Һамынын еһтијаҹ дујдуғу хош хәбәр

«[Хош хәбәр] иманы олан һәр кәсин... хиласа јетишә билмәси үчүн Аллаһын әлиндә ҝүҹлү бир васитәдир» (РОМ. 1:16).

1, 2. Нәјә ҝөрә сән «Аллаһын падшаһлығы һаггында хош хәбәри» тәблиғ едирсән вә чох вахт онун һансы јөнләриндән данышырсан?

«ХОШ ХӘБӘРИ һәр ҝүн инсанларла бөлүшмәк, һәгигәтән дә, севиндириҹидир!» Ола билсин, сән дә үрәјиндә нә вахтса белә фикирләшмисән вә ја бу сөзләри демисән. Јәгин ки, Јеһованын садиг хидмәтчиси кими, «Падшаһлыг һаггындакы бу хош хәбәр»и инсанлара чатдырмағын нә гәдәр ваҹиб олдуғуну дәрк едирсән. Бәлкә дә, Иса Мәсиһин бу барәдә сөјләдији пејғәмбәрлији әзбәр билирсән (Мат. 24:14).

² «Аллаһын падшаһлығы һаггында хош хәбәри» тәблиғ етмәклә сән Исанын башладығы иши давам етдирирсән. (Лука 4:43 ајәсини оху.) Јәгин, чох вахт тәблиғдә Аллаһын тезликлә бәшәријјәтин ишләринә гарышаҹағы, јәни «бөјүк мүсибәт» заманы јалан дини мәһв едәҹәји вә пислији тамамилә јер үзүндән силәҹәји һагда данышырсан (Мат. 24:21). Ола билсин, сән Аллаһын Падшаһлығынын јер үзүндә Ҹәннәти бәрпа едәҹәјини вә инсанларын сүлһ вә хошбәхтлик ичиндә јашајаҹагларыны да дејирсән. Әслинә галса, «Аллаһын падшаһлығы һаггында» хош хәбәр гәдимдә Ибраһимә бәјан едилмиш хош хәбәрин бир һиссәсидир. Аллаһ она демишди: «Бүтүн халглар сәнин васитәнлә хејир-дуа алаҹаг» (Галат. 3:8).

3. Һәвари Павелин ромалылара үнванладығы мәктубда «хош хәбәр» ифадәсини хүсусилә гејд етдији нәдән ҝөрүнүр?

³ Амма һәрдән елә олур ки, инсанларын еһтијаҹ дујдуғу хош хәбәри тәблиғ едәркән онун әсас һиссәсинә аз диггәт јетиририк. Һәвари Павел Ромадакы мәсиһчиләрә үнванладығы мәктубда «падшаһлыг» сөзүнү бир дәфә истифадә етдији һалда, «хош хәбәр» ифадәсини 12 дәфә ишләдир. (Ромалылара 14:17 ајәсини оху.) Павел бу мәктубда хош хәбәрин һансы һиссәсинә тез-тез истинад едир? Нәјә ҝөрә хош хәбәрин бу һиссәси бөјүк әһәмијјәт кәсб едир? «Аллаһын хош хәбәрини» башгалары илә бөлүшәркән нәјә ҝөрә буну јадда сахламалыјыг? (Марк 1:14; Ром. 15:16; 1 Салон. 2:2).

Ромадакы мәсиһчиләр нәји билмәли идиләр?

4. Илк дәфә Ромада һәбсдә оларкән Павел нәләр барәдә тәблиғ едирди?

⁴ Павел илк дәфә Ромада һәбсдә оларкән әсасән нә барәдә тәблиғ етмәсиндән биз чох шеј өјрәнә биләрик. Биз охујуруг ки, јәһудиләр Павелә баш чәкмәјә ҝәләндә о, 1) «Аллаһын падшаһлығы һаггында әтрафлы шәһадәт верди» вә 2) «Иса һаггында данылмаз сүбутлар ҝәтириб... һәр шеји онлара изаһ етди». Павелин сөзләри онлара неҹә тәсир етди? «Бәзиләри дејиләнләрә инанды, бәзиләри исә инанмады». Павел бундан сонра да «јанына ҝәләнләри сәмими гәлбдән гәбул едир, онлара [1] Аллаһын падшаһлығы һаггында данышыр, [2] Ағамыз Иса Мәсиһ һаггында... тәлим верирди» (Һәв. иш. 28:17, 23—31). Тамамилә ајдындыр ки, Павел Аллаһын Падшаһлығы мөвзусуна бөјүк өнәм верирди. Лакин бундан башга, о, бу мөвзунун әсас һиссәси олан Исанын Аллаһын нијјәтиндәки ролуну вурғулајырды.

5. Павел ромалылара мәктубунда нәјин ваҹиблијини вурғулајыр?

⁵ Бүтүн инсанлар Иса һаггында билмәли вә она иман ҝәтирмәлидирләр. Бунун ваҹиблијини Павел ромалылара јаздығы мәктубда вурғулајыр. Мәктубун әввәлиндә о, «Оғул һаггындакы хош хәбәр уғрунда ҹанла-башла чалышараг» ибадәт етдији Аллаһ һаггында јазыр вә сонра әлавә едир: «Мән хош хәбәри бәјан етмәкдән утанмырам. Чүнки о, иманы олан һәр кәсин... хиласа јетишә билмәси үчүн Аллаһын әлиндә ҝүҹлү бир васитәдир». Бунда сонра о, тәблиғ етдији хош хәбәрә әсасән, Аллаһын «инсанларын ҝизли ишләрини Мәсиһ Иса васитәсилә» мүһакимә едәҹәји вахтдан данышыр вә дејир: «Мән Мәсиһ һаггындакы хош хәбәри Јерусәлимдән та Иллирикә гәдәр олан бүтүн әразидә тәблиғ етдим»a (Ром. 1:9, 16; 2:16; 15:19). Сәнҹә, нәјә ҝөрә Павел Ромадакы мәсиһчиләрә јаздығы мәктубда әсас фикри Иса Мәсиһә јөнәлдир?

6, 7. Ромада јығынҹағын јаранмасы вә онун үзвләри барәдә һансы мәлуматымыз вар?

⁶ Ромадакы јығынҹағын неҹә јарандығыны биз дәгиг билмирик. Лакин бу барәдә бир нечә еһтимал вар. Ола билсин, хош хәбәри Ромаја ерамызын 33-ҹү илиндә Әллинҹи ҝүн бајрамында иштирак едән јәһудиләр, јахуд прозелитләр ҝәтирмишдиләр (Һәв. иш. 2:10). Ја да бу, тиҹарәтлә мәшғул олан вә ја сәјаһәт едән мәсиһчиләр ола биләрди. Һәр неҹә олурса-олсун, Павел тәхминән ерамызын 56-ҹы илиндә бу мәктубу јазанда артыг узун мүддәт иди ки, Ромада мәсиһчи јығынҹағы фәалијјәт ҝөстәрирди (Ром. 1:8). Бу јығынҹағын үзвләри һансы милләтләрә мәнсуб идиләр?

⁷ Онларын бәзиләри јәһуди иди. Мәсәлән, Павел Андрониклә Јуниасы саламлајаркән онлары «гоһум» адландырды. Ҝөрүнүр, Павел онларын да јәһуди олдуғуну демәк истәјирди. Чадыр дүзәлтмәклә мәшғул олан Акила вә онун һәјат јолдашы Прискилла да јәһуди идиләр (Ром. 4:1; 9:3, 4; 16:3, 7; Һәв. иш. 18:2). Амма ҝөрүнүр, Павелин салам ҝөндәрдији баҹы-гардашларын әксәријјәти башга милләтләрин нүмајәндәләри иди. Ола билсин, бәзиләри «императорун ев әһли»нә мәнсуб иди, јәни императорун гуллары вә ја ади мәмурлар иди (Филип. 4:22; Ром. 1:6; 11:13).

8. Ромадакы мәсиһчиләр һансы аҹынаҹаглы вәзијјәтдә идиләр?

⁸ Миллијјәтиндән асылы олмајараг, Ромадакы бүтүн мәсиһчиләр, елә бизим кими, аҹынаҹаглы вәзијјәтдә идиләр. Павел буну белә изаһ едир: «Һамы ҝүнаһ ишләди вә Аллаһын шөһрәтини әкс етдирә билмәди» (Ром. 3:23). Ајдын мәсәләдир ки, Павелин мәктубуну охујан һәр кәсдән нәсә етмәк тәләб олунурду. Онлар ҝүнаһлы олдугларыны гәбул етмәли вә Аллаһын онлары бу вәзијјәтдән гуртармаг үчүн ҝөрдүјү тәдбирә иман ҝәтирмәли идиләр.

Ҝүнаһлы олдуғумузу гәбул етмәлијик

9. Павелин сөзләринә әсасән, хош хәбәрә иман едәнләр нәјә наил ола биләрләр?

⁹ Мәктубунун әввәлиндә Павел һаггында дөнә-дөнә данышдығы хош хәбәрин ҝәтирдији ҝөзәл нәтиҹәдән сөз ачыр. О дејир: «Мән хош хәбәри бәјан етмәкдән утанмырам. Чүнки о, иманы олан һәр кәсин, әввәлҹә јәһудинин, сонра јунанын хиласа јетишә билмәси үчүн Аллаһын әлиндә ҝүҹлү бир васитәдир». Бәли, хиласа јетишмәк мүмкүн иди. Лакин бунун үчүн иман тәләб олунурду. Иманын нә гәдәр ваҹиб олдуғуну Павелин Һабаггуг 2:4 ајәсиндән ситат ҝәтирдији сөзләрдән ҝөрүрүк: «Салеһ иманы сајәсиндә јашајаҹаг» (Ром. 1:16, 17; Галат. 3:11; Ибр. 10:38). Бәс хиласа апаран хош хәбәрлә һамынын ҝүнаһлы олмасы арасында һансы әлагә вар?

10, 11. Нәјә ҝөрә Ромалылара 3:23 ајәсиндә јазылан сөзләр бәзиләринә ади, бәзиләринә исә гәрибә ҝәлир?

¹⁰ Һәјатыны хилас едә биләҹәк иман инкишаф етдирмәздән өнҹә инсан ҝүнаһлы олдуғуну гәбул етмәлидир. Ушаглыгдан Аллаһа инанан вә Мүгәддәс Китаб һагда аздан-чохдан мәлуматы оланлар үчүн бу, гејри-ади фикир дејил. (Ваиз 7:20 ајәсини оху.) Онлар разы олсалар да, олмасалар да, ән азындан, Павелин «һамы ҝүнаһ ишләди» дејәркән нәји нәзәрдә тутдуғуну баша дүшүрләр (Ром. 3:23). Анҹаг һәрдән хидмәтдә биз бу сөзләрин мәнасыны анламајан инсанларла да гаршылашырыг.

¹¹ Бәзи өлкәләрдә инсанлар ҝүнаһлы доғулдугларындан, јәни ҝүнаһы мирас алдыгларындан бихәбәрдирләр. Ола билсин, онлар бәзән сәһвләрә јол вердикләрини, хасијјәтләриндә һансыса хошаҝәлмәз ҹәһәтләрин олдуғуну вә нә вахтса пис иш ҝөрдүкләрини бојунларына алырлар. Онлар башгаларынын да белә вәзијјәтдә олдуғуну ҝөрүрләр. Бунунла белә, бөјүдүкләри мүһит уҹбатындан онлар һәм өзләринин, һәм дә башгаларынын нәјә ҝөрә белә вәзијјәтдә олдугларыны баша дүшә билмирләр. Һәтта бәзи дилләрдә «ҝүнаһлы» сөзү алтында инсанын ҹинајәткар олдуғу вә ја ән азы, онун һансыса гајданы поздуғу нәзәрдә тутулур. Ајдын мәсәләдир ки, белә шәраитдә тәрбијә алмыш инсан үчүн Павелин нәзәрдә тутдуғу мәнада өзүнү ҝүнаһлы һесаб етмәк чәтин ола биләр.

12. Нәјә ҝөрә чохлары һамынын ҝүнаһлы олдуғуна инанмыр?

¹² Һәтта Христиан өлкәләриндә јашајан бир чох инсанлар белә ҝүнаһлы олдугларыны гәбул етмирләр. Нәјә ҝөрә? Онлар вахташыры олараг килсәјә ҝетсәләр дә, Мүгәддәс Китабда Адәмлә Һәвва барәдә јазыланлары нағыл вә әфсанә һесаб едирләр. Диҝәрләри исә инсанларын Аллаһын варлығына инанмадығы вә ја буна шүбһә илә јанашдығы мүһитдә бөјүмүшләр. Бу сәбәбдән онлар Аллаһын инсанлар үчүн әхлаг нормалары тәсис етдијини вә бу нормалары позмағын ҝүнаһ олдуғуну баша дүшмүрләр. Мүәјјән мәнада онлар, Павелин биринҹи әсрдә јашајан бәзи инсанлар һагда дедији кими, «бу дүнјада үмидсиз вә Аллаһсыз»дырлар (Ефес. 2:12).

13, 14. а) Аллаһын мөвҹудлуғуна инанмајан вә ҝүнаһлы олдугларыны гәбул етмәјән инсанлара нәјә ҝөрә «һагг газандырмаг» мүмкүн дејил? б) Имансызлыг чохларыны нәјә тәһрик едиб?

¹³ Лакин инсанларын бөјүдүјү мүһит, бу ҝүн олдуғу кими, о вахт да онлара һагг газандырмырды. Нәјә ҝөрә? Павел бунун ики сәбәбини ачыглајыр. Биринҹиси, хилгәт Јараданын мөвҹудлуғуна шаһидлик едир. (Ромалылара 1:19, 20 ајәләрини оху.) Бу, Павелин Ромада оларкән ибраниләрә јаздығы сөзләрә ујғун ҝәлир: «Һәр бир ев кимсә тәрәфиндән тикилир, һәр шеји тикән исә Аллаһдыр» (Ибр. 3:4). Павелин јүрүтдүјү мүлаһизә Каинатын бир Шәхс тәрәфиндән јарадылдығына ишарә едир.

¹⁴ Буна ҝөрә дә Павел әсаслы олараг билдирир ки, гәдимдә јашајан исраиллиләр дә дахил олмагла, ҹансыз бүтләрә сәҹдә едән инсанларын һеч биринә «һагг газандырмаг» мүмкүн дејил. Буну гејри-тәбии ҹинси әлагәјә ҝирәнләрә дә шамил етмәк олар (Ром. 1:22—27). Буна ҝөрә дә Павел тамамилә һаглы олараг белә бир нәтиҹәјә ҝәлмишди ки, «јәһудиләр дә, јунанлар да ҝүнаһын әсарәти алтындадыр»лар (Ром. 3:9).

Шаһидлик едән виҹдан

15. Бүтүн инсанларда нә вар вә о, неҹә фәалијјәт ҝөстәрир?

¹⁵ Инсанлар ҝүнаһлы олдугларыны вә бу аҹынаҹаглы вәзијјәтдән чыхыш јолуна еһтијаҹ дујдугларыны нәјә ҝөрә гәбул етмәлидирләр? «Ромалылара мәктуб»да бунун икинҹи сәбәби ачыгланыр. Павел Аллаһын гәдим Исраил халгына вердији ганунлар барәдә јазыр: «Ганунун табелијиндә олуб ҝүнаһ ишләјәнләрин һамысы Ганун васитәсилә мәһкум едиләҹәкләр» (Ром. 2:12). Сөзүнә давам едәрәк о гејд едир ки, Аллаһын бу ганунларындан хәбәри олмајан башга милләтләрдән вә халглардан олан инсанлар чох вахт «Ганунун тәләбләринә сөвги-тәбии» әмәл едирләр. Нәјә ҝөрә белә халгларда үмумиликдә јахын гоһумлар арасында ҹинси әлагә, гатиллик вә оғурлуг гадаған олунуб? Чүнки Павелин јаздығы кими, онларда виҹдан вар. (Ромалылара 2:14, 15 ајәләрини оху.)

16. Нәјә ҝөрә виҹданын олмасы инсанын онун сәсинә гулаг асаҹағына зәманәт вермир?

¹⁶ Бунунла белә, јәгин, фикир вермисән ки, дахили шаһид кими фәалијјәт ҝөстәрән виҹданын олмасы инсанын онун сәсинә гулаг асаҹағына зәманәт вермир. Гәдим Исраил халгы буна бир сүбутдур. Аллаһ онлара һәм виҹдан, һәм дә оғурлуғу вә әхлагсызлығы гадаған едән конкрет ганунлар вермишди. Анҹаг исраиллиләр дәфәләрлә һәм виҹданларына гаршы чыхмыш, һәм дә Јеһованын Ганунуну позмушдулар (Ром. 2:21—23). Онлар икигат ҝүнаһлы идиләр, буна ҝөрә дә Аллаһын нормаларына вә ирадәсинә мүвафиг дејилдиләр. Бу, онларын Јараданлары илә мүнасибәтләринә ҹидди зәрәр вурмушду (Лев. 19:11; 20:10; Ром. 3:20).

17. «Ромалылара мәктуб» бизә неҹә тәсәлли верир?

¹⁷ «Ромалылара мәктуб»да јазыланлары арашдырдыгдан сонра биздә елә тәәссүрат јарана биләр ки, биз дә дахил олмагла, бүтүн бәшәријјәтин Күлли-Ихтијар Аллаһ гаршысындакы вәзијјәти чыхылмаздыр. Амма Павел сөзүнү бу јердә битирмир. О, Мәзмур 32:1, 2 ајәләриндә јазылан Давудун сөзләрини ситат ҝәтирир: «Тәгсирләри бағышланмыш вә ҝүнаһлары әфв едилмиш адамлар нә хошбәхтдирләр! Ҝүнаһы Јеһова тәрәфиндән һесаба алынмајан инсан нә хошбәхтдир!» (Ром. 4:7, 8). Бәли, ҝүнаһларымызын бағышланмасы үчүн Аллаһ гануни әсас тәгдим едиб.

Хош хәбәрин әсас һиссәси — Иса Мәсиһ

18, 19. а) Павел Ромадакы мәсиһчиләрә јаздығы мәктубда хош хәбәрин һансы һиссәсини вурғулајыр? б) Падшаһлығын ҝәтирәҹәји хејир-дуалары дадмаг үчүн биз нәји гәбул етмәлијик?

¹⁸ Бизи хилас етмәк үчүн Јеһованын ҝөрдүјү тәдбир һагда дүшүнәндә, јәгин ки, үрәјимиздән: «Бу, һәгигәтән дә, хош хәбәрдир!» — сөзләрини демәк кечир. Инди исә ҝәлин Павелин бу мәктубда дәфәләрлә гејд етдији хош хәбәрин ваҹиб һиссәсинә јенидән нәзәр салаг. Јухарыда гејд олундуғу кими, Павел јазмышды: «Мән хош хәбәри бәјан етмәкдән утанмырам. Чүнки о, иманы олан һәр кәсин... хиласа јетишә билмәси үчүн Аллаһын әлиндә ҝүҹлү бир васитәдир» (Ром. 1:15, 16).

¹⁹ Исанын Аллаһын нијјәтиндәки ролу бу хош хәбәрин әсасыны тәшкил едир. Павел јазыр ки, тәблиғ етдији хош хәбәрә әсасән, Аллаһын «инсанларын ҝизли ишләрини Мәсиһ Иса васитәсилә» мүһакимә едәҹәји вахты сәбирсизликлә ҝөзләјир (Ром. 2:16). Бунунла о, «Мәсиһин вә Аллаһын» Падшаһлығынын вә ја Аллаһын бу Падшаһлыг васитәсилә едәҹәји ишләрин ваҹиблијини азалтмаг истәмирди (Ефес. 5:5). О садәҹә ҝөстәрди ки, әбәди јашамаг вә Аллаһын Падшаһлығынын ҝәтирәҹәји хејир-дуалары дадмаг үчүн биз, биринҹиси, Аллаһын ҝөзүндә ҝүнаһлы олдуғумузу, икинҹиси, ҝүнаһларымызын бағышланмасы үчүн Иса Мәсиһә иман етмәјин ваҹиблијини гәбул етмәлијик. Инсан Аллаһын нијјәтинин бу јөнләрини баша дүшүб онлары гәбул едәндә, о ҹүмләдән бунун она һансы үмиди вердијини анлајанда там әсаслы олараг: «Бах, бу, һәгигәтән дә, хош хәбәрдир!» — дејә нида едәҹәк.

20, 21. Нәјә ҝөрә тәблиғ едәркән «Ромалылара мәктуб»да хош хәбәрин тез-тез вурғуландығы һиссәни јадда сахламалыјыг вә бу, һансы хејир-дуалары ҝәтирир?

²⁰ Тәблиғ едәркән биз хош хәбәрин бу һиссәсини јадда сахламалыјыг. Исаны нәзәрдә тутараг Павел Јешајанын нөвбәти сөзләрини ситат ҝәтирир: «Иманыны онун үзәриндә гуран һеч вахт пешман олмајаҹаг» (Ром. 10:11; Јешаја 28:16). Мүгәддәс Китабда ҝүнаһ һаггында дејиләнләр барәдә аз да олса мәлуматы олан инсанлара, ола билсин, Иса һаггында олан ваҹиб хәбәр танышдыр. Диҝәрләри үчүн исә бу хәбәр јени ола биләр; ола билсин, онларын мәдәнијјәтиндә бу мәлум дејил вә ја инсанларын чоху буна инанмыр. Белә инсанлар Аллаһа инанмаға вә Мүгәддәс Јазылара етибар етмәјә башлајанда биз ҝәрәк Исанын ролуну онлара изаһ едәк. Нөвбәти мәгаләдә «Ромалылара мәктуб»ун 5-ҹи фәслинин хош хәбәрин бу һиссәсини неҹә ачыгладығыны арашдыраҹағыг. Орадакы фикирләр хидмәтин үчүн фајдалы ола биләр.

²¹ «Ромалылара мәктуб»да тез-тез хатырланан хош хәбәрин «иманы олан һәр кәсин... хиласа јетишә билмәси үчүн» Аллаһын әлиндә ҝүҹлү бир васитә олдуғуну сәмими-гәлбли инсанлара баша дүшмәјә көмәк етмәк неҹә дә бөјүк хејир-дуалар ҝәтирир! (Ром. 1:16). Һәмчинин биз Павелин Ромалылара 10:15 ајәсиндә ситат ҝәтирдији сөзләрә башгаларынын да шәрик олдуғуну ҝөрәҹәјик: «Јахшы шејләр һаггында хош хәбәри бәјан едәнләрин ајаглары нә ҝөзәлдир!» (Јешаја 52:7).

[Һашијә]

Јадыныздадырмы?

• «Ромалылара мәктуб»да хош хәбәрин һансы һиссәси вурғуланыр?

• Биз инсанлара нәләри баша дүшмәјә көмәк етмәлијик?

• «Мәсиһ һаггындакы хош хәбәр»ин бизә вә башгаларына хејир-дуа ҝәтирмәси үчүн нә етмәлијик?

[8 сәһифәдәки шәкил]

«Ромалылара мәктуб»да һаггында данышылан хош хәбәр Исанын Аллаһын нијјәтиндәки ваҹиб ролуну вурғулајыр

[9 сәһифәдәки шәкил]

Биз һамымыз өлүмлә нәтиҹәләнән гүсуру — ҝүнаһы мирас алмышыг!