Фидјә бизи неҹә хилас едә биләр?
«Оғула иман едәнин әбәди һәјаты вардыр; лакин Оғула итаәт етмәјән, һәјат ҝөрмәјәҹәкдир, Аллаһын гәзәби онун үзәриндә галаҹагдыр» (ЈӘҺ. 3:36).
1, 2. «Сион Ҝөзәтчи Гүлләси»нин нәшр едилмәсиндә әсас мәгсәд нә иди?
«МҮГӘДДӘС КИТАБЫ сәјлә арашдыран һәр бир кәс Исанын өлүмүнүн нәјә ҝөрә ваҹиб олдуғуну чох јахшы баша дүшүр», — дејә бу журналын дөрдүнҹү, 1879-ҹу ил октјабр сајында вурғуланырды. Һәмин мәгалә белә бир ҹидди фикирлә тамамланырды: «Ҝәлин еһтијатлы олаг ки, ҝүнаһы өртән барышыг гурбаны кими Иса Мәсиһин өлүмүнүн дәјәрини азалдан вә ја әһәмијјәтсиз едән шејләр бизә һеч вахт өз тәсирини ҝөстәрмәсин». (1 Јәһја 2:1, 2 ајәләрини оху.)
2 «Сион Ҝөзәтчи Гүлләси» 1879-ҹу илин ијул ајында чыхмаға башлајыб. Елә онун әсас мәгсәдләриндән бири дә Мүгәддәс Китабын фидјә гурбанлығы һаггында тәлимини мүдафиә етмәк иди. 1800-ҹү илләрин сонларына јахын Исанын өлүмүнүн бизим ҝүнаһларымыз үчүн неҹә фидјә ола биләҹәјинә даир шүбһә едән инсанларын сајы ҝетдикҹә артырды. Буна ҝөрә дә, бу журналын сәһифәләриндә тәгдим олунан руһани гида һәгигәтән дә «вахтлы-вахтында» иди (Мат. 24:45). О вахтлар чохлары инсанын камиллијини итирдијини инкар едән тәкамүл нәзәријјәсинин гурбанына чеврилмишдиләр. Тәкамүлчүләр өјрәдирләр ки, инсан тәбии шәкилдә инкишаф мәрһәләси кечир вә буна ҝөрә дә, онун һеч бир фидјәјә еһтијаҹы јохдур. Бу јердә һәвари Павелин Тимотејә вердији мәсләһәт неҹә дә јеринә дүшүр: «Сәнә һәвалә едилмиш әманәти һифз ет, Аллаһа мәкруһ олан бошбоғазлыг вә јалан јерә “елм” адлананын бир-биринә зидд фикирләриндән гачын. Бәзиләри бу “елмә” саһиб олдугларыны иддиа едәрәк, иман јолундан аздылар» (1 Тим. 6:20, 21).
3. Бу мәгаләдә биз һансы суаллары арашдыраҹағыг?
3 Әлбәттә, шүбһә јохдур ки, сән «иман јолундан» дөнмәмәк гәтијјәтиндәсән. Амма јенә дә, иманымызы даһа да мөһкәмләндирмәк үчүн ҝәлин нөвбәти суаллары арашдыраг: нә үчүн мәним фидјәјә еһтијаҹым вар? Бу фидјә нәјин баһасына баша ҝәлиб? Вә Аллаһын гәзәбинә туш ҝәлмәмәк үчүн бу гијмәтли әнамдан неҹә јарарлана биләрәм?
Аллаһын гәзәбиндән хилас олмаг мүмкүндүр
4, 5. Һарадан билирик ки, Аллаһ дүнјаја гаршы гәзәблидир?
4 Мүгәддәс Китаб вә тарихи фактлар ҝөстәрир ки, Адәмин ҝүнаһы уҹбатындан Аллаһ бәшәријјәтә гәзәблидир (Јәһ. 3:36). Һәлә һеч бир инсанын өлүмдән јаха гуртара билмәмәси буну ајдын ҝөстәрир. Шејтанын һөкмранлығы бәшәријјәти бәлалардан азад етмәк игтидарында дејил, еләҹә дә инсанларын гурдуғу һеч бир һөкумәт өз вәтәндашларынын садә еһтијаҹларыны белә тәмин едә билмир (1 Јәһ. 5:19). Буна ҝөрә дә, бәшәријјәти мүһарибәләр, ҹинајәткарлыг вә јохсуллуг өз ағушуна алыб.
5 Ајдындыр ки, бу пис дүнја Аллаһын хејир-дуасындан мәһрумдур. Чүнки Павелин сөзләринә ҝөрә, «инсанларын һәр ҹүр аллаһсызлыг вә һагсызлығына гаршы Аллаһын гәзәби ҝөјдән кәшф олунур» (Ром. 1:18—20). Буна ҝөрә дә, төвбә етмәдән аллаһсыз һәјат тәрзи сүрән инсанлар өз һәрәкәтләринин аҹы нәтиҹәләриндән һеч ҹүр јаха гуртара билмәјәҹәкләр. Бизим ҝүнләрдә Аллаһын гәзәби Шејтан дүнјасынын үзәринә бәла кими јағдырылан һөкм хәбәриндән ҝөрүнүр вә бу хәбәр Мүгәддәс Китаба әсасланан бир чох нәшрләримиз васитәсилә чатдырылыр (Вәһј 16:1).
6, 7. Мәсһ олунмушлар һансы тәшәббүсү ҝөстәрирләр вә бүтүн инсанлара һансы имкан верилиб?
6 Неҹә фикирләширсиниз, демәк олармы ки, Шејтанын һакимијјәти алтындан чыхыб Аллаһла барышмаг инсанлар үчүн артыг ҝеҹдир? Јох, һәлә дә Јеһова илә барышмаг үчүн имкан вар. Мәсиһин сәфирләри — мәсһ олунмуш мәсиһчиләр тәшәббүс ҝөстәрәрәк тәблиғ хидмәтиндә бүтүн халглардан олан инсанлары Аллаһла барышмаға чағырырлар (2 Кор. 5:20, 21).
7 Павел дејир ки, Иса «бизи ҝәләҹәк гәзәбдән хилас» едәҹәк (1 Салон. 1:10). Јеһованын гәзәби сон һәддинә чатанда бу, төвбә етмәјән ҝүнаһкарларын әбәди мәһви илә нәтиҹәләнәҹәк (2 Салон. 1:6—9). Бәс онда ким хилас олаҹаг? Мүгәддәс Китаб бу суала ҹаваб верир: «Оғула иман едәнин әбәди һәјаты вардыр; лакин Оғула итаәт етмәјән, һәјат ҝөрмәјәҹәкдир, Аллаһын гәзәби онун үзәриндә галаҹагдыр» (Јәһ. 3:36). Бәли, һал-һазырда Исаја вә онун фидјә гурбанлығына иман ҝәтирән инсанлар бу системин сонунҹу ҝүнүндә Аллаһын гәзәбинин аҹы нәтиҹәләриндән гуртула биләҹәкләр.
Фидјә неҹә тәтбиг олунур?
8. а) Адәмлә Һәвваны һансы ҝәләҹәк ҝөзләјирди? б) Јеһова әдаләтинин мүкәммәл олдуғуну неҹә ҝөстәрди?
8 Адәмлә Һәвва камил јарадылмышдылар. Әҝәр Аллаһа итаәт етсәјдиләр, инди онлар өвладлары илә бирликдә јерүзү Ҹәннәтдә шад-хүррәм өмүр сүрәрдиләр. Тәәссүф ки, улу валидејнләримиз биләрәкдән Аллаһын әмрини поздулар. Нәтиҹәдә онлар әбәди өлүмә мәһкум олараг ҹәннәт бағындан говулдулар. Адәмлә Һәвванын ушаглары оланда ҝүнаһ артыг бәшәријјәтә дахил олмушду вә ҝүнаһлы олдуглары үчүн илк киши илә гадын гоҹалыб өлдүләр. Бу ону ҝөстәрир ки, Јеһова сөзүнә садигдир. О һәмчинин камил әдаләт Аллаһыдыр. Јеһова Адәми хәбәрдар етмишди ки, гадаған олунмуш мејвәдән јесә, һөкмән өләҹәк — бу, белә дә олду.
9, 10. а) Адәмин өвладлары нәјә ҝөрә өлүрләр? б) Әбәди өлүмүн әлиндән ҹанымызы неҹә гуртара биләрик?
9 Адәмин нәсли олдуғумуз үчүн биз дә ҝүнаһа мејилли олан гејри-камил вә өлүмә мәһкум олунмуш бәдәни мирас алмышыг. Адәм биз дүнјаја ҝәлмәмишдән әввәл ҝүнаһ ишләтди. Буна ҝөрә дә өлүм һөкмү бизә дә аид иди. Әҝәр Јеһова фидјәни өдәмәдән өлүмү арадан галдырсајды, О, Өз сөзүнә садиг чыхмазды. Павелин дедији сөзләри һамымыза аид етмәк олар: «Билирик ки, Ганун руһанидир, мән исә ҹисманијәм, ҝүнаһа көлә кими сатылмышам. Нә заваллы адамам! Өлүмә апаран бу бәдәндән мәни ким хилас едәҹәк?» (Ром. 7:14, 24).
10 Әдаләтлә ҝүнаһларымызын бағышланмасына вә әбәди өлүм ҹәзасындан гуртулмамыза гануни әсасын олмасы үчүн тәдбири анҹаг Јеһова Аллаһ ҝөрә биләрди. Бунун үчүн Аллаһ Өз севимли Оғлуну јерә ҝөндәрди ки, һәјатыны бизә ҝөрә гурбан верә биләҹәк камил инсан кими доғулсун. Адәмдән фәргли олараг, Иса камиллијини итирмәди. Һәгигәтән дә, «О һеч бир ҝүнаһ ишләтмәди» (1 Пет. 2:22). Буна ҝөрә дә, Исанын камил бәшәријјәтин атасы олмаг имканы вар иди. Лакин бунун әвәзинә, о, Адәмин ҝүнаһлы өвладларыны өвладлыға ҝөтүрәрәк она иман едәнләрин әбәди һәјата наил олмаларына имкан јаратмаг үчүн Аллаһын дүшмәнләринин ону өлдүрмәсинә јол верди. «Чүнки Аллаһ бир вә Аллаһла инсанлар арасында олан Васитәчи дә бирдир; О, инсан олан Мәсиһ Исадыр. О Өзүнү һамы үчүн фидјә верди», — дејә 1 Тимотејә 2:5, 6 ајәләриндә изаһ олунур.
11. а) Фидјәнин бизә һансы фајда ҝәтирдијини нүмунә әсасында ҝөстәрин. б) Фидјә дүнјанын ҝүнаһыны нә дәрәҹәдә арадан галдырыр?
11 Ҝәлин бир нүмунәнин әсасында фидјәнин неҹә тәтбиг олундуғуну нәзәрдән кечирәк. Бүтүн пулларыны јатырдыглары банк тәрәфиндән алдадылараг борҹа дүшән инсанлары тәсәввүр един. Банк саһиби тутулур вә она узун мүддәтә һәбс ҹәзасы верилир. Бәс јахшы, мүфлис олмуш ҝүнаһсыз инсанларын вәзијјәти неҹә олаҹаг? Чарәсиз кими ҝөрүнән бу вәзијјәтдә јахшы вә варлы бир нәфәр банкы алараг инсанларын гојдуглары бүтүн әманәтләрини гајтарыр вә онлары борҹдан азад едир. Ејнилә Јеһова вә Онун севимли Оғлу улу атамыз Адәмин өвладларыны сатын алараг Исанын төкүлмүш ганы әсасында онлары ҝүнаһларындан азад едиб. Буна ҝөрә дә Вәфтизчи Јәһја демишди: «Будур, дүнјанын ҝүнаһыны арадан галдыран Аллаһ Гузусу!» (Јәһ. 1:29). Бурада дүнјанын ҝүнаһы дејилдикдә, тәкҹә јашајан инсанларын јох, һәмчинин өлән инсанларын да ҝүнаһларынын арадан галдырылмасы нәзәрдә тутулур.
Фидјә нәјин баһасына баша ҝәлиб?
12, 13. Ибраһимин Исһагы гурбан ҝәтирмәјә һазыр олмасындан нә өјрәнә биләрик?
12 Фидјәнин сәмави Атамыза вә Онун севимли Оғлуна нәјин баһасына баша ҝәлдијини сона гәдәр баша дүшмәк бизим үчүн гејри-мүмкүндүр. Лакин Мүгәддәс Китабда бунун үзәриндә дүшүнмәјимизә көмәк едән һадисәләр ҝәтирилир. Мәсәлән, Аллаһын: «Севдијин јеҝанә оғлун Исһагы ҝөтүр вә Морија торпағына ҝет. Орада сәнә ҝөстәрәҹәјим бир дағда оғлуну јандырма гурбаны олараг тәгдим ет» әмрини иҹра етмәк үчүн Моријаја үч ҝүн јол ҝедән заман Ибраһимин һансы һиссләри кечирдијини бир тәсәввүр един (Јар. 22:2—4).
13 Нәһајәт, Ибраһим тәјин олунмуш јерә ҝәлиб чатыр. Бир анлыға дүшүнүн: әл-голуну вә ајагларыны бағлајараг Исһагы өзүнүн дүзәлтдији гурбанҝаһа гојмасы, сонра исә ону өлдүрмәк үчүн бычағы һазырламасы Ибраһимә неҹә дә үрәк ағрысы верирди! Исһагын гурбанҝаһ үзәриндә ҝүҹлү вә кәскин ағры чәкәҹәјини дүшүнәрәк өлүмүнү ҝөзләјән заман һансы һиссләри кечирдијини тәсәввүрүнүзә ҝәтирин! Јеһованын мәләји Ибраһими вахтында сахлады. Ибраһим вә оғлу Исһагла баш верән бу һадисә Шејтанын әлалтылары тәрәфиндән Оғлунун гәтлә јетирилмәсинә јол вермәсинин Јеһоваја нәјин баһасына баша ҝәлдијини анламагда бизә көмәк едир. Ҝөрдүјүмүз кими, бу заман Исһаг Ибраһимә табе олду. Бу да ејнилә Исанын уғрумузда әзаб чәкәрәк өлүмә ҝетмәјә һазыр олдуғуну ајдын тәсвир едир (Ибр. 11:17—19).
14. Фидјәнин нәјин баһасына баша ҝәлдијини анламаг үчүн Јагубун һәјатындакы һадисә бизә неҹә көмәк едир?
14 Һәмчинин Јагубун һәјатында баш верән һадисә дә фидјәнин нәјин баһасына баша ҝәлдијини баша дүшмәјә көмәк едир. Јагуб оғулларындан ән чох Јусифи севирди. Тәәссүф ки, Јусифин гардашларынын она пахыллығы тутурду вә она нифрәтлә јанашырдылар. Бир дәфә атасы Јусифи гардашларынын јанына ҝөндәрир ки, онларын вәзијјәтиндән хәбәр тутсун. Һәмин вахт онлар јашадыглары Хеврондан тәхминән 100 километр шималда Јагубун сүрүләрини отарырдылар. Оғуллары Јусифин гана буланмыш палтарыны Јагубун јанына ҝәтирәндә онун кечирдији һиссләри тәсәввүрүнүзә ҝәтирин! «Бу, оғлумун палтарыдыр; јәгин ону вәһши бир һејван јејиб. Һәгигәтән, Јусиф парчаланыб», — дејә о, фәрјад едир. Бүтүн бунлар Јагуба чох пис тәсир ҝөстәрди; о узун мүддәт оғлу үчүн јас тутду (Јар. 37:33, 34). Јеһова јаранан вәзијјәтләрә гејри-камил инсанлар кими реаксија ҝөстәрмир. Лакин Јагубун һәјатында баш верән бу һадисә инсанларын Иса илә пис рәфтары вә јер үзүндә оланда гәддарлыгла өлдүрүлмәси заманы Јеһованын кечирдији һиссләри мүәјјән мәнада баша дүшмәјимизә көмәк едир.
Фидјә бизә һансы фајданы ҝәтирир?
15, 16. а) Фидјәни гәбул етдијини Јеһова неҹә ҝөстәрди? б) Фидјә сәнә һансы фајданы ҝәтирир?
15 Јеһова Аллаһ садиг Оғлуну гүдрәтли руһани шәхсијјәт кими дирилтди (1 Пет. 3:18). 40 ҝүн әрзиндә Иса шаҝирдләринин иманларыны мөһкәмләндирмәк вә ҝәләҹәк тәблиғ ишинә һазырламаг үчүн онлара ҝөрүнүрдү. Сонра о, ҝөјә галхараг ахыдылан ганынын дәјәрини Аллаһа тәгдим етди. Бу ахыдылан ганын дәјәри фидјә гурбанлығына иман ҝәтирән Исанын һәгиги давамчыларына тәтбиг олунаҹагды. Ерамызын 33-ҹү илинин Пентикост ҝүнүндә Јерусәлимдә јығышан шаҝирдләринин үзәринә Исанын васитәсилә мүгәддәс руһуну төкмәси ҝөстәрир ки, Јеһова онун фидјә гурбанлығыны гәбул етмишдир (Һәв. иш. 2:33).
16 Елә бу андан Исанын мәсһ олунмуш давамчылары инсанлары Аллаһын гәзәбиндән гача билмәләри үчүн ҝүнаһларынын бағышланмасынын рәмзи олараг Иса Мәсиһин исми илә вәфтиз олунмаға чағырырдылар. (Һәвариләрин ишләри 2:38—40 ајәләрини оху.) О тарихи ҝүндән бу ҝүнә гәдәр мүхтәлиф халглардан олан милјонларла инсанлар Исанын фидјә гурбанлығына иман ҝәтирмәјин сајәсиндә Аллаһла јахын мүнасибәтләр гура билмишләр (Јәһ. 6:44). Бу мәгамда биз даһа ики суалы да нәзәрдән кечирмәлијик: демәк олармы ки, әбәди һәјат үмиди бизә јахшы ишләримизә ҝөрә верилиб? Бәс биз бу үмиддән мәһрум ола биләрикми?
17. Аллаһын досту олмаг имканына неҹә јанашмалыјыг?
17 Әслинә галса, һеч бир инсан фидјә гурбанлығына лајиг дејил. Лакин фидјәјә иман ҝәтирмәклә милјонларла инсанлар Аллаһла достлуг мүнасибәтләри гурмушлар ки, бу да онлара јер үзү Ҹәннәтдә әбәди һәјат үмидини верир. Јеһова илә дост олмағымыз бизим Онунла даима белә мүнасибәтдә галаҹағымыза зәманәт вермир. Аллаһын ҝәләҹәк гәзәб ҝүнүндә хилас олмаг үчүн биз Иса Мәсиһин өдәдији фидјәјә ҝөрә һәмишә үрәкдән миннәтдар олмалыјыг. (Ром. 3:24; Филипилиләрә 2:12 ајәсини оху.)
Фидјәјә олан иманыны гору
18. Фидјәјә иман ҝәтирмәк өзүнә нәји дахил едир?
18 Мәгаләнин әсас ајәси, Јәһја 3:36 ајәси ҝөстәрир ки, Ағамыз Иса Мәсиһә иман ҝәтирмәк она итаәткар олмағы дахил едир. Фидјәјә ҝөрә миннәтдарлыг һисси бизи Исанын тәлимләринә, еләҹә дә әхлаг һаггында онун дедикләринә ујғун јашамаға тәшвиг етмәлидир (Марк 7:21—23). Ҹинси әхлагсызлыг, кобуд зарафат вә порнографијаја алудәчилији дә өзүнә дахил едән «һәр ҹүр» натәмизлик илә мәшғул олан вә төвбә етмәјән инсанларын үзәринә «Аллаһын гәзәби ҝәлир» (Ефес. 5:3—6).
19. Фидјәјә иман етдијимизи конкрет олараг неҹә ҝөстәрә биләрик?
19 Фидјәјә ҝөрә миннәтдарлыгдан ирәли ҝәләрәк биз даима «Аллаһа ихласкар бир һәјат» тәрзи сүрмәлијик (2 Пет. 3:11). Ҝәлин һәмишә мүнтәзәм вә үрәкдән дуа етмәјә, Мүгәддәс Китабы шәхсән өјрәнмәјә, ҝөрүшләрдә иштирак етмәјә, аиләви ибадәтә вә Падшаһлыг хәбәрини сәјлә тәблиғ етмәјә кифајәт гәдәр вахт ајыраг. Еләҹә дә һәр заман «јахшылыг етмәји» вә малымызы «башгалары илә бөлүшдүрмәји» јаддан чыхармајаг, «чүнки бу ҹүр гурбанлар Аллаһа мәгбулдур» (Ибр. 13:15, 16).
20. Фидјәјә иман едән инсанлары ҝәләҹәкдә һансы хејир-дуалар ҝөзләјир?
20 Бу пис дүнјанын үзәринә Јеһованын гәзәби ҝәләндә фидјәјә иман етдијимизә вә даима миннәтдарлыг тәзаһүр етдирдијимизә ҝөрә севинҹимиз јерә-ҝөрә сығмајаҹаг! Аллаһын бизи Өз гәзәбиндән гуртармаг үчүн ҝөрдүјү мөһтәшәм тәдбирләрә ҝөрә Онун вәд етдији јени дүнјада әбәдијјән миннәтдар олаҹағыг. (Јәһја 3:16; Вәһј 7:9, 10, 13, 14 ајәләрини оху.)
Неҹә ҹаваб верәрдиниз?
• Нәјә ҝөрә фидјәјә еһтијаҹ дујуруг?
• Фидјә нәјин баһасына баша ҝәлиб?
• Фидјә һансы фајданы ҝәтирир?
• Исанын фидјә гурбанлығына иман етдијимизи неҹә ҝөстәририк?
[13-ҹү сәһифәдәки шәкил]
Јеһова илә мүнасибәтләри бәрпа етмәк үчүн һәлә дә имкан вар
[15-ҹи сәһифәдәки шәкил]
Ибраһимлә, Исһагла вә Јагубла баш верән һадисәләр фидјәнин нәјин баһасына баша ҝәлдијини баша дүшмәјимизә көмәк едә биләр