Јеһованын Кәламы ҹанлыдыр
«Һәвариләрин ишләри» китабындан диггәтәлајиг фикирләр
МҮГӘДДӘС ЈАЗЫЛАРЫН «Һәвариләрин ишләри» китабында мәсиһчи јығынҹағынын јаранмасынын вә онун сонракы инкишафынын әтрафлы тарихи гәләмә алыныб. Һәким Луканын јаздығы бу мараглы китаб мәсиһчиләрин ерамызын 33-ҹү илиндән 61-ҹи илинәдәк олан 28 иллик фәалијјәтиндән бәһс едир.
Бу китабын илк һиссәсиндә һәвари Петерин, икинҹисиндә исә һәвари Павелин фәалијјәтиндән данышылыр. «Биз» вә «бизә» әвәзликләриндән истифадә етмәклә Лука һәмин һадисәләрин бәзиләриндә иштирак етдијини ҝөстәрир. «Һәвариләрин ишләри»ндә јазыланлара диггәт јетирмәјимиз Аллаһын Кәламыны вә Онун мүгәддәс руһуну даһа чох гијмәтләндирмәјимизә көмәк едәҹәкдир (Ибр. 4:12). Һәмчинин бу китаб бизи фәдакарлыға тәшвиг едәҹәк вә Падшаһлыг үмидинә иманымызы мөһкәмләндирәҹәк.
ПЕТЕР ПАДШАҺЛЫҒЫН АЧАРЛАРЫНДАН ИСТИФАДӘ ЕДИР
Һәвариләр мүгәддәс руһ алдыгдан сонра ҹәсарәтлә тәблиғ етмәјә башлајырлар. Петер Падшаһлығын биринҹи ачарындан истифадә едәрәк ‘онун сөзүнү гәбул едән’ јәһудиләрә вә прозелитләрә билик вә сәмави Падшаһлыға ҝирмәк гапысыны ачыр (Мат. 16:19; Һәв. иш. 2:5, 41). Сәрт тәгибләр башлајанда шаҝирдләр пәрән-пәрән олур, лакин бу, тәблиғ ишинин ҝенишләнмәсинә ҝәтириб чыхарыр.
Јерусәлимдәки һәвариләр самаријалыларын Аллаһын кәламыны гәбул етдикләриндән хәбәр тутанда, Петер вә Јәһјаны онларын јанына ҝөндәрирләр. Самаријалылара Падшаһлыға ҝирмәк имканыны вермәклә Петер икинҹи ачардан истифадә едир (Һәв. иш. 8:14-17). Еһтимал ки, Исанын дирилдији ил әрзиндә Тарсуслу Шаулда һејрәтамиз дәјишикликләр баш верир. Ерамызын 36-ҹы илиндә Петер үчүнҹү ачардан истифадә едир вә мүгәддәс руһун әнамлары диҝәр милләтләрә — сүннәт олунмамышлара верилир (Һәв. иш. 10:45).
Мүгәддәс Китаб суалларына ҹаваблар:
2:44-47; 4:34, 35 — Нәјә ҝөрә иман едәнләр малларыны сатыб пулуну пајлајырдылар? Иман едәнләрин чоху узаг јерләрдән ҝәлмишди вә Јерусәлимдә даһа чох галмаг үчүн кифајәт гәдәр вәсаитләри јох иди. Буна бахмајараг, онлар јени иманлары һагда даһа чох өјрәнмәк вә башгаларына шәһадәт етмәк үчүн шәһәрдә бир аз чох галмаг истәјирдиләр. Бәзи мәсиһчиләр онлара көмәк етмәк мәгсәдилә мал-мүлкүнү сатыб, сатылмыш шејләрин пулуну еһтијаҹы оланлара пајлајырдылар.
4:13 — Һәгигәтәнми Петер вә Јәһја охумамыш адамлар иди вә онларын һеч бир тәһсили јох иди? Јох, бу белә дејил. Онлар дини раввин мәктәбләриндә тәлим алмадыгларына ҝөрә «охумамыш, авам адамлар» адландырылдылар.
5:34-39 — Лука Синедрионун гапалы иҹласында Гамлијелин нә дедијини һарадан билә биләрди? Ән азы үч шеји тәхмин етмәк олар: 1) вахтилә Гамлијелин шаҝирди олмуш Павел она бу һагда хәбәр вермишди; 2) һәвариләрин һалына аҹыјан Синедрионун үзвү Накдимон буну Лукаја демишди; 3) Лука бу мәлуматы Аллаһдан илһам алараг гәләмә алмышды.
7:59 — Стефан Исаја дуа едирдими? Хејр. Инсанлар јалныз Јеһова Аллаһа ибадәт етмәлидирләр, буна ҝөрә дә дуаларыны јалныз Она јөнәлтмәлидирләр (Лука 4:8; 6:12). Адәтән Стефан Исанын ады васитәсилә Јеһоваја дуа едәрди (Јәһ. 15:16). Анҹаг бу һалда Стефан «Инсан Оғлуну Аллаһын сағында дурмуш» ҝөрдү (Һәв. иш. 7:56). Исаја өлүләри дирилтмәк сәлаһијјәти верилдијиндән там хәбәрдар олан Стефан руһуну һифз етмәји хаһиш едәрәк, орижинал мәтнә әсасән, Иса илә данышды, она дуа етмәди (Јәһ. 5:27-29).
Бизим үчүн ибрәт дәрсләри:
1:8. Јеһованын хидмәтчиләринин үмумдүнја тәблиғ иши мүгәддәс руһун көмәји олмадан иҹра олуна билмәз.
4:36–5:11. Кипрдә анадан олан Јусиф, мәнасы Тәсәлли Оғлу олан Барнаба ләгәбини алмышдыр. Ҝүман ки, Јусиф сәмими, хејирхаһ вә гајғыкеш олдуғу үчүн һәвариләр она бу ады вермишдиләр. Биз, һијләјә вә јалана әл атан Һананја вә Шапира кими дејил, Барнаба кими олмалыјыг.
9:23-25. Тәблиғи давам етдирмәк үчүн дүшмәнләрдән гачмаг горхаглыг дејил.
9:28-30. Әҝәр мүәјјән рајонларда, јахуд бәзи адамлара тәблиғ едәндә физики, мәнәви, јахуд руһани тәһлүкәјә мәруз галмаг еһтималы јаранарса, биз еһтијаты әлдән бурахмамалыјыг, мәсәлән, һарада вә нә вахт тәблиғ едәҹәјимизи өлчүб-бичмәлијик.
9:31. Нисби сакитлик дөврүндә арашдырма апармагла вә охудугларымызын үзәриндә дүшүнмәклә иманымызы мөһкәмләндирмәјә чалышмалыјыг. Бу бизә өјрәндикләримизи тәтбиг едәрәк вә хидмәтдә сәјли олараг Јеһовадан горхмаға көмәк едәҹәк.
ПАВЕЛИН СӘЈЛИ ХИДМӘТИ
Ерамызын 44-ҹү илиндә Агаб Барнаба илә Шаулун «там бир ил» тәблиғ етдикләри Антакја шәһәринә ҝәлир. О, «бөјүк гытлыг олаҹағыны» пејғәмбәрлик едир вә ики илдән сонра онун сөзләри јеринә јетир (Һәв. иш. 11:26-28). «Барнаба вә Шаул тапшырыгларыны јеринә јетирдикдән сонра» Антакјаја дөнүрләр (Һәв. иш. 12:25). Ерамызын 47-ҹи илиндә, Шаулун мәсиһчилији гәбул етмәсиндән тәхминән 12 ил кечәндән сонра, Барнаба вә Шаул мүгәддәс руһ тәрәфиндән миссионер сәјаһәтинә ҝөндәрилирләр (Һәв. иш. 13:1-4). Б. е. 48-ҹи илиндә онлар Антакја шәһәринә гајыдырлар (Һәв. иш. 14:26).
Доггуз ајдан сонра Павел (һәмчинин Шаул кими таныныр) Силаны өз әмәкдашы сечиб, икинҹи миссионер сәјаһәтинә јола дүшүр (Һәв. иш. 15:40). Јолда Тимотеј вә Лука Павелә гошулурлар. Лука Филипидә галыр, Павел исә Афинаја, орадан да Коринфә јола дүшүр. Коринфдә Акила вә Прискила илә растлашыр вә бир ил алты ај бу шәһәрдә јашајыр (Һәв. иш. 18:11). Тимотеј илә Силаны Коринфдә гојуб ҝедән Павел Акиланы вә Прискиланы өзү илә ҝөтүрүб ерамызын 52-ҹи илинин әввәлләриндә ҝәми илә Суријаја ҝедир (Һәв. иш. 18:18). Акила вә Прискила ону Ефесәдәк мүшајиәт едир вә бурада галыб јашајырлар.
Суријанын Антакја шәһәриндә бир мүддәт галдыгдан сонра Павел ерамызын 52-ҹи илиндә үчүнҹү миссионер сәјаһәтинә јола дүшүр (Һәв. иш. 18:23). Ефесдә Јеһованын ‘кәламы гүдрәтлә јајылыб нүфуз газаныр’ (Һәв. иш. 19:20). Павел бурада тәхминән үч ил галыр (Һәв. иш. 20:31). Ерамызын 56-ҹы илинин Пентикост ҝүнүндә Павел Јерусәлимдәдир. О һәбс едилир вә ҹәсарәтлә һаким даирәләринә шаһидлик едир. О, Ромада ики ил (тәх. б. е. 59-61-ҹи илләри) ев дустағы олур, лакин буна бахмајараг, Падшаһлыг һагда тәблиғ етмәк вә ‘Иса Мәсиһ барәдә өјрәтмәк’ үчүн һәр фүрсәтдән истифадә едир (Һәв. иш. 28:30, 31).
Мүгәддәс Китаб суалларына ҹаваблар:
14:8-13 — Нәјә ҝөрә Листра сакинләри «Барнабаны Зевс, Павели исә... Һермес адландырдылар»? Јунан мифолоҝијасында Зевс аллаһларын һөкмдары сајылырды, онун оғлу Һермес исә натиглик истедады илә танынырды. Әсасән Павел данышдығы үчүн Листра сакинләри ону Һермес, Барнабаны исә Зевс адландырдылар.
16:6, 7 — Нәјә ҝөрә мүгәддәс руһ Павели вә онун әмәкдашларыны Асија әјаләтиндә вә Битинијада тәблиғ етмәјә гојмады? Тәблиғчиләр аз олдуғундан мүгәддәс руһ онлары даһа бәһрәли јерләрә јөнәлтди.
18:12-17 — Нәјә ҝөрә јәһудиләр Состениси дөјәндә вали Галлијо мүдахилә етмәди? Ҝөрүнүр, Галлијо дүшүндү ки, Павелә гаршы чыхан издиһамын башчысы лајиг олдуғу ҹәзаны алды. Лакин бу һадисәнин мүсбәт нәтиҹәси олду, чүнки Состенис мәсиһчилији гәбул етди. Бир гәдәр сонра Павел ону ‘гардаш’ адландырды (1 Кор. 1:1).
18:18 — Павел нәји әһд етмишдир? Бәзи алимләр тәхмин едирләр ки, Павел Нәзири әһди вермишдир (Сај. 6:1-21). Лакин Мүгәддәс Китабда бу һагда дәгиг дејилмир. Үстәлик, Мүгәддәс Јазылар Павелин бу әһди мәсиһчи олдуғундан әввәл вә ја сонра вердијини, јахуд әһдин башланғыҹы вә ја сону олдуғуну демир. Һәр неҹә олса да, бу ҹүр әһд етмәк ҝүнаһ дејилди.
Бизим үчүн ибрәт дәрсләри:
12:5-11. Биз гардашларымыз үчүн дуа едә биләрик вә етмәлијик дә.
12:21-23; 14:14-18. Һирод Аллаһа мәхсус олан иззәти мәнимсәди. Бу, Павел вә Барнабанын јерсиз иззәтә вердикләри тез вә гәти реаксијадан неҹә дә фәргләнирди! Биз Јеһоваја хидмәтдә әлдә етдијимиз наилијјәтләрә ҝөрә иззәт арзуламамалыјыг.
14:5-7. Еһтијатлы олмаг хидмәтимиздә фәал галмаға көмәк едәҹәк (Мат. 10:23).
14:22. Мәсиһчиләр әзијјәтләрлә гаршылашаҹагларыны билирләр. Онлар етигадларында ҝүзәштә ҝетмәклә әзијјәтләрдән гачмаға чалышмырлар (2 Тим. 3:12).
16:1, 2. Ҝәнҹ мәсиһчиләр јығынҹагда чох чалышмалы вә јахшы ад газанмаг үчүн Јеһовадан көмәк истәмәлидирләр.
16:3. Мүгәддәс Китаб принсипләрини позмамаг шәртилә, башгаларынын хош хәбәри гәбул етмәләри үчүн әлимиздән ҝәләни етмәлијик (1 Кор. 9:19-23).
20:20, 21. Евдән-евә тәблиғ хидмәтимизин ваҹиб һиссәсидир.
20:24; 21:13. Аллаһ гаршысында нөгсансызлығымызы горумаг һәјатымызы горумагдан даһа ваҹибдир.
21:21-26. Јахшы мәсләһәти севинҹлә гәбул етмәлијик.
25:8-12. Мүасир мәсиһчиләр ‘Мүждәни мүдафиә вә тәсдиг етмәк’ үчүн бүтүн гануни васитәләрдән истифадә етмәлидирләр (Филип. 1:7).
26:24, 25. ‘Һәгигәт вә мәнтигли сөзләр’ «нәфсани адам» үчүн ағылсызлыг олса да, онлары бәјан етмәкдән ваз кечмәли дејилик (1 Кор. 2:14).
[30-ҹу сәһифәдәки шәкил]
Петер Падшаһлығын ‘ачарларындан нә заман истифадә етди?
[31-ҹи сәһифәдәки шәкил]
Үмумдүнја тәблиғ иши мүгәддәс руһун көмәји олмадан иҹра олуна билмәз