирләр?
10 Һәмин ахшам бир гәдәр сонра, Иса Мәсиһ садиг һәвариси (Тадај) Јәһуданын суалына ҹаваб олараг деди: “Ким Мәни севәрсә, сөзүмә риајәт едәр; вә Атам ону севәр вә Биз онун јанына ҝедиб онунла бәрабәр мәскән саларыг” (Јәһја 14:22, 23). Мәсиһлә ҝөјдә идарә етмәјә дә’вәт олунмуш мәсһ едилмишләр һәлә јер үзүндә икән Јеһова вә Оғлу илә хүсуси јахын мүнасибәтә маликдирләр (Јәһја 15:15; 16:27; 17:22; Ибраниләрә 3:1; 1 Јәһја 3:2, 24). Онларын һәмкарлары, јә’ни јер үзүндә әбәди јашамаг үмидини әлдә едән “башга гојунлар” да итаәтли олмалары сајәсиндә, “тәк Чобан” олан Иса Мәсиһлә, еләҹә дә Јеһова Аллаһла дәјәрли мүнасибәтә маликдирләр (Јәһја 10:16; Мәзмур 15:1-5; 25:14).
“Дүнјадан дејилсиниз”
11. Иса шаҝирдләринә һансы ајдын хәбәрдарлығы верди?
11 Өлүмүндән габаг, садиг шаҝирдләри илә сон ҝөрүшү заманы Иса ајдын хәбәрдарлыг верди: Аллаһын севдији кәсләрә дүнја нифрәт едәҹәкдир. О деди: “Әҝәр дүнја сизә нифрәт едәрсә, билин ки, сиздән әввәл Мәнә нифрәт етмишдир. Әҝәр дүнјадан олсајдыныз, дүнја ондан оланы севәрди. Һалбуки дүнјадан дејилсиниз, Мән сизи дүнјадан сечдим; бунун үчүн дүнја сизә нифрәт едир. Мәним сизә сөјләдијим сөзү хатырлајын: “Гул ағасындан үстүн дејилдир”. Әҝәр Мәни тә’гиб етдиләрсә, сизи дә тә’гиб едәҹәкләр; әҝәр Мәним сөзүмә риајәт етдиләрсә, сизин дә сөзүнүзә риајәт едәҹәкләр” (Јәһја 15:18-20).
12. а) Иса Мәсиһ өз шаҝирдләрини нәјә ҝөрә хәбәрдар етди ки, дүнја онлара нифрәт едәҹәкдир? б) Мәсиһин өлүмүнүн Хатирә Ҝеҹәсинин јахынлашмасы илә әлагәдар һәр биримиз нә һагда дүшүнмәлијик?
12 Иса бу хәбәрдарлығы 11 һәварисинә, еләҹә дә һәгиги давамчыларына она ҝөрә верди ки, онлар, дүнја тәрәфиндән ҝөстәрилән нифрәтлә гаршылашаркән руһдан дүшүб, мәғлуб олмасынлар. О әлавә етди: “Јолдан азмајасыныз дејә сизә бунлары сөјләдим. Сизи синагоглардан говаҹаглар; һәтта елә саат ҝәлир ки, сизи өлдүрән һәр адам, Аллаһа хидмәт етдијини санаҹагдыр. Вә бу шејләри едәҹәкләр, чүнки нә Атаны, нә дә Мәни таныдылар” (Јәһја 16:1-3). Мүгәддәс Китаба даир бир лүғәтә әсасән, “јолдан азмаг” кими тәрҹүмә олунан фе’л формасы, “инсанда шүбһә јаратмаг вә ону, е’тибар едәҹәји вә табе олаҹағы кәсдән үз дөндәрмәјә тәһрик етмәк; әлагәни кәсмәк” мә’насыны билдирир. Мәсиһин өлүмүнүн Хатирә Ҝеҹәсинин јахынлашмасы илә әлагәдар һәр биримиз, кечмишдәки вә буҝүнкү садиг мәсиһчиләрин һәјаты барәдә дәриндән дүшүнмәли, сынагларда ҝөстәрдикләри мәрдлији тәглид етмәлијик. Гој һеч бир әзијјәт вә ја тә’гибләр сизи Јеһовадан вә Иса Мәсиһдән үз дөндәрмәјә тәһрик етмәсин; онлара е’тибар етмәјә вә табе олмаға гәти гәрарлы олун.
13. Атасына етдији дуасында Иса Мәсиһ өз давамчылары үчүн нәји хаһиш етди?
13 Иса, Јерусәлимдә үст отагда ахырынҹы дәфә дуа едәркән, Атасына деди: “Мән онлара Сәнин сөзүнү вердим вә дүнја онлара нифрәт ејләди; чүнки Мән дүнјадан олмадығым кими, онлар да дүнјадан дејилләр. Мән хаһиш етмирәм ки, Сән онлары дүнјадан ҝөтүрәсән. Хаһиш едирәм ки, онлары шәрдән горујасан. Мән дүнјадан олмадығым кими, онлар да дүнјадан дејилләр” (Јәһја 17:14-16). Биз әмин ола биләрик ки, Јеһова севдији кәсләри горујур вә дүнјадан олмамаг ҹәһдләриндә онлары мөһкәмләндирир (Ишаја 40:29-31).
Атанын вә Оғулун мәһәббәтиндә галын
14, 15. а) Иса Мәсиһ өзүнү нә илә мүгајисә етди вә она зидд олан ҹыр асма кими тәмсил едирди? б) “Һәгиги мејнәнин” будаглары кимләрдир?
14 Нисанын 14-дә садиг шаҝирдләри илә етдији сәмими сөһбәти заманы Иса Мәсиһ, ҹыр мејнәјә, јә’ни вәфасыз Исраилә зидд олараг, өзүнү “һәгиги Мејнә” илә мүгајисә едиб деди: “Мән һәгиги Мејнәјәм, Атам да Бағбандыр” (Јәһја 15:1). Бир нечә әср әввәл Јеремја пејғәмбәр, Јеһованын өз дөнүк халгына дедији сөзләри јазмышды: “Мән сәни ә’ла асма... олараг әкмишдим... мәнә әҹнәби бир асманын азман чубугларына неҹә дөндүн?” (Јеремја 2:21). Һошеа пејғәмбәр исә јазырды: “Исраил јајылан [“ҹырлашан”, ЈД] бир асмадыр, мејвәсини верир... Онларын үрәји бөлүндү” (Һошеа 10:1, 2).
15 Һәгиги ибадәтин сәмәрәсини вермәк әвәзинә, Исраил өзү үчүн сәмәрә верәрәк, дөнүклүјә дүчар олду. Садиг һәвариләри илә сон ҝөрүшүндән үч ҝүн габаг, Иса Мәсиһ икиүзлү јәһуди рәһбәрләринә деди: “Сизә дејирәм ки, Аллаһын Падшаһлығы сиздән алыныб, Онун мејвәләрини јетишдирәҹәк бир милләтә вериләҹәкдир” (Матта 21:43, И-93). 144 000 мәсһ едилмиш мәсиһчиләрдән ибарәт олан бу јени халг - “Аллаһын Исраили” - Иса Мәсиһин “һәгиги мејнәсинин” будаглары илә мүгајисә едилир (Галатијалылара 6:16; Јәһја 15:5; Вәһј 14:1, 3).
16. Иса Мәсиһ 11 садиг һәварисини нәјә дә’вәт етди вә сонун вахтында садиг галыг һаггында нә демәк олар?
16 Иса Мәсиһ, онунла үст отаға топлашан 11 һәварисинә деди: “Сиз Мәндә галын вә Мән сиздә. Будаг мејнәдә галмаса, өзлүјүндә мәһсул верә билмәдији кими, сиз дә беләҹә, Мәндә галмасаныз, мәһсул верә билмәзсиниз” (Јәһја 15:2, 4). Јеһованын халгынын мүасир тарихи ҝөстәрир ки, мәсһ едилмиш мәсиһчиләрин садиг галыглары, онларын Башы олан Иса Мәсиһдә галыблар (Ефеслиләрә 5:23). Онлар јол вердиләр ки, Јеһова өз “үзүм бағыны” тәмизләјиб, будасын (Малаки 3:2, 3). Онлар 1919-ҹу илдән е’тибарән Падшаһлығын сәмәрәсини боллугла вермәјә башладылар: буну әввәлҹә мәсһ едилмиш мәсиһчиләр, 1935-ҹи илдән исә, онларын һәмкарлары олан вә ҝүнү-ҝүндән чохалан “бөјүк... издиһам” етди (Вәһј 7:9; Ишаја 60:4, 8-11).
17, 18. а) Иса Мәсиһин һансы сөзләри, Јеһованын мәһәббәтиндә галмагда мәсһ едилмишләрә вә “башга гојунлара” көмәк едир? б) Мәсиһин өлүмүнүн Хатирә Ҝеҹәсиндә иштирак етмәк бизә неҹә көмәк едәҹәк?
17 Иса Мәсиһин нөвбәти сөзләри мәсһ едилмишләрин һамысына вә онларын һәмкарларына аиддир: “Атам чох мәһсул вермәнизлә иззәтләнир; беләликлә Мәним шаҝирдләрим олаҹагсыныз. Атам Мәни севдији кими, Мән дә сизи севдим; Мәним мәһәббәтимдә галын. Мән Атамын әмрләрини јеринә јетириб Онун мәһәббәтиндә галырам. Әҝәр сиз дә Мәним әмрләрими јеринә јетирсәниз, Мәним мәһәббәтимдә галаҹагсыныз” (Јәһја 15:8-10).
18 Биз һамымыз Аллаһын мәһәббәтиндә галмаг истәјирик, бу исә бизи, мәсиһчи кејфијјәтләрини һасил етмәјә тәшвиг едир. Буна ҝөрә дә биз, “Падшаһлыг һаггында олан” хош хәбәри тәблиғ етмәјин бүтүн имканларындан истифадә едирик (Матта 24:14, И-93). Һәмчинин, һәјатымызда руһун сәмәрәсини тәзаһүр етдирмәк үчүн дә әлимиздән ҝәләни едирик (Галатијалылара 5:22, 23). Мәсиһин өлүмүнүн Хатирә Ҝеҹәсиндә иштирак етмәк, бу ишдә гәрарымызы мөһкәмләдәҹәк, һәмчинин Аллаһын вә Мәсиһин бизә олан бөјүк мәһәббәтини хатырладаҹагдыр (2 Коринфлиләрә 5:14, 15).
19. Нөвбәти мәгаләдә һансы көмәкдән бәһс олунаҹагдыр?
19 Рәббин Хатирә Ҝеҹәсини тә’сис етдикдән сонра, Иса вә’д етди ки, Атасы онун садиг давамчыларына “Тәсәлливериҹи, Мүгәддәс Руһ” ҝөндәрәҹәкдир (Јәһја 14:26). Нөвбәти мәгаләдә бу руһун, мәсһ едилмишләрә вә “башга гојунлара” Јеһованын мәһәббәтиндә галмаг үчүн неҹә көмәк етдији мүзакирә олунаҹагдыр.
[Һашијәләр]
a Мүгәддәс Китаб әсасындакы һесабламалара ҝөрә, 2002-ҹи илдә нисан ајынын 14-ү, мартын 28-дә Чәршәнбә ахшамы, ҝүнүн батмасы илә башланаҹаг. Һәмин ахшам бүтүн дүнјада Јеһованын Шаһидләри Рәбб Иса Мәсиһин өлдүјү ҝүнү гејд етмәк үчүн топлашаҹаглар.
b Јеһованын Шаһидләри тәрәфиндән нәшр едилән “Јеһованын Шаһидләри - Аллаһын Падшаһлығынын мүждәчиләри” адлы китабын (инҝ.) 19 вә 32-ҹи фәсилләринә бахын.
Тәкрар үчүн суаллар
• Иса Мәсиһ, мәһәббәтлә хидмәт етмәјә даир өз шаҝирдләринә һансы практики дәрси верди?
• Мәсиһин өлүмүнүн Хатирә Ҝеҹәси илә әлагәдар өзүмүзү һансы мә’нада јохламалыјыг?
• Дүнја тәрәфиндән нифрәт вә тә’гибләр олаҹағы барәдә Мәсиһин хәбәрдарлығы нәјә ҝөрә бизи бүдрәтмәли дејил?
• “Һәгиги мејнә” кими тәмсил едир? “Будаглар” кимләрдир вә онлардан нә ҝөзләнир?
[5-ҹи сәһифәдәки шәкил]
Иса Мәсиһ, башгаларына мәһәббәтлә хидмәт етмәкдә һәвариләрә унудулмаз дәрс верди.
[6 вә 7-ҹи сәһифәләрдәки шәкилләр]
Мәсиһин шаҝирдләри, фәдакар мәһәббәт ҝөстәрмәклә она табе олурлар.