Тәлим вермәк иши илә мәшғул ол

«СИЗ Мәнә “Мүәллим” вә “Рәбб” дејирсиниз вә доғру сөјләјирсиниз, она ҝөрә ки, Мән Ојам» (Јәһ. 13:13). Иса шаҝирдләринә бу сөзләри демәклә өзүнүн мүәллим олдуғуну вурғулајырды. Ҝөјә галхмаздан әввәл о, шаҝирдләринә белә бир ҝөстәриш верди: «Беләликлә, ҝедин, бүтүн халглары шаҝирдим един,.. сизә әмр етдијим һәр шејә риајәт етмәји онлара өјрәдин» (Мат. 28:19, 20). Сонралар һәвари Павел дә Аллаһын Кәламынын мүәллимләри олмағын ваҹиблијини вурғуламышды. О, мәсиһчи ағсаггал кими хидмәт едән Тимотејә белә бир нәсиһәт вермишди: «Нәсиһәт вә тәлим вермәклә мәшғул ол... Бу ишләрә фикир вер вә онларла мәшғул ол ки, сәнин тәрәггин һамыја ашкар олсун» (1 Тим. 4:13—15).

I әсрдә олдуғу кими, бу ҝүн дә тәлим вермәк иши тәблиғ хидмәтимизин вә јығынҹаг ҝөрүшләримизин ајрылмаз бир һиссәсидир. Бәс биз тәлим вермәк иши илә неҹә мәшғул ола биләрик вә бу, бизә Аллаһын Кәламынын мүәллимләри кими тәрәгги етмәкдә неҹә көмәк едәҹәк?

Бөјүк Мүәллими тәглид ет

Исанын тәлим вермә тәрзи чохларында мараг ојадырды. Ҝәлин Назаретдәки синагогда топлашан инсанларын онун сөзләринә неҹә мүнасибәт ҝөстәрдикләринә диггәт јетирәк: «Һамы... Онун һаггында јахшы сөзләр сөјләјир, Онун ағзындан чыхан ләтиф кәламлара һејран олур», — дејә мүждәләрдән бирини гәләмә алан Лука јазыр (Лука 4:22). Исанын шаҝирдләри дә тәблиғ едәркән өз Мүәллимләринин нүмунәсини изләјирдиләр. Еләҹә дә һәвари Павел өз һәмиманлыларыны тәшвиг едәрәк дејирди: «Мән Мәсиһи тәглид етдијим кими, сиз дә мәни тәглид един» (1 Кор. 11:1). Павел Исанын тәлим үсулларыны тәглид етдији үчүн о, инсанлар гаршысында вә евдән-евә тәлим вермәкдә чох мүвәффәгијјәтли иди (Һәв. иш. 20:20).

«Базар мејданында» өјрәдирди

«Һәвариләрин ишләри» китабынын 17-ҹи фәслиндән Павелин инсанлар гаршысында неҹә ҝөзәл тәлим вердијини ҝөрә биләрик. Бурада биз онун Јунаныстанын Афина шәһәринә ҝәлиши барәдә охујуруг. Павел һара бахдыса, һәр јердә — күчәләрдә, иҹтимаи јерләрдә — чохлу бүтләр ҝөрдү. Әлбәттә, бу һеч дә Павелин хошуна ҝәлмәди! Лакин о, һиссләринин она үстүн ҝәлмәсинә јол вермәди. Әксинә, о, «һаврада... вә һәр ҝүн базар мејданында растлашдығы адамларла сөһбәт едирди», башга сөзлә десәк, мүлаһизә јүрүдүрдү (Һәв. иш. 17:16, 17, И—93). Бу, бизим үчүн неҹә дә ҝөзәл нүмунәдир! Тәблиғ едәркән, мәншәјиндән асылы олмајараг, һеч кими мүһакимә етмәмәлијик, әксинә, һамы илә һөрмәтҹил тәрздә данышмалыјыг. Бу, сәмими инсанлары бизә гулаг асмаға тәшвиг едәҹәк вә онлар јалан динин әсарәтиндән азад олаҹаглар (Һәв. иш. 10:34, 35; Вәһј 18:4).

Павел базар мејданларында тәблиғ едәркән чохлары онун бәјан етдији хәбәрә һај вермирдиләр. Павели динләјәнләрин арасында философлар да варды вә онларын нөгтеји-нәзәри онун тәблиғ етдији һәгигәтләрә зидд ҝедирди. О, мүбаһисәјә ҝиришәнләрин дедикләрини нәзәрә алырды. Бәзиләри ону «бошбоғаз» (һәрфи мәнада «тохум јыған») адландырырды. Диҝәрләри исә дејирдиләр ки, о, «әҹнәби танрылары тәблиғ едән бир адама бәнзәјир» (Һәв. иш. 17:18).

Лакин Павел башгаларынын аҹы сөзләринин ону мәјус етмәсинә јол вермәди. Әксинә, ондан өјрәтдикләрини изаһ етмәји хаһиш едәндә о, фүрсәтдән истифадә едиб ҝөзәл чыхыш етди. Бу исә онун мәһарәтлә өјрәтмәк баҹарығынын олдуғуну ҝөстәрир (Һәв. иш. 17:19—22; 1 Пет. 3:15). Ҝәлин онун бу чыхышыны тәфсилаты илә нәзәрдән кечирәк вә ҝөрәк, ондан бу саһәдә нә өјрәнә биләрик.

Динләјиҹијә мараглы олан мөвзулар сеч

Павел демишди: «Еј Афина әрләри! Мән сизи һәр шејдә чох диндар ҝөрүрәм. Чүнки ибадәт етдијиниз зијарәтҝаһлары ҝәзиб тәдгиг едәркән, мән бир гурбанҝаһ да тапдым. Онун үстүндә “Намәлум Аллаһа” сөзү јазылмышдыр. Бах бу, билмәјәрәк ибадәт етдијиниз Варлығы мән сизә тәблиғ едирәм» (Һәв. иш. 17:22, 23).

Павел чох диггәтҹил инсан иди, онун диггәтиндән һеч нә јајынмырды. Әтрафына диггәтлә ҝөз ҝәздирмәјин сајәсиндә о, һәмсөһбәти һаггында чох шеј өјрәнирди. Диггәтли олсаг, ев саһиби барәсиндә биз дә нә исә өјрәнә биләрик. Мәсәлән, һәјәт-баҹада ҝөрдүјүмүз ојунҹаглар вә ја гапынын үстүндә асылан һансыса әшја бизә ев сакинләри һаггында чох шеј дејә биләр. Ев саһиби һаггында мүәјјән тәсәввүрүмүз јарандыгдан сонра тәкҹә нә дејәҹәјимиз барәдә јох, һәм дә неҹә дејәҹәјимиз барәдә дүшүнмәлијик (Колос. 4:6).

Павел инсанлары һеч вахт мүһакимә етмирди. Мәсәлән, афиналыларла сөһбәт едәркән онларын Аллаһа сәдагәтлә еһтирам бәсләдикләринә, лакин бунун дәгиг билијә әсасланмадығына диггәт јетирди. Буна ҝөрә Павел онлары тәнгид етмәди, әксинә, садәҹә һәгиги Аллаһа неҹә ибадәт етмәли олдугларыны ајдын ҝөстәрди (1 Кор. 14:8). Падшаһлыг һаггында хош хәбәри тәблиғ едәркән бизим дә ајдын вә мүсбәт тәрздә данышмағымыз чох ваҹибдир!

Нәзакәтли ол вә ајры-сечкилик етмә

Павел әлавә едиб дејир: «Дүнјаны вә онун ичиндә олан бүтүн шејләри јарадан Аллаһ, ҝөј вә јерин Рәбби олдуғундан, әл илә тикилмиш мәбәдләрдә јашамаз. Мадам ки, һамыја һәјат, нәфәс вә һәр шеји верән Өзүдүр, бир шејә мөһтаҹ имиш кими, инсанларын әлләри илә Она хидмәт олуна билмәз» (Һәв. иш. 17:24, 25).

Павел бурада Јеһованы нәзакәтлә «ҝөј вә јерин Рәбби» адландырмагла ҝөстәрир ки, О, бизим Һәјатверәнимиздир. Мүхтәлиф динә вә мәдәнијјәтләрә мәнсуб олан сәмими-гәлбли инсанлара һәјатын Мәнбәјинин Јеһова Аллаһ олдуғуну баша дүшмәјә көмәк етмәк бизим үчүн бөјүк шәрәфдир! (Мәз. 36:9).

Сонра Павел дејир: «О, бүтүн халглардан олан инсанлары бир гандан јаратды... Онларын габагҹадан мүәјјән едилмиш вахтларыны вә јашадыглары јерләрин сәрһәдләрини тәјин етди ки, Аллаһы ахтарсынлар вә бәлкә әл илә јохлаја-јохлаја тапсынлар. Амма бунунла бәрабәр, О һеч биримиздән узаг дејил» (Һәв. иш. 17:26, 27).

Өз тәлим вермә тәрзимизлә биз башгаларына нә ҹүр Аллаһа ибадәт етдијимизи ҝөстәририк. Јеһова ајры-сечкилик етмир, О, бүтүн халглардан олан инсанларын Ону ахтарыб тапмасына иҹазә верир. Ејнилә, биз дә гаршылашдығымыз инсанлар арасында ајры-сечкилик етмәдән Аллаһ һаггында һамыја данышмалыјыг. Биз Јараданын мөвҹудлуғуна инанан инсанлара Онунла јахын мүнасибәт гурмаға көмәк етмәјә чалышырыг, бу да онлара әбәди хејир-дуалар газанмаға көмәк едә биләр (Јаг. 4:8). Бәс биз Аллаһын варлығына шүбһә илә јанашанлара неҹә көмәк едә биләрик? Бунда бизә Павелин нүмунәси көмәк едә биләр. Ҝәлин онун нөвбәти сөзләринә диггәт јетирәк.

«Биз Онунла јашајырыг, һәрәкәт едирик вә варыг; неҹә ки, сизин шаирләриниздән бәзиләри дә демишдир: “Биз дә Онун нәслијик”. Беләликлә, биз Аллаһын нәсли олдуғумуза ҝөрә дүшүнмәмәлијик ки, илаһи Варлыг, инсан сәнәти вә тәхәјјүлү илә сурәт алан гызыла, ја ҝүмүшә, јахуд да даша бәнзәјир» (Һәв. иш. 17:28, 29).

Павел динләјиҹиләринин онун дедикләринә гулаг асмалары үчүн чыхышында афиналылара чох јахшы таныш олан шаирин сөзләрини ҝәтирир. Ејнилә биз дә динләјиҹиләримиздә мараг ојада биләҹәк үмуми мөвзулар әсасында мүлаһизә јүрүдә биләрик. Мәсәлән, Павелин ибраниләрә мәктубунда евлә бағлы чәкдији нүмунә бу ҝүнә гәдәр өз тәсирини итирмәјиб. Биз орада охујуруг: «Һәр бир евин бәннасы вардыр, һәр шејин бәннасы исә Аллаһдыр» (Ибр. 3:4). Тәблиғ етдијимиз инсанларла бу садә нүмунә әсасында мүлаһизә јүрүтсәк, бу, онлара дедикләримизин һәгигәт олдуғуна инанмаға көмәк едәҹәк. Ҝәлин Павелин чыхышында тәлими еффектив едән башга бир амилә нәзәр салаг; бу, бизи динләјәнләри һәрәкәтә тәшвиг етмәкдир.

Вахтын ҝөзләмәдијини вурғула

Павел дејир: «Демәли, Аллаһ ҹәһаләт заманларына ҝөз јумду; инди исә һәр јердә инсанлара әмр едир ки, һамы төвбә етсин. Чүнки Аллаһ елә бир ҝүн тәјин етди ки, о ҝүн сечдији Адам васитәси илә дүнјаја әдаләтлә һөкм едәҹәкдир» (Һәв. иш. 17:30, 31).

Аллаһын мүәјјән мүддәт әрзиндә писликләрә јол вермәси әслиндә үрәјимиздә нә олдуғуну ҝөстәрмәјә имкан верир. Буна ҝөрә дә бизим вахтын ҝөзләмәдијини вурғуламағымыз вә тезликлә Падшаһлығын ҝәтирәҹәји хејир-дуалар һаггында әминликлә данышмағымыз олдугҹа ваҹибдир (2 Тим. 3:1—5).

Инсанлар мүхтәлиф ҹүр мүнасибәт ҝөстәрирләр

«Өлүләрдән дирилмәји ешитдикдә, бәзиләри кинајә илә ҝүлдү, амма башгалары: “Бу һагда сәни јенә динләјәрик”, — дедиләр. Беләликлә, Павел онларын арасындан чыхды. Бәзи адамлар исә она гошулуб иман етдиләр» (Һәв. иш. 17:32—34).

Бәзи инсанлар чатдырдығымыз хәбәрә тез һај верир, диҝәрләринин исә дедикләримизин доғрулуғуна әмин олмалары үчүн даһа чох вахт тәләб олунур. Анҹаг һәгигәти садә вә ајдын изаһ етмәјин сајәсиндә бир нәфәрә белә Јеһова һаггында дәгиг билијә јијәләнмәјә көмәк етмәк инсана бөјүк мәмнунлуг һисси ҝәтирир. Биз Аллаһа чох миннәтдарыг ки, О, инсанлары Өз Оғлуна јахынлашдырмаг үчүн биздән истифадә едир! (Јәһ. 6:44).

Бизим үчүн ибрәт дәрсләри

Павелин чыхышындан Мүгәддәс Китаб һәгигәтләрини башгаларына неҹә изаһ етмәк барәдә чох шеј өјрәнирик. Јығынҹагда ачыг мәрузә илә чыхыш едәндә Павели тәглид едәрәк елә ифадәләр сечмәлијик ки, башгаларына Мүгәддәс Китаб һәгигәтләрини баша дүшмәјә вә гәбул етмәјә көмәк едәк. Биз истәјирик ки, һәгигәти ајдын, ејни заманда да башга әгидәјә саһиб олан инсанларын һиссләринә тохунмадан чатдыраг. Һәмчинин биз тәблиғ хидмәтиндә дә инандырыҹы вә нәзакәтли тәрздә данышмаға чалышырыг. Белә етмәклә биз һәгигәтән дә Павелин «тәлим вермәклә мәшғул ол» мәсләһәтинә риајәт етмиш олуруг.

[30-ҹу сәһифәдәки шәкил]

Павел ајдын, садә вә нәзакәтлә тәлим верирди

[31-ҹи сәһифәдәки шәкил]

Биз тәблиғ етдијимиз инсанларын һиссләрини нәзәрә алмагла Павели тәглид едирик