Јеһова һәгигәт Аллаһыдыр
“Ја Рәбб, һәгигәт Аллаһы, мәни гуртардын” (МӘЗМУР 31:5).
1. Јалан мөвҹуд олмајан вахт ҝөјдә вә јердә һансы шәраит һөкм сүрүрдү?
БИР ЗАМАНЛАР јалан гәтијјән мөвҹуд дејилди. Ҝөзәҝөрүнмәз тәбәгәдә Јараданлары олан ‘һәгигәт Аллаһына’ хидмәт едән камил руһани варлыглар мәскунлашмышдылар (Мәзмур 31:5). Јалан вә сахтакарлыг јох иди. Јеһова Өзүнүн руһани оғулларына јалныз доғру мә’лумат верирди. Буну она ҝөрә едирди ки, онлары севир вә рифаһлары илә дәриндән марагланырды. Јер үзүндәки вәзијјәт дә ејни ҹүр иди. Јеһова илк киши илә гадыны јаратды вә тә’јин етдији канал васитәсилә онларла һәмишә ачыг, сәмими вә дүрүст сөһбәт едирди. Еһтимал ки, бу олдугҹа ҝөзәл иди!
2. Јалана илк дәфә әл атан ким олмушдур вә нәјә ҝөрә?
2 Лакин нәтиҹәдә Аллаһын руһани оғулларындан бири аллаһ олмаг истәјәрәк, тәкәббүрлә Она гаршы чыхды. Шејтан вә Иблис кими танынан бу руһани варлыг, башгаларынын она ибадәт етмәләрини истәјирди. Иблис, инсанлары өз нәзарәти алтында сахламаг нијјәтилә јалана әл атан илк шәхсијјәт олду. Беләликлә дә о, ‘јаланчы вә јаланын атасы’ олду (Јәһја 8:44).
3. Адәм вә Һәвва Шејтанын јаланына неҹә реаксија ҝөстәрдиләр вә бу нә илә нәтиҹәләнди?
3 Шејтан иланын васитәсилә илк гадын олан Һәвваја сөјләди ки, әҝәр Аллаһын әмринә е’тинасыз јанашыб, гадаған олунмуш мејвәни јејәрсә өлмәјәҹәк. Бу јалан иди. О, бундан әлавә ону да деди ки, Һәвва мејвәни јејәрәк хејир вә шәри билән Аллаһ кими олаҹаг. Бу да јалан иди. Бу вахта гәдәр Һәвваја һеч заман јалан сөјләмәсәләр дә, о, баша дүшүрдү ки, иланын сөзләри Аллаһын онун әри Адәмә дедикләринә зидд ҝедир. Јенә дә о, Јеһоваја дејил, Шејтана инанмағы үстүн тутду. Бүтүнлүклә јалана тәслим олараг мејвәни ҝөтүрдү вә једи. Бир гәдәр сонра һәмин мејвәдән Адәм дә једи (Тәквин 3:1-6). Һәвва кими, Адәм дә һеч заман јалан ешитмәмишди, лакин Һәввадан фәргли олараг о, алдадылмамышды (1 Тимотејә 2:14). О, һәрәкәтләри илә Јараданыны рәдд етдијини ҝөстәрди. Бу һәрәкәтин сону бәшәр аиләси үчүн фәлакәтли олду. Адәмин итаәтсизлији уҹбатындан ҝүнаһ вә өлүм, өзү илә чүрүклүк вә сајсыз-һесабсыз изтираблар ҝәтирәрәк, онун бүтүн нәслинә кечди (Ромалылара 5:12).
4. а) Еден бағында сөјләнән јаланын мәғзи нәдән ибарәт иди? б) Шејтан бизи алдатмасын дејә нә етмәлијик?
4 Јалан јајылмаға башлады. Биз дәрк етмәлијик ки, Еден бағында сөјләнән јалан Јеһованын дүзҝүнлүјүнә хәләл ҝәтирди. Шејтан иддиа едирди ки, Аллаһ јалан данышараг илк инсан ҹүтүнү нә исә јахшы бир шејдән мәһрум етмишдир. Бу, шүбһәсиз ки, белә дејилди. Итаәтсизлик Адәм вә Һәвваја һеч бир фајда ҝәтирмәди. Јеһованын дедији кими, онлар өлдүләр. Буна бахмајараг, Шејтан Јеһоваја бөһтан атмаға давам едирди, јүзилликләр кечдикдән сонра исә һәвари Јәһја Аллаһдан илһам алараг Шејтанын ‘бүтүн дүнјаны алдатдығыны’ јазды (Вәһј 12:9). Шејтан Иблис бизи алдатмасын дејә, биз Јеһованын вә Онун Кәламынын доғрулуғуна бүтүнлүклә инанмалыјыг. Сән Јеһоваја олан е’тибарыны инкишаф етдириб мөһкәмләндирмәк, һәмчинин Онун Дүшмәнинин јалан вә фырылдағындан өзүнү горумаг үчүн нә едә биләрсән?
Јеһова һәгигәти билир
5, 6. а) Јеһова һансы биликләрә маликдир? б) Аллаһын билији илә мүгајисәдә инсанларын билији барәдә нә демәк олар?
5 Мүгәддәс Китаб дәфәләрлә Јеһова һаггында “һәр шеји јарадан” шәхс кими бәһс едир (Ефеслиләрә 3:9). О, “ҝөјү, јери, дәнизи вә онларын ичиндәки һәр шеји” Јарадандыр (Һәвариләрин ишләри 4:24). Бир Јарадан кими Јеһова һәр шеј һаггында һәгигәти билир. Мәсәлән, евини ахырынҹы деталына кими лајиһәләшдирән, сонра исә әввәлдән ахыраҹан ону өзү тикән адам һаггында нә демәк олар? О, өз евини беш бармағы кими таныјаҹаг вә бу евә аид һәр бир шеји кәнар адамлардан даһа јахшы биләҹәк. Бәли, инсанлар өз әлләри илә јаратдыглары шејләр барәдә һәр шеји билирләр. Буна бәнзәр тәрздә, Јарадан да Өз јаратдыглары һагда һәр шеји билир.
6 Ишаја пејғәмбәр Јеһованын билијинин нә гәдәр ҝениш олдуғуну чох ҝөзәл тәсвир етмишдир. Биз охујуруг: “Овҹунун чухуру ичиндә сулары өлчән вә гарышла ҝөјләри өлчән вә јерин торпағыны өлчү ичинә сығдыран вә дағлары јајлы әл тәрәзисилә вә тәпәләри тәрәзи илә чәкән кимдир? Рәббин Руһуна өлчү гојан вә өјүдчүсү олуб она өјрәдән кимдир? Данышдығы адам, она анлајыш верән вә әдаләт јолунда она дәрс верән вә она билҝи өјрәдән вә анлајыш јолуну она билдирән кимдир?” (Ишаја 40:12-14). Доғрудан да, Јеһова ‘билҝи Аллаһыдыр’ вә ‘билҝидә камилдир’ (1 Самуел 2:3; Ејуб 36:4; 37:16). Онунла мүгајисәдә биз неҹә дә аз билирик! Инсан нәсли тәрәфиндән топланмыш дәрин тәәссүрат доғуран биликләрә бахмајараг, бизим мадди јарадылыш барәдәки анлајышымыз Онун “јолларынын анҹаг кәнарларыдыр”. Бу, Аллаһын “әзәмәтинин ҝурултусу” илә мүгајисәдә јалныз “кичик бир фысылтыдыр” (Ејуб 26:14).
7. Јеһованын билијинә даир Давуд нәји е’тираф едирди вә буну нәзәрә алараг биз нәји е’тираф етмәлијик?
7 Јараданымыз олдуғу үчүн Јеһова бизи даһа јахшы таныјыр. Давуд падшаһ буну е’тираф едиб дејирди: “Ја Рәбб, мәни сынадын вә билдин. Отурушуму вә дурушуму сән биләрсән; дүшүнҹәми узагдан анларсан. Јолуму вә јатдығым јери ајырд едәрсән вә бүтүн јоларымы јахшы биләрсән. Чүнки дилимдә бир сөз јох икән, будур, ја Рәбб, сән ону тамамән биләрсән” (Мәзмур 139:1-4). Чох ҝүман ки, Давуд инсанларын ирадә азадлығына малик олдугларыны вә Аллаһын бизә, Она гулаг асыб-асмамағы сечмәк имканы вердијини баша дүшүрдү (Тәснијә 30:19, 20; Јешу 24:15). Бунунла белә, Јеһова бизи, бизим өзүмүздән јахшы таныјыр. О, бизә ән јахшы шејләри арзу едир вә јолларымыза истигамәт вермәјә гадирдир (Јеремја 10:23). Һеч бир мүәллим, експерт вә ја мәсләһәтчи бизә һәгигәти Јеһовадан јахшы өјрәдә билмәз вә бизи һикмәтли, јахуд хошбәхт едә билмәз.
Јеһова доғру Аллаһдыр
8. Јеһованын доғру Аллаһ олдуғуну һарадан билирик?
8 Бири вар ки, һәгигәти биләсән, бири дә вар ки, һәмишә һәгигәти сөјләјәсән, доғру оласан. Мисал үчүн, Иблис өз ирадәсилә “һәгигәтә бағлы галмады” (Јәһја 8:44). Онун әкси олараг, Јеһова “һәгигәти чох олан”дыр (Чыхыш 34:6). Мүгәддәс Јазылар дәфәләрлә Јеһованын доғру Аллаһ олдуғуна шаһидлик етмишдир. Һәвари Павел јазырды ки, “Аллаһын јалан данышмасы гејри-мүмкүн”дүр вә Јеһова “јалан данышмајан Аллаһ”дыр (Ибраниләрә 6:18; Титуса 1:2). Доғрулуг — Аллаһын шәхсијјәтинин зәрури һиссәсидир. Биз Јеһоваја бел бағлајыб, е’тибар едә биләрик, чүнки О, доғру Аллаһдыр; садиг хидмәтчиләрини һеч заман алдатмыр.
9. Јеһованын ады һәгигәт вә доғрулугла неҹә әлагәдардыр?
9 Јеһованын ады Онун доғру Аллаһ олдуғуна шаһидлик едир. Аллаһын ады — “олмасына сәбәб Олан” демәкдир. Бу ад Јеһованы, тәдриҹән бүтүн вә’дләринин Иҹрачысы кими таныдыр. Буну етмәјә башга һеч кәс гадир дејил. Јеһова Һагг-Тәала олдуғу үчүн, Онун ирадәсинин јеринә јетмәсинә һеч бир шеј мане ола билмәз. Јеһова доғру Аллаһ олмагла бәрабәр, Өзүнүн бүтүн вә’дләрини јеринә јетирмәк үчүн зәрури олан гүдрәтә вә һикмәтә малик јеҝанә Шәхсдир.
10. а) Јешу Јеһованын доғрулуғунун шаһиди неҹә олду? б) Сиз Јеһованын һансы пејғәмбәрликләринин иҹрасыны мүшаһидә етмисиниз?
10 Јешу, Јеһованын доғру Аллаһ олдуғуну тәсдиг едән валеһедиҹи һадисәләрин чохсајлы шаһидләриндән бири олмушдур. Јеһова мисирлиләр үзәринә габагҹадан сөјләдији он бәланы ҝөндәрәндә, Јешу Мисирдә иди. Башга шејләрлә јанашы Јешу, Јеһованын Өз вә’дләрини јеринә јетирәрәк исраиллиләри Мисирдән азад етдијини вә мүгавимәт ҝөстәрән ҝүҹлү Кән’ан гошунлары үзәриндә онлара гәләбә газандырараг, Вә’д едилән дијара дахил етдијини ҝөрмүшдүр. Јешу өмрүнүн сонуна јахын Исраил ағсаггалларына демишдир: “Бүтүн үрәкләриниздә вә бүтүн ҹанларынызда билирсиниз ки, Аллаһыныз Рәббин һаггынызда сөјләдији бүтүн јахшы шејләрдән һеч бир шеј боша чыхмады; сизин үчүн һамысы олду, ондан һеч бир шеј боша чыхмады” (Јешу 23:14). Сән Јешунун ҝөрдүјү мө’ҹүзәләри ҝөрмәсән дә, Јеһованын сәнин һәјатын боју јеринә јетән вә’дләринин доғрулуғуну тәсдиг едә биләрсәнми?
Јеһова һәгигәти ашкар едир
11. Јеһованын инсанларла һәгигәти бөлүшмәк истәдији нәдән ҝөрүнүр?
11 Ҝениш билијә малик олан, лакин ушаглары илә надир һалларда сөһбәт едән валидејнләри тәсәввүр ет. Мәҝәр Јеһованын бу ҹүр олмадығына ҝөрә миннәтдар дејилсәнми? Мәһәббәтлә тәшвиг олунараг Јеһова биликләрини инсанларла сәхавәтлә бөлүшүр. О, Мүгәддәс Јазыларда “Даһи Тә’лиматчы” (ЈД) адланыр (Ишаја 30:20). Севҝи долу инајәтә малик олдуғу үчүн, Она гулаг асмаға мејлли олмајан инсанларла белә үнсијјәт сахламаға һазырдыр. Мәсәлән, Јеһова Һезекиели, гулаг асмајаҹагларыны әввәлҹәдән билдији инсанлара тәблиғ етмәјә ҝөндәрди. Јеһова деди: “Адәм оғлу, һајды, Исраил евинә ҝет вә сөзләрими онлара сөјлә”. Сонра хәбәрдарлыг етди: “Исраил еви сәни динләмәк истәмәјәҹәк; чүнки мәни динләмәк истәмирләр; чүнки бүтүн Исраил евинин алны гаты вә үрәји сәртдир”. Бу чәтин тапшырыг иди, лакин Һезекиел Јеһованын мәрһәмәтини әкс етдирәрәк, бу тапшырығы сәдагәтлә јеринә јетирди. Әҝәр сән тәблиғ хидмәтиндә чәтинликләрлә гаршылашаркән Аллаһа ҝүвәнирсәнсә, әмин ол ки, О, сәни пејғәмбәри Һезекиели мөһкәмләтдији кими, мөһкәмләндирәҹәк (Һезекиел 3:4, 7-9).
12, 13. Аллаһ һәгигәти инсанлара неҹә чатдырыр?
12 Јеһова арзу едир ки, “бүтүн инсанлар хилас олуб, һәгигәти дәрк етсинләр” (1 Тимотејә 2:4). О, пејғәмбәрләри, мәләкләри вә һәтта севимли Оғлу Иса Мәсиһ васитәсилә дә данышмышдыр (Ибраниләрә 1:1, 2; 2:2). Иса Пилата демишдир: “Мән бунун үчүн доғулмушам вә бунун үчүн дүнјаја ҝәлмишәм ки, һәгигәтә шәһадәт едим. Һәгигәт тәрәфдары олан һәр кәс Мәним сәсими ешидир”. Пилат, Јеһованын инсанларын хиласы үчүн нәзәрдә тутдуғу нијјәти барәдәки һәгигәти бирбаша Аллаһын Оғлундан ешитмәк кими гијмәтли имкана малик иди. Лакин Пилат һәгигәт тәрәфдары дејилди вә Исадан өјрәнмәк арзусу да јох иди. Бунун әвәзинә Пилат абырсызҹасына сорушду: “Һәгигәт нәдир?” (Јәһја 18:37, 38). Неҹә дә аҹынаҹаглы һалдыр! Буна бахмајараг, Исанын тәблиғ етдији һәгигәтә чохлары гулаг асырдылар. О, өз шаҝирдләринә деди: “Сизин... ҝөзләриниз нә бәхтијардыр, чүнки ҝөрүрләр; гулагларыныз да, чүнки ешидирләр” (Матта 13:16).
13 Јеһова һәгигәти Мүгәддәс Китабда горујуб сахламыш вә ону бүтүн дүнјадакы инсанлар үчүн әлчатан етмишдир. Мүгәддәс Китаб бизә һәр шеји олдуғу кими ашкар едир. О, Аллаһын хүсусијјәтләрини, нијјәтләрини вә әмрләрини, о ҹүмләдән дүнјадакы шејләрин һәгиги вәзијјәтини тәсвир едир. Иса дуасында Јеһоваја деди: “Сәнин сөзүн һәгигәтдир” (Јәһја 17:17). Бу, Мүгәддәс Китабы надир китаб едир. Јалныз о һәр шеји билән Аллаһын илһамы алтында јазылмышдыр (2 Тимотејә 3:16). Мүгәддәс Китаб Аллаһын инсанлара олан гијмәтли һәдијјәсидир вә Аллаһын хидмәтчиләри ону хәзинә кими гијмәтләндирирләр. Биз ону һәр ҝүн охујуругса, мүдрик давранырыг.
Һәгигәтдән мөһкәм јапышын
14. Јеһова нә едәҹәјини вә’д едир вә Она нәјә ҝөрә инанмалыјыг?
14 Јеһованын бизә Өз Кәламында дедикләринә ҹидди јанашмалыјыг. О, һәгигәтән дә Өзүнү тәсвир етдији кимидир вә һәгигәтән дә вә’дләрини јеринә јетирәҹәкдир. Јеһоваја е’тибар етмәк үчүн там әсасымыз вар. Биз инана биләрик ки, Јеһова Өзүнүн дедији кими һәгигәтән дә “Аллаһы танымајан вә Рәббимиз Иса барәсиндәки Мүждәјә итаәт етмәјәнләрә ҹәза верәҹәкдир” (2 Салониклиләрә 1:8). Һәм дә һәгигәт јолунда јеријәнләри севдијини, иман ҝәтирәнләрә әбәди һәјат верәҹәјини вә ағрыны, ҝөз јашыны вә һәтта өлүмү арадан галдыраҹағыны сөјләјәндә дә Јеһованын сөзләринә инана биләрик. Јеһова бу вә’дләрин е’тибарлы олдуғуну вурғулајараг, һәвари Јәһјаја тапшырды: “Јаз, чүнки бу сөзләр һәгиги вә е’тимада лајигдир” (Вәһј 21:4, 5; Сүлејманын мәсәлләри 15:9; Јәһја 3:36).
15. Шејтан инсанлара һансы јалан тәсәввүрләри ашыламаға чалышыр?
15 Шејтан — Јеһованын там әксидир. Һәгигәти сөјләмәк әвәзинә, јалан данышыр. Өз мәгсәдинә наил олмаға, инсанлары тәмиз ибадәтдән дөндәрмәјә чалышараг чох вахт јалана әл атыр. Мәсәлән, Шејтан бизи инандырмаг истәјәрди ки, Аллаһ јер үзүндәки изтираблара е’тинасыз јанашыр вә һеч бир тәдбир ҝөрмүр. Лакин Мүгәддәс Китаб ҝөстәрир ки, Јеһова Өз јаратдыгларына һеч дә е’тинасыз јанашмыр: О, пислијә нифрәт едир вә онун ҝәтирдији изтираблары мүһакимә едир (Һәвариләрин ишләри 17:24-30). Шејтан һәм дә инсанлары инандырмаға чалышыр ки, руһани ишләрлә мәшғул олмаг — вахты бош јерә итирмәк демәкдир. Мүгәддәс Јазылар исә әксинә олараг бизи инандырыр: “Аллаһ һагсыз дејилдир ки, сизин... Онун ады наминә ҝөстәрдијиниз мәһәббәти унутсун”. Үстәлик ајдын изаһ едир ки, Аллаһ “Ону ахтаранлара мүкафат верир” (Ибраниләрә 6:10; 11:6).
16. Мәсиһчиләр нәјә ҝөрә ојаг галмалы вә һәгигәтдән мөһкәм јапышмалыдырлар?
16 Һәвари Павел Шејтан һаггында јазырды: “Бу әсрин танрысы имансызларын зеһинләрини кор етмишдир ки, ҝөрүнмәз Аллаһын сурәти олан Мәсиһин иззәти һаггындакы Мүждәнин нуру онлары ајдынлатмасын” (2 Коринфлиләрә 4:4). Һәвваја бәнзәр тәрздә бә’зиләри Шејтан Иблисин јаланына тамамилә тәслим олмушлар. Диҝәрләри, алдадылмајан, лакин биләрәкдән итаәтсизлик јолуну сечән Адәмин изләри илә ҝедирләр (Јәһуда 5, 11). Буна ҝөрә дә мәсиһчиләрин ојаг галыб, һәгигәтдән мөһкәм јапышмалары ваҹибдир.
Јеһова “ријасыз иман” тәләб едир
17. Јеһованын лүтфүнә малик олмаг үчүн нә етмәлијик?
17 Јеһова бүтүн јолларында доғру Аллаһ олдуғу үчүн, хидмәтчиләриндән дә бу ҹүр олмаларыны ҝөзләјир. Мәзмурчу јазырды: “Ја Рәбб, чадырында ким галаҹаг? Мүгәддәс дағында ким отураҹаг? Камал илә јеријән вә салеһ иш ҝөрән вә үрәјиндән һәгигәти сөјләјән” (Мәзмур 15:1, 2). Јеһованын мүгәддәс дағ һаггындакы хатырлатмалары бу мәзмуру охујан јәһудиләрә, шүбһәсиз ки, Давудун чадыр салараг әһд сандығыны көчүрдүјү Сион дағыны хатырладырды (2 Самуел 6:12, 17). Дағ вә чадыр, Јеһованын символик мә’нада мәскун олдуғу јер кими хидмәт едирди. Орада инсанлар Аллаһа јахынлашыб, лүтф етмәси барәдә Она јалвара биләрдиләр.
18. а) Аллаһын досту олмаг үчүн нә тәләб олунур? б) Нөвбәти мәгаләдә нә мүзакирә едиләҹәк?
18 Аллаһын досту олмаг истәјән һәр бир кәс, јалныз дилдә дејил, ‘үрәјиндән һәгигәти сөјләмәлидир’. Аллаһын әсл достлары үрәкләриндә доғру олмалы вә “ријасыз имана” малик олмалыдырлар, чүнки доғрулуг үрәкдән изһар олур (1 Тимотејә 1:5; Матта 12:34, 35). Аллаһын досту икиүзлү вә ја јаланчы олмалы дејил, чүнки “һијләҝәр адамдан Рәбб икраһ едәр” (Мәзмур 5:6). Бүтүн дүнјада јашајан Јеһованын Шаһидләри өз Аллаһларыны тәглид етмәјә вә доғру олмаға чалышырлар. Бу барәдә нөвбәти мәгаләдә бәһс едиләҹәк.
Сиз неҹә ҹаваб верәрдиниз?
• Нәјә ҝөрә Јеһова һәр шеј һаггында һәгигәти билир?
• Јеһованын доғру Аллаһ олдуғу нәдән ҝөрүнүр?
• Јеһова һәгигәти неҹә ашкар едир?
• Биздән һәгигәтә һансы нөгтеји-нәзәрлә јанашмаг тәләб олунур?
[21-ҹи сәһифәдәки шәкилләр]
Һәгигәт Аллаһы јаратдыглары барәдә һәр шеји билир.
[23-ҹү сәһифәдәки шәкилләр]
Јеһованын вә’дләри јеринә јетәҹәк.