“Аллаһын мөһтәшәм ишләри” илә тәшвиг олунанлар
“Онларын өз дилләримиздә Аллаһын мөһтәшәм ишләри барәдә данышдыгларыны ешидирик” (ҺӘВАРИЛӘРИН ИШЛӘРИ 2:11).
1, 2. Ерамызын 33-ҹү илинин Пентикост ҝүнүндә Јерусәлимдә һансы гәрибә һадисә баш верди?
ЕРАМЫЗЫН 33-ҹү илинин бир јаз сәһәри, Иса Мәсиһин, Јерусәлимдә шәхси евә топлашан киши вә гадынлардан ибарәт бир груп шаҝирдинин башына гәрибә иш ҝәлир. “Гәфләтән, ҝүҹлү бир күләк әсирмиш кими, ҝөјдән бир сәс ҝәлди вә отурдуглары евин һәр тәрәфинә јајылды. Аловун дилләринә бәнзәјән бир шеј онлара” ҝөрүндү вә “һамысы Мүгәддәс Руһла долду вә... башга-башга дилләрдә данышмаға башладылар” (Һәвариләрин ишләри 2:2-4, 15).
2 Евин гаршысына бөјүк издиһам топлашмышды. Орада, башга өлкәләрдә доғулмуш јәһудиләр, “диндар адамлар” варды. Онлар Јерусәлимә Пентикост бајрамыны гејд етмәјә ҝәлмишдиләр. Јығыланлар һејрәт ичиндә идиләр: бу инсанларын һәр бири Исанын шаҝирдләринин “Аллаһын мөһтәшәм ишләри барәдә” онларын өз ана дилиндә данышдығыны ешидирди. Буну неҹә изаһ етмәли, ахы данышанларын һамысы галилејалы идиләр? (Һәвариләрин ишләри 2:5-8, 11).
3. Пентикост ҝүнү Петер халга нә деди?
3 Бу галилејалылардан бири һәвари Петер иди. О изаһ етди ки, бир нечә һәфтә габаг Иса Мәсиһ әдаләтсиз адамлар тәрәфиндән гәтлә јетирилди. Аллаһ исә өз Оғлуну өлүләрдән дирилтди. Сонра Иса бир чох башга шаҝирдләринә, о ҹүмләдән Петерә вә һал-һазырда онун нитгини динләјән башгаларына ҝөрүндү. Ҹәми он ҝүн габаг Иса ҝөјә галхды. Шаҝирдләринин үзәринә дә мүгәддәс руһу төкән о иди. Бүтүн бунлар, Пентикост бајрамыны гејд едәнләр үчүн бир мә’на кәсб едирдими? Бәли, сөзсүз. Исанын өлүмү, она иман ҝәтирәрдиләрсә онлара ҝүнаһларын бағышланмасыны вә “Мүгәддәс Руһун ән’амыны” әлдә етмәк имканы верәрди (Һәвариләрин ишләри 2:22-24, 32, 33, 38). Јығыланлар “Аллаһын мөһтәшәм ишләри барәдә” ешидәндә неҹә һај вердиләр? Вә бу һадисә, Јеһоваја шәхси хидмәтимизи гијмәтләндирмәкдә бизә неҹә көмәк едәр?
Фәалијјәтә тәшвиг олунублар!
4. Ерамызын 33-ҹү илинин Пентикост ҝүнүндә Јоелин һансы пејғәмбәрлији јеринә јетди?
4 Мүгәддәс руһ алан кими шаҝирдләр, һәмән сәһәр топлашанлардан башлајараг, хилас һаггындакы хош хәбәри Јерусәлимдә башгалары илә бөлүшмәјә башладылар. Онларын тәблиғи илә, Петуелин оғлу Јоелин сәккиз әср габаг јаздығы һејрәт доғуран пејғәмбәрлик јеринә јетди: “Бүтүн бәшәр үзәринә Руһуму төкәҹәјәм; оғулларыныз да, гызларыныз да пејғәмбәрлик едәҹәкләр, ихтијарларыныз рө’јалар ҝөрәҹәкләр, ҝәнҹләриниз хәјаллар ҝөрәҹәкләр; о ҝүнләрдә көләләр үзәринә дә, ҹаријәләр үзәринә дә Руһуму төкәҹәјәм. Рәббин бөјүк вә горхунҹ ҝүнү ҝәлмәдән өнҹә” (Јоел 1:1; 2:28, 29, 31; Һәвариләрин ишләри 2:17, 18, 20).
5. Биринҹи әсрин мәсиһчиләри һансы мә’нада пејғәмбәрлик етмәли идиләр? (Һашијәјә бахын.)
5 Бу о демәк идими ки, Аллаһ өзүнә Давуд, Јоел вә Дебора кими пејғәмбәр киши вә гадынлар нәсли тә’јин едиб, онларын васитәсилә ҝәләҹәк һадисәләри хәбәр верәҹәкди? Хејр. Мәсиһчи “оғул” вә “гызлар”, “көлә” вә “ҹаријәләр” о мә’нада пејғәмбәрлик едәҹәкдиләр ки, Јеһованын руһу онлара Онун етдији вә етмәк нијјәтиндә олдуғу “мөһтәшәм ишләри барәдә” тәблиғ етмәјә тәшвиг едәҹәкди. Онлар Күлли-Ихтијар Аллаһын адындан данышаҹагдыларa. Халг Пентикост ҝүнүндә баш верәнләрә неҹә һај верди? (Ибраниләрә 1:1, 2).
6. Петери динләјәнләрдән чоху нәјә тәшвиг олундулар?
6 Петерә гулаг асдыгдан сонра, топлашанларын әксәријјәти фәалијјәт ҝөстәрмәјә тәшвиг олундулар. “Беләликлә, онун сөзүнү севинҹлә гәбул едәнләр вәфтиз олдулар. Вә о ҝүн үч минә јахын адам ҹәмијјәтә гошулду” (Һәвариләрин ишләри 2:41). Онлар — јәһудиләр вә прозелитләр — артыг Мүгәддәс Јазыларын әсас биликләрини мәнимсәмишдиләр. Бу биликләр, һәмчинин Петердән өјрәндикләринә иман ҝәтирмәләри, онларын “Ата, Оғул вә Мүгәддәс Руһ наминә” вәфтиз олунмаларына әсас кими хидмәт едирди (Матта 28:19). Вәфтиз олундугдан сонра, онлар өзләрини “һәвариләрин тә’лими” илә мәшғул олмаға һәср етдиләр. Ејни заманда, јени әлдә етдикләри иманы башгалары илә бөлүшмәјә башладылар. Онлар “һәр ҝүн бирликдә мә’бәдә ҝетмәкдә давам едәрәк... Аллаһа һәмд едәрәк, бүтүн халг гаршысында лүтф газанырдылар”. Онларын шәһадәт етмәләри бәһрәләр ҝәтирирди: “Рәбб дә хилас едиләнләри ҝүндән ҝүнә ҹәмијјәтә әлавә едирди” (Һәвариләрин ишләри 2:42, 46, 47). Бу иманлыларын јашадыглары бир чох өлкәләрдә мәсиһчи јығынҹаглары јаранырды. Шүбһәсиз ки, бу артымын бир һиссәси, онларын евә гајытдыгдан сонра “Мүждәни” сә’јлә тәблиғ етмәләри илә изаһ олунурду (Колослулара 1:23).
Аллаһын Кәламы тә’сирлидир
7. а) Бу ҝүн бүтүн милләтләрдән олан инсанлары Јеһованын тәшкилатына ҹәлб едән нәдир? б) Бүтүн дүнјада вә јерли әразиниздә сонракы артым үчүн һансы имканлары ҝөрүрсүнүз? (Һашијәјә бахын.)
7 Бәс бу ҝүн Аллаһын хидмәтчиси олмаг истәјәнләр барәдә нә демәк олар? Онлар да Аллаһын Кәламыны диггәтлә өјрәнмәлидирләр. Онлар Мүгәддәс Китабы өјрәнәрәк, Јеһованы “чох аҹыјан вә лүтф едән, ҝеҹ гәзәбләнән вә инајәти вә һәгигәти чох олан” Аллаһ кими таныјырлар (Чыхыш 34:6; Һәвариләрин ишләри 13:48). Онлар, төкүлән ганы илә онларын бүтүн ҝүнаһларыны јујан Иса Мәсиһ васитәсилә, Јеһованын мәһәббәтлә тәгдим етдији фидијә һаггында хәбәрдар олурлар (1 Јәһја 1:7). Онларда, Аллаһын “һәм салеһ, һәм дә салеһ олмајан өлүләри” дирилтмәк нијјәтинә ҝөрә дә миннәтдарлыг һисси јараныр (Һәвариләрин ишләри 24:15). Онлар бу ҹүр “мөһтәшәм ишләрин” Мәнбәјинә гаршы мәһәббәтлә долур вә бу гијмәтли һәгигәтләри тәблиғ етмәјә тәшвиг һисси дујурлар. Сонра онлар Аллаһын һәср олунмуш вә вәфтиз едилмиш хидмәтчиләри олур вә “Аллаһын билијиндә” бөјүмәјә давам едирләрb (Колослулара 1:10б; 2 Коринфлиләрә 5:14).
8-10. а) Бир мәсиһчи гадынын башына ҝәлән әһвалат, Аллаһын Кәламынын “тә’сирли” олдуғуну неҹә ҝөстәрир? б) Бу һадисәдән Јеһова вә Онун өз хидмәтчиләри илә неҹә даврандығы һагда нә өјрәндиниз? (Чыхыш 4:12)
8 Аллаһын хидмәтчиләринин Мүгәддәс Китабы өјрәнән заман әлдә етдикләри биликләр сәтһи дејил. Бу биликләр онларын үрәјинә тохунур, дүшүнҹәләрини дәјишир вә онларын бир һиссәси олур (Ибраниләрә 4:12). Мәсәлән, Камилла адлы бир гадын хәстә бахыҹысы ишинә дүзәлди. Онун вәзифәсинә гоҹа инсанлара гуллуг етмәк дахил иди. Камилланын гәјјумлуғу алтында оланлар арасында Марта адлы Јеһованын Шаһиди варды. Марта гоҹалыгла әлагәдар ағыл зәифлијиндән әзијјәт чәкирди, буна ҝөрә дә она даима нәзарәт етмәк лазым ҝәлирди. Јемәк јемәји, һәтта ағзындакы гиданы удмағы белә онун јадына салмаг лазым иди. Лакин, ҝөрәҹәјимиз кими, Марта бир шеји јадында мөһкәм сахлајырды.
9 Бир дәфә о, Камилланын шәхси проблемләр уҹбатындан ағладығыны ҝөрдү. Марта ону гуҹаглады вә Мүгәддәс Китабы өјрәнмәји тәклиф етди. Бәс Марта бу вәзијјәтдә Мүгәддәс Китаб өјрәнмәси кечирә биләрдими? Мә’лум олду ки, биләр. Марта чох шеји хатырламаса да, бөјүк Аллаһыны, һәмчинин Мүгәддәс Китабдан өјрәндији дәјәрли һәгигәтләри унутмамышды. Өјрәнмә заманы Марта Камилладан һәр абзасы охумағы, ҝәтирилән Мүгәддәс Китаб ајәләрини ачмағы, сәһифәнин ахырындакы суалы охумағы вә бу суала ҹаваб вермәји хаһиш едирди. Бир нечә мүддәт бу ҹүр давам етди вә Мартанын мәһдуд имканларына бахмајараг, Камилла Мүгәддәс Китаб билијиндә тәрәгги едирди. Марта баша дүшдү ки, Камилла, Аллаһа хидмәт етмәк истәјән башга адамларла үнсијјәтдә олмалыдыр. Падшаһлыг Залына ҝедә билсин дејә, Марта Камиллаја палтар вә ајаггабы верди.
10 Мартанын бу ҹүр диггәтли олмасы, онун нүмунәси вә инамы Камиллаја тә’сир бағышлады. Камилла белә бир нәтиҹәјә ҝәлди ки, Мартанын она Мүгәддәс Китабдан өјрәтмәјә чалышдыглары чох ваҹибдир, ахы Марта, демәк олар, һәр шеји јаддан чыхармышды, јалныз Мүгәддәс Јазылардан өјрәндикләрини хатырлајырды. Сонрадан Камилланы башга јерә көчүрәндә, о баша дүшдү ки, һәрәкәт етмәк вахтыдыр. Имкан јаранан кими, Мартанын она вердији палтар вә ајаггабыда Падшаһлыг Залына ҝәлди вә она Мүгәддәс Китабы өјрәтмәләрини хаһиш етди. Камилла руһани ҹәһәтдән ирәлиләди вә вәфтиз олунду.
Јеһованын нормаларына риајәт етмәјә тәшвиг олунублар
11. Тәблиғ ишиндә сә’ј ҝөстәрмәкдән башга, Падшаһлыг һаггындакы хәбәрин бизим үрәјимизә тә’сири даһа нәдә әкс олуна биләр?
11 Бу ҝүн бүтүн дүнјада, Марта вә Камилла кими, Јеһованын алты милјондан чох Шаһиди “Падшаһлыг һаггында олан... Мүждә”ни тәблиғ едир (Матта 24:14, И–93; 28:19, 20). Биринҹи әсрдә јашајан мәсиһчиләр кими, “Аллаһын мөһтәшәм ишләри” онлары да дәриндән марагландырыр. Онлар дәрк едирләр ки, Јеһованын адыны дашымаг шәрәфинә лајиг ҝөрүлүбләр вә Јеһова онларын үзәринә мүгәддәс руһуну төкүр. Нәһајәт, онлар һәјатларынын һәр бир саһәсиндә Јеһованын нормаларына риајәт едәрәк, вар гүввәләри илә “Рәббә лајиг шәкилдә һәрәкәт едиб, Ону һәр ҹәһәтдән”разы салмаға чалышырлар. Буна, Аллаһын ҝејим вә хариҹи ҝөрүнүшлә әлагәдар вердији нормалара һөрмәт етмәк дә аиддир (Колослулара 1:10а; Титуса 2:10).
12. Ҝејимә вә хариҹи ҝөрүнүшә даир 1 Тимотејә 2:9, 10 ајәләриндә һансы гәти мәсләһәтләр јазылыб?
12 Бәли, Јеһова хариҹи ҝөрүнүшүмүзә даир нормалар тә’јин едиб. Бу тәләбләрдән бә’зиләрини һәвари Павел гејд едиб. “Гадынлар да утанҹаглыг вә мө’тәдилликлә, әдәбли гијафәтлә өзләрини бәзәсинләр. Сачларыны һөрмәклә, гызыл, мирвари јахуд баһалы палтарла дејил, Аллаһа һөрмәт етдикләрини иддиа едән гадынлара јарашан тәрздә өзләрини хејирли ишләрлә бәзәсинләр”c. Бу сөзләрдән нә өјрәнирик? (1 Тимотејә 2:9, 10).
13. а) “Әдәбли гијафәт” дејәндә нә нәзәрдә тутулур. б) Нәјә ҝөрә демәк олар ки, Јеһованын нормалары мүдрикдир?
13 Павелин сөзләри ҝөстәрир ки, мәсиһчиләр өзләрини “утанҹаглыг вә мө’тәдилликлә, әдәбли гијафәтлә” бәзәмәлидирләр. Онлар чиркли, сәлигәсиз вә даранмамыш ҝөрүнмәли дејилләр. Фактики олараг һәр бир кәс, һәтта јохсул адамлар белә, палтарларынын сәлигәли, тәмиз вә лајигли олмасына диггәт јетирәрәк бу мүдрик нормалара риајәт едә биләрләр. Мәсәлән, ҹәнуби Америка өлкәләриндән бириндә јашајан Шаһидләр, вилајәт конгресиндә олмаг үчүн һәр ил ҹәнҝәлликләрлә чох километр мәсафә кечмәли олур, сонра исә узун мүддәт каное илә үзүрләр. Чох вахт ким исә суја јыхылыр вә ја палтарыны коллара илишдирәрәк ҹырыр. Буна ҝөрә дә конгресин кечириләҹәји јерә чатдыгда, гардашлар һәмишә сәлигәли ҝөрүнмүрләр. Лакин конгресә ҝејәҹәкләри палтарын дүјмәләрини тикмәјә, илҝәкләрини сәлигәјә салмаға, палтары јумаға вә үтүләмәјә вахт тапырлар. Онлар Јеһованын сүфрәси архасында гидаланмаг дә’вәтини гијмәтләндирир вә буна мүвафиг тәрздә ҝејинмәк истәјирләр.
14. а) “Утанҹаглыг вә мө’тәдилликлә” ҝејинмәк нә демәкдир? б) “Аллаһа һөрмәт етдикләрини иддиа едән” инсанлар кими ҝејинмәк бизим үчүн һансы мә’наны дашыјыр?
14 Павел давам едәрәк дејир ки, биз “утанҹаглыг вә мө’тәдилликлә” ҝејинмәлијик. Бу о демәкдир ки, биз ҹәлбедиҹи, јерсиз һиссләр ојадан, ачыг-сачыг вә ја һәддиндән артыг дәбдәбәли палтар ҝејинмәмәлијик. Бундан әлавә, “Аллаһа һөрмәт” етдијимиз палтарымыздан ҝөрүнмәлидир. Бунун үзәриндә дүшүнмәјә дәјәр. Јалныз јығынҹаға ҝетдијимиз заман әдәбли ҝејинмәк, башга вахтлар исә әдәб гајдаларыны унутмаг дүзҝүн олардымы? Хариҹи ҝөрүнүшүмүз һәмишә һөрмәт әкс етдирмәлидир, ахы биз ҝүнүн 24 саатыны мәсиһчи вә Аллаһын хидмәтчиси олараг галырыг. Ајдын мәсәләдир ки, бизим иш вә мәктәб палтарымыз фәалијјәтимизин характеринә мүвафиг олмалыдыр. Буна бахмајараг, биз һәр һалда садә вә ләјагәтлә ҝејинмәлијик. Әҝәр Аллаһа инандығымыз ҝејимимиздә һәмишә әкс олунарса, хариҹи ҝөрүнүшүмүздән утанараг гејри-рәсми тәрздә шәһадәтлик етмәкдән бојун гачырмарыг (1 Петер 3:15).
“Дүнјаны... севмәјин”
15, 16. а) Нәјә ҝөрә ҝејимдә вә хариҹи ҝөрүнүшдә бу дүнјаны тәглид етмәмәјимиз ваҹибдир? (1 Јәһја 5:19) б) Һансы практики сәбәбләр үзүндән дәбдәбәли ҝејимдән гачынмалыјыг?
15 “Дүнјаны вә дүнјада олан шејләри севмәјин. Ким дүнјаны севәрсә, онда Атанын мәһәббәти јохдур. Чүнки дүнјада олан һәр шеј, јә’ни ҹисмани еһтирас, ҝөзләрин еһтирасы вә һәјатын тәкәббүрү Атадан дејил, дүнјадандыр”. 1 Јәһја 2:15, 16 ајәләриндә јазылан бу нәсиһәт, бизим үчүн ҝејим вә хариҹи ҝөрүнүш саһәсиндә рәһбәрлик кими хидмәт едир.
16 Неҹә дә вахтында верилән мәсләһәтдир! Мүһитин тә’сири даһа ҝүҹлү олдуғу бир әсрдә, нә ҝејәҹәјимизә даир дүнјанын бизә ҝөстәриш вермәсинә јол вермәли дејилик. Сон илләр әрзиндә ҝејим стили писләшибдир. Һәтта ишҝүзар вә сәнәткар адамларын ҝејимләри белә мәсиһчиләр үчүн һәр заман е’тибарлы ме’јар дејил. Әҝәр биз Аллаһын нормаларына мүвафиг олараг јашамаг вә бунунла да “Хиласкарымыз Аллаһын тә’лимини ҹазибәли” етмәк истәјириксә, бу бизә даһа бир әсас верир ки, “бу зәманәјә” ујғунлашмамағын ваҹиблијини јадда сахлајаг (Ромалылара 12:2; Титуса 2:10).
17. а) Палтар аларкән вә ја онун үслубуна бахаркән өзүмүзә һансы суаллары верә биләрик? б) Аилә башчылары аилә үзвләринин хариҹи ҝөрүнүшү илә нәјә ҝөрә марагланмалыдырлар?
17 Бу вә ја диҝәр әшјаны алмаздан әввәл јахшы оларды ки, өзүмүздән сорушаг: бу үслуб нәјә ҝөрә хошума ҝәлир? Бу үслуб мәнә, вурғуну олдуғум мәшһур адамы хатырладырмы? Бу үслуб, өзләриндә мүстәгиллик вә гијамчылыг руһу әкс етдирән күчә ушагларынын гулдур дәстәси арасында дәбдәдирми? Бундан әлавә, биз ҝејимин өзүнә дә диггәт јетирмәлијик. Әҝәр бу дон вә ја јубкадырса, нә гәдәр узундур? Бу ҝејим садәдирми, мәсиһчиләрә лајигдирми, ләјагәт әкс етдирирми? Јохса һәддиндән артыг сых, јерсиз һиссләр ојадан вә сәлигәсиздир? Өзүнүздән сорушун: мән белә ҝејимдә ҝөрүнсәм, бу башгаларыны бүдрәтмәз ки? (2 Коринфлиләрә 6:3, 4). Бу бизи нәјә ҝөрә нараһат етмәлидир? Она ҝөрә ки, Мүгәддәс Китаб дејир: “Мәсиһ дә Өз гајғысына галмамышды” (Ромалылара 15:3). Аллаһдан горхан аилә башчылары, аилә үзвләринин хариҹи ҝөрүнүшү илә марагланмалыдырлар. Әзәмәтли Аллаһларына һөрмәт һиссиндән ирәли ҝәләрәк, аилә башчылары јери ҝәләндә ҹидди, мәһәббәтли мәсләһәт вермәјә ҝеҹикмәмәлидирләр (Јагуб 3:13).
18. Ҝејимә вә хариҹи ҝөрүнүшә там ҹиддиликлә јанашмаға сизи нә тәшвиг едир?
18 Данышдығымыз хәбәр Јеһовадан изһар олур, О исә, ләјагәт вә мүгәддәслијин тәҹәссүмүдүр (Ишаја 6:3). Мүгәддәс Китаб бизи чағырыр: “Севимли өвладлар кими, Аллаһы тәглид един” (Ефеслиләрә 5:1). Ҝејимимиз вә хариҹи ҝөрүнүшүмүзлә сәмави Атамыза ја еһтирам едир, ја да адына ләкә ҝәтиририк. Мәҝәр Онун үрәјини севиндирмәк истәмирикми? (Сүлејманын мәсәлләри 27:11).
19. Башгаларына “Аллаһын мөһтәшәм ишләри барәдә” данышмағымыз һансы фајданы ҝәтирир?
19 Һаггында ешитдијиниз “Аллаһын мөһтәшәм ишләри” сиздә һансы һиссләри ојадыр? Мәҝәр һәгигәти билдијимиз үчүн хошбәхт дејиликми? Иса Мәсиһин төкүлмүш ганына иман ҝәтирдијимиз үчүн, ҝүнаһларымыз бағышланыр (Һәвариләрин ишләри 2:38). Бу исә бизә Аллаһ гаршысында нитг азадлығы верир. Биз, үмиди олмајан инсанлар кими өлүмдән горхмуруг. Чүнки Иса бизи әмин етди ки, бир ҝүн “гәбирләрдә оланларын һамысы Онун сәсини ешидәҹәкләр вә гәбирләриндән чыхаҹаглар” (Јәһја 5:28). Јеһова бүтүн бунлары бизә илтифаты сајәсиндә ачыб. Бүтүн бунлардан әлавә, О бизим үзәримизә мүгәддәс руһуну төкүр. Гој бу јахшы бәхшишләринә ҝөрә олан миннәтдарлыг, бизи Онун јүксәк нормаларына риајәт етмәјә вә “мөһтәшәм ишләри барәдә” башгаларына данышараг Ону иззәтләндирмәјә тәшвиг етсин!
[Һашијәләр]
a Јеһова, Муса вә Һаруну фир’онла данышмаг вә ондан Аллаһын халгыны бурахмағы тәләб етмәк үчүн ҝөндәрәндә, Мусаја деди: “Бах сәни Фир’она Аллаһ кими етдим; вә гардашын Һарун сәнин пејғәмбәрин олаҹаг” (Чыхыш 7:1). Һарун, пејғәмбәр тимсалында чыхыш едәрәк ҝәләҹәк һадисәләри сөјләмирди, лакин Мусанын адындан данышырды.
b 2002-ҹи ил мартын 28-дә кечирилән, һәр ил гејд олунан Рәббин Хатирә Ҝеҹәси бајрамына ҝәлән чохсајлы инсанларын бөјүк әксәријјәти Јеһованын фәал хидмәтчиләри дејилләр. Дуа едирик ки, марагланан бу инсанлардан чохунун үрәји тезликлә онлары хош хәбәрин тәблиғчиләри тимсалында бу шәрәфли хидмәтә ҹан атмаға тәшвиг етсин.
c Павел бу сөзләри мәсиһчи гадынлара јазса да, бу сөзләрдә ифадә олунан принсипләр мәсиһчи јығынҹағынын диҝәр үзвләринә, кишиләрә вә ҝәнҹләрә дә аиддир.
Сиз неҹә ҹаваб верәрдиниз?
• Ерамызын 33-ҹү илинин Пентикост ҝүнүндә инсанлар һансы “мөһтәшәм ишләр” барәдә ешитдиләр вә буна неҹә һај вердиләр?
• Иса Мәсиһин шаҝирди неҹә олурлар вә шаҝирдлик өзүнә нә дахил едир?
• Ҝејимимизә вә хариҹи ҝөрүнүшүмүзә фикир вермәк нәјә ҝөрә ваҹибдир?
• Мәсиһчиләрә бу вә ја диҝәр ҝејимин, јахуд үслубун мүвафиг олуб-олмадығыны гәрара аларкән нәјә диггәт јетирмәк лазымдыр?
[29-ҹу сәһифәдәки шәкил]
Петер е’лан етди ки, Иса өлүләрдән дирилдилмишдир.
[31-ҹи сәһифәдәки шәкилләр]
Мәсиһчи валидејнләр аилә үзвләринин хариҹи ҝөрүнүшү илә марагланмалыдырлар.
[32-ҹи сәһифәдәки шәкилләр]
Хариҹи ҝөрүнүшүнүзлә Аллаһа иззәт ҝәтирирсинизми?