Јеһова «ҝөзүнү ачар», һамыја диггәтлә бахар
«[Јеһова] ҝөзүнү ачар, бәшәр өвладларына диггәтлә бахар» (МӘЗ. 11:4).
1. Бизи неҹә инсанлар ҹәлб едир?
СӘНӘ сәмими мараг ҝөстәрән инсанлар барәдә нә дүшүнүрсән? Онлардан нә исә сорушанда фикирләри илә дүрүст бөлүшүрләр. Сән дара дүшәндә бөјүк мәмнунијјәтлә көмәк едирләр. Мәсләһәтә еһтијаҹын оланда ону мәһәббәтлә верирләр (Мәз. 141:5; Галат. 6:1). Мәҝәр бу ҹүр инсанлар сәни ҹәлб етмирми? Јеһова вә Онун Оғлу сәнинлә сәмими-гәлбдән марагланырлар. Үстәлик, онларын ҝөстәрдији мараг истәнилән инсанын марағындан гат-гат үстүндүр, нијјәтләри исә тәмиздир. Онлар сәнә ‘әбәди [«һәгиги», һашијә] һәјата наил олмаға’ көмәк етмәк истәјирләр (1 Тим. 6:19; Вәһј 3:19).
2. Јеһова Өз хидмәтчиләри илә нә дәрәҹәдә марагланыр?
2 Мәзмурчу Давуд Јеһованын бизә олан дәрин марағыны нөвбәти сөзләрлә ифадә етмишди: «[Јеһованын] ҝөрән ҝөзләри вар, ҝөзүнү ачар, бәшәр өвладларына диггәтлә бахар» (Мәз. 11:4). Бәли, Аллаһ бизә садәҹә бахмыр, О бизә диггәтлә бахыр, јәни бизи јохлајыб арашдырыр. Давуд һәмчинин јазмышды: «Ҝеҹә икән гәлбими јохлајыб арашдырдын... һеч нә тапмадын» (Мәз. 17:3). Јеһованын онунла дәриндән марагландығынын Давуда бәлли олмасыны ајдын ҝөрүрүк. О билирди ки, әҝәр ҝүнаһа сөвг едән фикирләри өзүндән атмаса вә үрәјини һијләҝәрлијә мејл етдирсә, Јеһованы кәдәрләндирәҹәк вә Онун илтифатындан мәһрум олаҹаг. Давуд үчүн Јеһова реал иди. Буну сәнин үчүн дә демәк олармы?
Јеһова үрәкләри ҝөрүр
3. Јеһованын бизим гејри-камиллијимизә таразлы мүнасибәти нәдән ҝөрүнүр?
3 Јеһованы әсасән бизим дахилән неҹә инсан олдуғумуз, јәни үрәјимиз марагландырыр (Мәз. 19:14; 26:2). О, мәһәббәтдән ирәли ҝәләрәк кичик гүсурларымыза фикир вермир. Мисал үчүн, Ибраһимин арвады Сара үрәјиндә ҝүлдүјүнү инкар едәндә инсан ҹилдиндә ҝәлән мәләк онун горхдуғуну вә утандығыны нәзәрә алыб, ону јүнҝүлвары мәзәммәт етди (Јар. 18:12-15). Гәбилә башчысы Әјјуб ‘өзүнү Аллаһдан салеһ сајанда’ Јеһова ону Өз хејир-дуасындан мәһрум етмәди, чүнки Әјјубун Шејтанын әлиндән нә гәдәр әзијјәт чәкдијиндән хәбәрдар иди (Әјј. 32:2; 42:12). Бундан башга, Јеһова сарфатлы дул гадынын Илјас пејғәмбәрә чәкинмәдән дедији сөзләриндән дә инҹимәди. Бу гадынын јеҝанә өвладыны итирдијинә ҝөрә кәдәр ичиндә олдуғуну Аллаһ баша дүшүрдү (1 Пад. 17:8-24).
4, 5. Јеһова Авимелекә неҹә хејирхаһлыг ҝөстәрди?
4 Јеһова үрәкләрә диггәтлә бахдығы үчүн һәтта Она иман етмәјәнләрә дә хејирхаһлыг ҝөстәрир. Ҝәлин ҝөрәк Јеһова филиштлиләрин Ҝерар шәһәринин падшаһы Авимелеклә неҹә давранды. Ибраһимлә Саранын әр-арвад олдуғундан бихәбәр олан Авимелек арвады олсун дејә Сараны јанына ҝәтиртди. Лакин Авимелек Сараја тохунмаздан өнҹә Јеһова јухуда она деди: «Мән дә билирәм ки, сән буну садәдилликлә етдин. Буна ҝөрә дә сәни она тохунмаға гојмајараг Мәнә гаршы ҝүнаһ етмәкдән сахладым. Инди исә гадыны әринә гајтар, чүнки о, пејғәмбәрдир. Сәнин үчүн дуа едәр, саламат галарсан» (Јар. 20:1-7).
5 Әлбәттә, Јеһова бүтләрә ибадәт едән Авимелеклә сәрт даврана биләрди. Анҹаг Аллаһ бу һалда онун дүрүст даврандығына фикир верди. Јеһова буну нәзәрә алараг падшаһа бағышланмаг вә ‘саламат галмаг’ үчүн нә етмәли олдуғуну деди. Мәҝәр белә Аллаһа сән дә ибадәт етмәк истәмәздинми?
6. Иса Атасыны нәдә тәглид едирди?
6 Иса шаҝирдләринин јахшы ҹәһәтинә фикир вермәклә вә онларын сәһвләрини бағышламаға һазыр олмагла Атасыны мүкәммәл тәглид едирди (Марк 10:35-45; 14:66-72; Лука 22:31, 32; Јәһ. 15:15). Исанын бу мүнасибәти Јәһја 3:17 ајәсиндәки сөзләри илә һәмаһәнҝдир: «Аллаһ Өз Оғлуну дүнјаја она ҝөрә ҝөндәрмәмишдир ки, О, дүнјаја һөкм етсин. Амма она ҝөрә ҝөндәрмишдир ки, дүнја Онун васитәсилә хилас едилсин». Бәли, Јеһованын вә Исанын бизә олан мәһәббәти дәрин вә сөнмәздир. Бу ондан ҝөрүнүр ки, онлар бизим һәјата наил олмағымызы истәјирләр (Әјј. 14:15). Мәһәббәтин бу ҹүр тәзаһүрүндән Јеһованын бизә нә үчүн диггәтлә бахдығыны, неҹә мүнасибәт ҝөстәрдијини вә ҝөрдүкләринә әсасән неҹә даврандығыны ајдын баша дүшүрүк. (1 Јәһја 4:8, 19 ајәләрини оху.)
Јеһова мәһәббәтлә бизи мүшаһидә едир
7. Јеһова бизи һансы мәгсәдлә мүшаһидә едир?
7 Јеһованын бир балаҹа сәһвимизә ҝөрә бизи ҹәзаландырмаг мәгсәди илә ҝөјдән бир полис кими мүшаһидә етмәсини дүшүнмәк неҹә дә јанлышдыр! Шејтан бизи иттиһам едир вә өз мәнфәәтимизи ҝүддүјүмүзү иддиа едир (Вәһј 12:10). Һәтта башгаларынын ајағына пис нијјәтләр јазыр (Әјј. 1:9-11; 2:4, 5). Аллаһ һаггында мәзмурчу демишди: «Ја Рәбб, бизим тәгсирләримизи сијаһыја алсајдын, еј Худавәнд, ким бунун гаршысында дајана биләр?» (Мәз. 130:3). Әлбәттә ки, һеч ким! (Ваиз 7:20). Јеһова, севимли ушагларыны зәрәрдән горумаг истәјән гајғыкеш валидејн кими, бизи мәрһәмәт вә хејирхаһлыгла мүшаһидә едир. Гејри-камил вә зәиф олдуғумузу бизә тез-тез хатырлатмасы сајәсиндә өзүмүзү фәлакәтләрдән горуја билирик (Мәз. 103:10-14; Мат. 26:41).
8. Јеһова Өз хидмәтчиләринә тәлим-тәрбијәни вә ҝөстәришләри неҹә чатдырыр?
8 Аллаһын мәһәббәти һәм Мүгәддәс Јазылар, һәм дә «садиг вә ағыллы гул»ун һазырладығы руһани гида васитәсилә тәгдим етдији тәлим-тәрбијә вә ҝөстәришләрдә ифадә олунур (Мат. 24:45; Ибр. 12:5, 6). Һәмчинин Јеһова мәсиһчи јығынҹағы вә «инсанлар тимсалында һәдијјәләр» васитәсилә дә бизә көмәк едир (Ефес. 4:8, ЈД). Бундан савајы, Јеһова бизим Онун бир ата кими вердији тәлиминә неҹә һај вермәјимизә диггәт јетирир вә әлавә көмәк ҝөстәрир. Мәзмур 32:8 ајәсиндә дејилир: «Сәнә тәлим верәҹәјәм, ҝедәҹәјин јолу өјрәдәҹәјәм. Нәсиһәт верәҹәјәм, ҝөзүм сәнин үстүндә олаҹаг». Буна ҝөрә дә Јеһоваја һәр заман гулаг асмағымыз неҹә дә ваҹибдир! Јеһованы севән Мүәллимимиз вә Атамыз кими гәбул едәрәк Онун гаршысында тәвазөкар олмалыјыг. (Матта 18:4 ајәсини охујун.)
9. Биз һансы хүсусијјәтләрдән гачынмалыјыг вә нә үчүн?
9 Ҝәлин һеч заман јол вермәјәк ки, тәкәббүр, имансызлыг вә ја «ҝүнаһын һијләси» бизи «дашүрәкли» етсин (Ибр. 3:13, И–93; Јаг. 4:6). Адәтән белә хүсусијјәтләр инсан өзүндә јанлыш фикирләр вә арзулар инкишаф етдирәндә јараныр. Нәтиҹәдә о, Мүгәддәс Китабдан верилән мүнасиб мәсләһәтләри белә рәдд едә биләр. Ән дәһшәтлиси одур ки, белә инсан мүнасибәтини дәјишмәдији вә јолундан дөнмәдији тәгдирдә Аллаһын дүшмәнинә чеврилә биләр. Бу исә һәгигәтән аҹынаҹаглы вәзијјәтдир! (Сүл. мәс. 1:22-31). Ҝәлин Адәмлә Һәвванын илк өвлады Габилин нүмунәсинә нәзәр салаг.
Јеһова һәр шеји ҝөрүр вә буна мүвафиг давраныр
10. Јеһова нәјә ҝөрә Габилин тәгдимини гәбул етмәди вә о буна неҹә јанашды?
10 Габил вә Һабил Јеһоваја тәгдимләр ҝәтирәндә Ону јалныз онларын әнамы јох, һәмчинин нијјәтләри дә марагландырырды. Гардашларын үрәкләрини ҝөрән Јеһова Һабилин иманла ҝәтирдији тәгдимини гәбул етди, Габилин тәгдимини исә гәбул етмәди, чүнки онун тәгдиминдә иманынын зәифлији бүрузә олунурду (Јар. 4:4, 5; Ибр. 11:4). О бу һадисәдән ибрәт алмаг вә өз мүнасибәтини дәјишмәк әвәзинә, гардашына бәрк гәзәбләнди (Јар. 4:6).
11. Габил үрәјинин һијләҝәр олдуғуну неҹә ҝөстәрди вә биз бундан нә өјрәнирик?
11 Јеһова Габилин мүнасибәтинин тәһлүкәли олдуғуну ҝөрүб, она нәзакәтлә деди: «Әҝәр јахшы иш ҝөрүрсәнсә, Мән гәбул етмәрәмми?» Әфсуслар олсун ки, Габил өз Јараданынын мәсләһәтинә мәһәл гојмады вә гардашыны өлдүрдү. Онун үрәјинин пис олдуғу даһа сонра да — Аллаһын: «Гардашын Һабил һарададыр?» — суалына: «Билмирәм, мәҝәр мән гардашымын кешикчисијәм?» — дејә һөрмәтсизҹәсинә вә сәрт вердији ҹавабындан ҝөрүнүр (Јар. 4:7-9). Үрәк неҹә дә һијләҝәр ола вә һәтта Аллаһын бирбаша вердији мәсләһәти инкар едә биләрмиш! (Јер. 17:9). Буна ҝөрә, ҝәлин белә һадисәләрдән ибрәт алаг вә јанлыш фикир вә истәкләри тез рәдд едәк. (Јагуб 1:14, 15 ајәләрини оху.) Әҝәр бизә Мүгәддәс Јазылардан мәсләһәт верирләрсә, ҝәлин она ҝөрә миннәтдар олаг вә буну Јеһованын мәһәббәтинин тәзаһүрү кими гәбул едәк.
Ҝизли галан ҝүнаһ јохдур
12. Јеһованын ҝүнаһкара гаршы мүнасибәтиндә нә әкс олунур?
12 Бәзиләри дүшүнә биләрләр ки, әҝәр онларын дүзҝүн олмајан һәрәкәтләрини һеч ким ҝөрмүрсә, ҹәзасыз галаҹаглар (Мәз. 19:12). Әслиндә, ҝизли ҝүнаһ дејилән шеј јохдур. «Онун гаршысында ҝизли галан мәхлуг јохдур, әксинә Онун ҝөзләри өнүндә һәр шеј чылпаг вә ачыгдыр. Она һесабат верәҹәјик» (Ибр. 4:13). Јеһова ән дәрин мотивләримизи диггәтлә арашдыран Һакимдир вә ҝүнаһкара гаршы мүнасибәтиндә мүкәммәл әдаләт әкс олунур. О, ‘рәһмли вә лүтфкар, һәдсиз сәбирли, бол мәһәббәтли вә сәдагәтли’ Аллаһдыр. Төвбә етмәјәнләрә ҝәлдикдә исә, инсанлар ‘гәсдән ҝүнаһ ишләдәндә’, јахуд һијләҝәрлијә вә фитнәкарлыға әл атанда онлары ‘ҹәзасыз гојмур’ (Чых. 34:6, 7; Ибр. 10:26). Бунун доғрудан да белә олдуғуну Јеһованын Акан, Һананја вә Шапира илә неҹә даврандығындан ҝөрә биләрик.
13. Аканын сәһв дүшүнҹәси онун пис давранышына неҹә сәбәб олду?
13 Акан бирбаша Аллаһын ҝөстәришини позараг Јерихо шәһәриндән олан гәнимәти мәнимсәди вә ола билсин, аиләси илә әлбир олуб чадырында ҝизләтди. Ҝүнаһы үзә чыханда Акан: ‘Мән Исраилин Аллаһы Рәббә гаршы ҝүнаһ етдим’, — дејәрәк һәрәкәтин ҹиддилијини анладығыны ҝөстәрди (Јешуа 7:20). Габил кими, Акан үрәјиндә пислик јетишдирди. Аканын һадисәсиндә әсас амил тамаһкарлыг иди вә бу онун оғру олмасына сәбәб олду. Јериходан әлдә едилән гәнимәт Јеһоваја мәхсус олдуғу үчүн Акан, әслиндә, Аллаһдан оғурлады вә бу она вә аиләсинә һәјатлары баһасына баша ҝәлди (Јешуа 7:25).
14, 15. Аллаһ нәјә ҝөрә Һананја вә Шапираны ҹәзаландырды вә биз бундан нә өјрәнирик?
14 Һананја вә онун арвады Шапира Јерусәлимдәки еркән мәсиһчи јығынҹағынын үзвү идиләр. Ерамызын 33-ҹү илиндәки Пентикост бајрамындан сонра узаг јердән ҝәлиб Јерусәлимдә галан јени мәсиһчиләрин физики тәләбатларыны өдәмәк үчүн јығынҹаг пул јығмаг гәрарына ҝәлди. Онларын еһтијаҹлары көнүллү ианәләрин һесабына өдәнилирди. Һананја өз тарласыны сатыб пулунун бир гисмини ианә етди. Амма о вә арвады өзләрини елә апардылар ки, ҝуја пулун һамысыны ианә верибләр. Шүбһә јохдур ки, бу әр-арвад јығынҹагда хүсуси һөрмәт газанмаг истәјирди. Лакин онларын һәрәкәти фитнәкарлыг иди. Јеһова мөҹүзәли тәрздә бу јаланы һәвари Петерә ачды, о да Һананјанын јаланыны ифша етди. Елә һәмин ан Һананја јыхылыб өлдү. Чох кечмәмиш Шапира да өлдү (Һәв. иш. 5:1-11).
15 Бу әр-арвад ани зәифлијин гурбаны олмады. Онлар һәр шеји әввәлҹәдән өлчүб-бичдиләр вә һәвариләри алдатмаға ҹәһд едәрәк јалана әл атдылар. Ән дәһшәтлиси исә, онлар ‘мүгәддәс руһа вә Аллаһа јалан сөјләдиләр’. Јеһова јығынҹағы икиүзлүлүкдән горумаг үчүн онун кешијиндә дурмаға һазыр олдуғуну ачыг-ајдын ҝөстәрир. Доғрудан да, «јашајан Аллаһын әлләринә дүшмәк дәһшәтлидир!» (Ибр. 10:31).
Һәмишә нөгсансызлығыны гору
16. а) Шејтан Аллаһын халгыны јолдан чыхармаға неҹә чалышыр? б) Сизин әразидә јашајан инсанлары јолдан чыхармаг үчүн Иблис һансы үсуллара әл атыр?
16 Шејтан бизи јолдан чыхармаг вә Јеһованын лүтфүнү итирмәјимиз үчүн әлиндән ҝәләни едир (Вәһј 12:12, 17). Иблисин пис нијјәтләри әхлагсызлығын вә зоракылығын баш алыб ҝетдији бу дүнјада ачыг-ајдын әкс олунур. Инди порнографијаны компүтер вә диҝәр техника васитәсилә асанлыгла әлдә етмәк мүмкүндүр. Ҝәлин һеч вахт Шејтанын һүҹумларына тәслим олмајаг. Әксинә, «камиллик јолунда мүдрик олаҹағам... Тәмиз үрәклә евимдә јашајаҹағам» сөзләрини јазан мәзмурчу Давудун әһвал-руһијјәсини тәглид едәк (Мәз. 101:2).
17. а) Нәјә ҝөрә Јеһова ҝүнаһлары әввәл-ахыр ашкара чыхарыр? б) Биз нә етмәјә гәти гәрарлы олмалыјыг?
17 Бу ҝүн Јеһова ҹидди ҝүнаһын вә һијләҝәрлијин үстүнү кечмишдә етдији кими мөҹүзәли шәкилдә ачмыр. Амма О, һәр шеји ҝөрүр вә өз вахтында вә мүнасиб үсулла ҝизлини ашкара чыхарыр. Павел демишди: «Бәзи инсанларын ҝүнаһлары ашкардыр вә онлардан габаг мәһкәмәјә ҝедирләр, диҝәрләринин ҝүнаһлары исә сонрадан бәлли олур» (1 Тим. 5:24). Јеһованын пис әмәлләри ашкара чыхармасынын әсас сәбәби мәһәббәтдир. О, јығынҹағы севир вә онун тәмизлијини горумаг истәјир. Үстәлик, О, ҝүнаһ ишләдән, амма һәгигәтән төвбә едәнләрә мәрһәмәт ҝөстәрир (Сүл. мәс. 28:13). Буна ҝөрә дә, ҝәлин Аллаһа садиг галмаға вә өзүмүзү бүтүн позуҹу тәсирләрдән горумаға чалышаг.
Үрәјини гору
18. Падшаһ Давуд оғлунда Аллаһа гаршы һансы һиссләрин олмасыны истәјирди?
18 Давуд падшаһ оғлу Сүлејмана деди: «Аллаһыны таны, сәмими гәлбдән вә һәвәслә Она гуллуг ет, чүнки Рәбб бүтүн үрәкләри сынајыр вә ағылларын бүтүн истәкләрини билир» (1 Салн. 28:9). Давуд истәјирди ки, оғлу Аллаһа инанмагла кифајәтләнмәсин. О, Сүлејманын Јеһоваја Өз хидмәтчиләри илә дәриндән марагландығына ҝөрә миннәтдар олмасыны истәјирди. Сән дә буна ҝөрә Јеһоваја миннәтдарсанмы?
19, 20. Мәзмур 19:7-11 ајәләринә әсасән, Јеһоваја јахынлашмаға Давуда нә көмәк етди вә биз ону неҹә тәглид едә биләрик?
19 Јеһова Онунла јахын мүнасибәтләринин олмасыны истәјәнләрин Она јахынлашаҹагларыны вә Онун ҝөзәл хүсусијјәтләри һаггындакы билијин үрәкләрини исидәҹәјини билир. Буна ҝөрә, Јеһова истәјир ки, биз Онунла вә ҝөзәл шәхсијјәти илә јахындан таныш олаг. Биз буну неҹә едирик? Онун Кәламыны өјрәнмәклә вә хејир-дуаларыны дадмагла (Сүл. мәс. 10:22; Јәһ. 14:9).
20 Сән Аллаһын Кәламыны һәр ҝүн миннәтдарлыгла вә дуа едәрәк охујурсанмы? Мүгәддәс Китаб принсипләри илә јашамағын фајдасыны ҝөрүрсәнми? (Мәзмур 19:7-11 ајәләрини оху.) Әҝәр беләдирсә, сәнин Јеһоваја иманын вә мәһәббәтин ҝет-ҝедә артаҹаг. О исә өз нөвбәсиндә сәнинлә әл-әлә ҝәзәрәк сәнә даһа јахын олаҹаг (Јешаја 42:6; Јаг. 4:8). Бәли, Јеһова сәни һәјата апаран дар јолда хејир-дуаландырараг вә руһани ҹәһәтдән мүдафиә едәрәк Өз мәһәббәтини сүбут едәҹәк (Мәз. 91:1, 2; Мат. 7:13, 14).
Неҹә ҹаваб верәрдиниз?
• Јеһова нәјә ҝөрә бизә диггәтлә бахыр?
• Нәјә ҝөрә бәзи инсанлар Аллаһа дүшмән олмушлар?
• Јеһованын бизим үчүн реал олдуғуну неҹә ҝөстәрә биләрик?
• Аллаһ гаршысында үрәјимизи неҹә горуја биләрик?
[4-ҹү сәһифәдәки шәкил]
Гајғыкеш валидејн кими, Јеһова бизи неҹә мүшаһидә едир?
[5-ҹи сәһифәдәки шәкил]
Һананјанын нүмунәсиндән һансы ибрәти алырыг?
[6-ҹы сәһифәдәки шәкил]
Јеһоваја сәмими-гәлбдән хидмәт етмәјә бизә нә көмәк едәҹәк?